ନନ୍ଦିଘୋଷ ବ୍ୟୁରୋ: ବାଲେଶ୍ଵରରେ ସୁଧୁରୁନି ବନ୍ୟା ପରିସ୍ଥିତି। ଏବେ ବି ତିନିଟି ବ୍ଲକର ଶତାଧିକ ଗାଁ ପାଣି ଘେରରେ। ତଳିଆ ଅଂଚଳର ଲୋକେ ଜଳବନ୍ଦୀ। ଜଳେଶ୍ଵର, ବସ୍ତା, ବାଲିଆପାଳ, ଭୋଗରାଇ ବ୍ଳକର ବହୁ ଗାଁ ବାହ୍ୟଜଗତରୁ ବିଚ୍ଛିନ୍ନ। ରାସ୍ତା ଉପରେ ଅଣ୍ଟାଏ ପାଣି। ଲୋକଙ୍କ ପାଇଁ ଦେଶୀ ଡଙ୍ଗା ହଁ ପାଲଟିଛି ସାହା ଭରସା। ତେବେ ସୁବର୍ଣ୍ଣରେଖାର ପାଣି କମିଛି । ବିପଦ ସଂକେତ ତଳେ ଏହି ନଦୀ ପ୍ରବାହିତ ହେଉଛି। ରାଜଘାଟରେ ବିପଦ ସଂକେତ ୧୦. ୩୬ ମିଟର ଥିବା ବେଳେ ସକାଳ ୬ ଟା ସୁଦ୍ଧା ଏଠାରେ ସୁବର୍ଣ୍ଣରେଖାର ଜଳସ୍ତର ରହିଛି ୯.୧୭ ମିଟର।
ବାପାଙ୍କୁ ମୁଖାଗ୍ନି ଦେବା ପାଇଁ ଯାଉଥିବାବେଳେ ଦୁର୍ଘଟଣା, ଚାଲିଗଲା ପୁଅ-ବୋହୂଙ୍କ ଜୀବନ
ନନ୍ଦିଘୋଷ ବ୍ୟୁରୋ: ଏମିତି ବି ଆସେ ମୃତ୍ୟୁ। ବାପାଙ୍କୁ ମୁଖାଗ୍ନି ଦେବା ପାଇଁ ଯାଉଥିଲେ ପୁଅବୋହୂ । ସଡକ ଦୁର୍ଘଟଣାରେ ଚାଲିଗଲା ପୁଅବୋହୂଙ୍କ ଜୀବନ । ବୌଦ୍ଧ ଥାନା ଅନ୍ତର୍ଗତ ରମ୍ଭିକଟା ଟୋଲଗେଟ ନିକଟରେ ସଡକ ଦୁର୍ଘଟଣା । ରାସ୍ତାରେ ଠିଆ ହୋଇଥିବା ଟ୍ରକ କୁ ପିଟିଲା କାର । କାର ରେ ବସିଥିବା ସ୍ୱାମୀ ସ୍ତ୍ରୀ ମୃତ । ମୃତକ ଦୁଇଜଣ ହେଲେ ନୟାଗଡ଼ ଜିଲ୍ଲା ଗଣିଆ ତେଲିସାହିର ରାଜକିଶୋର ସାହୁ ଓ ମିନତି ସାହୁ । ରାଜକିଶୋର ନିଜ ବାପା ବଲଭ ସାହୁଙ୍କୁ ମୁଖାଅଗ୍ନି ଦେବା ପାଇଁ ଗଣିଆ ଯାଉଥିଲେ । ଘଟଣାରେ ବୌଦ୍ଧ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ନୂଆପଡା ଜିଲ୍ଲା କୁମୁରକୁରି ଉଚ୍ଚ ବିଦ୍ୟାଳୟ ର ବିଜ୍ଞାନ ଶିକ୍ଷକ ରାଜକିଶୋର ସାହୁ ଓ ତାଙ୍କ ସ୍ତ୍ରୀ ମିନତି ସାହୁ । ମୃତ୍ୟୁ ଖବର ଶୁଣି ରାଜକିଶୋର ଗାଁ ଗଣିଆ ରେ ଏକ ଶୋକାକୁଳ ପରିବେଶ ସୃଷ୍ଟି ହୋଇଛି । ଗାଁ ମଶାଣିରେ ଜଳିବ ଗୋଟିଏ ପରିବାର ୩ ଜୁଇ ।
ଟିଟିଲାଗଡ଼ର ପୂର୍ତ୍ତ ବିଭାଗ ସହକାରୀ ଯନ୍ତ୍ରୀଙ୍କ ଘରେ ଭିଜିଲାନ୍ସ ରେଡ୍
ନନ୍ଦିଘୋଷ ବ୍ୟୁରୋ: ଭିଜିଲାନ୍ସ ଜାଲରେ ଆଉ ଜଣେ ବାବୁ । ବଲାଙ୍ଗିର ଜିଲ୍ଲା ଟିଟିଲାଗଡ଼ର ପୂର୍ତ୍ତ ବିଭାଗ ସହକାରୀ ଯନ୍ତ୍ରୀଙ୍କ ଘରେ ଭିଜିଲାନ୍ସ ରେଡ୍। ଯନ୍ତ୍ରୀ ଜଣକ ହେଲେ ଦିଲେଶ୍ଵର ମାଝୀ। ଆୟ ବହିର୍ଭୁତ ସଂପତ୍ତିକୁ ନେଇ ସେ ସ୍କାନରରେ ଥିଲେ। ଆଜି ଭିଜିଲାନସ ବିଭାଗ ପକ୍ଷରୁ ରେଡ୍ ଚାଲିଛି। ଟିଟିଲାଗଡ଼ରେ ଥିବା ଦିଲେଶ୍ଵର ମାଝୀଙ୍କ ସରକାରୀ ବାସଭବନ, ଅଫିସ ସମେତ ସମ୍ବଲପୁର, ବ୍ରଜରାଜନଗର, ଝାରସୁଗୁଡାରେ ଥିବା ତାଙ୍କ ସଂପର୍କିୀୟଙ୍କ ଘରେ ରେଡ୍ ଚାଲିଛି।
ଜାମ୍ମୁ କାଶ୍ମୀରରେ ସେନାର ଏନକାଉଣ୍ଟର
ନନ୍ଦିଘୋଷ ବ୍ୟୁରୋ: ଜାମ୍ମୁ କାଶ୍ମୀରରେ ସେନାର ଏନକାଉଣ୍ଟର। କିସ୍ତୱାଡ ଅଂଚଳରେ ୨ରୁ ୩ ଆତଙ୍କୀ ଅନୁପ୍ରବେଶ କରିଥିବା ସନ୍ଦେହ। ଯବାନଙ୍କୁ ଦେଖି ଗୁଳିମାଡ଼ କଲେ ଆତଙ୍କୀ। ଜବାବରେ ସେନାର ଯବାନଙ୍କ ପକ୍ଷରୁ ଦିଆଯାଉଛି କଡ଼ା ଜବାବ। ଆତଙ୍କୀଙ୍କୁ ଘେରି ରହିଛନ୍ତି ସେନାର ଯବାନ। ଗତକାଲି ରାତିରୁ ଚାଲିଛି ଜୋରଦାର ଅପରେସନ। ଗୁପ୍ତ ସୂଚନା ମିଳିବା ପରେ ରେଡ୍ କରିଥିଲେ ଯବାନ। ଆତଙ୍କୀ ଲୁଚିଥିବା ଅଂଚଳରୁ ଘେରି ତଲାସୀ ଅଭିଯାନ ଆରମ୍ଭ କରିଥିଲେ। ସୁରକ୍ଷାକର୍ମୀ ଆତଙ୍କୀ ଲୁଚିଥିବା ଚାତରୁର ଜଙ୍ଗଲରେ ପହଞ୍ଚିବା ପରେ ଯବାନଙ୍କ ଉପରକୁ ଗୁଳିମାଡ଼ କରିଥିଲେ ଆତଙ୍କୀ। ଏହାପରେ ସେନାର ଯବାନଙ୍କ ପକ୍ଷରୁ ଦିଆଯାଉଛି ଜୋରଦାର ଜବାବ। ଉଭୟଙ୍କ ମଧ୍ୟରେ ଗୁଳିବିନିମୟ ଜାରି ରହିଛି।ପ୍ରାଥମିକ ସୂଚନା ଅନୁସାରେ ଆତଙ୍କୀ ଜୈଶ ଏ ମହମ୍ମଦ ଆତଙ୍କବାଦୀ ସଂଗଠନର ବୋଲି ଜଣାପଡିଛି। ଆତଙ୍କବାଦୀଙ୍କୁ ଘେରି କରିଛନ୍ତି ଯବାନ। ଅତିରିକ୍ତ ସୁରକ୍ଷାବାହିନୀକୁ ମଧ୍ୟ ଘଟଣାସ୍ଥଳକୁ ପଠାଯାଇଛି। ଆତଙ୍କବାଦୀଙ୍କୁ ନିପାତ ନକରିବା ପର୍ଯ୍ୟନ୍ତ ଅପରେସନ ଜାରି ରହିଛି।
ଆଜି ନନ୍ଦିଘୋଷ ରଥର ହେବ ଦକ୍ଷିଣ ମୋଡ
ନନ୍ଦିଘୋଷ ବ୍ୟୁରୋ: ଆରମ୍ଭ ହେଲା ବାହୁଡ଼ା ପ୍ରସ୍ତୁତି। ଆରମ୍ଭ ହୋଇଛି ୩ ରଥର ଦକ୍ଷିଣ ମୋଡ଼ ପ୍ରକ୍ରିୟା। ଗତକାଲି ପ୍ରଥମେ ରଥରେ ବ୍ରେକ ଓ ଦଉଡି ସଂଯୋଗ କରାଯାଇ ଦର୍ପଦଳନ ରଥକୁ ଦକ୍ଷିଣମୋଡ କରାଯାଇଥିଲା । ପରେ ତାଳଧ୍ବଜ ଟଣାଯାଇ ନାକଚଣା ଦ୍ବାର ନିକଟକୁ ଅଣାଯାଇଛି। ତେବେ ରାତି ଓ ବର୍ଷା ହୋଇଯିବାରୁ ମହାପ୍ରଭୁ ନନ୍ଦିଘୋଷ ରଥ ଦକ୍ଷିଣମୋଡ଼ କରାଯାଇ ନ ଥିଲା। ଆଜି ନନ୍ଦିଘୋଷ ରଥର ହେବ ଦକ୍ଷିଣ ମୋଡ। ସକାଳ ୯ଟା ବେଳେ ନନ୍ଦିଘୋଷ ରଥକୁ ଦକ୍ଷିଣ ମୋଡ଼ କରାଯିବ । ଆସନ୍ତାକାଲି ଶୁକ୍ରବାର ମହାପ୍ରଭୁଙ୍କ ସନ୍ଧ୍ୟାଦର୍ଶନ । ବାହୁଡା଼ ନୀତି ଶୃଙ୍ଖଳିତ କରିବାପାଇଁ ସନ୍ଧ୍ୟା ଦର୍ଶନ ସମୟ ସଂକୁଚିତ କରାଯାଇଛି । ସେହି ଦିନ ସନ୍ଧ୍ୟା ୭ ଟାରୁ ସର୍ବସାଧାରଣ ଦର୍ଶନ ବନ୍ଦ ରହିବ ।
ଆସନ୍ତା ୦୭ ତାରିଖ ପର୍ଯ୍ୟନ୍ତ ଓଡ଼ିଶାର ବିଭିନ୍ନ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ସହ ବଜ୍ରପାତ ସମ୍ଭାବନା
ନନ୍ଦିଘୋଷ ବ୍ୟୁରୋ: ଆସନ୍ତା ୦୭ ତାରିଖ ପର୍ଯ୍ୟନ୍ତ ଓଡ଼ିଶାର ବିଭିନ୍ନ ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ସହ ବଜ୍ରପାତ ସମ୍ଭାବନା । ଦକ୍ଷିଣ ଝାଡ଼ଖଣ୍ଡ ଏବଂ ପଡ଼ୋଶୀ ଉପରେ ଘୂର୍ଣ୍ଣିବଳୟ ଜାରି ରହିଛି । ଏବେ ଏହା ସମୁଦ୍ର ପତନଠାରୁ ୫.୮ କିଲୋମିଟର ଉଚ୍ଚତାରେ ଦକ୍ଷିଣ ଆଡକୁ ଘୂର୍ଣ୍ଣିବଳୟ ରହିଥିବା ବେଳେ ଏହି ଟ୍ରପ ଲାଇନ ଏବେ ଦକ୍ଷିଣ-ପୂର୍ବ ରାଜସ୍ଥାନରୁ ଉତ୍ତର-ପଶ୍ଚିମ ବଙ୍ଗୋପସାଗର ଦେଇ କେନ୍ଦ୍ରୀୟ ମଧ୍ୟପ୍ରଦେଶ, ଉତ୍ତର ଛତିଶଗଡ଼ ଦେଇ ଗତି କରୁଛି । ଆଜି ରାଜ୍ୟର ସୁନ୍ଦରଗଡ଼, ସମ୍ୱଲପୁର, ଝାରସୁଗୁଡ଼ା, କୋରାପୁଟ, ସୋନପୁର, ବରଗଡ ଏବଂ କଳାହାଣ୍ଡି ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ପବନ ସହ ବର୍ଷା ସମ୍ଭାବନା ରହିଛି ।
ପବନର ବେଗ ଘଣ୍ଟାପ୍ରତି ୩୦-୪୦ କିଲୋମିଟର ବେଗରେ ବହିବା ସହିତ ଅନେକ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ବି ହୋଇପାରେ । ସେଥିପାଇଁ ଏହି ସବୁ ଜିଲ୍ଲା ମାନଙ୍କୁ ଅରେଞ୍ଜ ଆଲର୍ଟ ଜାରି କରିଛି ବିଭାଗ । ପୁଣି ୫ ତାରିଖ ଓ ୬ ତାରିଖ ଦିନ ବି ରାଜ୍ୟର ଝାରସୁଗୁଡା ଓ ବରଗଡ଼ ଜିଲ୍ଲାର ଗୋଟିଏ କିମ୍ବା ଦୁଇଟି ସ୍ଥାନରେ ପବନର ସହିତ ଘଣ୍ଟାପ୍ରତି ୩୦ରୁ ୪୦ କିଲୋମିଟର ବେଗରେ ପବନ ବହିବା ସହିତ ପ୍ରବଳରୁ ଅତି ପ୍ରବଳ ବର୍ଷା ନେଇ ଆଲର୍ଟ ଜାରି କରିଛି ବିଭାଗ ।
ରକ୍ତର ନଦୀ ବୁହାଇବାକୁ ଧମକ ଦେଉଥିବା ବିଲାୱଲ ଭୁଟ୍ଟୋଙ୍କ ନରମିଲା ସ୍ଵର
ନନ୍ଦିଘୋଷ ବ୍ୟୁରୋ: ରକ୍ତର ନଦୀ ବୁହାଇବାକୁ ଧମକ ଦେଉଥିବା ବିଲାୱଲ ଭୁଟ୍ଟୋଙ୍କ ନରମିଲା ସ୍ଵର। ଭାରତର ସିନ୍ଧୁ ଜଳ ଚୁକ୍ତି ରଦ୍ଦ ପ୍ରସଙ୍ଗକୁ ନେଇ ନଇଁଲେ ପାକିସ୍ତାନର ପୂର୍ବତନ ବୈଦେଶିକ ମନ୍ତ୍ରୀ ବିଲାୱଲ ଭୁଟ୍ଟୋ ଜର୍ଦ୍ଦାରୀ। ଆତଙ୍କବାଦ ପ୍ରସଙ୍ଗକୁ ନେଇ ତାଲିବାନକୁ କଲେ ଟାର୍ଗେଟ। କହିଲେ ଆତଙ୍କବାଦୀଙ୍କୁ ଚୋରା ଅସ୍ତ୍ରଶସ୍ତ୍ର ଚାଲାଣ ବନ୍ଦ କରିବାକୁ ପଡିବ। ଆତଙ୍କବାଦ ବିରୋଧ ଲଢେଇରେ ଭାରତକୁ ସାମିଲ ହେବାକୁ ଆହ୍ଵାନ କରିଛନ୍ତି ବିଲାୱଲ ଭୁଟ୍ଟୋ। କହିଛନ୍ତି, ଭାରତ ଦୀର୍ଘ ସମୟ ଧରି ପାକିସ୍ତାନକୁ ଆତଙ୍କବାଦୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଆସୁଛି। କିନ୍ତୁ ସେ ପ୍ରତ୍ୟେକ ଥର ନିଜର ଦାୟିତ୍ୱ ଏଡାଇ ଦେଉଥିଲା।ଭାରତ ଏବଂ ପାକିସ୍ତାନ ପରସ୍ପରର ବିରୋଧୀ ନୁହଁନ୍ତି। ଇସଲାମାବାଦ ପଲିସି ରିସର୍ଚ୍ଚ ଇନଷ୍ଟିଚ୍ୟୁଟରେ ଆୟୋଜିତ ଏକ ଅନ୍ତର୍ଜାତୀୟ ସମ୍ମିଳନୀରେ ଯୋଗ ଦେଇ ବିଲାୱାଲ ଭୁଟ୍ଟୋ ଏହା କହିଛନ୍ତି।
ଆତଙ୍କବାଦ ବିରୋଧରେ ଲଢ଼ିବା ପାଇଁ ପାକିସ୍ତାନ ଭାରତ ସହିତ ଏକ ଐତିହାସିକ ଏବଂ ଅଭୂତପୂର୍ବ ସହଭାଗିତା ଗଠନ କରିବାକୁ ପ୍ରସ୍ତୁତ। ଭାରତ ଏବଂ ପାକିସ୍ତାନ ପଡ଼ୋଶୀ ଭାବରେ ରହିବା ଉଚିତ ଏବଂ ଆତଙ୍କବାଦୀଙ୍କଠାରୁ ଲୋକମାନଙ୍କୁ ସୁରକ୍ଷା ଦେବା ପାଇଁ ଆଗକୁ ଆସିବା ଉଚିତ । ସିନ୍ଧୁ ଜଳ ଚୁକ୍ତିନାମା ସ୍ଥଗିତ ରହିବା ଯୋଗୁଁ ବିଲାୱାଲ ଭୁଟ୍ଟୋ ଅନେକ ଥର ଭାରତ ବିରୁଦ୍ଧରେ କଠୋର ଶବ୍ଦ ବ୍ୟବହାର କରିଥିଲେ। କିନ୍ତୁ ଏବେ ସେ ସମସ୍ତ ବିଚାରାଧୀନ ବିବାଦର ସମାଧାନ ପାଇଁ ଭାରତ ସମ୍ମୁଖରେ ହାତ ଯୋଡିଛନ୍ତି।ପାଣିକୁ ଅସ୍ତ୍ର କରନାହିଁ ବୋଲି ଭାରତକୁ ନିବେଦନ କରିଛନ୍ତି ବିଲାୱଲ ଭୁଟ୍ଟୋ। ଗତ ୨୨ ଏପ୍ରିଲରେ ପହଲଗାଓଁରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ସିନ୍ଧୁ ଜଳ ଚୁକ୍ତିନାମାକୁ ସ୍ଥଗିତ ରଖିବା ସମେତ ଅନେକ ବଡ଼ ନିଷ୍ପତ୍ତି ନେଇଥିଲା। ଯାହାକୁ ନେଇ ପାକିସ୍ତାନ ସିମଲା ଚୁକ୍ତିନାମାକୁ ବାତିଲ କରିଦେଇଥିଲା । ଭାରତର କାର୍ଯ୍ୟାନୁଷ୍ଠାନ ପରେ ବିଲାୱାଲ ଭୁଟ୍ଟୋ କହିଥିଲେ ଯେ ସିନ୍ଧୁ ନଦୀରେ ପାଣି କିମ୍ବା ସେମାନଙ୍କର ରକ୍ତ ପ୍ରବାହିତ ହେବ।
ହିମାଚଳରେ ବର୍ଷାର ତାଣ୍ଡବ, ବାଦଲଫଟା ବର୍ଷାରୁ ସ୍ଥିତି ବେକାବୁ
ନନ୍ଦିଘୋଷ ବ୍ୟୁରୋ : ହିମାଚଳରେ ବର୍ଷାର ତାଣ୍ଡବ। ବାଦଲଫଟା ବର୍ଷାରୁ ସ୍ଥିତି ବେକାବୁ ହୋଇଛି। ଭୂସ୍ଖଳନ, କୋଠା ଭୁଶୁଡ଼ିବା ସହ ଅନେକ ଲୋକଙ୍କ ମୃତ୍ୟୁ ହେଲାଣି। ମୌସୁମୀ ପ୍ରକୋପ ସହିତ ଲଢେଇ କରୁଛନ୍ତି ହିମାଚଳ ପ୍ରଦେଶବାସୀ। କିଛି ସ୍ଥାନରେ ପ୍ରବଳ ବର୍ଷା ରେକର୍ଡ ହୋଇଛି। ଯାହା ଫଳରେ ରାସ୍ତା ଅବରୋଧ, ଭୂସ୍ଖଳନ, କୋଠା ଭୁଶୁଡ଼ି ପଡ଼ିବା ଖବର ଆସିଛି। ମୌସୁମୀ ବର୍ଷାରୁ ଏବେଯାଏଁ ୫୧ ଜଣଙ୍କର ମୃତ୍ୟୁ ହୋଇଥିବା ଜଣାପଡିଛି। ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି ସିମଲା ଓ ମଣ୍ଡି। ୨୦ ଜଣ ନିଖୋଜ ହୋଇଯାଇଛନ୍ତି। ବିଶେଷକରି ପାହାଡିଆ ଏବଂ ମାଟି ଧସୁଥିବା ଅଂଚଳରେ ପର୍ଯ୍ୟଟକ ଯାତ୍ରା ନକରିବାକୁ ପରାମର୍ଶ ଦିଯାଆଇଛି। ଚମ୍ବା, କୁଲୁ, ସିମଲା, କାଙ୍ଗଡ଼ା, ଉନା, ହମିରପୁର, ବିଳାସପୁର, ମଣ୍ଡି, ସୋଲନ ଏବଂ ସିରମୌର ଜିଲ୍ଲାର ବିଭିନ୍ନ ସ୍ଥାନରେ ବର୍ଷା ରେକର୍ଡ ହୋଇଛି। ସିମଲା, ସିମୌର, ମଣ୍ଡି ଏବଂ କାଙ୍ଗଡ଼ା ଜିଲ୍ଲାକୁ ପ୍ରବଳ ବର୍ଷା ନେଇ ଅରେଞ୍ଜ ଆଲର୍ଟ ଜାରି କରାଯାଇଛି ।
ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣା, ଦ୍ବିତୀୟ ଦିନରେ କଳାବ୍ୟାଜ ପିନ୍ଧି ପ୍ରତିବାଦ
ଭୁବନେଶ୍ବର : ବିଏମସି ଅତିରିକ୍ତ କମିଶନରଙ୍କୁ ଆକ୍ରମଣ ଘଟଣା। ଦ୍ବିତୀୟ ଦିନରେ କଳାବ୍ଯାଜ ପିନ୍ଧି ପ୍ରତିବାଦ। ସମୂହ ଛୁଟିରେ ଅଧିକାରୀ ଓ କର୍ମଚାରୀ। ସୁରକ୍ଷିତ ବାତାବରଣ ନଫେରିବା ଯାଏ କାମ କରିବାକୁ ନାରାଜ କର୍ମଚାରୀ। ବିଏମସି ମେୟରଙ୍କ ଅଧ୍ୟକ୍ଷତାରେ ଆଜି ବସିଥିଲା ଗୁରୁତ୍ବପୁର୍ଣ ବୈଠକ। ଷ୍ଟାଣ୍ଡିଂ କମିଟି ଅଧ୍ଯକ୍ଷଙ୍କ ସମେତ ସ୍ମାର୍ଟସିଟି ଅଧିକାରୀ ଥିଲେ ଉପସ୍ଥିତ। ବିଏମସି ଅଫିସରେ ସିସିଟିଭି କାମ କରୁ ନଥିବା ନେଇ ହୋଇଥିଲା ଅଭିଯୋଗ। ସେହିପରି ଢିଲା ସୁରକ୍ଷା ବ୍ୟବସ୍ଥା ନେଇ ସୁରକ୍ଷା ଏଜେନ୍ସିକୁ ଦୋଷ ଦେଇଛନ୍ତି ଅଧିକାରୀ ଓ କର୍ମଚାରୀ। ତେଣେ ସ୍ମାର୍ଟ ସିଟି ଅଧୀନରୁ ବିଏମସି ଅଫିସ ଭିତର ସିସିଟିଭିକୁ ନିଜ ନିୟନ୍ତ୍ରଣକୁ ନେଇଛି ବିଏମସି I ଘଟଣାର ମାଷ୍ଟର ମାଇଣ୍ଡ ସମେତ ସମସ୍ତ ଅଭିଯୁକ୍ତଙ୍କୁ ଗିରଫ ଦାବି କରିଛନ୍ତି ମେୟର। ତେଣେ ମାଡ଼ ଘଟଣା ପରେ ବଦଳିଛି ସିକୁରିଟି ବ୍ୟବସ୍ଥା। ଏଣିକି ଗନମ୍ୟାନ୍ ଜଗିବେ ବିଏମସି ଅଫିସ I
ଭୁବନେଶ୍ୱର ମହାନଗର ନିଗମରେ ୨ ଦିନ ହେଲା କାର୍ଯ୍ୟବନ୍ଦ ରହିଛି। ଚାଲିଛି କେବଳ ପରିମଳ କାମ । ବିଏମସି କମିଶନର ଓ ଅତିରିକ୍ତ କମିଶନରଙ୍କ ସହ ଆଲୋଚନା କରିଛନ୍ତି ପୋଲିସ କମିଶନର I ଘଟଣାର ତଦନ୍ତ ଚାଲିଛି। ୫ ଜଣଙ୍କୁ ଗିରଫ କରାଯାଇଛି। ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ପୋଲିସ କମିଶନର। ଦୁଇଦିନ ବିତିଯାଇଥିଲେ ସୁଦ୍ଧା ମୁଖ୍ୟ ଅଭିଯୁକ୍ତ କୁହାଯାଉଥିବା ବିଜେପି ନେତା ଜଗନ୍ନାଥ ପ୍ରଧାନଙ୍କୁ ଗିରଫ କରାଯାଇନାହିଁ। ଜଗନ୍ନାଥଙ୍କ ଗିରଫ ଦାବିରେ ଜୋର ଧରୁଛି ଆନ୍ଦୋଳନ।
‘ରଥଯାତ୍ରା ମହାବିଭ୍ରାଟ ନେଇ ପୁରୀକୁ ଯିବାକୁ ଡରୁଛନ୍ତି ଭକ୍ତ’
ଭୁବନେଶ୍ବର : ଘନ ଘନ ସମୀକ୍ଷା, ଜୋରଦାର ପ୍ରସ୍ତୁତି ହେଲେ ଫଳ ଶୂନ। ପୁରୀରେ ରଥ ବିଭ୍ରାଟ ପରେ ଦଳାଚକଟାରେ ଲୋକେ ମଲେ।ପ୍ରଥମବର୍ଷ ରଥଯାତ୍ରାରୁ କିଛି ଶିଖିଲେନି ବିଜେପି ସରକାର। ରଥଯାତ୍ରା ପରିଚାଳନାରେ ସଂପୂର୍ଣ୍ଣ ଫେଲ। ସରକାର କେବଳ ସମୀକ୍ଷା ବୈଠକ କରି ଫଟୋ ଉଠାଇ ନିଜର କାମ ସାରିଦେଉଛନ୍ତି। ଭିଡ ନିୟନ୍ତ୍ରଣ କରିବାରେ ବିଫଳ ହୋଇଛନ୍ତି। ଏସବୁ ପରେ ପୁରୀ ଯିବାକୁ ଭୟ କଲେଣି ଭକ୍ତ। ରଥଯାତ୍ରାରେ ପୋଲିସକୁ ଯେପରି ସଜାଗ ରଖିବା କଥା ବିଜେପି ସରକାର ତାହା କଲେନି। ୨୪ ବର୍ଷ ଭିତରେ ନବୀନ ପଟ୍ଟନାୟକ ଶାସନରେ ଏମିତି କେବେ ଘଟିନଥିଲା। ଗୁଣ୍ଡିଚା ମନ୍ଦିର ଆଗରେ ଦଳଚକଟା ସମୟରେ ମନ୍ଦିର ପ୍ରଶାସନ ଓ ପୋଲିସ କଣ କରୁଥିଲେ ବୋଲି ପ୍ରଶ୍ନ କରିଛି ବିଜେଡି। ସେପଟେ କଂଗ୍ରେସ କହିଛି ରଥଯାତ୍ରା ବିଭ୍ରାଟ ପାଇଁ ବିଜେପି ସରକାର ଧ୍ବଂସ ହୋଇଯିବ। ଗତବର୍ଷ ବଡ ଠାକୁରଙ୍କୁ ଚାଳମାଳରେ ପକାଇଦେଲେ। ଆଉ ଏବେ ଦଳାଚକଟାରେ ଭକ୍ତଙ୍କ ଗଲା ଜୀବନ। ରଥଯାତ୍ରା ଦିନ ନନ୍ଦିଘୋଷ କିଛି ପହଣ୍ଡ ମାତ୍ର ଗଡିଲା। ଏହା କଣ ବିଜେପି ସରକାରର ଓଡିଆ ଅସ୍ମିତା ବୋଲି ପଚାରିଛି କଂଗ୍ରେସ ।
ଗୁଣ୍ଡିଚା ଯାତ୍ରାରେ ବିଶୃଙ୍ଖଳା ପରେ ବାହୁଡ଼ା ଯାତ୍ରାକୁ ସୁରୁଖୁରୁରେ ଶେଷ କରିବାକୁ ଅଣ୍ଟା ଭିଡିଛନ୍ତି ସରକାର। ଠେଲାପେଲା, ଦଳାଚକଟା କିପରି ନହେବ। ପରମ୍ପରା ଅନୁସାରେ ସବୁ କାମ କିପରି ହେବ ସେ ନେଇ ମୁଖ୍ୟମନ୍ତ୍ରୀ ପୁରୀ ଯାଇ ସମୀକ୍ଷା କରିଛନ୍ତି।ତେବେ ପରିଚାଳନାରେ ସରକାର ବିଫଳ ପରେ ବିରୋଧୀ ସରକାରଙ୍କୁ ଘନଘନ ଟାର୍ଗେଟ କରୁଛନ୍ତି। ସେପଟେ ଆଇନମନ୍ତ୍ରୀ କହିଛନ୍ତି, ମହାପ୍ରଭୁଙ୍କ ରଥଯାତ୍ରା ସୁରୁଖୁରୁରେ ହେବ।ଜଗନ୍ନାଥଙ୍କ ଆଶୀର୍ବାଦରେ ରଥଯାତ୍ରା ଭଲରେ ଶେଷ ହେବ। ଏଥିଲାଗି ଯାହା ଆବଶ୍ୟକ ସବୁ ବ୍ୟବସ୍ଥା କରାଯାଇଛି କହିଛନ୍ତି ଆଇନମନ୍ତ୍ରୀ । ଆଗକୁ ବାହୁଡ଼ା ଯାତ୍ରା, ସୁନାବେଶ ଓ ନିଳାଦ୍ରୀବିଜେ। ଏହାକୁ ସୁରୁଖୁରୁରେ ଶେଷ କରିବାକୁ ବିରୋଧୀ ସରକାରଙ୍କୁ ପରାମର୍ଶ ଦେଇଛନ୍ତି। ଅନ୍ୟପଟେ ରଥଯାତ୍ରା ବିଭ୍ରାଟକୁ ନେଇ ଥମୁନି ରାଜନୈତିକ ବୟାନବାଜି।