ନୂଆଦିଲ୍ଲୀ: ସୁଶାନ୍ତ ସିଂଙ୍କ ମୃତ୍ୟୁ ନେଇ ଗୋଟିଏ ପରେ ଗୋଟିଏ ରହସ୍ୟର ପେଡ଼ି ଖୋଲିବାରେ ଲାଗିଛି । ୧୪ ଜୁନରେ ସୁଶାନ୍ତଙ୍କ ମୃତ୍ୟୁ ହେବା ପୂର୍ବରୁ ୯ ଜୁନ୍ ରାତିରେ ପ୍ରାୟ ୧.୩୦ ମିନିଟ ପରେ ସୁଶାନ୍ତଙ୍କ ପୂର୍ବତନ ମ୍ୟାନେଜର ଦିଶା ସାଲିଆନଙ୍କର ମୃତ୍ୟୁ ହୋଇଥିଲା । ଯେତେବେଳେ ସୁଶାନ୍ତଙ୍କ ଗର୍ଲଫ୍ରେଣ୍ଡ ରିୟା ଚକ୍ରବର୍ତ୍ତୀ ୮ ଜୁନ୍ ଅପରାହ୍ନରେ ସୁଶାନ୍ତଙ୍କ ଘରୁ ବାହାରିଥିଲେ । ଅର୍ଥାତ୍ ଦିଶାଙ୍କ ମୃତ୍ୟୁର ପ୍ରାୟ ୧୨ ଘଣ୍ଟା ପୂର୍ବରୁ ରିୟା ସୁଶାନ୍ତଙ୍କ ଘରୁ ବାହାରିଥିଲେ । ଏହା ପରେ ରିୟା ଏବଂ ସୁଶାନ୍ତଙ୍କ ମଧ୍ୟରେ ୮ ଜୁନ୍ ରୁ ୧୪ ଜୁନ୍ ମଧ୍ୟରେ କୌଣସି ପ୍ରକାରର କଥା ବାର୍ତ୍ତା ହୋଇନଥିଲା । ତେବେ ଏଠି ଏକ ବଡ଼ ପ୍ରଶ୍ନ ଉଠୁଛି । ଦିଶାଙ୍କ ମୃତ୍ୟୁରେ ସୁଶାନ୍ତଙ୍କୁ ଫସାଇଦେବା ପାଇଁ ସୁଶାନ୍ତଙ୍କୁ କିଏ ଧମକ ଦେଇଥିଲେ ?
ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ମାମଲାରେ ଏକ ବଡ଼ ଖୁଲାସା କରାଯାଇଛି । ଆତ୍ମହତ୍ୟାକୁ ନେଇ ଏକ ନୂଆ ମୋଡ଼ ଆସିଛି । ୨୦ ଜାନୁଆରୀରେ ତିନୋଟି କଲ, ୨୧ ଜାନୁଆରୀରେ ୫ ଟି କଲ, ୨୨ ଜାନୁଆରୀରେ ୩ ଟି କଲ ସୁଶାନ୍ତଙ୍କ ପାଖକୁ ବାରମ୍ବାର ଆସୁଥିଲା । ଏହା ମଧ୍ୟ କୁହାଯାଉଛି କି ରିୟାଙ୍କ ଫୋନ୍ ମଧ୍ୟ ସୁଶାନ୍ତଙ୍କୁ ବିରକ୍ତ କରୁଥିଲା। ସୁଶାନ୍ତ ସିଂଙ୍କ ନମ୍ବରର ଏହି କଲ୍ ରେକର୍ଡ ଏହାର ସାକ୍ଷୀ ଅଟେ । ତେବେ ରିୟାଙ୍କର କିଛି କଲ୍ ରେକର୍ଡ ମିଳିଛି ଯାହା ଚଳିତ ବର୍ଷର । ୨୦ ଜାନୁଆରୀରୁ ୨୪ ଜାନୁଆରୀ ମଧ୍ୟରେ ଯେତେବେଳେ ସୁଶାନ୍ତ ଚଣ୍ଡିଗଡ଼କୁ ତାଙ୍କ ଭଉଣୀ ରାନୀଙ୍କ ପାଖକୁ ଯାଉଥିଲେ । ସେହି ସମୟରେ ରିୟା ସୁଶାନ୍ତଙ୍କୁ ୨୫ ଟି କଲ କରିଥିଲେ । ପ୍ରତ୍ୟେକ କଲ ୨ରୁ ୩ ମିନିଟର ବ୍ୟବଧାନରେ ରହିଛି । ଏହି ଫୋନ୍ କଲଗୁଡ଼ିକରୁ ଜଣାପଡ଼ିଛିଯେ ସୁଶାନ୍ତ ତାଙ୍କ ପରିବାର ସହିତ ରିୟାଙ୍କ ଠାରୁ ଅଲଗା ହୋଇ କିଛି ଦିନ ବିତାଇବାକୁ ଚାହୁଁଥିଲେ । ସୂଚନା ଅନୁଯାୟୀ ଗତ ବର୍ଷ ନଭେମ୍ବରରେ ସୁଶାନ୍ତ ତାଙ୍କ ତିନି ଭଉଣୀଙ୍କ ସହ ଚଣ୍ଡିଗଡ଼ ଯିବାକୁ ଚାହୁଁଥିଲେ । ଏଥିପାଇଁ ଟିକେଟ୍ ମଧ୍ୟ ବୁକ୍ କରାଯାଇଥିଲା। କିନ୍ତୁ ରିୟା ତାଙ୍କୁ ଯିବାକୁ ଦେଇନଥିଲେ ।
ଏ ସଂପର୍କରେ ମଧ୍ୟ ସୁଶାନ୍ତଙ୍କ ପରିବାର ଏଫଆଇଆର ଦାଖଲ କରିଛନ୍ତି । ଏଫ୍ଆଇଆରରେ ସୁଶାନ୍ତଙ୍କ ପରିବାର ଅଭିଯୋଗ କରିଛନ୍ତି ଯେ ରିୟା ତାଙ୍କୁ ଫୋନ୍ ଉଠାଇବାକୁ ଦେଉନଥିଲେ । ସେଥିପାଇଁ ସୁଶାନ୍ତ ତାଙ୍କ ପରିବାରଙ୍କୁ ଡିସେମ୍ବର ମାସରେ ଏକ ନୂଆ ନମ୍ବର ଦେଇଥିଲେ । ସୁଶାନ୍ତ ତାଙ୍କ ପରିବାରକୁ କହିଥିଲେ ଯେ ରିୟା ଏବଂ ତାଙ୍କ ପରିବାର ତାଙ୍କୁ ପାଗଳ ଖାନା ପଠାଇବାକୁ ଚାହୁଛନ୍ତି । ସେଥିପାଇଁ ସୁଶାନ୍ତ ମୁମ୍ବାଇରୁ ଯାଇ ହିମାଚଳରେ ରହିବାକୁ ଚାହୁଁଥିଲେ ।
ଅନ୍ୟପକ୍ଷରେ ରିୟାଙ୍କ ବିଷୟରେ ନୂଆ ଖୁଲାସା ହୋଇଛି । ରିୟାଙ୍କ ଉପରେ ଇଡିର ଚାପ ମଧ୍ୟ ପଡ଼ିବାରେ ଲାଗିଛି । ବର୍ତ୍ତମାନ ରିୟାଙ୍କ ସପିଂ, ମେକଅପ୍, ଯାତ୍ରା ଖର୍ଚ୍ଚ, ରିୟାଙ୍କ ଭାଇଙ୍କ ହୋଟେଲ ବିଲ୍, ଟ୍ୟୁସନ ଫି, ଏୟାର ଟିକେଟ୍ ଇତ୍ୟାଦି ଖର୍ଚ୍ଚ ସୁଶାନ୍ତଙ୍କ ଆକାଉଣ୍ଟରୁ ଦିଆଯାଇଥିଲା । ଯାହାର ପ୍ରମାଣ ସୁଶାନ୍ତଙ୍କ ବ୍ୟାଙ୍କ ଆକାଉଣ୍ଟ ଷ୍ଟେଟମେଣ୍ଟରୁ ମିଳୁଛି। ରିୟା ତାଙ୍କୁ ଟଙ୍କା ପାଇଁ ବ୍ୟବହାର କରୁଥିଲେ ବୋଲି ସୁଶାନ୍ତଙ୍କ ପରିବାର ମଧ୍ୟ ଅଭିଯୋଗ କରିଛନ୍ତି।
କେବଳ ଏତିକି ନୁହେଁ, ରିୟା ଏବଂ ତାଙ୍କ ଭାଇ ଶୋଭିକ୍ ମଧ୍ୟ ସୁଶାନ୍ତଙ୍କ କମ୍ପାନୀରେ ନିର୍ଦ୍ଦେଶକ ଥିଲେ । ଯେଉଁଥିରେ ଏକ କମ୍ପାନୀର ନାମ Vividrage Rheality X ଥିଲା । ଯେଉଁ କମ୍ପାନୀରେ ରିୟା, ତାଙ୍କ ଭାଇ ଏବଂ ସୁଶାନ୍ତ ସମାନ ପୁଞ୍ଜି ବିନିଯୋଗ କରିଥିଲେ । ସେପଟେ ଅର୍ଥ ହେରଫେର ମାମଲାରେ ରିୟା, ତାଙ୍କ ଭାଇ ଶୋଭିକ୍ ଏବଂ ପିତା ଇନ୍ଦ୍ରଜିତ ଚକ୍ରବର୍ତ୍ତୀଙ୍କ ବିରୋଧରେ ଇଡି ଏକ ମାମଲା ରୁଜୁ କରିଛି । ରିୟାଙ୍କୁ ଆଜି ଏନଫୋର୍ସମେଣ୍ଟ ନିର୍ଦ୍ଦେଶାଳୟ ମଧ୍ୟ ପ୍ରଶ୍ନ କରିଛି । ରିୟାଙ୍କ ଭାଇଙ୍କୁ ମଧ୍ୟ ପ୍ରଶ୍ନ କରାଯାଇପାରେ ବୋଲି ସୂଚନା ମିଳିଛି ।
