ନମ୍ବର ବିହୀନ ଗାଡ଼ି ବିକ୍ରି ପାଇଁ ପୁରୀ ଶିବମ ହୋଣ୍ଡାକୁ ଜରିମାନା
ପୁରୀ: ନୂଆ ମୋଟର ଯାନ ଆଇନ୍ ଉଲ୍ଲଂଘନ କରି ଫସିଛନ୍ତି ଡିଲର । ଏମଭିଆଇ କରିଛି ଲକ୍ଷେ ଟଙ୍କା ଜରିମାନା । ପୁରୀ ଶିବମ ହୋଣ୍ଡାକୁ ଲକ୍ଷେ ଟଙ୍କା ଜରିମାନା କରାଯାଇଛି । ଶିବମ ହୋଣ୍ଡା ପୁରୀ ଚମାରକେରା ଅଞ୍ଚଳର ବିଜୟଲକ୍ଷ୍ମୀ ବାରିକଙ୍କୁ ମୋପେଡ ଦୁଇ ଚକିଆ ଯାନ ବିନା ନମ୍ବର ପ୍ଲେଟରେ ବିକ୍ରି କରିଥିଲା । ମାନେ ଗାଡ଼ି ରେଜିଷ୍ଟେସନ୍ ହେବା ପୂର୍ବରୁ ଗ୍ରାହକଙ୍କୁ ଦେଇଥିଲା କମ୍ପାନୀ ।
ଗୁରୁବାର ସନ୍ଧ୍ୟାରେ ସମୁଦ୍ରକୂଳ ଥାନା ଅଞ୍ଚଳରେ ପୋଲିସ ଓ ଏମଭିଆଇ ମିଳିତ ଚେକିଂ ବେଳେ ଉକ୍ତ ଗାଡ଼ିକୁ ଧରିଥିଲେ । ଏଥିସହ କମ୍ପାନୀ ଓ ଶିବମ ହୋଣ୍ଡାକୁ ଏକ ଲକ୍ଷେ ଟଙ୍କାର ଫାଇନ୍ କରାଯାଇଛି । ଏହି ଘଟଣା ନୂଆ ନୁହେଁ ପୂର୍ବରୁ ସମାନ ଘଟଣାରେ ନୂଆ ମୋଟର ଯାନ ଆଇନ୍ ବଳରେ କଟକର ଖିମଜି ହୋଣ୍ଡାକୁ ମଧ୍ୟ ଆରଟିଓ ଏକ ଲକ୍ଷ ଟଙ୍କା ଫାଇନ୍ କରିଥିଲେ ।
ଫେସବୁକରେ ଲେଖୁଥିଲେ ମନର କଥା ହେଲେ, କେହି ବୁଝି ପାରିଲେନି
ଭୁବନେଶ୍ୱର: କର୍ପୋରେଟ୍ ଦୁନିଆର କାଚଘର ଭିତରେ ତାଙ୍କ ହୃଦୟ ଥିଲା ଖୁବ କୋମଳ। ଟଙ୍କାଭର୍ତ୍ତି ବ୍ୟାଙ୍କର ଭିଡ଼ ଭିତରେ ତାଙ୍କ ଜୀବନ ଥିଲା ଖୁବ୍ ନିର୍ଜନ। ୟୁକୋ ବ୍ୟାଙ୍କର ସିନିୟର ମ୍ୟାନେଜର ରଞ୍ଜିତା ରାଓ । ଖୁବ୍ ସେନସେଟିଭ୍ ତାଙ୍କ ସୋସିଆଲ୍ ଲାଇଫ୍ । ଏ ହେଉଛି ଆତ୍ମହତ୍ୟା ଦିନର ଶେଷ ଫେସବୁକ୍ ପୋଷ୍ଟ। ଅପରାହ୍ଣ ୩ଟା ବାଜି ୧୮ମିନିଟ୍ । ବଲିଉଡ୍ର ଲାଟେଷ୍ଟ ସ୍ୟାଡ୍ ସଙ୍ଗକୁ ସେୟାର କରିଥିଲେ ରଞ୍ଜିତା ।
ଆଉ ଏ ହେଉଛି ନଭେମ୍ବର ୧୫ ତାରିଖର ପୋଷ୍ଟ । ହ୍ୱେନ୍ ଆଇ ଡାଏ ।… ମାନେ କେଉଁଦିନ ମୋ ମୃତ୍ୟୁ ହେବ । ପ୍ରତିଟି ପୋଷ୍ଟରେ ଦୁଃଖ, ଯନ୍ତ୍ରଣା ଓ ବିଫଳତାର ଧାଡି ଧାଡ଼ି କାହାଣୀ । କେତେବେଳେ ନିଜ ମନକୁ ବୁଝାଇବାକୁ ଚେଷ୍ଟା କରିଛନ୍ତି ତ ପୁଣି କେତେବେଳେ ନିଜ ମନର ମଣିଷକୁ ନିଜର କରିବାକୁ ଅଣ୍ଟା ଭିଡ଼ିଛନ୍ତି । ଲଗାତାର କିଛି ମାସ ହେଲା ହୃଦୟର ଗୋଟି ଗୋଟି କଥାକୁ ସେ ଲେଖିବାକୁ ଚେଷ୍ଟା କରିଛନ୍ତି ସୋସିଆଲ୍ ମିଡିଆର କାନ୍ଥରେ । କେତେବେଳେ ପ୍ରେମର ଜୁଆର ଭିତରେ ହଜି ଯିବାକୁ ଚେଷ୍ଟା କରିଛନ୍ତି ତ ପୁଣି କେତେବେଳେ ପ୍ରତାରଣାର ବନ୍ୟାରୁ ନିଜକୁ ରକ୍ଷା କରିବାକୁ ପ୍ରୟାସ କରିଛନ୍ତି ସେ ।
ମାନ, ଅଭିମାନର କାହାଣୀ ଯେମିତି ତାଙ୍କ ପ୍ରେମୀ ଜୀବନକୁ ଆଚ୍ଛାଦିତ କରି ରଖିଛି । ହେଲେ ଶକ୍ତଝିଅର ମନ ଭାଙ୍ଗି ଯାଉଛି । ରଙ୍ଗୀନ କଭରପେଜ୍ରେ ରଞ୍ଜିତାଙ୍କ ରଙ୍ଗ ଫିକା ପଡୁଛି । ଲାଗିଛି ସତେ ଯେମିତି ସେ ହାରି ଯାଉଛନ୍ତି ନିଜ ପ୍ରେମ ପାଖରେ । ଆଉ ତା ପରେ… ଜୀବନ ଓ ମୃତ୍ୟୁକୁ ନେଇ ଦ୍ୱନ୍ଦ୍ୱ ବଢୁଛି । ଯେଉଁଠି ପ୍ରେମ ନାହିଁ, ସେ ଜୀବନର ମାନେ କଣ ।ହୁଏତ ଏମିତି କିଛି ଅବାଞ୍ଛିତ, ଅସମାହିତ ପ୍ରଶ୍ନର ବୁଢୀଆଣି ଜାଲରେ ଛନ୍ଦି ହୋଇ ପଡୁଛନ୍ତି ରଞ୍ଜିତା । ଶେଷରେ ଶେଷ ହେଉଛି ପ୍ରେମ, ମରି ଯାଉଛି ପ୍ରେମିକା ।
ଜିଓ ବଢ଼ାଇଲା ଦର, ଏବେ ହିଁ କରି ନିଅନ୍ତୁ ରିଚାର୍ଜ
ମୁମ୍ବାଇ: ସରୁଛି ଶସ୍ତା ଯୁଗ । ମହଙ୍ଗା ହେବାରେ ଲାଗିଛି ମୋବାଇଲ କଲ୍ ଓ ଡାଟା । ଏୟାରଟେଲ୍, ଭୋଡ଼ାଫୋନ୍ ଓ ଆଇଡିଆ ଟାରିଫ୍ ବୃଦ୍ଧି କରିବା ପରେ ସମାନ ପଦକ୍ଷେପ ନେଇଛି ଜିଓ । ପ୍ରଥମେ ଫ୍ରି କଲ୍, ପରେ ଏଫୟୁପି ଲାଗୁ କରି ଜିଓ ଟାରିଫ ବୃଦ୍ଧି କରିଥିଲା । ଆଜି ଜିଓ ପୁଣିଥରେ ତା ଟାରିଫ ବୃଦ୍ଧି କରିଛି । ଏହା ଆଜି ମଧ୍ୟରାତ୍ରିରୁ ଲାଗୁ ହେବ ।
ନୂଆ ପ୍ଲାନରେ ମାସିକ ୧୯୯ ଟଙ୍କାରେ ପ୍ରତିଦିନ ୧.୫ ଜିବି ଡାଟା, ଜିଓରୁ ଜିଓକୁ ଅସୀମିତ କଲ ସହ ଅନ୍ୟ ନେଟୱାର୍କକୁ ୧୦୦୦ ମିନିଟର କଲ ମିଳିବ । ସେହିଭଳି ଦୈନିକ ୨ ମାସ ପାଇଁ ୩୯୯ ଟଙ୍କା ପ୍ଲାନରେ ପ୍ରତିଦିନ ୧.୫ ଜିବି ଡାଟା, ଜିଓରୁ ଜିଓକୁ ଅସୀମିତ କଲ ସହ ଅନ୍ୟ ନେଟୱାର୍କକୁ ୨୦୦୦ ମିନିଟର କଲ ପାଇବେ ।
ଦୈନିକ ୧.୫ ଜିବି ଡାଟା ପ୍ରଦାନ କରୁଥିବା ୩ ମାସ ଅବଧିର ପ୍ଲାନ ହେଉଛି ୫୫୫ । ଏଥିରେ ଜିଓରୁ ଜିଓକୁ ଅସୀମିତ କଲ ଏବଂ ଅନ୍ୟ ନେଟୱାର୍କକୁ ୩୦୦୦ ମିନିଟର କଲ ମିଳିବ । ଏହି କ୍ରମରେ ୩୬୫ ଦିନ ଅବଧିର ପ୍ଲାନର ମୂଲ୍ୟ ୨୧୯୯ ଟଙ୍କା ରହିଛି । ଏଥିରେ ଜିଓରୁ ଜିଓକୁ ଅସୀମିତ କଲ ଏବଂ ଅନ୍ୟ ନେଟୱାର୍କକୁ ୧୨୦୦୦ ମିନିଟର କଲ ସୁବିଧା ରହିଛି । ଏଥିସହିତ ଜିଓ ପକ୍ଷରୁ ଦୈନିକ ୨ ଜିବି ଓ ତିନି ଜିବି ଡାଟା ମିଳୁଥିବା ଭିନ୍ନ ଭିନ୍ନ ଅବଧିର ପ୍ଲାନ ଘୋଷଣା କରାଯାଇଛି ।
ଅଧିକ କଲ ଓ କମ ଡାଟା ବ୍ୟବହାର କରୁଥିବା ଗ୍ରାହକଙ୍କ ପାଇଁ ଜିଓ ପକ୍ଷରୁ ପ୍ଲାନ ଘୋଷଣା ହୋଇଛି । ୧୨୯ ଟଙ୍କା ମୂଲ୍ୟର ଏକ ମାସ (୨୮ ଦିନ) ଅବଧିର ପ୍ଲାନରେ ୨ ଜିବି ଡାଟା ସହିତ ଜିଓରୁ ଜିଓକୁ ଅସୀମିତ କଲ ଏବଂ ଅନ୍ୟ ନେଟୱାର୍କକୁ ୧୦୦୦ ମିନିଟର କଲ ସୁବିଧା ମିଳିବ । ସମାନ ଭାବେ ତିନି ମାସ ଅବଧିର ପ୍ଲାନ ମୂଲ୍ୟ ୩୨୯ ଟଙ୍କା ଓ ଏକ ବର୍ଷ ଅବଧିର ପ୍ଲାନର ମୂଲ୍ୟ ୧୨୯୯ ଟଙ୍କା ରହିଛି ।
ଯଦି ଆପଣ ଆଜି ରାତି ୧୧ଟା ୫୯ ପୂର୍ବରୁ ରିଚାର୍ଜ କରାଇ ନେଉଛନ୍ତି । ତେବେ, ଆପଣ ପୁରୁଣା ଟାରିଫରେ ରିଚାର୍ଜ କରାଇ ନେଇ ଏହାର ଲାଭ ଉଠାଇ ପାରିବେ । ନଚେତ୍ ସକାଳେ ପାଇଲେ ଆପଣଙ୍କୁ ପ୍ରାୟ ୩୯ ପ୍ରତିଶତ ଅଧିକ ଟଙ୍କା ଖର୍ଚ୍ଚ କରିବାକୁ ପଡ଼ିବ ।
ଆରବସାଗରରେ ବଳ ଗୋଟାଉଛି ବାତ୍ୟା; ୩୬ ଘଣ୍ଟାରେ ଛୁଇଁପାରେ ସ୍ଥଳଭାଗ
ନୂଆଦିଲ୍ଲୀ: ଟଳୁନି ବାତ୍ୟା ବିପଦ । ଗୋଟିଏ ପରେ ଗୋଟିଏ ବାତ୍ୟା ମୁହାଁଉଛି । ଆରବସାଗରରେ ପୁଣି ଥରେ ସୃଷ୍ଟି ହୋଇଛି ବାତ୍ୟା । ଗୋଟିଏ ସାମୁଦ୍ରିକ ଝଡ଼ର ରୂପ ନେଇଥିବା ବେଳେ ଅନ୍ୟଟି ଅବପାତରେ ପରିଣତ ହୋଇଛି । ଦକ୍ଷିଣ-ପଶ୍ଚିମ ଆରବସାଗରରେ ସୃଷ୍ଟି ହୋଇଥିବା ସାମୁଦ୍ରିକ ଝଡ଼ ‘ପବନ’ ମାଡ଼ି ଆସୁଛି । ଘଣ୍ଟାପ୍ରତି ୧୫ କିମି ବେଗରେ ସମୁଦ୍ରରେ ଗତି କରୁଛି ବାତ୍ୟା ‘ପବନ’ ।
ଭାରତୀୟ ପାଣିପାଗ ବିଭାଗର ଆକଳନ ଅନୁଯାୟୀ ଏହା ଦକ୍ଷିଣ-ଦକ୍ଷିଣ ପୂର୍ବ ଦିଗରେ ୟେମେନର ସୋକୋଟ୍ରା ଠାରୁ ୩୯୦ କିମି ଦୂରରେ ରହିଛି । ସୋମଲିଆର ବୋସାସୋ ଠାରୁ ପୂର୍ବ-ଦକ୍ଷିଣ ପୂର୍ବ ଦିଗରେ ୭୩୦ କିମି ଦୂରରେ ଅଛି ବାତ୍ୟା । ଆସନ୍ତାକାଲି ସକାଳେ ଏହା ସାଇକ୍ଲୋନିକ ଷ୍ଟର୍ମରୁ ଡିପ୍ ଡିପ୍ରେସନରେ ପରିଣତ ହୋଇପାରେ ।
ଆଗାମୀ ୩୬ ଘଣ୍ଟା ମଧ୍ୟରେ ଦୁର୍ବଳ ହୋଇ ୭ ତାରିଖରେ ସୋମଲିଆ ତଟ ଛୁଇଁବ ବୋଲି ଅନୁମାନ କରାଯାଉଛି । ପ୍ରଭାବରେ ଘଣ୍ଟା ପ୍ରତି ୬୦ରୁ ୭୦ କିମି ବେଗରେ ପବନ ବହିପାରେ । ସେହିପରି ପୂର୍ବକେନ୍ଦ୍ରୀୟ ବଙ୍ଗୋପସାଗରରେ ସୃଷ୍ଟି ହୋଇଥିବା ଅବପାତ ପଶ୍ଚିମ-ଉତ୍ତର ପଶ୍ଚିମ ଦିଗରେ ଘଣ୍ଟା ପ୍ରତି ୧୨ କିମି ବେଗରେ ଗତି କରୁଛି ।
ଏହା ଏବେ ପଶ୍ଚିମ- ଦକ୍ଷିଣ ପଶ୍ଚିମ ଦିଗରେ ମୁମ୍ବାଇ ଠାରୁ ୭୫୦ କିମି ଦୂରରେ ଅଛି । ଅବପାତ ଲଘୁଚାପରେ ପରିଣତ ହୋଇପାରେ । ଫଳରେ ସମୁଦ୍ର ଅଶାନ୍ତ ରହିବ । ମତ୍ସ୍ୟଜୀବୀଙ୍କୁ ସମୁଦ୍ର ବାରଣ କରାଯାଇଛି ।
ବାରବାଟୀ ଦିନିକିଆ ପାଇଁ ଟିକେଟ୍ ନାହିଁ, ମାତ୍ର ୩୦ ମିନିଟରେ ସରିଗଲା ଗ୍ୟାଲେରି ଟିକେଟ୍
ଭୁବନେଶ୍ୱର : ମାତ୍ର ୩୦ ମିନିଟରେ ବିକ୍ରୀ ହୋଇଗଲା ୬ ହଜାରରୁ ଅଧିକ ଟିକେଟ୍ । ବାରବାଟୀ ଦିନିକିଆଇ ପାଇଁ ଅନଲାଇନ୍ ଟିକେଟ୍ ବିକ୍ରୀର ମାତ୍ର କେଇ କ୍ଷଣରେ ସରିଗଲା ଟିକେଟ୍ ।
ସନ୍ଧ୍ୟା ୫ଟା ବେଳକୁ www.paytm.com ସାଇଟରେ ଅନଲାଇନ୍ ଟିକେଟ୍ ବିକ୍ରି ଆରମ୍ଭ ହୋଇସାରିଥିଲା । ପାଖାପାଖି ୯ ହଜାର ଟିକେଟ୍ ବିକ୍ରି ପାଇଁ ଧାର୍ଯ୍ୟ ହୋଇଥିଲା। ୪୦୦ ଟଙ୍କାରୁ ଆରମ୍ଭ କରି ୫୯୦୦ ଟଙ୍କା ପର୍ଯ୍ୟନ୍ତ ଟିକେଟ୍ ଏହି ସାଇଟରେ ଉପଲବ୍ଧ ଥିଲା । ସମସ୍ତେ ଧଡାଧଡ୍ ଲଗଇନ୍ କରି ଟିକେଟ୍ ବୁକିଂ କରୁଥିଲେ । ସାଇଟ୍ ଫୁଲ୍ ଜାମ୍ ରହିଥିଲା ।
୬ ନମ୍ବର ଗ୍ୟାଲେରୀ ପାଇଁ ଟିକେଟ୍ ମୂଲ୍ୟ ୪୦୦ ଟଙ୍କା ରହିଥିବା ବେଳେ, ୪ ଓ ୨ ନମ୍ବର ଗ୍ୟାଲେରୀ ପାଇଁ ଟିକେଟ୍ ମୂଲ୍ୟ ୫୯୦ ଟଙ୍କା ରହିିଥିଲା । ସ୍ପେସାଲ୍ ଏନକ୍ଲୋଜର ବକ୍ସ ପାଇଁ ୩୫୪୦ ଓ ଏସି ବକ୍ସ ପାଇଁ ୫୯୦୦ ଟଙ୍କା ଟିକେଟ୍ ମୂଲ୍ୟ ରହିଥିଲା। ଯଦି ଜଣେ ବ୍ୟକ୍ତି ୫୯୦ ଟଙ୍କିଆ ୩ଟି ଟିକେଟ୍ କିଣିବ ତେବେ ତାଙ୍କୁ ଟ୍ୟାକ୍ସ ମିଶାଇ ୧୮୯୫ ଟଙ୍କା ଦେବାରୁ ପଡ଼ୁଥିଲା । ମାତ୍ର କେଇ ମିନିଟରେ ଟିକେଟ୍ ସରିଯିବାକୁ ନେଇ ଅସନ୍ତୋଷ ଦେଖିବାକୁ ମିଳିଛି । ସମସ୍ତେ ଆଶା କରିଥିଲେ ବହୁଦିନ ପରେ ବାରବାଟୀରେ ମ୍ୟାଚ୍ ହେଉଛି, ଦେଖିବାକୁ ଯିବେ । କିନ୍ତୁ କେଇ ମିନିଟରେ ସରିଗଲା ଗ୍ୟାଲେରି ଟିକେଟ୍ ।
୨୫ ଟଙ୍କାରେ ପିଆଜ ବିକୁଥିଲେ ସରକାର, ଏମିତି ହେଲା ଅବସ୍ଥା
ଅମରାବତୀ: ପିଆଜ ଦରକୁ ନେଇ ଦେଶ ସାରା ଆକ୍ରୋଶ, ପ୍ରତିବାଦ । ଜନତାଙ୍କ ରୋଶକୁ ପ୍ରତିହତ ପାଇଁ ଆନ୍ଧ୍ରପ୍ରଦେଶ ସରକାର ପଦକ୍ଷେପ ନେଇଥିଲେ । କେଜି ପିଛା ୨୫ ଟଙ୍କାରେ ପିଆଜ ବିକ୍ରି ପାଇଁ ଘୋଷଣା କରିଥିଲେ । ସେହି ଅନୁଯାୟୀ ବିଜୟାନଗରମରେ ସରକାରଙ୍କ କୃଷି ଓ ବଜାର ବିଭାଗ ପକ୍ଷରୁ ପିଆଜ ବିକ୍ରି ହେଉଥିଲା ।
ବଜାରରେ ପିଆଜ ଦର ୧୦୦ ଟଙ୍କା ଉପରେ ଥିବାରୁ ଲୋକଙ୍କ ପ୍ରବଳ ଗହଳି ଦେଖିବାକୁ ମିଳିଥିଲା । ଭିଡ଼ ଏତେ ଥିଲା ଯେ, ଲୋକଙ୍କୁ ସ୍ଥାନୀୟ ପ୍ରଶାସନ ନିୟନ୍ତ୍ରଣ କରିପାରି ନଥିଲା । ଫଳରେ ସେଠାର ଦଳାଚକଟା ହୋଇଛି । ଦଳାଚକଟାରେ କିଛି ଲୋକ ଆହତ ମଧ୍ୟ ହୋଇଛନ୍ତି । ପ୍ରଶାସନ ପକ୍ଷରୁ ପିଆଜ ବିକ୍ରିକୁ ବର୍ତ୍ତମାନ ପାଇଁ ବନ୍ଦ କରି ଦିଆଯାଇଛି ।
https://nandighoshatv.comnirmalas-new-onion-theory-over-price-hike/