ନନ୍ଦିଘୋଷ ବ୍ୟୁରୋ : ପୁଣି ଆମେରିକା ସହ ଇରାନର ବଢ଼ିଲା ତିକ୍ତତା। ନିଜର ୟୁରାନିୟମ ଏନରିଚମେଣ୍ଟ କାର୍ଯ୍ୟକ୍ରମ ବନ୍ଦ ହେବ ନାହିଁ ବୋଲି କହିଛି ଇରାନ। ସାନି କଟକଣା ଓ ସାମରିକ ଧମକ ପରେ ବି ମୁଣ୍ଡ ନୋଇଁବାକୁ ଚାହୁଁନି ଇରାନ। ଇରାନ ବୈଦେଶିକ ମନ୍ତ୍ରୀ ଆବାସ ଆରାଗାଚି କହିଛନ୍ତି- ନିଜ ଦେଶର ଆଣବିକ ନୀତିକୁ ବାତିଲ କରାଯିବ ନାହିଁ କିମ୍ବା କାହାର ଚାପ ଆଗରେ ତାଙ୍କ ଦେଶ ମୁଣ୍ଡ ନୁଆଁଇବ ନାହିଁ। ଏହା ସହ ଆମେରିକା ସହ କଥାବାର୍ତ୍ତାର ସଫଳତା ନେଇ ସେ ପ୍ରଶ୍ନ ଉଠାଇଛନ୍ତି। ଆଣବିକ ପ୍ରସଙ୍ଗ ନେଇ ଓମାନରେ ହୋଇଥିବା ଆମେରିକା-ଇରାନ କଥାବାର୍ତ୍ତା ପରେ ଆରାଗାଚି କିହଛନ୍ତି- ଇରାନ ନିଜର ୟୁରାନିୟମ ଏନରିଚମେଣ୍ଟ ପ୍ରକ୍ରିୟା ଜାରି ରଖିବ। ଏହି ପ୍ରସଙ୍ଗକୁ ନେଇ କିଛି ମାସ ତଳେ ଇସ୍ରାଏଳ ସହ ମିଶି ଇରାନ ଉପରେ ହମଲା କରିଥିଲା ଆମେରିକା। ସେପଟେ ଇରାନ ବିରୋଧରେ ଆମେରିକା ଲଗାଇଥିବା ଆର୍ଥିକ କଟକଣାକୁ ହଟାଇବା ଲାଗି ଦାବି କରିଛି ଇରାନ। ଇରାନ ନିକଟରେ ଆମେରିକା ୟୁଏସଏସ ଆବ୍ରାହମ ଲିଙ୍କନ ସାମରିକ ଜାହାଜ ମୁତୟନ କରିଥିଲେ ବି ତାଙ୍କ ଦେଶ ଡରିବ ନାହିଁ ବୋଲି ସେ କହିଛନ୍ତି। ଗତ ଡିସେମ୍ବରରୁ ଆରମ୍ଭ ହୋଇଥିବା ଇରାନ ହିଂସାରେ ୨ ହଜାର ୧୧୭ ଲୋକଙ୍କ ମୃତ୍ୟୁ ଘଟିଛି ବୋଲି ଇରାନ କହୁଥିବାବେଳେ ମୃତ୍ୟୁ ସଖ୍ଯା ୭ ହଜାରରୁ ଅଧିକ ବୋଲି କହିଛି ଆମେରିକାର ମାନବାଧିକାର ସଂସ୍ଥା।
ଜାପାନର ପ୍ରଥମ ମହିଳା ପ୍ରଧାନମନ୍ତ୍ରୀ ହେଲେ ସାନାଏ ତାକାଇଚି
ନନ୍ଦିଘୋଷ ବ୍ୟୁରୋ: ଜାପାନର ପ୍ରଥମ ମହିଳା ପ୍ରଧାନମନ୍ତ୍ରୀ ହେଲେ ସାନାଏ ତାକାଇଚି। ଅନୁଷ୍ଠିତ ନିର୍ବାଚନରେ ସାନାଏଙ୍କୁ ମିଳିଛି ବହୁମତ। ଶାସକ ଲିବରାଲ ଡେମୋକ୍ରାଟିକ ପାର୍ଟି ବା ଏଲଡିପିର ସଭାପତି ସାନାଏଙ୍କ ନୀତିକୁ ଦେଶବାସୀ କରିଛନ୍ତି ସମର୍ଥନ। ଗତ ୮ ତାରିଖରେ ହୋଇଥିବା ନିର୍ବାଚନରେ ଏଲଡିପି ଦୁଇ ତୃତୀୟାଂଶ ଆସନରେ ବିଜୟ ଲାଭ କରିଥିଲା। ଜାପାନକୁ ଅଧିକ ଶକ୍ତିଶାଳୀ ଓ ବିକଶିତ କରିବା ଦିଗରେ ସେ କାର୍ଯ୍ଯ କରିବେ ବୋଲି କହିଛନ୍ତି ସାନାଏ। ୪୬୫ ଆସନ ବିଶିଷ୍ଟ ଜାପାନ ନିମ୍ନ ସଦନରେ ଏଲଡିପି ମ୍ୟାଜିକ ନମ୍ବରଠାରୁ ବହୁ ଅଧିକ ଆସନ ଅର୍ଥାତ ୩୧୬ ଆସନରେ ବିଜୟୀ ହୋଇଛି।
ଏଲଡିପିକୁ ବି ସମର୍ଥନ କରୁଛି ଜାପାନ ଇନୋଭେସନ ପାର୍ଟି। ୧୦୯ ଆସନରେ ବିରୋଧୀଙ୍କ ବିଜୟ ଘଟିଛି। ଶେଷ ଥର ଲାଗି ୧୯୮୬ରେ ଏଲଡିପି ସର୍ବାଧିକ ୩୦୦ ଆସନ ଲାଭ କରିଥିଲା। ଏଲଡିପିର ପ୍ରତିଷ୍ଠା ୧୯୫୫ରେ ହୋଇଥିବାବେଳେ ପ୍ରଥମ ଥର ଲାଗି ଦଳ ସର୍ବାଧିକ ୩୧୬ ଆସନ ହାସଲ କରିଛି। ଯଦିଓ ନିମ୍ନ ସଦନରେ ଏଲଡିପି ଭଲ କରିଛି ତଥାପି ଉଚ୍ଚ ସଦନରେ ଦଳର ସଂଖ୍ୟା ଗରିଷ୍ଠତା ନାହିଁ। ୨୪୮ ଆସନ ବିଶିଷ୍ଟ ଉଚ୍ଚ ସଦନରେ ଏଲଡିପି ୧୦୧ ସଦସ୍ୟ ଥିବାବେଳେ ବିରୋଧୀଙ୍କ ସଂଖ୍ଯା ରହିଛି ୧୨୧। ଚୀନ ସହ ଜାପାନର ବିବାଦ ବଢୁଥିବାରୁ ଆମେରିକା ସହ ସମ୍ପର୍କ ମଜଭୁତ କରିବାରେ ଲାଗିଛି ଜାପାନ। ଜାପାନର ନିରାପତ୍ତା, ପ୍ରବାସୀ ସମସ୍ୟା ଓ ଅଭିବୃଦ୍ଧିକୁ ଫୋକସ କରିପାରନ୍ତି ନୂଆ ପ୍ରଧାନମନ୍ତ୍ରୀ।
ଶିଶୁ ଭବନ ଛକରେ ସଡ଼କ ଦୁର୍ଘଟଣା ; ଓଭର ବ୍ରିଜ ବ୍ୟାରିକେଡ ଭାଙ୍ଗି ତଳକୁ ଖସି ପଡ଼ିଲା କାର
ଭୁବନେଶ୍ବର : ଭୁବନେଶ୍ୱର ଶିଶୁ ଭବନ ଛକରେ ସଡ଼କ ଦୁର୍ଘଟଣା । ଶିଶୁ ଭବନ ଓଭର ବ୍ରିଜ ବ୍ୟାରିକେଡ଼ ଭାଙ୍ଗି ତଳକୁ ଖସି ପଡ଼ିଲା କାର। ପ୍ରାୟ 10 ଫୁଟ ତଳକୁ ଖସିଲା କାର l କେଦାର ପଲ୍ଲୀ ବସ୍ତିର ଏକ ଘର ଉପରେ ପଡିଲା କାର l ଦୁର୍ଘଟଣାରେ ଜଣେ ଆହତ ହୋଇଥିବା ବେଳେ କାର ଡ୍ରାଇଭର ଅଳ୍ପକେ ବର୍ତ୍ତି ଯାଇଛନ୍ତି । କାର ଡ୍ରାଇଭର ଜଣଙ୍କ ଅତ୍ୟଧିକ ମଦ୍ୟପାନ ଓ ଗାଡି ଅଧିକ ବେଗରେ ଚଳାଇଥିବାରୁ ଏଭଳି ଦୁର୍ଘଟଣା ଘଟାଇଥିବା ସ୍ଥାନୀୟ ଯୁବକ ମାନେ କହୁଛନ୍ତି ।
ବ୍ରିଟେନ ପ୍ରଧାନମନ୍ତ୍ରୀଙ୍କ ଚିଫ ଅଫ ଷ୍ଟାଫ ମୋର୍ଗାନ ମାକସୁଇନଙ୍କ ଇସ୍ତଫା
ନନ୍ଦଘୋଷ ବ୍ୟୁରୋ : ବ୍ରିଟେନ ପ୍ରଧାନମନ୍ତ୍ରୀ କେର ଷ୍ଟର୍ମରଙ୍କ ଚିଫ ଅଫ ଷ୍ଟାଫ ମୋର୍ଗାନ ମାକସୁଇନଙ୍କ ଇସ୍ତଫା। ଆମେରକା ଲାଗି ବ୍ରିଟେନର ରାଷ୍ଟ୍ରଦୂତ ଭାବେ ନିଯୁକ୍ତ କରିବା ଲାଗି ପିଟର ମାଣ୍ଡେଲସନଙ୍କ ନା ସୁପାରିସ କରିବା ତାଙ୍କ ପାଇଁ ପଡିଲା ମହଙ୍ଗା। ଆମେରିକାର ବହୁଚର୍ଚ୍ଚିତ ଜେଫେରୀ ଏପଷ୍ଟିନଙ୍କ ସହ ସମ୍ପର୍କ ଥିବା ସତ୍ତ୍ବେ ମାଣ୍ଡେଲସନଙ୍କ ନାଁ ସୁପାରିସ କରିବା କାରଣରୁ ସେ ନୈତିକତା ଦୃଷ୍ଟିରୁ ଇସ୍ତଫା ଦେଇଛନ୍ତି।
ଗତ ଜାନୁଆରୀ ୩୦ରେ ଆମେରିକା ନ୍ୟାୟ ବିଭାଗ ପକ୍ଷରୁ ପ୍ରକାଶିତ ଏପଷ୍ଟିନ ଫାଇଲରେ ମାଣ୍ଡେଲସନଙ୍କ ସହ ଏପଷ୍ଟିନଙ୍କ ସମ୍ପର୍କ ଥିବା ଜଣାପଡ଼ିଥିଲା। ଏହି ଘଟଣାକୁ ନେଇ ଲେବର ପାର୍ଟି ସରକାରରେ ବାଦ ବିବାଦ ଜୋର ଧରିଥିଲା। ମାଣ୍ଡେଲସନଙ୍କ ନାଁ ସୁପାରିସ କରି ସେ ଭୁଲ୍ କରିଛନ୍ତି ଏବଂ ଏହି ଭୁଲ୍ ଲାଗି ସେ ନିଜେ ଦାୟୀ ବୋଲି କହିଛନ୍ତି ମାକସୁଇନ। ମାଣ୍ଡେଲସନଙ୍କ ନାଁ ପ୍ରସ୍ତାବ ଦିଆଯିବା ପରେ ଦଳରେ ଏକ ରକମ ବିଦ୍ରୋହ ସୃଷ୍ଟି ହୋଇଥିଲା। ସେପଟେ ଏପଷ୍ଟିନଙ୍କ ସହ ତିବ୍ବତୀୟ ଧର୍ମଗୁରୁ ଦଲାଇଲାମାଙ୍କ ସହ ସମ୍ପର୍କ ରହିଛି ବୋଲି ଚାଲିଥିବା ଚର୍ଚ୍ଚାକୁ ଦଲାଇଲାମାଙ୍କ ଅଫିସ ପକ୍ଷରୁ ଖଣ୍ଡନ କରାଯାଇଛି। ଏପଷ୍ଟିନଙ୍କୁ ଦଲାଇଲାମା କେବେ ବି ସାକ୍ଷାତ କରିନାହାନ୍ତି ବୋଲି କୁହାଯାଇଛି।
ଖଲିସ୍ତାନୀ ଆତଙ୍କବାଦୀଙ୍କୁ ଝଟକା …ଭାରତକୁ କ୍ଷତି ପହଞ୍ଚାଇଲେ କାନାଡ଼ା ନେବ ଦୃଢ କାର୍ଯ୍ୟାନୁଷ୍ଠାନ
ନନ୍ଦିଘୋଷ ବ୍ୟୁରୋ: ଖଲିସ୍ତାନୀ ଆତଙ୍କବାଦୀଙ୍କୁ ଝଟକା । ଭାରତକୁ କ୍ଷତିପହଞ୍ଚାଇବାକୁ ଚାହିଁଲେ କାନାଡ଼ା ନେବ ଦୃଢ କାର୍ଯ୍ୟାନୁଷ୍ଠାନ । ଦୁଇ ଦେଶ ମଧ୍ୟରେ ସୁଦୃଢ ହେଉଛି ସମ୍ପକ । କାନାଡା ଗସ୍ତରେ ଥିବା ଭାରତର ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ଉପସ୍ଥିତିରେ ଦୁଇ ଦେଶ ମଧ୍ୟରେ ସୁରକ୍ଷା ଆଲୋଚନା ହୋଇଛି । ବୈଠକ ସମୟରେ, ଅଜିତ ଡୋଭାଲ କାନାଡାର ଜାତୀୟ ସୁରକ୍ଷା ଏବଂ ଗୁଇନ୍ଦା ପରାମର୍ଶଦାତା ଏବଂ ପ୍ରଧାନମନ୍ତ୍ରୀଙ୍କ ଡେପୁଟି କ୍ଲର୍କ ନାଥାଲି ଡ୍ରୋଇନଙ୍କ ସହିତ କଥା ହୋଇଛନ୍ତି ।
ଭାରତ ଏବଂ କାନାଡା ଜାତୀୟ ସୁରକ୍ଷା, ଆଇନ ପ୍ରବର୍ତ୍ତନ ଏବଂ ସାଇବର ସୁରକ୍ଷା ଉପରେ ସହଯୋଗକୁ ଆହୁରି ଶକ୍ତ କରିବା ପାଇଁ ଏକ ମିଳିତ କାର୍ଯ୍ୟ ଯୋଜନା ଉପରେ ସହମତ ପ୍ରକାଶ କରିଛନ୍ତି । ବୈଦେଶିକ ମନ୍ତ୍ରଣାଳୟ କହିଛି ଯେ ଏହି ବୈଠକ ଭାରତ ଏବଂ କାନାଡା ମଧ୍ୟରେ ନିୟମିତ ଦ୍ୱିପାକ୍ଷିକ ସୁରକ୍ଷା ଆଲୋଚନାର ଏକ ଅଂଶ । ଉଭୟ ପକ୍ଷ ସେମାନଙ୍କ ଦେଶ ଏବଂ ନାଗରିକଙ୍କ ସୁରକ୍ଷା ବୃଦ୍ଧି ପାଇଁ ପଦକ୍ଷେପ ଉପରେ ସମୀକ୍ଷା କରିଥିଲେ।
ଏପ୍ରିଲ ପହିଲାରୁ ସାରା ଦେଶରେ ଲାଗୁ ହେବ ନୂଆ ଆୟକର ଆଇନ-୨୦୨୫
ନୂଆଦିଲ୍ଲୀ : ଆସନ୍ତା ଏପ୍ରିଲ ପହିଲାରୁ ସାରା ଦେଶରେ ଲାଗୁ ହେବ ନୂଆ ଆୟକର ଆଇନ-୨୦୨୫ । ଏହି ନୂଆ ଆଇନ ଅନୁଯାୟୀ ଆୟକର ଦାତା ପ୍ରତ୍ଯକ୍ଷ କର ଉପରେ ରିଟର୍ଣ୍ଣ ଫାଇଲ କରିବେ। ଆୟକର ରିଟର୍ଣ୍ଣ ଫାଇଲ କେତେ ସରଳ ଓ ସହଜ ହେବ ଏ ନେଇ ୪ଟି ବର୍ଗରେ ମତାମତ ଲୋଡ଼ିଛି ଆୟକର ବିଭାଗ। ଆୟକର ଭାଷାର ସରଳୀକରଣ, ଦ୍ବନ୍ଦ୍ବ ମୁକ୍ତ ରିଟର୍ଣ୍ଣ ଫାଇଲ ବ୍ଯବସ୍ଥା, ଆୟକର ଅନୁପାଳନ ବର୍ଡ଼ନ ହ୍ରାସ ଓ ପୁରୁଣା ବ୍ଯବସ୍ଥାରେ ଥିବା ଅନାବଶ୍ଯକ ନିୟମ ହଟାଇବାକୁ ମତାମତ ଦେଇପାରିବେ କରଦାତା।
ଏକ ପ୍ରେସ ବିଜ୍ଞପ୍ତି ଜାରି ଆୟକର ବିଭାଗ ପକ୍ଷରୁ କୁହାଯାଇଛି ଚୂଡାନ୍ତ ବିଜ୍ଞପ୍ତି ପ୍ରକାଶ ପାଇବା ପୂର୍ବରୁ ପ୍ରତ୍ଯେକ ଆୟକରଦାତା ସେମାନଙ୍କ ମତାମତ ଆୟକର ପୋର୍ଟାଲରେ ପ୍ରଦାନ କରିପାରିବେ। ଏହି ଲିଙ୍କଟି ଲାଇଭ ମୋଡ଼ରେ ରହିଛି। ଏହା ଗତ ୪ ତାରିଖରୁ କାର୍ଯ୍ଯକ୍ଷମ ହୋଇଛି। ମତାମତ ଦେଉଥିବା ବ୍ଯକ୍ତି ତାଙ୍କ ନାମ ସହ ମୋବାଇଲ ନମ୍ବର ଦେବା ବାଞ୍ଛନୀୟ।
ମତାମତ ପ୍ରଦାନ କରିବା ପରେ ବ୍ଯକ୍ତିଙ୍କ ମୋବାଇଲକୁ ଗୋଟିଏ ଓଟିପି ଆସିବ। ସେଇ ଓଟିପି ନମ୍ବରଟିକୁ ଦେଲା ପରେ ତାଙ୍କ ମତାମତଟି ଆନୁଷ୍ଠାନିକ ପୋର୍ଟାଲ ଯୋଗେ ସଂଗ୍ରହ ହେଲା ବୋଲି ଧରାଯିବ। ୪ଟି ବର୍ଗରେ କରଦାତା ସେମାନଙ୍କ ମତାମତ ଦୋଇପାରିବେ। ଏପରିକି ନିର୍ଦ୍ଦିଷ୍ଟ ଫର୍ମରେ କୌଣସି ଅସଂଗତି ଥିଲେ ସେ ସମ୍ପର୍କରେ ସ୍ପଷ୍ଟ ସୁପାରିସ କରିପାରିବେ ବୋଲି ଆୟକର ବିଭାଗ ପକ୍ଷରୁ ଜାରି ବିଜ୍ଞପ୍ତିରେ ସ୍ପଷ୍ଟ ଉଲ୍ଲେଖ ରହିଛି।
ଆଖୁ ଚାଷ କରି ଅଭାବୀ ବିକ୍ରିର ଶିକାର କଳାହାଣ୍ଡିର ଚାଷୀ
ଆଖୁ ଚାଷ କରି ଅଭାବୀ ବିକ୍ରିର ଶିକାର କଳାହାଣ୍ଡିର ଚାଷୀ
ନନ୍ଦିଘୋଷ ବ୍ୟୁରୋ: ଆଖୁ ଚାଷ କରି ଆଖିରୁ ଲୁହ ଗଡ଼ାଉଛି ଚାଷୀ । ଏକର ଏକର ଜମିରେ ଆଖୁ ଚାଷ କରି ଅଭାବୀ ବିକ୍ରିର ହେଉଛନ୍ତି ଶିକାର । ଆଉ ଏହା ପ୍ରଭାବରେ କଳାହାଣ୍ଡିର ଆଖୁ ଚାଷୀ ଏବେ ଛତିଶଗଡ଼ ଉପରେ ଭରସା କରିଛନ୍ତି । ଜିଲ୍ଲାର ତେଲ ନଦୀ ଅବବାହିକାରେ ଅବସ୍ଥିତ କାଙ୍କେରି, କନା ଗାଁ, ଲୁହା ଗାଁ, ଗୋଲାମୁଣ୍ଡା ଓ ଜୁନାଗଡ଼ ବ୍ଲକର ଅଧିକାଂଶ ଅଞ୍ଚଳରେ ବହୁଳ ମାତ୍ରାରେ ଆଖୁ ଚାଷ ହେଉଛି । ଚଳିତବର୍ଷ ପ୍ରାୟ ହଜାରେ ହେକ୍ଟର ଚାଷ ଜମିରେ ଆଖୁ ଚାଷ ହୋଇଛି l ହେଲେ ପ୍ରତିବର୍ଷ ଆଖୁ ଚାଷ କରି ନିରାଶ ହେଉଛନ୍ତି ଚାଷୀ । ବିକ୍ରି ପାଇଁ ସରକାରୀ ସୁବିଧା ନଥିବାରୁ ଚାଷୀ ଅଭାବୀ ବିକ୍ରିର ଶିକାର ହେଉଥିବା ଅଭିଯୋଗ ହୋଇଛି ।
ପ୍ରତିବର୍ଷ ଡିସେମ୍ବର ମାସରେ ଆଖୁ ଅମଳ ହୋଇଥାଏ । ଏହାକୁ ବିକ୍ରି କରିବା ପାଇଁ ସୁବିଧା ନ ଥିବାରୁ ଆଖୁକୁ ଘଣାରେ ପେଡ଼ି ଗୁଡ଼ ବିକ୍ରି କରୁଛନ୍ତି ଚାଷୀ l ତାହା ବି ଛତିଶଗଡର କିଛି ଦଲାଲକୁ ଶାଗ ମାଛ ଦରରେ କେଜି ପ୍ରତି ୫୦ରୁ ୬୦ଟଙ୍କା ଦରରେ ଟେକି ଦେଉଛନ୍ତି l ଫଳରେ ପରିଶ୍ରମ ତୁଳନାରେ ଚାଷୀଙ୍କୁ କ୍ଷତି ସହିବାକୁ ପଡୁଛି । ବିକ୍ରି ପାଇଁ ମଣ୍ଡି ବ୍ୟବସ୍ଥା ନଥିବା ସତ୍ତ୍ବେ ପେଟ ପାଟଣା ପାଇଁ ଆଖୁ ଚାଷକୁ ଆଦରି ନେଇଛନ୍ତି ଚାଷୀ ।
କେତେବେଳେ ଧାନ ତ କେତେବେଳେ କପା ଓ ମକା । ଏବେ ଆଖୁର ଅଭାବୀ ବିକ୍ରି ଚାଷୀଙ୍କ ଲାଗି ହୋଇଛି ବୋଝ ଉପରେ ନଳିତା ବିଡ଼ା ।
ମୁଖ୍ୟମନ୍ତ୍ରୀ ବସ୍ ଧକ୍କାରେ ମହିଳା ମୃତ, ପ୍ରତିବାଦରେ ଉତ୍ତ୍ୟକ୍ତ ଲୋକଙ୍କ ରାସ୍ତାରୋକ
ମୁଖ୍ୟମନ୍ତ୍ରୀ ବସ୍ ଧକ୍କାରେ ମହିଳା ମୃତ, ପ୍ରତିବାଦରେ ଉତ୍ତ୍ୟକ୍ତ ଲୋକଙ୍କ ରାସ୍ତାରୋକ
ନନ୍ଦିଘୋଷ ବ୍ୟୁରୋ: ମୁଖ୍ୟମନ୍ତ୍ରୀ ବସ୍ ନେଲା ଜୀବନ । ଗଞ୍ଜାମ ଜିଲ୍ଲା ବାସୁଦେବପୁର ପଞ୍ଚାୟତ ଅନ୍ତର୍ଗତ ବଜାପଲ୍ଲୀ ଛକ ନିକଟରେ ମହିଳାଙ୍କୁ ଧକ୍କା ଦେଲା ମୁଖ୍ୟମନ୍ତ୍ରୀ ବସ୍ । ଘଟଣାସ୍ଥଳରେ ଚାଲିଗଲା ମହିଳାଙ୍କ ଜୀବନ । ମୃତକ ହେଲେ ବଜାପଲ୍ଲୀ ଗାଁର କେସାରସୁଲୁ ରେଡ୍ଡୀଙ୍କୁ ଧକ୍କା ଦେଇଥିଲା ।
ଦୁର୍ଘଟଣା ପରେ ବସ୍ ଡ୍ରାଇଭରକୁ ଅଟକ ରଖିଲେ ଗ୍ରାମବାସୀ । ଡ୍ରାଇଭର ଜଣଙ୍କ ପ୍ରଚୁର ମଦ ପିଇ ଗାଡି ଚଲାଉଥିବା ବେଳେ ଦୁର୍ଘଟଣା ଘଟାଇଥିବା ଅଭିଯୋଗ । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ଉତ୍ତ୍ୟକ୍ତ ଲୋକେ ରାସ୍ତାରୋକ କରିବା ସହ ମୃତ ମହିଳାଙ୍କ ପରିବାରକୁ କ୍ଷତିପୂରଣ ଯୋଗାଇ ଦେବାକୁ ଦାବି କରିଛନ୍ତି ।
ଖବର ପାଇଁ ପୋଲିସ ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ସହ ମୁଖ୍ୟମନ୍ତ୍ରୀ ବସ୍ ଡ୍ରାଇଭରଙ୍କୁ ଗିରଫ କରିଛି । ଏହାସହ ଏକ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି ।
କଟନୀ ଛଟନୀ ଓ ଚାଷୀ ଶୋଷଣ ପ୍ରତିବାଦରେ ୧୬ ତାରିଖରେ ବିଜେଡିର ବିଶାଳ ଚାଷୀ ଆନ୍ଦୋଳନ
କଟନୀ ଛଟନୀ ଓ ଚାଷୀ ଶୋଷଣ ପ୍ରତିବାଦରେ ୧୬ ତାରିଖରେ ବିଜେଡିର ବିଶାଳ ଚାଷୀ ଆନ୍ଦୋଳନ
ନନ୍ଦିଘୋଷ ବ୍ୟୁରୋ: ଧାନରେ କଟନୀ ଛଟନୀ, ଚାଷୀଙ୍କୁ ଶୋଷଣ ପ୍ରତିବାଦରେ ଆଗାମୀ ୧୬ ତାରିଖରେ ଭଦ୍ରକରେ ବିଶାଳ ଚାଷୀ ଆନ୍ଦୋଳନ ଡାକରା ଦେଇଛି ବିଜେଡି । ଚାନ୍ଦବାଲି ବିଧାୟକ ବ୍ୟୋମକେଶ ରାୟ ନୂତନ ବିଜେଡି ଜିଲ୍ଲା ସଭାପତି ଭାବେ ଦାୟିତ୍ୱ ଗ୍ରହଣ କରିବା ପରେ ଆଜି ଜିଲ୍ଲା ବିଜେଡି କାର୍ଯ୍ୟାଳୟରେ ଆୟୋଜିତ ସାଙ୍ଗଠନିକ ବୈଠକରେ ଏହି ନିଷ୍ପତ୍ତି ନିଆଯାଇଛି । ଏହି ବୈଠକରେ ଭଣ୍ଡାରିପୋଖରୀ ବିଧାୟକ ସଞ୍ଜୀବ ମଲ୍ଲିକ, ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେଡି ନେତା ପ୍ରଫୁଲ ସାମଲ, ପୂର୍ବତନ ବିଧାୟକ ରାଜେନ୍ଦ୍ର ଦାସ, ଧାମନଗର ବିଧାୟକ ପ୍ରାର୍ଥୀ ସଞ୍ଜୟ ଦାସ ପ୍ରମୁଖଙ୍କ ଜିଲ୍ଲା ଓ ବ୍ଲକ ସ୍ତରୀୟ ସମସ୍ତ ନେତୃବୃନ୍ଦ ସାମିଲ ହୋଇଥିଲେ ।
ଏହି ଅବସରରେ ନୂତନ ଜିଲ୍ଲା ସଭାପତିଙ୍କୁ ସ୍ୱାଗତ ସମ୍ବର୍ଦ୍ଧନା ଦିଆଯାଇଥିଲା । ଜିଲ୍ଲା ସଭାପତି ପରି ଗୁରୁ ଦାୟିତ୍ବ ଦେଇଥିବାରୁ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇଛନ୍ତି ବ୍ୟୋମକେଶ । ଅନ୍ୟପଟେ ଜିଲ୍ଲାରେ ଚାଲିଥିବା ଚାଷୀ ଶୋଷଣ, ମିଲରଙ୍କ ମନମାନି ଓ ପ୍ରଶାସନର ନିରବତାକୁ ନେଇ ଆଗାମୀ ୧୬ରେ ଭଦ୍ରକ ବିଜେଡି ପକ୍ଷରୁ ଦଶ ହଜାର ଚାଷୀଙ୍କୁ ନେଇ ବିଶାଳ ଚାଷୀ ସମାବେଶ କରାଯିବ ବୋଲି ଜିଲ୍ଲା ସଭାପତି ସୂଚନା ଦେଇଛନ୍ତି।
ବଡ଼ ଭାଇ ବାହାଘର ନିମନ୍ତ୍ରଣ କରିବାକୁ ଯିବା ବେଳେ ଦୁର୍ଘଟଣାରେ ସାନ ଭାଇର ମୃତ୍ୟୁ
ବଡ଼ ଭାଇ ବାହାଘର ନିମନ୍ତ୍ରଣ କରିବାକୁ ଯିବା ବେଳେ ଦୁର୍ଘଟଣାରେ ସାନ ଭାଇର ମୃତ୍ୟୁ
ନନ୍ଦିଘୋଷ ବ୍ୟୁରୋ: ବଡ଼ ଭାଇର ବିବାହ ଭୋଜି ନିମନ୍ତ୍ରଣ ପାଇଁ ଯିବା ବେଳେ ଦୁର୍ଘଟଣାରେ ଚାଲିଗଲା ସାନ ଭାଇର ଜୀବନ । ଘଟଣା ବ୍ରହ୍ମପୁର ଚିକିଟି ରାସ୍ତାରେ ଘଟିଛି ।
ଜରଡ଼ା ଗାଁର ଦୁଇ ଭାଇ ଏକ ବାଇକରେ ବ୍ରହ୍ମପୁରକୁ ବିବାହ ଭୋଜି ନିମନ୍ତ୍ରଣ ପାଇଁ ଯାଉଥିଲେ । ସାନ ଭାଇ ଗାଡି ଚଳାଉ ଥିବା ବେଳେ ବଡ଼ ଭାଇ ପଛରେ ବସିଥିଲେ । ହେଲେ ଟାମଣା ଘାଟି ନିକଟରେ ଗାଡି ଏକ ଗଛକୁ ଧକ୍କା ଦେବା ପରେ ଦୁଇ ଭାଇ ରାସ୍ତା ଉପରେ ଛିଟିକି ପଡ଼ିଥିଲେ । ଉଭୟଙ୍କୁ ବ୍ରହ୍ମପୁର ବଡ଼ ମେଡିକାଲରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ସାନ ଭାଇକୁ ମୃତ ଘୋଷଣା କରିଥିଲେ । ଆଉ ଦୁଇ ଦିନ ପରେ ବଡ଼ ଭାଇଙ୍କ ବିବାହ ଭୋଜି ହୋଇଥାନ୍ତା ।