ନନ୍ଦିଘୋଷ ବ୍ୟୁରୋ: ଆସନ୍ତା ବୁଧବାର ପୃଥିବୀପୃଷ୍ଠକୁ ଫେରିବେ ମହାକାଶକାରୀ ସୁନୀତା ୱିଲିୟମସ । ଏଥିପାଇଁ ସବୁ ପ୍ରସ୍ତୁତି ଏକ ପ୍ରକାର ଶେଷ ହୋଇଛି। ଏହା ସ୍ପଷ୍ଟ କରିଛି ନାସା । ସୁନୀତା ୱିଲିୟମସଙ୍କ ସହିତ ଆଉ ୩ ଜଣ ମହାକାଶକାରୀ ମଧ୍ୟ ଫେରିବେ । ଗତ ୯ମାସ ଧରି ମହାକାଶରେ ଫସି ରହିଥିବା ସୁନିତା ୱିଲିୟମ୍ସ ଏବଂ ତାଙ୍କ ସାଥୀ ବୁଚ୍ ୱିଲମୋର ମାର୍ଚ୍ଚ ୧୯ ତାରିଖରେ ସ୍ପେସଏକ୍ସର ଡ୍ରାଗନ ମହାକାଶଯାନରେ ପୃଥିବୀକୁ ଫେରିବାକୁ ଯାଉଛନ୍ତି । ତେବେ ISSରେ ୯ମାସ ବିତାଇବା ପରେ, ସବୁଠାରୁ ବଡ଼ ପ୍ରଶ୍ନ ଉଠୁଛି ଯେ ଏହି ଲମ୍ବା ମିଶନ ପାଇଁ NASA ସେମାନଙ୍କୁ କେତେ ଟଙ୍କା ଦରମା ଦେବ ? ଦରମା ସହିତ ଅନ୍ୟ କିଛି ସହଯୋଗ କରିବ କି ? ଆସନ୍ତୁ ଜାଣିବା ..
ସୁନିତା ୱିଲିୟମ୍ସ ମହାକାଶରୁ ଫେରି ଆସୁଛନ୍ତି । ନାସାର ମହାକାଶଚାରୀ ସୁନିତା ୱିଲିୟମ୍ସ ଏବଂ ତାଙ୍କ ସହଯୋଗୀ ବୁଚ୍ ୱିଲମୋର ଆଠ ଦିନିଆ ମିଶନରେ ଯାଇଥିବାବେଳେ କିଛି ତ୍ରୁଟି କାରଣରୁ ସେମାନଙ୍କୁ ପ୍ରାୟ ନଅ ମାସ ମହାକାଶରେ ବିତାଇବାକୁ ପଡିଥିଲା। ଯାନ୍ତ୍ରିକ ଅସୁବିଧା ଯୋଗୁଁ ତାଙ୍କର ପ୍ରତ୍ୟାବର୍ତ୍ତନ ବାରମ୍ବାର ସ୍ଥଗିତ ହେଉଥିଲା । କିନ୍ତୁ ଶେଷରେ ଏହାର ଅନ୍ତ ଘଟିଛି । ମାର୍ଚ୍ଚ ୧୯ ତାରିଖରେ, ସେମାନେ ସ୍ପେସଏକ୍ସର ଡ୍ରାଗନ ମହାକାଶଯାନ ମାଧ୍ୟମରେ ପୃଥିବୀକୁ ଫେରିବାକୁ ଯାଉଛନ୍ତି ।
ନାସା କେତେ ଦରମା ଦେବ ?
ନାସାର ମହାକାଶଚାରୀମାନେ ସରକାରୀ କର୍ମଚାରୀ ଏବଂ ସେମାନଙ୍କ ପାଇଁ କୌଣସି ଓଭରଟାଇମ୍ ଦରମା ନାହିଁ। ତାଙ୍କର ଦରମା GS-15 ପେ ଗ୍ରେଡ୍ ଅଧୀନରେ ଆସେ, ଯାହା ଆମେରିକାର ବରିଷ୍ଠ ସରକାରୀ ଅଧିକାରୀମାନଙ୍କୁ ଦିଆଯାଏ । ଏହି ଅନୁସାରେ, ସୁନିତା ୱିଲିୟମ୍ସ ତାଙ୍କର ୯ମାସର ଦୀର୍ଘ ମିଶନ ପାଇଁ ପ୍ରାୟ ୮୧ ଲକ୍ଷ ଟଙ୍କାରୁ ୧.୦୫କୋଟି ଟଙ୍କା ପର୍ଯ୍ୟନ୍ତ ଦରମା ପାଇବେ। କିନ୍ତୁ ଯଦି ଆପଣ ଭାବୁଛନ୍ତି ଯେ ଏତେ ଦିନ ପର୍ଯ୍ୟନ୍ତ ମହାକାଶରେ ରହିବା ବଦଳରେ ସେମାନେ କିଛି ବଡ଼ ବୋନସ ପାଇବେ, ତେବେ ଏହା ଭୁଲ ଧାରଣା ।
ଏତିକି ଅତିରିକ୍ତ ଦେୟ ଦିଆଯିବ
ନାସା ମହାକାଶଚାରୀମାନଙ୍କୁ ମାତ୍ର $୪, ଅର୍ଥାତ୍ ପ୍ରାୟ ୩୪୭ଟଙ୍କା ପ୍ରତିଦିନ ଭତ୍ତା ଦିଏ। ଏହାର ଅର୍ଥ ହେଉଛି, ସମଗ୍ର ୨୮୭ ଦିନର ମିଶନରେ, ସେ ଅତିରିକ୍ତ ଦେୟ ଭାବରେ ମୋଟ ମାତ୍ର $୧,୧୪୮ (ପ୍ରାୟ ₹୧ ଲକ୍ଷ) ପାଇବେ। ଏହା ଜାଣି ସମସ୍ତଙ୍କୁ ଆଶ୍ଚର୍ଯ୍ୟ ଲାଗିପାରେ ଯେ ଏତେ ମାସ ଧରି ମହାକାଶରେ ରହିବା ଏବଂ ବିପଦ ନେବା ସତ୍ତ୍ୱେ, ସେମାନେ ଏତେ କମ ପରିମାଣର ଭତ୍ତା ପାଉଛନ୍ତି ।
ମହାକାଶଯାନରେ ବିପଦ କ’ଣ ?
ସ୍ପେସଏକ୍ସ ଫାଲକନ୍ ୯ ରକେଟ୍ ପ୍ରାୟ ୩ ଘଣ୍ଟାରେ ୪୦୦ କିଲୋମିଟର ଦୂରତା ଅତିକ୍ରମ କରିବ ଏବଂ ଆଟଲାଣ୍ଟିକ ମହାସାଗର କିମ୍ବା ମେକ୍ସିକୋ ଉପସାଗରରେ ପଡ଼ିଯିବ। କିନ୍ତୁ ପୃଥିବୀକୁ ଫେରିବା ଏତେ ସହଜ ନୁହେଁ। ବିଶେଷଜ୍ଞଙ୍କ ମତରେ, ଯେତେବେଳେ ଡ୍ରାଗନ୍ କ୍ୟାପସୁଲ୍ ପୃଥିବୀର ବାୟୁମଣ୍ଡଳରେ ପ୍ରବେଶ କରେ, ଏହାର କୋଣ ସମ୍ପୂର୍ଣ୍ଣ ସଠିକ୍ ହେବା ଆବଶ୍ୟକ। ଛୋଟ ଭୁଲ ମଧ୍ୟ ଏକ ବଡ଼ ଦୁର୍ଘଟଣାର କାରଣ ହୋଇପାରେ। ଏହା ପୂର୍ବରୁ ମଧ୍ୟ, ମହାକାଶ ଅଭିଯାନ ସମୟରେ, ଭୁଲ ପ୍ରବେଶ କୋଣ ଯୋଗୁଁ କ୍ରୁ ସଦସ୍ୟମାନେ ଅସୁବିଧାର ସମ୍ମୁଖୀନ ହୋଇଛନ୍ତି ।
ସୂଚନା ଅନୁଯାୟୀ, ଆନ୍ ମ୍ୟାକଲେନ୍, ନିକୋଲ୍ ଆୟର୍ସ, ଟାକୁୟା ଓନିଶି ଏବଂ କିରିଲ୍ ପେସକୋଭ୍ ଏବେ ସୁନିତା ୱିଲିୟମ୍ସ ଏବଂ ତାଙ୍କ ସହଯୋଗୀ ବୁଚ୍ ୱିଲମୋରଙ୍କ ସ୍ଥାନରେ ଆଇଏସଏସର ନୂତନ ମିଶନର ଦାୟିତ୍ୱ ନେବେ । ଗତ ବର୍ଷ ଜୁନ ୫ ତାରିଖରେ ସେମାନେ ISS କୁ ଯାଇଥିଲେ। ଏକ ମରାମତି କାମ କରିବାକୁ ଯାଇଥିଲେ ସୁନୀତା ଓ ବଚ୍ । କିଛି ଦିନରେ କାମ ଶେଷ କରି ସେମାନେ ବୋଇଂ ଷ୍ଟାରଲାଇନର୍ ରେ ଫେରିବାର ଥିଲା। କିନ୍ତୁ ଏହି ମହାକାଶଯାନରେ ତ୍ରୁଟି ଦେଖାଯିବାରୁ ସେମାନେ ଫେରି ପାରିନଥିଲେ।
