ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଲେ ନବ ନିର୍ବାଚିତ ଜିଲ୍ଲା ପରିଷଦ ସଦସ୍ୟ । ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ସାକ୍ଷାତ କରିବା ସହ କୃତଜ୍ଞତା ଜଣାଇଲେ କୋରାପୁଟ ଜିଲ୍ଲା ପରିଷଦର ଦୁଇ ନବନିର୍ବାଚିତ ସଭ୍ୟ । ଦଶମନ୍ତପୁରର କହ୍ନେଇ ଜାନି ଓ ପଟାଙ୍ଗୀର ଲଛନ ଖରା ଜିଲ୍ଲା ପରିଷଦ ସଦସ୍ୟଭାବେ ନିର୍ବାଚିତ ହୋଇଛନ୍ତି । ମନ୍ତ୍ରୀ ପଦ୍ମିନୀ ଦିଆନ୍‌, ବିଧାୟକ ତଥା କୋରାପୁଟ ଜିଲ୍ଲା ପର୍ଯ୍ୟବେକ୍ଷକ ଚନ୍ଦ୍ର ସାରଥି ବେହେରା, କୋରାପୁଟ ଜିଲ୍ଲା ବିଜେଡି ସଭାପତି ଇଶ୍ୱର ଚନ୍ଦ୍ର ପାଣିଗ୍ରାହୀ, କୋରାପୁଟ ବିଧାୟକ ରଘୁରାମ ପାଡାଲ୍‌, , ପଟାଙ୍ଗୀ ପୂର୍ବତନ ବିଧାୟକ ପ୍ରଫୁଲ୍ଲ ପାଙ୍ଗୀ, ପୂର୍ବତନ ସାଂସଦ ଝିନ୍‌ ହିକ୍‌କା, ଜିଲ୍ଲା ପରିଷଦ ସଦସ୍ୟ ତୁଳସି କ୍ରିଷାନୀ, ଦଶମନ୍ତପୁର ବ୍ଳକ୍‌ର ଭାଇସ୍‌ ଚେୟାରମ୍ୟାନ୍‌ ନାରାୟଣ ବିଷୋୟୀଙ୍କ ସମେତ ଲମତାପୁଟ ବ୍ଳକ୍‌ର ୨୦ ପିଆରଆଇ ସଦସ୍ୟ  ଉପସ୍ଥିତ ଥିଲେ ।

ଉଦଘାଟିତ ହେଲା ଟେକ୍‌ ମହିନ୍ଦ୍ରାର ଅନ୍ତର୍ଜାତୀୟ ବିଜନେସ ପ୍ରୋସେସିଂ ସେଣ୍ଟର ବା ବିପିଓ । ଏହାକୁ ଭୁବନେଶ୍ବରର ଫରଚ୍ୟୁନ ଟାୱାରରେ ଉଦଘାଟନ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ଅବସରରେ ଟେକ ମହିନ୍ଦ୍ରାର ସିଏମଡି ସି.ପି. ଗୁରନାନୀଙ୍କ ସମେତ କମ୍ପାନୀର ବିଭାଗୀୟ ଅଧିକାରୀ ଉପସ୍ଥିତ ଥିଲେ । ଏହି କ୍ୟାମ୍ପସରେ ୫ ଶହ କର୍ମଚାରୀ ପ୍ରତିଦିନ ୨୪ ଘଣ୍ଟିଆ ସେବା ପ୍ରଦାନ କରିବେ । ଏଥିସହ ବିଶ୍ୱର ବଡ଼ ବଡ଼ ଗ୍ରାହକଙ୍କୁ ଉତ୍ତମ ସେବା ଯୋଗାଇବାରେ ଏହି ସେଣ୍ଟର ବେଶ ସହାୟକ ହେବ। ତେବେ ରାଜ୍ୟ ସରକାର ସହର ମଧ୍ୟରେ ୨୫ ଏକର ଯାଗା ଯୋଗାଇଲେ କମ୍ପାନୀର ନିଜସ୍ୱ କ୍ୟାମ୍ପସ କରାଯାଇପାରିବ ବୋଲି ସରକାରଙ୍କୁ ଅନୁରୋଧ କରିଛନ୍ତି କମ୍ପାନୀର ସିଏମଡି।

ସାଲେପୁର: ଛାତ୍ରୀଙ୍କ ଆତ୍ମହତ୍ୟା ସନ୍ଦେହ । ନିଶ୍ଚିନ୍ତକୋଇଲି ବରପଡ଼ା ବ୍ରିଜ ଉପରୁ ଲୁଣା ନଦୀକୁ ଡେଇଲେ କଲେଜ ଛାତ୍ରୀ । ସୂଚନା ଅନୁଯାୟୀ, ଛାତ୍ରୀ ଜଣକ ବନ୍ଧକାଟିଆ ଫତେପୁର ଗାଁର ପତନ ମହାନ୍ତିଙ୍କ ଝିଅ ରୋନାଲି ମହାନ୍ତି ।

ସବୁଦିନ ପରି ଆଜି ମଧ୍ୟ କଲେଜରୁ ଫେରିବା ବେଳେ ବରପଡ଼ା ବ୍ରିଜ ଉପରୁ ଛାତ୍ରୀ ଜଣଙ୍କ ଡେଇଁ ପଡିଥିବା ସୂଚନା ମିଳିଛି । ସ୍ଥାନୀୟ ଲୋକେ ନଦୀରେ କେହି ଜଣେ ଭାସୁଥିବାର ଦେଖି ପୋଲିସକୁ ସୂଚନା ଦେଇଥିଲେ ।

ପରେ ଅଗ୍ନିଶମ ବିଭାଗ ଘଟଣା ସ୍ଥଳରେ ପହଂଚି ନଈରେ ଛାତ୍ରୀଙ୍କୁ ଖୋଜା ଖୋଜି ଆରମ୍ଭ କରିଥିଲା । କିନ୍ତୁ ଏପର୍ଯ୍ୟନ୍ତ ଝିଅର କୌଣସି ପତ୍ତା ମିଳିନାହିଁ । ଦମକଳ ବାହିନୀର ଉଦ୍ୟମ ଜାରି ରହିଛି ।

ସାଇକେଲ ସହ କଲେଜ ବ୍ୟାଗ୍ ଓ କଲେଜ ଆଇ କାର୍ଡ ବ୍ରିଜ ଉପରେ ଥୁଆ ହୋଇଥିବା ଦେଖିବାକୁ ମିଳିଛି । ଛାତ୍ରୀ ଜଣଙ୍କ ଆତ୍ମହତ୍ୟା କରିଛନ୍ତି ନା ତାଙ୍କୁ କେହି ଠେଲି ଦେଇଛନ୍ତି ତାହା ବର୍ତ୍ତମାନ ଅସ୍ପଷ୍ଟ ରହିଛି । ଛାତ୍ରୀ ଜଣକ ସ୍ଥାନୀୟ ବଲ୍ଲଭ ଦେବୀ ମହିଳା ମହାବିଦ୍ୟାଳୟ ରେ +୨ ଶ୍ରେଣୀରେ ପାଠ ପଢ଼ୁଥିଲେ ।

ଭୁବନେଶ୍ୱର: ସିଇଟି କଲେଜରେ ଲୋକାର୍ପିତ ହେଲା ସେଣ୍ଟର ଅଫ ଏକ୍ସଲେନ୍ସି ଅନ୍‌ ଆର୍ଟିଫିସିଆଲ ଇଣ୍ଟେଲିଜେନ୍‌ସି । ଏହାସହ କ୍ୟାମ୍ପସରେ ଅଡିଟୋରିୟମ୍‌ ଏବଂ ଇ-ଲର୍ଣ୍ଣି ସେଣ୍ଟରର ଲୋକାର୍ପଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ସେଣ୍ଟରରେ ଛାତ୍ରଛାତ୍ରୀମାନେ ଅତ୍ୟାଧୁନିକ ଜ୍ଞାନ କୈାଶଳ ପ୍ରୟୋଗ କରି ବିଭିନ୍ନ ସଫ୍ଟୱେୟାର ଡେଭଲପ କରିବେ ।

ସିଇଟି କଲେଜରେ ହେବ ସଫ୍ଟୱେୟାର ଡେଭଲପ୍‌ । ଶିକ୍ଷା, ସ୍ୱାସ୍ଥ୍ୟ ଏବଂ କୃଷି କାମ ପାଇଁ ତିଆରି ହେବ ଅତ୍ୟାଧୁନିକ ଯନ୍ତ୍ରପାତି । କଲେଜର ଛାତ୍ରଛାତ୍ରୀମାନେ ଏହାକୁ ନିର୍ମାଣ କରିବେ । ଅଧିକ ମାନବ ସମ୍ବଳ ଯାହା କରିବାରେ କଷ୍ଟ ହେଉଥିବ ତାହା କରିବ ରୋବର୍ଟ ଭଳି ଅତ୍ୟାଧୁନିକ ଯନ୍ତ୍ର । ଏଭଳି ଏକ ପ୍ରୟୋଗଶାଳାକୁ ଲୋକାର୍ପଣ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଭୁବନେଶ୍ୱର ସିଇଟି କଲେଜ କ୍ୟାମ୍ପରରେ ଆରମ୍ଭ ହୋଇଛି ସେଣ୍ଟର ଅଫ ଏକ୍ସଲେନ୍ସି ଅନ୍‌ ଆର୍ଟିଫିସିଆଲ ଇଣ୍ଟେଲିଜେନ୍‌ସି । ଏକାଥରେ ୩୦ ଜଣ M.TEC ଛାତ୍ରଛାତ୍ରୀ ଏହି ତାଲିମ୍‌ ପାଇପାରିବେ । ଏହି ଅବସରରେ ମୁଖ୍ୟମନ୍ତ୍ରୀ କ୍ୟାମ୍ପସରେ ୨ହଜାର କ୍ଷମତା ବିଶିଷ୍ଟ ବିଜୁ ପଟ୍ଟନାୟକ ଅଡିଟୋରିୟମ୍‌, ଇ-ଲର୍ଣ୍ଣି ସେଣ୍ଟର ଏବଂ ଇ-ଲାଇବ୍ରେରୀର ଲୋକାର୍ପଣ କରିଛନ୍ତି ।

ଅନ୍ୟପଟେ ବୋର ୱେଲରେ ଶିଶୁ ପଡି ମୃତ୍ୟୁ ବରଣ କରିବା ଖବର ଏବେ ଚିନ୍ତା ବଢ଼ାଇଛି । ଏଭଳି ଘଟଣା ଏବେ ଦେଶର ବିଭିନ୍ନ ସ୍ଥାନରେ ଘଟୁଥିବା ନଜର ଆସୁଛି । ଏହାକୁ ଦୃଷ୍ଟିରେ ରଖି ସିଇଟି ଛାତ୍ରଛାତ୍ରୀମାନେ ଏକ ସଫ୍ଟୱେୟାର ଡେଭଲପ କରିଛନ୍ତି । ଯାହା ଶିଶୁଟିକୁ ସୁରକ୍ଷିତ ଭାବରେ ବୋରୱେଲରୁ ଉଦ୍ଧାର କରିପାରିବ । ଏଭଳି ବ୍ୟବସ୍ଥା ଆରମ୍ଭ ହେବା ପରେ ଛାତ୍ରଛାତ୍ରୀମାନେ ବେଶ ଉତ୍ସାହିତ ଅଛନ୍ତି । ଏଣିକି ଛାତ୍ରଛାତ୍ରୀମାନେ ରାଜ୍ୟର ବିକାଶରେ ସାମିଲ ହେବା ସହ ନୂଆ ନୂଆ ଟେକ୍ନୋଲୋଜି ବାହାର କରିପାରିବେ ବୋଲି ଆଶା କରିଛନ୍ତି ।

ଭୁବନେଶ୍ୱର ଘାଟିକିଆରେ ଶହେ ଏକରରେ ଚାଲିଛି ସିଇଟି କଲେଜ । ବର୍ତ୍ତମାନ ୪ହଜାର ୨୬୨ ଜଣ ଛାତ୍ରଛାତ୍ରୀ ପଢୁଛନ୍ତି । ୟୁଜି ଏବଂ ପିଜିରେ ୧୧ଟି ବିଟେକ୍‌ ଏବଂ ୨୪ଟି ଏମ୍‌ଟେକ୍‌ ପାଠ୍ୟକ୍ରମରେ ଛାତ୍ରଛାତ୍ରୀ ଅଧ୍ୟନ କରୁଛନ୍ତି ।

ପୁରୀ: ନୂଆ ବର୍ଷଦିନ ବଡ଼ଦାଣ୍ଡରେ ସମସ୍ତ ଦୋକାନ ବନ୍ଦ ରହିବ । ଭକ୍ତଙ୍କ ସୁବିଧାକୁ ଆଖି ଆଗରେ ରଖି ନିଷ୍ପତ୍ତି ନିଆଯାଇଛି । ନୂଆ ବର୍ଷ ଓ ବଡ଼ ଦିନରେ ପ୍ରବଳ ଭକ୍ତଙ୍କ ସମାଗମ ହୋଇଥିବାରୁ ଏମିତି ଏକ ପଦକ୍ଷେପ ନେଇଛି ପ୍ରଶାସନ । ଭକ୍ତ କିଭଳି ସୁବିଧାରେ ଦର୍ଶନ କରି ଫେରିବେ ସେନେଇ ମଧ୍ୟ ଧ୍ୟାନ ଦେଇଛି ପ୍ରଶାସନ । ଭକ୍ତ ସିଂହଦ୍ୱାର ଦେଇ ପ୍ରବେଶ କରି ଅନ୍ୟ ତିନିଦ୍ଵାର ଦେଇ ପ୍ରସ୍ଥାନ କରିବେ । ମହାପ୍ରଭୁଙ୍କ ନୀତି ଶୃଙ୍ଖଳିତ କରିବା ଲାଗି ଭୋରୁ ଶ୍ରୀମନ୍ଦିର ଦ୍ୱାର ଫିଟାଯାଇ ନୀତି ତ୍ୱରାନ୍ୱିତ କରାଯିବ । ଅନ୍ୟପଟେ  ଚାରିଚକିଆ ଯାନ ଓ ଅଟୋ ବନ୍ଦ କରାଯାଇଥିବା ବେଳେ ଭକ୍ତମାନଙ୍କ ପାଇଁ ସ୍ୱତନ୍ତ୍ର ପାଦଚଲା ରାସ୍ତା ନିର୍ମାଣ ହୋଇଛି । 

ବଡ଼ଦିନ ଓ ନୂଆବର୍ଷକୁ ନଜରରେ ରଖି ଜିଲ୍ଲା ଓ ପୋଲିସ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି  । ଟ୍ରାଫିକ ନିୟନ୍ତ୍ରଣ, ଭକ୍ତ ଓ ଶ୍ରଦ୍ଧାଳୁମାନେ କିଭଳି ଶୃଙ୍ଖଳିତ ଭାବରେ ଦର୍ଶନ କରିବେ ସେନେଇ ଜିଲ୍ଲା ପ୍ରଶାସନ ପ୍ରଥମ କରି ସ୍ୱତନ୍ତ୍ର ପଦକ୍ଷେପ ନେଇଛନ୍ତି ।

ପଦକ୍ଷେପ ଗୁଡ଼ିକ ହେଲା

ଶ୍ରୀମନ୍ଦିର ସମ୍ମୁଖରେ ଅଧିଗ୍ରହଣ କରାଯାଇଥିବା ସ୍ଥାନରେ ନୂତନ କରି ବ୍ୟାରିକେଡ ନିର୍ମାଣ ହୋଇଛି । ଭକ୍ତ ଓ ଶ୍ରଦ୍ଧାଳୁମାନେ ଏହି ବ୍ୟାରିକେଡ୍ ଦେଇ ସିଂହଦ୍ୱାରକୁ ପ୍ରବେଶ କରିବେ । ବ୍ୟାରିକେଡରେ ସ୍ୱତନ୍ତ୍ର ସିସିଟିଭି ସହ ଭିଡିଓଗ୍ରାଫି, ଡ଼ାକବାଜି ଯନ୍ତ୍ରର ବ୍ୟବସ୍ଥା କରାଯାଇଛି । ଭକ୍ତମାନଙ୍କ ଜୋତା,ଚପଲ ମୋବାଇଲ ଓ ଅନ୍ୟାନ୍ୟ ସାମଗ୍ରୀ ରଖିବା ପାଇଁ ମାଗଣା ଲକର ଓ ଜୋତା ଷ୍ଟାଣ୍ଡ ମଧ୍ୟ ଉପଲବ୍ଧ କରାଯାଇଛି । ଦୂରଦୂରାନ୍ତରୁ ଆସିଥିବା ଭକ୍ତ, ଶ୍ରଦ୍ଧାଳୁ ଓ ପର୍ଯ୍ୟଟକ ଶ୍ରୀକ୍ଷେତ୍ର ଓ ଶ୍ରୀମନ୍ଦିର ପ୍ରତି କିଭଳି ଭଲ ଅନୁଭୂତି ନେଇ ଫେରିବେ ସେନେଇ ବିଶେଷ ଭାବରେ ପ୍ରଶାସନ ବ୍ୟବସ୍ଥା କରିଥିବା ବେଳେ ପିଇଵା ପାଣି ଓ ଅନ୍ୟାନ୍ୟ ଆନୁସଙ୍ଗିକ ବ୍ୟବସ୍ଥା ମଧ୍ୟ କରିଛି ।

ନୂଆ ବର୍ଷ ଲାଗି ଟାଉନ ଥାନାର ଟ୍ରାଫିକ କଟକଣା

ବସ ଓ ଅନ୍ୟାନ୍ୟ ଚାରିଚକିଆ ଗାଡିକୁ ମାର୍କେଟ ଛକରୁ ରିଟର୍ଣ୍ଣ କରାଯିବ । ଟ୍ରାଫିକ ନିୟନ୍ତ୍ରଣ ପାଇଁ ମୁନିସିପାଲିଟି ମାର୍କେଟ,  ପୁରୁଣା ଜେଲ ଓ ଶ୍ରୀ ଜଗନ୍ନାଥ  ବଲ୍ଳଭରେ ପାର୍କିଂ ବନ୍ଦୋବସ୍ତ । ପାଦଚଲା ଭକ୍ତଙ୍କ ସଂଖ୍ୟା ଅଧିକ ହେତୁ ସେମାନେ କିଭଳି ଦର୍ଶନ ସୁରୁଖୁରୁରେ କରିପାରିବେ ସେନେଇ ମରିଚିକୋଟ ଛକ ଠାରୁ ବ୍ୟାରିକେଡ । ପ୍ରଶାସନର ଏଭଳି ବନ୍ଦୋବସ୍ତକୁ ଭକ୍ତଙ୍କ ମହଲରେ ସ୍ୱାଗତ କରାଯାଇଛି  ।

ବେଳେ ବେଳାଭୂମିରେ ମଧ୍ୟ ସୁରକ୍ଷା ବ୍ୟବସ୍ଥା କଡାକଡି:

ବାଲିରେ ୩ଟି ପୋଲିସ ଟେଣ୍ଟ୍ କରାଯିବା ସହ ସମୁଦ୍ରରେ ସୁରକ୍ଷିତ ସ୍ନାନ ପାଇଁ ଅଗ୍ନିଶମ ବିଭାଗ ଓ ୧୦୦ରୁ ଉର୍ଦ୍ଧ ଲାଇଫଗାର୍ଡ଼ ମୁତୟନ ରହିବେ ।