ନନ୍ଦିଘୋଷ ବ୍ୟୁରୋ: ୨୦୨୪ ନିର୍ବାଚନର ୧୧ ମାସ ପରେ ବି ରାଜ୍ୟର ୩ ପ୍ରମୁ୍ଖ ରାଜନୈତିକ ଦଳ ସାଂଗଠନିକ ନିର୍ବାଚନ ପର୍ବ ଶେଷ କରିପାରୁନାହାନ୍ତି । ଶାସକ ବିଜେପି ବେକରେ ରାଜ୍ୟ ମୁଖିଆ ଚୟନ କଣ୍ଟା ଲାଗିଥିବା ବେଳେ ଜିଲ୍ଲା ସଭାପତି ବାଛି ପାରୁନାହିଁ କଂଗ୍ରେସ । ବିଜେଡି କିନ୍ତୁ ବିଜେପି ଓ କଂଗ୍ରେସଠାରୁ ସାଙ୍ଗଠନିକ ନିର୍ବାଚନରେ ଢେର ଆଗରେ ରହିଛି । ବିଜେପି, ବିଜେଡି ଓ କଂଗ୍ରେସ ସଙ୍ଗଠନର ନବକଳେବର କରି ପୁଣି ଥରେ ତୃଣମୂଳ ସ୍ତରରେ ଦଳକୁ ମଜଭୁତ କରିବାକୁ ଯୋଜନା କରିଛନ୍ତି ।

ଦଳୀୟ ସାଙ୍ଗଠନିକ ନିର୍ବାଚନ ପର୍ବରେ କିଏ ଆଗରେ ଓ କିଏ ପଛରେ ? ଡେଡଲାଇନ ପରେ ଡେଡଲାଇନ ସରୁଛି ହେଲେ ଶାସକ ବିଜେପିର ରାଜ୍ୟ ମୁଖିଆ କିଏ ହେବ ତାହା ସ୍ଥିର ହୋଇପାରୁନାହିଁ । ବିଜେପିର ପରବର୍ତ୍ତୀ ରାଜ୍ୟ ସଭାପତି କିଏ ହେବ ତାହାକୁ ନେଇ ଦଳରେ ସସପେନ୍ସ ଜାରି ରହିଛି । ରାଜ୍ୟ ନେତୃତ୍ବରୁ କେନ୍ଦ୍ରୀୟ ନେତୃତ୍ବ ଯାଏଁ ସଭାପତି ଚୟନ ନେଇ ଚାଲିଛି କସରତ । ଏହାକୁ ନେଇ ଓଡିଶାରେ ବ୍ୟାକଫୁଟରେ ବିଜେପି ସଙ୍ଗଠନ । ଏହାର ପ୍ରଭାବ ବି ତୃଣମୂଳସ୍ତରେ ପଡୁଛି । ନେତାଙ୍କ ମୁହଁରେ ଗୋଟିଏ କଥା, ଶୀଘ୍ର ସଭାପତି ଚୟନ ପ୍ରକ୍ରିୟା ଶେଷ ହେବ ।

ଅନ୍ୟପଟେ ୩୦ ଜଣିଆ ପିସିସି ଟିମ ଗଠନ କରିବା ପରେ ବି କଂଗ୍ରେସ ଜିଲ୍ଲା ସଭାପତି ଚୟନ କରିପାରୁନାହିଁ । ପିସିସି ଟିମକୁ ନେଇ ଦଳରେ ବରିଷ୍ଠ ନେତାମାନେ ଅସନ୍ତୋଷ ପ୍ରକାଶ କରିବା ପରେ ଜିଲ୍ଲା ସଭାପତି ଚୟନ ପିସିସି ସଭାପତିଙ୍କ ପାଇଁ ଚ୍ୟାଲେଞ୍ଜ ଭରା ହୋଇଛି । ଦଳର ବରିଷ୍ଠ ନେତା ସୁରେଶ ରାଉତରାୟ କହିଛନ୍ତି, ପିସିସି ସଭାପତି ଜିଲ୍ଲା ବୁଲି ସଭାପତି ଚୟନ କରୁଛନ୍ତି । ଖୁବଶୀଘ୍ର ନାଁ ଘୋଷଣା କରାଯିବ ।

ଅନ୍ୟପଟେ ସାଙ୍ଗଠନିକ ନିର୍ବାଚନ ପ୍ରକିୟାରେ ବେଶ ଆଗରେ ରହିଛି ମୁଖ୍ୟ ବିରୋଧୀ ବିଜେଡି । ସଭାପତି, ରାଜ୍ୟ କାର୍ଯ୍ୟକାରିଣୀ, ରାଜ୍ୟ ପରିଷଦ, ରାଜନୈତିକ ବ୍ୟାପାର କମିଟି, ଶୃଙ୍ଖଳା କମିଟି ଗଠନ, ୧୦ଟି ଛାମୁଆ ସଙ୍ଗଠନକୁ ନୂଆ ରୂପ ଦେଇଛି ଦଳ । ୩୩ଟି ସାଙ୍ଗଠନିକ ଜିଲ୍ଲା ସଭାପତିରୁ ମାତ୍ର ୯ଟି ଜିଲ୍ଲାର ସଭାପତି ଚୟନ କରିପାରିନାହିଁ ଦଳ । ଏନେଇ ରାଜ୍ୟ ନିର୍ବାଚନ ଅଧିକାରୀଙ୍କ ବାସଭବନରେ ଘନଘନ ବୈଠକ କରାଯାଇ ଜିଲ୍ଲା ସଭାପତି ଚୟନ ଚୂଡାନ୍ତ କରାଯାଇଛି ବୋଲି ବିଜେଡି ନେତା ପ୍ରଶାନ୍ତ ମୁଦୁଲି କହିଛନ୍ତି ।

ବିଜେପି ଲାଗି ରାଜ୍ୟ ସଭାପତି ଚୟନ ଟେନସନ ବନିଥିବାବେଳେ କଂଗ୍ରେସ ଜିଲ୍ଲା ସଭାପତିରେ ଝୁଣ୍ଟୁଛି । ବିଜେଡି ୯ ଜିଲ୍ଲା ସଭାପତିଙ୍କ ନାଁ ଝୁଲାଇ ରଖିଛି । ଆଗକୁ ପଞ୍ଚାୟତ ନିର୍ବାଚନ । ଯଦି ସଙ୍ଗଠନ ଅଧା ଗଢା ରହିଲା, ତେବେ ରଣନୀତି କିପରି ଶକ୍ତିଶାଳୀ ହେବ ତାହା ନେତାଙ୍କ ମନରେ ବଡ଼ ପ୍ରଶ୍ନବାଚୀ ସୃଷ୍ଟି କରିଛି ।

ନନ୍ଦିଘୋଷ ବ୍ୟୁରୋ: ବର୍ଷ ପୂର୍ତ୍ତିକୁ ନେଇ ବଡ଼ ଆୟୋଜନ କରୁଛି ବିଜେପି ସରକାର । ନିଜର ସଫଳତା ବଖାଣିବାକୁ ଆରମ୍ଭ କରିଛି ସଜବାଜ । କେନ୍ଦ୍ରୀୟ ନେତୃତ୍ବଙ୍କୁ ଓଡ଼ିଶା ଆଣି ବର୍ଷର ସଫଳତା ଲୋକଙ୍କୁ ଜଣାଇବାକୁ ଦଳ ଅଣ୍ଟା ଭିଡିଛି । ବିଜେପିର ବର୍ଷ ପୂର୍ତ୍ତିକୁ ନେଇ ବିଜେଡି ଲୋକଙ୍କ ସ୍ବର ସାଜି କେତେକ ମୌଳିକ ପ୍ରଶ୍ନ ପଚାରି ସରକାରଙ୍କୁ ଘେରିଛି । ଅନ୍ୟପଟେ କଂଗ୍ରେସ କହିଛି, ବର୍ଷେ ଭିତରେ ଓଡ଼ିଶାରେ କିଛି ହୋଇନି ବୋଲି ଅନୁଭବ କଲେଣି ରାଜ୍ୟବାସୀ । ଯାହାକୁ ନେଇ ଆରମ୍ଭ ହୋଇଛି ରାଜନୈତିକ ବୟାନବାଜି ।

ନିର୍ବାଚନୀ ପ୍ରତିଶ୍ରୁତି ଗୋଟେ ଦିଗରେ, ବିଜେପି ସରକାର ଅନ୍ୟ ଦିଗରେ । ବର୍ଷେ ଭିତରେ ଶାସକ ଦଳର ମନ୍ତ୍ରୀ, ବିଧାୟକ, ସାଂସଦ ସଭା, ସମିତି, ସାଂସ୍କୃତିକ କାର୍ଯ୍ୟକ୍ରମ ଓ ବୁଲାବୁଲିରେ ସମୟ ବିତାଇଲେ । ୨୦୨୪ରେ ଓଡ଼ିଶାବାସୀଙ୍କୁ ଦେଇଥିଲେ ମାଳମାଳ ପ୍ରତିଶ୍ରୁତି । କିନ୍ତୁ ପୂରଣ କରିବାକୁ ଭୂଲିଗଲେ । ଯାହା କିଛି ପ୍ରତିଶ୍ରୁତି ପାଳନ କଲେ ତାହା ପ୍ରତାରଣା ସଦୃଶ । ସୁଭଦ୍ରା ଯୋଜନାରେ ୨ ବର୍ଷରେ ୫୦ ହଜାର ଟଙ୍କା କଥା କହି ପାଞ୍ଚ ବର୍ଷରେ ଦେବାକୁ ଯୋଜନା କାର୍ଯ୍ୟକାରୀ କଲେ । ଯେଉଁଥିରେ ଦିନକୁ ମହିଳାଙ୍କୁ ମିଳିବ ମାତ୍ର ୨୭ ଟଙ୍କା । ଠିକ ସେହିପରି ସମସ୍ତଙ୍କୁ ଭତ୍ତା ୩୦୦୦ ଟଙ୍କା କହି କାର୍ଯ୍ୟକାରୀ କରିବା ବେଳେ କେବଳ ୮୦ ବର୍ଷରୁ ଅଧିକଙ୍କୁ ଏହି ସୁବିଧା ମିଳିଲା । କେନ୍ଦ୍ରାପଡ଼ାରେ ବୃଦ୍ଧ ବ୍ୟକ୍ତି ଭତ୍ତା ଆଣିବାକୁ ରାସ୍ତାରେ ଘୁଷୁଡି ଘୁଷୁଡ଼ି ଗଲେ । ଧାନର କଟନି ଛଟନି ହେବ ନାହିଁ କହି ୫ରୁ ୧୫ କିଲୋ ଯାଏଁ କଟନି ଛଟନି କଲେ । ଠପ୍ ହୋଇଗଲାଣି ବ୍ଲକରୁ ଆରମ୍ଭ କରି ରାଜ୍ୟର ବଡ ବଡ ବିକାଶମୂଳକ ପ୍ରକଳ୍ପର କାମ । ବର୍ଷ ପୂର୍ତ୍ତିରେ ବିଜେପି ସରକାରର ଏପରି ମାଳମାଳ ପ୍ରତିଶ୍ରୁତି କିପରି ପ୍ରତାରଣାରେ ପରିଣତ ହୋଇଛି ସେ କଥା ବଖାଣିଛନ୍ତି ବିଜେଡି ନେତା ପ୍ରଶାନ୍ତ ମୁଦୁଲି ।

ବିଜେପି ସରକାର ନିଜର ବର୍ଷ ପୂର୍ତ୍ତି ପାଳନକୁ ନେଇ ଚଳଚଞ୍ଚଳ ହୋଇଛି । କେନ୍ଦ୍ରୀୟ ନେତୃତ୍ବଙ୍କୁ ଓଡ଼ିଶା ଆଣି ବଡ ସଭା ସମିତି ଜରିଆରେ ସଫଳତାର ତାଲିକା ଦେବାକୁ ଅଣ୍ଟା ଭିଡିଛି । ଲୋକଙ୍କ ସ୍ବର ସାଜି ବିଜେପି ସରକାରର ବିଭିନ୍ନ ଦୋଷ ଦୁର୍ବଳତାକୁ ସାମ୍ନାକୁ ଆଣିବ ବୋଲି କହିଛନ୍ତି ବରିଷ୍ଠ ବିଧାୟକ ଅରୁଣ ସାହୁ । ବିଜେପି ଯଦି ନିଜର ସଫଳତା ବଖାଣେ, ତେବେ ଲୋକେ ତାଙ୍କ ବିଫଳତାକୁ ପଦାରେ ପକାଇବେ ବୋଲି ଯୁକ୍ତି ବାଢିଛନ୍ତି ଅରୁଣ । ବର୍ଷେ ହେବ ପ୍ରଶାସନ ଲୋକଙ୍କ ପାଖରେ ପହଞ୍ଚି ପାରୁନି । ତେଣୁ ତୁରନ୍ତ ସରକାର ଲୋକଙ୍କ ସମସ୍ୟା ଦୂର କରନ୍ତୁ ବୋଲି ଦାବି କରିଛି ବିଜେଡି । ବରିଷ୍ଠ କଂଗ୍ରେସ ନେତା ସୁରେଶ ରାଉତରାୟଙ୍କ କହିବା କଥା, ବର୍ଷେ ହେବ ଓଡ଼ିଶାରେ କିଛି ହେଉନାହିଁ । ଅନ୍ୟପଟେ ଆଇନ, ପୂର୍ତ୍ତ ଓ ଅବକାରୀ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି, ବର୍ଷ ପୂର୍ତ୍ତି ପାଇଁ ପ୍ରଧାନମନ୍ତ୍ରୀଙ୍କୁ ନିମନ୍ତ୍ରଣ କରାଯାଇଛି । ୨୦୩୬ରେ ବିକଶିତ ଭାରତ ଓ ବିକଶିତ ଓଡ଼ିଶା ଗଠନ ଉପରେ ଗୁରୁତ୍ବ ଦିଆଯାଇଛି ବୋଲି କହିଛନ୍ତି ପୃଥ୍ବୀରାଜ ହରିଚନ୍ଦନ ।

ରାଜ୍ୟ ସରକାର ବର୍ଷ ପୂର୍ତ୍ତୀ ପାଇଁ ସଫଳତାର ତାଲିକା ପ୍ରସ୍ତୁତ କରିଥିବା ବେଳେ ବିଜେଡି ତିଆରି କରିଛି ପ୍ରତାରଣାର ଲମ୍ବା ତାଲିକା ।