ଆସିକା: ଆସିକା ଧରାକୋଟ ବ୍ଲକ ବଡ଼ଗଡ଼ ଥାନା ଖାରିପଲ୍ଲୀରେ ଗୋଷ୍ଠୀ ସଂଘର୍ଷ। ଗୋଷ୍ଠୀ ସଂଘର୍ଷରେ ୩ ଜଣଙ୍କର ମୃତ୍ୟୁ ହୋଇଛି । ଗୋଟିଏ ଗୋଷ୍ଠୀର ୨ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଗୋଷ୍ଠୀର ଜଣକର ମୃତ୍ୟୁ ହୋଇଛି । ସଂଘର୍ଷରେ ୩ ଜଣ ଗୁରୁତର ଆହତ ହୋଇଛନ୍ତି । ସଂଘର୍ଷରେ ଗୋଟିଏ ଗୋଷ୍ଠୀର ମୃତ୍ୟୁ ହୋଇଥିବା ୨ ଜଣଙ୍କ ମଧ୍ୟରେ ରହିଛନ୍ତି ବାପା ଓ ପୁଅ । ସେମାନେ ହେଲେ ଖଦାଳ ବେହେରା ଓ ରତ୍ନାକର ବେହେରା। ଅନ୍ୟ ଗୋଷ୍ଠୀର ମୃତକ ହେଲେ ରମେଶ ବେହେରା। ୩ ମୃତଦେହକୁ ପୋଲିସ ବ୍ୟବଚ୍ଛେଦ ପାଇଁ ବ୍ରହ୍ମପୁର ପଠାଇଛି। ଗୁଣିଗାରେଡି ଘଟଣାକୁ ନେଇ ଗତକାଲି ଖାରିପଲ୍ଲୀରେ ଏକ ବୈଠକ ବସିଥିଲା। ବୈଠକ ପରେ ଦୁଇ ଗୋଷ୍ଠୀ ମଧ୍ୟରେ ପ୍ରଥମେ କଥା କଟାକଟି ଓ ପରେ ସଶସ୍ତ୍ର ଆକ୍ରମଣ ହୋଇଥିଲା। ଗୋଷ୍ଠୀ ସଂଘର୍ଷ ପରେ ଗାଁରେ ଚାପା ଉତ୍ତେଜନା ଲାଗି ରହିଛି। ଦୁଇ ପ୍ଲାଟୁନ ପୋଲିସ ପୋର୍ସ ସହ ଦୁଇ ଅତିରିକ୍ତ ଆରକ୍ଷୀ ଅଧିକାରୀ, ଆସିକା SDPO, ଧରାକୋଟ ତହସିଲଦାର ଓ ୫ ଥାନାର IIC ରହି ତଦନ୍ତ କରୁଛନ୍ତି। ଏହି ଘଟଣାରେ ୧୦ ଜଣଙ୍କୁ ଅଟକ ରଖି ପଚରାଉଚରା ଜାରି ରଖିଛି ପୋଲିସ।
ପ୍ରେମ ବ୍ୟାପାରରୁ ଛୁରାମାଡ଼ ! ପୁରୁଷ କର୍ମଚାରୀଙ୍କ ଛୁରାମାଡ଼ରେ ମହିଳା କର୍ମଚାରୀ ଆହତ
ନିଆଳି: କଟକ ନିଆଳି ଚିତ୍ତରଞ୍ଜନ ସେବା ସଦନରେ ଅଭାବନୀୟ ଘଟଣା। ପୁରୁଷ କର୍ମଚାରୀଙ୍କ ଛୁରାମାଡ଼ରେ ମହିଳା କର୍ମଚାରୀ ଆହତ। ଅଭିଯୁକ୍ତକୁ ପୋଲିସର ହସ୍ତାନ୍ତର କଲେ ସେବାସଦନ କର୍ତ୍ତୃପକ୍ଷ। ଆହତ ମହିଳା କର୍ମଚାରୀଙ୍କ ଚାଲିଛି ଚିକିତ୍ସା। ପ୍ରେମ ବ୍ୟାପାରକୁ ନେଇ ଛୁରାମାଡ଼ ହୋଇଥିବା ସନ୍ଦେହ କରାଯାଉଛି।
’ଜଣେ ୫୦ ବର୍ଷରେ ବିବାହ କରିପାରୁଛି, ଅମିର ୬୦ ବର୍ଷରେ ପାର୍ଟନର ଖୋଜି ପାରିବେନି କାହିଁକି?’
ବଲିଉଡ ଅଭିନେତା ଅମିର ଖାନ ତାଙ୍କର ନୂଆ ପାର୍ଟନରଙ୍କ ପାଇଁ ବର୍ତ୍ତମାନ ସମୟରେ ବେଶ ଚର୍ଚ୍ଚାରେ ରହିଛନ୍ତି । ଅମିରଙ୍କୁ ଏବେ ୬୦ ବର୍ଷ ହୋଇଥିବା ବେଳେ ସେ ଏବେ ଗୌରୀ ସ୍ପ୍ରେଟଙ୍କୁ ଡେଟ କରୁଛନ୍ତି । ଅମିରଙ୍କର ଦୁଇ ପତ୍ନୀଙ୍କ ସହ ତଲାକ ହୋଇସାରିଥିବା ବେଳେ ସେ ଏବେ ୩ଟି ସନ୍ତାନର ପିତା ଅଟନ୍ତି । ନିକଟରେ ନିଜର ଜନ୍ମଦିନ ଅବସରରେ ଅମିର ତାଙ୍କର ଗାର୍ଲଫ୍ରେଣ୍ଡଙ୍କୁ ନେଇ ଖୁଲାସା କରିଥିଲେ । ଏହାପରେ ଅମିରଙ୍କ ବିଷୟରେ ଲୋକମାନେ ନାନା ପ୍ରକାରର ଆଲୋଚନା କରିଥିଲେ । ଏହା ମଧ୍ୟରେ ବଲିଉଡ ଫିଲ୍ମମେକର ବିକ୍ରମ ଭଟ୍ଟ ଅଭିନେତାଙ୍କ ଏହି ରିଲେସନଶିପକୁ ନେଇ ନିଜର ରାୟ ରଖିଛନ୍ତି ।
ଗୌରୀ ବେଙ୍ଗାଲୁରୁର ଜଣେ ମହିଳା ବ୍ୟବସାୟୀ ଓ ତାଙ୍କର ୬ ବର୍ଷର ଏକ ପୁଅ ରହିଛି । ଗୌରୀ ଅଭିନେତାଙ୍କୁ ଦୁଇ ଦଶନ୍ଧି ଧରି ଜାଣିଛନ୍ତି ଓ ୧୮ ମାସ ତଳେ ସେ ଅମିରଙ୍କ ଜୀବନରେ ଆସିଥିଲେ । ଅଧିକ ବର୍ଷରେ ପ୍ରେମ କରିବାକୁ ନେଇ ବିକ୍ରମ ନିଜର ରାୟ ଦେଇଛନ୍ତି । ସେ ଯଦି ୫୦ ବର୍ଷରେ ବିବାହ କରିପାରୁଛନ୍ତି, ଅମିର ୬୦ ବର୍ଷରେ ପାର୍ଟନର କାହିଁକି ଖୋଜିପାରିବେନି ବୋଲି ବିକ୍ରମ ପ୍ରଶ୍ନ କରିଛନ୍ତି । ବୟସ କେବଳ ଏକ ନମ୍ବର । ଖୁସି ପାଇବାର କୌଣସି ବୟସ ନଥାଏ । ବୟସ ଯେତିକି ଯେତିକି ଆଗକୁ ବଢ଼େ, ସେପରି ସ୍ଥିତିରେ ଖୁସି ପାଇବାର କୌଣସି ବୟସ ନଥାଏ । ଜୀବନ ଆଗକୁ ବଢ଼ିବା ସମୟରେ ଏହା ସମ୍ପର୍କ ଓ ସେକ୍ସୁଆଲିଟି ବିଷୟରେ ରହିନଥାଏ । ଏପରି ସ୍ଥିତିରେ ଏକୁଟିଆ ପଣ ବଦଳରେ ସାଥୀ ବିଷୟରେ ଅଧିକ ରହିଥାଏ । ଏପରି ସ୍ଥିତିରେ ଜଣେ ଯଦି ଆପଣଙ୍କୁ ବୁଝିପାରୁଥିବ, ତେବେ ସବୁ କିଛି ଠିକ୍ ହୋଇଯିବ । ଯଦି ଅମିରଙ୍କୁ ଏଭଳି ଜଣେ ମଣିଷ ମିଳିଯାଇଛନ୍ତି, ତେବେ ସେଥିପାଇଁ ସେ ବହୁତ ଖୁସି । ସେ ଏଥିପାଇଁ ଅମିରଙ୍କୁ ଶୁଭକାମନା ଜଣାଉଛନ୍ତି ବୋଲି ବିକ୍ରମ କହିଛନ୍ତି ।
ଆଜିଠାରୁ ମାଟ୍ରିକ ପରୀକ୍ଷା ଖାତା ମୂଲ୍ୟାୟନ: ୫ ଲକ୍ଷରୁ ଅଧିକ ପରୀକ୍ଷାର୍ଥୀଙ୍କ ଭାଗ୍ୟ ନିର୍ଦ୍ଧାରଣ ହେବ
କଟକ: ଆଜିଠାରୁ ମାଟ୍ରିକ ପରୀକ୍ଷା ଖାତାଦେଖା ଆରମ୍ଭ। ମାଧ୍ୟମିକ ଶିକ୍ଷା ପରିଷଦ ଦ୍ବାରା ପରିଚାଳିତ ମାଟ୍ରିକ ପରୀକ୍ଷାର ଖାତା ମୂଲ୍ୟାୟନ ଆରମ୍ଭ ହୋଇଛି। ରାଜ୍ୟରେ ଏଥର ୫ ଲକ୍ଷ ୨୦ ହଜାର ପରୀକ୍ଷାର୍ଥୀ ମାଟ୍ରିକ, ମଧ୍ୟମା ଓ ରାଜ୍ୟ ଓପନ ସ୍କୁଲ ସାର୍ଟିଫିକେଟ ପରୀକ୍ଷା ଦେଇଥିବା ବେଳେ ୫୧ ଟି ପରୀକ୍ଷା କେନ୍ଦ୍ରରେ ଖାତା ଦେଖା ଆରମ୍ଭ ହୋଇଛି। ପ୍ରାୟ ୧୨ ହଜାର ଶିକ୍ଷକ ଶିକ୍ଷୟିତ୍ରୀ ମୂଲ୍ୟାୟନ କାମରେ ନିୟୋଜିତ ହୋଇଛନ୍ତି। ମୂଲ୍ୟାୟନ ଏକ ଗୁରୁତ୍ୱପୂର୍ଣ୍ଣ କାମ ହୋଇଥିବାରୁ ଏହାକୁ ଦାୟିତ୍ବ ର ସହ ସମ୍ପାଦନ କରିବାକୁ ଲକ୍ଷ୍ଯ ରଖିଛନ୍ତି ଶିକ୍ଷକ ଶିକ୍ଷୟିତ୍ରୀ।
ନାରୀ ସୁରକ୍ଷା ନେଇ ବିରୋଧୀଙ୍କ ପ୍ରବଳ ହଟ୍ଟଗୋଳ: ଦିନ ୧୨ଟା ଯାଏଁ ଗୃହକାର୍ଯ୍ୟ ମୁଲତବି
ଭୁବନେଶ୍ବର: ଦିନ ୧୨ଟା ଯାଏଁ ଗୃହ ମୁଲତବି । ବିରୋଧୀଙ୍କ ହଟ୍ଟଗୋଳ ଯୋଗୁଁ ଗୃହକୁ ଦିନ ୧୨ଟା ଯାଏଁ ମୁଲତବୀ ରଖିଲେ ବାଚସ୍ପତି । ବିଧାନସଭା ବଜେଟ ଅଧିବେଶନର ଆଜିର ପ୍ରଶ୍ନ ଉତ୍ତର କାଳ ଅରମ୍ଭରୁ ଗୃହରେ ହଟ୍ଟଗୋଳ । ନାରୀ ସୁରକ୍ଷା ନେଇ ମୁଖ୍ୟମନ୍ତ୍ରୀଙ୍କ ବିବୃତ୍ତି ଦାବି କରି କଂଗ୍ରେସ ସଦସ୍ୟ ଗୃହ ମଧ୍ୟଭାଗକୁ ଆସି ପ୍ରତିବାଦ କରିଛନ୍ତି । ନାରୀଙ୍କ ସୁରକ୍ଷା ଦାବିରେ କଂଗ୍ରେସ ବିଧାୟକମାନେ ଗୃହ ମଧ୍ୟଭାଗକୁ ଆସି ହଟ୍ଟଗୋଳ କରିଥିଲେ । ନାରୀ ସୁରକ୍ଷା ପାଇଁ ଗୃହ କମିଟି ଦାବି ଦୋହରାଇଛି କଂଗ୍ରେସ । ପ୍ରବଳ ହଟ୍ଟଗୋଳ ଯୋଗୁଁ ବାଚସ୍ପତି ଗୃହ କାର୍ଯ୍ୟକୁ ଦିନ ୧୨ଟା ଯାଏ ମୁଲତବି ରଖିଛନ୍ତି ।
IPL ଇତିହାସର ୫ଟି ବଡ଼ ବିବାଦ: କେଉଁ ସିଜିନରେ ଘଟିଥିଲା କେଉଁ ଘଟଣା?
ନୂଆଦିଲ୍ଲୀ: ଆସନ୍ତା ୨୨ ତାରିଖରୁ ଇଣ୍ଡିଆନ ପ୍ରିମିୟର ଲିଗ (IPL)ର ଶୁଭାରମ୍ଭ ହେବ । କୋଲକତା ନାଇଟ ରାଇଡର୍ସ ଓ ରୟାଲ ଚାଲେଞ୍ଜର୍ସ ବେଙ୍ଗାଲୁରୁ ମଧ୍ୟରେ ପ୍ରଥମ ମ୍ୟାଚ ଖେଳାଯିବ । ମେ ୨୫ରେ ଏହି ଟୁର୍ଣ୍ଣାମେଣ୍ଟର ଫାଇନାଲ ମୁକାବିଲା ଖେଳାଯିବ । ଏଥର ୧୦ଟି ଟିମ ମଧ୍ୟରେ ଫାଇନାଲ ସମେତ ୭୪ଟି ମ୍ୟାଚ ଖେଳାଯିବ । ତେବେ ଆଇପିଏଲର ଇତିହାସ ଯେତିକି ରୋଚକ, ସେତିକି ବିବାଦରେ ମଧ୍ୟ ଭରି ରହିଛି । ପ୍ରଥମରୁ ୧୭ତମ ସିଜିନ ମଧ୍ୟରେ ଅନେକ ବିବାଦ ଦେଖିବାକୁ ମିଳିଥିଲା ।
(୧) ଆଇପିଏଲ ୨୦୧୩ରେ ହରଭଜନ ସିଂହ ଓ ଏସ. ଶ୍ରୀସନ୍ଥଙ୍କ ମଧ୍ୟରେ ବିବାଦ ଦେଖିବାକୁ ମିଳିଥିଲା । ମୁମ୍ବାଇ ଓ ପଞ୍ଜାବ ମ୍ୟାଚରେ ମୁମ୍ବାଇ ହାରିବା ପରେ ଶ୍ରୀସନ୍ଥ ହରଭଜନଙ୍କୁ ’ହାର୍ଡଲକ’ ବୋଲି କହିଥିଲେ । ଏହାପରେ ପଡ଼ିଆରେ ଭଜି ଶ୍ରୀସନ୍ଥଙ୍କୁ ଚାପୁଡ଼ା ମାରିଥିଲେ । ଏହି ହରକତ ପାଇଁ ଭଜିଙ୍କୁ ବିସିସିଆଇ ୫ଟି ଦିନିକିଆରୁ ବାହାର କରିଦେଇଥିଲା । ମାତ୍ର ଦୁହେଁ ଭଲ ବନ୍ଧୁ ପାଲଟି ଯାଇଥିଲେ ।
(୨) ଆଇପିଏଲରେ ଫ୍ରଞ୍ଚାଇଜିମାନେ ଖେଳାଳିମାନଙ୍କୁ ଲୋଭନୀୟ ଅଫର ଦେଉଥିବା ବେଳେ କିଛି ଖେଳାଳି ଫସିଯାଇଥାନ୍ତି ଓ ଆଉ କିଛି ଇମାନଦାର ରହିଥାନ୍ତି । ଏପରି ଭାବେ ଫସିଥିଲେ ଷ୍ଟାର ଅଲରାଉଣ୍ଡର ରବିନ୍ଦ୍ର ଜାଡ଼େଜା । ଜାଡ଼େଜା ରାଜସ୍ଥାନ ପାଇଁ ଖେଳୁଥିବା ବେଳେ ନିଜର ଫ୍ରାଞ୍ଚାଇଜିକୁ ନ ବତାଇ ମୁମ୍ବାଇ ସହ ଯୋଡ଼ିହେବାକୁ ପ୍ରୟାସ କରିଥିଲେ । ଏହି ଖବର ରାଜସ୍ଥାନ ଓ ଆଇପିଏଲ ଗଭର୍ଣ୍ଣିଂ କାଉନସିଲ ପାଇବା ପରେ ଜାଡ଼େଜା ଦୋଷୀ ସାବ୍ୟସ୍ତ ହୋଇଥିଲେ ଓ ତାଙ୍କୁ ୧ ବର୍ଷ ପାଇଁ ବ୍ୟାନ କରାଯାଇଥିଲା ।
(୩) ୨୦୧୩ ସିଜିନ ସ୍ପଟ ଫିକ୍ସିଂ ଓ ବେଟିଂକୁ ନେଇ ଚର୍ଚ୍ଚାରେ ରହିଥିଲା । ଏହାଛଡ଼ା ବେଟିଂ ମାମଲାରେ ଚେନ୍ନାଇର ମାଲିକ ଏନ ଶ୍ରୀନିବାସନଙ୍କ ଜ୍ବାଇଁ ଗୁରୁନାଥ ମୟପ୍ପନ ଓ ରାଜସ୍ଥାନ ରୟାଲ୍ସର ମାଲିକ ରାଜ କୁନ୍ଦ୍ରା ଦୋଷୀ ସାବ୍ୟସ୍ତ ହୋଇଥିଲେ । ସେଥିପାଇଁ ରାଜସ୍ଥାନ ଓ ଚେନ୍ନାଇକୁ ଦୁଇ ବର୍ଷ (୨୦୧୬-୨୦୧୭) ପାଇଁ ବ୍ୟାନ କରାଯାଇଥିଲା ।
(୪) ଆଇପିଏଲ ପରି ବଡ଼ ଟୁର୍ଣ୍ଣାମେଣ୍ଟର ଶୁଭାରମ୍ଭ ଲଲିତ ମୋଦୀ କରିଥିଲେ । ମାତ୍ର ୩ଟି ସିଜିନ ପରେ ମୋଦୀଙ୍କୁ ବାହାର କରି ଦିଆଯାଇଥିଲା । ମୋଦୀଙ୍କ ଉପରେ ଆଇପିଏଲର ଅର୍ଥ ହେରଫେର ନେଇ ଅଭିଯୋଗ ଆସିଥିଲା । ସୋନି ବ୍ରଡକାଷ୍ଟ ଡିଲ, ପଞ୍ଜାବ ଓ ରାଜସ୍ଥାନର ସନ୍ଦେହାତ୍ମକ ନିଲାମୀ ଆଦି ୫ଟି ବଡ଼ ମାମଲାରେ ମୋଦୀ ଅଭିଯୁକ୍ତ ଥିଲେ ।
(୫) ବିରାଟ କୋହଲି ଓ ଗୌତମ ଗମ୍ଭୀରଙ୍କ ବିବାଦ କାହାକୁ ଅଛପା ନାହିଁ । ଏପରି ଏକ ସିଜିନରେ ଦୁହେଁ ପଡ଼ିଆରେ ମୁହାଁମୁହିଁ ହୋଇଥିଲେ । ୨୦୨୩ ସିଜିନରେ ଖେଳାଯାଇଥିବା ଏକ ମ୍ୟାଚରେ ଲକ୍ଷ୍ନୌକୁ ୧୮ ରନରେ ବେଙ୍ଗାଲୁରୁ ପରାସ୍ତ କରିଥିଲା । ଉକ୍ତ ମ୍ୟାଚ ପରେ ହାତ ମିଳାଇବା ସମୟରେ ବିରାଟ ଓ ଲକ୍ଷ୍ନୌର ଦ୍ରୁତ ବୋଲର ନବୀନ ଉଲ ହକ ଦ୍ବିତୀୟ ଥର ମୁହାଁମୁହିଁ ହୋଇଥିଲେ । ସେହି ସମୟରେ ଗମ୍ଭୀର ଓ କୋହଲିଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା ।
ପୁଅ ଆଗରେ ଚାଲିଗଲା ବାପାର ଜୀବନ: ବାଇକ୍ ଧକ୍କାରେ ଯୁବକଙ୍କ ମୃତ୍ୟୁ
ଘଟଗାଁ: ପୁଅ ଆଗରେ ଚାଲିଗଲା ବାପାର ଜୀବନ। କେନ୍ଦୁଝର ଘଟଗାଁ ଥାନା ଅନ୍ତର୍ଗତ ଦେହୁରୀପଡା ଛକ ନିକଟରେ ବାଇକ୍ ଧକ୍କାରେ ଯୁବକଙ୍କ ମୃତ୍ୟୁ ଘଟିଛି। ମୃତ ଯୁବକ ହେଲେ ଦେହୁରୀପଡା ଗ୍ରାମର କେଦାର ନାଏକ। ଅମୃତ କେଦାର ପୁଅ ସହ ରାସ୍ତାରେ ଚାଲି ଚାଲି ଆସୁଥିବା ସମୟରେ ପଛ ପଟୁ ଏକ ବାଇକ୍ ଧକ୍କା ଦେଇଥିଲା। ଫଳରେ ସେ ଗୁରୁତର ଅବସ୍ଥାରେ ରାସ୍ତା କଡ଼ରେ ପଡ଼ିଯାଇଥିଲେ। ସ୍ଥାନୀୟ ଲୋକଙ୍କ ସହାୟତାରେ ଆମ୍ବୁଲାନ୍ସ ଯୋଗେ ଘଟଗାଁ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ଡାକ୍ତର ମୃତ ଘୋଷଣା କରିଛନ୍ତି। ଦୁର୍ଘଟଣା ଘଟାଇଥିବା ବାଇକ୍ ଚାଳକ ଘଟଣା ସ୍ଥଳରୁ ଫେରାର ହୋଇଯାଇଥିବା ବେଳେ ପୋଲିସ ତଦନ୍ତ ଚଳାଇଛି।
ସହଜ ନଥିଲା ଏହି ଯାତ୍ରା: କଳ୍ପନା ଚାଓ୍ବଲାଙ୍କ ପରି ବିପଦକୁ ସାମ୍ନା କରିଥିଲେ ସୁନୀତା ଓ୍ବିଲିୟମ୍ସ
ନୂଆଦିଲ୍ଲୀ: ସୁନୀତା ଓ୍ବିଲିୟମ୍ସ ଦୀର୍ଘ ୯ ମାସ ଧରି ମହାକାଶରେ ସମୟ ବିତାଇବା ପରେ ଶେଷରେ ଧରିତ୍ରୀରେ ପାଦ ରଖିଥିଲେ । ତଡ଼କେ ସ୍ପସଏକ୍ସର ଡ୍ରାଗନ କ୍ୟାପସୁଲ ସୁନୀତାଙ୍କ ସହିତ ୪ ଜଣ ମହାକାଶଚାରୀଙ୍କୁ ଫ୍ଲୋରିଡ଼ାର ସମୁଦ୍ରରେ ଲ୍ୟାଣ୍ଡିଂ କରିଥିଲା । ମହାକାଶରୁ ଧରିତ୍ରୀ ପର୍ଯ୍ୟନ୍ତ ୧୭ ଘଣ୍ଟାର ଯାତ୍ରା ଥିଲା । ମାତ୍ର ଲ୍ୟାଣ୍ଡିଂର ଏହି ପ୍ରକ୍ରିୟାରେ ନିଃଶ୍ବାସ ଅଟକାଇଦେବା ଭଳି ୭ ମିନିଟର ମୁହୂର୍ତ୍ତ ଥିଲା । ଇଣ୍ଟରନ୍ୟାସନାଲ ସ୍ପେସ ଷ୍ଟେସନ (ISS) ରୁ ପୃଥିବୀ ପର୍ଯ୍ୟନ୍ତ ୧୭ ଘଣ୍ଟାର ଯାତ୍ରା ବେଶ ଚ୍ୟାଲେଞ୍ଜିଂପୂର୍ଣ୍ଣ ରହିଥିଲା । ସ୍ପେସକ୍ରାଫ୍ଟ ପୃଥିବୀର ବାୟୁମଣ୍ଡଳରେ ପ୍ରବେଶ କରିବା ପରେ ତା’ର ତାପମାତ୍ରା ୧୯୦୦ ଡିଗ୍ରୀ ସେଲସିୟସରୁ ଅଧିକ ହୋଇଯାଇଥିଲା । ଏହା ସେହି ସମୟ ଥିଲା, ଯେତେବେଳେ କି ୭ ମିନିଟ ପାଇଁ କମ୍ୟୁନିକେସନ ବ୍ଲାକଆଉଟ ହୋଇଯାଇଥିଲା । ଏହା ସାମାନ୍ୟ ହେଲେ ହେଁ ଚ୍ୟାଲେଞ୍ଜିଂପୂର୍ଣ୍ଣ ହୋଇଥାଏ । ସେହି ସମୟରେ ନାସାର ସ୍ପେସକ୍ରାଫ୍ଟ ସହ ସମ୍ପର୍କ ରହିନଥାଏ ।
ସ୍ପେସଏକ୍ସର ଡ୍ରାଗନ ସହ ମଧ୍ୟ ଏପରି ହୋଇଥିଲା । ତେବେ ୭ ମିନିଟ ପରେ ବୁଧବାର ପାଖାପାଖି ୩.୨୦ ସମୟରେ ସ୍ପେସକ୍ରାଫ୍ଟ ସହ ପୁନର୍ବାର ସମ୍ପର୍କ ସ୍ଥାପିତ ହୋଇଥିଲା । ସାତ ମିନିଟର ଏହି ବ୍ଲାକଆଉଟର ସମୟ କୌଣସି ସ୍ପେସକ୍ରାଫ୍ଟର ପୃଥିବୀର ବାୟୁମଣ୍ଡଳରେ ପ୍ରବେଶ ପାଇଁ ବହୁତ ନିର୍ଣ୍ଣାୟକ ହୋଇଥାଏ । ଏହି ଅବସରରେ ତାପମାତ୍ରା ସାମାନ୍ୟ ଠାରୁ ଅଧିକ ହେବା ଫଳରେ ସ୍ପେସକ୍ରାଫ୍ଟ କ୍ରାସ ହେବାର ସମ୍ଭାବନା ବଢ଼ିଯାଇଥାଏ । ୨୦୦୩ ମସିହା ଫେବୃଆରୀ ୧ରେ ନାସାର ମହାକାଶ ଯାନ କଲମ୍ବିଆ ସହ ମଧ୍ୟ ଏପରି ଘଟିଥିଲା । ସେତେବେଳେ ପୃଥିବୀର ବାୟୁମଣ୍ଡଳରେ ପ୍ରବେଶ କରିବା ମାତ୍ରକେ ମହାକାଶଯାନ କ୍ରାଶ ହୋଇଯାଇଥିଲା । ଫଳରେ କଳ୍ପନା ଚାଓ୍ବଲା ଦୁର୍ଘଟଣାର ଶିକାର ହୋଇଥିଲେ । ତେଣୁ ଉକ୍ତ ସମୟ ଯେ କୌଣସି ସ୍ପେସକ୍ରାଫ୍ଟ ପାଇଁ ବହୁତ ସତର୍କପୂର୍ଣ୍ଣ ହୋଇଥାଏ । ଏହି ବିପଦକୁ ପାର କରି ସ୍ପେସକ୍ରାଫ୍ଟ ସମୁଦ୍ରରେ ସଫଳତାର ସହ ଲ୍ୟାଣ୍ଡିଂ କରିଥିଲା ଓ ଜଣ ଜଣ କରି ୪ ଜଣ ମହାକାଶଯାତ୍ରୀଙ୍କୁ ସୁରକ୍ଷିତ ଭାବେ ବାହାର କରାଯାଇଥିଲା । ଏପରି ଭାବେ ମହାକାଶରେ ୨୮୬ ଦିନ ବିତାଇବା ପରେ ସୁନୀତା ଓ ତାଙ୍କର ସାଥୀମାନେ ଧରିତ୍ରୀର ତାଜା ବାୟୁରେ ପୁଣି ଥରେ ନିଃଶ୍ବାସ ନେଇଥିଲେ ।
୧୫ ଦିନର ରହଣି ପରେ ଫେରିଗଲେ ରାଜାମୌଲି, ମହେଶ ବାବୁ ଓ ପ୍ରିୟଙ୍କା
ଜୟପୁର: ଦୀର୍ଘ ୧୫ଦିନ ରହଣି ପରେ ଫେରିଗଲେ ସାଉଥ ନିର୍ଦ୍ଦେଶକ ଏସଏସ ରାଜାମୌଲି, ଅଭିନେତା ମହେଶ ବାବୁ ଓ ବଲିଉଡ ଅଭିନେତ୍ରୀ ପ୍ରିୟଙ୍କା ଚୋପ୍ରା । ଆଜି ଫେରିବା ପୂର୍ବରୁ ସୁଟିଂ ସେଟରେ ଏକ ବିଦାୟକାଳୀନ ସଭା ସୃଷ୍ଟି ହୋଇଥିଲା । ତଲମାଲି ଠାରେ ଉପଜିଲ୍ଲାପାଳ ଆକବରମା ସସ୍ୟା ରେଡ୍ଡୀଙ୍କ ସମେତ ପ୍ରଶାସନିକ ଅଧିକାରୀ, ବରିଷ୍ଠ ପୋଲିସ ଅଧିକାରୀ, ସ୍ଥାନୀୟ ବିଧାୟକ ତଥା କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମଙ୍କ ସମେତ ସ୍ଥାନୀୟ ବାସିନ୍ଦା ବିଦାୟ ଦେଇଥିଲେ । ଏସଏସ ରାଜାମୌଲି ଓ ପ୍ରିୟଙ୍କା ଚୋପ୍ରା କୋରାପୁଟର ଅପୂର୍ବ ସୋନ୍ଦର୍ଯ୍ୟକୁ ପ୍ରଶଂସା କରିଛନ୍ତି । ଦୀର୍ଘ ୧୫ଦିନ ୫ଶହ ଜଣିଆ ଟିମ୍ ଆଗାମୀ ଫିଲ୍ମ ପାଇଁ ଯାହା ଯାହା ସିନ ଆବଶ୍ୟକ ସେସମସ୍ତ ସିନ ସୁଟ କରି ହାଇଦ୍ରାବାଦ ଅଭିମୁଖେ ବାହାରିଛନ୍ତି ।
ସୁନୀତା ଓ୍ବିଲିୟମ୍ସ କେଉଁ ସବୁ ସ୍ବାସ୍ଥ୍ୟ ସମସ୍ୟାର ସାମ୍ନା କରିବାର ସମ୍ଭାବନା ରହିଛି?
ନୂଆଦିଲ୍ଲୀ: ଆମେରିକୀୟ ସ୍ପେସ ଏଜେନ୍ସି ନାସାର ମହାକାଶ ଯାତ୍ରୀ ସୁନୀତା ଓ୍ବିଲିୟମ୍ସ ଓ ବୁଚ ଓ୍ବିଲମୋର ୯ ମାସ ପରେ ପୃଥିବୀକୁ ଫେରିଆସିଛନ୍ତି । ବୁଧବାର ଦିନ ତଡ଼କେ ସ୍ପେସଏକ୍ସର ଡ୍ରାଗନ କ୍ୟାପସୁଲ ମାଧ୍ୟମରେ ଫ୍ଲୋରିଡ଼ାର ତଟରେ ସୁନୀତା ସଫଳତାର ସହ ଅବତରଣ କରିଥିଲେ । ୨୦୨୪ ମସିହା ଜୁନ ୫ ରେ ସୁନୀତାଙ୍କ ମହାକାଶ ମିଶନ ଆରମ୍ଭ ହୋଇଥିଲା, ଯାହା କି କେବଳ ଆଠଦିନର ଥିଲା । ମାତ୍ର ବୈଷୟିକ ତ୍ରୁଟି କାରଣରୁ ସେ ୯ ମାସ ପର୍ଯ୍ୟନ୍ତ ମହାକାଶରେ ଫସି ରହିଥିଲେ । ତେଣୁ ମହାକାଶରେ ଦୀର୍ଘ ସମୟ ବିତାଇବା ପରେ ତାଙ୍କର ସ୍ବାସ୍ଥ୍ୟ ଉପରେ ଗଭୀର ପ୍ରଭାବ ପଡ଼ିପାରେ ।
ସବୁଠାରୁ ଚିନ୍ତାଚନକ କଥା ହେଉଛି, ହାଡ଼ ଓ ମାଂସପେଶୀ ଦୁର୍ବଳ ହେବା । ISSରେ ମହାକାଶ ଯାତ୍ରୀ ମାଇକ୍ରୋଗ୍ରାଭିଟିରେ ପହଁରିଥାନ୍ତି, ଯାହାକି ସେମାନଙ୍କର ଶରୀର ଉପରେ ପ୍ରଭାବ ପକାଇଥାଏ । ପୃଥିବୀରେ ଆମ ଶରୀରକୁ ସର୍ବଦା ଗୁରୁତ୍ବାକର୍ଷଣ ବିପକ୍ଷରେ କାମ କରିବାକୁ ପଡ଼ିଥାଏ । ଫଳରେ ଆମର ମାଂସପେଶୀ ଓ ହାଡ଼କୁ କ୍ରମାଗତ ବ୍ୟାୟାମ ମିଳିଥାଏ । ମାତ୍ର ମହାକାଶରେ ଏହି ପ୍ରତିରୋଧ ବିନା, ମାଂସପେଶୀର ସାମର୍ଥ୍ୟ ଓ ହାଡ଼ର ଘନତ୍ବ ହ୍ରାସ ପାଇବାରେ ଲାଗିଥାଏ । କାରଣ ଶରୀରକୁ ନିଜର ଓଜନ ସହ୍ୟ କରିବାର ଆବଶ୍ୟକତା ନଥାଏ ।
ମହାକାଶ ଯାତ୍ରୀ ପ୍ରତି ମାସରେ ନିଜର ହାଡ଼ର ୧ ପ୍ରତିଶତ ହରାଇପାରନ୍ତି । ବିଶେଷ କରି ଅଣ୍ଟା, ପଛଭାଗ ଓ ଜଙ୍ଘର ହାଡ଼ ପ୍ରଭାବିତ ହୋଇଥାଏ । ପୃଥିବୀକୁ ଫେରିବା ପରେ ହାଡ଼ ଭାଙ୍ଗିବାର ଆଶଙ୍କା ବଢ଼ିଯାଇଥାଏ । ଏହାକୁ କମ କରିବା ପାଇଁ ମହାକାଶ ଯାତ୍ରୀ ISSରେ କଠିନ ପରିଶ୍ରମ କରିଥାନ୍ତି । ମହାକାଶରେ ଯାତ୍ରୀ ୧-୨ ଇଞ୍ଚ ଲମ୍ବା ହୋଇପାରନ୍ତି କାରଣ ସେମାନଙ୍କର ମେରୁଦଣ୍ଡର ହାଡ଼ ଲମ୍ବା ହୋଇପାରେ । ମାତ୍ର ଏହି ଉଚ୍ଚତା ପୃଥିବୀକୁ ଫେରିବା ପରେ କମ ହୋଇଯାଏ । ISSରେ ଅଧିକ ଦିନ ରହିବା ଫଳରେ ମହାକାଶ ଯାତ୍ରୀଙ୍କ ହାର୍ଟ ପ୍ରଭାବିତ ହୋଇପାରେ । ହୃଦୟର ଆକାର ମଧ୍ୟ ବଦଳି ଯାଇଥାଏ । ମହାକାଶ ଯାତ୍ରୀଙ୍କ ହୃଦୟର ଆକାର ପାଖାପାଖି ୯.୪ ପ୍ରତିଶତ ଅଧିକ ଗୋଲ ହୋଇଯାଇଥାଏ ବୋଲି ରିସର୍ଚ୍ଚରୁ ଜଣାପଡ଼ିଛି ।