ଏସସିବିରେ ରୋଗୀଙ୍କୁ ଅସଦାଚରଣ ଅଭିଯୋଗ ମାମଲା, ଅଭିଯୁକ୍ତ ଡାକ୍ତର ଗିରଫ

କଟକ: କଟକ ବଡ଼ ଡାକ୍ତରଖାନା ଏସସିବିରେ ଦୁଇ ମହିଳା ରୋଗୀଙ୍କୁ ଡାକ୍ତରଙ୍କ ଅସଦାଚରଣ ଅଭିଯୋଗ ମାମଲାରେ ଅଭିଯୁକ୍ତ ଡାକ୍ତର ଠାକୁର ଦିଲବାଗ ସିଂଙ୍କୁ ଗିରଫ କଲା ପୋଲିସ । ସିନିୟର ରେସିଡେଣ୍ଟ ଡାକ୍ତର ଭାବେ କାଡିଓଲୋଜି ବିଭାଗରେ ୨ ବର୍ଷ ହେଲା ସଂପୃକ୍ତ ଡାକ୍ତର କାମ କରୁଥିଲେ । ୧୧ ତାରିଖ ରାତିରେ ଇସିଜି ବାହାନାରେ ସେ ବୀଭତ୍ସକାଣ୍ଡ ଘଟଣାଇ ଥିବା ଅଭିଯୋଗ ହୋଇଥିଲା । ମଙ୍ଗଳାବାଗ ଥାନାରେ ଅଭିଯୋଗ ପରେ ପୀଡ଼ିତାଙ୍କ ବୟନ ରେକର୍ଡ କରିଥିଲା ପୋଲିସ । ପୀଡ଼ିତାଙ୍କ ସମ୍ପର୍କୀୟଙ୍କ ମାଡ଼ରେ ସଂପୃକ୍ତ ଡାକ୍ତର ମଧ୍ଯ ଗୁରୁତର ହୋଇ ଆଇସିୟୁରେ ଭର୍ତ୍ତି ହୋଇଥିଲେ । ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେବା ସହ ତିନିଜଣିଆ କମିଟି ଗଠନ କରିଥିଲା ସ୍ବାସ୍ଥ୍ଯ ବିଭାଗ ।

ପୀଡ଼ିତାଙ୍କ ସମ୍ପର୍କୀୟଙ୍କ ମାଡ଼ରେ ସଂପୃକ୍ତ ଡାକ୍ତର ଗୁରୁତର ହୋଇ ଟ୍ରମା ଆଇସିୟୁରେ ଚିକିତ୍ସିତ ହେଉଥିଲେ । ଏନେଇ ଡାକ୍ତରଙ୍କ ପରିବାର ମଧ୍ଯ ଥାନାରେ ଅଭିଯୋଗ କରିଥିଲେ । ପୀଡ଼ିତା ଏସସିବିରେ ଅଧ୍ଯୟନରତ ଜଣେ ଡାକ୍ତରଙ୍କ ସମ୍ପର୍କୀୟ ବୋଲି ଜଣାପଡ଼ିଛି । ପରିବାର ଲୋକଙ୍କ ସହ ଦୁଇ ମହିଳା ରୋଗୀ ହୃଦରୋଗ ବିଭାଗକୁ ଚିକିତ୍ସା ପାଇଁ ଆସିଥିଲେ । ଇସିଜି କରିବା ବାହାନାରେ ଡାକ୍ତର ଜଣଙ୍କ ସେମାନଙ୍କ ସହ ଅସଦାଚରଣ କରିଥିବା ଅଭିଯୋଗ ହୋଇଛି । ଏସସିବି ଭଳି ଅନୁଷ୍ଠାନରେ ଏଭଳି ଘଟଣା ଲଜ୍ଜାଜନକ । ଏହାର ଉଚିତ ତଦନ୍ତ ହେବା ଉଚିତ ବୋଲି ଦାବି କରିଛନ୍ତି ସ୍ବେଚ୍ଛାସେବୀ ।