ନନ୍ଦିଘୋଷ ବ୍ୟୁରୋ : ଜାମ୍ମୁ ଓ କାଶ୍ମୀରରେ ଆତଙ୍କବାଦୀ ହମଲା । ଏଥରେ ପର୍ଯ୍ୟଟକଙ୍କ ଉପରେ ହମଲା କରିଛନ୍ତି ଆତଙ୍କବାଦୀ । ପହଲଗାଓଁସ୍ଥିତ ବୈସରନ ପର୍ବତାଞ୍ଚଳରେ ଗୁଳିମାଡ଼ ହୋଇଛି । ଟ୍ରେକିଂ ଟ୍ରିପରେ ଯାଇଥିବା ପର୍ଯ୍ୟଟକଙ୍କୁ ଗୁଳିମାଡ଼ କରାଯାଇଥିବା ସୂଚନା ମିଳିଛି । ଘଟଣାରେ ୨୮ରୁ ଅଧିକ ବ୍ୟକ୍ତି ପ୍ରାଣ ହରାଇଥିବା ବେଳେ ୧୨ରୁ ଅଧିକ ଆହତ ହୋଇଛନ୍ତି । ଜାମ୍ମୁ ଓ କାଶ୍ମୀରରେ ହୋଇଥିବା ଆତଙ୍କୀ ହମଲାରେ ପ୍ରାଣ ହରାଇଛନ୍ତି ବାଲେଶ୍ବରର ପ୍ରଶାନ୍ତ ଶତପଥୀ। ସାରଗାଁ ଇସାଣୀର ସେ ବାସିନ୍ଦା। ଦୁଇ ଦିନ ତଳେ ପତ୍ନୀ ଓ ପୁଅ ସହ ପହଲଗାଓଁ ଯାଇଥିଲେ ପ୍ରଶାନ୍ତ। ପ୍ରଶାନ୍ତଙ୍କ ମୃତଦେହ ଜାମ୍ମୁରେ ଥିବା ନେଇ ଅନନ୍ତନାଗ ପୋଲିସ ପକ୍ଷରୁ ସୂଚନା ମିଳିଛି । ଅନ୍ୟ ଜଣଙ୍କ ନାମ ମଞ୍ଜୁନାଥ ବୋଲି ସୂଚନା ମିଳିଛି। ମଞ୍ଜୁନାଥଙ୍କ ଘର କର୍ଣ୍ଣାଟକ ଶିବମୋଗାରେ । ଆଜି ଅପରାହ୍ଣ ୨.୩୦ଟାରେ ପହଲଗାମ ଅଞ୍ଚଳରେ ପର୍ଯ୍ଯଟକଙ୍କ ଉପରେ ଗୁଳିମାଡ କରିଥିଲେ ଆତଙ୍କବାଦୀ । ପର୍ଯ୍ଯଟକମାନେ ବୈସରନ ଅଞ୍ଚଳରେ ଥିବାବେଳେ ସେମାନଙ୍କ ଉପରେ ଗୁଳିମାଡ କରିଥିଲେ ଆତଙ୍କବାଦୀ । ଏହି ଘଟଣା ପରେ ସାରା ଅଞ୍ଚଳରେ ସର୍ଚ୍ଚ ଅପରେସନ ଜାରି ରହିଛି। ହମଲା ଲାଗି ନିଜକୁ ଦାୟୀ କରିଛି ଲସ୍କର ସଂଗଠନରେ ଟିଆରଏଫ ବାହିନୀ । ପହଲଗାଓଁ ହିଲ୍ ଷ୍ଟେସନରୁ ୫ କିଲୋମିଟର ଦୂର ବୈସରାମ ମିଡୋରେ ଏହି ହମଲା ହୋଇଛି । ଘଟଣା ପରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ସହ ଆଲୋଚନା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ଶ୍ରୀନଗର ଗସ୍ତ କରିଛନ୍ତି ଅମିତ ଶାହ। ଏହି ଘଟଣା ପରେ କେନ୍ଦ୍ର ସରକାରଙ୍କ ପକ୍ଷରୁ ଉଚ୍ଚସ୍ତରୀୟ ବୈଠକ ଡକାଯାଇଛି । ଏଥିରେ କେନ୍ଦ୍ର ଗୃହ ସଚିବଙ୍କ ସମେତ ବହୁ ବରିଷ୍ଠ ଅଧିକାରୀ ସାମିଲ ହୋଇଛନ୍ତି। ଗୁଳିକାଣ୍ଡକୁ ଜାମ୍ମୁ ଓ କାଶ୍ମୀର ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ନିନ୍ଦା କରିଛନ୍ତି । ଆହତଙ୍କୁ ତୁରନ୍ତ ଚିକିତ୍ସା ଯୋଗାଇଦେବା ଲାଗି ନିର୍ଦ୍ଦେଶ ଦେଇଛନ୍ତି ଲେଫଟନାଣ୍ଟ ଗଭର୍ଣ୍ଣର ମନୋଜ ସିହ୍ନା।
ସାମ୍ନାକୁ ଆସିଲା ଅପହରଣ ବେଳର ସିସିଟିଭି ଫୁଟେଜ୍, ସ୍କୁଲରୁ ଫେରିବାବେଳେ ଉଠାଇ ନେଇଥିଲେ ଦୁର୍ବୃତ୍ତ
ଭୁବନେଶ୍ବର : ସାମ୍ନାକୁ ଆସିଲା ଅପହରଣ ବେଳର ସିସିଟିଭି । ସ୍କୁଲରୁ ଫେରିବାବେଳେ ଭୁବନେଶ୍ବରରୁ ଉଠାଇ ନେଇଥିଲେ ଦୁର୍ବୃତ୍ତ । ଇଏ ହେଉଛି ସେହି ସିସିଟିଭି ଭିଜୁଆଲ । ସହର ଉପକଣ୍ଠ ପାଞ୍ଚଗାଁରୁ ବନ୍ଧୁକ ମୁନରେ ୮ ବର୍ଷର ଛୁଆକୁ ଉଠାଇନେଇଥିଲେ ଦୁର୍ବୃତ୍ତ । ନନ୍ଦିଘୋଷ ଟିଭି ହାତରେ ଲାଗିଛି ଅପହରଣ ସମୟର ଏକ୍ସୁସିଭ ସିସିଟିଭି ଭିଜୁଆଲ । ନମ୍ବର ଢାଙ୍କି ଏକ କାରରେ ପିଲାଟିକୁ ଅପହରଣ କରାଯାଇଥିଲା । ଅଭିଯୋଗ ପାଇବା ପରେ ଏୟାରଫିଲ୍ଡ ଥାନା ପକ୍ଷରୁ ହୋଇଥିଲା ଛାନବିନ । ସକାଳ ୧୦ଟାରେ ଶିଶୁକୁ ଅପହରଣ କରାଯାଇଥିଲା । ସ୍କୁଲରୁ ଘରକୁ ଫେରିବାବେଳେ ଆରତ ରଞ୍ଜନ କାଳିଆଙ୍କ ୮ ବର୍ଷର ପୁଅକୁ ଏକ କାରରେ ଅପହରଣ କରାଯିବା ନେଇ ଏୟାରଫିଲ୍ଡ ଥାନାରେ ଅଭିଯୋଗ ହୋଇଥିଲା । ଗାଁରୁ ଗାଡ଼ିଟି ବାହାରିବାବେଳେ କିଛି ଯୁବକ ଗାଡ଼ିଟିକୁ ଅଟକାଇଥିଲେ ମଧ୍ଯ ଦୁର୍ବୃତ୍ତମାନେ ବନ୍ଧୁକ ଓ ଛୁରୀ ଦେଖାଇ ପିଲାଟିକୁ ଅପହରଣ କରି ନେଇଥିଲେ । ଅଭିଯୁକ୍ତଙ୍କୁ ଧରିବା ସହ ପିଲାଟିକୁ ସୁରକ୍ଷିତ ଭାବେ ଉଦ୍ଧାର କରିବା ପାଇଁ ଗଠନ ହୋଇଥିଲା ସ୍ପେଶାଲ ଟିମ୍ । ଆଖପାଖରେ ଛାନବିନ କରିବା ସହ ସିସିଟିଭି ଯାଞ୍ଚ କରାଯାଇଥିଲା । ଠିକ୍ ଏହି ସମୟରେ ଅପହରଣକାରୀଙ୍କ ପାଖରୁ ଆସିଥିଲା ଏକ ଫୋନକଲ୍ । ପିଲାଟିର ମୁଣ୍ଡ ଜାମିନ ରଖି ୧୦ଲକ୍ଷ ଟଙ୍କା ଦାବି କରିଥିଲେ ଅପହରଣକାରୀ । କିନ୍ତୁ ଟେଲିଫୋନ ନମ୍ବରକୁ ଟ୍ରେସ କରି ଅପହରଣକାରୀଙ୍କ ଲୋକେସନ ମିଳିବା ପରେ ପିଲାଟିକୁ ଉଦ୍ଧାର କରାଯାଇଛି ।
ଦର୍ଶକ ଦେଖିଲେ ପାଇକ ବିଦ୍ରୋହର ଲୋମହର୍ଷକ କାହାଣୀ
ଭୁବନେଶ୍ୱର : ଭୁବନେଶ୍ଵର ରବୀନ୍ଦ୍ର ମଣ୍ଡପରେ ରେ ଦର୍ଶକ ଦେଖିଲେ ପାଇକ ବିଦ୍ରୋହର କାହାଣୀ । ବକ୍ସି ଜଗବନ୍ଧୁଙ୍କ ଡାକରାରେ ବିପ୍ଳବୀ କୃତ୍ତିବାସ ପାଟ୍ଟଶାଣୀ ଆରମ୍ଭ କଲେ ଯୁଦ୍ଧ । ବାଣପୁର ଓ ଖୋର୍ଦ୍ଧାରେ କୃତ୍ତିବାସଙ୍କ ନେତୃତ୍ଵରେ ଇଂରେଜ ନମାନେ ବିରୁଦ୍ଧରେ ଆରମ୍ଭ ହେଲା ଲଢ଼େଇ । ଆଉ ଏହି ଲଢେଇରେ ପରାଜିତ ହେଲା ବ୍ରିଟିଶ ବାହିନୀ । ଶେଷରେ ଇଂରେଜମାନେ କୂଟନୀତି ପ୍ରୟୋଗ କରି କୃତ୍ତିବାସଙ୍କ ଦାଦା ଶ୍ବଶୁର ବାସୁଦେବ ନରେନ୍ଦ୍ର ସିଂହଙ୍କୁ କରାୟତ କଲେ । ନରେନ୍ଦ୍ର ସିଂହଙ୍କ ଛଳନାରେ ଭୁଲିଯାଇ କୃତ୍ତିବାସ ତାଙ୍କ ଘରକୁ ନିଜ ସ୍ତ୍ରୀ ପଦ୍ମାଙ୍କୁ ଦେଖା କରିବାକୁ ଯାଆନ୍ତି । ଆଉ ଛଳନା କରି ଇଂରେଜ କୃତ୍ତିବାସଙ୍କୁ ବନ୍ଦି କରେ । ଏଭଳି ଦେଶପ୍ରେମର କାହାଣୀକୁ ନେଇ ଅତି ଚମତ୍କାର ଢଙ୍ଗରେ ପରିବେଷଣ କରିଛନ୍ତି ଶତାବ୍ଦୀର କଳାକାର।
ଶତାବ୍ଦୀର କଳାକାର ସୁବର୍ଣ୍ଣ ଜୟନ୍ତୀ ସମାରୋହରେ ନାଟ୍ୟକାର ସ୍ବର୍ଗତ ପର୍ଶୁରାମ ହରିଚନ୍ଦନଙ୍କ ଲିଖିତ ନାଟକ ବିପ୍ଳବୀ କୃତ୍ତିବାସକୁ ଦର୍ଶକ ବେଶ ପସନ୍ଦ କରିଛନ୍ତି । ଧୀର ମଲ୍ଲିକ ଏହାକୁ ନିର୍ଦ୍ଦେଶନା ଦେଇଥିବାବେଳେ ସଂଗୀତରେ ସଜାଇଥିଲେ ପ୍ରତାପ । ଅଭିନୟରେ ସୌମେନ୍ଦ୍ର, ସନ୍ତୋଷ, କାର୍ତ୍ତିକ, ଅନିଲ, ପ୍ରିୟଙ୍କା ରଶ୍ମି ଓ ଅଭିଙ୍କ ଭଳି ଅନେକ ଅଭିଜ୍ଞ କଳାକାରଙ୍କୁ ଦେଖିବାକୁ ମିଳିଥିଲା । ଶତାବ୍ଦୀର କଳାକାରଙ୍କ ପକ୍ଷରୁ ଦ୍ବିତୀୟ ଦିନରେ ପ୍ରସିଦ୍ଧ ନାଟକ ବାଞ୍ଛାର ବଗିଚା ପରିବେଷଣ ହେବ । ମଞ୍ଚ ନାଟକକୁ ବଞ୍ଚାଇ ରଖିବା ପାଇଁ ଶତାବ୍ଦୀର ଏହି ପ୍ରୟାସକୁ ସଭିଏଁ ପ୍ରଶଂସା କରିଛନ୍ତି ।
ଠାକୁରାଣୀ ଯାତ୍ରା ପାଇଁ ଦୁଲୁକୁଛି ବ୍ରହ୍ମପୁର ସହର, ପ୍ରବଳ ଖରା ସତ୍ତ୍ବେ ଛୁଟୁଛି ଶ୍ରଦ୍ଧାଳୁଙ୍କ ସୁଅ
ବ୍ରହ୍ମପୁର ; କେଉଁଠି ମେଳା ତ କେଉଁଠି ମୀନା ବଜାର । ଖେଳକୁଦ ସାଙ୍ଗକୁ ଖାଦ୍ଯ ପେୟର ଆସର । ହସ୍ତତନ୍ତ ସାମଗ୍ରୀ ସହ ରାଜ୍ଯର ଟେରାକୋଟା ସାମଗ୍ରୀ କିଣାକିଣି ପାଇଁ ଜମିଛି ଆସର । ମହିଶୂର ହସ୍ତଶିଳ୍ପ ଠାରୁ କାଶ୍ମୀରର ପାରମ୍ପରକି ବସ୍ତ୍ର, ରାଜ୍ଯର ହସ୍ତକଳା ସବୁ ଗୋଟିଏ ସ୍ଥାନରେ ମିଳୁଛି । ବ୍ରହ୍ମପୁର ମାଆ ବୁଢୀ ଠାକୁରାଣୀଙ୍କ ଯାତ୍ରା ଆଣି ଦେଇଛି ଲୋକଙ୍କ ପାଇଁ ଏହି ସୁଯୋଗ । ଗତ ୩ ତାରିଖରୁ ମାଆ ବାପା ଘରକୁ ଆସିବା ପରଠାରୁ ଲୋକାରଣ୍ୟ ହୋଇ ଉଠିଛି ବ୍ରହ୍ମପୁର ସହର । ଅସ୍ଥାୟୀ ମଣ୍ଡପରେ ମାଆଙ୍କୁ ଦର୍ଶନ କରି ଯାତ୍ରା ବୁଲୁଛନ୍ତି ପିଲାଠାରୁ ବୁଢା । ପ୍ରବଳ ଖରା ସତ୍ତ୍ବେ ମାଆଙ୍କ ଦର୍ଶନ ପାଇଁ ଜିଲ୍ଲା ଓ ଜିଲ୍ଲା ବାହାରୁ ଶ୍ରଦ୍ଧାଳୁଙ୍କ ସୂଅ ଛୁଟୁଛି ।
ଦୋଳି ଖେଳ ସାଙ୍ଗକୁ ବିଭିନ୍ନ ମଜା ମସ୍ତିରେ ଲାଗି ପଡିଛନ୍ତି ଲୋକେ । ସଂଧ୍ଯା ହେଲା ମାତ୍ରେ ମୀନା ବଜାର ଓ ମେଳାରେ ଜମୁଛି ଖଚାଖଚ ଭିଡ଼ । ରାମ ଦୋଳି ସାଙ୍ଗକୁ ଚକାଭଉଁରି, ଆହୁରି କେତେ କଣ । କିଏ ଦୋଳି ମାୟାରେ ବାୟା ତଦ କିଏ ଚଟପଟି ଖାଦ୍ଯ ଷ୍ଟଲରେ ଭିଡ଼ ଜମାଉଛନ୍ତି । ଦୁଇବର୍ଷ ପରେ ମାଆ ବୁଢୀ ଠାକୁରାଣୀ ଯାତ୍ରା ପଡ଼ିଥିବାରୁ ଏହାକୁ ହାତଛଡ଼ା କରିବାକୁ କେହି ଚାହୁଁ ନାହାନ୍ତି । ମାଆଙ୍କ ଦର୍ଶନ କରି ବିଭିନ୍ନ କଳାକୁଞ୍ଜ ବୁଲି ଦେଖିବା ସହ ମୀନା ବଜାର ଓ ମେଳାରୁ ବିଭିନ୍ନ ସାମଗ୍ରୀ କିଣି ନେଉଛନ୍ତି ଲୋକେ ।
ଲିଫ୍ଟ ପରିଚାଳନା ନାଁରେ ମହାଦୁର୍ନୀତି ଅଭିଯୋଗ
ବ୍ରହ୍ମପୁର : ସମସ୍ୟାବହୁଳ ବ୍ରହ୍ମପୁର MKCG ମେଡିକାଲ କଲେଜ ଓ ହସ୍ପିଟାଲ । ଲିଫ୍ଟ ପରିଚାଳନାରେ ମହାଦୁର୍ନୀତି ଅଭିଯୋଗ । ରକ୍ଷଣାବେକ୍ଷଣା ପାଇଁ ବର୍ଷକୁ ପ୍ରାୟ ୭୦ ଲକ୍ଷ ଟଙ୍କାର ହେଉଛି ବିଲ୍ । କିନ୍ତୁ ବର୍ଷରେ ଅଧାଦିନ ରୋଗୀଙ୍କୁ ବୋହି ନେବାକୁ ପଡୁଛି । ଯନ୍ତ୍ରାଂଶ ମିଳୁନଥିବା ଦର୍ଶାଇ ଠିକା ସଂସ୍ଥା ଅଚଳ ଲିଫ୍ଟ ମରମତି କରିବାରେ ଦିନ ଗଡ଼ାଉଛନ୍ତି । ହେଲେ କର୍ତ୍ତୃପକ୍ଷଙ୍କ ପକ୍ଷରୁ କେବଳ ନୋଟିସ୍ କରି କୈଫିୟତ ମଗାଯାଇ ଚୁପ ବସୁଥିବା ଦେଖିବାକୁ ମିଳୁଛି । ଆଖିଦୃଶିଆ କାର୍ଯ୍ୟାନୁଷ୍ଠାନ ନହେବାରୁ ହନ୍ତସନ୍ତ ହେଉଛନ୍ତି ରୋଗୀ ଓ ତାଙ୍କ ସମ୍ପର୍କୀୟ । କାଜୁଆଲ୍ଟି ଓ ଅଇସିୟୁ ଭଳି ଜରୁରିକାଳୀନ ବିଭାଗରେ ମଧ୍ଯ କାମ କରୁନି ଲିଫ୍ଟ ।
MKCG ମେଡିକାଲରେ ବହୁତଳ ବିଶିଷ୍ଟ କୋଠାରେ ରୋଗୀଙ୍କୁ ସୁରକ୍ଷିତ ନେବାଆଣିବା ପାଇଁ ୩୨ଟି ଲିଫ୍ଟ ଥିବା ବେଳେ ଏହାର ସୁପରିଚାଳନା ପାଇଁ ୩୬ ଜଣ ଅପରେଟର ନିଯୁକ୍ତି ହୋଇଛନ୍ତି । କର୍ମଚାରୀ ଦରମା ବାବଦରେ ପ୍ରାୟ ୫୦ଲକ୍ଷ ଟଙ୍କା ବିଲ୍ ହେଉଛି । ମରାମତି ପାଇଁ ବାର୍ଷିକ ୨୦ ଲକ୍ଷ ଟଙ୍କା ଖର୍ଚ୍ଚ ହେଉଛି । ମରାମତି ନାଁରେ ଏବଂ ପରିଚାଳନା ପାଇଁ ପ୍ରାୟ ୭୦ ଲକ୍ଷ ଟଙ୍କା ଖର୍ଚ୍ଚ ହେଉଛି । ହେଲେ ଅଭିଯୋଗ ସମୟରେ ଅପରେଟର ନଥିବା ଦେଖିବାକୁ ମିଳୁଛି । ସେପଟେ ଏନେଇ କାର୍ଯ୍ଯାନୁଷ୍ଠାନ ନିଆଯିବ ବୋଲି କହିଛନ୍ତି ହସପିଟାଲ ଡିନ୍ ।
ପିସିଆର ଭ୍ୟାନ ଉପରେ ଚଢିଗଲା ହାଇୱା, ଜଣେ ପୋଲିସ କର୍ମଚାରୀ ଓ ଜଣେ ହୋମଗାର୍ଡଙ୍କ ମୃତ୍ୟୁ
କଟକ : ବିପର୍ଯ୍ୟୟ ଘଟାଇଲା ବାଲି ବୋଝେଇ ହାଇୱା । କଟକ ଗତିରାଉତ ପାଟଣା ମହାନଦୀ ବନ୍ଧ ଉପରେ ଦୁର୍ଘଟଣା । ଠିଆ ହୋଇଥିବା ପିସିଆର ଭ୍ୟାନ ଉପରେ ଚଢିଗଲା ହାଇୱା । ଜଣେ ପୋଲିସ କର୍ମଚାରୀ ଓ ଜଣେ ହୋମଗାର୍ଡଙ୍କ ମୃତ୍ୟୁ । CRI ଥାନା ୧୫ ନମ୍ବର PCR ଧରି ଜଣେ ପୋଲିସ କର୍ମଚାରୀ ଓ ଦୁଇଜଣ ହୋମଗାର୍ଡ ପାଟ୍ରୋଲିଂ କରୁଥିଲେ । ଚୋରା ବାଲି ଗାଡି ଯାଉଥିବା ଖବର ପାଇ ଅଟକାଇବାକୁ ଉଦ୍ୟମ କରିଥିଲେ । ଏହି ସମୟରେ ଅଣଓସାରିଆ ରାସ୍ତାରେ କନ୍ଦରପୁର ଆଡୁ ଦୃତ ଗତିରେ ଆସୁଥିବା ବାଲି ବୋଝେଇ ହାଇୱାଟି ପିସିଆର ଉପରେ ଚଢି ଯାଇଥିଲା । ଫଳରେ ଭାରସାମ୍ଯ ହରାଇ ଦୁଇଟିଯାକ ଗାଡ଼ି ବନ୍ଧ ତଳକୁ ଖସି ପଡ଼ିଥିଲା । ପୋଲିସ, ଅଗ୍ନିଶମ ଓ ସ୍ଥାନୀୟ ଲୋକେ ଗ୍ୟାସ କଟରରେ କାଟି ୩ ଜଣଙ୍କୁ ଉଦ୍ଧାର କରିଥିଲେ । ମୃତ ହୋମଗାର୍ଡ ଜଗବନ୍ଧୁ ମାହାଲି ଏବଂ ଓପିଏଏଫ ଯବାନ ଲୋକନାଥ ଶବରଙ୍କ ମରଶରୀରକୁ ଗାର୍ଡ ଅଫ ଅନର ଦେବା ପରେ ତାଙ୍କ ଗାଁକୁ ପଠାଯାଇଥିଲା । ସେପଟେ ଆହତ ହୋମଗାର୍ଡ ପବିତ୍ର ମୋହନ ସେଠୀଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି ।
ଜଗବନ୍ଧୁଙ୍କ ମର ଶରୀର ନିଜ ଯଶପଡାରେ ପହଞ୍ଚିବା ପରେ ଗାଁରେ ଶୋକାକୂଳ ପରିବେଷ ସୃଷ୍ଟି ହୋଇଥିଲା । ରୋଜଗାରିଆ ପୁଅକୁ ହରାଇ ଅସହାୟ ହୋଇପଡ଼ିଛନ୍ତି ବୃଦ୍ଧ ମାଆ-ବାପା । ସ୍ତ୍ରୀ ଓ ୬ ବର୍ଷର ଝିଅ ଓ ୩ ବର୍ଷର ପୁଅକୁ ନେଇ ଜଗବନ୍ଧୁଙ୍କ ସଂସାର । ତେଣୁ ପରିବାର ଲୋକଙ୍କ ଉପଯୁକ୍ତ କ୍ଷତିପୂରଣ ଯୋଗାଇ ଦେବାକୁ ପରିବାର ଓ ପୋଲିସ କର୍ମଚାରୀ ସଂଘ ପକ୍ଷରୁ ଦାବି କରାଯାଇଛି । ସେପଟେ ସମସ୍ତ ସହଯୋଗ ଯୋଗାଇ ଦେବାସହ ରାଜ୍ଯ ସରକାରଙ୍କୁ ଏନେଇ ଅବଗତ କରିବେ ବୋଲି ପ୍ରତିଶ୍ରୁତି ଦେଇଛନ୍ତି ସ୍ଥାନୀୟ ବିଧାୟକ ।ଏହା ଏକ ଦୁର୍ଘଟଣା ନା ଯୋଜନାବଦ୍ଧ ହତ୍ଯାକାଣ୍ଡ ତାହା ସ୍ପଷ୍ଟ ହୋଇ ନଥିବାବେଳେ ହାଇୱା ଡ୍ରାଇଭରକୁ ଅଟକ ରଖି ପଚରାଉଚରା କରୁଛି ପୋଲିସ୍ ।
ନୀରବି ଯାଇଛି ପୂରା ପରିବେଶ, ସ୍ତବ୍ଧ ପାଲଟିଯାଇଛି ରତନପୁର
ପିପିଲି : ଝୁରୁଛି ଗାଁ ଦାଣ୍ଡ । ନୀରବି ଯାଇଛି ପୂରା ପରିବେଶ । ସ୍ତବ୍ଧ ପାଲଟିଯାଇଛି ରତନପୁର । କାନ୍ଦୁଛି ଆଶୀର୍ବାଦର ଆତ୍ମା, ପଚାରୁଛି ମୋର ଦୋଷ କଣ ଥିଲା ? ମୋ ହତ୍ଯାକାରୀକୁ ଦଣ୍ଡ ଦେବେନି କି ସରକାର ? ଏ ହେଉଛି ୧୧ ବର୍ଷୀୟ ବାଳକ ମୃତ୍ଯୁ ପରର ଦୃଶ୍ଯ । ଆର୍ଶୀବାଦ ବାପା ମାନସ ପାଲଟି ଯାଇଛନ୍ତି ଜୀଅନ୍ତା ଶବ । ମା, ବୁଢ଼ୀ ମା କଥା ନ କହିଲେ ଭଲ । ପୁଅର ଜୁଇ ର ନିଆଁ ଲିଭି ଲିଭି ଆସୁଥିଲା ବେଳେ ଏବେ ଆର୍ଶୀବାଦଙ୍କ ପରିବାର ଓ ଗାଁ ଲୋକଙ୍କ ମନରେ କୁହୁଳୁଛି ନିଆଁ । କାହାରି ଘରେ ଜଳୁ ନାହିଁ ଚୁଲି,। ଆର୍ଶୀବାଦ ପାଇଁ ଖାଁ ଖାଁ ଗାଁ ଖେଳ ପଡିଆ । ଆର୍ଶୀବାଦ ସହିତ ଖେଳୁଥିବା ସାଙ୍ଗ ଓ ଗାଁରେ କିଛି ଦିନ ତଳେ ନାଚିଥିବା ନାଚକୁ ଭୁଲି ପାରୁ ନାହାଁନ୍ତି କେହି । ସମସ୍ତଙ୍କର ଗୋଟିଏ ପ୍ରଶ୍ନ ଆର୍ଶୀବାଦର ଦୋଷ କଣ ଥିଲା ।
ପୁଅ କଲେକ୍ଟର ହେବ ଗାଁ ଦାଣ୍ତକୁ ଆସି ନାଲିବତୀ ଗାଡିରେ ଓହ୍ଲାଇବ, ଏମିତି କିଛି ଆଶା ବାନ୍ଧି ବସିଥିଲେ ଆର୍ଶୀବାଦଙ୍କ ପରିବାର ଲୋକେ । କିଏ ଜାଣିଥିଲା ଏଭଳି ସ୍ଵପ୍ନକୁ ଭାଙ୍ଗି ଚୁରମାର କରି ଦେଵ ଦଇବ । କାଳବୈଶାଖୀ ନୁହେଁ ସତେ ଯେମିତି ଆର୍ଶୀବାଦର କାଳ ହୋଇ ଆସିଥିଲା କାଳବୈଶାଖୀ । ଏପ୍ରିଲ ୧୫ ତାରିଖ ସନ୍ଧ୍ୟାରେ ଆସିଥିବା କାଳବୈଶାଖୀ ଆର୍ଶୀବାଦ ଓ ତାଙ୍କ ପରିବାର ପାଇଁ ଆଣି ଦେଇଥିଲା କାଳଦିନ । ନିଖୋଜର ଛଅ ଦିନ ପରେ ଆର୍ଶୀବାଦର ଗଳିତ ଶବକୁ ଉଦ୍ଧାର କରିଥିଲା ପୋଲିସ । ଆର୍ଶୀବାଦର ହତ୍ୟାକାରୀକୁ ପୋଲିସ ଗିରଫ କରିଥିବା ବେଳେ, ହତ୍ଯାକାଣ୍ଡ ପଛରେ ବ୍ଯବସାୟିକ ଶତ୍ରୁତା ବୋଲି କହି ତଦନ୍ତ କରୁଛି । କିନ୍ତୁ ଅଭିଯୁକ୍ତ ବାପି ସାହୁ ଗତ ୪ ବର୍ଷରୁ ଉର୍ଦ୍ଧ୍ବ ହେବ ବ୍ୟବସାୟ କରୁ ନଥିଲା ବେଳ। ଅଭିଯୁକ୍ତ ସହିତ ବ୍ୟବସାୟିକ ଶତ୍ରୁତା ନଥିବା କହିଛନ୍ତି ଆର୍ଶୀବାଦର ଜେଜେ ମା । ଆଶୀର୍ବାଦର ହତ୍ଯାକାରୀକୁ କେବେ ଦଣ୍ଡ ଦିଆଯାଉଛି ତାହା ଉପରେ ସମସ୍ତଙ୍କ ନଜର ରହିଛି ।
ଠିକ ଅମଳ ସମୟରେ କାଳବୈଶାଖୀ ଉଜାଡିଦେଲା ଫସଲ
ବାଙ୍କୀ : କ୍ଷେତରେ ଲୋଟି ଯାଇଛି ଧାନ କେଣ୍ଡା । ବର୍ଷା ପାଣିରେ ଭିଜୁଛି କଞ୍ଚା ଧାନ । ପାଣିରୁ ଛାଣି ଧାନକୁ ଟେକି ଧରୁଛି ଚଷା ପୁଅ । ଅଦିନିଆ କାଳବୈଶାଖୀ ବର୍ଷା ଏମିତି ଦୁଃଖ ଦେଇଛି ଯାହାକୁ ଭାବି ଭାବି ଆଖିର ନିଦ ହଜାଇ ଦେଲେଣି ଚାଷୀ । ବାଙ୍କୀ ଡମପଡ଼ା ବ୍ଲକ୍ ଅନ୍ତର୍ଗତ ଭଗିପୁର, ବାଆଁରା ଗ୍ରାମ ପଞ୍ଚାୟତର ବିଭିନ୍ନ ଗାଁରେ ଅଦିନିଆ କାଳବୈଶାଖୀ ବର୍ଷା ଚାଷୀଙ୍କ ମେରୁଦଣ୍ଡ ଦୋହଲାଇ ଦେଇଛି । ଡମପଡା ବ୍ଲକରେ ରବି ଋତୁରେ ୩ ହଜାର ୧୦ ହେକ୍ଟର ଜମିରେ ଧାନ ଚାଷ ହୋଇଥିଲା । କିଏ ୧୦ ଦିନ ପରେ ତ କିଏ ୧୫ ଦିନ ପରେ ଧାନ ଅମଳ କରିଥାନ୍ତେ । ହେଲେ କାଳବୈଶାଖୀ ବର୍ଷା ସବୁ ନଷ୍ଟ କରିଦେଲା ।
ଧାନ ପାଣିରେ ବୁଡି ଗଜାକୁ ହେବାକୁ ବସିଥିବା ବେଳେ କିଛି ଚାଷୀ ତରତର ହୋଇ ଧାନ କାଟି ଅମଳ କରିବାରେ ଲାଗିପଡିଛନ୍ତି । ହେଲେ ଅନେକଙ୍କ ଧାନ ଏବେବି ପାଣିରେ ପଡି ରହିଛି । ହେଲେ ଏବେ ସୁଦ୍ଧା ଚାଷୀଙ୍କ ପାଖରେ ପ୍ରଶାସନ ପହଞ୍ଚି ନଥିବାରୁ ଚାଷୀ ମାନେ ଅସନ୍ତୋଷ ପ୍ରକାଶ କରିଛନ୍ତି । କୃଷି ବିଭାଗ କର୍ମଚାରୀ କ୍ଷେତ ପରିଦର୍ଶନ କରି କ୍ଷୟକ୍ଷତି ଆକଳନ କରିବାକୁ ଚାଷୀ ମାନେ ଦାବି କରିଛନ୍ତି । ଏନେଇ ଉପଜିଲ୍ଲାପାଳଙ୍କୁ ପଚାରିବାରୁ ସେ କହିଛନ୍ତି । ଧାନ କ୍ଷୟକ୍ଷତିର ଆକଳନ ନିମନ୍ତେ ତହସିଲ ଓ କୃଷି ବିଭାଗକୁ ନିର୍ଦ୍ଦେଶ ଦିଆଯାଇଛି ରିପୋର୍ଟ ଆସିଲା ପରେ କ୍ଷତିପୂରଣ ଦିଆଯିବ । ତେବେ ଉପଜିଲ୍ଲାପାଳଙ୍କ ନିର୍ଦ୍ଦେଶ କେବେ କାର୍ଯ୍ୟକାରୀ ହେଉଛି ଓ ଚାଷୀ ମାନେ କେବେ କ୍ଷତିପୂରଣ ପାଉଛନ୍ତି ତାହା ଦେଖିବାକୁ ବାକି ରହିଲା ।
ରାସ୍ତା କାମରେ ମହାଦୁର୍ନୀତି, କେଉଁଠି ବିନା କଲଭର୍ଟରେ ତ କେଉଁଠି ପୁରୁଣା କଲଭର୍ଟ ଉପରେ ପକାଯାଉଛି ପିଚୁ
ଡୁଙ୍ଗୁରିପାଲ୍ଲୀ : ରାସ୍ତା କାମରେ ମହାଦୁର୍ନୀତି । ବିନା କଲଭର୍ଟରେ ତିଆରି ଚାଲିଛି ରାସ୍ତା । ଆଉ କେଉଁଠି ପୁରୁଣା କଲଭର୍ଟ ଉପରେ ପିଚୁ କାମ ସାରିଦେଉଛି ଠିକାଦାର । ବଲାଙ୍ଗୀର ଜିଲ୍ଲା ଆଗଲପୁର ବ୍ଲକ ସାଲେଭଟାରୁ କୁଟାସିଂହା ପର୍ଯ୍ୟନ୍ତ ପିଡବ୍ଲ୍ୟୁଡି ରାସ୍ତା କାମରେ ଅନିୟମିତତା ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ୩୦ କୋଟି ଟଙ୍କା ବ୍ଯୟ ବରାଦରେ ଚାଲିଥିବା ରାସ୍ତା କାମ ନିମ୍ନମାନର ହେଉଥିବା ବେଳେ ରାସ୍ତାର ଉଭୟ ପାର୍ଶ୍ଵରେ ଗର୍ତ୍ତ ଖୋଳି ମେଟାଲିକ୍ସ କରି ମୋରମ୍ ପକେଇବା କଥା ତାହା ମଧ୍ୟ କରାଯାଉନି । ଯେଉଁଥିପାଇଁ ମୁରସୁଣ୍ଡି, ହରଭଙ୍ଗା ଅଞ୍ଚଳର ଲୋକେ ରାସ୍ତା କାମକୁ ବନ୍ଦ କରିଦେଇଛନ୍ତି ।
ବିଭାଗୀୟ ଯନ୍ତ୍ରୀ ଓ ଠିକାଦାରର ମଧୁଚନ୍ଦ୍ରିକାରେ ନିମ୍ନମାନର କାମ ହେଉଥିବା ନେଇ ଅଭିଯୋଗ କରିଛନ୍ତି ଗ୍ରାମବାସୀ । ଅନ୍ଯପଟେ କଲଭର୍ଟ କାମ ନହୋଇ ରାସ୍ତା କାମ ହୋଇଥିବାକୁ ସ୍ଵୀକାର କରିଛନ୍ତି ବିଭାଗୀୟ ଯନ୍ତ୍ରୀ । ଯେଉଁ ପର୍ଯ୍ୟନ୍ତ ପାଣି ପାଇପ୍ କାର୍ଯ୍ୟ ନ ହୋଇଛି ସେ ପର୍ଯ୍ୟନ୍ତ କାମ ସ୍ଥଗିତ ରହିବ ବୋଲି ବିଭାଗୀୟ ଅଧିକାରୀ ସୂଚନା ଦେଇଛନ୍ତି l
ସୂର୍ଯ୍ୟ ମନ୍ଦିର ଗର୍ଭଗୃହରୁ କେବେ କଢାଯିବ ବାଲି ?
କୋଣାର୍କ : ସୂର୍ଯ୍ୟମନ୍ଦିର ଗର୍ଭଗୃହରୁ ବାଲି କଢ଼ା ଯିବା ଲାଗି ୩ବର୍ଷ ସମୟ ଧାର୍ଯ୍ୟ ହୋଇଥିଲା । ଆଜିକୁ ଅଢ଼େଇ ବର୍ଷ ବିତିଗଲାଣି । ସମୟ ସୀମା ସରି ଆସୁଥିବା ବେଳେ ଏବେ ସୂର୍ଯ୍ୟମନ୍ଦିରରୁ ବାଲି କଢା ପ୍ରକ୍ରିୟା ସଂପୂର୍ଣ୍ଣ ବନ୍ଦ ରହିଛି । ଯାହାକୁ ନେଇ ସୃଷ୍ଟି ହୋଇଛି ଦ୍ଵନ୍ଦ୍ଵ । କେବେ ଗର୍ଭଗୃହରୁ ବାଲି ବାହାରିବ ଓ କେବେ ଖୋଲାଯିବ ଜଗମୋହନ ଦ୍ଵାର ତାକୁ ନେଇ ଦେଖାଦେଇଛି ଆଶଙ୍କା । କୋଣାର୍କ ସୁରକ୍ଷା ସମିତି ପକ୍ଷରୁ ତୁରନ୍ତ ବାଲି କାଢିବା ପାଇଁ ଦାବି କରାଯାଉଥିବା ବେଳେ ନିରାଶ ହୋଇପଡିଛନ୍ତି ସ୍ଥାନୀୟ ବୁଦ୍ଧିଜୀବୀ ଓ ପର୍ଯ୍ୟଟକ ।
୮ ସେପ୍ଟେମ୍ବର ୨୦୨୨ ରେ ଏଏସ୍ଆଇ ଓ ବିଡିଆର୍ ନିର୍ମାଣ ବିଭାଗ ସୂର୍ଯ୍ୟମନ୍ଦିର ଗର୍ଭଗୃହ ଦ୍ୱାର ନିକଟରେ ପୂଜାର୍ଚ୍ଚନା ସହିତ ହୋମଯଜ୍ଞ କରି ବାଲି କାଢ଼ିବା ଲାଗି ଶୁଭ ଦେଇଥିଲେ । ପ୍ରାଥମିକ ପର୍ଯ୍ୟାୟରେ ଉତ୍ତର ଓ ପଶ୍ଚିମ କୋଣରେ ଲିଫ୍ଟ ପାଇଁ ମୂଳଦୁଆ ନିର୍ମାଣ ପରେ ଲୁହା ବିମ୍ ଲଗା ଯାଇଥିଲା । ପରେ ଟନେଲ୍ ଓ ଲିଫ୍ଟ ନିର୍ମାଣ ନିମନ୍ତେ ଫର୍ମାଟ ଓ ଲେଆଉଟ୍ କାର୍ଯ୍ୟ ଆରମ୍ଭ ହୋଇଥିଲା । ସେହିଭଳି ଦକ୍ଷିଣ ପାର୍ଶ୍ଵରେ ଲୁହା ବିମ୍ ସାହାଯ୍ୟରେ ମନ୍ଦିର ଚୂଡ଼ାକୁ ପାହାଚ ନିର୍ମାଣ, ଉତ୍ତର ପଶ୍ଚିମ କୋଣରେ ମନ୍ଦିର ପାଦଦେଶରୁ ଚୂଡ଼ା ପର୍ଯ୍ୟନ୍ତ ଏକ ଲିଫ୍ଟ ଲଗାଯାଇଛି । ଏହି ସ୍ୱତନ୍ତ୍ର ଲିଫ୍ଟ ମାଧ୍ୟମରେ ମନ୍ଦିର ଚୂଡ଼ାରୁ ଗର୍ଭଗୃହରେ ରହିଥିବା ବାଲି ଗୁଡ଼ିକୁ ମନ୍ଦିର ପାଦଦେଶକୁ ସୁରକ୍ଷିତ ଉପାୟରେ ପର୍ଯ୍ୟାୟକ୍ରମେ ବାହାର କରାଯିବ । ବାଲି ନିଷ୍କାସନ ସରିଲେ ପର୍ଯ୍ୟଟକଙ୍କ ପାଇଁ ଜଗମୋହନ ଦ୍ୱାର ଖୋଲି ଦିଆଯିବ ବୋଲି ଏଏସ୍ଆଇ ସୂଚନା ଦେଇଥିଲା । ହେଲେ ଏବେ କାମ ବନ୍ଦ ରହିଛି । ଏନେଇ ପୁରୀ ସର୍କଲ ଏ ଏସ ଆଇ ସୁପରଟେଣ୍ଡେଣ୍ଟ କହିଛନ୍ତି ସମସ୍ତ ପ୍ରସ୍ତୁତି ଶେଷ ହୋଇଛି । ବାଲି କଢ଼ାଯିବା ପାଇଁ ଦିଲ୍ଲୀ ଏ ଏସ ଆଇ ଅଫିସରୁ ନିର୍ଦ୍ଦେଶ ଆସିଲେ ବାଲି କଢ଼ାଯିବ ।