ଚ୍ୟାଲେଞ୍ଜ କରିଥିଲେ, ଏବେ ଗିରଫ କଲା ନବରଙ୍ଗପୁର ପୋଲିସ

1 min read

ନବରଙ୍ଗପୁର: ନବରଙ୍ଗପୁର ଜିଲ୍ଲା ପୋଲିସକୁ ବଡ଼ ସଫଳତା ମିଳିଛି । ଧରା ପଡ଼ିଲା ବହୁ ଚର୍ଚ୍ଚିତ ନବରଙ୍ଗପୁର ଜିଲ୍ଲା ଖାତୀଗୁଡ଼ା ହାଇସ୍କୁଲର କମ୍ପ୍ୟୁଟର ଚୋରି କରି ପୋଲିସକୁ ଚ୍ୟାଲେଞ୍ଜ ଦେଇଥିବା ଚୋର । ଖାତିଗୁଡ଼ା ସହରର ଦୁଇ ଭାଈ ଏହି ଘଟଣାରେ ଜଡ଼ିତ ଥିବା ନେଇ ନବରଙ୍ଗପୂର ଏଏସପି ସୂଚନା ଦେଇଛନ୍ତି । ରଥଯାତ୍ରା ଦିନ ଇନ୍ଦ୍ରାବତୀ ସହର ଅନ୍ତର୍ଗତ ଖାତିଗୁଡା ହାଇସ୍କୁଲରେ କମ୍ପ୍ୟୁଟର୍ , ପ୍ରିଣ୍ଟର ତଥା ଅନ୍ୟ କିଛି ଜିନିଷ ଚୋରୀ ହୋଇଥିଲା । ସମସ୍ତ ଜିନିଷ ସେମାନଙ୍କ ପାଖରୁ ଜବତ କରାଯାଇଛି ।

ଗତ ତିନି ତାରିଖରେ ଦୁର୍ବୁର୍ତ୍ତ ସ୍କୁଲରୁ ଚୋରି କରିବା ସହ ଲେଖିଥିଲେ  IT’S ME । ଧୁମ-4, କମିଙ୍ଗ୍ ଶୁନ୍  । “ସ୍କୁଲ ପିଲା, ଧରିପାରିଲେ ଧର ” । ଫିଲ୍ମ ଷ୍ଟାଇଲରେ ଚୋରି କରି ସ୍କୁଲ ବ୍ଲାକ ବୋର୍ଡରେ ଲେଖିଥିଲେ  ।  ବିଦ୍ୟାଳୟର ମୁଖ୍ୟ ଫାଟକର ଚାବି ଭାଙ୍ଗିବା ସହ ପ୍ରଧାନଶିକ୍ଷକଙ୍କ କକ୍ଷରେ ଥିବା ୨ଟି ତାଲା ଭାଙ୍ଗି କମ୍ପ୍ୟୁଟର, ପ୍ରିଣ୍ଟର୍, ଜେରକ୍ସ ମେସିନ୍, ଏବଂ ସାଉଣ୍ଡ ବକ୍ସ ଆଦି ଚୋରି ହୋଇଥିବା ଅଭିଯୋଗ ହୋଇଥିଲା  । ଏପରିକି ଦୁର୍ବୃତ୍ତମାନେ କମିଙ୍ଗ୍‌ ଶୁନ୍‌, ସ୍କୁଲ ପିଲା ଧରିପାରିଲେ ଧର ଏବଂ ଆମେ ପୁଣି ଆସିବୁ ବୋଲି ଲେଖି ଚାଲି ଯାଇଥ‌ିଲେ  । ଏଥିସହ ବ୍ଲାକ ବୋର୍ଡ ରେ କିଛି ମୋବାଇଲ ନମ୍ୱର୍ ଲେଖିଥିଲେ । ଯେଉଁଥିରେ ସ୍କୁଲ ଶିକ୍ଷକ ଙ୍କ ନମ୍ୱର୍ ମଧ୍ୟ ରହିଥିଲା । ରଥଯାତ୍ରା ପାଇଁ ସ୍କୁଲ ଛୁଟି ଥିବାରୁ ଶନିବାର ସକାଳେ ବିଦ୍ୟାଳୟ କର୍ତ୍ତୃପକ୍ଷ ବିଦ୍ୟାଳୟରେ ପହଞ୍ଚିବା ପରେ ବିଭିନ୍ନ ସାମଗ୍ରୀ ଚୋରି ହୋଇଥିବା ଜାଣିବାକୁ ପାଇବା ସହ ଚୋରମାନେ ବ୍ଲାକ୍‌ ବୋର୍ଡରେ ଲେଖିଥିବା ଲେଖାକୁ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ଏନେଇ ବିଦ୍ୟାଳୟ କର୍ତ୍ତୃପକ୍ଷ ଖାତିଗୁଡ଼ା ଥାନାରେ ଅଭିଯୋଗ କରିଥିଲେ  । ଅଭିଯୋଗ ପରେ ଖାତିଗୁଡା ପୋଲିସ ଅନୁସନ୍ଧାନ ଆରମ୍ଭ କରିଥିଲା । ସାଇଣ୍ଟିଫିକ ଟିମ ଓ ସନ୍ଧାନି କୁକୁର ସହାୟତାରେ ପୋଲିସ୍ ତଦନ୍ତ ଆରମ୍ଭ କରିଥିଲା । ଘଟଣାରେ ଇନ୍ଦ୍ରାବତୀ ସହରର ଦୁଇ ଭାଇ ଆଦିତ୍ୟ କୁମାର ଦାସ ଓ ଆନନ୍ଦ କୁମାର ଦାସଙ୍କୁ ଗିରଫ କରିଛି ପୋଲିସ ।