ନନ୍ଦିଘୋଷ ବ୍ୟୁରୋ : ଜାପାନରେ ଲେଖାହେଲା ନୂଆ ଇତିହାସ । ଦେଶକୁ ମିଳିଲା ପ୍ରଥମ ମହିଳା ପ୍ରଧାନମନ୍ତ୍ରୀ । ମଙ୍ଗଳବାର ଜାପାନର ନିମ୍ନ ସଦନ ସାନାଏ ତାକାଇଚିଙ୍କୁ ଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ଭାବରେ ନିର୍ବାଚିତ କରିଛି। ଏହି ମୁହୂର୍ତ୍ତ ଜାପାନର ରାଜନୈତିକ ଇତିହାସରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ । ୬୪ ବର୍ଷୀୟ ସାନାଏ ତାକାଇଚି ଚୀନ୍ ପ୍ରତି ତାଙ୍କର ସମାଲୋଚନା ପାଇଁ ଜଣାଶୁଣା ୪୬୫ ସଦସ୍ୟ ବିଶିଷ୍ଟ ଗୃହରେ ୨୩୭ ଭୋଟର ବହୁମତ ପାଇଥିଲେ। ଜାପାନୀ ସମ୍ରାଟ ନାରୁହିତୋଙ୍କ ସହ ସାକ୍ଷାତ କରିବା ପରେ ସେ ଆନୁଷ୍ଠାନିକ ଭାବରେ ଦାୟିତ୍ୱ ଗ୍ରହଣ କରିବେ। ପ୍ରଧାନମନ୍ତ୍ରୀ ଶିଗେରୁ ଇଶିବାଙ୍କ ପରେ ତାକାଇଚି ଜାପାନର ପଞ୍ଚମ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି। ଜାପାନରେ ତାକାଇଚିଙ୍କ ବିଜୟକୁ ମହତ୍ବପୂର୍ଣ୍ଣ ବୋଲି ବିବେଚନା କରାଯାଏ କାରଣ ଜାପାନରେ ଏପର୍ଯ୍ୟନ୍ତ ଦେଶର ପ୍ରାୟ ସମସ୍ତ ଗୁରୁତ୍ୱପୂର୍ଣ୍ଣ ପଦବୀରେ ପୁରୁଷମାନେ ନିୟୋଜିତ ଅଛନ୍ତି । ସଂସଦରେ ମହିଳାଙ୍କ ସଂଖ୍ୟା ବହୁତ କମଥିବା ବେଳେ ଜଣେ ମହିଳା ପ୍ରଧାନମନ୍ତ୍ରୀଙ୍କ ବିଜୟକୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି ।
ପୂର୍ବରୁ, ଜାପାନର ଶାସକ ଲିବରାଲ ଡେମୋକ୍ରାଟିକ୍ ପାର୍ଟି (LDP) “#ChangeLDP” ସ୍ଲୋଗାନ ଦେଇ ସାନାଏ ତାକାଇଚିଙ୍କୁ ଏହାର ନୂତନ ନେତା ଭାବରେ ମନୋନୀତ କରିଥିଲା। ଏହା ଜାପାନ ପାଇଁ ଏକ ଐତିହାସିକ ଘଟଣା। ସାନାଏ କେବଳ LDPର ନେତା ଭାବରେ ନିର୍ବାଚିତ ହୋଇଥିବା ପ୍ରଥମ ମହିଳା ନୁହଁନ୍ତି, ବରଂ ଦ୍ୱିତୀୟ ବିଶ୍ୱଯୁଦ୍ଧ ପରବର୍ତ୍ତୀ ଯୁଗର କିଛି ନେତାଙ୍କ ମଧ୍ୟରୁ ଜଣେ, ଯେଉଁମାନେ କୌଣସି ରାଜନୈତିକ ପୃଷ୍ଠଭୂମି ନଥିବା ସତ୍ତ୍ୱେ, ଉଚ୍ଚ ରାଜନୈତିକ ପଦବୀ ହାସଲ କରିଛନ୍ତି।
ସାମ୍ବିଧାନିକ ସଂଶୋଧନ, ଶକ୍ତିଶାଳୀ ସେନା, ୟାସୁକୁନି ମନ୍ଦିର ପରିଦର୍ଶନ, କଠୋର ଅନୁପ୍ରବେଶ ନିୟନ୍ତ୍ରଣ ଏବଂ ସମଲିଙ୍ଗୀ ବିବାହକୁ ବିରୋଧ କରି ଚର୍ଚ୍ଚାକୁ ଆସିଥିଲେ ଟାକାଇଚି । ପୂର୍ବତନ ପ୍ରଧାନମନ୍ତ୍ରୀ ସ୍ବର୍ଗତ ସିଞ୍ଜୋ ଆବେଙ୍କ ଦୃଢ ସମର୍ଥକ ତଥା ସହଯୋଗୀ ଥିଲେ । ଚଳିତ ବର୍ଷ ଆରମ୍ଭରେ ସେ LDPର ସଭାପତି ହୋଇଥିଲେ ।ଶିଗେରୁ ଇଶିବାଙ୍କ ଇସ୍ତଫା ପରେ ଜାପାନ ଇନୋଭେସନ୍ ପାର୍ଟି ସହ ମେଣ୍ଟ କରି ସେ ସରକାରକୁ ଆସିଛନ୍ତି । ସାତ୍ସୁକି କାଟାୟାମାଙ୍କୁ ସେ ପ୍ରଥମ ମହିଳା ଅର୍ଥମନ୍ତ୍ରୀ ଭାବରେ ନିଯୁକ୍ତ କରିଛନ୍ତି ।
ତାକାଇଚି ପ୍ରାୟତଃ ଚୀନ୍ ବିରୁଦ୍ଧରେ ତାଙ୍କର ଦୃଢ଼ ମନୋଭାବ ପାଇଁ ଜଣାଶୁଣା। ସେ ଟୋକିଓର ୟାସୁକୁନି ମନ୍ଦିର ପରିଦର୍ଶନ କରନ୍ତି, ଯାହା ଜାପାନର ଯୁଦ୍ଧ ମୃତମାନଙ୍କୁ ସମ୍ମାନ ଜଣାଇଥାଏ, ଯାହା ପ୍ରାୟତଃ ପଡ଼ୋଶୀ ଦେଶମାନଙ୍କୁ କ୍ରୋଧିତ କରିଥାଏ। ସେ ଚୀନକୁ ତାଙ୍କର ମୁଖ୍ୟ ପ୍ରତିଦ୍ୱନ୍ଦ୍ୱୀ ବୋଲି ମାନିଥାନ୍ତି। ପୂର୍ବତନ ପ୍ରଧାନମନ୍ତ୍ରୀ ଆବେଙ୍କ ପରି ସେ ଜାପାନର ସାମରିକ ବାହିନୀକୁ ସୁଦୃଢ଼ କରିବା ପାଇଁ ପଦକ୍ଷେପକୁ ସମର୍ଥନ କରନ୍ତି।
