ମୟୁରଭଞ୍ଜ: ବାରିପଦାର ନିଶା ନିବାରଣ କେନ୍ଦ୍ରରେ ବର୍ବର ଘଟଣା। ଖବର ପ୍ରସାରଣ ପରେ ନିଶା ନିବାରଣ କେନ୍ଦ୍ରରେ ପୋଲିସର ତନାଘନା । ଦିବ୍ୟାଙ୍ଗଙ୍କୁ ମାଡ ମାରିଥିବା ‘ପ୍ରତିଜ୍ଞା’ ନିଶା ନିବାରଣ କେନ୍ଦ୍ର ମୁଖ୍ୟ ଅବନୀ ପତି ଓ ଅନ୍ତେବାସୀଙ୍କୁ ପଚରାଉଚରା କରିଛି ପୋଲିସ। ଅବନି ପତିକୁ ପୋଲିସ ଥାନାକୁ ନେବା ପରେ ଗିରଫ କରିଛି। ଘଟଣାରେ ସଂପୃକ୍ତ ଥିବା ପୀତବାସ ରାଉଳକୁ ମଧ୍ୟ କରଞ୍ଜିଆ ପୋଲିସ ସହାୟତାରେ ଗିରଫ କରାଯାଇଛି। ଆସନ୍ତାକାଲି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ।
ସେପଟେ ନିଶା ନିବାରଣ କେନ୍ଦ୍ରକୁ ଖାଲିକରିଛି ପୋଲିସ। ସେଠାରେ ଥିବା ୫୦ ଜଣ ଅନ୍ତେବାସୀଙ୍କୁ ସେମାନଙ୍କ ପରିବାରକୁ ହସ୍ତାନ୍ତର କରାଯିବ ବୋଲି ଏସଡିପିଓ କହିଛନ୍ତି । ବାରିପଦାର ପ୍ରତିଜ୍ଞା ନିଶା ନିବାରଣ କେନ୍ଦ୍ରରେ ଜଣେ ଦିବ୍ୟାଙ୍ଗ ଅନ୍ତେବାସୀଙ୍କୁ ପାଇପରେ ମାଡ଼ ମାରୁଥିଲେ କେନ୍ଦ୍ରର ମୁଖ୍ୟ ଅବନି ପତି। ଏହାସହ କେନ୍ଦ୍ରର ସହଯୋଗୀ ପୀତବାସ ରାଉଳ ତାଙ୍କୁ ପାଦ ଚାଟିବାକୁ ବାଧ୍ୟ କରିଥିବା ଭିଡ଼ିଓ ଭାଇରାଲ ହୋଇଥିଲା । ସମସ୍ତ ଅନ୍ତେବାସୀଙ୍କୁ ଭୟଭୀତ କରିବା ପାଇଁ ସର୍ବ ସମ୍ମୁଖରେ ପ୍ଲାଷ୍ଟିକ ପାଇପରେ ମାଡ଼ ମାରୁଥିଲେ କେନ୍ଦ୍ରର ମୁଖ୍ୟ। ବିଭିନ୍ନ ସମୟରେ ନିଶା ନିବାରଣ କେନ୍ଦ୍ରରେ ମାଡ ମରାଯାଉଥିବା ଅଭିଯୋଗ ଆସୁଥିଲା । ପୂର୍ବରୁ ମାଡ଼ ଭୟରେ ୪୯ ଜଣ ଅନ୍ତେବାସୀ ନିଶା ନିବାରଣ କେନ୍ଦ୍ର ଛାଡି ପଳାଇଥିଲେ। ଅବନୀଙ୍କ ନାଁରେ ପୂର୍ବରୁ ହତ୍ୟା ମାମଲା ସହିତ ଚାରିଟି ମାମଲା କୋର୍ଟରେ ବିଚାର ଚାଲିଛି । ସେପଟେ ଏଭଳି ନିଶା ନିବାରଣ କେନ୍ଦ୍ରକୁ ବନ୍ଦ କରିବାକୁ ସାଧାରଣରେ ଦାବି ହୋଇଛି।
