ଭୁବନେଶ୍ବର: ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗଙ୍କ ପାଇଁ ବଢିଲା ଅଡୁଆ । ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି କଂଗ୍ରେସ । ତାଙ୍କୁ ତୁରନ୍ତ ବିଧାୟକ ତଥା ମନ୍ତ୍ରିମଣ୍ଡଳରୁ ବହିଷ୍କାର କରିବାକୁ ଦାବି କରିଛି ଦଳ । ଜାଲ ଜାତିଗତ ପ୍ରମାଣ ପତ୍ର ଓ ମିଥ୍ୟା ସତ୍ୟପାଠ ପାଇଁ ତାଙ୍କୁ ଏହି ଦୁଇ ପଦବୀରୁ ତୁରନ୍ତ ବହିଷ୍କାର କରିବାକୁ ଦାବି କରିଛନ୍ତି ଏଆଇସିସି ସଦସ୍ୟ ଅଭିଷେକ ମହାନନ୍ଦ । ୨୦୦୨ ପରେ ତାଙ୍କ ଜାତି ଅନୁସୂଚିତ ଜାତି ତାଲିକାଭୁକ୍ତ ହୋଇଛି । କିନ୍ତୁ ତା ପୂର୍ବରୁ ତାଙ୍କୁ ସାର୍ଟିଫିକେଟ କେମିତି ମିଳିଲା ? ମୁକେଶ ମହାଲିଙ୍ଗଙ୍କ ମାମଲାରେ ଚୁପ କାହିଁକି ପ୍ରଶାସନ ? ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ ଗୃହ ଭିତରେ ଶପଥ ପାଠ କରିଥିଲେ । ଏବେ କିଭଳି ସେ ମନ୍ତ୍ରୀ ଅଛନ୍ତି ? ମହିଳାଙ୍କ ପାଇଁ ଲଢ଼ିବାରୁ ୧୪ କଂଗ୍ରେସ ବିଧାୟକଙ୍କୁ ସସପେଣ୍ଡ କରାଗଲା ।

କିନ୍ତୁ ଅସଭ୍ୟ ଭାଷାରେ ମୁକେଶ ଗାଳି କଲେ। ବାଚସ୍ପତି କାହିଁକି ଆକ୍ସନ ନେଲେନି ବୋଲି ପ୍ରଶ୍ନ କରିଛି କଂଗ୍ରେସ। ଫେକ ସାର୍ଟିଫିକେଟ ମାଧ୍ୟମରେ ଚାକିରି କରି ମୁକେଶ ବିଧାୟକ ହୋଇଛନ୍ତି ଓ ଏବେ ମନ୍ତ୍ରୀ ପଦ ବି ସମ୍ଭାଳିଛନ୍ତି । ନହେଲେ ଏହା ବିରୋଧରେ ଆଇନଗତ ପଦକ୍ଷେପ ନିଆଯିବ ବୋଲି କଂଗ୍ରେସ ଚେତାବନୀ ଦେଇଛି । ସ୍କୁଲିଂ, ଚାକିରି ଆଦି ସବୁ ଏସସି ହିସାବରେ କରିଛନ୍ତି ମହାଲିଙ୍ଗ। ତଦନ୍ତ ରିପୋର୍ଟ ଆସିଛି ଏବେ ପେଣ୍ଡିଙ୍ଗ ଅଛି । ଏହି ସମାନ ପ୍ରସଙ୍ଗରେ ଡିଏସପିଙ୍କ ଚାକିରି ଯାଇଛି କିନ୍ତୁ ମୁକେଶଙ୍କ ପ୍ରସଙ୍ଗରେ ଆରଡିସି ଏହାକୁ ପେଣ୍ଡିଙ୍ଗ କାହିଁକି ରଖିଛନ୍ତି ? ଏହି ଆଧାରରେ କାର୍ଯ୍ୟାନୁଷ୍ଠାନ ନିଆଯାଉ ବୋଲି କଂଗ୍ରେସ ଆରଡିସିଙ୍କୁ ଅନୁରୋଧ କରିଛି । .. ..

ଭୁବନେଶ୍ବର: ଆନ୍ଧ୍ର ହାତକୁ କୋଟିଆକୁ ଟେକି ଦେବେ ନାହିଁ ତ ରାଜ୍ୟର ଡବଲ ଇଞ୍ଜିନ ସରକାର ? ଏପରି ଆଶଂକା ପ୍ରକାଶ କରିଛନ୍ତି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ । କେନ୍ଦ୍ରରେ ସରକାର ବଞ୍ଚାଇବା ପାଇଁ ରାଜ୍ୟ ସରକାର କୋଟିଆର ୨୧ ଅଞ୍ଚଳକୁ ଆନ୍ଧ୍ର ହାତକୁ ଯୌତୁକ ଭାବେ ଟେକିଦେବେ ବୋଲି ଆଶଂକା ପ୍ରକାଶ କରିଛନ୍ତି କାଡ଼ାମ । କୋଟିଆରେ ଆନ୍ଧ୍ର ପ୍ରତିଦିନ ଅନୁପ୍ରବେଶ କରୁଛି କିନ୍ତୁ ଓଡ଼ିଶା ସରକାର ନିରବ ।

ଏହି ନିରବତା କୋଟିଆ ପାଇଁ ବଡ଼ ବିପଦ ସୃଷ୍ଟି କରିଛି । ଏବେ ଆନ୍ଧ୍ର ସରକାର କୋଟିଆରେ ପାଣି ଟାଙ୍କି କରି ଲୋକଙ୍କୁ ପାଣି ଦେଲେଣି। ରାଜ୍ୟର ସୀମା ସୁରକ୍ଷିତ ନାହିଁ। ଓଡ଼ିଶାବାସୀ ବିଜେପିକୁ ୨୦ ସାଂସଦ ଦେଇଛନ୍ତି। ବିଜେପି ଇସ୍ତାହାରରେ କହିଥିଲା ଡବଲ ଇଞ୍ଜିନ ସରକାର ହେଲେ ଓଡ଼ିଶାର ସ୍ୱତନ୍ତ୍ର ବିକାଶ କରିବ । କିନ୍ତୁ ଓଡ଼ିଶାର ଯିଏ କ୍ଷତି କରୁଛନ୍ତି ତାଙ୍କୁ ରାଜ୍ୟ ସରକାର ପୁରସ୍କାର ଦେଉଛନ୍ତି । କିନ୍ତୁ ଜୀବନ ଥିବା ଯାଏ ଏହା କରାଇ ଦିଆଯିବ ନାହିଁ ବୋଲି ଚେତାଇ ଦେଇଛନ୍ତି ସ୍ଥାନୀୟ ବିଧାୟକ ରାମଚନ୍ଦ୍ର କାଡାମ ।

କୋଟିଆର ସବୁ ଗାଁରେ ଉତ୍କଳ ଦିବସ ପାଳନ କରିବେ ସ୍ଥାନୀୟ ବିଧାୟକ ତଥା କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ। କୋଟିଆ ଅଞ୍ଚଳର ୨୦ ହଜାରରୁ ଅଧିକ ଲୋକଙ୍କୁ ଏଥିରେ ସାମିଲ କରାଯିବ। ରାଜ୍ୟର ସୀମା ଓ ମାଆ ମାନେ ଅସୁରକ୍ଷିତ । ତେଣୁ ଓଡ଼ିଆ ପକ୍ଷ ପାଳନ କଣ ପାଇଁ ବୋଲି ପ୍ରଶ୍ନ ଉଠାଇଛନ୍ତି କାଡାମ।

କଟକ: କ୍ରାଇମବ୍ରାଞ୍ଚ ହ୍ୟାଣ୍ଡକପରେ ଅନ୍ତରାଜ୍ୟ ସାଇବର ଠକ । ୧ .୪ କୋଟି ଟଙ୍କାର ସାଇବର ଠକେଇ କରି ଗିରଫ ହେଲେ ୭ ଜଣ ଅଭିଯୁକ୍ତ । ଗିରଫ ଅଭିଯୁକ୍ତମାନେ ହେଲେ ଜ୍ୟୋତି ରାଜୁ , ରାଜୁ ସି , ଇଶ୍ମାଇଲ ରାହାଇଦ, ବାସୀମ ପଟ୍ଟାରାଜା ଏସ , ଜେଗାଥିସ ରାଧାକୃଷ୍ଣନ ଓ ଇ ସକ୍ତିକୁମାରାଭେଲ । ତଦନ୍ତ ସମୟରେ ଅନେକ ସିମ କାର୍ଡ, ଆଧାରକାର୍ଡ ,ହ୍ବାଟସାର୍ପ ସ୍କ୍ରିନସର୍ଟ, ଡେବିଟ କାର୍ଡ ଓ ପାସବୁକ ଇତ୍ୟାଦି ଜବତ କରିଛି କ୍ରାଇମବ୍ରାଞ୍ଚ ଟିମ । ଏହାସହ ବିଭିନ୍ନ ଆକାଉଣ୍ଟ ଫ୍ରିଜ କରିବା ପରେ ୧୯ଲକ୍ଷ ଟଙ୍କା ଜବତ କରିଛି ଟିମ ।

ଟ୍ରେଡିଂ ଆପରେ କୋଟି କୋଟି ଟଙ୍କା ଠକେଇ ଘଟଣାରେ ଅନ୍ତର୍ଭୁକ୍ତ ସମସ୍ତ ଅଭିଯୁକ୍ତଙ୍କୁ କର୍ଣ୍ଣାଟକ ଓ ତାମିଲନାଡୁରୁ ଗିରଫ କଲା କ୍ରାଇମବ୍ରାଞ୍ଚ । ଗତ ଜାନୁଆରୀ ମାସ ୨୩ ତାରିଖରେ ଭୁବନେଶ୍ୱର ସାଇବର ପୋଲିସ ଷ୍ଟେସନରେ ଏକ ମମାଲା ରୁଜୁ ହୋଇଥିଲା । ଟ୍ରେଡିଂ ଆପରେ ଟଙ୍କାର ପ୍ରଲୋଭନ ଦେଖାଇ ଅଭିଯୋଗକାରୀଙ୍କ ଠାରୁ କୋଟି କୋଟି ଟଙ୍କା ସାଇବର ଠକ ଲୁଟିଥିବା ନେଇ ଥାନାରେ ଏତେଲା ହୋଇଥିଲା । ଅଭିଯୋଗ ଆଧାରରେ କ୍ରାଇମବ୍ରାଞ୍ଚ ପକ୍ଷରରୁ ଏକ ଟିମ ଗଠନ କରାଯାଇ ତଦନ୍ତ କରାଯାଉଥିଲା । ଯଦି କୌଣସି ଏଭଳି ଘଟଣା ପରିପାର୍ଶ୍ୱକରେ ଘଟୁଛି ତେବେ ସଙ୍ଗେସଙ୍ଗେ ସାଇବର ହେଲ୍ପ ଲାଇନ ୧୯୩୦ ନମ୍ବରରେ ଯୋଗାଯୋଗ କରିବାକୁ କ୍ରାଇମବ୍ରାଞ୍ଚ ପକ୍ଷରୁ ସୂଚନା ଦିଆଯାଇଛି ।

ପୁରୀ: ଆଜି ଚୈତ୍ରମାସ କୃଷ୍ଣପକ୍ଷ ସପ୍ତମୀ ତିଥି । ଆଜିର ଏହି ପବିତ୍ର ତିଥିରେ ଶ୍ରୀମନ୍ଦିରରେ ଶ୍ରୀଜିଉ ମାନଙ୍କର ଅନୁଷ୍ଠିତ ହୋଇଥାଏ ଖସାପଡା ନୀତି । ତେଣୁ ଆଜି ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ହେବାପରେ ସର୍ବସାଧାରଣ ଦର୍ଶନ ବନ୍ଦ ରହିବ । ଶ୍ରୀଜଗନ୍ନାଥ ମନ୍ଦିର ପ୍ରଶାସନ ପକ୍ଷରୁ ଏନେଇ ସୂଚନା ଦିଆଯାଇଛି । ଏହା ଏକ ଗୁପ୍ତ ସେବା ହେଇଥିବାରୁ ନୀତି ସମୟରେ ଦର୍ଶନରୁ ବଞ୍ଚିତ ରହିବେ ଶ୍ରଦ୍ଧାଳୁ । ମହାପ୍ରଭୁଙ୍କ ଶ୍ରୀଅଙ୍ଗ ଶ୍ରୀପୟର ସୁରକ୍ଷା ପାଇଁ ଏହି ନୀତି ଅନୁଷ୍ଠିତ ହୋଇଥାଏ । ମହାପ୍ରଭୁଙ୍କ ଶ୍ରୀପୟରକୁ ଧଳା କପଡାରେ ଘୋଡାଇ ଦିଆଯାଏ । ଏହି ନୀତି ପାଇଁ ପୂର୍ବ ଦିନରୁ ଦେଉଳକରଣ ଧଳାକନା ଧୋଇ ଶୁଖାଇ ଗାରଦରେ ଜମା ଦେଇଥାନ୍ତି । ସେହିପରି ଶୁଦ୍ଧସୁଆର ଖଳି, କଇଁଥ ଅଠା ଯୋଗାଇଥାନ୍ତି। ମଧ୍ୟାହ୍ନ ଧୂପ ପରେ ଜୟ ବିଜୟ ଦ୍ୱାର ବନ୍ଦ କରାଯାଏ । ବେହେରଣ ଦ୍ୱାର ଦେଇ ଦଇତାପତିମାନେ ଗର୍ଭଗୃହକୁ ଯାଇ ରତ୍ନସିଂହାସନ ଉପରେ ମହାପ୍ରଭୁଙ୍କର ଏହି ଗୁପ୍ତ ନୀତି ସମ୍ପନ୍ନ କରିଥାନ୍ତି । ତେବେ ଏହି ନୀତି ଦଇତାପତି ସେବାୟତମାନଙ୍କର ଗୋଷ୍ଠୀଗତ ଏବଂ ଗୁପ୍ତ ସେବା ଅଟେ । ବର୍ଷକୁ ୨ ରୁ ୩ ଥର ଏହି ଗୁପ୍ତ ସେବା ଅନୁଷ୍ଠିତ ହୋଇଥାଏ । ଗୁଣ୍ଡିଚା ଯାତ୍ରା ସରିବା ପରେ ଚତୁର୍ଦ୍ଧାମୂର୍ତ୍ତିଙ୍କର ଶ୍ରୀଅଙ୍ଗ ଶ୍ରୀପୟର ସୁରକ୍ଷା ପାଇଁ ଏହି ଖସାପଡା ନୀତି ଅନୁଷ୍ଠିତ ହୋଇଥାଏ । ସେହିପରି ଦିଅଁମାନେ ଦୋଳ ପୂର୍ଣ୍ଣିମାରେ ହୋଲି ଖେଳିବା ଯୋଗୁଁ ତାଙ୍କ ଶ୍ରୀଅଙ୍ଗର କେତେକ ଅଂଶ କ୍ଷତବିକ୍ଷତ ହୋଇଯାଇ ଥାଏ । ତେଣୁ ଏଥିପାଇଁ ମଧ୍ୟ ଖସାପଡା ନୀତି ହୋଲି ପରେ ଅନୁଷ୍ଠିତ ହୋଇଥାଏ । ଏହି ନୀତି ସମ୍ପୂର୍ଣ୍ଣ ହେବା ପାଇଁ ୪ ରୁ ୫ ଘଣ୍ଟା ସମୟ ଲାଗିଥାଏ । ଖସାପଡା ନୀତି ସମ୍ପୂର୍ଣ୍ଣ ହେବା ପରେ ମହାପ୍ରଭୁଙ୍କ ମହାସ୍ନାନ ନୀତି ଅନୁଷ୍ଠିତ ହୋଇଥାଏ। ଖସାପଡା ନୀତି ସରିବା ପରେ ପୁନର୍ବାର ସର୍ବସାଧାରଣ ଦର୍ଶନ ଚାଲୁ ରହିବ ।

ଭଦ୍ରକ : ସୃଷ୍ଟି ନିର୍ମାଣର ପ୍ରଥମ ଦିବସ ଓ ଆର୍ଯ୍ୟ ସମାଜର ପ୍ରତିଷ୍ଠା ଦିବସ । ଚୈତ୍ର ଶୁକ୍ଳ ପ୍ରତିପଦାରେ ଆର୍ଯ୍ୟ ସମାଜ ଭଦ୍ରକ ପକ୍ଷରୁ ମହାସମାରୋହରେ ପାଳନ କରାଯାଇଛି । ବେଦ ପ୍ରବକ୍ତା ପଣ୍ଡିତ ବୀରେନ୍ଦ୍ର ପଣ୍ଡାଙ୍କ ପୌରହିତ୍ୟରେ ଅନୁଷ୍ଠାନରେ ପଣ୍ଡିତ ପଣ୍ଡା ସୃଷ୍ଟିର ଆଦ୍ୟ ଦିବସ ଓ ଆର୍ଯ୍ୟ ସମାଜର ମହତ୍ତ୍ଵ ବର୍ଣ୍ଣନା କରିଥିଲେ ଏହା ସହ ସମସ୍ତଙ୍କୁ ନବବର୍ଷର ଅଭିନନ୍ଦନ ଜଣାଇଥିଲେ । ସଭାପତି ସୁଶ୍ରୀ ବୀଣାପାଣି ପଣ୍ଡା ଓ ସହ ଆଚାର୍ଯ୍ୟ ଲକ୍ଷ୍ମୀଧର ପଣ୍ଡାଙ୍କ ଯଜମାନତ୍ବରେ ଯଜ୍ଞ କାର୍ଯ୍ୟ ସଂପର୍ଣ୍ଣ ପରେ ସମାଜର ସଦସ୍ୟା ସ୍ମିତାରାଣୀ ନାୟକ, ସୁସଂଧ୍ୟା ପଣ୍ଡା, ମଧୁମିତା ସାହୁ, ନର୍ମଦା ନାୟକ ଓ ସଂସ୍କୃତି ପଣ୍ଡା ବେଦମନ୍ତ୍ର ପାଠ ଓ ଭଜନ ପରିବେଷଣ କରିଥିଲେ । ଲକ୍ଷ୍ମୀଧର ପଣ୍ଡା ଆର୍ଯ୍ୟ ସମାଜର ସଂସ୍କାର ଦିଗ ଓ ବୈଚାରିକ ଦିଗ ସଂପର୍କରେ ବିସ୍ତୃତ ଆଲୋଚନା କରିଥିଲେ । ସଂପାଦକ ସୁଧୀର ମୁଦୁଲି ସୃଷ୍ଟି ଆରମ୍ଭ ଦିବସରେ ମହତ୍ତ୍ଵ ବ୍ୟାଖ୍ୟା କରିଥିଲେ । ରବି ନାରାୟଣ ଲେଙ୍କାଙ୍କ ପରିଚାଳନାରେ ଅନୁଷ୍ଠିତ କାର୍ଯ୍ୟକ୍ରମରେ ଭଦ୍ରକର ବହୁ ବିଶିଷ୍ଟ ବ୍ୟକ୍ତି ତଥା ବିଦ୍ବାନ ବିଦୂଷୀ ଓ ଆର୍ଯ୍ୟ ସମାଜର ସଦସ୍ୟ, ସଦସ୍ୟା ଉପସ୍ଥିତ ଥିଲେ । ଏହି ଅବସରରେ ସମସ୍ତେ ସମସ୍ତ ଆତ୍ମୀୟ ତଥା ପ୍ରିୟମାନଙ୍କୁ ନବବର୍ଷର ଅଭିନନ୍ଦନ ଜଣାଇଥିଲେ ।