ନନ୍ଦିଘୋଷ ବ୍ୟୁରୋ: ଯୋଡ଼ା ଥାନା ୫୨୦ ଜାତୀୟ ରାଜପଥ ବିଲେଇପଦା ଛକରେ ଆଜି ସକାଳେ ବାଇକ ଓ କାରକୁ ପିଟିଲା ଟ୍ରେଲର । ଘଟଣାସ୍ଥଳରେ ଜଣେ ବାଇକ ଆରୋହୀଙ୍କ ମୃତ୍ୟୁ ଘଟିଥିବା ବେଳେ, ଅନ୍ୟଜଣେ ଗୁରୁତର ହୋଇଛନ୍ତି । କାରରେ ଯାଉଥିବା ୩ ଜଣ ଯାତ୍ରୀ ଅଳ୍ପକେ ବର୍ତ୍ତିଯାଇଛନ୍ତି । ମୃତାହତଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି । ମୃତ ବାଇକ ଆରୋହୀ କେନ୍ଦୁଝର ସିଜୁକଳା ଅଞ୍ଚଳର ପରମେଶ୍ଵର ମହାନ୍ତ । ବିଲେଇପଦା ଛକ ନିକଟରେ ଟ୍ରେଲରଟି ପ୍ରଥମେ ବାଇକକୁ ଧକ୍କା ଦେଇ ଆଗରେ ଯାଉଥିବା ଏକ ଭିଟାରା କାରକୁ ଜୋରଦାର ଟକ୍କର ମାରିଥିଲା । ଯାହାଫଳରେ କାରଟି ଆଗରେ ଯାଉଥିବା ଏକ ଟ୍ରକରେ ପିଟି ହୋଇଥିଲା । କାରର ଆଗ ଏବଂ ପଛ ଭାଗ ସମ୍ପୂର୍ଣ୍ଣ ଭାବରେ ଚୁରମାର୍ ହୋଇଯାଇଛି । ଘଟଣାସ୍ଥଳରେ ଚାପା ଉତ୍ତେଜନା ପ୍ରକାଶ ପାଇଛି । ଯୋଡ଼ା ପୋଲିସ୍ ଘଟଣାର ତଦନ୍ତ ଚଳାଇଛି ।
କେନାଲ କଡ଼ରୁ ଯୁବକଙ୍କ ମୃତଦେହ ଉଦ୍ଧାର : ହତ୍ୟା ସନ୍ଦେହ
ନନ୍ଦିଘୋଷ ବ୍ୟୁରୋ: ଗଂଜାମ ଜିଲ୍ଲା ପାଟପୁର ଥାନା ରାମଚନ୍ଦ୍ରପୁର କାଳିଆଘାଇ କେନାଲ ରାସ୍ତାରୁ ଏକ ମୃତଦେହ ଉଦ୍ଧାର। ରକ୍ତାକ୍ତ ଅବସ୍ଥାରେ ମୃତ ଦେହ ପଡି଼ଥିଲା। ସ୍ଥାନୀୟ ଲୋକଙ୍କ କହିବା ଅନୁସାରେ ଏହା ହେଉଛି ସାମନ୍ତରାପୁର ଗାଁର ହୀନ ପାତ୍ରଙ୍କ ମୃତଦେହ। ଗତକାଲି ସେ ବ୍ରହ୍ମପୁର ଯାଇ ଆଉ ଫେରିନଥିଲେ। ଆଜି ସକାଳୁ ସକାଳୁ କେନାଲ ନିକଟରୁ ମୃତଦେହ ମିଳିଛି। ତାଙ୍କ ବାଇକ ମଧ୍ୟ ସେଠାରେ ପଡ଼ିଛି। କେମିତି ତାଙ୍କର ମୃତ୍ୟୁ ହେଲା ସ୍ପଷ୍ଟ ହୋଇନାହିଁ। ତେବେ ପାରିପାର୍ଶ୍ଵିକ ସ୍ଥିତି ଦେଖି ତାଙ୍କୁ ହତ୍ୟା କରାଯାଇଥିବାର ସନ୍ଦେହ କରାଯାଉଛି। ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଛି। ରିପୋର୍ଟ ଆସିବା ପରେ ସବୁ ସ୍ପଷ୍ଟ ହେବ।
ରାଜନୀତିରେ ମତଭେଦ କିନ୍ତୁ ସମ୍ପର୍କ ଖରାପ ନାହିଁ : ସୁପ୍ରିୟା ସୁଲେ
ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ରରେ ପରିବାର ରାଜନୀତି ସବୁବେଳେ ଚର୍ଚ୍ଚାରେ ରହିଥାଏ । କେତେପବେଳେ ଠାକରେ ପରିବାରରେ ବିବାଦ ତ ଆଉ କେତେବେଳେ ପାଓ୍ବାର ପରିବାରରେ । ଏବେ ଉଭୟ ପରିବାର ଏକ ହେବା କଥା ଗଣମାଧ୍ୟମରେ ଆରମ୍ଭ ହୋଇଛି ଚର୍ଚ୍ଚା । ତେବେ ନିକଟରେ ଶରଦ ପାଓ୍ବାରଙ୍କ ଝିଅ ତଥା ସାଂସଦ ସୁପ୍ରିୟା ସୁଲେ ଭାଇ ଶରଦ ପାଓ୍ବାରଙ୍କ ସମ୍ପର୍କରେ ଦେଇଥିବା ଏକ ପ୍ରତିକ୍ରିୟାକୁ ନେଇ ରାଜନୈତିକ ମହଲରେ ଚର୍ଚ୍ଚା ବଢ଼ିଛି । ସୁପ୍ରିୟା ସୁଲେ ଶରଦ ପାଓ୍ବାରଙ୍କ ସାନ ଝିଅର ନିର୍ବନ୍ଧ ଭୋଜିରେ ଯୋଗ ଦେଇଥିଲେ । ଏହାସହ ନିକଟରେ ତିନୋଟି ରାଜନୈତିକ ବୈଠକରେ ଏକାଠି ଗୋଟିଏ ମଞ୍ଚରେ ଶରଦ-ଅଜିତ ନଜର ଆସିଥିଲେ । ଯାହାକୁ ନେଇ ଏକାଠି ହେବେ ବୋଲି କୁହାଯାଉଛି । ସେପଟେ ଏହି ଚର୍ଚ୍ଚାକୁ ଆହୁରି ବଢ଼ାଇ ଦେଇଛନ୍ତି ସୁପ୍ରିୟା ସୁଲେ । ସେ କହିଛନ୍ତି କି, ଆମ ପରିବାରରେ କୌଣସି ମତଭେଦ ନାହିଁ । ରାଜନୀତିରେ ମତଭେଦ ଥାଇପାରେ । କିନ୍ତୁ ସମ୍ପର୍କ ଆଜି ମଧ୍ୟ ଭଲ ରହିଛି । ପାୱାର ପରିବାର କେବେ ବିଭାଜିତ ହୋଇନାହିଁ, ସମସ୍ତ ଭାଇଭଉଣୀ ଆମର ପୂର୍ବପୁରୁଷଙ୍କ ଦ୍ୱାରା ଶିକ୍ଷା ଦିଆଯାଇଥିବା ମୂଲ୍ୟବୋଧ ସହିତ ବଢ଼ିଛନ୍ତି। ଆମର ରାଜନୈତିକ ମତଭେଦ ଥାଇପାରେ, କିନ୍ତୁ ଆମେ ଏହାକୁ କେବେବି ଆମର ବ୍ୟକ୍ତିଗତ ସମ୍ପର୍କରେ ପ୍ରଭାବ ପକାଇବାକୁ ଦେଇନାହୁଁ। ଶରଦ ପାୱାରଙ୍କ ବିଷୟରେ କହିବା ସମୟରେ ଉପମୁଖ୍ୟମନ୍ତ୍ରୀ ଅଜିତ ପାୱାର ସମ୍ପ୍ରତି ନରମ ସ୍ୱର ଗ୍ରହଣ କରିଥିଲେ ବୋଲି ମନ୍ତବ୍ୟ ଉପରେ ପ୍ରତିକ୍ରିୟା ଦେଇ ସୁଲେ କହିଛନ୍ତି, “ଯଦି ଦାଦା ନରମ ହୋଇଛନ୍ତି, ତେବେ ଏହାକୁ ସମସ୍ତେ ସ୍ୱାଗତ କରୁଛନ୍ତି।”
ପାକିସ୍ତାନରେ କମୁଛି କ୍ରିକେଟ କ୍ରେଜ୍, ପିଏସଏଲ ବେଳେ ଷ୍ଟାଡିୟମ ଖାଲି!
ନନ୍ଦିଘୋଷ ବ୍ୟୁରୋ: ଆଇପିଏଲକୁ ଟକ୍କର ଦେବା ପାଇଁ ଏକା ସମୟରେ ପ୍ରଥମ ଥର ପାଇଁ ପାକିସ୍ତାନ ସୁପର ଲିଗ୍ ଚାଲିଛି । ମାତ୍ର ମ୍ୟାଚ ସମୟରେ ଷ୍ଟାଡିୟମ ଫାଙ୍କା । ଷ୍ଟାଡିୟମରେ ଦର୍ଶକଙ୍କଠାରୁ ସୁରକ୍ଷା କର୍ମୀ ଅଧିକ ରହିଥିବା ଦେଖିବାକୁ ମିଳିଛି । ଏମିତି ଏକ ଭିଡିଓ ଏବେ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି । ସୋମବାର ପେଶାଓ୍ବାର ଏବଂ କରାଚି ମଧ୍ୟରେ ଖେଳାଯାଉଥିବା ମ୍ୟାଚ ସମୟରେ ଦର୍ଶକଙ୍କ ମରୁଡ଼ି ପଡ଼ିଥିଲା । ତେବେ ଏହି ମ୍ୟାଚରେ ପାକିସ୍ତାନର ପୂର୍ବତନ ଅଧିନାୟକ ତଥା ଷ୍ଟାର ବ୍ୟାଟ୍ସମ୍ୟାନ ବାବର ଆଜମ ୪୧ ବଲରୁ ୪୬ ରନର ପାଳି ଖେଳିଥିଲେ । ବାବର ଆଜମଙ୍କ ମ୍ୟାଚ୍ ସତ୍ତ୍ୱେ, ପ୍ରଶଂସକମାନେ କରାଚୀ ଷ୍ଟାଡିୟମରେ ପହଞ୍ଚି ନଥିଲେ। ଏହା ଦେଖାଯାଉଛି ଯେ ପାକିସ୍ତାନୀ ପ୍ରଶଂସକମାନେ ଏବେ କ୍ରିକେଟରୁ ଦୂରେଇ ଯାଉଛନ୍ତି। ପାକିସ୍ତାନ ସୁପର ଲିଗ୍ ଏପର୍ଯ୍ୟନ୍ତ ୧୧ଟି ମ୍ୟାଚ୍ ସମାପ୍ତ କରିଛି। ସମ୍ପ୍ରତି, ଇଂଲଣ୍ଡ ବ୍ୟାଟସମ୍ୟାନ୍ ସାମ୍ ବିଲିଙ୍ଗସ୍ ଆଇପିଏଲକୁ ବିଶ୍ୱର ସର୍ବୋତ୍ତମ ଟି-୨୦ ଲିଗ୍ ବୋଲି କହିଛନ୍ତି ଏବଂ ଏହାକୁ ପିଏସଏଲ ସମେତ ଅନ୍ୟ ଫ୍ରାଞ୍ଚାଇଜ୍ ଲିଗଠାରୁ ଉପରକୁ ସ୍ଥାନ ଦେଇଛନ୍ତି।
କିଛି ଦିନ ପୂର୍ବେ, ଜଣେ ପାକିସ୍ତାନୀ ସାମ୍ବାଦିକ ସୋସିଆଲ ମିଡିଆରେ ଏକ ଫଟୋ ସେୟାର କରି ଲେଖିଥିଲେ ଯେ କରାଚୀରେ ପାକିସ୍ତାନ ସୁପର ଲିଗ୍ ସମୟରେ 6700 ସୁରକ୍ଷା କର୍ମୀ ନିୟୋଜିତ ହୋଇଛନ୍ତି। କରାଚୀରେ ଅନୁଷ୍ଠିତ ମ୍ୟାଚ୍ରେ ଦର୍ଶକଙ୍କ ସଂଖ୍ୟା ପ୍ରାୟ ୫୦୦୦ ଥିଲା, ଅର୍ଥାତ୍ ସୁରକ୍ଷା କର୍ମୀଙ୍କ ସଂଖ୍ୟା ତୁଳନାରେ ୧୫୦୦ କମ୍ ଲୋକ ମ୍ୟାଚ୍ ଦେଖିବାକୁ ଆସିଥିଲେ।
ଆଜି ଶ୍ରୀମନ୍ଦିରରେ ଅନୁଷ୍ଠିତ ହେବ ରାମାଭିଷେକ ନୀତି
ନନ୍ଦିଘେୋଷ ବ୍ୟୁରୋ: ଆଜି ମହାପ୍ରଭୁ ଜଗନ୍ନାଥଙ୍କ ରାମାଭିଷେକ ନୀତି ଅନୁଷ୍ଠିତ ହେବ । ଏହା ସହ ଶ୍ରୀରାମ ନବମୀରୁ ଆରମ୍ଭ ହୋଇଥିବା ଶ୍ରୀକ୍ଷେତ୍ର ସାହିଯାତ ମଧ୍ୟ ଚଳିତବର୍ଷ ପାଇଁ ଶେଷ ହେବ । ଆଜି ଶ୍ରୀମନ୍ଦିରରେ ମଧ୍ୟାହ୍ନ ଧୂପ ପରେ ନକ୍ଷତ୍ର ଦିଅଁ ଭିତରକୁ ବିଜେ କରିବା ପରେ ନକ୍ଷତ୍ର ବନ୍ଦାପନା କରାଯାଇ ନକ୍ଷତ୍ର ବେଢାକୁ ଦିଅଁ ବିଜେ କରିବେ । ଜୟବିଜୟ ଦ୍ୱାରରେ ଭୋଗ ଓ ବନ୍ଦାପନା ନୀତି ସରିବା ପରେ ଦିଅଁ ଦକ୍ଷିଣୀ ଘରକୁ ବିଜେ କରିବେ । ସେଠାରେ ଅନ୍ୟାନ୍ୟ ନୀତି ସରିବା ପରେ ସନ୍ଧ୍ୟାରେ ଅଜ୍ଞାମାଳ ପାଇଁ ଶ୍ରୀରାମ, ଶ୍ରୀ ଲକ୍ଷ୍ମଣ ଓ ଦେବୀସୀତା ପାଲିଙ୍କିଙ୍କୁ ବିଜେ କରି ଶ୍ରୀଜଗନ୍ନାଥ ବଲ୍ଳବ ମଠକୁ ବିଜେ କରିବେ । ଦୁଇ ସେବାୟତ ଭରତ ଓ ଶତ୍ରୁଘ୍ନ ଚରିତ୍ର ଧାରଣ କରି ପ୍ରଭୁ ଶ୍ରୀରାମଙ୍କ ରୂପାର ପାଦୁକା ଦ୍ବୟ ସାଙ୍ଗରେ ଧରି ଶ୍ରୀଜଗନ୍ନାଥ ବଲ୍ଳବ ମଠରେ ପହଂଚିବା ପରେ ଗୌଡ଼ବାଡ଼ ସାହି ଆଖେଡା ପକ୍ଷରୁ ସେଠାରେ ଶ୍ରୀରାମଙ୍କ ଅଭିଷେକ ନୀତି ଅନୁଷ୍ଠିତ ହେବା । ପରେ ଶ୍ରୀମନ୍ଦିରକୁ ଠାକୁର ବାହୁଡା଼ ବିଜେ କରିବେ । ଆଜି ସାହିଯାତ୍ରାର ଅନ୍ତିମ ଦିନରେ ଗୌଡ଼ବାଡ଼ ସାହି ପକ୍ଷରୁ ନାଗା, ମେଢ଼, ନବଶିରା, ସପ୍ତଶିରା, ପଞ୍ଚଶିରା, ପାରମ୍ପରିକ ସମରକଳା ଆଦି ପରିବେଷଣ କରାଯିବ ।…
ଗୁଣି ଗାରେଡି ସନ୍ଦେହରେ ଆକ୍ରମଣ: ଜଣେ ମୃତ
ନନ୍ଦିଘୋଷ ବ୍ୟୁରୋ: ରାୟଗଡ଼ା ଜିଲ୍ଲା ପଦ୍ମପୁର ଥାନା ନିକଟ ହାଟପଦା ସାହିରେ ଗତ ବିଳମ୍ବିତ ରାତିରେ ସଂଘବଦ୍ଧ ଆକ୍ରମଣ କରି ଜଣେ ବ୍ୟକ୍ତିଙ୍କୁ ହତ୍ୟା । ମୃତକ ହେଲେ ଭୈରବ ସାହୁ । ଗୁଣିଗାରେଡ଼ିକୁ ନେଇ ହତ୍ୟା କରାଯାଇଥିବା ଅଭିଯୋଗ। ଘଟଣାସ୍ଥଳରେ ପଦ୍ମପୁର ପୋଲିସ ପହଞ୍ଚିବା ପରେ ଥାନା ଅଧିକାରୀ ଧରଣୀଧର ପ୍ରଧାନଙ୍କୁ ଆକ୍ରମଣ । ଥାନା ଅଧିକାରୀଙ୍କ ମୁଣ୍ଡରେ ଲାଗିଛି ଶକ୍ତ ଆଘାତ ଲାଗିଥିବା ବେଳେ ପୋଲିସ ଗାଡି ଭାଙ୍ଗିଛି । ପଦ୍ମପୁର ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରରେ ଥାନା ଅଧିକାରୀ ଚିକିତ୍ସିତ ହୋଇଛନ୍ତି । ଅପ୍ରିତିକର ପରିସ୍ଥିତି ମୁକାବିଲା ପାଇଁ ଘଟଣାସ୍ଥଳରେ ପୋଲିସ ଫୋର୍ସ ମୂତୟନ ରହିଛି ।
ପିସିଆରକୁ ଚାପିଦେଲା ହାଇଓ୍ବା : ୨ ପୋଲିସ କର୍ମଚାରୀଙ୍କ ମୃତ୍ୟୁ
ନନ୍ଦିଘୋଷ ବ୍ୟୁରୋ: କଟକ ଗତିରାଉତ ପାଟଣା କେନାଲ ରୋଡ଼ ରାସ୍ତାରେ ଦୁର୍ଘଟଣା। ପୋଲିସ ପିସିଆର୍ ଉପରେ ଚଢ଼ିଗଲା ହାଇୱା। ଡ୍ୟୁଟିରେ ଥିବା ୨ ପୋଲିସ କର୍ମଚାରୀ ମୃତ। ଜଣେ ହୋମଗାର୍ଡ ହୋଇଥିବା ବେଳେ ଜଣେ ଏପିଆଇ ପୋଲିସ କର୍ମଚାରୀ। ଘଟଣା ସ୍ଥଳରେ ବରିଷ୍ଠ ପୋଲିସ ଅଧିକାରୀ ପହଂଚି ତଦନ୍ତ କରୁଛନ୍ତି। ପିସିଆର ଟି CRRI ଥାନାର ବୋଲି ଜଣାପଡ଼ିଛି। ଆଉ ଜଣେ ଗୁରୁତରଙ୍କୁ କଟକ ବଡ଼ ଡାକ୍ତରଖାନାରେ ଭର୍ତ୍ତି କରାଯାଇଥିବା ଜଣାପଡ଼ିଛି।
ମୁର୍ଶିଦାବାଦ ହିଂସା:ଝାରସୁଗୁଡ଼ାରୁ ୮ ଗିରଫ
ନନ୍ଦିଘୋଷ ବ୍ୟୁରୋ: ୱାକଫ ଆଇନକୁ ନେଇ ପଶ୍ଚିମବଂଗ ମୁର୍ସିଦାବାଦରେର ହିଂସାକାଣ୍ଡ ଘଟଣା। ମୋଟ ୮ ଜଣଙ୍କୁ ଗିରଫ କଲା ପଶ୍ଚିମବଂଗ ପୋଲିସର ଏସଟିଏଫ। ମୁର୍ସିଦାବାଦର ହର ଗୋବିନ୍ଦ ଦାଶ ଏବଂ ତାଙ୍କ ପୁଅଙ୍କୁ ହତ୍ୟା ଘଟଣାରେ ଏହି ଗିରଫ କରାଯାଇଛି। ପଶ୍ଚିମବଙ୍ଗର ଏସଟିଏଫ ଝାରସୁଗୁଡ଼ା ପୋଲିସ ସହାୟତାରେ ଗତକାଲି ରାତିରେ ଚଢ଼ାଉ କରି ବାଣୀ ଇସ୍ରାଏଲ, ସେଫାଉଲ ହକଙ୍କ ସମେତ ଅନ୍ୟ ୬ ଅଭିଯୁକ୍ତ ବାବୁଲ ଏସକେ, ଅବଦୁଲ ଖାଲେକ, ସାବା କରିମ, ରୋନୀ ଏସକେ, ମନରୁଲ ଏସକେ, ଅଜ଼ଫୁରଲ ଏସକେଙ୍କୁ ଗିରଫ କରିଛି।ତେବେ ପୋଲିସଙ୍କୁ ଦେଖିବା ପରେ ଏ ସମସ୍ତ ଅଭିଯୁକ୍ତ ଫେରାର ମାରିବାକୁ ଚେଷ୍ଟା କରୁଥିବା ବେଳେ ପୋଲିସ ଏମାନଙ୍କ ଉପରକୁ ଫାଙ୍କା ଗୁଳି ଚାଳନା କରିଥିଲା। ଚାରିଟି ବ୍ଲାଙ୍କ ଫାୟାରିଂ କରାଯାଇଥିବା ଆଇଜି ହିମାଂଶୁ ଲାଲ ସୂଚନା ଦେଇଛନ୍ତି। ସେହିପରି ଏଭଳି ଘଟଣାରେ ଆହୁରି ତଦନ୍ତ ଚାଲିଛି ଯଦି ଅନ୍ୟ କେଉଁ ବ୍ୟକ୍ତିଙ୍କ ସମ୍ପୃକ୍ତି ଥିବ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଏସପି ସ୍ମିଥ ପରମାର ସୁଚନା ଦେଇଛନ୍ତି।ଗତ ୧୩ ତାରିଖ ଦିନ ମୁର୍ସିଦାବାଦରେ ଘଟିଥିବା ହିଂସାରେ ମୁଖ୍ୟ ଅଭିଯୁକ୍ତ ସମେତ ଅନ୍ୟ ଅଭିଯୁକ୍ତଙ୍କ ସମ୍ପୃକ୍ତି ଥିବା ଅଭିଯୋଗ ହୋଇଥିଲା। ସମସ୍ତେ ଆସି ବନହରପାଳି ଥାନା ଅଂଚଳରେ ଲୁଚିଥିବା ସୂଚନା ମିଳିଥିଲା।
ମହାକାଳପଡାରେ ତେଜୁଛି ବିଜେପି ଗୋଷ୍ଠୀ କନ୍ଦଳ
ନନ୍ଦିଘୋଷ ବ୍ୟୁରୋ: ମହାକାଳପଡାରେ ତେଜୁଛି ବିଜେପି ଗୋଷ୍ଠୀ କନ୍ଦଳ । ରାମନଗର ଠାରେ ଚାଲିଥିବା ଜମ୍ବୁଦ୍ବୀପ ମହୋତ୍ସବ ଓ ପଲ୍ଲୀଶ୍ରୀ ମେଳାକୁ ନେଇ ପଦାକୁ ଆସିଲା ଅନ୍ତଃକନ୍ଦଳ। ମହୋତ୍ସବ ପାଇଁ ଚାରିଆଡେ ମୁଖ୍ୟମନ୍ତ୍ରୀଙ୍କ ବ୍ୟାନର ଏବଂ ହୋଡିଙ୍ଗ ଲଗାଯାଇଥିବା ବେଳେ କାହିଁକି ଦୁଇ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା ଓ କନକ ବର୍ଦ୍ଧନ ସିଂଦେଓ ଏବଂ କେନ୍ଦ୍ର ମନ୍ତ୍ରୀ ଜୁଏଲ ଓରାମଙ୍କ ପୋଷ୍ଟର ଲଗାଗଲାନାହିଁ ବୋଲି କିଛି ନେତା ପ୍ରଶ୍ନ କରିଛନ୍ତି । ଏହାସହ ମହୋତ୍ସବ ପ୍ରସ୍ତୁତି ବୈଠକକୁ କିଛି ପୁରୁଖା ନେତାଙ୍କୁ ଡକାଯାଇନଥିବା ଅଭିଯୋଗ ବାଢିଛନ୍ତି ବିଜେପି ନେତା ପବିତ୍ର ପରିଡା । ଏନେଇ ସେ କିଛି ଫଟୋ ଓ ଲେଖା ସୋସିଆଲ ମିଡ଼ିଆରେ ପୋଷ୍ଟ କରିଥିଲେ । ଏଥିରେ ଉତକ୍ଷିପ୍ତ ହୋଇ ମହାକାଳପଡା ବିଧାୟକଙ୍କ ଦୁଇ ଜଣ ସମର୍ଥକ ପ୍ରବିତ୍ରଙ୍କୁ ଭେଟି ସେହି ପୋଷ୍ଟକୁ ହଟାଇବାକୁ ଧମକ ଦେଇଥିବା ଅଭିଯୋଗ କରିଛନ୍ତି ପବିତ୍ର ।
ଗତ ୧୯ ତାରିଖ ରାତି ନଅଟା ସମୟରେ ପବିତ୍ର ପରିଡା ନିଜ ମୋଟରସାଇକେଲରେ ଘରକୁ ଫେରୁଥିବା ବେଳେ ରାମଚଣ୍ଡୀ ପୋଲ ପୂର୍ବରୁ ତାଙ୍କୁ ଛଅ ଗୋଟି ମଟର ସାଇକେଲରେ ୧୦ରୁ ୧୨ ଜଣ ବ୍ୟକ୍ତି ଅଟକାଇ ବିଧାୟକଙ୍କ ନାମରେ ଫେସବୁକ ପୋଷ୍ଟ ହଟାଇବାକୁ ଧମକ ଦେଇଥିଲେ । ଜଣେ ପବିତ୍ରଙ୍କ ମୁଣ୍ଡରେ ବନ୍ଧୁକ ଲଗାଇଥିବା ବି ଅଭିଯୋଗ ହୋଇଛି । ଏନେଇ ଗତକାଲି ବିଜେପି ନେତା ପବିତ୍ର ପରିଡା ଜମ୍ବୁ ସାମୁଦ୍ରିକ ଥାନାରେ ଲିଖିତ ଅଭିଯୋଗ କରିବା ପରେ ବିଜେପି ଦଳର ଭିତିରି କନ୍ଦଳ ପଦାକୁ ଆସିଛି । ନିଜ ଜୀବନ ପ୍ରତି ବିପଦ ଥିବା ସେ ଏଫଆଇଆରରେ ଅଭିଯୋଗ କରିଛନ୍ତି । ତେବେ ଏନେଇ ମହାକାଳପଡା ବିଧାୟକ କିମ୍ବା ତାଙ୍କ ସମର୍ଥକଙ୍କ ପ୍ରତିକ୍ରିୟା ମିଳିପାରିନି।
ଭଦ୍ରକ ଖଣ୍ଡତଡ଼ା ପଞ୍ଚାୟତରେ ଚାଞ୍ଚଲ୍ୟ : ୧୦ ଫୁଟ ମାଟି ଖୋଳିଲେ ବାହାରୁଛି କିରୋସିନ୍ ଗନ୍ଧ
ନନ୍ଦିଘୋଷ ବ୍ୟୁରୋ: ଭଦ୍ରକ ଖଣ୍ଡତଡ଼ା ପଞ୍ଚାୟତରେ ଚାଞ୍ଚଲ୍ୟ । ୧୦ ଫୁଟ ମାଟି ଖୋଳିଲେ ବାହାରୁଛି କିରାସିନର ଗନ୍ଧ । କିରାସିନ ଗନ୍ଧ ବାହାରିବା ସହ ଆଖପାଖ ଅଞ୍ଚଳରେ ଗନ୍ଧ ଖେଳିଯାଇଛି । ଘଟଣା ପ୍ରଘଟ ହେବା ପରେ ଅଞ୍ଚଳରେ ଲୋକଙ୍କ ଭିଡ଼ ଜମୁଛି । ପଞ୍ଚାୟତର ନୂତନ ଗୃହ ନିର୍ମାଣ ପାଇଁ ପିଲାର ପାଇଁ ଗାତ ଖୋଳାଯାଉଥିଲା । ୧୦ ଫୁଟ ଗଭୀରର ପିଲାର ଖୋଲିବା ପରେ ଗାତ ଭିତରୁ ଆସିଥିଲା କିରାସିନର ଉତ୍କଟ ଗନ୍ଧ । ଏପରିକି ଭିତରୁ ଯାହାବି ମାଟି ବାହାରୁଥିଲା ତାହା କିରାସିନ ଗନ୍ଧ କରିବା ସହିତ ତେଲ ଚିକିଟା ମାଟି ବାହାରୁଛି । ଏପରିକି ଭିତରୁ ବାହାରୁଥିବା ପାଣିରୁ ମଧ୍ୟ କିରାସିନ ଗନ୍ଧ ବାହାରୁଛି । ଆଖପାଖ ଅଞ୍ଚଳ କିରାସିନ ଗନ୍ଧ ବାରିହେଉଛି । ଯାହା ଏବେ ସ୍ଥାନୀୟ ଅଞ୍ଚଳରେ ବେଶ ଚର୍ଚ୍ଚାର ବିଷୟ ପାଲଟିଛି । ଆଖପାଖ ଅଞ୍ଚଳରୁ ଏହାକୁ ଦେଖିବାକୁ ଲୋକଙ୍କ ଧାଡ଼ି ଛୁଟୁଛି । ଯାହାକୁ ନେଇ ମାଟିତଳେ କିରାସିନ ଥିବା ସ୍ଥାନୀୟ ଲୋକେ ସନ୍ଦେହ କରୁଥିବା ବେଳେ ଘଟଣାର ସରକାରୀ ଯାଞ୍ଚ କରିବାକୁ ଦାବି କରିଛନ୍ତି ।