ନାବାଳକକୁ ଚୋରି କରି ଦଶପଲ୍ଲାରେ ବିକିଦେଇଥିଲା ଦଲାଲ

କଟକ : କଟକରେ ପିଲା ଚୋରି । ନାବାଳକକୁ ଚୋରି କରି ଦଶପଲ୍ଲାରେ ବିକିଦେଇଥିଲା ଦଲାଲ । ପରିବାର ଲୋକଙ୍କ ଅଭିଯୋଗ ପରେ ପିଲାଙ୍କୁ ଉଦ୍ଧାର କଲା ପୋଲିସ । କଟକ ସଦର ଥାନାରେ ହୋଇଥିବା ଅଭିଯୋଗ ଅନୁସାରେ, ନିଛିପୁରଠାରେ ଏକ ଇଟାଭାଟିରେ ନବରଙ୍ଗପୁରର ମଙ୍ଗଳ ସିଂ କାମ କରୁଥିଲେ  । ଗତ ଶୁକ୍ରବାର ତାଙ୍କ ଦୁଇ ପୁଅ ଖେଳୁଥିବା ସମୟରେ ସେହି ଅଞ୍ଚଳରେ କାମ କରୁଥିବା ବଲାଙ୍ଗୀର ଜିଲ୍ଲାର ଜଣେ ମହିଳା ଉଭୟଙ୍କୁ ଚୋରି କରିନେଇଥିଲେ । ଉଭୟଙ୍କୁ ଚୋରି କରି ସେ କାମ କରୁଥିବା ଏକ ପାଣିପାଉଚ୍ କମ୍ପାନୀରେ ଲୁଚାଇ ରଖିଥିଲେ ।

ପରେ ୬ ବର୍ଷୀୟ ନାବାଳକକୁ ନୟାଗଡ଼ ଜିଲ୍ଲା ଦଶପଲ୍ଲାରେ ବିକ୍ରି କରିଦେଇଥିଲେ । ବଡ଼ ପୁଅ ଅପହରକାରୀ ମହିଳାଙ୍କ କବଳରୁ ଖସିଆସି ସବୁକଥା କହିବା ପରେ ପରିବାର ଲୋକ ଥାନାରେ ଏତଲା ଦେଇଥିଲେ । ପୋଲିସ ତଦନ୍ତ କରି ଦଶପଲ୍ଲାରୁ ନାବାଳକୁ ଉଦ୍ଧାର କରିଛି । ଅପରହଣକାରୀ ମହିଳାଙ୍କ ସମେତ ୭ ଜଣଙ୍କୁ ଅଟକ ରଖି ତଦନ୍ତ ଜାରି ରହିଛି । ମହିଳାଜଣଙ୍କ କେଉଁ ଉଦ୍ଦେଶ୍ଯରେ ନାବାଳକଙ୍କୁ ଗିରଫ କରିଥିଲେ, ତାଙ୍କ ସହ ଆଉ କିଏ ସଂପୃକ୍ତ ରହିଛି କି ନାହିଁ ସେନେଇ ତଦନ୍ତ କରୁଛି ପୋଲିସ ।