ନନ୍ଦିଘୋଷ ବ୍ୟୁରୋ: ଆଜି ବିଜେଡିର ରାଇଘର ବନ୍ଦ ଡ଼ାକରା । ରାଜ୍ୟ ସରକାର ବିରୋଧରେ ୧୨ ଘଣ୍ଟିଆ ବନ୍ଦ ପାଳନ ସହ ଆନ୍ଦୋଳନ ତୀବ୍ରତର ପାଇଁ ସରକାରଙ୍କୁ ଚେତାବନୀ ଦେଇଛି ବିଜେଡି। ଆନ୍ଦୋଳନ ବେଳେ ଅତ୍ୟାବଶ୍ୟକ ସେବା ଆମ୍ବୁଲାନ୍ସ ଓ ଅଗ୍ନିଶମ ବାହିନୀର ଗାଡି ଓ ଔଷଧ ଦୋକାନକୁ ଛାଡି ସମସ୍ତ ଦୋକାନ ବଜାର ବନ୍ଦ ପାଇଁ ବିଜେଡି ପକ୍ଷରୁ ଲୋକଙ୍କୁ ଅପିଲ କରାଯାଇଛି। ରାଇଘର ଅଂଚଳର ୩୪୪ ଜଣ ଚାଷୀ ସରକାରୀ ନିୟମ ଅନୁସାରେ ରେଜିଷ୍ଟ୍ରେସନ ପରେ ଧାନ ଚାଷ କଲେ।୧୫ ଫେବୃଆରୀରୁ ଧାନ ବିକିବା ପାଇଁ ମେସେଜ ଆସିଲା। ମଣ୍ଡିରେ ଧାନ ଦେଇ ରସିଦ ପାଇଲେ, କିନ୍ତୁ ଆଜି ପର୍ଯ୍ୟନ୍ତ ଧାନ ବିକ୍ରି ଟଙ୍କା ପାଇଲେ ନାହିଁ। ସରକାରୀ ନିୟମ ଅନୁସାରେ ୨୪ ଘଣ୍ଟାରୁ ୪୮ ଘଣ୍ଟା ଭିତରେ ଚାଷୀଙ୍କୁ ଧାନ ବିକ୍ରିର ଟଙ୍କା ମିଳିବା କଥା।୨୩ ଏପ୍ରିଲରେ ସରକାରୀ ଅଧିକାରୀ ଚାଷୀଙ୍କ ସହ ଆଲୋଚନା ପରେ ବି ଚାଷୀ ଟଙ୍କା ପାଇଲେ ନାହିଁ। କିଛି ମିଲ୍ ମାନଙ୍କୁ ଟାର୍ଗେଟ ଦିଆ ଯାଇନାହିଁ ତେଣୁ ଚାଷୀ ଟଙ୍କା ପାଇ ପାରୁ ନାହାନ୍ତି। ଚାଷୀଙ୍କ ଭୁଲ୍ ରହିଲା କେଉଁଠି ବୋଲି ବିଜେଡି ପ୍ରଶ୍ନ କରିଛି। ବିଜେପିର ଚାଷୀ ମାରଣ ନୀତି ବିରୋଧରେ ଆନ୍ଦୋଳନ ତୀବ୍ରତର ହେବ। ଆଜି ରାଇଘରରେ ପାଳନ ହେବ କଳାଦିବସ। ଚାଷୀଙ୍କର ସାଢ଼େ ଚାରିକୋଟି ଟଙ୍କା ଏଯାଏଁ ମିଳିନାହିଁ। ୬ ଦିନ ହେଲା ଭୁବନେଶ୍ୱରରେ ଚାଷୀ ଆନ୍ଦୋଳନ କରୁଛନ୍ତି। କିନ୍ତୁ ମୁଖ୍ୟମନ୍ତ୍ରୀ ଏ ବିଷୟ ନବୁଝିବା ଦୁର୍ଭାଗ୍ୟଜନକ ବୋଲି କହିଛି ବିଜେଡି।
ହନିମୁନ ମର୍ଡର ମିଷ୍ଟ୍ରି, ଆଜିଠୁ ୮ ଦିନିଆ ରିମାଣ୍ଡରେ ଯିବେ ୫ ଅଭିଯୁକ୍ତ
ନନ୍ଦିଘୋଷ ବ୍ୟୁରୋ: ଖୋଲିବ ହାଇପ୍ରୋଫାଇଲ ମର୍ଡରର ଗୁମର। ରାଜା ରଘୁବଂଶୀ ହତ୍ୟା ଘଟଣାରେ ଆଜିଠାରୁ ୮ ଦିନିଆ ରିମାଣ୍ଡରେ ନେଇ ୫ ଅଭିଯୁକ୍ତଙ୍କୁ ମାରାଥନ ଜେରା କରିବା ମେଘାଳୟ ଏସଆଇଟି। ତେଣେ ମେଘାଳୟରେ ରହଣୀ କାଳରେ ସୋନମ ଛାଡ଼ିଯାଇଥିବା ଏକ ମଙ୍ଗଳସୂତ୍ର ଓ ଏକ ମୁଦି ପୋଲିସ ଜବତ କରିବା ପରେ ଘଟଣାର ଖିଅ ଧରିପାରିଥିଲା ପୋଲିସ। ଜଣେ ନବବିବାହିତା କାହିଁକି ମଙ୍ଗଳସୂତ୍ର ଛାଡି ଚାଲିଯିବେ ବୋଲି ପୋଲିସର ସନ୍ଦେହ ଘନୀଭୂତ ହୋଇଥିଲା। ଗତକାଲି ହତ୍ୟା ଷଡ଼ଯନ୍ତ୍ରରେ ସାମିଲ ଥିବା ନେଇ ମାନିଥିଲା ପତ୍ନୀ ସୋନମ।
ସିସିଟିଭି ଫୁଟେଜ, କଲ ରେକର୍ଡ ଆଦି ପ୍ରମାଣ ମିଳିବା ପରେ ଜେରା ବେଳେ ଭାଙ୍ଗି ପଡିଥିଲା ସୋନମ। ଅନ୍ଯ ୪ ଅଭିଯୁକ୍ତ ରାଜ ଖୁସୱାହା, ଆନନ୍ଦ କୁର୍ମୀ, ଆକାଶ ରାଜପୁତ, ବିଶାଲ ସିଂ ଚୌହାନଙ୍କୁ ବି ଆଜିଠାରୁ ହେବ ମାରାଥନ ଜେରା। ଖୁବ ଶୀଘ୍ର ସମସ୍ତଙ୍କୁ ନେଇ କରାଯାଇପାରେ ସିନ ରିକ୍ରିଏସନ। ହତ୍ଯା ଘଟଣାରେ ଏହି ୫ ଅଭିଯୁକ୍ତ ନା ଅନ୍ୟ କେହି ଅଛନ୍ତି ତାହାର ଖୋଳତାଡ଼ କରିବ ଏସଆଇଟି। ଗତକାଲି ରାଜା ରଘୁବଂଶୀଙ୍କ ଘରକୁ ଯାଇ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଥିଲେ ସୋନମର ଭାଇ ଗୋବିନ୍ଦ। ଏପରିକି ଏହି ହତ୍ୟା ଲାଗି ରାଜାଙ୍କ ପରିବାର ନିକଟରେ ସେ କ୍ଷମା ମାଗିଥିଲେ। ସୋନମ ଯଦି ଦୋଷୀ ତେବେ ତାକୁ ଫାଶୀ ଦିଆଯାଉ କହିଥିଲେ ଗୋବିନ୍ଦ। ଗତ ମେ ୧୧ ତାରିଖରେ ନୂଆ ସଂସାର ଗଢିଥିଲେ ରାଜା ଓ ସୋନମ। ହନିମୁନରେ ଦୁହେଁ ଯାଇଥିଲେ ମେଘାଳୟ। ହେଲେ ୨୩ରେ ଘଟିଥିଲା ହତ୍ୟାକାଣ୍ଡ। ଜୁନ ୨ରେ ରାଜାଙ୍କ କ୍ଷତାକ୍ତ ମୃତଦେହ ହୋଇଥିଲା ଉଦ୍ଧାର। ଜୁନ ୯ରେ ୟୁପି ଗାଜିପୁରରୁ ସୋନମକୁ କରାଯାଇଥିଲା ଗିରଫ।
ଆଜିଠୁ ଖସିବ ତାପମାତ୍ରା, କମିବ ଗୁଳୁଗୁଳି : ୭ ଦିନ ପ୍ରବଳ ଛେଚିବ
ନନ୍ଦିଘୋଷ ବ୍ୟୁରୋ: ଆଜିଠୁ ଖସିବ ତାପମାତ୍ରା, କମିବ ଗୁଳୁଗୁଳି । ଆଗାମୀ ୭ ଦିନ ପାଇଁ ରାଜ୍ୟରେ ରହିବ ବର୍ଷାର ପ୍ରଭାବ । ରାଜ୍ୟରେ କିଛିଦିନ ଧରି ଦିନରେ ଖରା ଗରମ ଓ ମଧ୍ୟାହ୍ନରେ କାଳବୈଶାଖୀ ଜନିତ ବର୍ଷା ଲାଗି ରହିଥିବା ବେଳେ ଗରମ ଗୁଳୁଗୁଳି ବଢି ଚାଲିଥିଲା । ହେଲେ ଆସନ୍ତାକାଲି ଠାରୁ ୨ ରୁ ୩ ଡିଗ୍ରୀ ତାପମାତ୍ରା ଖସିବ । ରାଜ୍ୟକୁ ପୁଣି ମୌସୁମୀ ଫେରୁଛି ବୋଲି ସୂଚନା ଦେଇଛି ପାଣିପାଗ କେନ୍ଦ୍ର । ମୌସୁମୀ ପ୍ରବହ ନେଇ ଅନୁକୂଳ ରହିଛି ପାଗ । ଆସନ୍ତା ୧୪ ତାରିଖ ପରେ ରାଜ୍ୟର ଅନେକ ଜିଲ୍ଲାରେ ମୌସୁମୀ ଜନିତ ବର୍ଷା ହେବ । ୪ ଦିନ ପାଇଁ ବିଭିନ୍ନ ଜିଲ୍ଲାକୁ ବଜ୍ରପାତ ସତର୍କତା ଜାରି କରାଯାଇଛି ।
ଆରସିବି ବିଜୟ ଉତ୍ସବରେ ଦଳାଚକଟା ଘଟଣା : ଆଜି ମାମଲାର ଶୁଣାଣି
ନନ୍ଦିଘୋଷ ବ୍ୟୁରୋ: ଆରସିବି ବିଜୟ ଉତ୍ସବରେ ଦଳାଚକଟା ଘଟଣା। ଆଜି ମାମଲାର ଶୁଣାଣି କରିବେ କର୍ଣ୍ଣାଟକ ହାଇକୋର୍ଟ। ଗତ ଜୁନ ୪ରେ ବେଙ୍ଗାଳୁରୁସ୍ଥିତ ଚିନ୍ନାସ୍ବାମୀ ଷ୍ଟାଡିୟମରେ ଘଟିଥିବା ଦଳାଚକଟାରେ ପ୍ରାଣ ହରାଇଥିଲେ ୧୧ ଜଣ। ଆହତ ହୋଇଥିଲେ ୫୦ରୁ ଅଧିକ ଦର୍ଶକ। ମାମଲାର ଶୁଣାଣି ବେଳେ ନିଜ ଉତ୍ତର ଏକ ମୁଦା ଲଫାଫାରେ ଦାଖଲ କରିବା ଲାଗି ଆଡଭୋକେଟ ଜେନେରାଲ ଶଶୀକିରଣ ସେଟ୍ଟୀଙ୍କୁ ନିର୍ଦ୍ଦେଶ ଦେଇଛନ୍ତି କୋର୍ଟ। ପୂର୍ବରୁ ଆଡଭୋକେଟ ଜେନେରାଲ କହିଥିଲେ- ମାମଲାର ତଦନ୍ତ ଲାଗି ଗଠିତ ହୋଇଛି ଏକ ବିଚାର ବିଭାଗୀୟ କମିଶନ। ଏହି କମିଶନ ଏକ ମାସ ଭିତରେ ରିପୋର୍ଟ ଦେବ। ଏହି ବହୁଚର୍ଚ୍ଚିତ ଘଟଣାରେ ନିଜ ଆଡୁ ପିଟିସନ ଦାୟର କରି ତଦନ୍ତ କରୁଛନ୍ତି କାର୍ଯ୍ଯକାରୀ ମୁଖ୍ୟ ବିଚାରପତି ଜଷ୍ଟିସ ଭି. କାମେଶ୍ବର ରାଓ ଓ ଜଷ୍ଟିସ ସି.ଏମ. ଯୋଶୀ। ସେପଟେ ଜଣେ କାଉନସେଲ ବି ଏହି ମାମଲାରେ ଏକ ଜନସ୍ବାର୍ଥ ମାମଲା ଦାୟର କରୁଥିବା ଚର୍ଚ୍ଚା ହେଉଛି। ଏହି ଘଟଣାରେ RCB ମାର୍କେଟିଂ ହେଡ୍ ନିଖିଲ ସୋସାଲେ ସମେତ ଅନ୍ୟ କର୍ମଚାରୀ ଗିରଫ ହୋଇଥିଲେ। ପରେ କର୍ଣ୍ଣାଟକ ରାଜ୍ୟ କ୍ରିକେଟ ଆସୋସିଏସନର ସମ୍ପାଦକ ଏ. ଶଙ୍କର ଓ କୋଷାଧ୍ୟକ୍ଷ ଇଏସ ଜୟରାମ ଦେଇଥିଲେ ଇସ୍ତଫା। ଗତ ୭ ତାରିଖରେ ବିଧିବଦ୍ଧ ଭାବେ ଘଟଣାର ତଦନ୍ତ ଦାୟିତ୍ବ ନେଇଥିଲା ସିଆଇଡି।
ଅଣସର ପିଣ୍ଡିରେ ଶ୍ରୀବିଗ୍ରହଙ୍କ ଚାଲିବ ଗୁପ୍ତସେବା, ଶ୍ରୀଅଲାରନାଥରେ ଜମିବ ଭକ୍ତଙ୍କ ଭିଡ଼
ନନ୍ଦିଘୋଷ ବ୍ୟୁରୋ: ସ୍ନାନପୂର୍ଣ୍ଣିମାରେ ୧୦୮ ଗଡୁ ସୁବାସିତ ଜଳରେ ସ୍ନାନ ପରେ ଜ୍ବରରେ ପୀଡିତ ମହାପ୍ରଭୁ । ଶ୍ରୀମନ୍ଦିର ଅଣସର ପିଣ୍ଡିରେ ଶ୍ରୀବିଗ୍ରହଙ୍କ ଚାଲିବ ଗୁପ୍ତସେବା । ସ୍ନାନବେଦୀରେ ସ୍ନାନଯାତ୍ରା ସରିବା ପରେ ଅଣସର ଚାଳିକୁ ବିଜେ କରିଛନ୍ତି ଚତୁର୍ଦ୍ଧାମୂର୍ତ୍ତି । ଜ୍ବର ଲାଘବ ପାଇଁ ମହାପ୍ରଭୁଙ୍କ ସେବାରେ ନିୟୋଜିତ ହୋଇଛନ୍ତି ଦଇତାପତି । ଏହି ସମୟରେ ଶ୍ରୀମନ୍ଦିରରେ ମନ୍ତ୍ରୋଚାରଣ, ସଂକୀର୍ତ୍ତନ ଆଦି ନିତୀ ବନ୍ଦ ରହିବା ସହ ଶ୍ୱେତ ପୁଷ୍ପରେ ମହାପ୍ରଭୁଙ୍କୁ ପୂଜା କରାଯିବ । ସେପଟେ ମହାପ୍ରଭୁଙ୍କ ଅନୁପସ୍ଥିତିରେ ଶ୍ରୀମନ୍ଦିରରେ ଆଜିଠାରୁ ଦର୍ଶନ ଦେଉଛନ୍ତି ପଟି ଦିଅଁ । ଶ୍ରୀବଳଭଦ୍ରଙ୍କ ସ୍ଥାନରେ ଅନନ୍ତ ବାସୁଦେବ, ସୁଭଦ୍ରାଙ୍କ ସ୍ଥାନରେ ମାଆ ଭୂବନେଶ୍ୱରୀ, ଶ୍ରୀଜଗନ୍ନାଥଙ୍କ ସ୍ଥାନରେ ଅନନ୍ତ ନାରାୟଣ ଏବଂ ସୁଦର୍ଶନଙ୍କ ସ୍ଥାନରେ ପତିତପାବନ ପୂଜା ପାଉଛନ୍ତି ।
ସେପଟେ ଆଜିଠାରୁ ବ୍ରହ୍ମଗିରି ସ୍ଥିତ ଅଲାରନାଥ ପୀଠରେ ଲାଗିଛି ଗହଳି । ୨୫ ତାରିଖ ଯାଏଁ ବ୍ରହ୍ମଗିରି ଅଲାରନାଥ ପୀଠରେ ଜମିବ ଶ୍ରଦ୍ଧାଳୁଙ୍କ ଭିଡ଼ । ଭିଡ଼ ନିୟନ୍ତ୍ରଣ, ଟ୍ରାଫିକ ବ୍ଯବସ୍ଥା, ସୁରକ୍ଷା ଓ ନୀତିକାନ୍ତି ନେଇ ସମସ୍ତ ବ୍ଯବସ୍ଥା କରାଯାଇଛି । ଶୃଙ୍ଖଳିତ ନୀତିକାନ୍ତି ସହ ଭକ୍ତ କିପରି ସୁବିଧାରେ ଅଲାରନାଥଙ୍କ ପ୍ରଶିଦ୍ଧ କ୍ଷୀରି ଭୋଗ ପାଇବେ, ସେଥିପାଇଁ ସେବାୟତଙ୍କୁ ପରାମର୍ଶ ଦେଇଛନ୍ତି ଜିଲ୍ଲାପାଳ । ପୁରୀରୁ ବ୍ରହ୍ମଗିରିକୁ ଗମନଗମନ ଶୃଙ୍ଖଳିତ କରିବାକୁ ପୋଲିସ ପକ୍ଷରୁ କରାଯାଇଛି ସ୍ବତନ୍ତ୍ର ପ୍ଲାନ୍ । ୩ଟି ପଏଣ୍ଟରେ ଟ୍ରାଫିକ କଟକଣା ସହ ମନ୍ଦିର ଭିତରେ ଓ ବାହାରେ ବ୍ୟାପକ ପୋଲିସ ଫୋର୍ସ ମୁତୟନ ହୋଇଛନ୍ତି ।
୨୦ ଡିଗ୍ରୀ ତଳକୁ କରିହେବନି AC: AC ଚଳାଇବାକୁ ଆସିବ ନୂଆ ନିୟମ
ନନ୍ଦିଘୋଷ ବ୍ୟୁରୋ: ଏଣିକି ଘରେ ନିଜର କୋଠରୀକୁ ସିମଲା ଭଳି ଥଣ୍ଡା କରିହେବ ନାହିଁ। ୨୦ ଡିଗ୍ରୀ ତଳକୁ କରିହେବନି AC। ଏ ନେଇ ଖୁବଶୀଘ୍ର ସରକାର ନୂଆ ନିୟମ ଆଣିବାକୁ ଯାଉଛନ୍ତି। କେନ୍ଦ୍ର ଗୃହ ନିର୍ମାଣ ଏବଂ ସହରାଞ୍ଚଳ ବ୍ୟାପାର ମନ୍ତ୍ରୀ ମନୋହର ଲାଲ ଖଟ୍ଟର ଏହି ବଡ଼ ଘୋଷଣା କରିଛନ୍ତି।
ଏହି ନିୟମ ଅନୁଯାୟୀ, ଏସିର ତାପମାତ୍ରା ୨୦ ଡିଗ୍ରୀରୁ ୨୮ ଡିଗ୍ରୀ ମଧ୍ୟରେ ସ୍ଥିର କରାଯିବ। ଲୋକେ ୨୦ ଡିଗ୍ରୀ ତଳକୁ ଥଣ୍ଡା ଏବଂ ୨୮ ଡିଗ୍ରୀ ଉପରକୁ କରିପାରିବେ ନାହିଁ। ଏହା ଦ୍ଵାରା ବିଦ୍ୟୁତ୍ ସଞ୍ଚୟ ସହ ପରିବେଶ ପାଇଁ ଲାଭଦାୟକ ହେବ। ଏହି ନିୟମ ଏସି କମ୍ପାନୀଗୁଡ଼ିକୁ ମନଇଚ୍ଛା ତାପମାତ୍ରା ସ୍ଥିର କରିବାରୁ ରୋକିବ। ଏୟାର କଣ୍ଡିସନିଂ ମାନଦଣ୍ଡ ସମ୍ପର୍କରେ ଖୁବଶୀଘ୍ର ଏକ ନୂତନ ନିୟମ କାର୍ଯ୍ୟକାରୀ ହେବାକୁ ଯାଉଛି। ସମସ୍ତେ ଏକ ନିର୍ଦ୍ଦିଷ୍ଟ ତାପମାତ୍ରା ପରିସର ମଧ୍ୟରେ ଏସି ବ୍ୟବହାର କରନ୍ତୁ ବୋଲି ସରକାର ଚାହୁଁଛନ୍ତି। ଏହା ବିଦ୍ୟୁତ୍ ବ୍ୟବହାର ହ୍ରାସ କରିବ। ବିଦ୍ୟୁତ୍ ସଞ୍ଚୟ କରିବା ଦ୍ୱାରା ଦେଶ ଆର୍ଥିକ ଭାବରେ ମଧ୍ୟ ଲାଭବାନ ହେବ। ଏହା ସହିତ ପରିବେଶ ପ୍ରତି ସୃଷ୍ଟି ହେଉଥିବା ବିପଦ ମଧ୍ୟ ହ୍ରାସ ପାଇବ। ଏହି ନିୟମ ଖୁବ୍ ଶୀଘ୍ର କାର୍ଯ୍ୟକାରୀ ହେବାକୁ ଯାଉଛି। ଲୋକଙ୍କୁ ଏହା ବିଷୟରେ ସଚେତନ କରାଯାଉଛି।
ଖାଦ୍ୟରେ ବିଷକ୍ରିୟା ଯୋଗୁଁ ୧୦୦ରୁ ଅଧିକ ଭକ୍ତ ମେଡିକାଲରେ ଭର୍ତ୍ତି
ଖାଦ୍ୟରେ ବିଷକ୍ରିୟା ଯୋଗୁଁ ୧୦୦ରୁ ଅଧିକ ଭକ୍ତ ମେଡିକାଲରେ ଭର୍ତ୍ତି। ତାମିଲନାଡୁ ବିରୁଧୁନଗର ଜିଲ୍ଲାର ଏକ ମନ୍ଦିରରେ ପ୍ରସାଦ ଖାଇ ଅସୁସ୍ଥ ହୋଇ ପଡିଛନ୍ତି ଭକ୍ତ। ମନ୍ଦିରରେ ମହୋତ୍ସବରେ ଖାଦ୍ୟ ପରିବେଷଣ କରାଯାଇଥିଲା। ଆକ୍ରାନ୍ତ ବ୍ୟକ୍ତିମାନଙ୍କୁ ବିଭିନ୍ନ ହସ୍ପିଟାଲରେ ଭର୍ତ୍ତି କରାଯାଇଛି। ଅଧିକାଂଶ ଅସୁସ୍ଥଙ୍କୁ ମଦୁରାଇର ରାଜାଜୀ ହସ୍ପିଟାଲରେ ଭର୍ତ୍ତି କରାଯାଇଛି। ଅନ୍ୟ କିଛି ଲୋକଙ୍କୁ ବିରୁଧୁନଗରର ଅନ୍ୟ ହସ୍ପିଟାଲରେ ଭର୍ତ୍ତି କରାଯାଇଛି। ମେଡିକାଲ କର୍ତ୍ତୃପକ୍ଷ ଘଟଣାର ତଦନ୍ତ କରୁଛନ୍ତି। ସମସ୍ତ ରୋଗୀ ସୁସ୍ଥ ଥିବା ରାଜାଜୀ ହସ୍ପିଟାଲର ଡିନ୍ କହିଛନ୍ତି। ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ଜିଲ୍ଲା ପ୍ରଶାସନ। ଖାଦ୍ୟରେ ବିଷକ୍ରିୟାର କାରଣ କଣ ଏହାର ତଦନ୍ତ ଚାଲିଛି।
ସ୍ନାନ ପୂର୍ଣ୍ଣିମାରେ ବରିଷ୍ଠ ସୂପକାର ସେବାୟତଙ୍କୁ ହତ୍ୟା ଘଟଣା: ମୁଖ୍ୟ ଅଭିଯୁକ୍ତକୁ ଧରିଲା ପୋଲିସ
ପୁରୀ: ସ୍ନାନ ପୂର୍ଣ୍ଣିମାରେ ବରିଷ୍ଠ ସୂପକାର ସେବାୟତଙ୍କୁ ହତ୍ୟା ଘଟଣା। ମୁଖ୍ୟ ଅଭିଯୁକ୍ତକୁ ଧରିଲା ପୁରୀ ପୋଲିସ। ଅଭିଯୁକ୍ତ ନାରାୟଣ ପାଟ୍ଟଯୋଶୀଙ୍କୁ ଗିରଫ କରିଛି ପୋଲିସ।
ଟାଉନ ଥାନା ଅନ୍ତର୍ଗତ ଗୁଡ଼ିଆ ସାହିରେ ଘଟିଥିଲା ହତ୍ୟାକାଣ୍ଡ । ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରୁଛି ପୋଲିସ।
ମୃତ ସେବାୟତ ହେଲେ ମହି ପ୍ରକାଶ ମଠର ୮୪ ବର୍ଷୀୟ ଜଗନ୍ନାଥ ଦିକ୍ଷୀତ। ସ୍ନାନ ମଣ୍ଡପରେ ପନ୍ତିବଡୁ ସେବା ପାଳିସାରି ଫେରୁଥିଲେ ଜଗନ୍ନାଥ। ରାସ୍ତାରେ ଜଗନ୍ନାଥଙ୍କୁ ନିଜ ଘରକୁ ଡ଼ାକି ହତ୍ୟା କରିଥିଲା ନାରାୟଣ। ପରେ ମୃତ ଦେହକୁ ଦାଣ୍ଡରେ ଶୁଆଇ ଦେଇ ସାଇକେଲ ଯୋଗେ ପଳାଇଥିଲା। ପଡ଼ୋଶୀ ଖବର ଦେବାପରେ ସାଇଣ୍ଟିଫିକ ଟିମ୍ ଓ ଟାଉନଥାନା ପୋଲିସ ପହଞ୍ଚି ଛନଭିନ ଆରମ୍ଭ କରି ଅଭିଯୁକ୍ତକୁ ଗିରଫ କରିଛି। ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ନିମନ୍ତେ ଜିଲ୍ଲା ମୁଖ୍ୟ ଚିକତ୍ସାଳୟକୁ ପଠାଇଛି ପୋଲିସ। ସେପଟେ ହତ୍ୟାକାଣ୍ଡକୁ ନେଇ ପ୍ରତିକ୍ରିୟା ରଖିଛନ୍ତି ପୁରୀ ଏସପି ବିନୀତ ଅଗ୍ରୱାଲ । ବ୍ୟକ୍ତିଗତ ଶତ୍ରୁତାକୁ ନେଇ ହତ୍ୟାକାଣ୍ଡ ଘଟିଥିବା ସେ କହିଛନ୍ତି।
ସରକାରଙ୍କୁ ଘାରିଛି ଦଶମରେ ଡ୍ରପଆଉଟ ଚିନ୍ତା
ସରକାରଙ୍କୁ ଘାରିଛି ଦଶମରେ ଡ୍ରପଆଉଟ ଚିନ୍ତା । ଏହାକୁ ରୋକିବାକୁ ଡ୍ରପଆଉଟ୍ ନେଇ ଗଣ ଶିକ୍ଷା ବିଭାଗ ପକ୍ଷରୁ ସର୍ଭେ କରାଯାଇଛି । ଚାଇଲ୍ଡ ଟ୍ରାକିଂ ସର୍ଭେ ବି ଚାଲିଛି । ଡୋର ଟୁ ଡୋର ଯାଇ ଶିକ୍ଷକମାନେ ସର୍ଭେ କରିଛନ୍ତି । ସେହି ସର୍ଭେ ରିପୋର୍ଟ ଆସିଲା ପରେ ପଦକ୍ଷେପ ନେବେ ସରକାର । ଗତ ଶିକ୍ଷା ବର୍ଷରେ ଏହା ଉପରେ ଅଂକୁଶ ଲାଗିପାରି ନଥିଲା ।
ଗତବର୍ଷ ୭,୬୮୨ ପିଲା ଅଧାରୁ ପାଠ ଛାଡ଼ିଥିଲେ । ଏଥିସହ ୨୦୨୪-୨୫ ମସିହାରେ ପ୍ରାଥମିକ ଶ୍ରେଣୀରେ ୨, ୨୯୯ ପିଲା ଅଧାରୁ ପାଠ ଛାଡ଼ିଥିଲେ । ଷଷ୍ଠ ଶ୍ରେଣୀରୁ ଅଷ୍ଟମ ଶ୍ରେଣୀର ପର୍ଯ୍ୟନ୍ତ ୧,୧୯୮ ପିଲା ଅଧାରୁ ପାଠ ଛାଡ଼ିଥିଲେ । ସେହିପରି ନବମରୁ ଦଶମ ଶ୍ରେଣୀ ମଧ୍ୟରେ ୧,୪୪୬ ପିଲା ଅଧାରୁ ପାଠ ଛାଡ଼ିଥିବା ବେଳେ ପରବର୍ତ୍ତୀ ସମୟରେ ସେମାନଙ୍କ ମଧ୍ୟରୁ ୪୮୧ ପିଲା ସ୍କୁଲ ଫେରିଥିଲେ । ମାତ୍ର ୨୮ ଟି ଜିଲ୍ଲା ୯୬୫ ପିଲା ବିଦ୍ୟାଳୟ ଆସୁନାହାନ୍ତି । ମାଟ୍ରିକରେ ଫର୍ମ ଫିଲଅପ୍ କରି ୮୩୬୨ ପିଲା ପରୀକ୍ଷା ଦେଇ ପାରି ନଥିଲେ । ଏହାର ପ୍ରକୃତ କାରଣ ଖୋଜି ଶିକ୍ଷା ଉପଯୋଗୀ ବାତାବରଣ ସୃଷ୍ଟି କରିବାକୁ ଅଭିଭାବକ ଦାବି କରିଛନ୍ତି ।
ଗୁରୁମନ୍ତ୍ର ଦେବେ ନବୀନ; ଲୋକଙ୍କ ସମସ୍ୟାର ସମାଧାନ କରିବାକୁ ଦେବେ ଫର୍ମୁଲା
ଭୁବନେଶ୍ୱର: ବିଧାୟକଙ୍କୁ ଗୁରୁମନ୍ତ୍ର ଦେବେ ନବୀନ। ଫୋକସରେ ତୃଣମୂଳ ସଂଗଠନ। ସରକାରଙ୍କ ବିରୋଧରେ ତ୍ବରିତ ହେବ ଜନଜାଗରଣ। ବିଧାୟକ କହିଲେ ଜନସେବା ହିଁ ବିଜେଡିର ମୂଳମନ୍ତ୍ର। ସଶକ୍ତ ବିରୋଧୀ ଦଳ ଭୂମିକାରେ ବିଜେଡି। ଲୋକଙ୍କ ସ୍ବର ସାଜି ସରକାରଙ୍କୁ ବିଭିନ୍ନ ପ୍ରସଙ୍ଗରେ ପ୍ରଶ୍ନ କରିଛି ଦଳ। କେତେବେଳେ ଦରଦାମକୁ ନେଇ ରାଜରାସ୍ତାକୁ ଓହ୍ଲାଇଛି ତ ଆଉ କେତେବେଳେ ଓବିସି ସଂରକ୍ଷଣ ନେଇ ସରକାର ବିରୋଧରେ ଜୋରଦାର ଲଢେଇ କରିଛି। ମହାନଦୀ, ପୋଲାଭରମ ପାଇଁ ବିଜେଡି ଗ୍ରାଉଣ୍ଡରୁ ବିଧାନସଭା ଯାଏଁ ହକ ମାଗିଛି। ୫୧ ଜଣ ବିଜେଡି ବିଧାୟକ ବିଧାନସଭାରୁ ନିର୍ବାଚନମଣ୍ଡଳି ଯାଏ ଲୋକଙ୍କ ସମସ୍ୟା ସରକାରଙ୍କ ସାମ୍ନାକୁ ଆଣି ସମାଧାନର ବାଟ ବାହାର କରିଛନ୍ତି। ଏହାରି ଭିତରେ ବିଜେପି ସରକାରକୁ ବର୍ଷେ ପୂରିଛି। ସରକାର ଯେଉଁ ପ୍ରତିଶୃତି ଦେଇଥିଲେ ତାହା ପାଳନ କରିନାହିଁ। ବିଜେପି ସରକାର ଯାହା ପ୍ରତିଶୃତି ଦେଇଥିଲା ତାହା ପାଳନ କରିବାକୁ ସରକାରଙ୍କ ଉପରେ ଚାପ ପକାଇବାକୁ ପ୍ରଶ୍ନ କରିଛନ୍ତି ବିଜେଡି ବିଧାୟକ। ବିଜେଡି ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ଶଙ୍ଖ ଭବନରେ ବିଜେଡି ବିଧାୟକମାନଙ୍କ ସହ ବୈଠକ କରି ଦେବେ ଗୁରୁମନ୍ତ୍ର ।
ବିଜେଡି ସଭାପତି ବାରମ୍ବାର ସଂଗଠନକୁ ନେଇ ବୈଠକ କରିବା ପରେ ତୃଣମୂଳରୁ ରାଜ୍ୟସ୍ତରରେ ବିଜେଡି ସଂଗଠନ କ୍ରିୟାଶୀଳ ହୋଇଛି। ୨୦୨୪ ନିର୍ବାଚନରେ ବିଜେଡିର ଆସନ ସଂଖ୍ୟା କମିଥିଲେ ମଧ୍ୟ ବିଜେପି ଠାରୁ ବିଜେଡି ଅଧିକ ଭୋଟ ପାଇଛି। ବିଜେପି ସରକାର ବିଫଳତା ବିରୋଧରେ ଶାଣିତ ସ୍ବର ଉଠାଇବାକୁ ନବୀନ ବିଧାୟକମାନଙ୍କୁ ଗୁରୁମନ୍ତ୍ର ଦେଇପାରନ୍ତି ବୋଲି ରାଜନୈତିକ ସମୀକ୍ଷକ କହିଛନ୍ତି। ବିଜେଡି ଏବେଠାରୁ ପଂଚାୟତ ଓ ପୌର ନିର୍ବାଚନ ପ୍ରସ୍ତୁତିକୁ ଜୋରଦାର କରିଛି ।
୨୦୨୪ ନିର୍ବାଚନ ପରେ ୨୦୨୭ ପାଇଁ ବିଜେଡି ସଂଗଠନକୁ ନୂଆରୂପ ଦେଇ ତୃଣମୂଳ ସଂଗଠନକୁ ମଜଭୁତ କରିବାକୁ ଫୋକସ କରିଛି। ରାଜ୍ୟସ୍ତରୀୟ ଜନ ଜଗରଣ ଅଭିଯାନକୁ ତୃଣମୂଳସ୍ତରରେ ବିଧାୟକମାନେ କିପରି ଅଧିକ ତ୍ବରାନ୍ନିତ କରିବେ ତାହା ଉପରେ ବୈଠକରେ ଆଲୋଚନା କରାଯାଇ ରଣନୀତି ପ୍ରସ୍ତୁତ କରିବ ବିଜେଡି।