ଜଗତସିଂହପୁର: ଜଗତସିଂହପୁରରେ ଜଘନ୍ୟକାଣ୍ଡ। ବାପା ମାଆ ଓ ଭଉଣୀକୁ ବୀଭତ୍ସ ହତ୍ୟା। ପଥର ଓ ହେମଦସ୍ତାରେ ଛେଚି ଛେଚି ମାରି ଦେଇଛି ପୁଅ। ଗତ ରାତିର ଏହି ଘଟଣା ସାରା ରାଜ୍ୟରେ ଚାଞ୍ଚଲ୍ୟ ଖେଳାଇ ଦେଇଛି। ଜଗତସିଂହପୁର ଥାନା ଜୟବଡ଼ ସେଠି ସାହିରେ ଘଟିଛି ଏହି ଘଟଣା। ମୃତକ ହେଲେ ବାପା
କାଳନ୍ଦୀ ସେଠୀ, ତାଙ୍କ ସ୍ତ୍ରୀ କନକଲତା ଓ ରୋଜାଲିନ। ପୁଅ ସୂର୍ଯ୍ୟକାନ୍ତ ସମସ୍ତଙ୍କୁ ରାତିରେ ମାରି ଦେଇଥିବାର ଅଭିଯୋଗ ହୋଇଛି। ସୂର୍ଯ୍ୟକାନ୍ତ ଓରଫ୍ ବଣ୍ଟି ବହୁ ସମୟ ଧରି ମୋବାଇଲ ଖେଳୁଥିବାରୁ ଗତ ରାତିରେ ବାପା ତାକୁ ଗାଳି କରିଥିଲେ। ଏହାକୁ ନେଇ ଘରେ ପାଟିତୁଣ୍ଡ ହୋଇଥିଲା। ପରେ ରାତିରେ ଖାଇ ପିଇ ସମସ୍ତେ ଶୋଇଥିଲେ। ପଡ଼ୋଶୀ କହିଛନ୍ତି, ରାତିରେ ସମସ୍ତଙ୍କୁ ପଥର ଓ ହେମଦସ୍ତାରେ ଛେଚି ହତ୍ୟା କରିଥିଲା ବଣ୍ଟି।ତା ପରେ ପଡ଼ୋଶୀଙ୍କୁ କହିଥିଲା, ମୁଁ ସମସ୍ତଙ୍କୁ ମାରି ଦେଇଛି। ଗାଁ ଲୋକେ ଖବର ଦେବା ପରେ ପୋଲିସ ଆସିଥିଲା। ପୋଲିସ ଆସି ମୃତଦେହ ଜବତ କରିଛି। ଖୋଜାଖୋଜି କରିବା ପରେ ବଣ୍ଟି ପାଖ ସ୍କୁଲ ନିକଟରେ ବସିଥିବା ବେଳେ ତାକୁ ଧରିଛି ପୋଲିସ। ସାଇଣ୍ଟିଫିକ୍ ଟିମ୍ ସହାୟତାରେ ପୋଲିସ ତଦନ୍ତ କରୁଛି।
ମୋବାଇଲ ପାଇଁ ଜୀବନ ନେଲା ପୁଅ ! ବାପା, ମାଆ ଓ ଭଉଣୀଙ୍କୁ ହତ୍ୟା କଲା
କ୍ରୀଡ଼ାପ୍ରେମୀ ନିରାଶ: ଭାରତର ପରାଜୟକୁ ନେଇ ୨୦୧୫ରୁ ୨୦୨୫ ମଧ୍ୟରେ ଆସୁଛି ୧୧ଟି ସଂଯୋଗ
ଆଜି ଚାମ୍ପିୟନ୍ସ ଟ୍ରଫିର ପ୍ରଥମ ସେମିଫାଇନାଲରେ ଭାରତ ଓ ଅଷ୍ଟ୍ରେଲିଆ ମୁହାଁମୁହିଁ ହେବ । ଦୁବାଇ ଇଣ୍ଟରନ୍ୟାସନାଲ କ୍ରିକେଟ ଷ୍ଟାଡିୟମରେ ଏହି ମ୍ୟାଚ ଖେଳାଯିବ । ତେବେ ଏହା ମଧ୍ୟରେ କୋଟି କୋଟି ଭାରତୀୟ କ୍ରୀଡ଼ାପ୍ରେମୀଙ୍କ ପାଇଁ ଆସିଛି ଏକ ନୈରାଶ୍ୟଜନକ ଖବର । ୨୦୧୫ରୁ ୨୦୨୫ ମଧ୍ୟରେ ୧୧ଟି ସଂଯୋଗ ସାମ୍ନାକୁ ଆସୁଛି, ଯାହାକି ଭାରତର ପରାଜୟର କାରଣ ସାଜିପାରେ । ୨୦୧୧ ବିଶ୍ବକପ ପରେ ଅଷ୍ଟ୍ରେଲିଆ ଭାରତକୁ ୩ ଥର ହରାଇଥିବା ବେଳେ ଏଥର ୧୧ଟି ସଂଯୋଗ ଭାରତ ବିପକ୍ଷରେ ଯାଉଛି ।
୧- ୨୦୧୫ ଦିନିକିଆ ବିଶ୍ବକପରେ ଭାରତ, ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା ଓ ନ୍ୟୁଜିଲାଣ୍ଡ ସେମିକୁ କ୍ବାଲିଫାଏ କରିଥିଲେ । ୨୦୨୫ରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିଛି ।
୨- ୨୦୧୫ ବିଶ୍ବକପରେ ବିରାଟ କୋହଲି ପାକିସ୍ତାନ ବିପକ୍ଷରେ ଶତକ ହାସଲ କରିଥିଲେ । ଏଥର ମଧ୍ୟ ପାକିସ୍ତାନ ବିପକ୍ଷରେ ଶତକ ହାସଲ କରିଛନ୍ତି ।
୩- ୨୦୧୫ରେ ଭାରତ-ଅଷ୍ଟ୍ରେଲିଆ ମଧ୍ୟରେ ସେମି ମୁକାବିଲା ହୋଇଥିବା ବେଳେ ଏଥର ମଧ୍ୟ ସମାନ ସ୍ଥିତି ହୋଇଛି ।
୪- ୨୦୧୫ରେ ଅଷ୍ଟ୍ରେଲିଆ ଟିମରେ ଜନସନ ସରନେମ ଥାଇ ମିଚେଲ ଜନସନ ଖେଳୁଥିବା ବେଳେ ଏଥର ସ୍ପେନସର ଜନସନ ଖେଳୁଛନ୍ତି ।
୫- ୨୦୧୫ରେ ବିଶ୍ବକପ ନକଆଉଟ ମ୍ୟାଚ ମାର୍ଚ୍ଚରେ ଖେଳାଯାଇଥିଲା । ଏଥର ମଧ୍ୟ ଚାମ୍ପିୟନ୍ସ ଟ୍ରଫିର ନକଆଉଟ ମାର୍ଚ୍ଚରେ ହେଉଛି ।
୬- ୨୦୧୫ ବିଶ୍ବକପ ସେମିଫାଇନାଲ ମ୍ୟାଚ ଦୁଇଟି ଅଲଗା ଅଲଗା ଦେଶରେ ହୋଇଥିଲା । ଗୋଟିଏ ମ୍ୟାଚ ଅଷ୍ଟ୍ରେଲିଆରେ ଓ ଅନ୍ୟ ଏକ ମ୍ୟାଚ ନ୍ୟୁଜିଲାଣ୍ଡରେ ହୋଇଥିଲା । ଏଥର ମଧ୍ୟ ଦୁଇ ଅଲଗା ଅଲଗା ଦେଶ ମଧ୍ୟରେ ସେମି ମୁକାବିଲା ହେବ ।
୭- ୨୦୧୫ ବିଶ୍ବକପର ଏକ ବର୍ଷ ପରେ ଭାରତ ଟି-୨୦ ବିଶ୍ବକପ ଆୟୋଜନ କରିଥିଲା । ଏଥର ମଧ୍ୟ ୨୦୨୬ରେ ଭାରତ ଟି-୨୦ ବିଶ୍ବକପ ଆୟୋଜନ କରିବ ।
୮- ୨୦୧୫ ବିଶ୍ବକପ ଖେଳାଯିବା ସମୟରେ ଆଇପିଏଲରେ କୋଲକାତା ଚାମ୍ପିୟନ ହୋଇଥିଲା । ଏଥର ମଧ୍ୟ କୋଲକତା ଚାମ୍ପିୟନ ହୋଇଛି ।
୯- ସେ ସମୟରେ ଆଇପିଏଲ ଫାଇନାଲରେ ଅଷ୍ଟ୍ରେଲୀୟ ଅଧିନାୟକଙ୍କୁ କୋଲକତା ହରାଇଥିଲା । ଏଥର ମଧ୍ୟ ପ୍ୟାଟ କମିନ୍ସଙ୍କ ଅଧିନାୟକତ୍ବରେ କେକେଆର ପ୍ରତିପକ୍ଷ ହାଇଦ୍ରାବାଦକୁ ହରାଇଥିଲା ।
୧୦- ୨୦୧୫ରେ ରାହୁଲ ଦ୍ରାବିଡ଼ ରାଜସ୍ଥାନକୁ ଫେରିଥିବା ବେଳେ ଏଥର ରାଜସ୍ଥାନ ସହ ଆଇପିଏଲକ ଫେରିବେ ।
୧୧- ୨୦୧୫ରେ ଆର ଅଶ୍ବିନ ଆଇପିଏଲରେ ଚେନ୍ନଇ ତରଫରୁ ଖେଳୁଥିବା ବେଳେ ଏଥର ମଧ୍ୟ ସିଏସକେ ପାଇଁ ଖେଳିବେ ।
ଟ୍ରମ୍ପଙ୍କ ବଡ଼ ଘୋଷଣା: କାନାଡ଼ା ଓ ମେକ୍ସିକୋ ଉପରେ ଆଜିଠାରୁ ୨୫ ପ୍ରତିଶତ ଟାରିଫ ଲାଗୁ
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଟାରିଫ ଓ୍ବାର ସାରା ବିଶ୍ବର ଶେୟାର ବଜାର ପାଇଁ ବିପଦ ସୃଷ୍ଟି କରିଛି । କାନାଡ଼ା ଓ ମେକ୍ସିକୋ ଉପରେ ୨୫ ପ୍ରତିଶତ ଟାରିଫ ଲଗାଇବାକୁ ଟମ୍ପ ଘୋଷଣା କରିଛନ୍ତି । ଟ୍ରମ୍ପଙ୍କ ଏହି ପଦକ୍ଷେପ ପରେ ଆମେରିକା ସମେତ ଏସୀୟ ବଜାରଗୁଡ଼ିକରେ ହଡ଼କମ୍ପ ମଚିଯାଇଛି । ଆମେରିକା ଆଜିଠାରୁ ଦୁଇ ଦେଶ ଉପରେ ୨୫ ପ୍ରତିଶତ ଟାରିଫ ଲଗାଇବ ବୋଲି ପୂର୍ବରୁ ସଙ୍କେତ ଦେଇ ସାରିଥିଲା । ଏହାଫଳରେ ଡାଉ ଜୋନ୍ସ ଠାରୁ ଆରମ୍ଭ କରି ଏସଏଣ୍ଡପି-୫୦୦ ପର୍ଯ୍ୟନ୍ତ ବଡ଼ ହ୍ରାସ ଦେଖିବାକୁ ମିଳିଛି । ମଙ୍ଗଳବାର ଦିନ ଏସୀୟ ବଜାରରେ ମଧ୍ୟ ବହୁ ହ୍ରାସ ଦେଖିବାକୁ ମିଳିଛି । ଗିଫ୍ଟ ନିଫ୍ଟୀ ମଧ୍ୟ ଲାଲ ପ୍ରତୀକରେ କାରବାର କରୁଛି ।
ଟ୍ରମ୍ପଙ୍କ ଏହି ଘୋଷଣା ପରେ ନର୍ଥ ଆମେରିକୀ ଟ୍ରେଡ ଓ୍ବାରର ଆଶଙ୍କା ପୁଣି ଥରେ ବଢ଼ିଯାଇଛି । ଦୁଇ ଆମେରିକୀୟ ପଡ଼ୋଶୀ ଫେଣ୍ଟେନାଇଲ ତସ୍କରୀ ବିରୋଧରେ ନିଜେ ଲଢ଼ିବା ଓ ଅବୈଧ ଓ ମିଗ୍ରେସନକୁ ରୋକିବା ପାଇଁ ବାଧ୍ୟ କରିବା ପାଇଁ ଏହି ପଦକ୍ଷେପ ଗ୍ରହଣ କରାଯାଇଥିବା ଟ୍ରମ୍ପ କରିଛନ୍ତି । ତେବେ ଦୁଇ ଦେଶଙ୍କ ସହ ବ୍ୟାପାର ଅସନ୍ତୁଳନକୁ ମଧ୍ୟ ସନ୍ତୁଳିତ କରିବାକୁ ସେ ଚାହାନ୍ତି । ଅଧିକ କାରଖାନାକୁ ଆମେରିକାରେ ସ୍ଥାନାନ୍ତରିତ କରିବାକୁ ପ୍ରେରିତ କରିବାକୁ ଟ୍ରମ୍ପ ଚାହାନ୍ତି । ଆଜିଠାରୁ କାନାଡ଼ା ଓ ମେକ୍ସିକୋ ଉପରେ ୨୫ ପ୍ରିଶତ ଟାରିଫ ଲାଗୁ ହେବ ବୋଲି ଟ୍ରମ୍ପ କହିଛନ୍ତି ।
ଖୁବ୍ ଶୀଘ୍ର ଦୂର ହେବ ପାର୍ଟ ପ୍ଲଟ ପଞ୍ଜୀକରଣ କଟକଣା: ଆପାର୍ଟମେଣ୍ଟ କିଣାବିକା ପାଇଁ ବାଟ ଫିଟିବ, ଜାରି ହେବ ବିସ୍ତୃତ ନିର୍ଦ୍ଦେଶନାମା
ଭୁବନେଶ୍ବର: ଖୁବ୍ ଶୀଘ୍ର ଦୂର ହେବ ପାର୍ଟ ପ୍ଲଟ ପଞ୍ଜୀକରଣ କଟକଣା । ଏହି ସମସ୍ୟାର ସମାଧାନ ପାଇଁ ନଗର ଉନ୍ନୟନ ବିଭାଗ ଏକ ଚିଠା ଗାଇଡଲାଇନ ରାଜସ୍ବ ବିଭାଗକୁ ଦେଇଛି। ରାଜସ୍ବ ବିଭାଗ ଏହା ଉପରେ ଅଧିକ ତର୍ଜମା କରିବାକୁ ଉଭୟ ବିଭାଗର ଅଧିକାରୀଙ୍କ ସହ ଆସନ୍ତା ୬ ତାରିଖରେ ବୈଠକ କରିବେ । ୫ହଜାର ବର୍ଗଫୁଟ ପର୍ଯ୍ୟନ୍ତ ପ୍ଲଟ ପଞ୍ଜୀକରଣ ପାଇଁ ବାଟ ବାହାରିଛି । ଏଥିରେ ଥିବା ପାର୍ଟ ପ୍ଲଟ ପଞ୍ଜୀକରଣ ପୂର୍ବରୁ କ୍ରେତା ପ୍ରଥମେ ରାସ୍ତା, ଡ୍ରେନେଜ ପାଇଁ ଆବଶ୍ୟକୀୟ ଜମି ସରକାରଙ୍କ ନାମରେ ରେଜିଷ୍ଟ୍ରେସନ କରିବାକୁ ସ୍ଥିର ହୋଇଛି ବୋଲି ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି। କେବଳ ପାର୍ଟ ପ୍ଲଟ ନୁହଁ, ଆପାର୍ଟମେଣ୍ଟ କିଣାବିକା ପାଇଁ ବାଟ ଫିଟିବାର ଆଶା ରଖାଯାଇଛି । ମାର୍ଚ୍ଚ ମାସ ମଧ୍ୟରେ ସରକାର ବିସ୍ତୃତ ନିର୍ଦ୍ଦେଶନାମା ଜାରି କରିବାକୁ ଉଦ୍ୟମ କରୁଛନ୍ତି । ଏପ୍ରିଲ ମାସରୁ ଏସବୁ ସମସ୍ୟାର ସମାଧାନ ହେବ ବୋଲି ରାଜସ୍ବ ମନ୍ତ୍ରୀ କହିଛନ୍ତି।
ଚାମ୍ପିୟନଶିପ ସେମିରେ କିଏ ମାରିବ ବାଜି: ଭାରତ ଓ ଅଷ୍ଟ୍ରେଲିଆା ମଧ୍ୟରୁ କାହା ସପକ୍ଷରେ ରହିଛି ଇତିହାସ?
ଆଇସିସି ଚାମ୍ପିୟନଶିପ ଟ୍ରଫି ୨୦୨୫ର ପ୍ରଥମ ସେମିଫାଇନାଲ ମୁକାବିଲା ଆଜି ଦ୍ବିପ୍ରହର ୨.୩୦ରେ ଖେଳାଯିବ । ଅଷ୍ଟ୍ରେଲିଆ ବିପକ୍ଷରେ ଆଇସିସି ଟୁର୍ଣ୍ଣାମେଣ୍ଟର ନକଆଉଟ ମ୍ୟାଚଗୁଡ଼ିକରେ ଭାରତୀୟ ଟିମର ରେକର୍ଡ ଗତ ୧୪ ବର୍ଷରେ ଅତ୍ୟନ୍ତ ଖରାପ ରହିଛି । ଚଳିତ ଟୁର୍ଣ୍ଣାମେଣ୍ଟରେ ଭାରତୀୟ ଅଧିନାୟକ ରୋହିତ ଶର୍ମାଙ୍କ ନେତୃତ୍ବାଧୀନ ଟିମ୍ ଇଣ୍ଡିଆ ବର୍ତ୍ତମାନ ସୁଦ୍ଧା କୌଣସି ମ୍ୟାଚ ହାରି ନାହିଁ । ଗ୍ରୁପ ଷ୍ଟେଜରେ ଭାରତ ୩ଟି ମ୍ୟାଚ ଖେଳି ୩ଟି ଜିତିଛି । ଏବେ ସେମିରେ ଅଷ୍ଟ୍ରେଲିଆକୁ ହରାଇ ଫାଇନାଲରେ ପ୍ରବେଶ ପାଇଁ ଲକ୍ଷ୍ୟ ରଖିଛି ଭାରତ । ମାତ୍ର ରୋହିତ ବ୍ରିଗେଡ ପାଇଁ ଏହା ଏତେ ସହଜ ହୋଇନପାରେ ।
ଗତ ୧୪ ବର୍ଷରେ ଅଷ୍ଟ୍ରେଲିଆା ବିପକ୍ଷରେ ଭାରତର ଚାମ୍ପିୟନ୍ସ ଟ୍ରଫିର ନକଆଉଟ ମ୍ୟାଚର ରେକର୍ଡ ଅତ୍ୟନ୍ତ ନୈରାଶ୍ୟଜନକ ରହିଛି । ଯେବେ ବି ଦୁଇ ଟିମ୍ ପରସ୍ପର ସହ ମୁହାଁମୁହିଁ ହୋଇଛନ୍ତି, ଭାରତକୁ ପରାଜୟର ସାମ୍ନା କରିବାକୁ ପଡ଼ିଛି । ୨୦୦୭ ଓ ୨୦୧୧ ଦିନିକିଆ ବିଶ୍ବକପରେ ଭାରତ ବିଜୟୀ ହୋଇଥିଲା । ଦୁଇଥର ନକଆଉଟ ମୁକାବିଲାରେ ଭାରତ କଙ୍ଗାରୁକୁ ମାତ୍ ଦେଇଥିଲା । ଯଦି ଏଥର ସେମିରେ ଭାରତୀୟ ଟିମ୍ ଜିତେ, ତେବେ ଟ୍ରଫି ଜିତିବା ପକ୍କା ହୋଇପାରେ ବୋଲି ଅନୁମାନ କରାଯାଉଛି । ଆଇସିସି ଟୁର୍ଣ୍ଣାମେଣ୍ଟର ନକଆଉଟ ମ୍ୟାଚରେ ଉଭୟ ଟିମ୍ ପରସ୍ପରକୁ ୭ ଥର ଭେଟିଥିବା ବେଳେ ଭାରତ ୩ଟିରେ ଓ ଅଷ୍ଟ୍ରେଲିଆ ୪ଟିରେ ବିଜୟୀ ହୋଇଛି । ୨୦୧୧ ବିଶ୍ବକପ ପରଠାରୁ ଭାରତୀୟ ଟିମର ଖରାପ ସ୍ଥିତି ଦେଖିବାକୁ ମିଳିଛି ।
୨୦୧୧ ବିଶ୍ବକପ ପରେ ୨୦୧୫ ବିଶ୍ବକପ ସେମିରେ ଭାରତ ପରାଜିତ ହୋଇଥିଲା । ୨୦୨୩ ବିଶ୍ବକପ ଫାଇନାଲ ଓ ୨୦୨୩ ବିଶ୍ବ ଟେଷ୍ଟ ଚାମ୍ପିୟନଶିପ ଫାଇନାଲରେ ଭାରତକୁ ପରାଜର ସାମ୍ନା କରିବାକୁ ପଡ଼ିଥିଲା । ୨୦୨୩ ବିଶ୍ବକପରେ ଏକ ଗ୍ରୁପ ମ୍ୟାଚରେ ଭାରତ ଅଷ୍ଟ୍ରେଲିଆାକୁ ପରାସ୍ତ କରିଥିଲା । ଏଥର ଅଷ୍ଟ୍ରେଲିଆ ଟିମର ବହୁ ଷ୍ଟାର ଖେଳାଳି ପ୍ଲେଇ-୧୧ ବାହାରେ ରହିଛନ୍ତି । ତେଣୁ ଏଥର କଙ୍ଗାରୁ ସାମାନ୍ୟ ଦୁର୍ବଳ ମନେହେଉଛି, ମାତ୍ର ତାହାକୁ ହେୟଜ୍ଞାନ ମନେ କରିବା ଅନୁଚିତ ।
ବଢୁଛି ଟାଇପ-୨ ମଧୁମେହ ରୋଗୀଙ୍କ ସଂଖ୍ୟା, ଭାରତ ହେବ ଡାଏବେଟିସ ରୋଗୀଙ୍କ ରାଜଧାନୀ
ନନ୍ଦିଘୋଷ ବ୍ୟୁରୋ: ସବୁଦିନ ଶୃଙ୍ଖଳିତ ଖାଦ୍ୟ । କିନ୍ତୁ ଦିନକ ପାଇଁ ଚିଟ୍ ଡେ । ଆଧୁନିକ ଜୀବନଶୈଳୀର ଏହି ନିୟମ ଏବେ ଜୀବନକୁ କରୁଛି ବିପନ୍ନ । ଶରୀରରେ ଇନ୍ସୁଲିନକୁ କରୁଛି ଅସନ୍ତୁଳନ । ବଢୁଛି ଟାଇପ-୨ ଡାଇବେଟିସ ରୋଗୀଙ୍କ ସଂଖ୍ୟା । ଭାରତରେ ଏପରି ରୋଗୀଙ୍କ ସଂଖ୍ୟା ଦିନକୁ ବଢୁଛି । ଫଳରେ ଚୀନ ପରେ ଭାରତ ଖୁବଶୀଘ୍ର ବିଶ୍ବରେ ମଧୁମେହ ରୋଗୀଙ୍କ ରାଜଧାନୀ ହେବାକୁ ଯାଉଛି । ଜର୍ମାନୀର ଟୁବିଜେନ୍ ସ୍ବାସ୍ଥ୍ୟ ବିଶ୍ବବିଦ୍ୟାଳୟର ବୈଜ୍ଞାନିକଙ୍କ ନୂଆ ତଥ୍ୟ କହୁଛି ଜଣେ ସୁସ୍ଥ ଲୋକ ଯଦି ଦିନକ ପାଇଁ ଚକଲୋଟ ବାର, ଆଳୁ ଚିପ୍ସ, ଫାଷ୍ଟ ଫୁଡ୍ ଖାଉଛି ତା ହେଲେ ତା ଶରୀରର ଇନ୍ସୁଲିନ୍ ଅସନ୍ତୁଳନ ହୋଇ ଦୀର୍ଘ ସମୟ ପାଇଁ ମୋଟାପଣ ସୃଷ୍ଟି କରୁଛି । ଏଥିପାଇଁ ଦାୟୀ ମସ୍ତିଷ୍କର ହାଇପୋଥାଲାମସ୍ । ହାଇପୋଥାଲାମସ୍ ଶରୀରରେ ଖାଦ୍ୟ ପାଇଁ ଭୋକ ସୃଷ୍ଟି କରିଥାଏ । ଜଙ୍କ ଫୁଡ, ବେକେରୀ ଖାଦ୍ୟ ଦ୍ବାରା ଶରୀରର ରକ୍ତ ଧମନୀରେ କୋଲେଷ୍ଟ୍ରଲ ଜମି ମସ୍ତିଷ୍କକୁ ରକ୍ତ ପ୍ରବାହ କମାଇଦେଉଛି । ଫଳରେ ସୁସ୍ଥ ଲୋକଟିର ଅଧିକ ଖାଇବା ଇଚ୍ଛା ହେଉଛି । ଅତିମାତ୍ରାରେ ଖାଦ୍ୟ ଖାଇବା ଦ୍ବାରା ମୋଟାପଣର ଶିକାର ହେଉଛି । ଇନ୍ସୁଲିନ୍ ରେଜିଷ୍ଟାନସ୍ ଯୋଗୁ ଟାଇପ-୨ ମଧୁମେହରେ ପୀଡ଼ିତ ହେବା ସହ ଶରୀରରେ ଓଜନ ବଢୁଛି । ଆଉ ତାର ଜୀବନ ବିପଦରେ ପଡୁଛି । ଭାରତରେ ଏପରି ରୋଗୀଙ୍କ ସଂଖ୍ୟା ଏବେ ବଢିବଢିଚାଲିଛି ।
ଟାଇପ-୨ ଡାଇବେଟିସ୍ ହୃଦଘାତ, କିଡନୀ, ଆଖିର ରେଟିନା, ମସ୍ତିଷ୍କରେ ଭୁଲାରୋଗ ସୃଷ୍ଟି କରୁଛି । ପାଶ୍ଚାତ୍ୟ ଲୋକଙ୍କ ଦେହରେ ଚର୍ବି ଶରୀରର ସବୁ ଅଂଶରେ ଖେଳାଇ ହୋଇ ରହିଥାଏ । କିନ୍ତୁ ଭାରତ କଣ ପୂରା ଦକ୍ଷିଣ ଏସିଆ ଲୋକଙ୍କ ଦେହରେ ତଳିପେଟରେ ଚର୍ବି ଜମି ରହି ପେଟ ବଢାଇଥାଏ । ବିଶେଷଜ୍ଞଙ୍କ ମତରେ ଦକ୍ଷିଣ ଏସିଆ ଓ ଭାରତୀୟଙ୍କ କ୍ଷେତ୍ରରେ ଖାଦ୍ଯଭାବ ଯୋଗୁଁ ଖାଦ୍ଯ ଦେଖିଲେ ଅଧିକ ଖାଉଥିବାରୁ ଲୋକଙ୍କ ତଳିପେଟରେ ଚର୍ବି ଜମିଥାଏ । ଯେଉଁଥିପାଇଁ ରକ୍ତରେ କୋଲେଷ୍ଟ୍ରଲର ମାତ୍ରା ବଢୁଥିବାରୁ ମସ୍ତିଷ୍କକୁ ରକ୍ତ ପ୍ରବାହ କମିଥାଏ । କମ ରକ୍ତ ପ୍ରବାହ ଯୋଗୁଁ ମସ୍ତିଷ୍କର ବିଭିନ୍ନ ପ୍ରକାର ଅସନ୍ତୁଳନ ଦେଖାଦେଇଥାଏ । ବିଶ୍ବ ସ୍ବାସ୍ଥ୍ୟ ସଂଗଠନ ଅନୁଯାୟୀ ଜଣେ ଲୋକ ସୁସ୍ଥ ରହିବାକୁ ହେଲେ ଦୈନିକ ଅତିକମରେ ୩୦ ମିନିଟ୍ ଚାଲିବା ଦରକାର । ଏହି ଅଭ୍ୟାସ ସପ୍ତାହରେ ୫ ଦିନ କରିବା ଦରକାର ।
ରିପୋର୍ଟ ଅନୁଯାୟୀ ଭାରତରେ ଟାଇପ-୨ ଡାଇବେଟିସ ଯୋଗୁ ପ୍ରତି ୨୫ ଜଣଙ୍କ ମଧ୍ୟରୁ ଜଣେ ଲୋକ ଦୃଷ୍ଟିଶକ୍ତି ହରାଉଛନ୍ତି ।
ବିଜେପି ପାଇଁ ଓଡ଼ିଆ ଅସ୍ମିତା ଏକ ନିର୍ବାଚନୀ ଜୁମଲା,ଭୋଟ ସରିବା ପରେ ସବୁ ଭୁଲି ଗଲା ଦଳ
ନନ୍ଦିଘୋଷ ବ୍ୟୁରୋ: କୋଟିଆରେ ଆନ୍ଧ୍ରର ମନମାନି । ପୋଲାଭରମରେ ଆନ୍ଧ୍ରକୁ ଅହେତୁକ ଅନୁକମ୍ପା। ଡବଲ ଇଂଜିନ ସରକାର ଭୁଲିଯାଇଛନ୍ତି ସ୍ଵତନ୍ତ୍ର ରାଜ୍ୟପ୍ୟାହା, ସ୍ଵତନ୍ତ୍ର ପ୍ୟାକେଜ, ମହାନଦୀ ଜଳ ବିବାଦ କଥା । କଂଗ୍ରେସ ଅଭିଯୋଗ କରିଛି – ବିଜେପି ସରକାର ଓଡ଼ିଆ ଅସ୍ମିତାକୁ ଅପମାନ କରୁଛି। ଓଡ଼ିଶାର, ଓଡ଼ିଆଙ୍କ ସ୍ଵାର୍ଥ ପ୍ରସଙ୍ଗରେ ଶାସକ ଦଳ ଚୁପ୍। ଅସ୍ମିତାକୁ ନେଇ ବିଜେପି ସରକାରଙ୍କ ଦୋମୁହାଁ ନୀତି ପଦାରେ ପଡ଼ିଛି ବୋଲି କହିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ। । ଦଳର ବରିଷ୍ଠ ନେତା ଜୟଦେବ ଜେନା, ବିଜେପି ନେତାଙ୍କୁ ମନେପକାଇ ଦେଇଛନ୍ତି, ସେମାନେ ନିର୍ବାଚନ ବେଳେ ଦେଇଥିବା ପ୍ରତିଶୃତି। ୩୦୦ ୟୁନିଟ ବିଜୁଳି ମାଗଣା ଦେବାକୁ ପ୍ରତିଶ୍ରୁତି ଦେଇଥିଲା ବିଜେପି। ଏବେ କିନ୍ତୁ ବିଜୁଳି ଦର କିପରି ବଢିବ ସେ ବ୍ୟବସ୍ଥା କରୁଛି। ଏହାର ଜବାବ ରଖିଛି ବିଜେପି।
ସେପଟେ ବିଜେଡି କହିଛି, ଓଡ଼ିଶାର ସ୍ଵାର୍ଥ ପାଇଁ ଦଳ ଲଢ଼େଇ ଜାରି ରଖିବ। ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି, ରାଜ୍ୟର ହକ୍ ପାଇଁ ଲଢ଼େଇ କରିବାକୁ ମାର୍ଚ୍ଚ ୫ ତାରିଖରେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଜୟନ୍ତୀରେ ଦଳର ନେତାମାନେ ସଂକଳ୍ପ ନେବେ । ପୋଲାଭରମ, ମହାନଦୀ, କୋଟିଆରୁ ଆରମ୍ଭ କରି ରାଜ୍ୟର ସମସ୍ତ ସ୍ଵାର୍ଥ ପାଇଁ ଦିଲ୍ଳୀରୁ ପଲ୍ଲୀ ଯାଏ ବିଜେଡି ଲଢେଇ କରିବ।
ରାଜନୀତି ପାଇଁ ଡବଲ ଇଂଜିନ ସରକାର ଅସ୍ମିତାକୁ ଢାଲ କରି ଓଡ଼ିଶାବାସୀଙ୍କୁ ଭଣ୍ଡାଇ ଚାଲିଛି। ଏଥିପାଇଁ ବିଜେପି ଉପରେ ବର୍ଷିଛି କଂଗ୍ରେସ। ସେପଟେ ଓଡ଼ିଶାର ହକ୍ ପାଇଁ ବିଜେଡି ବିଜୁ ଜୟନ୍ତୀରୁ ସଂକଳ୍ପ ନେବାକୁ ଯାଉଛି। ଏହାକୁ ନେଇ ରାଜ୍ୟ ରାଜନୀତି ଉଷ୍ଣ।
ବିଜେପି ଲାଗି କଣ୍ଟା ହେଲାଣି ନିଗମ ଓ ମନ୍ତ୍ରିମଣ୍ଡଳ ସମ୍ପ୍ରସାରଣ, ସରକାର ଗଠନର ୮ ମାସ ପରେ ବି ଛିଡୁନି ଅଙ୍କ
ନନ୍ଦିଘୋଷ ବ୍ୟୁରୋ: ବିବାଦୀୟ ସ୍ଥିତିରେ ବିଜେପିର ନିଗମ ବଣ୍ଟନ ପ୍ରକ୍ରିୟା । ଘୋଷଣା ପୂର୍ବରୁ ଆରମ୍ଭ ହେଲାଣି ବିବାଦ। ମୁହଁ ଖୋଲିଲେଣି ଦଳର ପ୍ରମୁଖ ଦାବିଦାର। ପଦ ତୁଳନାରେ ବଢ଼ି ଚାଲିଛି ଆଶାୟୀଙ୍କ ସଂଖ୍ୟା। ସରକାର ଗଠନର ୮ ମାସ ପରେ ବି ନିଗମ ବଣ୍ଟନ କରିପାରୁନି ବିଜେପି। ଯାହାକୁ ନେଇ ଏବେ ମୁହଁ ଖୋଲିଲେଣି ପୂର୍ବତନ ବିଧାୟକ ସୁବାସ ପାଣିଗ୍ରାହୀ। ତାଙ୍କ ଯୁକ୍ତି ହେଉଛି, ନିଗମ ଘୋଷଣା ହେବ ହେବ କହି ସମୟ ଗଡ଼ିଚାଲିଛି । ଆମେ ଦଳ ପାଇଁ କାମ କରିଛୁ, ତେଣୁ ନିଗମ ବଣ୍ଟନ ବେଳେ ଦଳର ବରିଷ୍ଠ ନେତାଙ୍କ ନେତୃତ୍ବ ରହିବ । ଅନ୍ୟପଟେ ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କ ଓଡିଶା ଗସ୍ତ ପରେ ବି ନିଗମ ଘୋଷଣା ହୋଇପାରୁ ନଥିବାରୁ ଉଠିଛି ପ୍ରଶ୍ନ।
ସେପଟେ ମନ୍ତ୍ରିମଣ୍ଡଳରେ ଖାଲି ପଡିଛି ୬ଟି ଆସନ। ଏହି ସ୍ଥାନ ମୁଖ୍ୟମନ୍ତ୍ରୀ ପୂରଣ କରିବେ କି ନାହିଁ ତାକୁ ନେଇ ମଧ୍ୟ ମୁହଁ ଖୋଲିଲେଣି ବିଜେପି ବିଧାୟକ। ଆବଶ୍ୟକତାକୁ ଦୃଷ୍ଟିରେ ରଖି ମନ୍ତ୍ରିମଣ୍ଡଳ ସମ୍ପ୍ରସାରଣ କରାଯିବ ବୋଲି ନେତା କହୁଥିବା ବେଳେ, ଦାୟିତ୍ବ ନେବାକୁ ମଧ୍ୟ ପ୍ରସ୍ତୁତ ହେଲେଣି। ଏହାରି ଭିତରେ ମନ୍ତ୍ରିମଣ୍ଡଳ ସମ୍ପ୍ରସାରଣ ପାଇଁ ପାଓ୍ବାର କରିଡରରେ ଚର୍ଚ୍ଚା ଆରମ୍ଭ ହୋଇଛି। ତେବେ ରାଜ୍ୟ ଓ ଶୀର୍ଷ ନେତୃତ୍ବ ମଧ୍ୟରେ ଆଲୋଚନା ପରେ ନିଷ୍ପତ୍ତି ନିଆଯିବ ବୋଲି କହିଛନ୍ତି ବିଜେପି ବିଧାୟକ।
ନିଗମ ବଣ୍ଟନ ଓ ମନ୍ତ୍ରିମଣ୍ଡଳ ସମ୍ପ୍ରସାରଣ ଚର୍ଚ୍ଚାକୁ ନେଇ ଉଷ୍ମ ହେଲାଣି ବିଜେପି ଶିବିର। କାହାକୁ କେମିତି ଦଳ ଥଇଥାନ କରିବ, ତାକୁ ନେଇ ଚିନ୍ତାରେ ପଡ଼ିଲେଣି ରାଜ୍ୟ ଠାରୁ କେନ୍ଦ୍ର ନେତୃତ୍ବ ଯାଏ।
ଦିନକ ପରେ ବିଜୁ ଜୟନ୍ତୀ,ମହାପୁରୁଷଙ୍କୁ ଅସମ୍ମାନ ଓ ନବେ ଦଶକର ପରମ୍ପରାକୁ କୁଠାରଘାତ ନେଇ ବର୍ଷିଲା ବିଜେଡି
ନନ୍ଦିଘୋଷ ବ୍ୟୁରୋ: ରାଜ୍ୟ ସରକାରଙ୍କ ବିଚିତ୍ର ନୀତି। ଗୋଟିଏ ମାଡ଼ରେ ମହାପୁରୁଷଙ୍କୁ ଅସମ୍ମାନ ଓ ୯୦ ଦଶକର ପରମ୍ପରାକୁ କୁଠାରଘାତ । କେବଳ ଓଡ଼ିଶା କି ଭାରତ ନୁହେଁ, ସାରା ବିଶ୍ବରେ ବରପୁତ୍ରର ଆଖ୍ୟା ପାଇଥିବା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ପ୍ରତି ଡବଲ ଇଂଜିନ ସରକାର ଅସମ୍ମାନ ପ୍ରଦର୍ଶନ କରିବାର ଆଶଙ୍କା ରହିଛି । କାରଣ ବିଜୁ ଜୟନ୍ତୀକୁ ମାତ୍ର ଦିନେ ବାକି ଅଛି । ଏହି ଦିନକୁ ପ୍ରତି ବର୍ଷ ପଞ୍ଚାୟତିରାଜ ଦିବସ ଭାବେ ପାଳି ଆସୁଥିଲେ ରାଜ୍ୟ ସରକାର । ହେଲେ ନୂଆ ସରକାର ଏଯାଏଁ ଏହା ପାଳନ କରିବାକୁ କୌଣସି ପଦକ୍ଷେପ ନେଇ ନଥିବା ଅଭିଯୋଗ କରିଛି ବିଜୁ ଜନତା ଦଳ । ଏହାକୁ ପଞ୍ଚାୟତିରାଜ ଦିବସ ଭାବେ ପାଳିବାକୁ ଏଯାଏଁ ସରକାରୀ ଅଧିକାରୀ କି ଜିଲ୍ଲାପାଳମାନଙ୍କୁ ରାଜ୍ୟ ସରକାରଙ୍କ ପକ୍ଷରୁ କୌଣସି ନିର୍ଦ୍ଦେଶ ଯାଇନି । ୯୦ ଦଶକରୁ ଓଡ଼ିଶାକୁ ଶାସନ କରିଥିବା ବିଭିନ୍ନ ସରକାର ବିଜୁ ପଟ୍ଟନାୟକଙ୍କ ସମ୍ମାନରେ ତାଙ୍କ ଜନ୍ମଦିନକୁ ପଞ୍ଚାୟତିରାଜ ଦିବସ ଭାବେ ପାଳି ଆସୁଥିଲେ । ହେଲେ ଦଳମତଠାରୁ ଉପରେ ଥିବା ବିଜୁ ବାବୁଙ୍କୁ ମୋହନ ମାଝୀ ସରକାର ରାଜନୈତିକ ଦୃଷ୍ଟିକୋଣରୁ ଦେଖୁଥିବାରୁ ଅସନ୍ତୋଷ ବଢିଛି । ସରକାର ଆସିବେ ଓ ଯିବେ । ହେଲେ ମହାପୁରୁଷଙ୍କ ସମ୍ମାନ ଓ ଗଣତନ୍ତ୍ରର ମହାନୀୟତା ପାଇଁ ବିଜୁ ଜୟନ୍ତୀକୁ ପଞ୍ଚାୟତିରାଜ ଦିବସ ଭାବେ ପାଳନ ଜାରି ରଖିବାକୁ ବିଜେଡି ଦାବି କରିଛି । କଂଗ୍ରେସ ବି ସରକାର ଥିବା ସମୟରେ ବିଜୁ ପଟ୍ଟନାୟକଙ୍କ ସମ୍ମାନରେ କାମ କରିଥିଲା । ଯେଉଁଥିପାଇଁ ବିଜୁ ଜୟନ୍ତୀକୁ ହିଁ ପଞ୍ଚାୟତିରାଜ ଦିବସ ଭାବେ ପାଳନ କରିବାକୁ ସରକାରଙ୍କ ପାଖରେ କଂଗ୍ରେସ ବି ଦାବି ରଖିଛି ।
ନୂଆ ସରକାର ଆସୁ ଆସୁ ହିଁ ବିଜୁ ପଟ୍ଟନାୟକଙ୍କୁ ନେଇ ରାଜନୀତି ଆରମ୍ଭ କରି ଦେଇଥିଲା । ସରକାର ଗଠନ ହେଉ ହେଉ ବିଜୁ ପଟ୍ଟନାୟକ କ୍ରୀଡ଼ା ସମ୍ମାନର ନାଁ ପରିବର୍ତ୍ତନ ହୋଇଥିବା ନେଇ ବିଜ୍ଞପ୍ତି ପ୍ରକାଶ କରିଥିଲେ ରାଜ୍ୟ ସରକାର । ହେଲେ ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଲୋକପ୍ରିୟତା ଏତେ ଅଧିକ ଥିଲା ଯେ ବିଭିନ୍ନ ମହଲରୁ ବିରୋଧ ସହ ନିନ୍ଦା ସହିଥିଲେ ରାଜ୍ୟ ସରକାର । ବାଧ୍ୟ ହୋଇ ଗୋଟାଏ ଦିନରେ ହିଁ ବିଜ୍ଞପ୍ତି ସଂଶୋଧନ କରାଗଲା ଓ ରବିବାର ଛୁଟି ଦିନ ସକାଳୁ ଲୋକସେବା ଭବନ ଆସି ବିଜୁ ପଟ୍ଟନାୟକ କ୍ରୀଡ଼ା ସମ୍ମାନର ନାଁ ପରିବର୍ତ୍ତନ ହୋଇ ନଥିବା ନେଇ ମୁଖ୍ୟମନ୍ତ୍ରୀ ମୋହନ ମାଝୀ କୈଫତ ଦେଲେ । ପ୍ରଶ୍ନ ଉଠୁଛି, ଜାଣିଶୁଣି ବିଜୁ ପଟ୍ଟନାୟକଙ୍କୁ ରାଜନୈତିକ ଦଣ୍ଡିକୁ ଟାଣୁଛନ୍ତି ନା ବିଜୁ ବାବୁଙ୍କ ଲୋକପ୍ରିୟତାକୁ ହଜମ କରି ପାରୁ ନାହାନ୍ତି ରାଜ୍ୟ ସରକାର ।
ମାର୍ଚ୍ଚ ମାସର ନିଯୁକ୍ତି କ୍ୟାଲେଣ୍ଡର ଜାରି କଲା OSSC: ଚଳିତ ମାସରେ କେଉଁ କେଉଁ ପରୀକ୍ଷା ହେବ?
ଭୁବେନଶ୍ବର: ଓଡ଼ିଶା କର୍ମଚାରୀ ଚୟନ ଆୟୋଗ (OSSC) ତରଫରୁ ମାର୍ଚ୍ଚ ମାସ ୨୦୨୫ର ନିଯୁକ୍ତି କ୍ୟାଲେଣ୍ଡର ଜାରି କରାଯାଇଛି । ଚଳିତ ମାସରେ କେଉଁ କେଉଁ ପଦ ପାଇଁ ପରୀକ୍ଷା ଅନୁଷ୍ଠିତ ହେବ, ତାହା OSSC ଓ୍ବେବସାଇଟରେ ଜାରି କରାଯାଇଛି । ବିଭିନ୍ନ ପଦ ପାଇଁ ଆବେଦନ କରିଥିବା ପ୍ରାର୍ଥୀମାନେ ଓ୍ବେବସାଇଟକୁ ଯାଇ ପରୀକ୍ଷା ସମ୍ପର୍କିତ ସବିଶେଷ ତଥ୍ୟ ପାଇ ପାରିବେ । କେଉଁ ତାରିଖରେ କେଉଁ ପରୀକ୍ଷା ଅନୁଷ୍ଠିତ ହେବ, ତା’ର ସଠିକ୍ ତାରିଖ ପରବର୍ତ୍ତୀ ସମୟରେ ଅଲଗା ଭାବେ ଜାରି କରାଯିବ ।
– ଚଳିତ ମାସ ୧୬ ତାରିଖରେ ମିଳିତ ବୈଷୟିକ ସେବା ନିଯୁକ୍ତି ପରୀକ୍ଷା ୨୦୨୩ର ମୁଖ୍ୟ ଲିଖିତ ପରୀକ୍ଷା ଅନୁଷ୍ଠିତ ହେବ ।
– ୨୩ ତାରିଖରେ ଲିଭ ଟ୍ରେନିଂ ରିଜର୍ଭ (LTR) ଶିକ୍ଷକ, ୨୦୨୪ ନିଯୁକ୍ତିର ପ୍ରିଲିମିନାରୀ ପରୀକ୍ଷା ଅନୁଷ୍ଠିତ ହେବ ।
– ୨୯ ଓ ୩୦ ତାରିଖରେ ଗ୍ରୁପ- ବି ଓ ଗ୍ରୁପ-ସି ରାଜ୍ୟ କ୍ୟାଡର ପଦ/ସେବା, ୨୦୨୪ ପାଇଁ ମିଳିତ ସ୍ନାତକ ସ୍ତରୀୟ ନିଯୁକ୍ତିର ମୁଖ୍ୟ ଲିଖିତ ପରୀକ୍ଷା ଅନୁଷ୍ଠିତ ହେବ ।
– ୧୮ ତାରିଖ ପରେ ଆସିଷ୍ଟାଣ୍ଟ ଟ୍ରେନିଂ ଅଫିସର (NTC/NAC), ୨୦୨୪ର ପ୍ରାକ୍ଟିକାଲ / ଟ୍ରେଡ ଟେଷ୍ଟ ହେବ ।
– ମାସର ଚତୁର୍ଥ ସପ୍ତାହରେ STA, ୨୦୨୪ ଅଧିନସରେ ଟ୍ରାଫିକ କନଷ୍ଟେବଳ ଫିଜିକାଲ ମେଜରମେଣ୍ଟ ଓ ଫିଜିକାଲ ଟେଷ୍ଟ କରାଯିବ ।