ଭୁବନେଶ୍ବର : ବିଜେବି କଲେଜ ଛାତ୍ର-ଅଣଛାତ୍ର ଗଣ୍ଡଗୋଳ ଘଟଣା । ଜଣକୁ ଗିରଫ କଲା ବଡ଼ଗଡ ଥାନା ପୋଲିସ। ଗିରଫ ଅଣଛାତ୍ର ଜିତ ପାଣିଗ୍ରାହୀଙ୍କୁ ପୋଲିସ ଗିରଫ କରିଥିବା ଜଣାପଡିଛି। ଜିତ କ୍ୟାମ୍ପସରେ ପଶି ଛାତ୍ରଛାତ୍ରୀଙ୍କୁ ଧମକ ଚମକ ଦେବା ସହ କ୍ୟାମ୍ପସକୁ ଅଶାନ୍ତ କରିବାକୁ ଚେଷ୍ଟା କରୁଥିବା ନେଇ ଅଭିଯୋଗ ହୋଇଛି। ଏ ନେଇ ଅଭିଯୋଗ ହେବା ପରେ ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା। ଆଜି ଅଣଛାତ୍ର ଜିତକୁ ଗିରଫ କରାଯାଇଛି।
ଖଣ୍ଡଗିରି ଥାନା ଆଗରେ ଖଣ୍ଡଯୁଦ୍ଧ ; ମାଡ଼ପିଟ ଚାଲିଥିବା ବେଳେ ଦର୍ଶକ ସାଜିଲା ପୋଲିସ
ଭୁବନେଶ୍ବର : ଭୁବନେଶ୍ବର ଖଣ୍ଡଗିରି ଥାନା ଆଗରେ ଖଣ୍ଡଯୁଦ୍ଧ । ମାଡ଼ପିଟ ଚାଲିଥିବା ବେଳେ ଦର୍ଶକ ସାଜିଲା ପୋଲିସ । ଦୁଇ ଗୋଷ୍ଠୀ ପ୍ରାୟ ୧୫ ମିନିଟ ଧରି ଗଣ୍ଡଗୋଳ କରୁଥିଲେ ମଧ୍ୟ ନିରବଦ୍ରଷ୍ଟା ସାଜିଲା ପୋଲିସ । ଦେଖେଣାହାରୀ ପାଲଟିଲେ ପିସିଆର କର୍ମଚାରୀ । ସ୍ଥିତି ଅଣାୟତ୍ତ ହେବାରୁ ଥାନାରୁ ପୋଲିସ ଷ୍ଟାଫ ବାହାରି ସେମାନଙ୍କୁ ଆୟତ୍ତ କରିଥିଲେ । କିଛି ଯୁବକଙ୍କୁ ଅଟକ ରଖାଯାଇଥିବା ଜଣାପଡିଛି ।
କିନ୍ତୁ ଥାନା ଗେଟ ସମ୍ମୁଖରେ କିଛି ଅସାମାଜିକ ଯୁବକ ଗଣ୍ଡଗୋଳ କରୁଥିବା ବେଳେ ପୋଲିସ କାହିଁକି ଅଟକାଇଲା ନାହିଁ ବୋଲି ପ୍ରଶ୍ନ ଉଠିଛି ? ଏଭଳି ଆଇନଶୃଙ୍ଖଳା ପରିସ୍ଥିତି ପୋଲିସର ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।
ବସଷ୍ଟାଣ୍ଡରେ ନାବାଳିକାଙ୍କୁ ମାଡ଼; ଅଭିଯୁକ୍ତଙ୍କ ମଧ୍ୟରେ ୩ ନାବାଳକ
ସୁବର୍ଣ୍ଣପୁର: ନାବାଳିକାଙ୍କୁ ଆସି ମାଡ଼ ମାରିଲେ ୩ ନାବାଳକ। ମାଡ଼ ମାରି ଫେରାର ହୋଇଗଲେ। ସୁବର୍ଣ୍ଣପୁର ଜିଲ୍ଲା ବିନିକା ଥାନା ଅଞ୍ଚଳର ଏ ଘଟଣା। ଯୁବତୀ ଜଣକ ଘରୁ ବାହାରି କଲେଜ ଯିବାକୁ ବସଷ୍ଟାଣ୍ଡରେ ଅପେକ୍ଷା କରିଥିବାବେଳେ ହଠାତ ୩ ନାବାଳକ ଆସି ନାବାଳିକାଙ୍କୁ ମାଡ଼ ମାରିଥିଲେ। ଏହାସହ ଅଶ୍ଲୀଳ ଭାଷାରେ ଗାଳିଗୁଲଜ କରିଥିଲେ। ଏହାପରେ ନାବାଳିକା ଜଣକ ଜୀବନ ବଞ୍ଚାଇବାକୁ ବିନିକା ଥାନାକୁ ଯାଇ ପୋଲିସ ଆଗରେ ସବୁ କଥା କହିଥିଲେ। ପୋଲିସ ଖବର ପାଇ ଘଟଣାସ୍ଥଳକୁ ପହଞ୍ଚିଥିବା ବେଳକୁ ମାଡ଼ ମାରିଥିବା ୩ନାବାଳକ ସେଠାରୁ ଫେରାର ମାରିଥିଲେ ।
ଯୁବତୀ ଜଣକ ଚେତାଶୂନ୍ୟ ହୋଇଯିବାରୁ ତତକ୍ଷଣାତ୍ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା।ପରିବାର ଲୋକେ ଏ ନେଇ ଶିଶୁ ସୁରକ୍ଷା ସମିତିକୁ ଜଣାଇବା ପରେ ମାମଲା ରୁଜୁ ପରେ ତଦନ୍ତ ଆରମ୍ଭ ହୋଇଛି। ଚାଇଲ୍ଡ ହେଲ୍ପ ଲାଇନ ଏବଂ ସଖୀର ସଦସ୍ୟ ମାନେ ବିନିକା ଥାନାକୁ ଆସି ତନାଘନା କରିଛନ୍ତି । ନାବାଳିକାଙ୍କ ଘରକୁ ଯାଇ ମଧ୍ୟ ପଚରାଉଚରା କରିଛନ୍ତି ସମସ୍ତ ସଦସ୍ୟ ।
ରାଜଧାନୀରେ ଫୁଟିଲା ବୋମା; ପୂର୍ବ ଶତ୍ରୁତାରୁ କେନ୍ଦ୍ର କରି ଫୁଲେଶ୍ୱରୀ ବସ୍ତିରେ ବୋମାମାଡ଼
ଭୁବନେଶ୍ବର : ଭୁବନେଶ୍ବର ଫୁଲେଶ୍ୱରୀ ବସ୍ତିରେ ବୋମାମାଡ଼ । ଗତକାଲି ବିଳମ୍ବିତ ରାତିରେ ବୋମାମାଡ଼ ହୋଇଛି । ପୂର୍ବ ଶତ୍ରୁତାରୁ କେନ୍ଦ୍ର କରି ବୋମାମାଡ଼ ହୋଇଥିବା ଜଣାପଡିଛି। ଘର କାନ୍ଥରେ ବୋମାମାଡ଼ର ଦାଗ ରହିଛି । ବୋମାମାଡ଼ ପରେ ଭରତପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଛାନବିନ ଆରମ୍ଭ କରିଛି । ଗତ କିଛିଦିନ ତଳେ ସରକାରୀ ଜମି ଦଖଲକୁ ନେଇ ଫୁଲେଶ୍ୱରୀ ବସ୍ତି ନିକଟ ଭୂଦାନରେ ହୋଇଥିଲା ବୋମାମାଡ଼ ।
୪ ଟି ବାଇକକୁ ମଧ୍ୟ ଜାଳି ଦେଇଥିଲେ ଦୁର୍ବୃତ୍ତ । ସେହି ଘଟଣାରେ ମୁଖ୍ୟ ଅଭିଯୁକ୍ତ ଏଯାଏଁ ଗିରଫ ହୋଇନଥିବା ବେଳେ ପୁଣି ବୋମାମାଡ଼ ଘଟଣା ପୋଲିସ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି ।
ପୋଲ ଉପରେ ୨ଫୁଟ ବର୍ଷାଜଳ ପ୍ରବାହିତ ; ୧୩ଟି ପଞ୍ଚାୟତରୁ ଯୋଗାଯୋଗ ବିଛିନ୍ନ
କେନ୍ଦୁଝର : ସମାକୋଇ ନଦୀ ପୋଲ ଉପରେ ୨ଫୁଟ ବର୍ଷାଜଳ ପ୍ରବାହିତ । ଗତକାଲି ବିଳମ୍ବିତ ରାତିରୁ କେନ୍ଦୁଝର ଜିଲ୍ଲା ତେଲକୋଇରେ ଲଗାଣ ବର୍ଷା ଜାରି ରହିଛି । ଫଳରେ ସମାକୋଇ ନଦୀ ପୋଲ ଉପରେ ୨ଫୁଟର ବର୍ଷାଜଳ ପ୍ରବାହିତ ହେଉଛି । ତେଲକୋଇ ମୁଖ୍ୟାଳୟରୁ ୧୩ଟି ପଞ୍ଚାୟତରୁ ଯୋଗାଯୋଗ ବିଛିନ୍ନ ହୋଇପଡ଼ିଛି । ପୋଲ ଉପରେ ବର୍ଷାଜଳ ପ୍ରଭାବିତ ଯୋଗୁଁ ଲୋକମାନେ ନାହିଁ ନଥିବା ସମସ୍ୟାର ସମ୍ମୁଖୀନ ହେଉଛନ୍ତି । ଅନ୍ୟପଟେ ହନୁମନ୍ତିଆ ନାଳ ପୋଲ ଉପରେ ୩ଫୁଟର ବର୍ଷାଜଳ ପ୍ରବାହିତ ହେଉଛି ।
ଫଳରେ ୫ଟି ପଞ୍ଚାୟତ ମଧ୍ୟ ତେଲକୋଇ ମୁଖ୍ୟାଳୟରୁ ଯୋଗାଯୋଗ ବିଛିନ୍ନ ହୋଇପଡ଼ିଛି । ତେଲକୋଇରେ ସର୍ବାଧିକ ୧୦୨ ମିଲିମିଟର ବର୍ଷା ରେକର୍ଡ ହୋଇଛି । ବ୍ଲକର ବିଭିନ୍ନ ନାଳର ପୋଲ ଉପରେ ବର୍ଷାଜଳ ପ୍ରବାହିତ ଯୋଗୁଁ ଲୋକଙ୍କ ଯାତାୟାତ ଠପ୍ ହୋଇପଡିଛି । ପୋଲ ଉପରେ ବର୍ଷାଜଳ ପ୍ରବାହିତ ହେଉଥିଲେ ମଧ୍ୟ ବିପଦ ସଙ୍କୁଳ ଅବସ୍ଥାରେ ଗାଡ଼ି ଯିବା ଆସିବା କରୁଥିବା ଦେଖିବାକୁ ମିଳିଛି ।
ଡୋନାଲ୍ଡ ଟ୍ରମ୍ପଙ୍କ ଘନିଷ୍ଠ ସହଯୋଗୀ ‘ସର୍ଗିଓ ଗୋର’, ଭାରତରେ ଆମେରିକାର ରାଷ୍ଟ୍ରଦୂତ ଭାବରେ ହେବେ ନିଯୁକ୍ତ
ନନ୍ଦିଘୋଷ ବ୍ୟୁରୋ: ଡୋନାଲ୍ଡ ଟ୍ରମ୍ପଙ୍କ ଘନିଷ୍ଠ ସହଯୋଗୀ ହେବେ ଭାରତରେ ଆମେରିକାର ନୂଆ ରାଷ୍ଟ୍ରଦୂତ । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତାଙ୍କର ଘନିଷ୍ଠ ସହଯୋଗୀ ଏବଂ ବିଶ୍ୱସ୍ତ ସର୍ଗିଓ ଗୋରଙ୍କୁ ଭାରତରେ ଆମେରିକାର ରାଷ୍ଟ୍ରଦୂତ ଭାବରେ ନିଯୁକ୍ତ କରିଛନ୍ତି । ଏହା ସହିତ ସର୍ଗିଓ ଦକ୍ଷିଣ ଏବଂ ମଧ୍ୟ ଏସିଆ ପାଇଁ ଆମେରିକାର ସ୍ୱତନ୍ତ୍ର ପ୍ରତିନିଧି ମଧ୍ୟ ହେବେ। ରାଷ୍ଟ୍ରପତି ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ଏହି ଘୋଷଣା କରିଛନ୍ତି। ବର୍ତ୍ତମାନ ସର୍ଗିଓ ଗୋର୍ ହ୍ୱାଇଟ୍ ହାଉସର ରାଷ୍ଟ୍ରପତି କାର୍ମିକ କାର୍ଯ୍ୟାଳୟର ନିର୍ଦ୍ଦେଶକ। ଆମେରିକୀୟ ସେନେଟ୍ ଦ୍ୱାରା ଅନୁମୋଦନ ପରେ ସେ ଭାରତରେ ଆମେରିକାର ନୂତନ ସ୍ଥାୟୀ ରାଷ୍ଟ୍ରଦୂତ ହେବେ।
ବାସ୍ତବରେ ଏରିକ ଗାର୍ସେଟିଙ୍କ ବିଦାୟର ସାତ ମାସ ପରେ ଆମେରିକା ଭାରତରେ ସ୍ଥାୟୀ ରାଷ୍ଟ୍ରଦୂତ ନିଯୁକ୍ତ କରିଛି। ସର୍ଗିଓ ଭାରତରେ ୨୬ତମ ଆମେରିକୀୟ ରାଷ୍ଟ୍ରଦୂତ ହେବେ। ଟ୍ରମ୍ପ କହିଛନ୍ତି ଯେ ମୁଁ ଖୁସିର ସହିତ ଜଣାଇ ଦେଉଛି ଯେ ମୁଁ ସର୍ଗିଓ ଗୋରଙ୍କୁ ଭାରତରେ ପରବର୍ତ୍ତୀ ଆମେରିକୀୟ ରାଷ୍ଟ୍ରଦୂତ ଏବଂ ଦକ୍ଷିଣ ଏବଂ ମଧ୍ୟ ଏସୀୟ ବ୍ୟାପାର ପାଇଁ ସ୍ୱତନ୍ତ୍ର ଦୂତ ଭାବରେ ନିଯୁକ୍ତ କରୁଛି। ଡୋନାଲ୍ଡ ଟ୍ରମ୍ପ ସର୍ଗିଓ ଗୋରଙ୍କୁ ତାଙ୍କର ଘନିଷ୍ଠ ସହଯୋଗୀ, ବନ୍ଧୁ ଏବଂ ବିଶ୍ୱସ୍ତ ବୋଲି ବର୍ଣ୍ଣନା କରିଛନ୍ତି ଯାହାଙ୍କ ଉପରେ ସେ ସମ୍ପୂର୍ଣ୍ଣ ଭରସା କରିପାରିବେ। ଟ୍ରମ୍ପ କହିଛନ୍ତି ଯେ ବିଶ୍ୱର ସବୁଠାରୁ ଜନସଂଖ୍ୟା ବିଶିଷ୍ଟ ଅଞ୍ଚଳ ପାଇଁ, ଏହା ଗୁରୁତ୍ୱପୂର୍ଣ୍ଣ ଯେ ମୋ ପାଖରେ ଏପରି ଜଣେ ବ୍ୟକ୍ତି ଅଛନ୍ତି ଯିଏ ମୋର ଏଜେଣ୍ଡାକୁ ସମ୍ପୂର୍ଣ୍ଣ ଭାବରେ କାର୍ଯ୍ୟକାରୀ କରିପାରିବେ ଏବଂ ଆମକୁ ମେକ୍ ଆମେରିକା ଗ୍ରେଟ୍ ଅଗେନ୍ (MAGA) ଲକ୍ଷ୍ୟ ଆଡ଼କୁ ନେଇପାରିବେ ।
ସର୍ଗିଓ ଗୋର୍ ଦୀର୍ଘ ସମୟ ଧରି ଟ୍ରମ୍ପଙ୍କ ରାଜନୈତିକ ଏବଂ ବ୍ୟକ୍ତିଗତ ବିଶ୍ୱସ୍ତ ଥିଲେ। ସେ ଟ୍ରମ୍ପଙ୍କ ଐତିହାସିକ ରାଷ୍ଟ୍ରପତି ଅଭିଯାନରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ହ୍ୱାଇଟ୍ ହାଉସ୍ରେ ରାଷ୍ଟ୍ରପତି କାର୍ମିକ କାର୍ଯ୍ୟାଳୟର ନିର୍ଦ୍ଦେଶକ ଭାବରେ ଗୋର୍ ଡୋନାଲ୍ଡ ଟ୍ରମ୍ପ ପ୍ରଶାସନ ପାଇଁ କର୍ମଚାରୀ ନିଯୁକ୍ତିରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ଟ୍ରମ୍ପ୍ ତାଙ୍କର ପ୍ରଶଂସା କରି କହିଥିଲେ ଯେ ସର୍ଗିଓ ଗୋର୍ ଏବଂ ତାଙ୍କ ଦଳ ରେକର୍ଡ ସମୟରେ ସଂଘୀୟ ସରକାରଙ୍କ ବିଭିନ୍ନ ବିଭାଗରେ ପ୍ରାୟ ୪୦୦୦ ‘ଆମେରିକା ଫାଷ୍ଟ ପାଟ୍ରିଅଟ୍ସ’ଙ୍କୁ ନିଯୁକ୍ତି ଦେଇଛନ୍ତି, ସରକାରୀ ବିଭାଗ ଏବଂ ଏଜେନ୍ସିଗୁଡ଼ିକରେ ୯୫% ରୁ ଅଧିକ ପଦବୀ ପୂରଣ କରିଛନ୍ତି।
ଆମେରିକୀୟ ସାମଗ୍ରୀ ଉପରୁ ହଟିବ ପ୍ରତିଶୋଧମୂଳକ ଶୁଳ୍କ, ଟ୍ରମ୍ପଙ୍କ ସହ ଆଲୋଚନା ପରେ ମାର୍କ କାର୍ନିଙ୍କ ଘୋଷଣା
ନନ୍ଦିଘୋଷ ବ୍ୟୁରୋ: ଆମେରିକୀୟ ସାମଗ୍ରୀ ଉପରେ ପ୍ରତିଶୋଧମୂଳକ ଶୁଳ୍କ ହଟାଇବ କାନାଡ଼ା । ଟ୍ରମ୍ପଙ୍କ ସହ ଆଲୋଚନା ପରେ ଘୋଷଣା କଲେ ମାର୍କ କାର୍ନି । କାନାଡା ସେପ୍ଟେମ୍ବର ୧ ତାରିଖରୁ ଅଧିକାଂଶ ଆମେରିକୀୟ ସାମଗ୍ରୀ ଉପରୁ ପ୍ରତିଶୋଧମୂଳକ ଶୁଳ୍କ ହଟାଇବ। ତଥାପି, ଷ୍ଟିଲ୍, ଆଲୁମିନିୟମ୍ ଏବଂ ଅଟୋମୋବାଇଲ୍ ଉପରେ ଶୁଳ୍କ ପୂର୍ବପରି ରହିବ। କାନାଡା ପ୍ରଧାନମନ୍ତ୍ରୀ ମାର୍କ କାର୍ନି ଏବଂ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଫୋନ୍ରେ କଥାବାର୍ତ୍ତା କରିଥିଲେ, ଯାହା ପରେ କାର୍ନି ପ୍ରତିଶୋଧମୂଳକ ଶୁଳ୍କ ହଟାଇବା ଘୋଷଣା କରିଥିଲେ। ଏହି ନିଷ୍ପତ୍ତି ଦୁଇ ଦେଶ ମଧ୍ୟରେ ବାଣିଜ୍ୟ ଉତ୍ତେଜନା ହ୍ରାସ କରିବ ବୋଲି ଆଶା କରାଯାଉଛି।
ଏହି ଘୋଷଣା USMCA (ଆମେରିକା-ମେକ୍ସିକୋ-କାନାଡା ଚୁକ୍ତିନାମା) ଅଧୀନରେ କରାଯାଇଛି। USMCA ଅଧୀନରେ ଆସୁଥିବା ସମସ୍ତ ଉତ୍ପାଦକୁ ମୁକ୍ତ କରିବା ପାଇଁ ସାମ୍ପ୍ରତିକ ନିଷ୍ପତ୍ତି ଅନୁଯାୟୀ ଏହା ନିଆଯାଇଛି। USMCA ୧ଜୁଲାଇ ୨୦୨୦ରେ କାର୍ଯ୍ୟକାରୀ ହୋଇଥିଲା, ଯାହା ଉତ୍ତର ଆମେରିକୀୟ ମୁକ୍ତ ବାଣିଜ୍ୟ ଚୁକ୍ତିନାମା (NAFTA) କୁ ବଦଳାଇଥିଲା। ଏହି ଚୁକ୍ତିନାମାର ଲକ୍ଷ୍ୟ ହେଉଛି ଆମେରିକା, ମେକ୍ସିକୋ ଏବଂ କାନାଡା ମଧ୍ୟରେ ଆର୍ଥିକ ସମ୍ପର୍କକୁ ସୁଦୃଢ଼ କରିବା ଏବଂ ବାଣିଜ୍ୟକୁ ଅଧିକ ସନ୍ତୁଳିତ କରିବା।
ଆମେରିକା ଏବଂ କାନାଡା ମଧ୍ୟରେ ବାଣିଜ୍ୟ ଚୁକ୍ତି ବିଷୟରେ ଆଲୋଚନା ଚାଲୁଥିବା ବେଳେ କାନାଡା ଏହି ନିଷ୍ପତ୍ତି ନେଇଛି । ଉଭୟ ଦେଶ ଆମେରିକା ଅଗଷ୍ଟରେ କାନାଡା ଉପରେ ୩୫% ଶୁଳ୍କ ଲାଗୁ କରିଥିଲା, ଯାହାର ଜବାବରେ କାନାଡା ଅନେକ ଆମେରିକୀୟ ସାମଗ୍ରୀ ଉପରେ୨୫% ଶୁଳ୍କ ଲାଗୁ କରିଥିଲା। କାନାଡା ପ୍ରଧାନମନ୍ତ୍ରୀ କାର୍ନି କହିଛନ୍ତି ଯେ ଏହି ପଦକ୍ଷେପ ୱାଶିଂଟନ ସହିତ ଆହୁରି ବାଣିଜ୍ୟ ଆଲୋଚନାକୁ ତ୍ୱରାନ୍ୱିତ କରିବ।
କାର୍ନି କହିଛନ୍ତି ବର୍ତ୍ତମାନ କାନାଡାର ଆମେରିକା ସହିତ ସର୍ବୋତ୍ତମ ବାଣିଜ୍ୟ ଚୁକ୍ତି ଅଛି। ଏହା ଅନ୍ୟ ଯେକୌଣସି ଦେଶର ଚୁକ୍ତି ଅପେକ୍ଷା ଭଲ। ଟ୍ରମ୍ପ ଏହି ଆଲୋଚନାକୁ ଅର୍ଥପୂର୍ଣ୍ଣ ବୋଲି ବର୍ଣ୍ଣନା କରି କହିଛନ୍ତି ଯେ ଆମେ କାନାଡା ସହିତ ବହୁତ ଭଲ ବ୍ୟବହାର କରିବାକୁ ଚାହୁଁଛୁ। ମୁଁ କାର୍ନିଙ୍କୁ ବହୁତ ପସନ୍ଦ କରେ। ମୁଁ ଭାବୁଛି ସେ ଜଣେ ବହୁତ ଭଲ ବ୍ୟକ୍ତି।
କାର୍ନି କହିଛନ୍ତି ଯେ UMCA ପ୍ରତି ଆମେରିକାର ପ୍ରତିବଦ୍ଧତା ନିଶ୍ଚିତ କରେ ଯେ କାନାଡା-ଆମେରିକା ବାଣିଜ୍ୟର ୮୫% ରୁ ଅଧିକ ଶୁଳ୍କ ମୁକ୍ତ ରହିବ ଏବଂ କାନାଡା ସାମଗ୍ରୀ ଉପରେ ହାରାହାରି ଆମେରିକାର ଶୁଳ୍କ ମାତ୍ର ୫.୬%। କାର୍ନି ଏହା ମଧ୍ୟ କହିଛନ୍ତି ଯେ ଆମେ ଏହି ସମସ୍ୟାଗୁଡ଼ିକର ସମାଧାନ ପାଇଁ କାର୍ଯ୍ୟ କରିବା ସହିତ କାନାଡା ଇସ୍ପାତ, ଆଲୁମିନିୟମ ଏବଂ ଅଟୋମୋବାଇଲ ଉପରେ ତାର ଶୁଳ୍କ ବଜାୟ ରଖିବ।
ଶୁଳ୍କ ହ୍ରାସ ସତ୍ତ୍ୱେ, କିଛି କାନାଡିୟ ରାଜନେତା ଏବଂ ୟୁନିଅନ ନେତା କାର୍ନିଙ୍କ ପଦକ୍ଷେପକୁ ସମାଲୋଚନା କରିଥିଲେ। କାନାଡାର ସର୍ବବୃହତ ଘରୋଇ କ୍ଷେତ୍ର ୟୁନିଅନ ୟୁନିଫୋର ସଭାପତି ଲାନା ପେନ୍ କହିଛନ୍ତି ଯେ ପ୍ରତିଶୋଧମୂଳକ ଶୁଳ୍କ ପ୍ରତ୍ୟାହାର କରିବା ଏକ ଶାନ୍ତି ପ୍ରସ୍ତାବ ନୁହେଁ। ଏହା କେବଳ ଆମେରିକାର ଆକ୍ରମଣକୁ ଉତ୍ସାହିତ କରିବ।କଞ୍ଜରଭେଟିଭ ପାର୍ଟି ନେତା ପିଏରେ ପୋଇଲିଭରେ ଏହି ନିଷ୍ପତ୍ତିକୁ ଆତ୍ମସମର୍ପଣ ବୋଲି କହିଛନ୍ତି। ସେ କହିଛନ୍ତି ଯେ କାନାଡା ଆମେରିକୀୟ ଶୁଳ୍କକୁ ସମ୍ପୂର୍ଣ୍ଣ ଭାବରେ ହଟାଇବା ପାଇଁ ଚେଷ୍ଟା କରିବା ଉଚିତ। କାର୍ନି କହିଛନ୍ତି ଯେ ରାଷ୍ଟ୍ରପତି ଟ୍ରମ୍ପ ଏବଂ ମୋର ଏକ ଲମ୍ବା ଆଲୋଚନା ହୋଇଛି। ଆମେ ପରେ ମୁକ୍ତ ବାଣିଜ୍ୟ ଚୁକ୍ତିନାମା (FTA) ସମୀକ୍ଷା କରିବୁ।
RJD ନେତା ତେଜସ୍ୱୀ ଯାଦବଙ୍କ ନାଁରେ FIR ରୁଜୁ ; ଜାଣନ୍ତୁ କାରଣ ..
ନନ୍ଦିଘୋଷ ବ୍ୟୁରୋ : ଅଡ଼ୁଆରେ RJD ନେତା ତେଜସ୍ୱୀ ଯାଦବ । ବିହାର ବିଧାନସଭା ନିର୍ବାଚନ ପୂର୍ବରୁ ବଢିଲା ଆରଜେଡି ନେତା ତେଜସ୍ୱୀ ଯାଦବଙ୍କ ସମସ୍ୟା ।ଆପତ୍ତିଜନକ ପୋଷ୍ଟକୁ ନେଇ ତେଜସ୍ୱୀ ଯାଦବଙ୍କ ନାଁରେ ମହାରାଷ୍ଟ୍ର ଏବଂ ୟୁପିରେ FIR ରୁଜୁ । ମହାରାଷ୍ଟ୍ରର ଗଡଚିରୋଲିରେ ତେଜସ୍ୱୀ ଯାଦବଙ୍କ ବିରୋଧରେ ଏକ ଏଫଆଇଆର ରୁଜୁ ହୋଇଛି। ଅଭିଯୋଗ ହୋଇଛି ଯେ ସେ ପ୍ରଧାନମନ୍ତ୍ରୀଙ୍କ ପାଇଁ ଆପତ୍ତିଜନକ ଶବ୍ଦ ବ୍ୟବହାର କରିଛନ୍ତି। ଗଡଚିରୋଲିର ବିଜେପି ବିଧାୟକ ମିଲିନ୍ଦ ରାମଜୀ ନରୋଟ ତାଙ୍କ ବିରୋଧରେ ଏହି ଅଭିଯୋଗ ଆଣିଛନ୍ତି। ତେଜସ୍ୱୀ ଯାଦବଙ୍କ ବିରୋଧରେ ଦାୟର ଅଭିଯୋଗରେ କୁହାଯାଇଛି ଯେ ସେ ଅଗଷ୍ଟ ୨୨ ତାରିଖରେ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ X ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୁଦ୍ଧରେ ଏକ ଆପତ୍ତିଜନକ ଏବଂ ଅପମାନଜନକ ପୋଷ୍ଟ ସେୟାର କରିଛନ୍ତି ।
ବିଜେପି ବିଧାୟକ ଥାନାରେ ଅଭିଯୋଗ କରିଛନ୍ତି ଯେ ତେଜସ୍ୱୀ ଯାଦବ ଶୁକ୍ରବାର ସକାଳେ ତାଙ୍କ x ହ୍ୟାଣ୍ଡେଲରୁ ଏକ ପୋଷ୍ଟ ସେୟାର କରିଛନ୍ତି। ଅଭିଯୋଗ ହୋଇଛି ଯେ ଏଥିରେ ପ୍ରଧାନମନ୍ତ୍ରୀ ମୋଦିଙ୍କ ଉପରେ ଆପତ୍ତିଜନକ ମନ୍ତବ୍ୟ ଦିଆଯାଇଛି। ଏହି ପୋଷ୍ଟରେ ପ୍ରଧାନମନ୍ତ୍ରୀଙ୍କ ଫଟୋ ମଧ୍ୟ ସଂଲଗ୍ନ କରାଯାଇଛି। ଅଭିଯୋଗକାରୀ କହିଛନ୍ତି ଯେ ଦେଶର ପ୍ରଧାନମନ୍ତ୍ରୀଙ୍କ ବିରୋଧରେ ତେଜସ୍ୱୀ ଯାଦବଙ୍କ ଅଶାଳୀନ ମନ୍ତବ୍ୟରେ ସମଗ୍ର ଦେଶ କ୍ରୋଧିତ।
https://x.com/yadavtejashwi/status/1958703230684471585/photo/1
ପ୍ରକୃତରେ ଅଗଷ୍ଟ ୨୨ରେ ପ୍ରଧାନମନ୍ତ୍ରୀଙ୍କ ଗୟା ଗସ୍ତ ପୂର୍ବରୁ, ତେଜସ୍ୱୀ ଯାଦବ ତାଙ୍କ ସୋସିଆଲ ମିଡିଆ ଆକାଉଣ୍ଟରେ ପ୍ରଧାନମନ୍ତ୍ରୀଙ୍କ ଏକ କାର୍ଟୁନ ସହିତ ଏକ ପୋଷ୍ଟ ସେୟାର କରିଥିଲେ। ଏଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଗୟା ରାଲିକୁ “ବାୟାବାଜି କି ଦୋକାନ” ଭାବରେ ବର୍ଣ୍ଣନା କରାଯାଇଥିଲା। ରାଲି ପୂର୍ବରୁ X ରେ ସେୟାର କରାଯାଇଥିବା ଏହି ପୋଷ୍ଟରେ ପ୍ରଧାନମନ୍ତ୍ରୀ ମୋଦିଙ୍କୁ ଜଣେ ଦୋକାନୀ ଭାବରେ ଦେଖାଯାଇଥିଲା। ଦୋକାନର ସାଇନବୋର୍ଡରେ ଲେଖାଥିଲା, “ବାୟାବାଜି କି ପଶ୍ଚିମି ଦୋକାନ”। ଏହା ସହିତ, ତେଜସ୍ୱୀ ଯାଦବ ପ୍ରଧାନମନ୍ତ୍ରୀ ମୋଦିଙ୍କୁ ବିହାରରେ NDAର ୨୦ ବର୍ଷର ଶାସନ ସହିତ ତାଙ୍କର ୧୧ ବର୍ଷର ହିସାବ ଦେବାକୁ ମଧ୍ୟ କହିଥିଲେ।
ରାତି ଅଧରେ ହଠାତ୍ ମାଡ଼ିଆସିଲା ..ମାଟିରେ ମିଶିଲା ଥରାଲି ଗାଁ ..
ନନ୍ଦିଘୋଷ ବ୍ୟୁରୋ: ଉତ୍ତରାଖଣ୍ଡର ଚାମୋଲିର ଥରାଲି ସହରରେ ବାଦଲଫଟା ବର୍ଷା । ରାତିଅଧରେ ପ୍ରକୃତିର ତାଣ୍ଡବ ଯୋଗୁଁ ବ୍ୟାପକ କ୍ଷୟକ୍ଷତି ଘଟିଛି। ଲୋକଙ୍କ ଘରେ ବନ୍ୟାପାଣି ପଶିବା ସହ ଅନେକ ଯାନବାହନ ଭଗ୍ନାବଶେଷ ତଳେ ଚାପି ହୋଇ ରହିଛି। ଏହି ବିପର୍ଯ୍ୟୟରେ ଜଣେ ଯୁବତୀଙ୍କର ମୃତ୍ୟୁ ଘଟିଥିବା ବେଳେ ଦୁଇଜଣ ନିଖୋଜ ଥିବା ଜଣାପଡ଼ିଛି। ଏସ୍ଡିଆରଏଫ୍ ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛି। ଥରାଲି ସହିତ ନିକଟବର୍ତ୍ତୀ ଗ୍ରାମଗୁଡ଼ିକରେ ମଧ୍ୟ କ୍ଷୟକ୍ଷତି ଘଟିଛି।
ଶୁକ୍ରବାର ମଧ୍ୟରାତ୍ରିରେ ବାଦଲ ଫଟା ବର୍ଷା ପରେ ଏହି ଘଟଣା ଘଟିଛି । ଯାହା ପରେ ରାଡିବାଗ ଏବଂ ଚେପଡୋରେ ଅନେକ ଯାନବାହନ ଭଗ୍ନାବଶେଷ ତଳେ ଚାପି ହୋଇଯାଇଥିଲା। ଏଠାରେ ଅନେକ ଦୋକାନ ମଧ୍ୟ କ୍ଷତିଗ୍ରସ୍ତ ହୋଇଛି। ମଧ୍ୟରାତ୍ରିରେ ଘଟିଥିବା ଧ୍ୱଂସାବଶେଷ ଯୋଗୁଁ ଲୋକମାନେ ଆତଙ୍କିତ ଅଛନ୍ତି। ସେମାନେ ଘରୁ ବାହାରକୁ ପଳେଇ ଆସିଛନ୍ତି। ରାସ୍ତାରେ ଏତେ ପରିମାଣରେ ଭଗ୍ନାବଶେଷ ଜମା ହୋଇଛି ଯେ ରାସ୍ତାଗୁଡ଼ିକ ପୋଖରୀରେ ପରିଣତ ହୋଇଛି।
https://x.com/chamolipolice/status/1959073628156301808/photo/1
ବାଦଲ ଫଟା ବର୍ଷା ଯୋଗୁଁ ଲୋକମାନେ ଆତଙ୍କିତ ହୋଇପଡ଼ିଥିଲେ। ରାସ୍ତାରେ ଭଙ୍ଗାରୁଜା ଯୋଗୁଁ ରାସ୍ତା ଅବରୋଧ ହୋଇ ରାସ୍ତା ବନ୍ଦ ହୋଇଯାଇଥିଲା। ଥରାଲି-ଗ୍ୱାଲଡମ୍ ରାସ୍ତା ଏବଂ ଥରାଲି-ସଗୱାରା ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଛି। ଏପରି ପରିସ୍ଥିତିରେ ଲୋକମାନେ ସମସ୍ୟାର ସମ୍ମୁଖୀନ ହେଉଛନ୍ତି । ମିଙ୍ଗଡେରା ନିକଟରେ ରାସ୍ତାରୁ ଭଗ୍ନାବଶେଷ ହଟାଇବା ପାଇଁ ପ୍ରୟାସ କରାଯାଉଛି ।
#WATCH | Uttarakhand: There is a possibility of a lot of damage due to the cloud burst in Tharali tehsil of Chamoli last night. A lot of debris has come due to the cloudburst, due to which many houses, including the SDM residence, have been completely damaged: Chamoli DM, Sandeep… pic.twitter.com/3kGNYRSMdG
— ANI (@ANI) August 23, 2025
ସୁରକ୍ଷାକୁ ଧ୍ୟାନରେ ରଖି, ଜିଲ୍ଲା ପ୍ରଶାସନ ଥରାଲି ତହସିଲର ସମସ୍ତ ସ୍କୁଲ ଏବଂ ଅଙ୍ଗନୱାଡି କେନ୍ଦ୍ର ବନ୍ଦ ରଖିବାକୁ ନିର୍ଦ୍ଦେଶ ଦେଇଛି। ଜିଲ୍ଲା ମାଜିଷ୍ଟ୍ରେଟ୍ କହିଛନ୍ତି ଯେ ପୋଲିସ ଏବଂ ପ୍ରଶାସନ ଦଳ ନିରନ୍ତର ଘଟଣାସ୍ଥଳରେ ଉପସ୍ଥିତ ଅଛନ୍ତି ଏବଂ ରିଲିଫ୍ ଏବଂ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି।
ଭାରତ ସହ ଆଲୋଚନା କରିବାକୁ ପ୍ରସ୍ତୁତ ପାକିସ୍ତାନ ; ପାକ୍ ବୈଦେଶିକ ମନ୍ତ୍ରୀଙ୍କ ସୂଚନା
ନନ୍ଦିଘୋଷ ବ୍ୟୁରୋ: ଭାରତ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିବାକୁ ପ୍ରସ୍ତୁତ ପାକିସ୍ତାନ। ଏପକିକି କାଶ୍ମୀର ପ୍ରସଙ୍ଗରେ ବି ଭାରତ ସହ ଆଲୋଚନା କରିବାକୁ ପାକିସ୍ତାନ ରାଜି ବୋଲି କହିଛନ୍ତି ପାକ୍ ଉପପ୍ରଧାନମନ୍ତ୍ରୀ ତଥା ବୈଦେଶିକ ମନ୍ତ୍ରୀ ଇଶାକ ଦର। ସେପଟେ ଭାରତ ସ୍ପଷ୍ଟ କରିଛି- ପାକ୍ ଅଧିକୃତ କାଶ୍ମୀରକୁ ଫେରାଇବା ଏବଂ ଆତଙ୍କବାଦ ପ୍ରସଙ୍ଗ ବ୍ୟତୀତ ପାକିସ୍ତାନ ସହ ଅନ୍ୟ କୌଣସି ପ୍ରସଙ୍ଗରେ ଆଲୋଚନା କରାଯିବ ନାହିଁ। ଇଶାକ କହିଛନ୍ତି- ଭାରତ ସହ କୌଣସି ଗୋଟିଏ ପ୍ରସଙ୍ଗରେ ପାକିସ୍ତାନ ଆଲୋଚନା କରିବ ନାହିଁ।
କୌଣସି ମଧ୍ୟସ୍ଥତା ଲାଗି ବି ପାକିସ୍ତାନ ଅନୁରୋଧ କରିନାହିଁ। ମାତ୍ର ଏକ ନିରପେକ୍ଷ ସ୍ଥଳରେ ବୈଠକ ଲାଗି ପାକିସ୍ତାନ ରାଜି। ଅପରେସନ ସିନ୍ଦୂର ବେଳେ ଅସ୍ତ୍ରବିରତି ସକାଶେ ଆମେରିକା ପକ୍ଷରୁ ତାଙ୍କ ନିକଟକୁ ଫୋନ ଆସିଥିଲା ଏବଂ ଭାରତ ସହ ଯୁଦ୍ଧ କରିବାକୁ ପାକିସ୍ତାନ ଚାହେଁ ନାହିଁ ବୋଲି ସେ ଆମେରିକାକୁ କହିଥିଲେ ବୋଲି କହିଛନ୍ତି ଇଶାକ ଦର୍।