ଭୁବନେଶ୍ବର : ବଙ୍ଗୋପସାଗରରେ ସୃଷ୍ଟି ହୋଇଛି ଲଘୁଚାପ କ୍ଷେତ୍ର । ୨୬ ତାରିଖରେ ଗଭୀର ଅବପାତରେ ହେବ ପରିଣତ । ୨୭ ସକାଳେ ବାତ୍ୟାର ମୋନ୍ଥାର ନେଇପାରେ ରୂପ । ଏନେଇ ଆନ୍ଧ୍ର ଓ ଓଡ଼ିଶା ଉପକୂଳ ପାଇଁ ସୃଷ୍ଟି ହୋଇଛି ବାତ୍ୟା ଭୟ । ହେଲେ ଏହାର ଗତି ପଥ ଏବେ ସୁଦ୍ଧା ସ୍ପଷ୍ଟ ହୋଇନଥିବା ବେଳେ ବାତ୍ୟା ପାଇଁ ପାଗ ଅନୁକୁଳ ରହିଥିବା ସୂଚନା ଦେଇଛି ଭାରତୀୟ ପାଣିପାଗ ବିଭାଗ । ତେବେ ୨୭ ତାରିଖ ସକାଳେ ଏହା କେଉଁଠି ମାଡ଼ ହେବ, ଗତିପଥ କେଉଁଆଡେ ରହିବ ତାହାର ସ୍ପଷ୍ଟ ସୂଚନା ଆସିଯିବ ବୋଲି କୁହାଯାଇଛି । ପ୍ରତିକୂଳ ପାଗ ପରିସ୍ଥିତି ଯୋଗୁଁ ତାମିଲନାଡୁ, ଆନ୍ଧ୍ରପ୍ରଦେଶ ଓ ଓଡ଼ିଶା ଉପକୂଳବର୍ତ୍ତୀ ଅଞ୍ଚଳରେ ସମୁଦ୍ର ଅଶାନ୍ତ ରହିବ । ବାତ୍ୟା ପ୍ରଭାବରେ ପ୍ରବଳ ବର୍ଷା ଏବଂ ପବନ ବହିବାର ସମ୍ଭାବନା ରହିଛି । ୨୭ ତାରିଖରୁ ଦକ୍ଷିଣ ଓଡ଼ିଶା ଓ ପଶ୍ଚିମ ଓଡ଼ିଶାରେ ବର୍ଷା ହେବ । କୋରାପୁଟ, ନୂଆପଡ଼ା, ଗଜପତି, କନ୍ଧମାଳ ସହିତ ଅନ୍ୟ ଜିଲା ଗୁଡ଼ିକରେ ଏହାର ପ୍ରଭାବ ରହିପାରେ । ଉପକୂଳବର୍ତ୍ତୀ ଜିଲ୍ଲା ମାନଙ୍କରେ ସମୁଦ୍ର କୂଳରେ ୫୦ ରୁ ୬୦ କିମି ବେଗରେ ପବନ ବହି ପାରେ । ଥାଇଲାଣ୍ଡ ଦ୍ବାରା ପ୍ରସ୍ତାବିତ ଶବ୍ଦ ମୋନ୍ଥାକୁ ନେଇ ବାତ୍ୟାର ନାମକରଣ କରାଯାଇଛି । ମୋନ୍ଥାର ଅର୍ଥ ସୁଗନ୍ଧିତ ଫୁଲ ବା ସୁନ୍ଦର ଫୁଲ । ତେବେ ଲଘୁଚାପ ଘଣ୍ଟା ପ୍ରତି ୩ କି.ମି ବେଗରେ ଉତ୍ତର-ପଶ୍ଚିମ ଉତ୍ତର ଦିଗରେ ଗତି କରୁଛି । ସେପଟେ ୨୭ରୁ ୨୯ ତାରିଖ ଯାଏ ଓଡ଼ିଶାରେ ପ୍ରବଳ ବର୍ଷାର ସମ୍ଭାବନା ସହିତ ବିଭିନ୍ନ ଜିଲାକୁ ବର୍ଷା ନେଇ ଆଲର୍ଟ ଜାରି କରିଛି ପାଣିପାଗ ବିଭାଗ ।
ଆଉନାହାନ୍ତି ପ୍ରଖ୍ଯାତ କବି ଓ ଲେଖକ ରାଜେନ୍ଦ୍ର କିଶୋର ପଣ୍ଡା
ଭୁବନେଶ୍ବର : ଆଉନାହାନ୍ତି ପ୍ରଖ୍ଯାତ କବି ଓ ଲେଖକ ରାଜେନ୍ଦ୍ର କିଶୋର ପଣ୍ଡା। ଆଜି ସକାଳ ୧୧.୩୦ରେ ପରଲୋକ ଗମନ କରିଛନ୍ତି ରାଜେନ୍ଦ୍ର। ସେ ଭାରତୀୟ ପ୍ରଶାସନିକ ସେବା ଅଧିକାରୀ ଭାବେ ୧୪ ଜୁଲାଇ ୧୯୬୭ରୁ ୩୦ ଜୁନ ୨୦୦୪ ପର୍ଯ୍ୟନ୍ତ କାର୍ଯ୍ୟ କରିଥିଲେ। ଝାରସୁଗୁଡା ଜିଲ୍ଲା ବାଟଲଗା ଗାଁରେ ୧୯୪୪ ଜୁନ ୨୪ରେ ରାଜେନ୍ଦ୍ରଙ୍କ ହୋଇଥିଲା ଜନ୍ମ। ୮୧ ବର୍ଷ ବୟସରେ ସେ ଇହଲୀଳା ସମ୍ବରଣ କରିଛନ୍ତି। ଶୈଳକଳ୍ପ ଲାଗି ୧୯୮୫ରେ କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର ଲାଭ କରିଥିଲେ ରାଜେନ୍ଦ୍ର। ଏହା ସହ ସେ ବିଷୁବ ସମ୍ମାନ, ସାରଳା ପୁରସ୍କାର, ଗଙ୍ଗାଧର ଜାତୀୟ ସମ୍ମାନ, ଝଙ୍କାର ପୁରସ୍କାର ଆଦି ଲାଭ କରିଥିଲେ।
କବି ରାଜେନ୍ଦ୍ର କିଶୋର ପଣ୍ଡାଙ୍କ ପ୍ରକାଶିତ କବିତା ସଂକଳନଗୁଡି଼କ ହେଉଛି-ଗୌଣ ଦେବତା, ଅନାବତାର, ଘୁଣାକ୍ଷର, ଶତଦ୍ରୁ ଅନେକ, ନିଜ ପାଇଁ ନାନାବାୟା,ଚଉକାଠରେ ଚିରକାଳ, ଶୈଳକଳ୍ପ,ଅନ୍ୟା, ବହୁବ୍ରୀହି, ବୋଧି-ନଭ, ଇଶାଖେଳ, ଦ୍ରୋହବାକ୍ୟ, ଦୁଜା ନାରୀ, ବୈରାଗୀ ଭ୍ରମର, ସତ୍ୟୋତ୍ତର, ବହ୍ୱାରମ୍ବେ ଇତ୍ୟାଦି।.
କବି ରାଜେନ୍ଦ୍ର ଜୀବନ କାଳ ମଧ୍ଯରେ ଲାଭ କରିଥିଲେ ଅନେକ ସମ୍ମାନ। ୧୯୮୫ରେ କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର, ୨୦୦୪ରେ ବିଷୁବ ପୁରସ୍କାର, ୨୦୨୧ରେ ସାରଳା ସମ୍ମାନ, ୨୦୧୨ରେ ଗଙ୍ଗାଧର ଜାତୀୟ ସମ୍ମାନ, ୧୯୯୫ରେ ଶାରଳା ପୁରସ୍କାର, ୧୯୯୪ରେ ଝଙ୍କାର ପୁରସ୍କାର, ୨୦୦୪ରେ ସାହିତ୍ୟ ଭାରତୀ ସମ୍ମାନ, ୨୦୦୫ରେ ସଚ୍ଚି ରାଉତରାୟ ସମ୍ମାନ ଲାଭ କରିଥିଲେ।
ଦିଲ୍ଲୀରେ ବିସ୍ଫୋରଣ ଯୋଜନା ପଣ୍ଡ
ନନ୍ଦିଘୋଷ ବ୍ୟୁରୋ : ଦିଲ୍ଲୀରେ ବିସ୍ଫୋରଣ ଯୋଜନା ପଣ୍ଡ। IED ବିସ୍ଫୋରଣ ଲାଗି ଷଡ଼ଯନ୍ତ୍ର ହୋଇଥିବା ବେଳେ ତାହାକୁ ପଣ୍ଡ କରିଛି ଦିଲ୍ଲୀ ପୋଲିସ। ଏହି ଘଟଣାରେ କିଛି ଅସ୍ତ୍ରଶସ୍ତ୍ର ଓ ଗୁଳି ଜବତ ହୋଇଛି। ବିସ୍ଫୋରଣ ଲାଗି କୁଖ୍ୟାତ ଆତଙ୍କୀ ସଂଗଠନ ISIS ଷଡ଼ଯନ୍ତ୍ର କରୁଥିବା ସୂଚନା ମିଳିବା ପରେ ପୋଲିସ ପକ୍ଷରୁ ଛାନବିନ ଆରମ୍ଭ ହୋଇଥିଲା। ୨ ସନ୍ଦିଗ୍ଧ ଆଇଏସଆଇଏସ ଆତଙ୍କୀଙ୍କୁ ଗିରଫ କରାଯାଇଛି। ୨ ସନ୍ଦିଗ୍ଧଙ୍କ ଭିତରେ ଜଣେ ଦିଲ୍ଲୀର ହୋଇଥିବାବେଳେ ଅନ୍ୟ ଜଣେ ମଧ୍ଯପ୍ରଦେଶର ହୋଇଥିବା ସୂଚନା ମିଳିଛି। ଦିଲ୍ଲୀ ପୋଲିସ ସ୍ପେସାଲ ସେଲ ପକ୍ଷରୁ ତନାଘନା ଆରମ୍ଭ ହୋଇଛି। ଗୁଇନ୍ଦା ତଥ୍ୟ ଆଧାରରେ ସର୍ଚ୍ଚ ଅପରେସନ ବେଳେ ସେମାନଙ୍କୁ ଗିରଫ କରାଯାଇଥିଲା। ସେମାନେ ଏପରିକ ଆତ୍ମଘାତୀ ହମଲା କରିବା ଲାଗି ତାଲିମପ୍ରାପ୍ତ ହୋଇଥିବା ସୂଚନା ମିଳିଥିଲା। ଅତିରିକ୍ତ ପୋଲିସ କମିଶନର ପ୍ରମୋଦ କୁସୱାହା ଓ ଏସିପି ଲଳିତ ମୋହନ ନେଗିଙ୍କ ନେତୃତ୍ବରେ ଗଠିତ ଟିମ୍ ପକ୍ଷରୁ ସର୍ଚ୍ଚ ଅପରେସନ କରାଯାଇଥିଲା। ପାକିସ୍ତାନର ଆଇଏସଆଇ ପକ୍ଷରୁ ସହଯୋଗ ପାଇ ସେମାନେ ରାଜଧାନୀରେ ଟେରର ମଡ୍ୟୁଲ କରୁଥିଲେ।
ଦୀପାବଳିରେ ବିପଦ ପାଲଟିଲା କାର୍ବାଇଡ୍ ବନ୍ଧୁକ ? ମଧ୍ୟପ୍ରଦେଶରେ ୩୦୦ ଆହତ, ୩୦ ଦୃଷ୍ଟିଶକ୍ତି ହରାଇଲେ
ନନ୍ଦିଘୋଷ ବ୍ୟୁରୋ : ସାରା ଦେଶରେ ଦୀପାବଳି ପାଳନ କରାଯାଉଥିଲା, ଲୋକମାନେ କାର୍ବାଇଡ୍ ବନ୍ଧୁକ ଦ୍ୱାରା ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ମଧ୍ୟପ୍ରଦେଶରେ କାର୍ବାଇଡ୍ ବନ୍ଧୁକ ଯୋଗୁଁ ତିରିଶ ଜଣ ଆଖି ହରାଇଛନ୍ତି। ଏହା ସହ ୩୦୦ରୁ ଅଧିକ ଲୋକଙ୍କୁ ଗୁରୁତର ଆଖି ଆଘାତ ଲାଗି ଡାକ୍ତରଖାନାରେ ଭର୍ତ୍ତି କରାଯାଇଛି ।
ଗଣମାଧ୍ୟମ ରିପୋର୍ଟରୁ ଜଣାପଡ଼ିଛି ଯେ ବିହାର ସମେତ ଦେଶର ଅନ୍ୟ କେତେକ ରାଜ୍ୟରେ କାର୍ବାଇଡ୍ ବନ୍ଧୁକ ବ୍ୟବହାର ଯୋଗୁଁ ଆହତ ହେବାର ରିପୋର୍ଟ ଆସିଛି। ତଥାପି, ସବୁଠାରୁ ଖରାପ ପ୍ରଭାବ ମଧ୍ୟପ୍ରଦେଶର ବିଦିଶା ଜିଲ୍ଲାରେ ଦେଖିବାକୁ ମିଳିଛି, ଯେଉଁଠାରେ ସ୍ଥାନୀୟ ବଜାରରେ କାର୍ବାଇଡ୍ ବନ୍ଧୁକ ବ୍ୟାପକ ଭାବରେ ବିକ୍ରି ହେଉଥିଲା। ଯଦିଓ ମଧ୍ୟପ୍ରଦେଶ ସରକାର ଦୀପାବଳି ପୂର୍ବରୁ ଅକ୍ଟୋବର ୧୮ତାରିଖରେ ଏଗୁଡ଼ିକୁ ନିଷିଦ୍ଧ କରିଥିଲେ, ତଥାପି ଏଗୁଡ଼ିକର ଉତ୍ପାଦନ ଏବଂ ବିକ୍ରୟ ବନ୍ଦ କରାଯାଇ ପାରିନଥିଲା କାରଣ ଏଗୁଡ଼ିକ ସ୍ଥାନୀୟ ସ୍ତରରେ ନିର୍ମିତ ହୋଇଥାଏ।
କାର୍ବାଇଡ୍ ବନ୍ଧୁକ କାରଖାନାରେ ତିଆରି ହୁଏ ନାହିଁ। ଏଗୁଡ଼ିକ ସ୍ଥାନୀୟ ଭାବରେ ଏକ ଅତ୍ୟନ୍ତ ସ୍ୱଦେଶୀ ପଦ୍ଧତି ବ୍ୟବହାର କରି ତିଆରି କରାଯାଏ। ଯେପରି ଲୁହା ପାଇପ୍ ପୋଟାସ୍ ଟ୍ୟୁବ୍ ତିଆରି ପାଇଁ ବ୍ୟବହୃତ ହୁଏ, ସେହିପରି ଏହି ବନ୍ଧୁକ ଅନେକ ପ୍ଲାଷ୍ଟିକ୍ ପାଇପ୍ ସହିତ ଯୋଡ଼ି ତିଆରି କରାଯାଏ। ଏହା ଏକ ସ୍ଥାନୀୟ ମିଶ୍ରଣ, ଏବଂ କ୍ୟାଲସିୟମ୍ କାର୍ବାଇଡ୍ ବ୍ୟବହୃତ ହେଉଥିବାରୁ ଏହାକୁ କାର୍ବାଇଡ୍ ବନ୍ଧୁକ କୁହାଯାଏ। ଏହା ବହୁତ ଶସ୍ତା ଏବଂ ପିଲାମାନଙ୍କୁ ଆକର୍ଷିତ କରେ, ତେଣୁ ଏହି ବନ୍ଧୁକ ଏହି ଦୀପାବଳିରେ ବହୁ ସଂଖ୍ୟାରେ କିଣାଯାଇଥିଲା।
ଏହା ବ୍ୟାପକ ଲୋକପ୍ରିୟତା ହାସଲ କରିଥିଲା, ବିଶେଷକରି ସୋସିଆଲ ମିଡିଆ ମାଧ୍ୟମରେ, ଏବଂ ଲୋକମାନେ ଏହାକୁ ମାତ୍ର ୧୫୦ ରୁ ୨୦୦ ଟଙ୍କାରେ ତିଆରି କରି ବିକ୍ରି କରୁଥିଲେ। ଯେଉଁମାନେ ଅଳ୍ପ ସମ୍ପତ୍ତିର ଲୋଭରେ ଏହି ବନ୍ଧୁକ ତିଆରି କରି ବିକ୍ରି କରିଥିଲେ, ସେମାନେ ହୁଏତ ଜାଣି ନ ଥିବେ ଯେ ଏହା ପିଲାମାନଙ୍କ ଦୃଷ୍ଟିଶକ୍ତି ଉପରେ ପ୍ରଭାବ ପକାଇବ ।
ଏହି ସ୍ୱଦେଶୀ କାର୍ବାଇଡ୍ ବନ୍ଧୁକଟି ବହୁତ ବିପଦପୂର୍ଣ୍ଣ କାରଣ ଏଥିରେ ରାସାୟନିକ ପଦାର୍ଥ ବ୍ୟବହାର କରାଯାଏ। ବନ୍ଧୁକର ପ୍ଲାଷ୍ଟିକ୍ ପାଇପ୍ରେ କ୍ୟାଲସିୟମ୍ କାର୍ବାଇଡ୍ ଢାଳି ଦିଆଯାଏ। ଏହି କ୍ୟାଲସିୟମ୍ କାର୍ବାଇଡ୍ ଉପରେ କିଛି ବୁନ୍ଦା ପାଣି ଢାଳି ଦିଆଯାଏ, ଯାହା ଏକ ଗ୍ୟାସ୍ ସୃଷ୍ଟି କରେ। ଲାଇଟର କିମ୍ବା ଦିଆସିଲି କାଠିରୁ ଏକ ସ୍ପାର୍କିଂ ବିସ୍ଫୋରଣ ଘଟାଇଥାଏ। ଦୀପାବଳିରେ ଏହି ବିସ୍ଫୋରଣ ପାଇଁ ପିଲାମାନେ ଏହାକୁ ବ୍ୟବହାର କରୁଥିଲେ।
କାର୍ବାଇଡ୍ ବନ୍ଧୁକରେ ପାଣି ଏବଂ କ୍ୟାଲସିୟମ୍ କାର୍ବାଇଡ୍ ଖଣ୍ଡର ରାସାୟନିକ ପ୍ରତିକ୍ରିୟା ଦ୍ୱାରା ଆସିଟିଲିନ୍ ଗ୍ୟାସ୍ ଉତ୍ପାଦିତ ହୁଏ। ୱେଲ୍ଡିଂରେ ମଧ୍ୟ ଆସିଟିଲିନ୍ ଗ୍ୟାସ୍ ବ୍ୟବହାର କରାଯାଏ। ଏହା ଅତ୍ୟନ୍ତ ଜ୍ୱଳନଶୀଳ। ଯେତେବେଳେ ପିଲାମାନେ ଏହାକୁ ଦେଖନ୍ତି କିମ୍ବା ମୁହଁ ପାଖରେ ରଖନ୍ତି, ବିସ୍ଫୋରଣ ଫଳରେ ଆସିଟିଲିନ୍ ଗ୍ୟାସ୍ ଏବଂ ଗରମ, ପୋଡ଼ିଯାଇଥିବା କାର୍ବାଇଡ୍ ସିଧାସଳଖ ମୁହଁ ଏବଂ ଆଖିରେ ଆଘାତ କରିପାରେ, ଯାହା ମୁହଁ ଏବଂ ଆଖିରେ ରାସାୟନିକ ପୋଡ଼ାଜଳା ସୃଷ୍ଟି କରେ । ଏହା ସହିତ, ବିସ୍ଫୋରଣ ସମୟରେ ପିଭିସି ପାଇପ୍ ରୁ ଛୋଟ ଛୋଟ ଖଣ୍ଡ ବାହାରକୁ ବାହାରି ଯାଏ। ଏହି ପ୍ଲାଷ୍ଟିକ୍ ଖଣ୍ଡଗୁଡ଼ିକ ଗୁଳି ପରି ଆଖି ଭିତରକୁ ପ୍ରବେଶ କରି ଆଖିକୁ କ୍ଷତି ପହଞ୍ଚାଇପାରେ ଏବଂ ଯଦି ଗୁରୁତର ହୁଏ, ତେବେ ଦୃଷ୍ଟିଶକ୍ତି ମଧ୍ୟ ହରାଇପାରେ।
କାର୍ବାଇଡ୍ ବନ୍ଧୁକ ଯୋଗୁଁ ଘଟିଥିବା ଦୁର୍ଘଟଣାକୁ ଦୃଷ୍ଟିରେ ରଖି, ମଧ୍ୟପ୍ରଦେଶ ସରକାର କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବା ଆରମ୍ଭ କରିଛନ୍ତି। ନିଷେଧ ସତ୍ତ୍ୱେ କାର୍ବାଇଡ୍ ବନ୍ଧୁକ କିପରି ବଜାରରେ ପ୍ରବେଶ କଲା ତାହା ତଦନ୍ତ ପାଇଁ ସରକାର ନିର୍ଦ୍ଦେଶ ଦେଇଛନ୍ତି। ଏହାର ବ୍ୟବହାରକୁ ରୋକିବା ଏବଂ ସେଗୁଡ଼ିକୁ ଜବତ କରିବା ପାଇଁ ବିଭିନ୍ନ ଜିଲ୍ଲାରେ ଚଢାଉ କରାଯାଉଛି। ଅନେକ ଲୋକଙ୍କୁ ଅଟକ ରଖାଯାଇଛି। ସେମାନଙ୍କ ବିରୁଦ୍ଧରେ ଏଫଆଇଆର ରୁଜୁ କରାଯାଇଛି ଏବଂ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି।
ପରଲୋକରେ ଆଡଭର୍ଟାଇଜିଂ ଲିଜେଣ୍ଡ ପୀୟୂଷ ପାଣ୍ଡେ
ନନ୍ଦିଘୋଷ ବ୍ୟୁରୋ : ଆଉନାହାନ୍ତି ଆଡଭର୍ଟାଇଜିଂ ଲିଜେଣ୍ଡ ପୀୟୂଷ ପାଣ୍ଡେ। ଫେଭିକଲ ଓ ଭୋଡାଫୋନ ଲାଗି ବିଜ୍ଞାପନ ସକାଶେ ଖ୍ୟାତି ଅର୍ଜନ କରିଥିବା ପୀୟୂଷ ୭୦ ବର୍ଷରେ ଇହଲୀଳା ସମ୍ବରଣ କରିଛନ୍ତି। ଅନେକ ଲୋକପ୍ରିୟ ବିଜ୍ଞାପନ ପ୍ରସାରଣ କରି ସେ କିମ୍ବଦନ୍ତୀ ସାଜିଥିଲେ। ତାଙ୍କ ମୃତ୍ୟୁରେ କେନ୍ଦ୍ର ବାଣିଜ୍ୟ ମନ୍ତ୍ରୀ ପୀୟୂଷ ଗୋଏଲଙ୍କ ସମେତ ବହୁ ବିଶିଷ୍ଟ ବ୍ଯକ୍ତି ଶୋକବ୍ୟକ୍ତ କରିଛନ୍ତି। କାଡବରୀ ଲାଗି କୁଛ ଖାସ ହୈ ସ୍ଲୋଗାନଠାରୁ ଆରମ୍ଭ କରି ଏସିଆନ ପେଣ୍ଟସର ହର ଖୁସି ମେ ରଙ୍ଗ ଲାୟେ ସମେତ ଭୋଡାଫୋନର ବିଜ୍ଞାପନ ଲାଗି ସେ ଖ୍ଯାତି ଅର୍ଜନ କରିଥିଲେ। ଏପରିକି ୨୦୧୪ରେ ଅବ କି ବାର୍ ମୋଦି ସରକାର ସ୍ଲୋଗାନ ସୃଷ୍ଟି କରି ସେ ସାରା ରାଜନୀତି ଜଗତରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଥିଲେ। ୧୯୫୫ରେ ଜନ୍ମିତ ପୀୟୂଷ ନିଜ ପ୍ରତିଭା ଲାଗି ପଦ୍ମଶ୍ରୀ ସମ୍ମାନରେ ବିଭୂଷିତ ହୋଇଥିଲେ। ଅମିତାଭ ବଚ୍ଚନଙ୍କ ସହ ପୋଲିଓ ବିଜ୍ଞାପନ, ଫେଭିକଲ ବସ୍ ଫେଭିକଲ ଫିସ୍ ଫେଭିକଲ ସୋଫା, ଫେଭିକଲ କ୍ବିକ, ପଣ୍ଡସ୍, ଚଲ ମେରି ଲୁନା, ବେଲ୍ ବଜାଓ, କ୍ୟାନସର ରୋଗୀ ସଂଘ ଲାଗି ଧୂମପାନ ନିରୋଧୀ ଅଭିଯାନରେ ନିଜର ପାରଦର୍ଶିତା ପ୍ରତିପାଦନ କରିଥିଲେ ପୀୟୂଷ।
ମହଙ୍ଗା ପଡିଲା କଙ୍ଗାରୁ କୋର୍ଟ, ୪ ଜଣଙ୍କୁ ବାନ୍ଧିଲା ପୋଲିସ
ଆନନ୍ଦପୁର : ମହଙ୍ଗାପଡିଲା କଙ୍ଗାରୁ କୋର୍ଟ । ଭିଡିଓ ଭାଇରାଲ ପରେ ୪ ଜଣଙ୍କୁ ବାନ୍ଧିଲା ପୋଲିସ । କେନ୍ଦୁଝର ଜିଲ୍ଲା ଆନନ୍ଦପୁର ଥାନା ଅଞ୍ଚଳରେ ଜଣେ ବ୍ୟକ୍ତି ଧାନ କାଟି ଫେରୁଥିବା ବେଳେ ପାଣି ପିଇବା ପାଇଁ ଜଣେ ମହିଳାଙ୍କ ନିକଟକୁ ଯାଇଥିଲେ । ଏହି ସମୟରେ ଗାଁର କିଛି ଯୁବକ ସେମାନଙ୍କ ମଧ୍ୟରେ ଖରାପ ସମ୍ପର୍କ ଥିବା କହି କବାଟ ବନ୍ଦ କରିଦେଇଥିଲେ । ପରେ ସମ୍ପୃକ୍ତ ମହିଳାଙ୍କ ସ୍ବାମୀଙ୍କୁ ଜଣାଇବା ସହ ଉଭୟଙ୍କୁ ନିର୍ଦ୍ଧୁମ ମାଡ଼ ମାରିବା ସହ ଲଙ୍କା ଗୁଣ୍ଡ ଏବଂ ପାଣି ଢ଼ାଳି ବାଡ଼େଇ ଥିଲେ । ପରେ ଉଭୟଙ୍କୁ ଜୋତା ମାଳ ପିନ୍ଧାଇ ଗାଁ ଦାଣ୍ଡରେ ବୁଲାଇ ଥିବା ନେଇ ଅଭିଯୋଗ ହୋଇଛି। ଜୋତା ମାଳ ପିନ୍ଧାଇ ଗାଁ ଦାଣ୍ଡରେ ବୁଲାଇବା ଭିଡିଓ ଭାଇରାଲ ହେଉଛି। ଏନେଇ ଆନନ୍ଦପୁର ଥାନାରେ ସମ୍ପୃକ୍ତ ମହିଳା ଅଭିଯୋଗ କରିଥିଲେ। ଅଭିଯୋଗ ପାଇ ପୋଲିସ ଘଟଣାସ୍ଥଳରେ ପହଂଚି ସେହି ଗ୍ରାମର ୨ ଜଣ ମହିଳା ଏବଂ ୨ ଜଣ ପୁରୁଷଙ୍କୁ ଗିରଫ କରିଛି ।
ଡୁଙ୍ଗୁରିପାଲି-ସୋନପୁର ମୁଖ୍ୟ ରାସ୍ତା ନଙ୍ଗଳକଟା ଠାରେ ରାସ୍ତାରୋକ
ଡୁଙ୍ଗୁରିପାଲି : ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ନଙ୍ଗଳକଟା ଗ୍ରାମବାସୀ ନବନିର୍ମାଣ ରାଇସମିଲ ବନ୍ଦ ଦାବିରେ ଆନ୍ଦୋଳନ କରିଛନ୍ତି । ଆଜି ସକାଳ ୬ ଟାରୁ ଡୁଙ୍ଗୁରିପାଲି-ସୋନପୁର ମୁଖ୍ୟ ରାସ୍ତା ନଙ୍ଗଳକଟା ଠାରେ ରାସ୍ତାରୋକ ଓ ଧାରଣା ଦେଇଛନ୍ତି l ଉକ୍ତ ଗ୍ରାମର ରାସ୍ତା ପାର୍ଶ୍ବରେ ସରସ୍ଵତୀ ରାଇସମିଲ ନିର୍ମାଣ ହୋଇଛି ଏବଂ ଏହି ମିଲକୁ କାର୍ଯ୍ୟକାରୀ କରିବାକୁ ପ୍ରଚେଷ୍ଟା ଚାଲିଛି l ଏହି ମିଲ ଚାଲୁ ହେଲେ ସ୍ଥାନୀୟ ଅଞ୍ଚଳର ଲୋକଙ୍କ ନାନା ଅସୁବିଧା ଉପୁଜିବ । ପାଖରେ ଏକ ଡ଼ାକ୍ତରଖାନା ରହିଛି ଏବଂ ଏହା ଜନଗହଳି ପୂର୍ଣ୍ଣ ରାସ୍ତା ଥିବା ଯୋଗୁ ଜନ ସାଧାରଣ ବିଶେଷ ଅସୁବିଧା ଭୋଗିବେ । ତେଣୁ ଏହି ରାଇସମିଲକୁ ସମ୍ପୂର୍ଣ୍ଣ ଭାବେ ବନ୍ଦ କରିବାକୁ ଦାବି କରି ପ୍ରତିବାଦ ଓ ଧାରଣା ଦେଇଛନ୍ତି ଲୋକେ l ଯାହା ଫଳରେ ଉଭୟ ପାର୍ଶ୍ୱରେ ଗାଡ଼ି ଗୁଡିକ ଅଟକି ରହିଛି ଏବଂ ସମ୍ପୂର୍ଣ୍ଣ ଭାବେ ରାସ୍ତା ବନ୍ଦ ହୋଇଛି l
କୁର୍ନୁଲ ଚିନ୍ନାଟେକୁରୁ ନିକଟରେ ବଡ଼ ଦୁର୍ଘଟଣା ; ଜଳିଗଲା ଚଳନ୍ତା ବସ, ୧୫ ଜୀବନ୍ତ ଦଗ୍ଧ
ନନ୍ଦିଘୋଷ ବ୍ୟୁରୋ: ଆନ୍ଧ୍ରର କୁର୍ନୁଲ ଜିଲ୍ଲା ଚିନ୍ନାଟେକୁରୁ ନିକଟରେ ବଡ଼ ଦୁର୍ଘଟଣା। ଜଳିଗଲା ଚଳନ୍ତା ବସ୍। ଏଥିରେ ୧୫ ଜଣ ଜୀବନ୍ତ ଦଗ୍ଧ ହୋଇ ଯାଇଛନ୍ତି। ଆହୁରି ଅନେକ ଆହତ ହୋଇଛନ୍ତି। ସମସ୍ତଙ୍କୁ ହସପିଟାଲରେ ଭର୍ତ୍ତି କରାଯାଇଛି। ହାଇଦ୍ରାବାଦରୁ ବସଟି ବେଙ୍ଗାଲୁରୁ ଯାଉଥିଲା। ଏକ ବାଇକକୁ ଧକ୍କା ଦେବା ପରେ ବସରେ ନିଆଁ ଲାଗି ଯାଇଥିଲା। ବସ୍ ଝରକା ଭାଙ୍ଗି ୧୨ ଜଣ ଯାତ୍ରୀଙ୍କୁ ଉଦ୍ଧାର କରାଯାଇଥିଲା ।
ବସରେ ଥିଲେ ୪୦ ଜଣ ଯାତ୍ରୀ ଓ ଦୁଇ ଜଣ ଡ୍ରାଇଭର। ଏହି ଦୁର୍ଘଟଣାକୁ ନେଇ ରାଷ୍ଟ୍ରପତି ଗଭୀର ଶୋକ ପ୍ରକାଶ କରିଛନ୍ତି। ଆନ୍ଧ୍ର ଓ ତେଲେଙ୍ଗାନାର ମୁଖ୍ୟମନ୍ତ୍ରୀମାନେ ବି ଶୋକ ପ୍ରକାଶ କରିଛନ୍ତି। ଜିଲ୍ଲାପାଳ ଘଟଣାସ୍ଥଳରେ ପହଞ୍ଚିଥିବା ବେଳେ ଏକ ହେଲପ ଲାଇନ ନମ୍ଵର ବି ଜାରି କରାଯାଇଛି।
ଆସୁଛି ଆଉ ଏକ ଲଘୁଚାପ ; ଆସନ୍ତା ୨୭ରୁ ୩୦ ଛେଚିବ ବର୍ଷା
ଭୁବନେଶ୍ବର : ଆଜି ସୃଷ୍ଟି ହୋଇପାରେ ଆଉ ଏକ ଲଘୁଚାପ। ଦକ୍ଷିଣ ଆଣ୍ଡାମାନ ସାଗରରେ ଏକ ଘୂର୍ଣ୍ଣବଳୟ ସକ୍ରିୟ ରହିଥିବାରୁ ଏହି ଲଘୁଚାପ ସୃଷ୍ଟି ହେବାର ସମ୍ଭାବନା ଦେଖା ଦେଇଛି। ଏହି ଲଘୁଚାପ ଅଧିକ ଘନୀଭୂତ ହେଲେ ଅଧିକ ବର୍ଷା ହୋଇପାରେ। ତେବେ ବର୍ତ୍ତମାନ ପୂର୍ବ ଦିଗରୁ ରାଜ୍ୟକୁ ପବନ ଆସୁଥିବାରୁ ବଙ୍ଗୋପସାଗରର ଜଳୀୟବାଷ୍ପ ଆସୁଛି। ଏହାର ପ୍ରଭାବରେ ରାଜ୍ୟରେ ୭ ଦିନ ଧରି ବର୍ଷା ଜାରି ରହିବ ବୋଲି ପାଣିପାଗ ବିଭାଗ ପକ୍ଷରୁ କୁହାଯାଇଛି । ସେପଟେ ତାମିଲନାଡୁ ଉପକୂଳରେ ଏବେ ୱେଲ୍ ମାର୍କଡ ଲୋ ପ୍ରେସର ସକ୍ରିୟ ଅଛି । ତାହା ଅବପାତରେ ପରିଣତ ହୋଇ ତାମିଲନାଡୁ ପୁଡୁଚେରୀ ଓ ଦକ୍ଷିଣ ଆନ୍ଧ୍ର ପ୍ରଦେଶ ଉପକୂଳ ଆଡ଼କୁ ମୁହାଁଇବ ।
ଆସନ୍ତାକାଲି ଦକ୍ଷିଣ ଆଭ୍ୟନ୍ତରୀଣ ଓ ଉପକୂଳରେ ବର୍ଷାର ବିସ୍ତୃତି ବୃଦ୍ଧି ପାଇବ । ୨୫ ଓ ୨୬ ତାରିଖରେ ବି ବର୍ଷା ହେବ। ୨୮ ତାରିଖ ଯାଏ ରାଜ୍ୟରେ ଏପରି ବର୍ଷା ଜାରି ରହିବ ବୋଲି ପାଣିପାଗ ବିଭାଗ ପକ୍ଷରୁ ଅନୁମାନ କରାଯାଇଛି। ୨୪ରେ ଥିବା ଲଘୁଚାପ ପ୍ରଭାବ ଅଧିକ ରହିବ ବୋଲି ଆକଳନ କରିଛନ୍ତି ପାଣପାଗ ବିଶେଷଜ୍ଞ । ବଙ୍ଗୋପସାଗରରେ ଏହି ସପ୍ତାହରେ ସମୁଦ୍ର ଓ ଉପରିସ୍ଥ ବାୟୁମଣ୍ଡଳର ପ୍ରତିକୂଳ ସ୍ଥିତି, ବର୍ତ୍ତମାନ ରହିଥିବା ଲଘୁଚାପ ୨୩-୨୪ ତାରିଖ ସୁଦ୍ଧା ଘନୀଭୂତ ନ ହୋଇ ୨୪-୨୫ ତାରିଖ ମଧ୍ୟରେ ସମ୍ଭାବ୍ୟ ଦ୍ବିତୀୟ ଲଘୁଚାପ ସହ ମିଶି ଗୋଟିଏ ସିଷ୍ଟମରେ ପରିଣତ ହେବ । ତେବେ ଏହା କେବେ ଓ କେତେ ଘନୀଭୂତ ହେବ ଏବଂ ଗତିପଥ କ’ଣ ରହିବ, ତାହା ବର୍ତ୍ତମାନ ଅନିଶ୍ଚିତତାରେ ରହିଛି ।
ଆଜି ମାଓବାଦୀଙ୍କ ଭାରତ ବନ୍ଦ ; ସରକାରଙ୍କ ଦମନଲୀଳାକୁ ମାଓ ସଂଗଠନର ବିରୋଧ
ନନ୍ଦିଘୋଷ ବ୍ୟୁରୋ: ଆଜି ସିପିଆଇ(ମାଓବାଦୀ) ପକ୍ଷରୁ ପାଳନ ହେବ ଭାରତ ବନ୍ଦ । ମାଓବାଦୀ ସଂଗଠନ ବିରୋଧରେ ଦେଶରେ ଚାଲିଥିବା ସରକାରଙ୍କ ଦମନଲୀଳାକୁ ବିରୋଧ କରି ଏହି ବନ୍ଦ ଡାକରା ଦିଆଯାଇଛି । କର୍ପୋରେଟ ସ୍ବାର୍ଥକୁ ଦୃଷ୍ଟିରେ ରଖି ମାଓବାଦୀ କର୍ମୀଙ୍କ ଉପରେ ଚାଲିଥିବା ଦମନଲୀଳାକୁ ବିରୋଧ କରି ସାରା ଦେଶରେ ଏହି ବନ୍ଦ ପାଳନ କରାଯିବ ବୋଲି କହିଛି ନିଷିଦ୍ଧ ଘୋଷିତ ସଂଗଠନ । ସିପିଆଇ(ମାଓବାଦୀ) କେନ୍ଦ୍ରୀୟ କମିଟି ମୁଖପାତ୍ର ଅଭୟ କହିଛନ୍ତି- ନାରାୟଣପୁର, ବିଜାପୁର, କାଙ୍କର, ସୁକମା, ପଶ୍ଚିମ ସିଂହଭୂମ ଏବଂ ଓଡ଼ିଶାର କିଛି ଅଞ୍ଚଳରେ ମାଓବାଦୀ କର୍ମୀମାନଙ୍କ ଉପରେ ନିରାପତ୍ତା ବାହିନୀ ପକ୍ଷରୁ ନିର୍ଯାତନା, ଦମନଲୀଳା ଆଦି ଚାଲିଛି ।
ଫେକ୍ ଏନକାଉଣ୍ଟର ଜରିଆରେ କମ୍ରେଡ ମନୋଜ ଓରଫ ମୋଡେମ ଲକ୍ଷ୍ମୀ କ୍ରିଷ୍ଣା, କମ୍ରେଡ ବିଜୟ ଓରଫ ଚିନ୍ନା ହାସ୍ ଓ ଅନ୍ୟ ବହୁ ମାଓବାଦୀ ନେତା ପ୍ରାଣ ହରାଇଲେଣି । ବିନା ଆଇନଗତ ପ୍ରକ୍ରିୟାରେ କର୍ମୀମାନଙ୍କୁ ନିର୍ଯାତନା ଦିଆଯାଇ ହତ୍ୟା କରାଯାଉଛି । ଅଭୟ କହିଛନ୍ତି- କେନ୍ଦ୍ର ସରକାର ଭାରତକୁ ଏକ କର୍ପୋରେଟ ହିନ୍ଦୁ ରାଷ୍ଟ୍ରରେ ପରିଣତ କରିବା ସହ ଗଣତାନ୍ତ୍ରିକ ପ୍ରତିଷ୍ଠାନଗୁଡିକୁ ଧ୍ବଂସ କରୁଛନ୍ତି । ଏହି ବନ୍ଦରେ ସାମିଲ ହେବା ଲାଗି ସମସ୍ତ ପ୍ରଗତିଶୀଳ, ଗଣତାନ୍ତ୍ରିକ ଓ ବାମଦଳକୁ ଆହ୍ବାନ କରିଛନ୍ତି ଅଭୟ ।