ନନ୍ଦିଘୋଷ ବ୍ୟୁରୋ: ଧୀରେ ଧୀରେ କଡ଼ ଲେଉଟାଉଛି କରୋନା । ନାଁ ଶୁଣିଲେ ଲାଗୁଛି ଭୟ । ପୁଣି ଏସିଆ ମହାଦେଶରେ ବଢ଼ିଲାଣି ସଂକ୍ରମଣ । ପୁରୁଣା ଭୟ ଲୋକଙ୍କ ମନରୁ ହଟିନଥିବା ବେଳେ ପୁଣି ନିଜ କାୟା ବିସ୍ତାର କଲାଣି ଏହି ମହାମାରୀ । ଭାରତରେ କୋଭିଡ୍ ୧୯ ପଜିଟିଭ୍ ଲୋକଙ୍କ ସଂଖ୍ୟା ଏକ ହଜାର ଅତିକ୍ରମ କରିଛି । ବର୍ତ୍ତମାନ ରାଜଧାନୀ ଦିଲ୍ଲୀରେ ୯୯ଟି ସକ୍ରିୟ ମାମଲା ଅଛି । ଦିଲ୍ଲୀ, ମହାରାଷ୍ଟ୍ର ଏବଂ କେରଳ ସମେତ ଅନେକ ରାଜ୍ୟରେ ନୂତନ ମାମଲା ପଞ୍ଜୀକୃତ ହୋଇଛି । ଏନେଇ ଭାରତୀୟ ଚିକିତ୍ସା ଗବେଷଣା ପରିଷଦ (ICMR) କହିଛି ଯେ ବର୍ତ୍ତମାନ ଭୟଭୀତ ହେବାର କୌଣସି ଆବଶ୍ୟକତା ନାହିଁ । ଭାରତରେ କୋଭିଡ୍-୧୯ ବୃଦ୍ଧିର କାରଣ ଏହି ନୂତନ ଭାରିଆଣ୍ଟ ବୋଲି ବିଶ୍ୱାସ କରାଯାଉଛି । ସ୍ୱାସ୍ଥ୍ୟ ମନ୍ତ୍ରଣାଳୟ ଅନୁଯାୟୀ NB। 1.8.1 ଏବଂ LF.7, JN.1 ପ୍ରକାରର ଭାରିଆଣ୍ଟ ଯୋଗୁଁ ମାମଲା ବୃଦ୍ଧି ପାଉଛି । ଆମେରିକାରେ ମଧ୍ୟ ନୂତନ ପ୍ରକାରର ମାମଲା ଦେଖିବାକୁ ମିଳିଛି । ପୂର୍ବରୁ ଏହା ଚୀନରେ ଦେଖିବାକୁ ମିଳିଥିବା ବେଳେ ଏବେ ଏହା ଏସିଆର ଅନ୍ୟ ଦେଶଗୁଡ଼ିକୁ ମଧ୍ୟ ବ୍ୟାପିବା ଆରମ୍ଭ କରିଛି ।
ବଢ଼ୁଥିବା କରୋନା ମାମଲା ଉପରେ ICMRଙ୍କ ସୂଚନା
ICMR ନିର୍ଦ୍ଦେଶକ ଜେନେରାଲ ଡକ୍ଟର ରାଜୀବ ବହଲ କହିଛନ୍ତି ଯେ ଏପର୍ଯ୍ୟନ୍ତ ମିଳିଥିବା ମାମଲାଗୁଡ଼ିକ ବହୁତ ଗମ୍ଭୀର ନୁହେଁ। ସେ କହିଛନ୍ତି, “ଭାରତରେ କୋଭିଡ୍ -୧୯ ସଂକ୍ରମଣ ବୃଦ୍ଧି ପାଉଛି, କିନ୍ତୁ ଏହା ଗମ୍ଭୀର ନୁହେଁ ତେଣୁ ଚିନ୍ତା କରିବାର କିଛି ଆବଶ୍ୟକତା ନାହିଁ । ଆମେ ଏହା ଉପରେ କଡ଼ା ନଜର ରଖିଛୁ,” ସେ କହିଛନ୍ତି, ସରକାର ନିରନ୍ତର ଭାବରେ ମାମଲାଗୁଡ଼ିକ ଉପରେ ନଜର ରଖୁଛନ୍ତି ।
କରୋନା ଭାଇରସ ଯୋଗୁଁ ମୃତ୍ୟୁ
ସ୍ୱାସ୍ଥ୍ୟ ମନ୍ତ୍ରଣାଳୟର ସରକାରୀ ୱେବସାଇଟ୍ ଅନୁଯାୟୀ ମହାରାଷ୍ଟ୍ରରେ କୋଭିଡ୍ -୧୯ ଯୋଗୁଁ ୩ ଜଣଙ୍କର ମୃତ୍ୟୁ ହୋଇଛି । ଯେତେବେଳେ କି କେରଳରେ ଜଣଙ୍କର, କର୍ଣ୍ଣାଟକରେ ଜଣେ ବ୍ୟକ୍ତିଙ୍କର ଏବଂ ରାଜସ୍ଥାନର ଜୟପୁରରେ ମଧ୍ୟ ଜଣେ ବ୍ୟକ୍ତି ପ୍ରାଣ ହରାଇଛନ୍ତି ।
ଦେଶରେ ଏକ ହଜାରରୁ ଅଧିକ ନୂତନ ମାମଲା ପଞ୍ଜିକୃତ ହୋଇଛି।
ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ଦ୍ୱାରା ପ୍ରକାଶିତ ନୂତନ ତଥ୍ୟ ଅନୁଯାୟୀ, ଭାରତରେ କୋଭିଡ୍ର ୧୦୦୯ ମାମଲା ରହିଛି, ଯେଉଁଥିରୁ କେରଳ (୪୩୦), ମହାରାଷ୍ଟ୍ର (୨୦୯) ଏବଂ ଦିଲ୍ଲୀ (୧୦୪) ମାମଲା ରିପୋର୍ଟ ହୋଇଛି ।
କୋଭିଡ୍ ସମ୍ପର୍କରେ ଦିଲ୍ଲୀ ସରକାର ପରାମର୍ଶ ଜାରି
ଦିଲ୍ଲୀ ସରକାର କୋଭିଡ୍-୧୯ ସମ୍ପର୍କରେ ଏକ ପରାମର୍ଶ ଜାରି କରିଥିଲେ, ଯେଉଁଥିରେ ରାଜଧାନୀର ହସ୍ପିଟାଲଗୁଡ଼ିକୁ ଶଯ୍ୟା, ଅକ୍ସିଜେନ, ଔଷଧ ଏବଂ ଟୀକାର ଉପଲବ୍ଧତା ସୁନିଶ୍ଚିତ କରିବାକୁ କୁହାଯାଇଥିଲା। “ହସ୍ପିଟାଲଗୁଡ଼ିକ ଶଯ୍ୟା, ଅକ୍ସିଜେନ, ଆଣ୍ଟିବାୟୋଟିକ୍ସ, ଅନ୍ୟାନ୍ୟ ଔଷଧ ଏବଂ ଟୀକାର ଉପଲବ୍ଧତା ଏବଂ ପ୍ରସ୍ତୁତି ନିଶ୍ଚିତ କରିବା ଉଚିତ। ଭେଣ୍ଟିଲେଟର, ବାଇ-ପିଏପି, ଅକ୍ସିଜେନ କନସେଣ୍ଟରେଟର ଏବଂ ପିଏସଏ ଭଳି ସମସ୍ତ ଉପକରଣ କାର୍ଯ୍ୟକ୍ଷମ ଅବସ୍ଥାରେ ରହିବା ଉଚିତ,” ।
