ବ୍ୟାଙ୍କ ସୁରକ୍ଷା କର୍ମୀଙ୍କ ବନ୍ଧୁକରୁ ଗୁଳି ଫୁଟି ଗ୍ରାହକ ଗୁରୁତର
ପୁରୀ : ବ୍ୟାଙ୍କରେ ଗୁଳିମାଡ଼ । ବ୍ୟାଙ୍କ ଅଫ୍ ଇଣ୍ଡିଆର ପୁରୀ ଶାଖାରେ ଫୁଟିଛି ଗୁଳି । ବ୍ୟାଙ୍କରେ ଗ୍ରାହକଙ୍କ ଗହଳି ଲାଗିଥିବା ବେଳେ ଗୁଳି ଫୁଟିଛି । ବ୍ୟାଙ୍କରେ ନିୟୋଜିତ ସୁରକ୍ଷା କର୍ମୀ ଅଜୟ ମହାରଣାଙ୍କ ବନ୍ଧୁକରୁ ଗୁଳି ଫୁଟି ଜଣେ ଗ୍ରାହକ ଗୁରୁତର ଆହତ ହୋଇଛନ୍ତି ।
ଆହତ ଗ୍ରାହକ ମନାନ ଖାଁଙ୍କୁ ପ୍ରଥମେ ପୁରୀ ସଦର ଚିକିତ୍ସାଳୟରେ ଭର୍ତ୍ତି କରାଯାଇଥିଲା । ପରେ ଭୁବନେଶ୍ୱରର ଏକ ଘରୋଇ ହସ୍ପିଟାଲକୁ ସ୍ଥାନାନ୍ତର କରାଯାଇଛି । ମନାନଙ୍କ ବାମ ଗୋଡ଼ରେ ଗୁଳି ବାଜିଛି ।
ବ୍ୟାଙ୍କରେ କୁମ୍ଭାରପଡ଼ା ଥାନା ପୋଲିସ, ସିଟି ଡିଏସପି, ସାଇଣ୍ଟିଫିକ୍ ଟିମ୍ ସହ ତଦନ୍ତ କରୁଛନ୍ତି । ସୁରକ୍ଷା କର୍ମୀ ଅଜୟଙ୍କୁ ଅଟକ ରଖି ପୋଲିସ ପଚରାଉଚରା କରୁଥିବା ବେଳେ ବନ୍ଧୁକ ଜବତ କରାଯାଇଛି । କେଉଁ ପରିସ୍ଥିତିରେ ସୁରକ୍ଷା କର୍ମୀଙ୍କ ବନ୍ଧୁକରୁ ଗୁଳି ଫୁଟିଲା ପୋଲିସ ଅନୁସନ୍ଧାନ କରୁଛି ।
ଅପରାହ୍ଣ ପ୍ରାୟ ସାଢ଼େ ୩ଟା ବେଳେ ଅସାବଧାନତା ବଶତଃ ସୁରକ୍ଷା କର୍ମୀଙ୍କ ହାତରୁ ବନ୍ଧୁକ ଖସିପଡ଼ି ଗୁଳି ଫୁଟିଥିଲା । ବନ୍ଧୁକ କାଗଜପତ୍ର ଓ ଲାଇସେନ୍ସ ନେଇ ପୋଲିସ ତଦନ୍ତ କରୁଛି । ଆହତଙ୍କ ସମସ୍ତ ଖର୍ଚ୍ଚ ବ୍ୟାଙ୍କ ବହନ କରିବ ବୋଲି ବ୍ୟାଙ୍କ ଅଫ୍ ଇଣ୍ଡିଆର ପୁରୀ ଶାଖା ମ୍ୟାନେଜର ସୂଚନା ଦେଇଛନ୍ତି ।
ଚାଣକ୍ୟଙ୍କୁ ଚଣା ଖୁଆଇ ପଶାପାଲିକୁ ଏମିତି ଓଲଟପାଲଟ କରିଦେଲେ ଏହି ମହାନାୟକ
ମୁମ୍ବାଇ: ଧୀରେ ଧୀରେ ବଦଳୁଛି ଜାତୀୟ ରାଜନୀତିର ଦୃଶ୍ୟପଟ୍ଟ । ଏକଦା ଜିତାପଟ ରାଜନୀତିର ଜାତକକୁ ନିଜ ପକେଟ୍ରେ ଧରି ବୁଲୁଥିବା ମୋଦି-ଶାହାଙ୍କ ଲୋକପ୍ରିୟତା କ୍ରମଶଃ ଘୁଣ ଖାଇବା ଆରମ୍ଭ କଲାଣି । ‘ମୋଦି ହୈ ତୋ ମୁମକିନ୍ ହୈ’ ବିଜେପିର ଏ ଅହଙ୍କାର ବାଣୀ ଆଉ ଶତ ପ୍ରତିଶତ ଶତ ନୁହେଁ ବୋଲି କହିଲେଣି ରାଜନୀତିକ ପଣ୍ଡିତ । ନିର୍ବାଚନ ରାଜନୀତିର କଷଟି ପଥରରେ କଡ଼ା ଆହ୍ୱାନର ସମ୍ମୁଖୀନ ହେବା ଆରମ୍ଭ କଲେଣି ବିଜେପିର ଏହି ଦୁଇ ପୋଷ୍ଟରବୟ । ମାତ୍ର କେଇମାସ ତଳେ ଧୂଳା ଉଡ଼େଇ ମ୍ୟାଜିକ ନମ୍ବରଠାରୁ ବହୁ ଅଧିକ ଆସନ ହାତେଇଥିବା ବିଜେପି, ମହାରାଷ୍ଟ୍ର ମ୍ୟାଜିକ ଚେୟାର ଚାମ୍ପିଅନସିପ୍ରେ ଚିତପଟାଙ୍ଗ ହୋଇଛି । ବିଫଳ ହେଲା ଗୈରିକ ଦଳର ତଥାକଥିତ ‘ଚାଣକ୍ୟ’ ଅମିତ ଶାହଙ୍କ ସବୁ ପ୍ଲାନ । ଚୌକି ଛକାପଞ୍ଝାର କସରତରେ ମାତ୍ ଖାଇ ୮୦ ଘଣ୍ଟାରେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଲେ ଦେବେନ୍ଦ୍ର ଫଡ଼ନବିସ୍ । ଅଧୁରା ରହିଗଲା ପୁଣି ପାଞ୍ଚବର୍ଷ ଗାଦିସୀନ ହେବାର ସ୍ୱପ୍ନ ।
ଯଦି ମହାରାଷ୍ଟ୍ର ମ୍ୟାଚ୍କୁ ନେଇ ପ୍ରାଇଜ ସେରିମନି କରାଯାଏ ତେବେ ରାଜନୀତି ବିଶେଷଜ୍ଞ ମତରେ ମ୍ୟାନ ଅଫ ଦି ମ୍ୟାଚ୍ ପୁରସ୍କାର ନିଶ୍ଚୟ ଯିବ ଶରଦ ପାଓ୍ୱାରଙ୍କ ପାଖକୁ । ଅମିତ ଶାହାଙ୍କ ଚକ୍ରବ୍ୟୁହକୁ ଭେଦ କରି ନିଜ ପାଓ୍ୱାର ପ୍ଲେ ଜରିଆରେ ବିଜେପି ପାଖରୁ ପାଓ୍ୱାର ଛଡ଼ାଇ ଆଣିଥିଲେ ମହାରାଷ୍ଟ୍ରର ଏନସିପି ପାଓ୍ୱାର ହାଉସ୍ । ଏଥିସହ ଭାରତ ରାଜନୀତିର ଏ ଭୀଷ୍ମ ପିତାମହ ଜଣାଇଦେଇଥିଲେ ଚାଣକ୍ୟ ଅମିତ୍ ଶାହା ନୁହେଁ, ସେ ନିଜେ ।
https://nandighoshatv.commagic-touch-of-modi-shaw-became-impactless/
ଅକ୍ଟୋବର ୨୪ ନିର୍ବାଚନ ଫଳାଫଳ ବାହାରିବା ପରଠୁ ଓ ଶିବସେନା ସହ ବିଜେପିର ସଂପର୍କ ତୁଟିବା ପରେ ଶରଦ ପାଓ୍ୱାର ହିଁ ବନିଥିଲେ ମେଣ୍ଟ ସରକାରର ବିଶ୍ୱକର୍ମା । ସୋନିଆ ଗାନ୍ଧିଙ୍କୁ ବୁଝେଇବା ହେଉ କି ଅଜିତ୍ ପାଓ୍ୱାରଙ୍କୁ ମନାଇ ପୁଣି ନିଜ ନୀଡ଼କୁ ଫେରାଇଆଣିବା କିମ୍ବା ଉଦ୍ଧବ ଠାକରେଙ୍କୁ ମୁଖ୍ୟମନ୍ତ୍ରୀ କରିବାର ନିଷ୍ପତ୍ତି ସବୁକିଛି ସମ୍ଭବ ହୋଇଥିଲା ଶରଦଙ୍କ ଗୋଟିଚାଳନା ପାଇଁ । ଏକ ଉଗ୍ର ହିନ୍ଦୁବାଦୀ ଦଳକୁ ଧର୍ମନିରପେକ୍ଷତାର ମୁକୁଟ ପିନ୍ଧାଇ ଇତିହାସ ବଦଳାଇଦେଲେ ପାଓ୍ୱାର । କେହି କେହି ତ କହୁଛନ୍ତି ଦୁର୍ନୀତି ବିରୋଧୀ ମାମଲାକୁ ରଫାଦଫା କରିବା ପାଇଁ ରାତିରାତି ସରକାର ଗଠନର ଡ୍ରାମା ରଚି ଅଜିତ ପାଓ୍ୱାରଙ୍କୁ ବ୍ୟବହାର କରିଥିଲେ ମହାରାଷ୍ଟ୍ରର ଏହି ମାଷ୍ଟର ଷ୍ଟ୍ରାଟେଜିଷ୍ଟ । ତେଣୁ ପ୍ରକୃତ ଚାଣକ୍ୟ କିଏ ? ଅମିତ ଶାହା ନା ଶରଦ ପାଓ୍ୱାର ?
ପାଓ୍ୱାରଷ୍ଟ୍ରୋକ୍
୧୯୭୭ ମସିହାର କଥା । ଜରୁରୀକାଳିନ ପରିସ୍ଥିତି ହଟିବା ପରର ସାଧାରଣ ନିର୍ବାଚନ । ବିପୁଳ ପରାଜୟ ଦେଖିଥିଲା କଂଗ୍ରେସ । ସେତେବେଳେ ମହାରାଷ୍ଟ୍ରରେ ଥାଏ କଂଗ୍ରେସ ଶାସନ । ପରାଜୟ ପାଇଁ ନୈତିକତା ମୁଣ୍ଡେଇ ଇସ୍ତଫା ଦେଲେ ମୁଖମନ୍ତ୍ରୀ ଶଙ୍କର ରାଓ ଚୌହାନ । ବସନ୍ତ ଦାଦା ପାଟିଲ ହେଲେ ପରବର୍ତ୍ତୀ ମୁଖ୍ୟମନ୍ତ୍ରୀ । କିନ୍ତୁ ପ୍ରଦେଶ ଶାଖାରେ ଅସନ୍ତୋଷ କାରଣରୁ ଦୁଇ ଭାଗ ହୋଇଗଲା କଂଗ୍ରେସ । କଂଗ୍ରେସ ଆଇ ଏବଂ କଂଗ୍ରେସ ୟୁ । ଶରଦ ଥାନ୍ତି ୟୁ ପଟରେ । ତାପର ବର୍ଷ ବିଧାନସଭା ନିର୍ବାଚନରେ କେହି ବି ପାଇଲେନି ବହୁମତ । ୯୯ ସିଟ୍ ପାଇ ବୃହତ ଦଳ ଭାବେ ଉଭା ହେଲା ଜନତା ଦଳ । କିନ୍ତୁ ଏଭଳି ସ୍ଥିତିରେ କନ୍ଦଳ ଭୁଲି ଦୁଇ କଂଗ୍ରେସ ଶକ୍ତି ପୁଣି ଏକାଠି ହୋଇ ବସନ୍ତ ଦାଦାଙ୍କ ନେତୃତ୍ୱରେ ସରକାର ଗଢ଼ିଲେ । କିନ୍ତୁ ତାହାର ଆୟୁ ବେଶୀ ଦିନ ନଥିଲା । ମାତ୍ର ପାଞ୍ଚ ମାସ ପରେ ଶରଦ ଖେଳିଲେ ଗେମ୍ । ୧୨ ଜଣ ବିଧାୟକଙ୍କୁ ନିଜ ସପକ୍ଷରେ ନେଇ ୧୯୭୮ରେ ଜନତା ଦଳ ସହ ମିଶି ୩୮ ବର୍ଷ ବୟସରେ ମହାରାଷ୍ଟ୍ରର ସର୍ବକନିଷ୍ଠ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ଏହା ଥିଲା ଯୁବ ଶରଦଙ୍କ ସେତେବେଳର ପାଓ୍ୱାରଷ୍ଟ୍ରୋକ୍।
ଚାଣକ୍ୟ ଚାଲ୍
କିଛି ବର୍ଷ ପରେ କଂଗ୍ରେସକୁ ପୁଣି ଫେରିଥିଲେ ପାଓ୍ୱାର । ୧୯୮୮ରେ ଦଳ ତାଙ୍କୁ କରିଥିଲା ମହାରାଷ୍ଟ୍ର ମୁଖ୍ୟମନ୍ତ୍ରୀ । ୧୯୯୦ରେ ଯେତେବେଳେ ବିଜେପି ଶିବସେନା ମେଣ୍ଟ ପାଇଁ ସଂଖ୍ୟା ଖେଳରେ ଗାଦି ହରାଇବାକୁ ଯାଉଥିଲା କଂଗ୍ରେସ ସେତେବେଳେ ଶରଦଙ୍କ ଚତୁର ଗୋଟି ଚାଳନାରେ ୧୨ ସ୍ୱାଧୀନ ବିଧାୟକଙ୍କ ସମର୍ଥନ ପାଇଥିଲା ଦଳ । ବଜାୟ ରଖିଲା କ୍ଷମତା ।
ଏନ୍ସିପି ଗଠନ
୧୯୯୯ରେ କଂଗ୍ରେସ ସଭାପତି ହୋଇଥିଲେ ସୋନିଆ ଗାନ୍ଧି । ଯାହାକୁ ବିରୋଧ କରିଥିଲେ ଶରଦ ପାଓ୍ୱାର । କାରଣ ସୋନିଆ ଥିଲେ ଇଟାଲୀ ଜନ୍ମିତ । ଜଣେ ବିଦେଶୀ ଜନ୍ମିତଙ୍କୁ ପ୍ରଧାନମନ୍ତ୍ରୀ ପ୍ରାର୍ଥୀ କରିବା ସପକ୍ଷରେ ନଥିଲେ ପାଓ୍ୱାର । ତେଣୁ ଏହାକୁ ବିରୋଧ କରି ଦଳ ଛାଡ଼ିଥିଲେ । ଗଠନ କରିଥିଲେ ଏନସିପି । ଆଉ ସେହି ଏନ୍ସିପି ଆଜି ବିଜେପି ଭଳି କ୍ଷମତାସୀନ ଦଳକୁ ପାଣି ପିଆଇଛି । କିଙ୍କ ମେକର ଭୂମିକାରେ ବସିଛନ୍ତି ଶରଦ ପାଓ୍ୱାର ।
ହୀରା ସହରରେ ପିଆଜ ଚୋରଙ୍କ କାରନାମା
ଗାନ୍ଧି ନଗର: ପିଆଜ ଦରକୁ ନେଇ ପୂରା ଦେଶରେ ହାହାକାର । କେଉଁଠି ପିଆଜ କେଜି ପିଛା ୧୦୦ ଟଙ୍କା ଡେଇଁଛି ତ ଆଉ କେଉଁଠି ମିଳୁନି । ଜମ୍ମୁ କଶ୍ମୀରରୁ ତାମିଲନାଡ଼ୁ, ଗୁଜରାଟରୁ ମିଜୋରାମ ଦେଶ ସାରା ଗୋଟିଏ ସ୍ଥିତି । ସବୁଠି କାଟିଲା ବେଳେ କନ୍ଦାଉଥିବା ପିଆଜକୁ କିଣିବା ତ ଦୂର କଥା ଛୁଇଁଲେ ଆଖିରୁ ଲୁହ ଆସି ଯାଉଛି । ପିଆଜର ଘୋର ଅଭାବ ଦେଖା ଦେଇଥିବା ବେଳେ ଏକ ମଣ୍ଡିରୁ ଚୋରି ହୋଇଛି ପିଆଜ । କେଜିଏ କି ୨ କେଜି ନୁହେଁ ପୂରା ୨୫୦ କେଜି ପିଆଜ ଚୋରି ହୋଇଛି ।
ପ୍ରଧାନମନ୍ତ୍ରୀ ମୋଦି ଓ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କ ଗୃହ ରାଜ୍ୟ ଗୁଜରାଟରୁ ୫ ବସ୍ତା ପିଆଜ ଚୋରି ହୋଇଛି । ଗୁରବାର ସୁରଟର ପାଳନପୁର ପାଟିୟାର ପିଆଜ ମଣ୍ଡି ଖୋଲିଥିଲା । ସକାଳେ ଦୋକାନ ଖୋଲିବା ପରେ ଠିକ୍ ଠାକ୍ ଚାଲିଥିଲା କିଣାବିକା । ହଠାତ୍ ପ୍ରହ୍ଲାଦ ଭାଇ ଦେଖିଥିଲେ ୫ ବସ୍ତା ପିଆଜ ନାହିଁ । କୁଆଡ଼େ ଗାୟବ ହୋଇଯାଇଛି । ସେ ଏ ସମ୍ପର୍କରେ ପାଖ ଦୋକାନୀଙ୍କୁ ପଚାରିବା ପରେ ପିଆଜ ଚୋରି ହୋଇଥିବା ଜାଣିବାକୁ ପାଇଥିଲେ । ୫ ବସ୍ତା ପିଆଜ ଚୋରିରେ ଆର୍ଥିକ କ୍ଷତିଗ୍ରସ୍ତ ପ୍ରହ୍ଲାଦ ମାନସିକ ସ୍ତରରେ ମଧ୍ୟ ଭାଙ୍ଗି ପଡ଼ିଛନ୍ତି । ଏନେଇ ଥାନାରେ ଅଭିଯୋଗ ହୋଇଛି ।
ମଣ୍ଡିରୁ ପିଆଜ ଚୋରି ନେଇ ପୋଲିସରେ ଅଭିଯୋଗ ପରେ ତଦନ୍ତ ଆରମ୍ଭ ହୋଇଛି । ପୋଲିସ ସିସିଟିଭି ଫୁଟେଜ ଆଧାରରେ ପିଆଜ ଚୋରକୁ ଖୋଜୁଛି ।
ଭୁବନେଶ୍ୱରର ହୋଟେଲରେ ଲାଗିଛି ସିକ୍ରେଟ୍ କ୍ୟାମେରା, ଓୟୋରୁ କର୍ମଚାରୀଙ୍କୁ ଉଠାଇନେଲା ପୋଲିସ
ଭୁବନେଶ୍ୱର : ସାବଧାନ୍ ! ଆପଣ ଭୁବନେଶ୍ୱରର ହୋଟେଲରେ ରହୁଛନ୍ତି କି ? ସବୁଆଡକୁ ଯାଞ୍ଚ କରି ହୋଟେଲରେ ଏଣ୍ଚ୍ରି କରନ୍ତୁ । କାରଣ ରାଜଧାନୀ ହୋଟେଲ ରୁମରେ ଲାଗିଥାଇପାରେ ସିକ୍ରେଟ୍ କ୍ୟାମେରା । ଆପଣଙ୍କର ସବୁ କାର୍ଯ୍ୟକଳାପ କଏଦ୍ ହୋଇପାରେ କ୍ୟାମେରା ଲେନ୍ସରେ ।
ଆଜି ଏଭଳି ଏକ ଘଟଣା ସାରା ରାଜ୍ୟରେ ଚହଳ ପକାଇ ଦେଇଛି । ସୂଚନା ଅନୁସାରେ, ନୟାପଲ୍ଲିସ୍ଥିତ ସାଇ ଆର୍ଯ୍ୟା ରେସିଡେନ୍ସିରେ ଥିବା ଓୟୋ ରୁମରେ ୨ ଜଣ ଯୁବକ ଯୁବତୀ ଜନ୍ମଦିନ ପାଳନ ପାଇଁ ଗତ ୫ ତାରିଖରେ ଯାଇଥିଲେ । ପରେ ଯୁବତୀଙ୍କୁ ନଭେମ୍ବର ୮ ତାରିଖରେ ୪ଟି ଭିନ୍ନ ଭିନ୍ନ ନମ୍ବରରୁ ଫୋନ୍ ଆସିଥିଲା ।
ଫୋନରେ ସଂପୃକ୍ତ ବ୍ୟକ୍ତି କହିଥିଲେ ଯେ, ୫ ତାରିଖରେ ହୋଟେଲକୁ ଆସିଥିବା ଯୁବକ-ଯୁବତୀଙ୍କର ଅନ୍ତରଙ୍ଗ ମୂହୁର୍ତ୍ତର ଫଟୋ ଓ ଭିଡିଓ ସେମାନଙ୍କ ପାଖରେ ଅଛି । ୫୦ ହଜାର ଟଙ୍କା ଦେଲେ, ସେମାନଙ୍କୁ ଫଟୋ ଓ ଭିଡିଓ ଦିଆଯିବ । ବ୍ଲାକମେଲର କହିଥିଲା ଯଦି ଟଙ୍କା ନଦେବ ତେବେ ସେ ସବୁକୁ ସୋସିଆଲ୍ ମିଡିଆରେ ଭାଇରାଲ୍ କରାଇଦେବ ।
ଗତକାଲି ଅର୍ଥାତ୍ ୨୮ ତାରିଖରେ ଟଙ୍କା ଦେବାକୁ ଯୁବତୀ ଜଣଙ୍କ ସିଆରପି ପାଖକୁ ସଂପୃକ୍ତ ଯୁବକଙ୍କୁ ଡାକି ସ୍ଥାନୀୟ ଲୋକଙ୍କ ସାହାଯ୍ୟରେ ସେମାନଙ୍କୁ କାବୁ କରିଥିଲା । ଏହାପରେ ନୟାପଲ୍ଲୀ ଥାନାରେ ଲିଖିତ ଅଭିଯୋଗ ପରେ ୨ ଜଣ ଓୟୋ କର୍ମଚାରୀଙ୍କୁ ପୋଲିସ ଅଟର ରଖି ପଚରା ଉଚୁରା କରୁଛି । ଯୁବତୀଙ୍କର ମଧ୍ୟ ବୟାନ୍ ରେକର୍ଡ କରାଯାଇଥିବା ଜଣାପଡ଼ିଛି ।
ଏ ହୋଟେଲରେ ବହୁ ବେନିୟମ କାର୍ଯ୍ୟ ହେଉଥିବା ଅଭିଯୋଗ ହୋଇଛି । ପୋଲିସ ଏ ଘଟଣାର ତଦନ୍ତ କରୁଛି ।