ନବରଙ୍ଗପୁର: ଅନ୍ଧ ବିଶ୍ୱାସ ଓ ପୁରୁଣା ପରମ୍ପରା ଆଗରେ ପ୍ରଶାସନିକ କଟକଣା ଫିକା । ଚିନ୍ତା ବଢାଇଛି ନବରଙ୍ଗପୁର ଜିଲ୍ଲାରେ ବାଲ୍ୟ ବିବାହ ପ୍ରଥା । ନାନା ସଚେତନତା ପରେ ବି ଆଦିବାସୀ ଅଧ୍ୟୁଷିତ ଏହି ଜିଲ୍ଲାରେ ଆଜି ବି ବଞ୍ଚିରହିଛି କୁପ୍ରଥା । ଅନେକ ଗାଁରେ ୧୫ରୁ ୧୭ ବର୍ଷ ବୟସର କିଶୋରୀଙ୍କ ବିବାହ କରାଯାଉଛି ।
ଗରିବୀ, ଅଶିକ୍ଷା, ପରମ୍ପରା ଓ ସାମାଜିକ ଚାପ ଯୋଗୁ ଆଜି ବି ଅନେକ ପରିବାର ଝିଅମାନଙ୍କୁ ଅପରିପକ୍କ ବୟସରେ ବିବାହ କରାଉଛନ୍ତି । ଏହାସହ ଉଦୁଲିଆ ଓ ଝୋଲା ଭଳି ଆଦିବାସୀ ରୀତିନୀତିରେ ବିବାହ ଭଳି ପ୍ରଥା ହେତୁ କମ୍ ବୟସରେ ଗର୍ଭଧାରଣ କରି ବିପଦକୁ ବରଣ କରୁଛନ୍ତି ନାବଳିକା ।
ବାଲ୍ୟ ବିବାହ ରୋକିବା ପାଇଁ ପ୍ରଶାସନର ଅନେକ ପଦକ୍ଷେପ ପାଣି ଫୋଟକା ଭଳି ମିଳେଇ ଯାଉଛି । ପ୍ରଶାସନର ନଜର ଆଢୁଆଳରେ ବଢୁଥିବା ବାଲ୍ୟ ବିବାହ ଘଟଣା କୁମାରୀ ମାତୃତ୍ୱ ସଂଖ୍ୟା ବୃଦ୍ଧି କରିବାରେ ଖୋରାକ ଯୋଗାଉଛି ।
ଏନ୍ଏଫ୍ଏଚ୍ଏସ୍-୫ ସର୍ଭେ ଅନୁଯାୟୀ ରାଜ୍ୟରେ ବାଲ୍ୟବିବାହ କ୍ଷେତ୍ରରେ ନବରଙ୍ଗପୁର ଜିଲ୍ଲା ପ୍ରଥମ । ୨ ବର୍ଷ ତଳେ ସର୍ବଭାରତୀୟ ସ୍ତରରେ ନବରଙ୍ଗପୁର ପ୍ରଥମ ସ୍ଥାନରେ ଥିଲା । ସ୍ଵଳ୍ପ ବୟସରେ ଗର୍ଭଧାରଣ ଯୋଗୁଁ ମାତୃ ଓ ଶିଶୁ ମୃତ୍ୟୁ ହାର ମଧ୍ୟ ବଢୁଛି ।
ସ୍ୱତନ୍ତ୍ର ଆକ୍ସନ୍ ପ୍ଳାନରେ ଜିଲ୍ଲା ପ୍ରଶାସନ ବାଲ୍ୟବିବାହ ରୋକିବାକୁ ପଦକ୍ଷେପ ନେଇଛି । ୨୦୨୬ ଜାନୁଆରିରେ ୬୫ଟି, ଫେବ୍ରୁଆରିରେ ୪୨ଟି, ମାର୍ଚ୍ଚରେ ୪୭ଟି ଓ ଏପ୍ରିଲରେ ୨୪ ବାଲ୍ୟବିବାହ ରୋକିଛି ପ୍ରଶାସନ । ଗତ ୫ବର୍ଷରେ ୧,୮୯୦ ଟି ବାଲ୍ୟ ବିବାହ ରୋକାଯାଇଛି ।
ବାଲ୍ୟବିବାହ କରୁଥିବା ନାବାଳିକାଙ୍କ ମଧ୍ୟରୁ ୭୦.୮ ପ୍ରତିଶତ କମ୍ ଓଜନ ଓ ୬୯.୩ ପ୍ରତିଶତ ରକ୍ତହୀନତାର ଶିକାର ହେଉଛନ୍ତି । ଗ୍ରାମାଞ୍ଚଳରେ କାମ କରୁଥିବା ଅଙ୍ଗନବାଡ଼ି କର୍ମୀ ଓ ଆଶା ଦିଦି ବାଲ୍ୟବିବାହ ସମ୍ପର୍କରେ ସୂଚନା ଦେଲେ ଗ୍ରାମବାସୀ ଗଣ୍ଡଗୋଳ କରୁଥିବା ଅଭିଯୋଗ ହୋଇଛି ।
ପରମ୍ପରାର ନାଁରେ ଚାଲିଥିବା ବାଲ୍ୟବିବାହ କିଶୋରୀଙ୍କ ଭବିଷ୍ୟତକୁ ଅନ୍ଧାରକୁ ଠେଲିଦେଉଛି । ତେବେ କେମିତି ରୋକାଯିବ ଏହି ସାମାଜିକ ଅଭିଶାପ? ପ୍ରଶାସନ ଓ ସରକାର ପାଇଁ ଏହା ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି ।
