ରାତି ହେଲେ ଡରାଉଛି କିଟମିଟ ଅନ୍ଧାର । ଶୂନଶାନ ହୋଇଯାଉଛି ଗାଁ ଦାଣ୍ଡ । କ୍ୟାଣ୍ଡେଲ ଜଳାଇ ପାଠ ପଢୁଛନ୍ତି ପିଲା । ଆଜି ବି କନ୍ଧମାଳ ଜିଲ୍ଲା ଦାରିଙ୍ଗବାଡି ବ୍ଲକ ସିର୍କାବର୍ଗ ପଞ୍ଚାୟତ କଟେଡ଼ିମାହା ଗାଁକୁ ପହଞ୍ଚିପାରିନି ବିଦ୍ୟୁତ । ଗାଁରେ ଦୀର୍ଘ ବର୍ଷ ହେବ ୬ ଶହରୁ ଉର୍ଦ୍ଧ୍ଵ ଲୋକେ ବସବାସ କରୁଛନ୍ତି । ହେଲେ ଗାଁକୁ ଆଜି ଯାଏଁ ପହଞ୍ଚିପାରିନି ବିଦ୍ୟୁତ ଆଲୁଅ । ଫଳରେ ଟ୍ରଚ ଓ ଡିବିର ଆଲୁଅରେ କାଳ କାଟୁଛନ୍ତି ଲୋକେ । ଗାଁ ଚାରିଆଡେ ଜଙ୍ଗଲ ପାହାଡ ଘେରି ରହିଥିବାରୁ ଜୀବଜନ୍ତୁଙ୍କ ଭୟ ମଧ୍ୟ ରହୁଛି ।
ବିଦ୍ୟୁତ ସମସ୍ୟାକୁ ନେଇ ଗ୍ରାମବାସୀ ବାରମ୍ବାର ବ୍ଲକ ପ୍ରଶାସନ ଠାରୁ ଆରମ୍ଭ କରି ଜିଲ୍ଲା ପ୍ରଶାସନଙ୍କୁ ଜଣାଇସାଇଲେଣି । ହେଲେ କୌଣସି ସୁଫଳ ମିଳୁନଥିବା ଅଭିଯୋଗ ହୋଇଛି । ଏଠି ପ୍ରଶ୍ନ ଉଠୁଛି- କେତେଦିନ ଆଉ ଅନ୍ଧାରରେ କାଳ କାଟିବେ କଟେଡିମାହା ଗ୍ରାମବାସୀ ? ସେମାନେ ଆଲୋକ ଦେଖିବେ କି ନାହିଁ ? କଟେଡ଼ିମାହା ଗ୍ରାମବାସୀଙ୍କ ସମସ୍ୟା ପ୍ରତି ସରକାର ଶୀଘ୍ର ଦୃଷ୍ଟି ଦେଇ ବିଦ୍ୟୁତ ଯୋଗାଇ ଦେବାକୁ ଦାବି ହୋଇଛି ।
