ଭୁବନେଶ୍ୱର: କୋଭିଡ୍ ରୋଗୀଙ୍କ ଚିକିତ୍ସାରେ ପ୍ଳାଜ୍ମା ଥେରାପିର ଫଳାଫଳ ଉତ୍ସାହ ଜନକ ରହିଛି । ଏହି ଚିକିତ୍ସା ପଦ୍ଧତି ଦ୍ୱାରା କଟକର ଜଣେ ୪୮ ବର୍ଷୀୟ ମହିଳା ସୁସ୍ଥ ହୋଇ ଘରକୁ ଫେରିଛନ୍ତି । ଡାକ୍ତର ଓ ରୋଗୀମାନଙ୍କ ମଧ୍ୟରେ ଆଶା ସଞ୍ଚାର କରିଛି ପ୍ଳାଜ୍ମା ଥେରାପି । ଆତ୍ମବିଶ୍ୱାସ ମଧ୍ୟ ବୃଦ୍ଧି କରିଛି । ଏହି ପରିପ୍ରେକ୍ଷୀରେ ପ୍ଳାଜ୍ମା ଦାନକୁ ଅଧିକ ପରିବ୍ୟାପ୍ତ କରିବାକୁ ରାଜ୍ୟ ସରକାରଙ୍କ ପକ୍ଷରୁ ବିଭିନ୍ନ ପଦକ୍ଷେପ ନିଆଯାଇଛି । ପୂର୍ବରୁ କଟକରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ପ୍ଳାଜ୍ମା ବ୍ୟାଙ୍କ ଉଦ୍ଘାଟିତ୍ ହୋଇଥିବାବେଳେ ଅନ୍ୟ କିଛି ସ୍ଥାନରେ ମଧ୍ୟ ଏହି ବ୍ୟାଙ୍କ ଖୋଲଯିବାକୁ ନିଷ୍ପତ୍ତି ନିଆଯାଇଛି । ଏଥିସହି ପ୍ଳାଜ୍ମା ଦାନକୁ ଉତ୍ସାହିତ କରିବା ନେଇ ଜିଲ୍ଲାଓ୍ୱାରୀ ବିଭିନ୍ନ ମନ୍ତ୍ରୀଙ୍କୁ ବିଭିନ୍ନ ଜିଲ୍ଲାର ଦାୟିତ୍ୱ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ପୁରୀ: ନିରଞ୍ଜନ ପୂଜାରୀ
କନ୍ଧମାଳ, ଗଞ୍ଜାମ: ବିକ୍ରମ କେଶରୀ ଆରୁଖ
ବରଗଡ଼: ପ୍ରଫୁଲ୍ଲ କୁମାର ମଲ୍ଲିକ
ଭଦ୍ରକ,କେନ୍ଦ୍ରାପଡ଼ା: ରଣେନ୍ଦ୍ର ପ୍ରତାପ ସ୍ୱାଇଁ
ଝାରସୁଗୁଡ଼ା, ବୌଦ୍ଧ: ପଦ୍ମନାଭ ବେହେରା
ମୟୂରଭଞ୍ଜ ଓ କଟକ: ପ୍ରତାପ ଜେନା
ନୟାଗଡ଼ ଓ ଖୋର୍ଦ୍ଧା: ଅରୁଣ କୁମାର ସାହୁ
ସୋନପୁର: ସୁଦାମ ମାର୍ଣ୍ଡୀ
ବଲାଙ୍ଗୀର ଓ ସମ୍ୱଲପୁର: ସୁଶାନ୍ତ ସିଂହ
କଳାହାଣ୍ଡି ଓ ନୂଆପଡ଼ା: ନବ କିଶୋର ଦାସ
ଦେବଗଡ଼ ଓ ସୁନ୍ଦରଗଡ଼: ଟୁକୁନି ସାହୁ
ଗଜପତି ଓ କୋରାପୁଟ: ଜଗନ୍ନାଥ ସାରକା
ଢେଙ୍କାନାଳ: ଦିବ୍ୟଶଙ୍କର ମିଶ୍ର
ଅନୁଗୁଳ: ଅଶୋକ ଚନ୍ଦ୍ର ପଣ୍ଡା
ଯାଜପୁର: ସମୀର ରଞ୍ଜନ ଦାସ
ବାଲେଶ୍ୱର: ଜ୍ୟୋତି ପ୍ରକାଶ ପାଣିଗ୍ରାହୀ
କେନ୍ଦୁଝର :ପ୍ରେମାନନ୍ଦ ନାୟକ:
ନବରଙ୍ଗପୁର, ଜଗତସିଂହପୁର: ରଘୁନନ୍ଦନ ଦାସ
ରାୟଗଡ଼ା : ପଦ୍ମିନୀ ଦିଆନ
ମାଲକାନଗିରି: ତୁଷାରକାନ୍ତି ବେହେରା
ସୂଚନା ଯୋଗ୍ୟ ଯେ, ଗତସପ୍ତାହରୁ ରାଜ୍ୟରେ ଆରମ୍ଭ ହୋଇଛି ପ୍ଳାଜ୍ମା ଥେରାପି । କଟକରେ ପ୍ଳାଜ୍ମା ବ୍ୟାଙ୍କ୍ ଉଦ୍ଘାଟନ୍ ଅବସରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଥିଲେ ଯେ, ’ମୋ ପାଇଁ ପ୍ରତିଟି ଲୋକଙ୍କ ଜୀବନ ମୂଲ୍ୟବାନ । ଓଡ଼ିଶାବାସୀଙ୍କୁ ସର୍ବୋତ୍ତମ ଚିକିତ୍ସା ସୁବିଧା ଯୋଗାଇବା ମୋର ଲକ୍ଷ୍ୟ’ । ପ୍ଳାଜ୍ମା ଥେରାପି ଏ ଦିଗରେ ଅନ୍ୟତମ ଗୁରୁତ୍ୱପୂର୍ଣ୍ଣ ପଦକ୍ଷେପ । ଦେଶରେ ପ୍ଳାଜ୍ମା ଥେରାପି ଚିକିତ୍ସା ସୁବିଧା ମିଳୁଥିବା ଅଳ୍ପ କେତୋଟି ରାଜ୍ୟ ମଧ୍ୟରେ ଓଡ଼ିଶା ଅନ୍ୟତମ ।
କଟକର ଏସ୍ସିବି ଓ ରାଉରକେଲା ଆଇଜିଏଚ୍ରେ ପ୍ଳାଜ୍ମା ବ୍ୟାଙ୍କ ପ୍ରତିଷ୍ଠା ହେବା ସହ କଟକ, ଭୁବନେଶ୍ୱର ଓ ବ୍ରହ୍ମପୁରରେ ଆରମ୍ଭ ହୋଇଛି ପ୍ଳାଜ୍ମା ବ୍ୟାଙ୍କ ଥେରାପି । ଭୁବନେଶ୍ୱର ଓ ବ୍ରହ୍ମପୁରରେ ମଧ୍ୟ ପ୍ଳାଜ୍ମା ବ୍ୟାଙ୍କ କରାଯିବା ପାଇଁ ସ୍ଥିର ହୋଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିବଦେନ କ୍ରମେ କୋଭିଡରୁ ଆରୋଗ୍ୟ ଲାଭ କରୁଥିବା ବ୍ୟକ୍ତିମାନେ ପ୍ଳାଜ୍ମା ଦାନ ପାଇଁ ଆଗେଇ ଆସୁଛନ୍ତି ।
ରାଜ୍ୟରେ ଆରମ୍ଭ ହେଲା ପ୍ଲାଜମା ଥେରାପି, ଯୋଗ୍ୟ ବ୍ୟକ୍ତିଙ୍କୁ ପ୍ଲାଜମା ଦାନ ପାଇଁ ମୁଖ୍ୟମନ୍ତ୍ରୀଙ୍କ ଆହ୍ୱାନ
ଜଣେ କୋଭିଡରୁ ସୁସ୍ଥ ହେବାର ୪ ସପ୍ତାହ ପରେ ପ୍ଳାଜ୍ମା ଦାନ କରିପାରିବେ । ଜଣେ ବ୍ୟକ୍ତି ଚାହିଁଲେ ଏକାଧିକବାର (ପ୍ରତି ଦୁଇ ସପ୍ତାହରେ ଥରେ) ପ୍ଳାଜ୍ମା ଦେଇପାରିବେ । ଗୋଟିଏ ୟୁନିଟ୍ ପ୍ଳାଜ୍ମା ଦ୍ୱାରା ଦୁଇ ଜଣଙ୍କୁ ଚିକିତ୍ସା କରାଯାଇପାରିବ ।
ସୂଚନା ଯୋଗ୍ୟ ଯେ, ରାଜ୍ୟରେ ଆଜି ଦିନକ ମଧ୍ୟରେ ୮୦୮ ଜଣ ରୋଗୀ କୋଭିଡ ଆରୋଗ୍ୟ ଲାଭ କରିଥଇବା ବେଳେ ସମୁଦାୟ ୧୫ହଜାର ୨୦୦ ଜଣ ଆରୋଗ୍ୟ ଲାଭ କରିଛନ୍ତି ।
ଗୁରୁତର କୋଭିଡ ରୋଗୀଙ୍କ ଚିକିତ୍ସାରେ ପ୍ଳାଜ୍ମା ଥେରାପିର ମହତ୍ତ୍ୱପୂର୍ଣ୍ଣ ଭୂମିକାକୁ ଦୃଷ୍ଟିରେ ରଖି ପ୍ଳାଜ୍ମା ଦାନକୁ ଉତ୍ସାହିତ କରିବା ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମନ୍ତ୍ରିମଣ୍ଡଳର ସଦସ୍ୟମାନଙ୍କୁ ବିଭିନ୍ନ ଜିଲ୍ଲାର ଦାୟିତ୍ୱ ଦେଇଛନ୍ତି । ମନ୍ତ୍ରୀମାନେ ସେମାନଙ୍କ ଦାୟିତ୍ୱ ଦିଆଯାଇଥିବା ଜିଲ୍ଲା ଗସ୍ତ କରି ଆରୋଗ୍ୟ ଲାଭ କରିଥିବା କୋଭିଡ ରୋଗୀମାନଙ୍କ ସହିତ ଯୋଗାଯୋଗ ରଖି ସେମାନଙ୍କୁ ପ୍ଳାଜ୍ମା ଦାନ ପାଇଁ ଉତ୍ସାହିତ କରିବେ ଏବଂ ଏଥିପାଇଁ ଆବଶ୍ୟକ ବ୍ୟବସ୍ଥା ମଧ୍ୟ କରିବେ । ନିୟମିତ ବ୍ୟବଧାନରେ ମୁଖ୍ୟମନ୍ତ୍ରୀ ପ୍ଳାଜ୍ମା ଦାନର ଅଗ୍ରଗତି ସମ୍ପର୍କରେ ସମୀକ୍ଷା କରିବେ ବୋଲି କହିଛନ୍ତି ।
