ନୂଆଦିଲ୍ଲୀ: ରାଜୀବ ଶୁକ୍ଳା ହେବେ ବିସିସିଆଇର ନୂଆ ସଭାପତି । ସେ ଆସନ୍ତା ମାସରେ ବର୍ତ୍ତମାନର ଅଧକ୍ଷ ରୋଜର ବିନିଙ୍କ ସ୍ଥାନ ନେବେ । ସମ୍ବାଦ ସରବରାହ ସଂସ୍ଥା ପିଟିଆଇ ସୂତ୍ରରୁ ଏହି ଖବର ପ୍ରକାଶ ପାଇଛି । ୭୦ ବର୍ଷିୟ ବିନିଙ୍କ ଆସନ୍ତା ଜୁଲାଇ ୧୯ ତାରିଖରେ କାର୍ଯ୍ୟକାଳ ସରୁଛି । ଶୁକ୍ଳାଙ୍କୁ ପ୍ରଥମ ୩ ମାସ ପାଇଁ BCCIର କାର୍ଯ୍ୟକାରୀ ସଭାପତି କରାଯିବ । ତାଙ୍କୁ ୬୫ ବର୍ଷ ବୟସ ହୋଇଛି । ସେପ୍ଟେମ୍ବରରେ ବିସିସିଆଇର ବାର୍ଷିକ ସାଧାରଣ ବୈଠକ ଅନୁଷ୍ଠିତ ହେବା ପରେ ଶୁକ୍ଳାଙ୍କୁ ପୂର୍ଣ୍ଣକାଳୀନ କରାଯିବ ।

ରୋଜର ବିନି ଅକ୍ଟୋବର ୨୦୨୨ରେ BCCIର ମୁଖ୍ୟ ଭାବେ ଦାୟିତ୍ବ ଗ୍ରହଣ କରିଥିଲେ । ସେ ପୂର୍ବତନ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କ ସ୍ଥାନ ନେଇଥିଲେ । ଜୁଲାଇ ୧୯ ତାରିଖରେ ତାଙ୍କୁ ୭୦ ବର୍ଷରେ ପଦାର୍ପଣ କରୁଛନ୍ତି । ଏଥିପାଇଁ ତାଙ୍କ କାର୍ଯ୍ୟକାଳ ଶେଷ ହେଉଛି । ଜଷ୍ଟିସ ଲୋଧା କମିଟି ସୁପାରିଶ ଉପରେ ସୁପ୍ରିମକୋର୍ଟଙ୍କ ନିଷ୍ପତ୍ତି ଅନୁସାରେ ବିସିସିଆଇର ଅଧିକାରୀ ୭୦ ବର୍ଷରୁ ଅଧିକ ବୟସର ହୋଇ ପାରିବେ ନାହିଁ ।

ନୂଆଦିଲ୍ଲୀ: ପ୍ରକାଶ ପାଇଛି ଜେଇଇ ଆଡଭାନ୍ସ ପରୀକ୍ଷା ଫଳ । ଆଇଆଇଟି କାନପୁର ଏହି ପରୀକ୍ଷା ଫଳ ପ୍ରକାଶ କରିଛି । ରଜିତ ଗୁପ୍ତା ସାରା ଦେଶରେ ପ୍ରଥମ ସ୍ଥାନ ଅଧିକାର କରି ଟପ୍ପର ହୋଇଛନ୍ତି । ରଜିତ ଗୁପ୍ତା ଜେଇଇ ମେନ୍ସ ୨୦୨୫ ପରୀକ୍ଷାରେ ଶହେ ପ୍ରତିଶତ ନମ୍ବର ରଖିଥିଲେ । ତାଙ୍କର ସର୍ବଭାରତୀୟ ସ୍ତରରେ ରାଙ୍କ ଥିଲା ୧୬ । ଏବେ ଜେଇଇ ଆଡଭାନ୍ସରେ ସେ ପ୍ରଥମ ସ୍ଥାନ ଅଧିକାର କରିଛନ୍ତି । ମେ ୧୮ ତାରିଖରେ ଦେଶରେ ଏହି ପରୀକ୍ଷା ଅନୁଷ୍ଠିତ ହୋଇଥିଲା ।

ରଜତ ଗୁପ୍ତା ହେଉଛନ୍ତି କୋଟା ମହାବୀର ନଗରର ବାସିନ୍ଦା । ତାଙ୍କ ବାପା ଦୀପକ ଗୁପ୍ତା BSNLର ଜଣେ ଇଞ୍ଜିନିୟର ଏବଂ ତାଙ୍କ ମାଆ ଜଣେ ପ୍ରଫେସର୍ । ରଜିତ ଦଶମ ପରୀକ୍ଷାରେ ୯୬.୮ ପ୍ରତିଶତ ମାର୍କ ରଖିଥିଲେ । ଏହା ସହ ପରୀକ୍ଷାରେ ଦ୍ବିତୀୟ ସ୍ଥାନ ଅଧିକାର କରିଛନ୍ତି ଶଶାମ ଜିନ୍ଦଲ ଏବଂ ତୃତୀୟରେ ଅଛନ୍ତି ମାଜିଦ ମୁଜାହିଦ ହୁସେନ ।

ନୂଆଦିଲ୍ଲୀ: ଜୁନ୍ ପ୍ରଥମ ଦିନରେ ଷ୍ଟକ୍ ବଜାର ଖୋଲିବା ସମୟରେ ନିବେଶକମାନେ ଆଶା କରିଥିଲେ ଯେ ବଜାର ସ୍ଥିର ରହିବ କାରଣ ଏହି ସପ୍ତାହରେ RBIର ମୁଦ୍ରା ନୀତି ଭଳି ଏକ ବଡ଼ ନିଷ୍ପତ୍ତି ଆସିବାକୁ ଯାଉଛି । କିନ୍ତୁ ବଜାରରେ ନିମ୍ନଗାମୀ ଧାରା ଦେଖିବାକୁ ମିଳିଥିଲା। ବଜାର ଖୋଲିବାର ମାତ୍ର ୪ ମିନିଟ୍ ପରେ BSE ସେନସେକ୍ସ ୬୫୦ ପଏଣ୍ଟରୁ ଅଧିକ ହ୍ରାସ ପାଇଥିଲା ଏବଂ ୬ ମିନିଟ୍ ପରେ ଏହି ହ୍ରାସ ୭୫୦ ପଏଣ୍ଟ ଅତିକ୍ରମ କରିଥିଲା।

ଜୁନ୍ ୨ ତାରିଖରେ ଲଗାତାର ହ୍ରାସ ମଧ୍ୟରେ ବିଏସଇ ସେନସେକ୍ସର ଆରମ୍ଭ ଖରାପରୁ ହୋଇଥିଲା। ସେନସେକ୍ସ ୨୦୦ ପଏଣ୍ଟରୁ ଅଧିକ ହ୍ରାସ ସହିତ ୮୧,୨୧୪.୪୨ ପଏଣ୍ଟରେ ଖୋଲିଥିଲା, ଏହା ୭୫୦ ପଏଣ୍ଟରୁ ଅଧିକ ହ୍ରାସ ପାଇ ୮୦,୬୫୪.୨୬ ପଏଣ୍ଟରେ ପହଞ୍ଚିଥିଲା। ଶୁକ୍ରବାର ଦିନ ସେନସେକ୍ସ 81,451.01 ପଏଣ୍ଟରେ ବନ୍ଦ ହୋଇଥିଲା।

NSE ନିଫ୍ଟି ୫୦ ରେ ମଧ୍ୟ ସମାନ ପରିସ୍ଥିତି ଦେଖାଦେଇଥିଲା। ବଜାର ଖୋଲିବା ସମୟରେ ଏଥିରେ ପ୍ରାୟ ୮୦ ପଏଣ୍ଟ ହ୍ରାସ ଦେଖାଯାଇଥିଲା। ଆଜି ନିଫ୍ଟି 50 24,669.70 ପଏଣ୍ଟରେ ଖୋଲିଛି। ଯେତେବେଳେ ଶୁକ୍ରବାର ଏହା 24,750.70 ପଏଣ୍ଟରେ ବନ୍ଦ ହୋଇଥିଲା। ବଜାର ଖୋଲିବାର ୧୫ ମିନିଟ୍ ମଧ୍ୟରେ ଏହା ୨୦୦ ପଏଣ୍ଟରୁ ଅଧିକ ହ୍ରାସ ପାଇ 24,526.15 ପଏଣ୍ଟର ସର୍ବନିମ୍ନ ସ୍ତରରେ ପହଞ୍ଚିଥିଲା।

ଶୁକ୍ରବାର ଭାରତୀୟ ଷ୍ଟକ୍ ବଜାର ମଧ୍ୟ ନିମ୍ନଗାମୀ ଧାରା ସହିତ ବନ୍ଦ ହୋଇଥିଲା। ସୋମବାର ବଜାରରେ ଉନ୍ନତି ହେବ ବୋଲି ଆଶା କରାଯାଉଥିଲା। ସମ୍ଭବତଃ ନିବେଶକମାନେ RBIର ମୁଦ୍ରା ନୀତି ନିଷ୍ପତ୍ତିକୁ ଅପେକ୍ଷା କରି ଭୟଭୀତ ହୋଇ ପଡିଛନ୍ତି, ଯାହା ଯୋଗୁଁ ବଜାରରେ ନିମ୍ନଗାମୀ ଧାରା ଦେଖାଯାଇଛି। କେବଳ ଏତିକି ନୁହେଁ, ଗତ ସପ୍ତାହରେ ପ୍ରକାଶିତ GDP ତଥ୍ୟ ମଧ୍ୟ ନିବେଶକଙ୍କ ଭାବନାକୁ ଦୁର୍ବଳ କରିଛି।

ନୂଆଦିଲ୍ଲୀ: ସାଧାରଣ ଲୋକଙ୍କୁ ୪ ଦିନ ପରେ ଆଶ୍ୱସ୍ତି ଦେଲା ଭଳି ଖବର ମିଳିପାରେ। ସାରା ଦେଶରେ ଗୃହ ଋଣ ଠାରୁ ଆରମ୍ଭ କରି କାର୍ ଋଣ ପର୍ଯ୍ୟନ୍ତ ଖୁଚୁରା ଋଣର EMI ପୁଣି ଥରେ ହ୍ରାସ ପାଇପାରେ। ଗତ ୬ ମାସ ମଧ୍ୟରେ, କେନ୍ଦ୍ରୀୟ ବ୍ୟାଙ୍କ RBI ଏହା ଦୁଇଥର କରିଛି ଏବଂ ଏବେ ଏହା ୬ ଜୁନରେ ଏ ସମ୍ପର୍କରେ ଏକ ବଡ଼ ନିଷ୍ପତ୍ତି ନେବାକୁ ଯାଉଛି।

ପ୍ରକୃତରେ, ଭାରତୀୟ ରିଜର୍ଭ ବ୍ୟାଙ୍କ (RBI)ର ମୁଦ୍ରା ନୀତି କମିଟି (MPC)ର ବୈଠକ ୪ ରୁ ୬ ଜୁନ୍ ପର୍ଯ୍ୟନ୍ତ ଚାଲିବାକୁ ଯାଉଛି। ପ୍ରତି ଦୁଇ ମାସରେ ଅନୁଷ୍ଠିତ ଏହି ବୈଠକରେ, RBI ଦେଶର ମୁଦ୍ରାସ୍ଫୀତି ସ୍ତର ଯାଞ୍ଚ କରେ ଏବଂ ତା’ପରେ ସେହି ଅନୁସାରେ ଦେଶର ମୁଦ୍ରାନୀତି ସ୍ଥିର କରେ ଏବଂ ଏହାର ରେପୋ ହାର ପରିବର୍ତ୍ତନ କରେ। ଏହା ଆପଣଙ୍କ ଋଣ EMI ଉପରେ ସୁଧକୁ ପ୍ରଭାବିତ କରେ।

ଭାରତୀୟ ରିଜର୍ଭ ବ୍ୟାଙ୍କ ପୂର୍ବରୁ ଫେବୃଆରୀ ଏବଂ ଏପ୍ରିଲରେ MPC ବୈଠକ କରିଥିଲା। ତା’ପରେ ଉଭୟ ଥର ରେପୋ ହାର ୦.୨୫-୦.୨୫ ପ୍ରତିଶତ ହ୍ରାସ କରାଯାଇଥିଲା। ଏହିପରି, ଗତ ୬ ମାସ ମଧ୍ୟରେ, ଭାରତୀୟ ରିଜର୍ଭ ବ୍ୟାଙ୍କର ରେପୋ ହାର ୦.୫୦ ପ୍ରତିଶତ ହ୍ରାସ ପାଇଛି। ବର୍ତ୍ତମାନ, ରେପୋ ହାର ୬ ପ୍ରତିଶତ ରହିଛି।

ନନ୍ଦିଘୋଷ ବ୍ୟୁରୋ: ବନ୍ୟାରେ ଭାସୁଛି ଆସାମ । ବ୍ରହ୍ମପୁତ୍ର ନଦୀର ପାଣିରେ ଉଟୁବୁଟୁ ହେଉଛି ପୁରା ରାଜ୍ୟ।ବର୍ଷା ଓ ବନ୍ୟାରେ ୮ ଜଣଙ୍କ ମୃତ୍ୟୁ ହୋଇଥିବା ବେଳେ ୧୭ ଟି ଜିଲ୍ଲାର ପ୍ରାୟ ୮୦ ହଜାର ଲୋକ ପ୍ରଭାବିତ ହୋଇଛନ୍ତି। ଏପରିକି ଦିବ୍ରୁଗଡ଼ରେ ବିପଦ ସଂକେଟ ପାର୍ କରିଛି ବ୍ରହ୍ମପୁତ୍ର। ଯୁଆଡ଼େ ଦେଖିବ ଖାଲି ପାଣି ଆଉ ପାଣି। କିଛି ଦିନ ହେଲା ଏହି ଅଞ୍ଚଳରେ ମୂଷଳଧାରାରେ ବର୍ଷା ଜାରି ରହିଛି। ଏଥିରେ ବ୍ୟାପକ ଧନଜୀବନ ହାନି ହୋଇଛି। ହଜାର ହଜାର ଲୋକ ବାସହରା ହୋଇଥିବାର ମଧ୍ୟ ସୂଚନା ମିଳିଛି। ଆସାମ ରାଇଫଲସ୍ ଓ ଏନଡିଆରଏଫ୍ ଲାଗିଛନ୍ତି ଉଦ୍ଧାର କାର୍ଯ୍ୟରେ। ପ୍ରାୟ ୩ ହଜାର ଲୋକଙ୍କୁ ରେସକ୍ୟୁ କରାଯାଇଛି । ଆଗକୁ ଆହୁରି ବର୍ଷା ହେବାର ସମ୍ଭାବନା ଥିବାରୁ କେତେକ ଜିଲ୍ଲାରେ ଜାରି କରାଯାଇଛି ରେଡ୍ ଆଲର୍ଟ।

ପ୍ରକୃତିର ତାଣ୍ଡବରେ ଛାରଖାର ମଣିପୁର । ଗତ ୪୮ ଘଣ୍ଟା ମଧ୍ୟରେ ମୋଟ ୩,୮୦୨ ଜଣ ଲୋକ ପ୍ରଭାବିତ ହୋଇଛନ୍ତି ।  ୮୮୩ ଘର କ୍ଷତିଗ୍ରସ୍ତ ହୋଇଥିବା ସୂଚନା ରହିଛି । ବନ୍ୟା ଯୋଗୁ ବହୁ ସ୍ଥାନରେ ଭୂସ୍ଖଳନ ହୋଇଛି । ବର୍ଷା ଯୋଗୁଁ ରାଜ୍ୟର ୩, ୨୭୫ଟି ଅଞ୍ଚଳ ପ୍ରଭାବିତ ହୋଇଛି। ଏହି ବିପର୍ଯ୍ୟୟରେ ଦୁଇ ଜଣ ଆହତ ଏବଂ ୬୪ ପଶୁଙ୍କ ମୃତ୍ୟୁ ହୋଇଥିବା ରିପୋର୍ଟ ମିଳିଛି। ରାଜ୍ୟ ସାରା ୧୨ ଟି ଭୂସ୍ଖଳନ ରେକର୍ଡ କରାଯାଇଛି । ନଦୀ ଖୁରାଇ, ହିଙ୍ଗାଙ୍ଗ ଏବଂ ଚେକନ ଅଞ୍ଚଳରେ ଏହାର ବନ୍ଧ ଭାଙ୍ଗିଛି । ଯାହା ଫଳରେ ରାଜ୍ୟ ରାଜଧାନୀ ଇମ୍ଫାଲ ଏବଂ ଇମ୍ଫାଲ ପୂର୍ବ ଜିଲ୍ଲାର ବିଭିନ୍ନ ଅଂଶ ପ୍ରଚୁର ପରିମାଣରେ ଜଳମଗ୍ନ ହୋଇଛି । ଭାରତୀୟ ସେନା ଏବଂ ଆସାମ ରାଇଫଲ୍ସର କର୍ମଚାରୀମାନେ ଇମ୍ଫାଲ ପୂର୍ବରେ ଜଳମଗ୍ନ ଅଞ୍ଚଳରୁ ପ୍ରାୟ ୧୦୦୦ ଜଣଙ୍କୁ ସଫଳତାର ସହ ଉଦ୍ଧାର କରିଛନ୍ତି ।  ଯାହାକୁ ସବୁଠାରୁ ଅଧିକ ପ୍ରଭାବିତ ଜିଲ୍ଲା ଭାବରେ ଚିହ୍ନଟ କରାଯାଇଛି । ଚେକନ୍ ଅଞ୍ଚଳରେ ଇମ୍ଫାଲ ନଦୀର ପ୍ରବାହିତ ଜଳ ଅଲ୍ ଇଣ୍ଡିଆ ରେଡିଓ ଇମ୍ଫାଲ କମ୍ପ୍ଲେକ୍ସ ଏବଂ ସରକାରୀ ଜବାହରଲାଲ ନେହେରୁ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ସମେତ ଅନେକ ପ୍ରମୁଖ ପ୍ରତିଷ୍ଠାନ ପରିସରରେ ଜଳବନ୍ଦୀ ସୃଷ୍ଟି କରିଥିଲା ।

ସିକିମରେ ମଧ୍ୟ ସମାନ ପରିସ୍ଥିତି। ବର୍ଷାରେ ଅନେକ ସ୍ଥାନରେ ହୋଇଛି ଭୂସ୍ଖଳନ। ଏହା ଦ୍ଵାରା ରାସ୍ତା ଅବରୋଧ ହୋଇଛି। ବିଭିନ୍ନ ସ୍ଥାନରେ ଅଟକି ରହିଛନ୍ତି ପର୍ଯ୍ୟଟକ। ୧୫୦୦ ପର୍ଯ୍ୟଟକ ଫସି ରହିଛନ୍ତି। ସେମାନଙ୍କୁ ଉଦ୍ଧାର କରି ନିଜ ନିଜ ରାଜ୍ୟକୁ ପଠାଇବା ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ତେବେ ତିସ୍ତା ନଦୀ ଭୟଙ୍କର ରୂପ ନେଇଛି। ଏହାର କରାଳ ସ୍ରୋତରେ ଅନେକ ବ୍ରିଜ ଭାସି ଯାଇଛି। ଦେଖୁ ଦେଖୁ ଭୁଶୁଡ଼ି ପଡ଼ିଥିଲା ଏକ ପୁରୁଣା ପୋଲ ଏବଂ ପାଣିର ସ୍ରୋତରେ ତାହା ଲୀନ ହୋଇ ଯାଇଥିଲା। ଗତ ଶନିବାର ପର୍ଯ୍ୟଟକଙ୍କ ଏକ ଗାଡ଼ି ତିସ୍ତା ନଦୀକୁ ଖସି ପଡ଼ିଥିଲା।୬ ଜଣ ଟୁରିଷ୍ଟ ନିଖୋଜ ହୋଇଛନ୍ତି। ସେମାନଙ୍କୁ ଏପର୍ଯ୍ୟନ୍ତ ଠାବ କରାଯାଇପାରିନାହିଁ। ନିଖୋଜ ଟୁରିଷ୍ଟଙ୍କ ମଧ୍ୟରେ ଅଛନ୍ତି ୪ ଜଣ ଓଡ଼ିଆ ବି ଅଛନ୍ତି। ସେମାନେ ଯାଜପୁରର।ସିକିମ ମୁଖ୍ୟମନ୍ତ୍ରୀଙ୍କ ସହିତ କଥା ହୋଇଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହା। ସବୁ ପ୍ରକାରର ସାହାଯ୍ୟ କରିବାକୁ ସେ ପ୍ରତିଶ୍ରୁତି ଦେଇଛନ୍ତି।

ନୂଆଦିଲ୍ଲୀ: ଦେଶରେ ଉପରମୁହାଁ ହେଲାଣି କରୋନା ଗ୍ରାଫ୍। ଆଜି ସୁଦ୍ଧ ଭାରତରେ ୩, ୭୫୮ଟି ସକ୍ରିୟ ମାମଲା ରହିଛି । ଗୋଟିଏ ଦିନ ପୂର୍ବେ ୩,୩୯୫ ଥିଲା। ୨୪ ଘଣ୍ଟା ମଧ୍ୟରେ ୩୬୩ ଟି ମାମଲା ରିପୋର୍ଟ ହୋଇଛି। ୨୪ ଘଣ୍ଟା ମଧ୍ୟରେ ଦୁଇ ଜଣଙ୍କ ମୃତ୍ୟୁ ହୋଇଥିବା ବି ସୂଚନା ରହିଛି । କର୍ଣ୍ଣାଟକ ଏବଂ କେରଳରୁ ଜଣେ ଲେଖାଏଁ ମୃତ୍ୟୁ ରିପୋର୍ଟ ହୋଇଛି । ମୃତ ବ୍ୟକ୍ତି ଦୁଇ ଜଣ ଅନ୍ୟ ରୋଗରେ ବି ପୀଡିତ ଥିବା କୁହାଯାଇଛି । ଗତକାଲିଠାରୁ ଆଜି ପର୍ଯ୍ୟନ୍ତ କେରଳରେ ୬୪ ଜଣ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ମହାରାଷ୍ଟ୍ରରେ ୪୮୫ ଏବଂ ଦିଲ୍ଲୀରେ ୪୩୮ କୋଭିଡ-19 ମାମଲା ରହିଛି।

୨୪ ଘଣ୍ଟା ମଧ୍ୟରେ ପଶ୍ଚିମବଙ୍ଗରେ ୮୨ ଟି ନୂତନ ମାମଲା ରିପୋର୍ଟ ହୋଇଛି । ଯାହା ସମସ୍ତ ରାଜ୍ୟ ମଧ୍ୟରେ ସର୍ବାଧିକ। ଏହା ପରେ କେରଳରେ ୬୪ ଏବଂ ଦିଲ୍ଲୀରେ ୬୧ ଟି ମାମଲା ରହିଛି।