ନନ୍ଦିଘୋଷ ବ୍ୟୁରୋ: ସେପ୍ଟେମ୍ବର ୩୦ ତାରିଖରେ ଦୁବାଇରୁ ଇସ୍ରାଏଲର ତେଲ ଅଭିବ ଯାଉଥିବା ଫ୍ଲାଏଦୁବାଇ ବିମାନରେ ଯାହା ଘଟିଲା, ତାହା ସମସ୍ତଙ୍କୁ ଦୋହଲାଇ ଦେଇଛି । ସୌଭାଗ୍ୟବସତଃ ଭାରତୀୟ ପାଇଲଟଙ୍କ ସାହସିକତା ଏବଂ କିଛି ଯାତ୍ରୀଙ୍କ ସହଯୋଗ ପାଇଁ ବିମାନରେ ଥିବା ୧୭୪ ଜଣ ଯାତ୍ରୀଙ୍କ ଜୀବନ ବଞ୍ଚି ଯାଇଥିଲା । ଏହି ଘଟଣାକୁ ନେଇ ବିଭିନ୍ନ ଦିଗରୁ ସେନ୍ଦହ କରାଯାଉଥିବା ବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏହି ଆକ୍ରମଣ ପାଇଁ ଇରାନକୁ ଦାୟୀ କରିଛନ୍ତି । କିନ୍ତୁ ଆମେରିକାର ଉପରାଷ୍ଟ୍ରପତି ଏହି ମାମଲାରେ ଟ୍ରମ୍ପଙ୍କ ସହ ଏକମତ ନାହାଁନ୍ତି । ତାଙ୍କର କହିବାନୁସାରେ, ଏହାର ସେଭଳି କୌଣସି ଠୋସ୍ ପ୍ରମାଣ ନାହିଁ , ଯାହାଦ୍ବାରା ଏହାକୁ ପ୍ରମାଣିତ କରିହେବ ।
ସୂଚନା ଅନୁସାରେ ଟ୍ରମ୍ପଙ୍କୁ ଜଣେ ସାମ୍ବାଦିକ ପ୍ରଶ୍ନ କରିଥିଲେ, କ’ଣ ତାଙ୍କୁ ଲାଗୁଛି ଯେ ଫ୍ଲାଏଦୁବାଇରେ ହୋଇଥିବା ଆତଙ୍କବାଦୀ ଆକ୍ରମଣ ପାଇଁ ଇରାନ ଦାୟୀ ଥିଲା ? ଯାହାର ଯବାବରେ ଟ୍ରମ୍ପ ହଁ କହିଥିଲେ । ଟ୍ରମ୍ପ କହିଥିଲେ ଯେ, ବ୍ୟକ୍ତିଗତ ଭାବରେ ତାଙ୍କୁ ଏପରି ହିଁ ଲାଗୁଛି । ହେଲେ ଉପରାଷ୍ଟ୍ରପତି ଜେ.ଡି ଭାନ୍ସଙ୍କ ରାୟ ଏହି ମାମଲରେ ଟ୍ରମ୍ପଙ୍କ ଠାରୁ ସମ୍ପୂର୍ଣ୍ଣ ଭିନ୍ନ । ତାଙ୍କ କହିବା କଥା ଯେ, ଏଭଳି ଦାବିର କୌଣସି ପ୍ରମାଣ ମିଳିନାହିଁ । ଯାହାଫଳରେ ଏହା ପ୍ରମାଣ କରାଯାଇପାରିବ କି ବିମାନରେ ହୋଇଥିବା ଆକ୍ରମଣରେ ଇରାନର ହାତ ରହିଛି । ଗଣମାଧ୍ୟମକୁ ପ୍ରତିକ୍ରିୟା ଦେଇ ଆମେରିକାର ଉପରାଷ୍ଟ୍ରପତି କହିଛନ୍ତି ଯେ, ସେପ୍ଟେମ୍ବର ୩୦ ତାରିଖରେ ଫ୍ଲାଇଟ FZ1073 ରେ ହୋଇଥିବା ଘଟଣା ପରେ ଟ୍ରମ୍ପ ପ୍ରଶାସନ ଆମେରିକାରେ ଉଡାଣ ପ୍ରକ୍ରିୟାର ସମୀକ୍ଷ କରୁଛନ୍ତି । ହେଲେ ଏହି ଘଟଣା ସହିତ ଇରାନକୁ ଯୋଡିବାର ଏପର୍ଯ୍ୟନ୍ତ କୌଣସି ଠୋସ୍ ପ୍ରମାଣ ମିଳିନାହିଁ । ସେ ଆହୁରି କହିଛନ୍ତି ଯେ, ବିମାନରେ ହୋଇଥିବା ଏହି ଆକ୍ରମଣକୁ ୟୁଏଇ ପକ୍ଷରୁ ଆତଙ୍କବାଦୀଙ୍କ ପ୍ରୟାସ ବୋଲି କୁହାଯାଇଛି ।
ଅନ୍ୟପଟେ ଇରାନ ଓଲଟି ଇସ୍ରାଏଲ ଉପରେ ଏହି ଆକ୍ରମଣର ଷଡଯନ୍ତ୍ର ରଚିଥିବା ଅଭିଯୋଗ ଲଦିଛି । ଇରାନର କନସଲ ଜେନେରାଲ ସଇଦ ରଜା ମୋସାଏବ ମୋତଲାଘ ଭାରତୀୟ ପାଇଲଟ ସ୍ମି୍ତ୍ ମଚ୍ଛାରଙ୍କ ପ୍ରଶଂସା କରି କହିଛନ୍ତି ଯେ, ମାନବ ଜୀବନ ରକ୍ଷା କରିବା ସର୍ବଦା ପ୍ରଶଂସନୀୟ ଏବଂ ପାଇଲଟଙ୍କ ଉପସ୍ଥିତ ବୁଦ୍ଧି ଯୋଗୁଁ ଶହ ଶହ ଜୀବନ ବଞ୍ଚିଯାଇଥିଲା । ଏହାସହ ଇସ୍ରାଏଲକୁ ସିଧାସଳଖ ନିଶାନା କରି ଦାବି କରିଥିଲେ ଯେ, ପ୍ରଧାନମନ୍ତ୍ରୀ ନିର୍ବାଚନ ପୂର୍ବରୁ ଦ୍ବନ୍ଦ୍ବ ସୃଷ୍ଟି କରିବା ପାଇଁ ଖୋଦ ଇସ୍ରାଏଲ ଦ୍ବାରା ହିଁ ସମଗ୍ର ଘଟଣାର ରଚନା କରାଯାଇଥିଲା । କହିରଖୁଛୁ ଯେ, ଏହି ଫ୍ଲାଇଟରେ ଅଧିକାଂଶ ଇସ୍ରାଏଲର ହିଁ ଯାତ୍ରୀ ରହିଥିଲେ । ତେବେ କିଏ ସତ କହୁଛି, ଆଉ କିଏ ମିଛ କହୁଛି ତାହାର ସତ ଘଟଣାର ସମ୍ପୂର୍ଣ୍ଣ ତଦନ୍ତ ପରେ ହିଁ ଜଣା ପଡିପାରିବ ।
