ନନ୍ଦିଘୋଷ ବ୍ୟୁରୋ : ଗଞ୍ଜାମ ଜିଲ୍ଲା ଆସିକା ଥାନା ଦନ୍ତାରି ବିଗଡ଼ ଗାଁରେ ଅଭାବନୀୟ ଘଟଣା। ନିଜ ଜନ୍ମକଲା ମାକୁ ତଣ୍ଟି ଚିପି ହତ୍ୟା କଲା ନୃଶଂସ ପୁଅ। ଜମିବାଡ଼ି ବିବାଦକୁ କେନ୍ଦ୍ର କରି ପୁଅର ବର୍ବର କାଣ୍ଡ । ମୃତକ ହେଲେ ୭୫ ବର୍ଷିୟା ଲକ୍ଷ୍ମୀ ବରାଡ଼ । ପୁଅ ବୋହୂ ମିଶି ତଣ୍ଟି ଚିପି ହତ୍ୟା କରିଥିବା ଅଭିଯୋଗ ହୋଇଛି। ଥାନାରେ ଅଭିଯୋଗ କରିଛନ୍ତି ମୃତକଙ୍କ ଝିଅ । ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଆସିକା ମେଡ଼ିକାଲରେ ଭର୍ତ୍ତି କରିଥିବାବେଳେ ତଦନ୍ତ ଜାରି ରଖିଛି। ସେପଟେ ନିଜ ଜନ୍ମ କଲା ମାକୁ ପୁଅ ମାରିବା ଘଟଣାକୁ ନେଇ ଅଞ୍ଚଳରେ ଚାଞ୍ଚଲ୍ୟ ଖେଳି ଯାଇଛି।
କର୍ନାଟକରେ ଚାଞ୍ଚଲ୍ୟକର ଘଟଣା : ୧୦ ସ୍ଥାନରୁ ମିଳିଲା ମହିଳାଙ୍କ ଶରୀରର ଅଙ୍ଗ
ନନ୍ଦିଘୋଷ ବ୍ୟୁରୋ : କର୍ଣ୍ଣାଟକରେ ଘଟିଛି ଏକ ଅଭାବନୀୟ ଘଟଣା । ତୁମାକରୁ ଜିଲା ଅନ୍ତର୍ଗତ ୧୦ଟି ସ୍ଥାନରୁ ଜଣେ ମହିଳାଙ୍କ ଶରୀରର ବିଭିନ୍ନ ଅଙ୍ଗ ମିଳିଛି । ଯାହା ପରେ ପୂରା ଅଞ୍ଚଳରେ ଏହି ଘଟଣା ଆତଙ୍କ ଖେଳାଇ ଦେଇଛି। ଗତ ଗୁରୁବାର କୁକୁର ଏକ କଟା ହାତକୁ ରାସ୍ତାକୁ ଘୋଷାଡ଼ି ଆଣିବା ଦେଖି ଲୋକେ ଭୟଭୀତ ହୋଇଯାଇଥିଲେ। ଏହାର ଗୋଟିଏ କିଲୋମିଟର ଦୂରରେ ଆଉ ଏକ ହାତ ମିଳିଥିଲା।
ଏହିପରି ୧୦ଟି ବିଭିନ୍ନ ସ୍ଥାନରୁ ମହିଳାଙ୍କ ମୁଣ୍ଡ ଓ ଶରୀରର ଅନ୍ୟାନ୍ୟ ଅଙ୍ଗ ମିଳିଥିଲା। ଏହ ଜଘନ୍ୟ ହତ୍ୟାକାଣ୍ଡ ପଛର ଉଦ୍ଦେଶ୍ୟ ଜଣାପଡ଼ି ନ ଥିବାବେଳେ ହତ୍ୟାକାରୀଙ୍କୁ ମଧ୍ୟ ଚିହ୍ନଟ କରାଯାଇ ନାହିଁ। ହାତର ଟାଟୁ ଓ ମୁହଁର ବିଶେଷତାକୁ ଆଧାର କରି ପୋଲିସ ମୃତକଙ୍କୁ ତୁମାକୁର ତାଲୁକ୍ ଅନ୍ତର୍ଗତ ବେଲ୍ଲାଭି ଗ୍ରାମର ୪୨ ବର୍ଷୀୟ ଲକ୍ଷ୍ମୀଦେବାମ୍ମା ବୋଲି ଚିହ୍ନଟ କରିଛି।
ସେ ଗତ ୪ ତାରିଖରୁ ନିଖୋଜ ଥିବାନେଇ ତାଙ୍କ ସ୍ବାମୀ ବାସବରାଜୁ ବେଲ୍ଲାଭି ଥାନାରେ ଅଭିଯୋଗ କରିଥିଲେ। ଏହି ଘଟଣା ୨୦୨୨ର ଶ୍ରଦ୍ଧା ଓ୍ବାଲ୍କର ମାମଲାକୁ ମନେ ପକାଇ ଦେଉଛି। ୨୭ ବର୍ଷୀୟ ଶ୍ରଦ୍ଧାଙ୍କୁ ତାଙ୍କ ଲିଭ୍ ଇନ୍ ପାର୍ଟନର ହତ୍ୟା କରିବା ପରେ ଶରୀରକୁ ଖଣ୍ଡ ଖଣ୍ଡ କରି ଦିଲ୍ଲୀର ଜଙ୍ଗଲ ମଧ୍ୟରେ ବିଭିନ୍ନ ସ୍ଥାନରେ ଫିଙ୍ଗିଥିଲେ।
ଅପରେସନ ସିନ୍ଦୂରରେ କାହାର ବିଜୟ ଏବଂ କାହାର ପରାଜୟ? ସେନା ମୁଖ୍ୟ କହିଲେ ପାକିସ୍ତାନୀଙ୍କ ଉତ୍ତର
ନନ୍ଦିଘୋଷ ବ୍ୟୁରୋ : ଭାରତ-ପାକିସ୍ତାନ ବିବାଦ ଏବଂ ଅପରେସନ ସିନ୍ଦୂର ସମୟରେ ପାକିସ୍ତାନକୁ ପରାଜୟର ସାମ୍ନା କରିବାକୁ ପଡିଥିଲା। ଏହା ପରେ ମଧ୍ୟ, ପାକିସ୍ତାନ ସାରା ବିଶ୍ୱରେ ନିଜର ବିଜୟର ବିଗୁଲ ବଜାଇ ଚାଲିଥିଲା, ଯଦିଓ ଅପରେସନ ସିନ୍ଦୂର ପରେ ପାକିସ୍ତାନକୁ ଏକ ବଡ଼ ପରାଜୟର ସାମ୍ନା କରିବାକୁ କରିଥିଲା। ହେଲେ ଏହି ସତ୍ୟ କାହାଠାରୁ ଲୁଚି ନାହିଁ। ଏବେ ସେନା ମୁଖ୍ୟ ଜେନେରାଲ ଉପେନ୍ଦ୍ର ଦ୍ୱିବେଦୀ ଏହା ଉପରେ କଡ଼ା ସମାଲୋଚନା କରିଛନ୍ତି।
ଉପେନ୍ଦ୍ର ଦ୍ୱିବେଦୀ ଆଇଆଇଟି ମାଡ୍ରାସରେ ଅପରେସନ ସିନ୍ଦୂର ବିଷୟରେ କହିଥିଲେ। ଏହି ସମୟରେ ସେ ସଂଘର୍ଷ ସମୟରେ ପାକିସ୍ତାନର ଅବସ୍ଥା ବିଷୟରେ ମଧ୍ୟ ଉଲ୍ଲେଖ କରିଥିଲେ। ସେ କହିଥିଲେ ଯେ ଯଦି ଆପଣ କୌଣସି ପାକିସ୍ତାନୀଙ୍କୁ ପଚାରନ୍ତି ଯେ ଯୁଦ୍ଧ କିଏ ଜିତିଛି? ତେବେ ସେମାନେ କହିବେ; ଆମେ ଜିତିଥିଲୁ, ସେଥିପାଇଁ ଆମ ଚିଫ୍ ମାର୍ଶାଲ ହୋଇଥିଲେ।
ଏହି ମନ୍ତବ୍ୟ ମାଧ୍ୟମରେ ଜେନେରାଲ ଦ୍ୱିବେଦୀ ପାକିସ୍ତାନ ସେନା ମୁଖ୍ୟ ଅସୀମ ମୁନିରଙ୍କୁ ଫିଲ୍ଡ ମାର୍ଶାଲ ଭାବେ ନିଯୁକ୍ତି ନେଇ କଟାକ୍ଷ କରିଛନ୍ତି। ଏହା ସହିତ, ଅପରେସନ ସିନ୍ଦୁର ବିଷୟରେ ଉଲ୍ଲେଖ କରି ସେ କହିଛନ୍ତି ଯେ କେନ୍ଦ୍ର ସରକାର ସଶସ୍ତ୍ର ବାହିନୀକୁ ମୁକ୍ତ ହାତ ଦେଇଥିଲେ। ଏହି କାରଣରୁ ଆମେ ପାକିସ୍ତାନକୁ ଉଚିତ ଶିକ୍ଷା ଦେବାରେ ସଫଳ ହୋଇଛୁ।
ସେ ଆହୁରି କହିଥିଲେ କି, ପାକିସ୍ତାନ ସେନା ମୁଖ୍ୟ ଲୋକଙ୍କ ମଧ୍ୟରେ କାହାଣୀ ପରିଚାଳନା କରିଥିଲେ। ସେମାନେ ଯୁଦ୍ଧ ସଂଘର୍ଷ ବିଷୟରେ ସୋସିଆଲ ମିଡିଆରେ ଏକ କାହାଣୀ ସୃଷ୍ଟି କରିଥିଲେ। ଏହି କାରଣରୁ ସେଠାକାର ଲୋକମାନେ ଏବେ ବି ଅନୁଭବ କରନ୍ତି ଯେ ସେମାନେ ଜିତିଛନ୍ତି। ଏହା ମାଧ୍ୟମରେ ଯୁଦ୍ଧ ସମୟରେ ଏକ କାହାଣୀ ସୃଷ୍ଟି କରାଯାଏ ଏବଂ ଦର୍ଶାଯାଏ ଯେ ଆମେ ଜିତିଛୁ। ପାକିସ୍ତାନ ମଧ୍ୟ ସେହିପରି କରୁଥିଲା।
କିଛି ବଡ଼ କରିବାକୁ ମିଳିଥିଲା ଆଦେଶ
ଅପରେସନ ସିନ୍ଦୂର ପରେ ସାରା ଦେଶରେ କ୍ରୋଧର ପରିବେଶ ସୃଷ୍ଟି ହୋଇଥିଲା। ସମସ୍ତେ ପାକିସ୍ତାନଠାରୁ ପ୍ରତିଶୋଧ ନେବାକୁ ଚାହୁଁଥିଲେ। ଆକ୍ରମଣର ୨୪ ଘଣ୍ଟା ମଧ୍ୟରେ ପ୍ରତିରକ୍ଷା ମନ୍ତ୍ରୀ ତିନି ସେନା ମୁଖ୍ୟଙ୍କ ସହ ଏକ ବୈଠକ କରିଥିଲେ। ଏହି ବୈଠକରେ ଏକ ସିଧାସଳଖ ଏବଂ ସ୍ପଷ୍ଟ ନିର୍ଦ୍ଦେଶ ଦିଆଯାଇଥିଲା। ଏବେ କିଛି ବଡ଼ କାମ କରିବାକୁ ପଡିବ। ଏବେ ଯଥେଷ୍ଟ ହେଲା। ଆମ ସେନା ମୁଖ୍ୟମାନଙ୍କୁ, ପାକିସ୍ତାନଠାରୁ ପ୍ରତିଶୋଧ ନେବା ପାଇଁ ସମ୍ପୂର୍ଣ୍ଣ ରଣନୀତି ପ୍ରସ୍ତୁତ କରିବାର ଦାୟିତ୍ୱ ଦିଆଯାଇଥିଲା। ଏହି ବିଶ୍ୱାସ ଯୋଗୁଁ ହିଁ ଅପରେସନ ସିନ୍ଦୂର ସଫଳ ହୋଇଛି।
ପ୍ରଥମ ଥର ପାଇଁ, ଅପରେସନ ସିନ୍ଦୂର ପରେ ପାକିସ୍ତାନକୁ ହୋଇଥିବା କ୍ଷତି ବିଷୟରେ ଜଣେ ବରିଷ୍ଠ ଅଧିକାରୀ ଏକ ବିବୃତ୍ତି ଦେଇଥିଲେ। ବାୟୁସେନା ମୁଖ୍ୟ ଗତକାଲି କହିଥିଲେ ଯେ ଅପରେସନ ସିନ୍ଦୂର ସମୟରେ, ଆମେ ପାକିସ୍ତାନର ୫ଟି ଯୁଦ୍ଧ ବିମାନକୁ ଖସାଇ ଦେଇଛୁ। ଆମେ ୩୦୦ କିଲୋମିଟର ଭିତରକୁ ପ୍ରବେଶ କରି ସେମାନଙ୍କୁ ଏକ ଶିକ୍ଷା ଦେଇଛୁ।
ପ୍ରତାରଣାରୁ ନର୍ସିଂ ଛାତ୍ରୀ ବିଷ ପିଇବା ଘଟଣା ; ଆଜି ଏମ୍ସରେ ହେବ ମୃତଦେହ ବ୍ୟବଚ୍ଛେଦ
ନନ୍ଦିଘୋଷ ବ୍ୟୁରୋ : ନବରଙ୍ଗପୁର ନର୍ସିଂ ଛାତ୍ରୀଙ୍କ ଆତ୍ମହତ୍ୟା ଘଟଣା। ଆଜି ଭୁବନେଶ୍ଵର ଏମ୍ସରେ ହେବ ମୃତଦେହ ବ୍ୟବଚ୍ଛେଦ। ତା ପରେ ମୃତଦେହକୁ ତାଙ୍କ ଗାଁକୁ ନିଆଯିବ ଏବଂ ସେଠାରେ ଅନ୍ତିମ ସଂସ୍କାର ହେବ ବୋଲି ଜଣାପଡ଼ିଛି। ଗତକାଲି ଚିକିତ୍ସାଧୀନ ଅବସ୍ଥାରେ ଭୁବନେଶ୍ଵର ଏମସରେ ନର୍ସିଂ ଛାତ୍ରୀଙ୍କ ମୃତ୍ୟୁ ହୋଇଥିଲା। ଦୀର୍ଘ ୧୫ ଦିନରୁ ଅଧିକ ଦିନ ଧରି ମୃତ୍ୟୁ ସହ ସଂଗ୍ରାମ କରିବା ପରେ ସେ ହାରି ଯାଇଛନ୍ତି। ଏ
କତରଫା ପ୍ରେମ କରୁଥିବା ଯୁବକ ବାରମ୍ଵାର ହଇରାଣ କରିବାରୁ ବିଷ ପିଇ ଦେଇଥିଲେ ନର୍ସିଂ ଛାତ୍ରୀ। ଯୁବକଙ୍କ ମାନସିକ ଓ ଶାରୀରିକ ନିର୍ଯ୍ୟାତନା ସହି ନପାରି ସେ ଚରମ ନିଷ୍ପତ୍ତି ନେଇଥିଲେ। ଗତ ଜୁଲାଇ ୨୨ ତାରିଖରେ ରାଇଘର ଥାନାରେ ଏତଲା ଦେଇଥିଲେ ଛାତ୍ରୀଙ୍କ ପରିବାର ଲୋକେ ସଂପୃକ୍ତ ଯୁବକ ବିରୋଧରେ ଏତଲା ଦେଇଥିଲେ। ସେପଟେ ଘଟଣାକୁ ନେଇ ସରକାରକୁ ଘେରିଛନ୍ତି ବିଜେଡି ଓ କଂଗ୍ରେସ। ଓଡ଼ିଶାରେ ସରକାର ନାରୀ ମାନଙ୍କୁ , ଛାତ୍ରୀ ମାନଙ୍କୁ ମହିଳା ମାନଙ୍କୁ ନାବାଳିକା ମାନଙ୍କୁ ସୁରକ୍ଷା ଦେବାରେ ବିଫଳ ହୋଇଛି ବୋଲି କହିଛନ୍ତି ବିଜେଡି ନେତା ପ୍ରଦୀପ ମାଝୀ। ଓଡ଼ିଶାରେ ଅପରାଧୀ ମାନେ ମୁକ୍ତ ଭାବରେ ବୁଲୁଛନ୍ତି। ଅପରାଧୀଙ୍କୁ କଢ଼। କାର୍ଯ୍ୟାନୁଷ୍ଠାନ ଗ୍ରହଣ ସହ ପୀଡ଼ିତାଙ୍କ ପରିବାରେଵ ଆର୍ଥିକ ସାହାଯ୍ୟ ଦିଆଯାଉ ବୋଲି କହିଛନ୍ତି କଂଗ୍ରେସ ନେତା ସନରାଜ ଗଣ୍ଡ।
ଋଣ ଠକେଇ ମାମଲାରେ ଶିଳ୍ପପତି ଅନୀଲ ଅମ୍ବାନୀଙ୍କୁ ସୁପ୍ରିମକୋର୍ଟ ଆଶ୍ଵସ୍ତି
ନନ୍ଦିଘୋଷ ବ୍ୟୁରୋ : ବ୍ୟାଙ୍କ ଋଣ ଅର୍ଥ ହେରଫେର ମାମଲା। ଶିଳ୍ପପତି ଅନୀଲ ଅମ୍ବାନୀଙ୍କୁ ସୁପ୍ରିମକୋର୍ଟରୁ ମିଳିଲା ଆଶ୍ଵସ୍ତି। ରିଲାଏନ୍ସ ଇନଫ୍ରାର ଦୁଇ ସହଯୋଗୀ କମ୍ପାନୀ ଯମୁନା ପାୱାର ଲିମିଟେଡ ଓ ରାଜଧାନୀ ପାୱାର ଲିମିଟେଡର ପଡିଥିବା ବକେୟା ଆଦାୟ କରିବାକୁ ଅନୁମତି ଦେଲେ ସୁପ୍ରିମକୋର୍ଟ। ଏହି ଦୁଇ କମ୍ପାନୀର ବକେୟା ୨୮ ହଜାର ୪୮୩ କୋଟି ଆଦାୟ କରିବାକୁ ଅନୁମତି ଦେଇଛନ୍ତି ସୁପ୍ରିମକୋର୍ଟ। ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ବକେୟା ଆଦାୟ କରାଯିବ।
ରିଲାଏନ୍ସ ଇନଫ୍ରା କହିଛି ଯେ BSES ଯମୁନା ପାୱାର ଲିମିଟେଡ୍ ଏବଂ BSES ରାଜଧାନୀ ପାୱାର ଉପରେ ୩୧ ଜୁଲାଇ୨୦୨୫ ସୁଦ୍ଧା ମୋଟ ୨୮ ହଜାର ୪୮୩କୋଟି ଟଙ୍କା ବକେୟା ଅଛି। ନିୟାମକ ସମ୍ପତ୍ତିର ପୁନରୁଦ୍ଧାର ପାଇଁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ରିଲାଏନ୍ସ ଇନଫ୍ରାର ସହାୟକ କମ୍ପାନୀଗୁଡ଼ିକ ୧ ଏପ୍ରିଲ, ୨୦୨୪ ପରଠାରୁ ୪ ବର୍ଷ ମଧ୍ୟରେ ୨୮ ହଜାର ୪୮୩ କୋଟି ଟଙ୍କାର ନିୟାମକ ସମ୍ପତ୍ତି ପୁନରୁଦ୍ଧାର କରିବେ।BSES ଯମୁନା ପାୱାର ଲିମିଟେଡ୍ ଏବଂ BSES ରାଜଧାନୀ ପାୱାରରେ ରିଲାଏନ୍ସ ଇନଫ୍ରାଷ୍ଟକ୍ଚରର ୫୧ପ୍ରତିଶତ ଅଂଶଧନ ଅଛି, ଯେତେବେଳେ ବାକି ୪୯ ପ୍ରତିଶତ ଅଂଶଧନ ଦିଲ୍ଲୀ ସରକାରଙ୍କ ପାଖରେ ଅଛି। ଏହି ଦୁଇଟି ବିଦ୍ୟୁତ ବଣ୍ଟନ କମ୍ପାନୀ DISCOMs ଦିଲ୍ଲୀର ପ୍ରାୟ ୫୩ ଲକ୍ଷ ଘରକୁ ବିଦ୍ୟୁତ୍ ଯୋଗାଣ କରନ୍ତି।
ଟ୍ରମ୍ପ–ପୁଟିନ ଆଲୋଚନାକୁ ଭାରତର ସ୍ଵାଗତ, ବୈଦେଶିକ ମନ୍ତ୍ରାଳୟର ବିବୃତ୍ତି
ନନ୍ଦିଘୋଷ ବ୍ୟୁରୋ : ଆସନ୍ତା ଅଗଷ୍ଟ ୧୫ରେ ଟ୍ରମ୍ପ-ପୁଟିନ ଆଲୋଚନା । ଆଲାସ୍କାରେ ଦୁଇ ନେତାଙ୍କ ମଧ୍ୟରେ ହେବ ବଡ଼ ଆଲୋଚନା। ଯୁକ୍ରେନ ଯୁଦ୍ଧ ସମାପ୍ତ କରିବା ନେଇ ଏହି ବୈଠକ ହେବ। ଭାରତ ଏହାକୁ ସ୍ଵାଗତ କରିଛି। ବୈଦେଶିକ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ ଆମେରିକା ଏବଂ ରୁଷ ମଧ୍ୟରେ ବୈଠକକୁ ସ୍ବାଗତ କରୁଛି ଭାରତ। ବିବୃତ୍ତିରେ କୁହାଯାଇଛି, “ଏହି ବୈଠକ ୟୁକ୍ରେନରେ ଚାଲିଥିବା ସଂଘର୍ଷର ଅନ୍ତ ଆଣିବା ଏବଂ ଶାନ୍ତିର ସମ୍ଭାବନା ଖୋଲିବାର ପ୍ରତିଶୃତି ରଖୁଛି ।”
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅନେକ ଥର କହିଛନ୍ତି ଯେ, “ଏହା ଯୁଦ୍ଧର ଯୁଗ ନୁହେଁ” । ୨୦୧୫ ମସିହାରେ ପୂର୍ବତନ ରାଷ୍ଟ୍ରପତି ବାରାକ ଓବାମାଙ୍କୁ ଭେଟିବା ପରେ ପୁଟିନଙ୍କର ଏହା ପ୍ରଥମ ଆମେରିକା ଯାତ୍ରା ହେବ। ଆଗରୁ ସୋସିଆଲ ମିଡିଆରେ ଟ୍ରମ୍ପ ପୋଷ୍ଟ କରିଥିଲେ ଯେ, ଆଲାସ୍କାର ଗ୍ରେଟ୍ ଷ୍ଟେଟରେ ବହୁ ପ୍ରତୀକ୍ଷିତ ବୈଠକ ହେବ। ପୁଟିନଙ୍କ ସହିତ ମୋର ଆଲୋଚନା ହେବ। ଆହୁରି ବିସ୍ତୃତ ସୂଚନା ପରେ ଆସିବ। କ୍ରେମଲିନ୍ ସୂଚନା ଦେଇଛି ଯେ ଦୁଇ ନେତା ୟୁକ୍ରେନ ସଙ୍କଟର ଏକ ଦୀର୍ଘକାଳୀନ ଶାନ୍ତିପୂର୍ଣ୍ଣ ସମାଧାନ ପାଇଁ ଆଲୋଚନା କରିବେ। ୟୁକ୍ରେନକୁ ନେଇ ଟ୍ରମ୍ପ-ପୁଟିନ ଆଲୋଚନା ଖବର ପରେ ୟୁକ୍ରେନର ରାଷ୍ଟ୍ରପତି ଜେଲେନସ୍କି କହିଛନ୍ତି, ୟୁକ୍ରେନକୁ ନେଇ କୌଣସି ଆଲୋଚନା ବିନା ୟୁକ୍ରେନର ଅଂଶଗ୍ରହଣରେ ସଂପୂର୍ଣ୍ଣ ହେବ ନାହିଁ।
ରୁଷକୁ ଟାର୍ଗେଟ କରି ସେ କହିଛନ୍ତି, କୌଣସି ପରିସ୍ଥିତିରେ ଜବରଦଖଲକାରୀକୁ ୟୁକ୍ରେନ ନିଜ ଅଞ୍ଚଳ ସମର୍ପି ଦେବ ନାହିଁ। ଏଥିରୁ ଜଣାପଡୁଛି ଜେଲେନସ୍କି କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ୨୦୨୨ ଫେବୃଆରୀରେ ୟୁକ୍ରେନ ଉପରେ ରୁଷିଆ ଆକ୍ରମଣ କରିଥିଲା। ଏଥିରେ ହଜାର ହଜାର ଲୋକଙ୍କ ମୃତ୍ୟୁ ହେବା ସହିତ ଧ୍ଵଂସସ୍ତୁପରେ ପରିଣତ ହୋଇଛି ୟୁକ୍ରେନର ବହୁ ଅଞ୍ଚଳ। ରୁଷିଆ କେତେକ ଡୋନବାସ ପରି କେତେକ ଏରିଆକୁ ଦଖଲ କରି ନେଇଛି। ଏହି ଯୁଦ୍ଧରେ କେବଳ ଯେ, ୟୁକ୍ରେନର କ୍ଷତି ହୋଇଛି, ତାହା ନୁହେଁ। ରୁଷିଆ ମଧ୍ୟ ପ୍ରଭୁତ କ୍ଷତି ସହିଲାଣି। ତାର ଆର୍ଥିକ ସ୍ଥିତି ଦୋହଲି ଯାଇଛି। ଏପରିକି ଉତ୍ତର କୋରିଆରୁ ଭଡ଼ାରେ ସୈନ୍ୟ ଆଣିଛି ମସ୍କୋ। ଅନ୍ୟଦେଶର ନାଗରିକଙ୍କୁ ମଧ୍ୟ ଟଙ୍କା ଦେଇ ଲଢେ଼ଇରେ ସାମିଲ କରିଛି ରୁଷିଆ। ୟୁକ୍ରେନ ଯୁଦ୍ଧର ପ୍ରଭାବ ବିଶ୍ଵ ଅର୍ଥନୀତିରେ ବି ପଡ଼ିଛି।
ବିଜୁ ଯୁବ ଓ ଛାତ୍ର ଜନତା ଦଳ ପକ୍ଷରୁ ଆଭାସୀ ମାଧ୍ୟମରେ କ୍ରାନ୍ତିଦିବସ ପାଳିତ
ନନ୍ଦିଘାେଷ ବ୍ୟୁରୋ: ଆଜି କ୍ରାନ୍ତି ଦିବସ ଉପଲକ୍ଷେ ବିଜୁ ଯୁବ ଓ ଛାତ୍ର ଜନତା ଦଳ ପକ୍ଷରୁ ଆଭାସୀ ମାଧ୍ୟମରେ କ୍ରାନ୍ତି ଦିବସ ପାଳନ କରାଯାଇଛି । ବିଧାୟକ ଡ. ବ୍ୟୋମକେଶ ରାୟ ଓ ବିଧାୟକ ଦେବୀ ରଂଜନ ତି୍ରପାଠୀଙ୍କ ନେତୃତ୍ୱରେ ଏହି ଆଭାସୀ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ବିଜୁ ଯୁବ ଓ ଛାତ୍ର ଜନତା ଦଳ ପକ୍ଷରୁ ଅନୁଷ୍ଠିତ ଏହି ଆଭାସୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ବିଜେଡି ଉପସଭାପତି ପ୍ରଣବ ପ୍ରକାଶ ଦାସ, ଉପସଭାପତି ସଂଜୟ କୁମାର ଦାସବର୍ମା ଓ ବିଧାୟକ ଡ. ଅରୁଣ କୁମାର ସାହୁ ଯୋଗ ଦେବା ସହିତ ବହୁ ଯୁବ ଓ ଛାତ୍ର ନେତାମାନେ ଯୋଗ ଦେଇଥିଲେ ।
ଏହି ଅବସରରେ ଶ୍ରୀ ଦାସବର୍ମା, ଦେଶରୁ ଇଂରେଜମାନଙ୍କୁ ହଟାଇ ସ୍ୱାଧୀନତା ଆଣିଥିବା ମହାପୁରୁଷମାନଙ୍କ ସ୍ମୃତିଚାରଣ କରିଥିଲେ । ସେମାନଙ୍କ ବୀରତ୍ୱ ତଥା ବଳିଷ୍ଠ ତ୍ୟାଗ ଯୋଗୁ ଦେଶ ସ୍ୱାଧୀନତା ହାସଲ କରିଥିଲା । ପୂର୍ବପୁରୁଷ ମାନଙ୍କୁ ସମ୍ମାନ ଜଣାଇ ଆମ ସାର୍ବଭୌମତ୍ୱ ଓ ଅଖଣ୍ଡତାକୁ ସୁରକ୍ଷା ଦେବା ଆମ ସମସ୍ତଙ୍କ ଦାୟିତ୍ୱ । ସେହିପରି ଶ୍ରୀ ଦାସ କହିଥିଲେ, ରାଜ୍ୟରେ ଦିନକୁ ଦିନ ଛାତ୍ରୀ ଓ ନାରୀ ବିରୋଧୀ ହିଂସା ଘଟଣା ଅହେତୁକ ଭାବରେ ବଢିବାରେ ଲାଗିଛି । ଯାହା ଆମ ସମସ୍ତଙ୍କୁ ଚିନ୍ତିତ କରିଛି । ରାଜ୍ୟ ସରକାରଙ୍କ ଅପାରଗତା ଓ ପୋଲିସ ପ୍ରଶାସନ ନିଷ୍କ୍ରିୟତା ଯୋଗୁଁ, ଗୋପାଳପୁର, ବଳଙ୍ଗା, ବାଲେଶ୍ୱର ଓ କେନ୍ଦ୍ରାପଡା ଭଳି ସ୍ଥାନରେ ଆଇନ କାନୁନର ଖୋଲା ଉଲ୍ଲଂଘନ କରି ଅପରାଧୀମାନେ ଅପରାଧ ଘଟାଉଛନ୍ତି । କିନ୍ତୁ ରାଜ୍ୟ ସରକାର ନିରବଦ୍ରଷ୍ଟା ସାଜିଛନ୍ତି । ଗୋଟିଏ ସଜାଗ, ଦାୟିତ୍ୱପୂର୍ଣ୍ଣ ତଥା ପ୍ରମୁଖ ବିରୋଧୀ ଦଳ ହିସାବରେ ବିଜେଡି ଆଗାମୀ ଦିନରେ ରାଜ୍ୟ ସରକାରଠାରୁ ଏହାର ଉତ୍ତର ଆଶା କରିବା ସହ ଯେପର୍ଯ୍ୟନ୍ତ ରାଜ୍ୟରେ ଆଇନ ଶୃଙ୍ଖଳା ସୁଧୁରୁନି ସେ ପର୍ଯ୍ୟନ୍ତ ବିଜୁ ଜନତା ଦଳର ଯୁବ ଓ ଛାତ୍ର ନେତାମାନେ ଆନେ୍ଦାଳନକୁ ତୀବ୍ରତର କରିବାକୁ ଶ୍ରୀ ଦାସ ଆହ୍ୱାନ ଦେଇଥିଲେ ।
ଅନ୍ୟପଟେ ଡ. ସାହୁ, ଅଗଷ୍ଟ ୧ରୁ ୮ ପର୍ଯ୍ୟନ୍ତ ଛାତ୍ରୀ ଓ ନାରୀ ସୁରକ୍ଷା ପାଇଁ ଡିଜିଙ୍କ ଉଦେ୍ଦଶ୍ୟରେ ସ୍ମାରକପତ୍ର ପ୍ରଦାନ କାର୍ଯ୍ୟକ୍ରମ ସଫଳ ହୋଇଥିବାରୁ ବିଜୁ ଯୁବ ଓ ଛାତ୍ର ଜନତା ଦଳର ସମସ୍ତ କାର୍ଯ୍ୟକର୍ତ୍ତାଙ୍କୁ ସାଧୁବାଦ ଜଣାଇଥିଲେ । ଏହି ପର୍ଯ୍ୟାୟରେ ହଜାର ହଜାର ଛାତ୍ର ଓ ଯୁବ ନେତା ସ୍ୱତଃପ୍ରଭୂତ ଭାବେ ଯୋଗଦାନ କରିଥିବାରୁ ସେମାନଙ୍କୁ ଧନ୍ୟବାଦ ଜଣାଇଥିଲେ । ବହୁ ଦିନ ପରେ ଏଭଳି ଗୋଟିଏ ବିରାଟ ଯୁବ ଓ ଛାତ୍ର ଆନେ୍ଦାଳନ ରାଜ୍ୟରେ ସଫଳ ହୋଇଛି । ବିଜୁ ଯୁବ ଓ ଛାତ୍ର ଜନତା ଦଳ ନେତୃତ୍ୱରେ ଅଗଷ୍ଟ ୯ରୁ ୧୪ ପର୍ଯ୍ୟନ୍ତ ଦ୍ୱିତୀୟ ପର୍ଯ୍ୟାୟରେ ହଜାର ହଜାର ଛାତ୍ରଛାତ୍ରୀମାନେ ମୁଖ୍ୟମନ୍ତ୍ରୀଙ୍କୁ ଛାତ୍ରୀ ଓ ନାରୀ ସୁରକ୍ଷା ପାଇଁ ଉଦବେଗ ପ୍ରକାଶ କରି ଖୋଲା ଚିଠି ଲେଖିବେ । ରାଜ୍ୟରେ ଛାତ୍ରୀ ଓ ନାରୀ ସୁରକ୍ଷା ପାଇଁ ବିଜୁ ଯୁବ ଓ ଛାତ୍ର ଜନତା ଦଳ ଏହି ଆନେ୍ଦାଳନକୁ ଅଧିକରୁ ଅଧିକ ଶାଣିତ କରିବ । ଏହି ଆଭାସୀ କାର୍ଯ୍ୟକ୍ରମରେ ବିଜୁ ଜନତା ଦଳର ରାଜ୍ୟ କର୍ମକର୍ତ୍ତା, ଜିଲ୍ଲା କର୍ମକର୍ତ୍ତା ଓ ବ୍ଲକ ସଭାପତି ପ୍ରମୁଖ ଯୋଗ ଦେଇଥିଲେ ।
ବିପଦରେ ସ୍କୁଲ ଶିକ୍ଷା, ପ୍ରାଥମିକ ଏବଂ ସଂସ୍କୃତ ଶିକ୍ଷକ ସମସ୍ତେ ସଂକଟରେ
ଭୁବନେଶ୍ୱର: ପ୍ରାଥମିକ ଶିକ୍ଷାରୁ ସ୍କିମଟିକ ନିଯୁକ୍ତି ହଟାଇ ନିୟମିତ ଶିକ୍ଷକ ନିଯୁକ୍ତି ପାଇଁ ବିଭାଗ ପକ୍ଷରୁ ଚିଠି ହେଲା। ସ୍କୁଲ ଗୁଡିକରେ ଖାଲି ପଡିଥିବା ଶିକ୍ଷକ ନିଯୁକ୍ତି ପାଇଁ ମଧ୍ୟ ନିଷ୍ପତ୍ତି ହେଲା। କିନ୍ତୁ ନିଷ୍ପତ୍ତି ହେବାର ଦିନ କେଇଟା ନ ପୁରୁଣୁ ଏହାକୁ ପ୍ରତ୍ୟାହାର କରାଗଲା। ଯାହାକୁ ନେଇ ଏବେ ପ୍ରାଥମିକ ଶିକ୍ଷକ ମାନଙ୍କ ଠାରୁ ଆରମ୍ଭ କରି ସାରା ରାଜ୍ୟରେ ଅସନ୍ତୋଷର ସ୍ୱରକୁ ଜନ୍ମ ଦେଇଛି। ଠିକ ସେଭଳି ଢଙ୍ଗରେ ଧନ୍ଦାମୂଳକ ଶିକ୍ଷା ନାଁ ରେ ସ୍କୁଲ ଗୁଡିକରେ ଦେବ ଭାଷା ସଂସ୍କୃତକୁ ଲୋପ କରିବାର ଯୋଜନା କରାଯାଉଥିବା ଅଭିଯୋଗ ହେଲା। କିନ୍ତୁ ସେପଟେ ସରକାର ସାରା ରାଜ୍ୟରେ ଶିକ୍ଷାନୁଷ୍ଠାନ ଗୁଡିକରେ ସଂସ୍କୃତ ସପ୍ତାହ ପାଳନ ପାଇଁ ଚିଠି କରିଛନ୍ତି। ତେଣୁ ସରକାରଙ୍କ ଏସବୁ ଦ୍ଵନ୍ଦତ୍ମକ ନିଷ୍ପତ୍ତିକୁ ନେଇ ପ୍ରଶ୍ନ ଉଠାଇଛନ୍ତି ଶିକ୍ଷକ ସଂଘ ଓ ରାଜନୈତିକ ସଂଗଠନ। ସଂସ୍କୃତ ଭାଷାକୁ ହତାଦର କରାଯାଉଥିବା ଅଭିଯୋଗ ହେବା ପରେ ସଂସ୍କୃତ ସପ୍ତାହ ପାଳନ ପାଇଁ ଚିଠି କରାଯିବା ଏକ ଲୋକଦେଖାଣିଆ ନିଷ୍ପତ୍ତି ବୋଲି ଅଭିଯୋଗ ହୋଇଛି। ସମାଜର ମେରୁଦଣ୍ଡ ଶିକ୍ଷା ସହିତ ଏମିତି ଲୁଚକାଳି ଖେଳ ନ ଖେଳିବାକୁ ରାଜନୈତିକ ଦଳ ଓ ଶିକ୍ଷକ ସଂଗଠନ ଚେତାଇ ଦେଇଛନ୍ତି। ପ୍ରାଥମିକ ଶିକ୍ଷକ ନିଯୁକ୍ତିରେ ସ୍କିମାଟିକ ବ୍ୟବସ୍ଥା ହଟାଇବା ନିଷ୍ପତ୍ତିକୁ ପୁନର୍ବାର ଲାଗୁ କରା ନ ଗଲେ ଆଗାମୀ ବିଧାନସଭା ଅଧିବେଶନରେ ବ୍ୟାପକ ଆନ୍ଦୋଳନ ପାଇଁ ଚେତାବନୀ ଦିଆଯାଇଛି।
ସେପଟେ ରାଜ୍ୟର ସ୍କୁଲ ଗୁଡିକରେ ସଂସ୍କୃତ ଶିକ୍ଷାକୁ ସରକାର ଜାଣିଶୁଣି ଦୁର୍ବଳ କରୁଥିବାର ବଡ଼ ଅଭିଯୋଗ ଆସିଛି। କିନ୍ତୁ ଏହି ଅଭିଯୋଗ ଆସିବା କ୍ଷଣି ସରକାର ରାଜ୍ୟର ଶିକ୍ଷାନୁଷ୍ଠାନ ଗୁଡିକରେ ସଂସ୍କୃତ ସପ୍ତାହ ପାଳନର ଚିଠି କରିଛନ୍ତି। ଯାହାକୁ କଡା ସମାଲୋଚନା କରିଛନ୍ତି ସଂସ୍କୃତ ବିଶାରଦ ମାନେ। ସଂସ୍କୃତର ପ୍ରଚାର ପ୍ରସାର କଥା କହୁଥିବା ସରକାର ପ୍ରକୃତରେ ଆନ୍ତରିକତାର ସହ ଏହା କରନ୍ତୁ ବୋଲି ଦାବି ହୋଇଛି। ସେପଟେ ଶାସକ ଦଳର କହିବା କଥା ରାଜ୍ୟର ଶିକ୍ଷା, ଭାଷା , ସାହିତ୍ୟ ଓ ସଂସ୍କୃତ ଆଦି ସବୁକୁ ସମୃଦ୍ଧ କରିବାକୁ ଉଦ୍ୟମ କରାଯାଉଛି। ରାଜ୍ୟରେ ବିଜେପି ସରକାର ଆସିବାର ବର୍ଷକରୁ ଅଧିକ ବିତି ଯାଇଥିଲେ ମଧ୍ୟ ସବୁ ପ୍ରସଙ୍ଗରେ ଦ୍ଵନ୍ଦଆତ୍ମକ ନିଷ୍ପତ୍ତି ବିକାଶମୂଳକ କାର୍ଯ୍ୟକୁ ପଛକୁ ଠେଲି ଦେଉଛି ଓ ଲୋକଙ୍କ ମନରେ ଘୋର ଅସନ୍ତୋଷ ସୃଷ୍ଟି କରୁଛି ବୋଲି ଅଭିଯୋଗ ହୋଇଛି।
କଂଗ୍ରେସ ଆଣିଲା ସାଙ୍ଘାତିକ ଅଭିଯୋଗ, ଓଡ଼ିଶାରେ ହୋଇଛି ଭୋଟ ଗଡବଡ
ଭୁବନେଶ୍ଵର : ପିସିସି ସଭାପତିଙ୍କ ଟାର୍ଗେଟରେ ବିଜେପି ସରକାର। ଓଡ଼ିଶାରେ ଭୋଟ ଚୋରିର ସରକାର ଚାଲିଥିବା ଅଭିଯୋଗ। ୨୧ ଲୋକସଭାରେ ୪୨ ଲକ୍ଷ ଅଧିକ ଭୋଟ ପଡ଼ିଛି। ୫୧ ବିଧାନସଭା ଆସନରେ ବିଜେଡି ଜିତିଲା, ହେଲେ ଗୋଟେ ବି ସଂସଦୀୟ କ୍ଷେତ୍ରରେ ଜିତିଲାନି। କଳାହାଣ୍ଡି ଓ କେନ୍ଦ୍ରାପଡ଼ା ଲୋକସଭା ଆସନର ଉଦାହରଣ ଦେଇ ଭକ୍ତ ଦାସ ପ୍ରଶ୍ନ କରିଛନ୍ତି, ଏହି ଦୁଇ ସ୍ଥାନରେ ମାତ୍ର ଗୋଟିଏ ଲେଖାଁଏ ବିଧାନସଭା ଆସନ ଜିତି ବିଜେପି କିଭଳି ଜିତିଲା ଲୋକସଭା ଆସନ। ନିର୍ବାଚନ କମିଶନ ଓ ଶାସକ ଦଳ ହାତ ମିଶାଇ ଭୋଟ ଚୋରି କରିଛନ୍ତି, ସେଥିପାଇଁ ଇଲେକ୍ସନ କମିଶନ ଭୋଟରଙ୍କ ତଥ୍ୟ କିମ୍ବା ମତଦାନ ବେଳର ତଥ୍ୟ ଦେଲେନି। ଭକ୍ତ ଦାସ କହିଛନ୍ତି, ଠିକରେ ନିର୍ବାଚନ ହୋଇଥିଲେ, କଂଗ୍ରେସରୁ ୩୫-୪୦ ବିଧାୟକ ଜିତିଥାନ୍ତେ। ଓଡ଼ିଶାରେ ବି ଭୋଟ ଚୋରି ହେବାରୁ ବିଜେପିର ୨୦ ସାଂସଦ ଜିତିଲେ। ଆସନ୍ତା ସୋମବାରରୁ ଏ ନେଇ ଲୋକଙ୍କୁ ସଚେତନ କରିବ କଂଗ୍ରେସ।
ବାଙ୍ଗାଲୋର ସେଣ୍ଟ୍ରାଲ ଲୋକସଭା ଆସନର ମହଦେବପୁରା ନିର୍ବାଚନ ମଣ୍ଡଳୀ ତଥ୍ଯ ଯାଞ୍ଚ ପରେ ଭୋଟ ଚୋରି କଥା ପଦାକୁ ଆସିଥିଲା। ସେଠାରେ ୩୩ ହଜାର ୬୯୯ ଜାଲ ଭୋଟର ବାହାରିଛି। ମୋଟ ୧ ଲକ୍ଷ ୨୫୦ ଭୋଟ ଚୋରି ହୋଇଥିବା ଅଭିଯୋଗ ହୋଇଛି। ସେହିପରି ବିହାରରେ ଭୋଟ ଚୋରିର ନୂଆ ତରିକା କରାଯାଇଛି। ପୁରୁଣା ଭୋଟରଙ୍କ ନାମ କାଟି ନୂଆ ଭୋଟର ଭର୍ତ୍ତି କରାଯାଉଛି। ମହାରାଷ୍ଟ୍ରରେ ୧ କୋଟି ଭୋଟ ଚୋରି ହୋଇଥିବା ଅଭିଯୋଗ। ଏବେ ରାଜ୍ୟ ନିର୍ବାଚନ କମିଶନଙ୍କ ପକ୍ଷରୁ ଚିଠି ଆସିଛି, ଆଗାମୀ ନିର୍ବାଚନ ପାଇଁ ଏଜେଣ୍ଟ ଦିଅ। ଏହା ଦ୍ବାରା ଏଜେଣ୍ଟଙ୍କୁ ଅସାଧୁ ଉପାୟରେ ପ୍ରଭାବିତ କରିବାର ଆଶଙ୍କା ରହିଛି। ସେପଟେ ବିଜେଡି କହିଛି, ଆମର ଅମର ପଟ୍ଟନାୟକ ପୂର୍ବରୁ କହିଥିଲେ ଯେ ଭୋଟ ଜାଲିଆତି ହୋଇଛି। ଫର୍ମ 17 C ଏ ଯାଏଁ ଦିଆଗଲାନି। ଆସନ୍ତା ୧୯ ତାରିଖରେ ପୁଣି ବିଜେଡି ECI ଙ୍କ ନିକଟକୁ ଯିବ। ତେବେ ଭକ୍ତ ଦାସ ସିଧାସଳଖ ବିଜେପିକୁ କିଛି ନ କହି ବିଜେଡିକୁ ଟାଣୁଛନ୍ତି ବୋଲି କହିଛି ବିଜେଡି। କଂଗ୍ରେସ ଅଭିଯୋଗର କଡା ଜବାବ ଦେଇଛି ବିଜେପି। ଓଡ଼ିଶାର ପ୍ରତି ଲୋକସଭା ଆସନରେ କିପରି ୨ ଲକ୍ଷ ଭୋଟ ଅଧିକ ପଡିଲା ତାକୁ ନେଇ କଂଗ୍ରେସ ପ୍ରଶ୍ନ ଉଠାଇଛି। ବିଜେଡି ମଧ୍ୟ ଏନେଇ ନିର୍ବାଚନ କମିଶନ ପାଖରେ ତଥ୍ୟ ସହ ଅଭିଯୋଗ କରିଛି। ଅଭିଯୋଗ ଉପରେ ଆଗକୁ ନିର୍ବାଚନ କମିଶନ କଣ ପଦକ୍ଷେପ ନେଉଛନ୍ତି, ତା ଉପରେ ନଜର।
ଖୁବଶୀଘ୍ର ରାଜ୍ୟରେ ନିଯୁକ୍ତ ହେବେ ନିଗମ ଓ ବୋର୍ଡ ମୁଖିଆ
ଭୁବନେଶ୍ବର : ଖୁବ୍ ଶୀଘ୍ର ଆସିବ ବିଜେପି ସରକାରରେ ନିଗମ, ବୋର୍ଡ଼ର ପ୍ରଥମ ତାଲିକା। ଅଗଷ୍ଟ ୧୫ରୁ ଅଗଷ୍ଟ ୨୦ ମଧ୍ୟରେ ତାଲିକା ଆସିପାରେ ବୋଲି ରାଜ୍ୟ ସଭାପତି ଦେଲେ ସୂଚନା। କାହାକୁ କେଉଁ ପଦରେ ଥଇଥାନ କରାଯିବ, ତାର ଖସଡ଼ା ପ୍ରସ୍ତୁତ ହେଉଛି। ଦଳୀୟ ଆନୁଗତ୍ୟ, ଦକ୍ଷତା, ଅଭିଜ୍ଞତା ହେବ ମାପକାଠି। ନିଗମ, ବୋର୍ଡ଼ ସହ ରାଜ୍ୟ ବିଜେପି ଟିମ୍ ବ ଖୁବ୍ ଶୀଘ୍ର ଗଢାଯିବ। କେଉଁମାନେ ସଙ୍ଗଠନ ପାଇଁ କାମ କରିବେ, କେଉଁମାନେ ସରକାରଙ୍କ ସହ ରହିବେ, ତାର ତାଲିକା ଏକ ପ୍ରକାର ପ୍ରସ୍ତୁତ ହୋଇସାରିଛି। ତେବେ ନିଗମ ଓ ବୋର୍ଡ଼ ତାଲିକା ଦିଲ୍ଲୀରେ ନୁହେଁ, ଭୁବନେଶ୍ବରରେ ପ୍ରସ୍ତୁତ ହେବ ବୋଲି କହିଛନ୍ତି ମନମୋହନ। ଦିଲ୍ଲୀରେ ପ୍ରତି ବୁଧବାର ସାଂସଦମାନଙ୍କ ସହ ଆଲୋଚନାର କାର୍ଯ୍ୟକ୍ରମ ଥାଏ। ଏଥର ଦିଲ୍ଲୀ ଗସ୍ତରେ ଥିବାରୁ ସାଂସଦମାନଙ୍କ ସହ ବିଭିନ୍ନ ପ୍ରସଙ୍ଗରେ ଆଲେଚନା ହୋଇଛି ବୋଲି ସଭାପତି କହିଛନ୍ତି।
ରାଜ୍ୟରେ ମୋଟ ୫୬ଟି ନିଗମ ଥିବା ବେଳେ କିଛି ନିଗମରେ ଅଫିସରମାନଙ୍କୁ ଦାୟିତ୍ବ ଦିଆଯାଇଛି। ଏଥିରୁ ୪୦ଟି ନିଗମ ଏବଂ ବୋର୍ଡ଼ରେ ରାଜନୈତିକ ନିଯୁକ୍ତି ଦିଆଯିବ। ଦଳର ବରିଷ୍ଠ କର୍ମକର୍ତ୍ତା, ଛାମୁଆ ନେତାଙ୍କ ସହ କିଛି ବିଧାୟକଙ୍କ ନଜର ବି ନିଗମ ବୋର୍ଡ଼ ଉପରେ ରହିଛି। ଚଳଚ୍ଚିତ୍ର ନିଗମ, ଅର୍ଥ ନିଗମ, କାଜୁ ନିଗମ, ଖଦୀ ବୋର୍ଡ଼, ହାଉସିଙ୍ଗ ବୋର୍ଡ଼, ବିହନ ନିଗମ, ପର୍ଯ୍ୟଟନ ନିଗମ ଭଳି ଲାଭଜନକ ସଂସ୍ଥା ଉପରେ ରହିଛି ଆଶାୟୀଙ୍କ ନଜର। ମହିଳା ବିକାଶ ନିଗମ, ବନ ନିଗମ, କ୍ଷୁଦ୍ର ଶିଳ୍ପ ନିଗମ, ଉଠା ଜଳସେଚନ ନିଗମ, ପଣ୍ୟାଗାର ନିଗମ ଭଳି ସଂସ୍ଥା ହାତେଇବାକୁ ନେତାମାନେ ଆଶା କରିଛନ୍ତି। ସଙ୍ଗଠନରେ ୩୩ ପ୍ରତିଶତ ମହିଳାଙ୍କ ଭଳି ସରକାରରେ ମହିଳାଙ୍କ ଭାଗିଦାରୀ ବଢିବ ବୋଲି ମହିଳା ମୋର୍ଚ୍ଚା ମୁଖ୍ୟ ଆଶା ରଖିଛନ୍ତି। ନିଜ ଟିମ୍ ଗଢିବା ସହ ନିଗମ ଓ ବୋର୍ଡ଼ ନିଯୁକ୍ତି ଦଳ ପାଇଁ ସଭାପତିଙ୍କ ପାଇଁ ବଡ଼ ଆହ୍ବାନ। ଅସନ୍ତୁଷ୍ଟଙ୍କୁ ମନାଇବା, ପରାଜିତ ପ୍ରାର୍ଥୀଙ୍କୁ ଥଇଥାନ କରିବା ଯେତିକି ଗୁରୁତ୍ବ ବହନ କରୁଛି, ଦଳୀୟ ଆନୁଗତ୍ୟ ସହିତ ଦକ୍ଷତା ଓ ଅଭିଜ୍ଞତାକୁ ପ୍ରାଧାନ୍ୟ ଦେବା ସେତିକି ଜରୁରୀ।