କରୋନା ସଙ୍କଟ ଓ ଲକଡାଉନ୍କୁ ନେଇ ବିଭିନ୍ନ ରାଜ୍ୟର ସ୍ୱାସ୍ଥ୍ୟମନ୍ତ୍ରୀ ମାନେ ଏକାଠି ହୋଇ ଆଲୋଚନା ଆରମ୍ଭ କରିଛନ୍ତି । ଲକ୍ ଡାଉନ୍ ମେ’ ୩ ରେ ଶେଷ ହେବାକୁ ଯାଉଛି । ତେବେ ଏହା ପରେ କେନ୍ଦ୍ର ସରକାର ଓ ରାଜ୍ୟ ସରକାରଙ୍କର କ’ଣ ପଦକ୍ଷେପ ରହିବ ବୋଲି ମନ୍ତ୍ରୀମାନେ ଆଲୋଚନା କରିଛନ୍ତି । ଏହି ପ୍ରଥମ ଅଧିବେଶନରେ ରାଜସ୍ଥାନ ସ୍ୱାସ୍ଥ୍ୟମନ୍ତ୍ରୀ ଡ.ରଘୁ ଶର୍ମା, ଛତିଶଗଡ ସ୍ୱାସ୍ଥ୍ୟମନ୍ତ୍ରୀ ଟି.ଏସ୍ ସିଂ ଦେବ, ବିହାର କ୍ୟାବିନେଟ୍ ମନ୍ତ୍ରୀ ସଞ୍ଜୟ ଝା, ଦିଲ୍ଲୀ ସ୍ୱାସ୍ଥ୍ୟମନ୍ତ୍ରୀ ସତୀନ୍ଦର ଜୈନ୍ ଏବଂ ମହାରାଷ୍ଟ୍ର ସ୍ୱାସ୍ଥ୍ୟମନ୍ତ୍ରୀ ରାଜେଶ ଟୋପେ ଯୋଗ ଦେଇଥିଲେ । ସେମାନେ କରୋନା ସଙ୍କଟ ବିଷୟରେ ଆଲୋଚନା କରିଥିବାବେଳେ ଏହାର ଆଗାମୀ ପନ୍ଥା କ’ଣ ରହିବ ସେନେଇ ମଧ୍ୟ ଆଲୋଚନା କରିଛନ୍ତି ।
ରାଜସ୍ଥାନ ସ୍ୱାସ୍ଥ୍ୟମନ୍ତ୍ରୀ ରଘୁ ଶର୍ମାଙ୍କ କହିବାନୁଯାୟୀ, ମାର୍ଚ୍ଚ ୨୨ ରୁ ଲକ୍ଡାଉନ୍ ତାଙ୍କ ରାଜ୍ୟରେ ଆରମ୍ଭ ହୋଇଥିବା ବେଳେ କେନ୍ଦ୍ର ସରକାର ୨୪ ତାରିଖରୁ ଆରମ୍ଭ କରିଥିଲେ । ଆସନ୍ତା ମେ ୩ ସୁଦ୍ଧା ଏହି ଲକ୍ଡାଉନ୍ ୪୦ ଦିନ ଟପିବ । ଯଦି ଲକଡାଉନ୍ କରୋନାର ସମାଧାନ, ତେବେ ଆମକୁ ବହୁତ ଗମ୍ଭୀର ଭାବରେ ଚିନ୍ତା କରିବାକୁ ପଡ଼ିବ ବୋଲି ରଘୁ ଶର୍ମା କହିଛନ୍ତି । ସେ ଆହୁରି କହିଛନ୍ତି ଲକଡାଉନ୍ ସମୟରେ ଲୋକଙ୍କ କ’ଣ ଅସୁବିଧା ହେଉଛି ତାହା ବୁଝିବାକୁ ପଡ଼ିବ । ଏହା ସହ ଲକ୍ଡାଉନ୍ ସମୟରେ ମୌଳିକ ସ୍ୱାସ୍ଥ୍ୟସେବାର ସୁବିଧା ବୃଦ୍ଧି କରାଯିବା ଉଚିତ୍ ବୋଲି ସେ କହିଛନ୍ତି ।
ସେହିଭଳି ବିହାର ସରକାରଙ୍କ ମନ୍ତ୍ରୀ ସଞ୍ଜୟ ଝା କହିଛନ୍ତି ତାଙ୍କ ରାଜ୍ୟରେ ଏବେ ସୁଦ୍ଧା ୧୫ ହଜାର ଲୋକଙ୍କ ପରୀକ୍ଷା ସରିଲାଣି । ପ୍ରତିଦିନ ୧୦୦୦ ସ୍ୱାବ୍ ଟେଷ୍ଟ କରାଯାଉଛି । ଏବେ ସୁଦ୍ଧା ୩.୭୫ କୋଟି ଲୋକଙ୍କର ଡୋର-ଟୁ-ଡୋର୍ ସ୍କ୍ରିନିଂ କରାଯାଇଛି । ବିହାରରେ ମଧ୍ୟ ୨୨ ମାର୍ଚ୍ଚଠାରୁ ଲକ୍ଡାଉନ୍ ଆରମ୍ଭ ହୋଇଥିଲା । ଲକ୍ଡାଉନ୍କୁ ଧିରେ ଧିରେ କୋହଳ କରିବା ଉଚିତ୍ ଏକା ସଙ୍ଗେ କୋହଳ କରିବା ଠିକ୍ ହେବ ନାହିଁ ବୋଲି କହିଛନ୍ତି ସଞ୍ଜୟ ଝା ।
ସେହିଭଳି ମହାରାଷ୍ଟ୍ର ସ୍ୱାସ୍ଥ୍ୟମନ୍ତ୍ରୀ ରାଜେଶ ଟୋପେ କହିଛନ୍ତି ଯେ ମହାରାଷ୍ଟ୍ରରେ ମାମଲା ଦ୍ୱିଗୁଣିତ ହୋଇଛି । ଏବେ ଏହା ସାଢ଼େ ସାତ ଦିନରେ ଦ୍ୱିଗୁଣିତ ହେଉଛି । ମୃତ୍ୟୁ ହାର ମଧ୍ୟ ୭ରୁ ଖସି ଆସି ୪ ପ୍ରତିଶତରେ ପହଞ୍ଚିଛି । ସେ କହିଛନ୍ତି ସବୁଠୁ ବଡ଼ ଅସୁବିଧା ହେଉଛି କ୍ଲଷ୍ଟରକୁ କିପରି ରୋକା ଯାଇପାରିବ । ଅନେକ ବସ୍ତିରେ ହୋମ୍ କ୍ୱାରେଣ୍ଟାଇନ୍ର କୗଣସି ଫାଇଦା ଦେଖାଯାଉନାହିଁ । ତେଣୁ ଲୋକଙ୍କୁ ବସ୍ତିରୁ ହଟାଯିବା ପରେ ସରକାରୀ ସ୍ଥାନକୁ ନିଆଯାଉଛି ।
ଏଥିସହ ଦିଲ୍ଲୀ ସ୍ୱାସ୍ଥ୍ୟମନ୍ତ୍ରୀ ସତୀନ୍ଦର ଜୈନ କହିଛନ୍ତି ଯେ ଲକଡାଉନ୍ ଅବଧି ଶେଷ ହେବାକୁ ଅନେକ ସମୟ ବାକି ରହିଛି । ତେଣୁ ଏବେଠାରୁ ଆମେ ଲକ୍ଡାଉନ୍ ପରବର୍ତ୍ତି ସ୍ଥିତି କଥା ଚିନ୍ତା କରିବା ଉଚିତ୍ ନୁହେଁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୨୭ ଏପ୍ରିଲରେ ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବେ । ତେଣୁ ମେ ୧ କିମ୍ବା ମେ ୨ ରେ ଲକଡାଉନ୍ ପରବର୍ତ୍ତି ଯୋଜନା ବିଷୟରେ ଆଲୋଚନା କରିବା ଉଚିତ ।
