ଆଜି ଟି-୨୦ ବିଶ୍ବକପରେ ଖେଳାଯାଇଥିବା ଏକ ମ୍ୟାଚରେ କାନାଡ଼ା ବିପକ୍ଷରେ ନ୍ୟୁଜିଲାଣ୍ଡ ୮ ଓ୍ବିକେଟରେ ପରାସ୍ତ କରିଛି । ପ୍ରଥମେ ବ୍ୟାଟିଂ କରି କାଡ଼ାନା ନିର୍ଦ୍ଧାରିତ ୨୦ ଓଭରରେ ୪ ଓ୍ବିକେଟ ହରାଇ ୧୭୩ ରନ୍ ସଂଗ୍ରହ କରିଥିଲା । ଓପନର ଯୁବରାଜ ସାମ୍ରା ୬୫ଟି ବଲରୁ ୧୧୦ ରନ୍ ସଂଗ୍ରହ କରିଥିଲେ । ନ୍ୟୁଜିଲାଣ୍ଡ ପକ୍ଷରୁ ମ୍ୟାଟ ହେନରୀ, ଜ୍ୟାକ ଡଫି, କାଇଲ ଜାମିଏସନ ଓ ଜେମ୍ସ ନିଶାମ ପ୍ରତ୍ୟେକ ୧ଟି ଲେଖାଏଁ ଓ୍ବିକେଟ ଅକ୍ତିଆର କରିଥିଲେ । ଜବାବରେ ନ୍ୟୁଜିଲାଣ୍ଡ ୧୫.୧ ଓଭରରେ ୨ ଓ୍ବିକେଟ ହରାଇ ୧୭୬ ରନ୍ ସଂଗ୍ରହ କରିଥିଲା । ରଚିନ୍ଦ୍ର ରବିନ୍ଦ୍ର ୩୯ଟି ବଲରୁ ୫୯ ଓ ଗ୍ଲେନ ଫିଲିପସ ୩୬ଟି ବଲରୁ ୭୬ ରନ୍ ସଂଗ୍ରହ କରିଥିଲେ । କାନାଡ଼ା ପକ୍ଷରୁ ଡିଲନ ହେଲିଗର ଓ ଦାସ ବିନ ଜାଫର ୧ଟି ଲେଖାଏଁ ଓ୍ବିକେଟ ଅକ୍ତିଆର କରିଥିଲେ ।
ପରକୀୟା ପ୍ରୀତିକୁ ବିରୋଧ କରିବା ପଡ଼ିଲା ମହଙ୍ଗା: ପ୍ରେମିକ ସହ ମିଶି ପତିଙ୍କୁ ହତ୍ୟା
ମଧ୍ୟପ୍ରଦେଶର ମଣ୍ଡଲା ପୋଲିସ ଛାତି ଥରାଇଦେବା ଭଳି ଏକ କଳାକାରନାମାର ପର୍ଦ୍ଦାଫାସ କରିଛି । ଏହି ହତ୍ୟାକାଣ୍ଡ କୌଣସି ଫିଲ୍ମ ସ୍କ୍ରିପ୍ଟ ଠାରୁ କମ୍ ନୁହେଁ । ଏହି ହତ୍ୟାକାଣ୍ଡକୁ ନେଇ ପୋଲିସ ଖୁଲାସା କରିଛି ଯେ, ମୃତକଙ୍କ ପତ୍ନୀ ହିଁ ନିଜର ପ୍ରେମିକଙ୍କ ସହ ମିଶି ନିଜର ପତିଙ୍କୁ ହତ୍ୟା କରିଥିଲେ । ଜିଲ୍ଲାର ଟିକାରିଆ ଥାନା ଅଞ୍ଚଳରେ ଫେବୃଆରୀ ୧୪ ତାରିଖରେ କୁଡ଼ାମୈଲୀ ଗାଁ ନିକଟରେ ମଧୁବନ ଢାବା ଆଗରେ ଜଣେ ଯୁବକଙ୍କ ଶବ ମିଳିଥିଲା । ମୃତକ ଜଣଙ୍କ ଜବଲପୁରର ସୁମିତ କାଛି ବୋଲି ଚିହ୍ନଟ ହୋଇଥିଲା । ପୋଲିସ ଯେତେବେଳ ଏହି ଘଟଣାର ତଦନ୍ତ ଆରମ୍ଭ କରିଥିଲା, ସେତେବେଳେ ପତ୍ନୀ ଜମୁନା ଓରଫ କବିତା ପଚରାଉଚରା ପୂର୍ବରୁ ପୋଲିସକୁ ଗୁମରାହ କରିବାକୁ ଚେଷ୍ଟା କରିଥିଲା । ମାତ୍ର ପୋଲିସ ଯଥାସମ୍ଭବ ସବୁ ସତ ପଦାକୁ ଆଣିଥିଲା ।
ମହିଳା କହିଥିଲେ, ପଡ଼ୋଶୀ ସୂର୍ଯ୍ୟକାନ୍ତ ତ୍ରିପାଠୀଙ୍କ ସହ ତାଙ୍କର ସମ୍ବନ୍ଧ ରହିଥିଲା । ଆପତ୍ତି କରିବାରୁ ପତିଙ୍କୁ ରାସ୍ତାର ହଟାଇବାକୁ ସେ ଷଡ଼ଯନ୍ତ୍ର ରଚିଥିଲେ । ନିଜର ପ୍ରେମିକଙ୍କ ସହ ମିଶି ସେ ସ୍ବାମୀଙ୍କୁ ହତ୍ୟା କରିଥିବା ମହିଳା କହିଥିଲେ । ଧାର୍ଯ୍ୟ ସମୟରେ ସେ ପତିଙ୍କୁ ଧରି ଫେବୃଆରୀ ୧୧ରେ ସନ୍ଧ୍ୟା ସମୟରେ ଜବଲପୁରରୁ ମଣ୍ଡଲା ଆଡ଼କୁ ଯାଇଥିଲେ । ମଧୁବନ ଢାବା ନିକଟରେ ସୂର୍ଯ୍ୟକାନ୍ତ ପୂର୍ବରୁ ଉପସ୍ଥିତ ଥିଲେ । ସେହି ସମୟରେ ସେମାନଙ୍କର ପରସ୍ପର ମଧ୍ୟରେ ବିବାଦ ହୋଇଥିଲା । ବିବାଦ ସମୟରେ ସୂର୍ଯ୍ୟକାନ୍ତ କ୍ରିକେଟ ବ୍ୟାଟରେ ସୁମିତଙ୍କ ଉପରେ ଆକ୍ରମଣ କରିଥିଲେ । ତା’ପରେ ସୁମିତଙ୍କ ପତ୍ନୀଙ୍କ ସହଯୋଗ କରିବା ବାହାନାରେ ହତିଆରରେ ସୁମିତଙ୍କୁ ହତ୍ୟା କରିଥିଲେ । ତା’ପରେ ଶବକୁ ଫୋପାଡ଼ି ଦୁହେଁ ଫେରାର ହୋଇଯାଇଥିଲେ । ୧୩ ଫେବଆରୀରେ ମୃତକଙ୍କ ଭାଇ ରିପୋର୍ଟ ଦାଖଲ କରିଥିଲେ ଓ ଭାଉଜଙ୍କ ଉପରେ ସନ୍ଦେହ କରିଥିଲେ । ପରେ ଦୁଇ ଅଭିଯୁକ୍ତ ଗିରଫ ହୋଇ ଜେଲ ଯାଇଥିଲେ ।
ରାହୁଲ ଗାନ୍ଧୀଙ୍କୁ ବଡ଼ ଆଶ୍ବସ୍ତି: ମାନହାନୀ କେସକୁ ଖାରଜ କଲେ କର୍ଣ୍ଣାଟକ ହାଇକୋର୍ଟ
ଲୋକସଭାର ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କୁ ମିଳିଛି ଏକ ବଡ଼ ଆଶ୍ବସ୍ତି । ରାହୁଲଙ୍କ ବିରୋଧରେ ବିଧାନସଭା ନିର୍ବାଚନ ସମୟରେ ମାନହାନୀ ସହ ଜଡ଼ିତ ନିର୍ବାଚନୀ କଣ୍ଟେଣ୍ଟକୁ ନେଇ ଦାୟର ହୋଇଥିବା ଏକ ବ୍ୟକ୍ତିଗତ ଅଭିଯୋଗକୁ କର୍ଣ୍ଣାଟକ ହାଇକୋର୍ଟ ରଦ୍ଦ କରିଦେଇଛନ୍ତି । ଜଷ୍ଟିସ ସୁନିଲ ଦତ୍ତ ଯାଦବଙ୍କ ଅଧ୍ୟକ୍ଷତାରେ ଏକ ବେଞ୍ଚ ଏହି ଆଦେଶ ଶୁଣାଣି କରି ରାହୁଲଙ୍କୁ ଆଶ୍ବସ୍ତି ଦେଇଛନ୍ତି । ଏହି ମାମଲାରେ ବିଜେପି ସରକାରଙ୍କୁ ଟାର୍ଗେଟ କରାଯାଇଥିବା ଏକ ‘କରପ୍ସନ ରେଟ କାର୍ଡ’ ବିଜ୍ଞାପନ ସହ ଜଡ଼ିତ ଥିଲା, ଯାହାକୁ ରାହୁଲ ସୋସିଆଲ ମିଡ଼ିଆରେ ଉଲ୍ଲେଖ କରିଥିଲେ ।
ଏହି ବିଜ୍ଞାପନ ପରେ ବିଜେପି ସମର୍ଥକ କେଶବ ପ୍ରସାଦ ଏକ ବ୍ୟକ୍ତିଗତ ଅଭିଯୋଗ ଦାଖଲ କରିଥିଲେ, ତାହାକୁ ନେଇ ତଳ ଅଦାଲତ ସମନ ଜାରି କରିଥିଲେ । ରାହୁଲ ଉକ୍ତ ସମନକୁ ହାଇକୋର୍ଟରେ ଚ୍ୟାଲେଞ୍ଜ କରିଥିଲେ । ତା’ପରେ କୋର୍ଟ ଶୁଣାଣି କରି ଅଭିଯୋଗକୁ ସମ୍ପୂର୍ଣ୍ଣ ଭାବେ ଖାରଜ କରିଦେଇଥିଲେ । କର୍ଣ୍ଣାଟକ ବିଧାନସଭା ନିର୍ବାଚନ ସମୟରେ ଏହି ପୂରା ବିବାଦ ଆରମ୍ଭ ହୋଇଥିଲା । ସେହି ସମୟରେ ବିଜେପି ସରକାର ବିରୋଧରେ କଂଗ୍ରେସ ଏକ ଆକ୍ରାମକ ବିଜ୍ଞାପନ ଅଭିଯାନ ଚଳାଇଥିଲେ । ଉକ୍ତ ଅଭିଯାନରେ ‘କରପ୍ସନ ରେଟ କାର୍ଡ’ ମାଧ୍ୟମରେ ସରକାରଙ୍କ ଉପରେ ଭ୍ରଷ୍ଟାଚାର ଅଭିଯୋଗ ଲାଗିଥିଲା । ରାହୁଲ ଉକ୍ତ କଣ୍ଟେଣ୍ଟକୁ ସୋସିଆଲ ମିଡ଼ିଆରେ ପ୍ରଚାର କରିବା ପରେ ତାହାକୁ ମାନହାନୀର ଆଧାର କରି ଆଇନଗତ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଥିଲା ।
ରାଜ୍ୟପାଳଙ୍କ ଅଭିଭାଷଣରେ ଶବ୍ଦ ଅଧିକା କିନ୍ତୁ କାର୍ଯ୍ୟ ଶୂନ : ନବୀନ ପଟ୍ଟନାୟକ
ଭୁବନେଶ୍ବର : ରାଜ୍ୟପାଳଙ୍କ ଅଭିଭାଷଣ ନେଇ ରାଜ୍ୟ ସରକାରଙ୍କୁ କଡ଼ା ଭାଷାରେ ସମାଲୋଚନା କରିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ରାଜ୍ୟପାଳଙ୍କ ଅଭିଭାଷଣରେ ଶବ୍ଦ ଅଧିକା କିନ୍ତୁ କାର୍ଯ୍ୟ ଶୂନ । ରାଜ୍ୟରେ ଭୁଶୁଡି ପଡିଲାଣି ଆଇନଶୃଙ୍ଖଳା । ଏକଥା ବାରମ୍ବାର କୁହାଗଲେ ବି ସରକାର ତତ୍ପର ହେଉନାହାଁନ୍ତି । ଭାରତ ବର୍ଷରେ କୌଣସି ରାଜ୍ୟ ନଥିବ ଓଡ଼ିଶାରେ ଯେଭଳି ଆଇନଶୃଙ୍ଖଳା ବିଗିଡିଯାଇଛି ସେଭଳି ରାଜ୍ୟରେ ଉଦାହରଣ ଦେଖିବାକୁ ମିଳୁନି ।
୯୦ ବର୍ଷୀୟ ସଲିମ୍ ଖାନଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିଲା: ବାପାଙ୍କୁ ଦେଖିବାକୁ ହସ୍ପିଟାଲରେ ପହଞ୍ଚିଲେ ସଲମାନ
ହିନ୍ଦି ସିନେମା ଜଗତର ଜଣାଶୁଣା ଲେଖକ ସଲିମ ଖାନ ବର୍ତ୍ତମାନ ସମୟରେ ହସ୍ପିଟାଲରେ ଭର୍ତ୍ତି ହୋଇଛନ୍ତି । ତାଙ୍କୁ ଲୀଲାବତୀ ହସ୍ପିଟାଲରେ ଆଡମିଟ୍ କରାଯାଇଛି । ସଲିମଙ୍କ ସ୍ବାସ୍ଥ୍ୟାବସ୍ଥାକୁ ନେଇ ଖାନ ପରିବାର ବହୁତ ଚିନ୍ତିତ ରହିଛନ୍ତି । ଫ୍ୟାନ୍ସ ମଧ୍ୟ ଏହାକୁ ନେଇ ବେଶ୍ ଦୁଃଖିତ ରହିଥିବା ବେଳେ ସଲିମଙ୍କ ଆରୋଗ୍ୟ ନେଇ କାମନା କରିଛନ୍ତି । ସଲିମଙ୍କର କ’ଣ ହୋଇଛି ବୋଲି ସଭିଏଁ ପଚାରୁଛନ୍ତି । ତେବେ ସଲିମଙ୍କ ସ୍ବାସ୍ଥ୍ୟାବସ୍ଥାକୁ ନେଇ ବର୍ତ୍ତମାନ ସୁଦ୍ଧା କୌଣସି ଖବର ସାମ୍ନାକୁ ଆସିନାହିଁ ।
ଅନ୍ୟପକ୍ଷରରେ ବାପାଙ୍କ ସ୍ବାସ୍ଥ୍ୟାବସ୍ଥା ବିଗିଡ଼ିବା ଖବର ପାଇ ସଲମାନ ଖାନ ସଙ୍ଗେସଙ୍ଗେ ହସ୍ପିଟାଲରେ ପହଞ୍ଚିଛନ୍ତି । ହସ୍ପିଟାଲ ବାହାରୁ ସଲମାନଙ୍କ ଭିଡିଓ ସାମ୍ନାକୁ ଆସିଛି । ତାଙ୍କର ମୁହଁରେ ଦୁଃଖ ଓ ବିବ୍ରତର ସ୍ପଷ୍ଟ ଛବି ବାରି ହୋଇ ପଡ଼ୁଛି । ଅଲବୀରା ଖାନ ମଧ୍ୟ ପିତାଙ୍କୁ ଦେଖିବାକୁ ପହଞ୍ଚିଛନ୍ତି । ତେବେ ସଲିମ ଖାନ କୌଣସି ସାଧାରଣ ରୁଟିନ ଚେକଅପ୍ ପାଇଁ ହସ୍ପିଟାଲ ଯାଇଛନ୍ତି ନା କୌଣସି ଗମ୍ଭୀର ବିମାରୀ କାରଣରୁ ଯାଇଛନ୍ତି ? ଏନେଇ ପରିବାର ତରଫରୁ କିଛି କୁହାଯାଇ ନାହିଁ ।
OLA ସିଇଓ ଭାବିଶ ଅଗ୍ରଓ୍ବାଲଙ୍କ ବିରୋଧରେ ଆରେଷ୍ଟ ଓ୍ବାରେଣ୍ଟ
ଓଲା ସିଇଓ ଭାବିଶ ଅଗ୍ରଓ୍ବାଲଙ୍କ ବିରୋଧରେ ଆରେଷ୍ଟ ଓ୍ବାରେଣ୍ଟ ଜାରି କରାଯାଇଛି । ଗୋଆରେ ଓଲା ବାଇକର ଜଣେ ମାଲିକଙ୍କ ଅଭିଯୋଗ ଆଧାରରେ ଗ୍ରାହକ ବିବାଦ ସମାଧାନ ଆୟୋଗ ଓଲା ଇଲେକଟ୍ରିକର ସିଇଓ ଭାବିଶଙ୍କ ବିରୋଧରେ ଆରେଷ୍ଟ ଓ୍ବାରେଣ୍ଟ ଜାରି କରିଛନ୍ତି ।
ଦେଶର ପ୍ରମୁଖ ଇଲେକଟ୍ରିକ ଦୁଇଚକିଆ ଯାନ ନିର୍ମାଣକାରୀ କମ୍ପାନୀ ଓଲା ଇଲେକଟ୍ରିକର ମୁସ୍କିଲ କମ୍ ହେବାର ନାଁ ଧରୁନାହିଁ । ଏହା ପୂର୍ବରୁ ନିଜର ଇଲେକଟ୍ରିକ ସ୍କୁଟରରେ ନିଆଁ ଲାଗିବାକୁ ନେଇ କମ୍ପାନୀ ଚର୍ଚ୍ଚାରେ ରହିଥିବା ବେଳେ ଏବେ ସିଇଓଙ୍କ ବିରୋଧରେ ଆରେଷ୍ଟ ଓ୍ବାରେଣ୍ଟ ଜାରି କରାଯାଇଛି । ଗୋଆର ଉପଭୋକ୍ତ ବିବାଦ ନିବାରଣ ଆୟୋଗ ଓଲା ଇଲେକଟ୍ରିକ ସହ ଜଡ଼ିତ ଏକ ମାମଲାରେ କଡ଼ା ଆଭିମୁଖ୍ୟ ଗ୍ରହଣ କରି ଗିରଫଦାରୀ ଜାରି କରିଛନ୍ତି ।
ପ୍ରୀତିଶ ଚନ୍ଦ୍ରକାନ୍ତ ଘାଡ଼ୀ ନାମକ ଜଣେ ବ୍ୟକ୍ତି ଏହି ଅଭିଯୋଗ ଦାଖଲ କରିଛନ୍ତି । ସେ ଅଭିଯୋଗ କରିଛନ୍ତି ଯେ, ସେ କିଣିଥିବା ଇଲେକଟ୍ରିକ ବାଇକ ମରାମତି ପାଇଁ ଓଲାକୁ ଦେଇଥିଲେ । ମାତ୍ର ଏବେ ତା’ର କୌଣସି ଖୋଜଖବର ନାହିଁ । ସବୁଠାରୁ ଆଶ୍ଚର୍ଯ୍ୟର କଥା ହେଉଛି ବାଇକର ପୂରା ଦାମ୍ ସେ ପୂର୍ବରୁ ଓଲାକୁ ଦେଇ ସାରିଛନ୍ତି । ଏହା ପରେ ବି ୟୁଜରଙ୍କୁ ନା ବାଇକ୍ ମିଳୁଛି ନା କୌଣସି ସନ୍ତାଷଜନକ ଉତ୍ତର ।
ଖରାଦିନେ ସନସ୍କ୍ରିନ ଲଗାଇବା କାହିଁକି ଆବଶ୍ୟକ ?
ନନ୍ଦିଘୋଷ ବ୍ୟୁରୋ: ଫେବୃଆରୀ ମାସ ଚାଲିଛି, କିନ୍ତୁ ସୂର୍ଯ୍ୟଙ୍କ ଉତ୍ତାପ ସହିହେଉନି । କିଛି ସପ୍ତାହ ପୂର୍ବରୁ ଲୋକମାନେ ସୂର୍ଯ୍ୟକିରଣରେ ବସିବାକୁ ଭଲ ପାଉଥିବା ବେଳେ ଏବେ ଖରାରେ ଦେହ କଳା ପଡ଼ିଯାଉଛି । ଗ୍ରୀଷ୍ମ ଋତୁର ଆରମ୍ଭ ସହିତ, ପ୍ରବଳ ସୂର୍ଯ୍ୟକିରଣ ଏବଂ ବୃଦ୍ଧି ପାଉଥିବା ତାପମାତ୍ରା ଆମ ଚର୍ମ ଉପରେ ସିଧାସଳଖ ପ୍ରଭାବ ପକାଏ। ଡାକ୍ତରମାନେ ଗ୍ରୀଷ୍ମ ଋତୁରେ ସନସ୍କ୍ରିନ୍ ଲଗାଇବାକୁ ସମସ୍ତଙ୍କୁ ପରାମର୍ଶ ଦିଅନ୍ତି, ଯାହା ଦ୍ଵାରା ଚର୍ମ ସୁସ୍ଥ ରହିଥାଏ। ଅନେକ ଲୋକ ଭାବନ୍ତି ଯେ ସନସ୍କ୍ରିନ୍ କେବଳ ସୌନ୍ଦର୍ଯ୍ୟ ବୃଦ୍ଧି ପାଇଁ ଲଗାଯାଏ, କିନ୍ତୁ ଏହା ଚର୍ମ ପାଇଁ ବହୁତ ଗୁରୁତ୍ୱପୂର୍ଣ୍ଣ। ସୂର୍ଯ୍ୟକିରଣରେ ଥିବା କ୍ଷତିକାରକ କିରଣ ଚର୍ମକୁ ଗଭୀର ଭାବରେ କ୍ଷତି ପହଞ୍ଚାଇଥାଏ । ଯଦି ସମୟ ମଧ୍ୟରେ ସତର୍କତା ଅବଲମ୍ବନ ନ କରାଯାଏ, ତେବେ ଟ୍ୟାନ୍, ଅକାଳ କୁଞ୍ଚନ ଏବଂ ଚର୍ମ କର୍କଟ ରୋଗର ଆଶଙ୍କା ବଢ଼ିପାରେ।
ସୂର୍ଯ୍ୟରୁ ଆସୁଥିବା ଅଲ୍ଟ୍ରାଭାୟୋଲେଟ୍ କିରଣ (UV କିରଣ) ଚର୍ମକୁ କ୍ଷତି ପହଞ୍ଚାଏ। UV କିରଣ ଚର୍ମର ଉପର ସ୍ତରକୁ କ୍ଷତି ପହଞ୍ଚାଇ ଚର୍ମକୁ ପୋଡିଦେଇଥାଏ ଯାହା ଫଳରେ ଅକାଳରେ ବାର୍ଦ୍ଧକ୍ୟ ହୁଏ। ସୁରକ୍ଷା ବିନା ଦୀର୍ଘ ସମୟ ପର୍ଯ୍ୟନ୍ତ ସୂର୍ଯ୍ୟର ଆଲୋକରେ ରହିବା ଦ୍ୱାରା ଚର୍ମ କୋଷଗୁଡ଼ିକୁ ସ୍ଥାୟୀ କ୍ଷତି ହୋଇପାରେ। ଏହି କ୍ଷତି ଧୀରେ ଧୀରେ ହୁଏ ଏବଂ ପରେ ଗୁରୁତର ଚର୍ମ ରୋଗ ହୋଇପାରେ। ସନସ୍କ୍ରିନର ନିୟମିତ ବ୍ୟବହାର ଚର୍ମକୁ ଏହି କ୍ଷତିକାରକ ରଶ୍ମିରୁ ରକ୍ଷା କରିବାରେ ସାହାଯ୍ୟ କରେ। ସନସ୍କ୍ରିନରେ ଥିବା ଉପାଦାନଗୁଡ଼ିକ ଚର୍ମକୁ UV କିରଣ ପ୍ରବେଶ କରିବାକୁ ରୋକିଥାଏ ଏବଂ ଚର୍ମକୁ କ୍ଷତି ହେବାରୁ ରୋକିଥାଏ।
ସନସ୍କ୍ରିନ୍ରେ ଏକ ସୂର୍ଯ୍ୟ ସୁରକ୍ଷା କାରକ (SPF) ଥାଏ, ଯାହା ସୂଚାଇଥାଏ ଯେ ଏହା କେତେ ସମୟ ପାଇଁ ସୂର୍ଯ୍ୟ କିରଣରୁ ଚର୍ମକୁ ସୁରକ୍ଷା ଦେଇପାରିବ। ସାଧାରଣତଃ ଗ୍ରୀଷ୍ମ ଋତୁରେ ୩୦ କିମ୍ବା ତା’ଠାରୁ ଅଧିକ SPF ଥିବା ସନସ୍କ୍ରିନ୍ ବ୍ୟବହାର କରିବାକୁ ସୁପାରିଶ କରାଯାଏ। ବାହାରକୁ ଯିବାର ଅତି କମରେ ୧୫-୨୦ ମିନିଟ୍ ପୂର୍ବରୁ ଏହାକୁ ଲଗାଯିବା ଉଚିତ ଏବଂ ପ୍ରତି ୨-୩ ଘଣ୍ଟାରେ ଏହାକୁ ପୁନଃ ଲଗାଯିବା ଉଚିତ। ଅନେକ ଲୋକଙ୍କର ଭୁଲ ଧାରଣା ଅଛି ଯେ ସନସ୍କ୍ରିନ୍ କେବଳ ସୂର୍ଯ୍ୟକିରଣରେ ଲଗାଇବା ଉଚିତ, କିନ୍ତୁ ସତ୍ୟ ହେଉଛି ଯେ UV ରଶ୍ମି ଘର ଭିତରେ କିମ୍ବା ମେଘୁଆ ଦିନରେ ମଧ୍ୟ ଚର୍ମରେ ପହଞ୍ଚିପାରେ। ସୂର୍ଯ୍ୟ ବିଶେଷ ଭାବରେ ସକାଳ ୧୦ ରୁ ଅପରାହ୍ନ ୪ଟା ମଧ୍ୟରେ ପ୍ରବଳ ଥାଏ, ତେଣୁ ଏହି ସମୟରେ ଅତିରିକ୍ତ ସତର୍କତା ଅବଲମ୍ବନ କରିବା ଉଚିତ । ପିଲା, ବୟସ୍କ ଏବଂ ସମ୍ବେଦନଶୀଳ ଚର୍ମ ଥିବା ଲୋକମାନେ ନିଶ୍ଚିତ ଭାବରେ ସନସ୍କ୍ରିନ୍ ଲଗାଇବା ଉଚିତ। ସନସ୍କ୍ରିନ୍ କେବଳ ଚର୍ମକୁ ସୁସ୍ଥ ରଖେ ନାହିଁ ବରଂ ଭବିଷ୍ୟତରେ ଗମ୍ଭୀର ଚର୍ମ ରୋଗକୁ ମଧ୍ୟ ରୋକିଥାଏ। ସୁସ୍ଥ ଚର୍ମ ବଜାୟ ରଖିବା ପାଇଁ କେବଳ ସନସ୍କ୍ରିନ୍ ଲଗାଇବା ଯଥେଷ୍ଟ ନୁହେଁ। ସୂର୍ଯ୍ୟ ସୁରକ୍ଷା ପାଇଁ ଟୋପି, ଛତା, ସନଗ୍ଲାସ୍ ଏବଂ ଲମ୍ବା ହାତର ପୋଷାକ ପିନ୍ଧିବା ମଧ୍ୟ ଅତ୍ୟନ୍ତ ଜରୁରୀ। ପର୍ଯ୍ୟାପ୍ତ ପାଣି ପିଇବା ଚର୍ମକୁ ହାଇଡ୍ରେଟେଡ୍ ରଖିବା ସହ ଚର୍ମ ସ୍ୱାସ୍ଥ୍ୟ ପାଇଁ ଲାଭଦାୟକ। ସନ୍ତୁଳିତ ଖାଦ୍ୟ ଚର୍ମକୁ ଭିତରୁ ମଜବୁତ କରିବାରେ ସାହାଯ୍ୟ କରେ।
କାମ ଦେଲାନି ଡଲାର କୂଟନୀତି ; ଟ୍ରମ୍ପଙ୍କ ନିକଟତର ହେବା ପାଇଁ ଖର୍ଚ୍ଚ ହେଉଥିବା ଟଙ୍କାକୁ ହ୍ରାସ କଲା ପାକିସ୍ତାନ
ନନ୍ଦିଘୋଷ ବ୍ୟୁରୋ: ଆମେରିକା ସହିତ ମିତ୍ରତା କରିବା ପରେ, ପାକିସ୍ତାନ ଏବେ ଟ୍ରମ୍ପଙ୍କ ନିକଟତର ହେବା ପାଇଁ ଖର୍ଚ୍ଚ ହେଉଥିବା ଟଙ୍କାକୁ ହ୍ରାସ କରିଛି। ପାକିସ୍ତାନ ତା’ର ଲବିଂ କାର୍ଯ୍ୟକଳାପ ହ୍ରାସ କରିଛି ଏବଂ ଅନେକ ବଡ଼ ଲବିଂ ଫାର୍ମ ସହିତ ସମ୍ପର୍କ ଛିନ୍ନ କରିଛି । ରିପୋର୍ଟ ଅନୁଯାୟୀ ୨୦୨୫ ମସିହାରେ ପାକିସ୍ତାନ ଆମେରିକା ପ୍ରଶାସନରେ ନିଜର ଛାପ ଛାଡିବା ପାଇଁ ରେକର୍ଡ ପରିମାଣର ଟଙ୍କା ଖର୍ଚ୍ଚ କରିଥିଲା, କିନ୍ତୁ ଏବେ ସେ ତା’ର ଖର୍ଚ୍ଚରେ ଏକ ବଡ଼ ହ୍ରାସ କରିଛି । ଆପଣଙ୍କୁ ଜଣାଇ ଦେଉଛୁ ଯେ ଅପରେସନ୍ ସିନ୍ଦୁର ପରେ ପାକିସ୍ତାନର ଅବସ୍ଥା ଶୋଚନୀୟ ଥିଲେ ମଧ୍ୟ ଲବିଂ ପାଇଁ ଟଙ୍କା ଯୋଗାଡ କରୁଥିଲା ଟ୍ରମ୍ପଙ୍କ ନିକଟତର ହେବାକୁ ଏବଂ ଭାରତକୁ କ୍ଷତି ପହଞ୍ଚାଇବାକୁ ।
ରିପୋର୍ଟ ଅନୁଯାୟୀ ୨୦୨୫ ମସିହାରେ ପାକିସ୍ତାନର ଲବିଂ ଖର୍ଚ୍ଚ ପ୍ରତି ମାସରେ ପ୍ରାୟ ୬୦୦,୦୦୦ ଡଲାରକୁ ବୃଦ୍ଧି ପାଇଛି। ଏହା ସାମ୍ପ୍ରତିକ ଦଶନ୍ଧି ମଧ୍ୟରେ ପାକିସ୍ତାନ ଦ୍ୱାରା ଖର୍ଚ୍ଚ ହୋଇଥିବା ସର୍ବାଧିକ ପରିମାଣ ଥିଲା। ଏପ୍ରିଲରେ ପହଲଗାମ ଆତଙ୍କବାଦୀ ଆକ୍ରମଣ ଏବଂ ମେ ମାସରେ ଭାରତର ସାମରିକ କାର୍ଯ୍ୟାନୁଷ୍ଠାନ, ଅପରେସନ ସିନ୍ଦୁର ପରେ ଏହି ବୃଦ୍ଧି ଦେଖାଯାଇଥିଲା। ସେହି ସମୟରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଥିଲା ଯାହାଫଳରେ ପାକିସ୍ତାନ ୱାଶିଂଟନରେ ଚାପୁଲୁସି ଆରମ୍ଭ କରିଥିଲା । ଏହି ଲବିଂର ଫଳସ୍ୱରୂପ ମୁନିର ହ୍ୱାଇଟ୍ ହାଉସରେ ହଲାଲା ଭୋଜି ଉପଭୋଗ କରୁଥିଲେ। ତେବେ ପାକିସ୍ତାନର ହଠାତ କ’ଣ ହୋଇଛି ଯେ ସେ ଭାରତ ଅପେକ୍ଷା ଅଧିକ ଖର୍ଚ୍ଚ ହ୍ରାସ କରିଛି ?
ପାକିସ୍ତାନ କଣ ଆମେରିକା ଉପରୁ ନିଜର ବିଶ୍ୱାସ ହରାଇଛି ?
ଏବେ ପାକିସ୍ତାନ ଜାଭେଲିନ୍ ଆଡଭାଇଜର୍ସ, ସିଡେନ୍ ଲ, ଅର୍କିଡ୍ ଆଡଭାଇଜର୍ସ, ସ୍କ୍ୱାୟାର ପାଟନ୍ ବଗ୍ସ ଏବଂ କନସାଇନ୍ସ ପଏଣ୍ଟ କନସଲ୍ଟିଂ ଭଳି ପାଞ୍ଚଟି ପ୍ରମୁଖ ଲବିଂ ଫାର୍ମ ସହିତ ତା’ର ଚୁକ୍ତିନାମା ସମାପ୍ତ କରିଛି । ଆମେରିକାର ନ୍ୟାୟ ବିଭାଗରେ ଦାଖଲ ହୋଇଥିବା ଦଲିଲ ଅନୁଯାୟୀ ଏହି ଫାର୍ମଗୁଡ଼ିକୁ ସାମୂହିକ ଭାବରେ ପ୍ରତି ମାସରେ ପ୍ରାୟ ୪୫୦,୦୦୦ ଦରମା ଦିଆଯାଉଥିଲା। ସେମାନଙ୍କର କାମ ଥିଲା ହ୍ୱାଇଟ୍ ହାଉସ୍, ଆମେରିକାର କଂଗ୍ରେସ ଏବଂ ବିଦେଶ ବିଭାଗ ଭଳି ପ୍ରତିଷ୍ଠାନ ସହିତ ସମ୍ପର୍କ ସ୍ଥାପନ କରିବା ଏବଂ ପାକିସ୍ତାନ ପାଇଁ ଏକ ଅନୁକୂଳ ପରିବେଶ ସୃଷ୍ଟି କରିବା।
ଜାଭେଲିନ୍ ଆଡଭାଇଜର୍ସ ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଜଡିତ କିଥ୍ ସ୍କିଲର ଏବଂ ଜର୍ଜ ସୋରିଆଲ୍ ଦ୍ୱାରା ପ୍ରତିଷ୍ଠା କରାଯାଇଥିଲା। ଏହି ଫାର୍ମକୁ ପାକିସ୍ତାନ ପାଇଁ ଗୁରୁତ୍ୱପୂର୍ଣ୍ଣ ଖଣିଜ ଚୁକ୍ତିନାମା ଉପରେ ପରାମର୍ଶ ଦେବା ଏବଂ ଆମେରିକୀୟ ଆଇନ ପ୍ରଣୋଦକ ଏବଂ ଅଧିକାରୀଙ୍କ ସହିତ ବୈଠକ ଆୟୋଜନ କରିବା ଦାୟିତ୍ୱ ଦିଆଯାଇଥିଲା। ଏହି ଚୁକ୍ତିନାମା ଅକ୍ଟୋବର ୨୦୨୫ରେ ଶେଷ ହେଉଛି । ସେହିପରି ରବର୍ଟ ସିଡେନଙ୍କ ଦ୍ୱାରା ପ୍ରତିଷ୍ଠିତ ସିଡେନ ଲ’ର ମାସିକ $୨୦୦.୦୦୦ ଚୁକ୍ତିନାମା ମଧ୍ୟ ଅକ୍ଟୋବର ୨୦୨୫ରେ ଶେଷ ହୋଇଥିଲା।
ରିପୋର୍ଟ ଅନୁଯାୟୀ, ପାକିସ୍ତାନର ଲବିଂ ଖର୍ଚ୍ଚ ଏବେ ପ୍ରତି ମାସରେ ପ୍ରାୟ $୧୭୫,୦୦୦କୁ ହ୍ରାସ ପାଇଛି, ଯାହା ଭାରତର ଆନୁମାନିକ $୨୦୦,୦୦୦ ପ୍ରତି ମାସ ଅପେକ୍ଷା କମ୍। ବର୍ତ୍ତମାନ ପାକିସ୍ତାନ କେବଳ ଦୁଇଟି ଫାର୍ମ ସହିତ କାମ କରୁଛି: Qorvis LLC ଏବଂ Ervin Graves Strategy Group ।
ଅନେକ ବିଶେଷଜ୍ଞଙ୍କ ମତରେ ଲବିଂ କ୍ଷଣସ୍ଥାୟୀ ଲାଭ ଦେଇପାରେ କିନ୍ତୁ ଆମେରିକା ଏବେ ବି ଭାରତକୁ ଏକ ପ୍ରମୁଖ ରଣନୈତିକ ଅଂଶୀଦାର ବୋଲି ବିବେଚନା କରେ। ଏହା ବ୍ୟତୀତ ଭାରତ ସହିତ ଆମେରିକାର ସାମ୍ପ୍ରତିକ ବାଣିଜ୍ୟ ଚୁକ୍ତି ପାକିସ୍ତାନ ପାଇଁ ଏକ ଗୁରୁତ୍ୱପୂର୍ଣ୍ଣ ସଂଯୋଗ ଆଣିଛି। ମୁନିର ଏବଂ ଶାହବାଜଙ୍କ ଚାପଶାଳୀତା ଏବଂ ପରବର୍ତ୍ତୀ ସମୟରେ ଦାରିଦ୍ର୍ୟ ଉପରେ ଏତେ ଟଙ୍କା ଖର୍ଚ୍ଚ କରିବା ସତ୍ତ୍ୱେ, ଭାରତର ଶୁଳ୍କ ୧୮% ଏବଂ ପାକିସ୍ତାନର ୧୯% ରେ ରହିଥିଲା, ଯାହା ଫଳରେ ନିଜ ଦେଶ ମଧ୍ୟରେ ବ୍ୟାପକ ସମାଲୋଚନା ହୋଇଥିଲା। ଏହି କାରଣରୁ ପାକିସ୍ତାନ ଆଉ ଲବିଂରେ ତା’ର ଟଙ୍କା ନଷ୍ଟ କରିବାକୁ ଚାହୁଁନାହିଁ।
ଆରମ୍ଭ ହେଲା ବିଧାନସଭା ବଜେଟ ଅଧିବେଶନ : ଜୟ ଜଗନ୍ନାଥ କହି ଅଭିଭାଷଣ ଆରମ୍ଭ କଲେ ରାଜ୍ୟପାଳ
ଭୁବନେଶ୍ବର : ଆରମ୍ଭ ହେଲା ବିଧାନସଭା ବଜେଟ ଅଧିବେଶନ । ଦୁଇଟି ପର୍ଯ୍ୟାୟରେ ଏପ୍ରିଲ ୮ ଯାଏଁ ଚାଲିବ ଅଧିବେଶନ । ଗାର୍ଡଅଫ ଅନର ପରେ ପ୍ରଥମ ଦିନରେ ବିଧାନସଭାରେ ରାଜ୍ୟପାଳଙ୍କ ଅଭିଭାଷଣ । ଜୟ ଜଗନ୍ନାଥ କହି ଅଭିଭାଷଣ ଆରମ୍ଭ କରିଥିଲେ ରାଜ୍ଯପାଳ ଡ. ହରିବାବୁ କମ୍ଭମପାଟୀ । ଦିବଂଗତ ଓ ସହିଦ ଅଧିକାରୀଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ ରାଜ୍ୟପାଳ । ବିକଶିତ ଭାରତ ପାଇଁ ଓଡ଼ିଶା ଗ୍ରୋଥ ଇଞ୍ଜିନ ହେବ ବୋଲି କହିଛନ୍ତି ରାଜ୍ୟପାଳ । ୨୦୩୬ରେ ଓଡ଼ିଶା ଗଠନକୁ ଶହେବର୍ଷ ପୂରିବ । ସମୃଦ୍ଧ ଓଡ଼ିଶା ପାଇଁ ସରକାର ପ୍ରତିଶୃତିବଦ୍ଧ । ତ୍ୟାଗ ଓ ଆତ୍ମବିଶ୍ବାସର ଭିତ୍ତି ଉପରେ ଦୃଢ଼ଭାବେ ଦଣ୍ଡାୟମାନ ଆଜିର ଓଡ଼ିଶା । ୨୦୩୬ ଏପ୍ରିଲ ୧ରେ ଆମ ସମ୍ମୁଖରେ ଏକ ସତ୍ୟନିଷ୍ଠ ପ୍ରତିଜ୍ଞା ଭଳି ଦଣ୍ଡାୟମାନ । ଏହାକୁ ଦୃଷ୍ଟିରେ ରଖି ଏକ ବିସ୍ତୃତ ଭିଜନ ଡକ୍ୟୁମେଣ୍ଟ ପ୍ରସ୍ତୁତ କରାଯାଇଛି । ଏହି ଡକ୍ୟୁମେଣ୍ଟକୁ ପ୍ରଧାନମନ୍ତ୍ରୀ ୨୦ ଜୁନ ୨୦୨୫ରେ ଉନ୍ମୋଚନ କରିଥିଲେ ।
୨୦୩୬ ସୁଦ୍ଧା ଓଡ଼ିଶାକୁ ୫ଶହ ବିଲିୟନ ଡଲାର ଓ ୨୦୪୭ ସୁଦ୍ଧା ୧.୫ ଟ୍ରିଲିୟନ ଡଲାର ଅର୍ଥନୀତିରେ ପହଞ୍ଚାଇବାକୁ ଲକ୍ଷ୍ୟ ରଖାଯାଇଛି । ରାଜଧାନୀ ରାସ୍ତାର କରାଯାଉଛି ଆଧୁନିକୀ କରଣ । ଯାତାୟାତ ଭିଡ଼, ଆଞ୍ଚଳିକ ସଂଯୋଗୀକରଣକୁ ଗୁରୁତ୍ବ ଦିଆଯାଇଛି । ଜୟଦେବବିହାର- ନନ୍ଦନକାନ ରାସ୍ତା ଫ୍ଲାଏଓଭର ହେବ । ରିଂରୋଡକୁ କରାଯାଇଛି ଅନୁମୋଦନ। ସେମିକଣ୍ଡକ୍ଟରରେ ଅଧିକ ନିଯୁକ୍ତ ସୃଷ୍ଟି ହେବ । ଓଡ଼ିଶାରେ ଦୁଇଟି ଅତ୍ୟାଧୁନିକ ସେମିକଣ୍ଡକ୍ଟର ୟୁନିଟ ସ୍ଥାପନକୁ ଅନୁମୋଦନ କରାଯାଇଛି । ୨୪୪୭ ସୁଦ୍ଧା ମୁଣ୍ଡପିଛା ଆୟ ୩୨ ଲକ୍ଷକୁ ବୃଦ୍ଧି ଲକ୍ଷ୍ୟ ରହିଛି ।
ବହୁମୁଖୀ ଦାରଦ୍ର୍ୟକୁ ୫ ପ୍ରତିଶତକୁ କମାଇବା ଉପରେ ଗୁରୁତ୍ବ ଦିଆଯାଇଛି । ମହିଳା ଶ୍ରମଶକ୍ତି ଅଂଶଗ୍ରହଣକୁ ୭୦ ପ୍ରତିଶତ ବୃଦ୍ଧି ଲକ୍ଷ୍ୟ ରହିଛି । ରାମେଶ୍ବର-ପାରଦୀପ ଉପକୂଳ ରାଜପଥକୁ ଅନୁମୋଦନ । ବଢୁଛି ଲଘୁ ଖଣିଜ ସମ୍ପଦର ରାଜସ୍ବ ଆୟ । ପ୍ରାଥମିକ ଶିକ୍ଷା କ୍ଷେତ୍ରରେ ଆସିଛି ସଂସ୍କାର । ସମସ୍ତ ପ୍ରାଇମେରୀ ସ୍କୁଲରେ ଖୋଲାଯାଇଛି ଶିଶୁ ବାଟିକା । ଆବର୍ଜନା ମୁକ୍ତ ଓଡ଼ିଶା ଦୃଷ୍ଟିକୋଣକୁ ତ୍ବରାନ୍ବିତ କରାଯାଇଛି ।
ପୁଣି ସାମ୍ନାକୁ ଆସିଲା SCB ମେଡ଼ିକାଲ ଅବ୍ୟବସ୍ଥାର ଚିତ୍ର ; ନିଘୋଡ଼ ନିଦରେ କର୍ମଚାରୀ, ଉଠାଉ ନାହାନ୍ତି ଫୋନ୍
କଟକ : ପୁଣି ସାମ୍ନାକୁ ଆସିଲା SCB ମେଡ଼ିକାଲରେ ଅବ୍ୟବସ୍ଥାର ଚିତ୍ର । ବ୍ୟାଟେରି ଗାଡ଼ି ନିୟନ୍ତ୍ରଣ କକ୍ଷର ଭିଡିଓ ଭାଇରାଲ୍ । ନିଘୋଡ଼ ନିଦରେ ଶୋଇ ଫୋନ୍ ଉଠାଉ ନାହାନ୍ତି ଦାୟିତ୍ଵରେ ଥିବା କର୍ମଚାରୀ । ଏସସିବି ବ୍ୟାଟେରି ଗାଡ଼ି ପାଇଁ ଖୋଲିଥିବା ନିୟନ୍ତ୍ରଣ କକ୍ଷର ଏକ ଭିଡିଓ ଭାଇରାଲ୍ ହୋଇଛି । କକ୍ଷର ଦାୟିତ୍ବରେ ଥିବା କର୍ମଚାରୀ ଶୋଇଥିବା ବେଳେ ଲ୍ୟାଣ୍ଡ ଫୋନ୍ ରିଙ୍ଗ ହେଉଛି । ଯେଉଁ ରୋଗୀଙ୍କ ଆଟେଣ୍ଡାଣ୍ଟମାନେ ବ୍ୟାଟେରି ଗାଡ଼ି ପାଇଁ ଲ୍ୟାଣ୍ଡ ଫୋନ୍ ନମ୍ବରରେ ଫୋନ୍ କରୁଛନ୍ତି ସେମାନଙ୍କ କଲକୁ ଏହି ନିୟନ୍ତ୍ରଣ କକ୍ଷରେ ରିସିଭ୍ କରାଯାଉନାହିଁ ।
ଏଭଳି ଅବ୍ୟବସ୍ଥା ଚିତ୍ର ସୋସିଆଲ ମିଡିଆରେ ଭାଇରାଲ୍ ହେବା ପରେ ଉଦବେଗ ପ୍ରକାଶ ପାଇଛି। ନିକଟରେ ମେଡିସିନ୍ ବିଭାଗ ଆଇସିୟୁରେ ରୋଗୀ ବେଡରୁ ପଡ଼ିବା ଘଟଣାରେ ସାରା ରାଜ୍ୟରେ ହଟଚମଟ ସୃଷ୍ଟି ହୋଇଥିଲା । ଏହି ଘଟଣାରେ ଦାୟିତ୍ଵରେ ଥିବା ଆଇସିୟୁ ଇନଚାର୍ଜ ଓ ନର୍ସଙ୍କୁ ବଦଳି କରାଯାଇଥିଲା ।