ନନ୍ଦିଘୋଷ ବ୍ୟୁରୋ: ବିହାର ବିଧାନସଭା ନିର୍ବାଚନ। ଆଜିଠୁ ଜମିବ ପ୍ରଚାର। ପ୍ରଥମ ପର୍ଯ୍ୟାୟ ନିର୍ବାଚନ ଲାଗି ସରିଛି ପ୍ରାର୍ଥିପତ୍ର ପ୍ରତ୍ୟାହାର। ସେପଟେ ଦ୍ବିତୀୟ ପର୍ଯ୍ୟାୟ ନିର୍ବାଚନ ଲାଗି ସରିଛି ପ୍ରାର୍ଥିପତ୍ର ଦାଖଲ। ଗତକାଲି ୧୪୩ ଜଣିଆ ପ୍ରାର୍ଥୀ ତାଲିକା ପ୍ରକାଶ କରିଥିଲା ରାଷ୍ଟ୍ରୀୟ ଜନତା ଦଳ ଆରଜେଡି। RJD ନେତା ତେଜସ୍ୱୀ ଯାଦବ ବୈଶାଳୀ ଜିଲ୍ଲାର ରାଘୋପୁର ବିଧାନସଭା ଆସନରୁ ନିର୍ବାଚନ ଲଢ଼ିବେ । ତେଜସ୍ୱୀ ଯାଦବଙ୍କ ନେତୃତ୍ୱରେ ପ୍ରକାଶିତ ଏହି ତାଲିକାରେ ଯୁବପିଢ଼ି, ମହିଳା ଏବଂ ସଂଖ୍ୟାଲଘୁଙ୍କୁ ପ୍ରାଥମିକତା ଦିଆଯାଇଛି । RJD ମହୁଆରୁ ମୁକେଶ ରୋଶନଙ୍କୁ ମନୋନୀତ କରିଛି । ଯିଏ ତେଜ ପ୍ରତାପ ଯାଦବଙ୍କ ବିପକ୍ଷରେ ପ୍ରତିଦ୍ୱନ୍ଦ୍ୱିତା କରିବେ। ଏଥର RJD ୧୮ଜଣ ସଂଖ୍ୟାଲଘୁ ପ୍ରାର୍ଥୀ ଏବଂ ୨୪ ଜଣ ମହିଳା ପ୍ରାର୍ଥୀଙ୍କୁ ଟିକେଟ୍ ଦେଇଛି । ଦଳ ଏହାକୁ ସାମାଜିକ ସଦଭାବ ଏବଂ ପ୍ରତିନିଧିତ୍ୱର ପ୍ରତୀକ ଭାବରେ ବର୍ଣ୍ଣନା କରିଛି ।
ବିରୋଧୀ ଦଳ ନେତା ତେଜସ୍ୱୀ ଯାଦବ ପୁଣି ଥରେ ରାଘୋପୁର ଆସନରୁ ନିର୍ବାଚନ ଲଢ଼ିବେ, ଯାହାକୁ ତାଙ୍କର ପାରମ୍ପରିକ ଗଡ଼ ବୋଲି ଧରାଯାଉଛି। ତାଲିକାରେ ଅନେକ ବଡ଼ ଏବଂ ଲୋକପ୍ରିୟ ନେତାଙ୍କ ନାମ ରହିଛି। ପୂର୍ବତନ କେନ୍ଦ୍ରମନ୍ତ୍ରୀ ଜୟ ପ୍ରକାଶ ଯାଦବଙ୍କୁ ଝାଝାରୁ ପ୍ରାର୍ଥୀ କରାଯାଇଛି । ଛଅ ଥର ବିଧାୟକ ଲଳିତ ଯାଦବଙ୍କୁ ଦରଭଙ୍ଗା ଗ୍ରାମାଞ୍ଚଳରୁ ପ୍ରାର୍ଥୀ କରାଯାଇଛି । ଲାଲୁ ପ୍ରସାଦ ଯାଦବଙ୍କ ଘନିଷ୍ଠ ବିଶ୍ୱାସୀ ବୋଲି କୁହାଯାଉଥିବା ଭୋଳା ଯାଦବ ବାହାଦୁରପୁର ଆସନରୁ ନିର୍ବାଚନ ଲଢ଼ିବେ । ପୂର୍ବତନ ବିଧାନସଭା ବାଚସ୍ପତି ଅୱଧ ବିହାରୀ ଚୌଧୁରୀ ସିୱାନରୁ ଆରଜେଡି ପ୍ରାର୍ଥୀ ହେବେ। ଦିବଂଗତ ଶକ୍ତିଶାଳୀ ଶାହାବୁଦ୍ଦିନଙ୍କ ପୁଅ ଓସାମା ଶାହାବଙ୍କୁ ରଘୁନାଥପୁର ଆସନରୁ ପ୍ରାର୍ଥୀ କରାଯାଇଛି।ଏହା ବ୍ୟତୀତ, ଭୋଜପୁରୀ ସୁପରଷ୍ଟାର ଖେସାରି ଲାଲ ଯାଦବଙ୍କୁ ଛାପରାରୁ ପ୍ରାର୍ଥୀ କରାଯାଇଛି । ସେପଟେ ଆମ୍ ଆଦମୀ ପାର୍ଟି ପକ୍ଷରୁ ଘୋଷିତ ହୋଇଛି ଆଉ ୧୨ ଜଣଙ୍କ ନାଁ। ସେହିପରି କଂଗ୍ରେସ ଘୋଷଣା କଲା ଆଉ ୬ ଜଣଙ୍କ ନାଁଁ। ଫଳରେ ବର୍ତ୍ତମାନ ସୁଦ୍ଧା କଂଗ୍ରେସ ମୋଟ ୬୦ ଜଣଙ୍କୁ ଦେଇଛି ପ୍ରାର୍ଥୀ।
