କଳାହାଣ୍ଡି: ରୋଗରେ ପଡ଼ି ମଲେ ବୋଲି ମୃତଦେହକୁ କେହି କାନ୍ଧରେ ନେଲେନି । ସାଇକେଲରେ ବୋହି ନେଇ ସଂସ୍କାର କଲେ ପରିବାର ଲୋକେ । କଳାହାଣ୍ଡି ଜିଲ୍ଲା ଧର୍ମଗଡ଼ ବ୍ଲକ୍ ବେହେରାଗୁଡ଼ା ଗାଁରେ ଏହି ଘଟଣା ଘଟିଛି । ୫୦ ବର୍ଷ ବୟସରେ ସୁବାସ ଦର୍ୱାନଙ୍କ ମୃତ୍ୟୁ ହୋଇଥିଲା । ସେ ଏକ ଦୁରାରୋଗ୍ୟ ବ୍ୟାଧିରେ ପ୍ରାଣ ହରାଇଥିଲେ ।
ଏହି କାରଣରୁ ତାଙ୍କ ମୃତଦେହକୁ କୋକେଇରେ କାନ୍ଧେଇ ଶ୍ମଶାନକୁ ନେବା ପାଇଁ କେହି ରାଜି ହୋଇ ନଥିଲେ । ସାଇକେଲ୍ରେ କୋକେଇ ଭଳି ତିଆରି କରି ମୃତଦେହକୁ ଶ୍ମଶାନକୁ ନେଇ ସଂସ୍କାର କରାଯାଇଛି ।
ଭୁବନେଶ୍ୱର: ସଡ଼କ ଦୁର୍ଘଟଣା ରୋକିବାକୁ ସରକାରଙ୍କ ପ୍ରୟାସ । ଏଣିକି ରାଜ୍ୟ ରାଜପଥ ଓ ଜାତୀୟ ରାଜପଥ ଜଗିବ ମୋବାଇଲ ଭ୍ୟାନ୍, ରାସ୍ତାରେ ରହିବେ ସ୍କ୍ୱାଡ୍ । ପ୍ରତି ୩୦ କିଲୋମିଟର ଅନ୍ତରରେ ମୋବାଇଲ୍ ଭ୍ୟାନ୍ ଓ ସ୍କ୍ୱାଡ୍ ରହିବେ । ନୂଆଦିଲ୍ଲୀରେ ଅନୁଷ୍ଠିତ ସଡ଼କ ସୁରକ୍ଷା ବୈଠକରେ ଯୋଗଦେଇ ଫେରିବା ପରେ ପରିବହନ ମନ୍ତ୍ରୀ ପଦ୍ମନାଭ ବେହେରା ଏନେଇ ସୂଚନା ଦେଇଛନ୍ତି ।
ଏଥିସହ ରାଜ୍ୟର ଦୁର୍ଘଟଣା ପ୍ରବଣ ରାସ୍ତାରେ ବ୍ଲାକ୍ ସ୍ପଟ ଚିହ୍ନଟ କାମ ଜାରି ରହିଛି । କେନ୍ଦ୍ରକୁ ପ୍ରସ୍ତାବ ଦେଇଛୁ । ଆର୍ଥିକ ସହାୟତା ମିଳିଲେ ଆମେ ରାଜପଥରେ ସ୍କ୍ୱାଡ୍ ମୁତୟନ କରିବୁ । ନୂଆ ମୋଟର ଯାନ ଆଇନରେ ମୋଟା ଫାଇନ୍ କୋହଳ ନେଇ ଆଲୋଚନା ହୋଇଛି । କେନ୍ଦ୍ର ସମ୍ମତି ପ୍ରଦାନ କଲେ ଜରିମାନା କମିବ । ବର୍ତ୍ତମାନ ସେ ନେଇ କିଛି ନିଷ୍ପତ୍ତି ହୋଇନାହିଁ ।
ରାଜ୍ୟ ସରକାର ଗାଡ଼ି କାଗଜପତ୍ର ଓ ଡ୍ରାଇଭିଂ ଲାଇସେନ୍ସ ପାଇଁ ଦେଇଥିବା ସମୟସୀମାକୁ ଆଉ କୋହଳ କରାଯିବ ନାହିଁ । ୩ ମାସ କଣ୍ଟ ପୂରିଲେ ନୂଆ ମୋଟର ଯାନ ଆଇନ୍ ଅନୁଯାୟୀ ଜରିମାନା ଆଦାୟ ହେବ । ବାଇକ୍ ଚାଳକ ଓ ପଛରେ ବସିଥିବା ବ୍ୟକ୍ତି ହେଲମେଟ ପିନ୍ଧିବାକୁ ବାଧ୍ୟ । ପିଲିଅନ୍ ହେଲମେଟ ପିନ୍ଧିବା କଡ଼ାକଡ଼ି କରାଯିବ ବୋଲି ସୂଚନା ଦେଇଛନ୍ତି ପରିବହନ ମନ୍ତ୍ରୀ ପଦ୍ମନାଭ ବେହେରା ।
ଜାତୀୟ ରାଜପଥ ଉପରେ ଟ୍ରାଫିକ୍ ଆଖି, ନିୟମ ଉଲ୍ଲଂଘନକାରୀଙ୍କୁ ତ୍ରାହି ନାହିଁ
ବଲାଙ୍ଗିର: ବଲାଙ୍ଗିରରେ ୪୪ଜଣ ଦାଦନ ଶ୍ରମିକ ଉଦ୍ଧାର କରାଯାଇଛି । ଏମାନଙ୍କୁ ରାଜ୍ୟ ବାହାରକୁ ପଠାଇବା ପାଇଁ ବଲାଙ୍ଗିର ଜିଲ୍ଲା କଣ୍ଟାବାଞ୍ଜି ଥାନା କୁର୍ଲା ଗାଁ ପାଖରେ ଜଣେ ଦଲାଲ ଲୁଚାଇ ରଖିଥିଲା । ଖବର ପାଇ ପୋଲିସ ଏମାନଙ୍କୁ ଉଦ୍ଧାର କରିଛି ।
ଉଦ୍ଧାର ୪୪ଜଣ ଶ୍ରମିକଙ୍କ ମଧ୍ୟରେ ୧୧ ଜଣ ଶିଶୁ, ୧୨ଜଣ ମହିଳା ଓ ୨୧ଜଣ ପୁରୁଷ ଥିବା ଜଣାପଡ଼ିଛି । ଏହି ଶ୍ରମିକମାନଙ୍କ ଘର କଣ୍ଟାବାଞ୍ଜି ଅଞ୍ଚଳରେ । ବର୍ତ୍ତମାନ ସେମାନଙ୍କୁ ଆଶ୍ରୟ ଗୃହରେ ରଖାଯାଇଛି । ଦାଦନ ଦଲାଲ ମୁକେଶ ସରାଫ୍ ଫେରାର ହୋଇଯାଇଛି । ତାକୁ ଧରିବା ପାଇଁ ଉଦ୍ୟମ ଜାରି ରଖିଛି ପୋଲିସ । ଶ୍ରମ ବିଭାଗ ଅଧିକାରୀ ପହଞ୍ଚିବା ପରେ ତଦନ୍ତ ତ୍ୱରାନ୍ୱିତ ହେବ ବୋଲି କଣ୍ଟାବାଞ୍ଜି ଥାନା ଅଧିକାରୀ ବିଜୟ କରକରା କହିଛନ୍ତି ।
ଭୁବନେଶ୍ୱର: ପରୀକ୍ଷାକୁ ନେଇ ବିଜେବି ଜୁନିଅର କଲେଜରେ ଉତ୍ତେଜନା । +୨ ପ୍ରଥମ ବର୍ଷ ପରୀକ୍ଷା ଘୁଞ୍ଚାଇବା ଦାବିରେ ଛାତ୍ର ବିକ୍ଷୋଭ ପ୍ରଦର୍ଶନ କରିଛନ୍ତି । ମେନ୍ ଗେଟରେ ଟାୟାର ଜାଳି ପ୍ରତିବାଦ କରିଛନ୍ତି । ପୂର୍ବରୁ ମାର୍ଚ୍ଚ ମାସରେ ଯୁକ୍ତ ୨ ପ୍ରଥମ ବର୍ଷ ପରୀକ୍ଷା ହେଉଥିଲା ।
ଚଳିତବର୍ଷ ଏହି ପରୀକ୍ଷା ଫେବ୍ରୁଆରୀ ମାସରେ ହେବ । ଯାହାକୁ କମର୍ସ ଛାତ୍ରଛାତ୍ରୀ ବିରୋଧ କରୁଛନ୍ତି । ଏଥିସହ +୨ ପ୍ରଥମ ବର୍ଷରେ ମନ୍ତ୍ରୀ ଘୋଷଣା କରିଥିବା କାଉନସିଲ୍ ପରୀକ୍ଷାକୁ ବିରୋଧ କରାଯାଇଛି । ପୂର୍ବଭଳି ମାର୍ଚ୍ଚ ମାସରେ ପରୀକ୍ଷା ପାଇଁ ଦାବି ହୋଇଛି ।
ଛାତ୍ର ଟାୟାର ଜାଳି ରାସ୍ତାରୋକ କରିଥିଲେ । ପୋଲିସ ଓ କଲେଜ କର୍ତ୍ତୃପକ୍ଷଙ୍କ ହସ୍ତକ୍ଷେପ ପରେ ଛାତ୍ରଛାତ୍ରୀ ଧାରଣରୁ ଉଠିଛନ୍ତି ।
ଭୁବନେଶ୍ୱର: ବିଜେବି କଲେଜରେ ଉତ୍ତେଜନା । +୨ ପରୀକ୍ଷା ତାରିଖ ଘୁଞ୍ଚାଇବାକୁ ଦାବି । ଟାୟାର ଜାଳି ରାସ୍ତା ରୋକ କରିଛନ୍ତି ଛାତ୍ରଛାତ୍ରୀ, ପୋଲିସ ମୁତୟନ । ପୂର୍ବରୁ ମାର୍ଚ୍ଚ ମାସରେ ପରୀକ୍ଷା ହେଉଥିବା ବେଳେ ଚଳିତର୍ଷ ଫେବ୍ରୁଆରୀରେ ହେଉଥିବାରୁ ବିରୋଧ ।
ଚନ୍ଦ୍ରଭାଗା : ବେଳାଭୂମି ବୁଲିଲେ, କହିଲେ ବିକାଶର କଥା କହିଲେ । ଆଇଏଏସ ସମ୍ମିଳନୀର ଦ୍ବିତୀୟ ଦିନରେ ଆଜି ସକାଳୁ ଚନ୍ଦ୍ରଭାଗା ବେଳାଭୂମିରେ ମର୍ଣ୍ଣି ଓ୍ବାକ୍ କରିଛନ୍ତି ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ସହ ଅନ୍ୟ ବରିଷ୍ଠ ପ୍ରଶାସନିକ ଅଧିକାରୀ ।
ଇକୋ ରିଟ୍ରିଟ୍ଠାରୁ ଚନ୍ଦ୍ରଭାଗା ପର୍ଯ୍ୟନ୍ତ ବେଳାଭୂମିରେ ମର୍ଣ୍ଣି ଓ୍ବାକ୍ କରିଛନ୍ତି ଅଧିକାରୀ । ଚନ୍ଦ୍ରଭାଗାରେ ମୁଖ୍ୟ ଶାସନ ସଚିବ ଓ ଅନ୍ୟ ପଦାଧି କାରୀମାନେ ଚନ୍ଦ୍ରଭାଗା ଓ କୋଣାର୍କର ବିଭିନ୍ନ ସମସ୍ୟା ସଂପର୍କରେ ଆଲୋଚନା କରିଛନ୍ତି। ବେଳାଭୂମିର ସ୍ବଚ୍ଛତା ଉପରେ ବିଶେଷ ଗୁରୁତ୍ବ ଦିଆଯାଇଛି।
ଚନ୍ଦ୍ରଭାଗାର ବିକାଶ ପାଇଁ ଖୁବ୍ ଶୀଘ୍ର ନୂଆ ଯୋଜନା ଆରମ୍ଭ କରାଯିବ ବୋଲି ପୁରୀ ଜିଲ୍ଲାପାଳ କହିଛନ୍ତି। ଗତକାଲିଠାରୁ ବରିଷ୍ଠ ଆଇଏଏସ ଅଧିକାରୀ ସମ୍ମିଳନୀ ଆରମ୍ଭ ହୋଇଛି। କାଲି ସାରା ଦିନ ବିକାଶ ନେଇ ମାନସ ମନ୍ଥନ ପରେ କୋଣାର୍କରେ ପହଞ୍ଚିଲେ ଆଇଏଏସ ସମ୍ମିଳନୀରେ ଯୋଗଦେଇଥିବା ଅଧିକାରୀ । ପୁରୀ ବେଲମାର୍ଗଠାରେ ଚାଲିଥିବା ମେରାଇନ୍ ଡ୍ରାଇଭ୍ ଇକୋ ରିଟ୍ରିଟ୍ରେ ରାତ୍ରୀଯାପନ କରିବା ପରେ ଆଜି ସକାଳୁ ବେଳାଭୂମିରେ ମର୍ଣ୍ଣି ଓ୍ବାକ୍ କରିଥିଲେ ଅଧିକାରୀ । କିଛିଦିନ ତଳେ ୫-ଟି ସଚିବ ଓ ପୂର୍ତ୍ତ ସଚିବ ବେଳାଭୂମି ଗସ୍ତ କରିଥିଲେ ।
ଭୁବନେଶ୍ୱର: କେମିତି ହେଲା ଲୋକମାନ୍ୟ ତିଲକ ଏକ୍ସପ୍ରେସ ଲାଇନ୍ଚ୍ୟୁତ ? ସେ ନେଇ ଆଜିଠୁ ଆରମ୍ଭ ହେବ ତଦନ୍ତ । କୋଲକାତା ରେଳ ନିରାପତ୍ତା କମିଶନର ଘଟଣାର ତଦନ୍ତ କରିବେ । ଗତ ଗୁରୁବାର ଦିନ ମୁମ୍ବାଇରୁ ଭୁବନେଶ୍ୱର ଆସୁଥିବା ଲୋକମାନ୍ୟ ତିଲକ ଏକ୍ସପ୍ରେସ ନିର୍ଗୁଣ୍ଡି- ଶାଳଗାଁ ଷ୍ଟେସନ୍ ମଝିରେ ମାଲବାହୀ ଟ୍ରେନ୍କୁ ଧକ୍କା ଦେଇଥିଲା । ଫଳରେ ଏକ୍ସପ୍ରେସ ଟ୍ରେନ୍ର ୮ଟି ବଗି ଲାଇନ୍ଚ୍ୟୁତ ହୋଇଥିଲା ।
ରେଲୱେ ସାଉଥ୍ ଇଷ୍ଟର୍ଣ୍ଣ ସର୍କଲ କୋଲକାତାର ସେଫ୍ଟି କମିଶନର ଅଭୟ ରାୟ ଦୁର୍ଘଟଣାର ତଦନ୍ତ କରିବେ । ଦୁର୍ଘଟଣା ସଂପର୍କରେ କିଛି ଜାଣିଥିବା ଓ ପ୍ରମାଣ ପାଇଥିବା ବ୍ୟକ୍ତି, ତାହା ଅବଗତ କରିବା ପାଇଁ ସୂଚନା ଦିଆଯାଇଛି ।
ଭୁବନେଶ୍ୱର: ପ୍ରତିମା ପ୍ରଡକ୍ସନର ପ୍ରଥମ ଅବଦାନ ଗାଁର ନାଁ ଗାଲୁଆପୁର, ଚଳଚ୍ଚିତ୍ରର ଶୁଭ ମହୁରତ ଅନୁଷ୍ଠିତ ହୋଇଯାଇଛି । ହୀରାପୁରସ୍ଥିତ ଚଉଷଠି ଯୋଗିନି ମନ୍ଦିର ପରିସରେ ଅନୁଷ୍ଠିତ ହୋଇଛି । ଏହି ଉତ୍ସବରେ ବରିଷ୍ଠ ଅଭିନେତା ଯୋଗଦେଇଥିଲେ । ଶୁଭ ମହୁରତ ଉତ୍ସବ ସମ୍ପନ୍ନ ହେବା ପରେ ଫିଲ୍ମର ସୁଟିଂ ଆରମ୍ଭ ହୋଇଯାଇଛି ।
ଏହାସହ ନୟାଗଡ଼ରେ ଫିଲ୍ମର ଅନ୍ୟାନ୍ୟ ସୁଟିଁ କରାଯିବା ନେଇ ପ୍ରଯୋଜନା ସଂସ୍ଥା ପକ୍ଷରୁ କୁହାଯାଇଥିଲା । ତେବେ ଶୁଫ ମହୁରତ ସମୟରେ ଫିଲ୍ମର ମୁଖ୍ୟ ଅଭିନେତା ପପୁ ପମପମ୍, ନବାଗତା ଅଭିନେତ୍ରୀ ମନୀଷା ଧର ମହାପାତ୍ରଙ୍କ ସହିତ ରବି ମିଶ୍ର, ମନୀଷା ମିଶ୍ର, କୁନା ତ୍ରିପାଠୀ ରହିଛନ୍ତି । ସେହିପରି ନିର୍ଦ୍ଦେଶନା ଦାୟିତ୍ୱରେ ଅଛନ୍ତି ଜିତୁ ମହାପାତ୍ର ।
ଭୁବନେଶ୍ୱର: ଅର୍ବାନ ଡେଭେଲପମେଣ୍ଟର ଏକ ପାର୍ଲିଆମେଣ୍ଟାରୀ ଷ୍ଟାଣ୍ଡିଂ କମିଟି ପୁରୀ ଗସ୍ତରେ ଆସି ମହାପ୍ରଭୁଙ୍କୁ ଦର୍ଶନ କରିଛନ୍ତି । ଷ୍ଟାଣ୍ଡିଂ କମିଟି ଅଧ୍ୟକ୍ଷ ଜଗଦମ୍ବିକା ପାଲଙ୍କ ନେତୃତ୍ୱରେ ଆସିଥିବା ଏହି ଟିମ୍ ମଧ୍ୟରେ ଥିବା ଅନେକ ସାଂସଦଙ୍କ ସହ ଅନ୍ୟ ଅଫିସର ମାନେ ମଧ୍ୟ ମହାପ୍ରଭୁଙ୍କୁ ଦର୍ଶନ କରି ଆଶିର୍ବାଦ ନେଇଛନ୍ତି । ଗତକାଲି ମଧ୍ୟପ୍ରଦେଶ ସାଂସଦ ତଥା ପୂର୍ବତନ ମୁଖ୍ୟମନ୍ତ୍ରୀ ଦିଗବିଜୟ ସିଂ ମଧ୍ୟ ମହାପ୍ରଭୁଙ୍କୁ ଦର୍ଶନ କରି ଆଶିର୍ବାଦ ଭିକ୍ଷା କରିଥିଲେ ।
ତେବେ ଏହି ପାର୍ଲିଆମେଣ୍ଟାରୀ ଷ୍ଟାଣ୍ଡିଂ କମିଟି ତିନିଦିନିଆ ଗସ୍ତରେ ଆସି ଗତକାଲି ସଂନ୍ଧ୍ୟାରେ ପୁରୀରେ ପହଞ୍ଚି ଥିଲେ । ଆଜି ମହାପ୍ରଭୁଙ୍କୁ ଦର୍ଶନ କରିବା ପରେ ପୁରୀ ମେଫେୟାର ହୋଟେଲ ପରିସରରେ ସଲିଡ ୱେଷ୍ଟମେନେଜମେଣ୍ଟ, ୱାଟର ସପ୍ଲାଏ, ସାନିଟେସନ, ପ୍ରଧାନମନ୍ତ୍ରୀ ଆବାସ ଯୋଜନା ଏବଂ ଅନ୍ୟାନ୍ୟ କେନ୍ଦ୍ରୀୟ ଯୋଜନାର କାର୍ଯ୍ୟକାରିତା ଉପରେ ଏକ ଗୁରୁତ୍ୱପୂର୍ଣ୍ଣ ବୈଠକର ଯୋଜନା ରହିଛି । ଏହାସହ ୧୯ ତାରିଖ ସକାଳେ ପୁରୀ ଛାଡିବାର କାର୍ଯ୍ୟକ୍ରମ ରହିଥିବା ଜଣାପଡିଛି ।
ଭୁବନେଶ୍ୱର: ପ୍ରକାଶ ପାଇଲା ଜେଇଇ ମେନ୍ ପରୀକ୍ଷା ଫଳ। ସୌରଭ ସୌମ୍ୟକାନ୍ତ ଦାସ ୯୯.୯୯ ସ୍କୋର କରିବା ସହ ଓଡ଼ିଶା ଟପ୍ପର ହୋଇଛନ୍ତି । ସର୍ବଭାରତୀୟ ସ୍ତରରେ ମୋଟ ୯ଜଣ ପରୀକ୍ଷାର୍ଥୀ ୧୦୦ ପ୍ରତିଶତ ସ୍କୋର କରିଛନ୍ତି ।
ସେମାନଙ୍କ ମଧ୍ୟରୁ ଆନ୍ଧ୍ରପ୍ରଦେଶ, ରାଜସ୍ଥାନ ଓ ତେଲେଙ୍ଗାନାର ୨ଜଣ ଲେଖାଏଁ ପରୀକ୍ଷାର୍ଥୀ ରହିଥିବା ବେଳେ ଗୁଜରାଟ ଓ ଦିଲ୍ଲୀର ଜଣେ ଲେଖାଏଁ ପରୀକ୍ଷାର୍ଥୀ ସଫଳତା ହାସଲ କରିଛନ୍ତି। ଗତ ୭ ଓ ୯ ତାରିଖରେ ଜେଇଇ ମେନ୍ ପରୀକ୍ଷା ହୋଇଥିଲା। ୫୭୦ ପରୀକ୍ଷା କେନ୍ଦ୍ରରେ ମୋଟ୍ ୮ଲକ୍ଷ ୬୯ହଜାର ୧୦ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲେ।
