କଂଗ୍ରେସରେ ବିଭୀଷଣ ଉପାଖ୍ୟାନ: ୟୁ-ଟର୍ଣ୍ଣ ମାରିଲେ ପିସିସି ସଭାପତି

ନନ୍ଦିଘୋଷ ବ୍ୟୁରୋ: ନୂଆପଡ଼ା ଉପନିର୍ବାଚନ ହାରିବା ପରେ କଂଗ୍ରେସ ସଭାପତି ଭକ୍ତ ଦାସଙ୍କ ବିଭୀଷଣ ଉପାଖ୍ୟାନ ଏବେ ଦାଣ୍ଡରେ ପଡ଼ି ହାଟରେ ଗଡୁଛି । ଆଜି ନିଜେ ଭକ୍ତ ୟୁ-ଟର୍ଣ୍ଣ ମାରିଛନ୍ତି । କହିଲେଣି, ଯଦି ଭୁଲ କରିଛନ୍ତି ତା’ହେଲେ ସମୀକ୍ଷା କରିବେ । ସେପଟେ ଦଳ ଭିତରେ ଅମାନିଆଙ୍କୁ ବିଶୃଙ୍ଖଳା ନ କରିବାକୁ ଆହ୍ବାନ ବି ଦେଇଛନ୍ତି । ରାଜ୍ୟ କଂଗ୍ରେସର ସାଂଗଠନିକ ଅବସ୍ଥା ନେଇ ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀ ମଧ୍ୟ ପିସିସି ସଭାପତିଙ୍କ ସହ ଆଲୋଚନା କରିଛନ୍ତି ।

ଏ କି ଦଶା ହେଲା ପିସିସି ସଭାପତି ଭକ୍ତ ଦାସଙ୍କର ! ଦଳ ଭିତରେ ଅଛନ୍ତି ବିଭୀଷଣ । ଏବେ ମାରିଲେଣି ୟୁ-ଟର୍ଣ୍ଣ । ନୂଆପଡ଼ା ଉପନିର୍ବାଚନରେ କଂଗ୍ରେସ ପ୍ରାର୍ଥୀ ଘାସିରାମ ମାଝୀ ହାରିବା ପରେ ଭକ୍ତଙ୍କ ରାଗ ଚରମରେ ଥିଲା । କହୁ କହୁ କହିଦେଲେ, ଦଳ ଭିତରେ ରହିଛନ୍ତି ବିଭୀଷଣ । ତାଙ୍କୁ ଖୋଜି ବାହାର କରିବାକୁ ପଡ଼ିବ । ଭକ୍ତ ଯାହା କହିଲେ ତା’ ଉପରେ ପ୍ରତିକ୍ରିୟା ଦେଇ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ ଆରମ୍ଭ କରିଦେଲେ ରାବଣକୁ ଖୋଜାଯାଉ । ବରିଷ୍ଠଙ୍କଠାରୁ ଆରମ୍ଭ କରି କନିଷ୍ଠ କଂଗ୍ରେସ ନେତା ସମସ୍ତେ ଭକ୍ତଙ୍କ ବିଭୀଷଣ ଉପାଖ୍ୟାନକୁ ନିନ୍ଦା କଲେ । ସ୍ଥିତି ଏମିତି ହେଲାଣି ଉପନିର୍ବାଚନ ଫଳାଫଳ ପରେ ରାଜ୍ୟ କଂଗ୍ରେସ ନେତୃତ୍ବ ବିରୋଧରେ ପୁଣି ଥରେ ମେଳି ଆରମ୍ଭ ହୋଇଯାଇଥିବା ସୂଚନା ମିଳିଲାଣି । ଅବସ୍ଥା ଅସମ୍ଭାଳ ହେବାରୁ ଏବେ ଖୋଦ ଭକ୍ତ କହିଲେଣି ସେ ସେପରି କହି ନଥିଲେ । ତାଙ୍କ ବିରୋଧରେ ଅପପ୍ରଚାର ହେଉଛି । ଏଥିରେ ତାଙ୍କୁ କିଛି ଫରକ ପଡ଼ୁନି । ଯଦି କୌଣସି କଂଗ୍ରେସ ନେତା ଭାବୁଛନ୍ତି ଯେ ସଭାପତି ଭୁଲ କରିଛନ୍ତି ତା’ହେଲେ ଏ ନେଇ ସେ ଆତ୍ମସମୀକ୍ଷା କରିବେ । ପୁଣି କହିଛନ୍ତି, ଯଦି କିଏ ଚାହିଁବ କାହାର ଗୁଲାମ ହୋଇ କାମ କରିବାକୁ । ତାଙ୍କୁ କିଏ ପକେଟରେ ରଖି ନଚାଉଛି । ଏସୁବୁ ଭ୍ରାନ୍ତ ଧାରଣା । ସେ ହାଇକମାଣ୍ଡଙ୍କ ପ୍ରତିନିଧି । ହାଇକମାଣ୍ଡଙ୍କ ନିର୍ଦ୍ଦେଶରେ ସେ କାମ କରିବେ ବୋଲି ରୋକଠୋକ ଶୁଣାଇ ଦେଇଛନ୍ତି ।

ସେପଟେ ଭକ୍ତଙ୍କ ହଟାଇବା କିଛି ନେତା ଲାଗିପଡ଼ିଛନ୍ତି । ଏ ନେଇ ନିଜେ ଭକ୍ତ କହିଛନ୍ତି ବରିଷ୍ଠ ନେତାମାନେ ତାଙ୍କର ସମ୍ମାନୀୟ । ସେମାନେ ଯାହା ବି କରିବେ ଭଲମନ୍ଦ ଭାବିକି କରିବେ । ଏବେ ହଟହଟା ହେବାର ସମୟ ଆସିନାହିଁ । ନିର୍ବାଚନ ପୂର୍ବରୁ କିଏ ମୁଖ୍ୟମନ୍ତ୍ରୀ ହେବ ବୋଲି ପ୍ରତିଯୋଗିତା ହେଲେ ଚଳିବ । ବ୍ୟକ୍ତିଗତ ସ୍ୱାର୍ଥ ନେଇ ବହୁ ଲୋକ କାମ କରୁଛନ୍ତି । ସେଭଳି ନେତାଙ୍କୁ ଚେତାଇ ଦେଇ ଭକ୍ତ କହିଛନ୍ତି, ଯଦି ଦଳରେ ଏଭଳି ନେତା ରହିବାକୁ ଚାହୁଁନାହାନ୍ତି ତା’ହେଲେ ଯାହା ଇଚ୍ଛା ତା’ କରନ୍ତୁ । ଏପରି ଅଭିଯାନ କରି ତାଙ୍କ ସହ ବ୍ୟକ୍ତିଗତ ଆଲୋଚନା କରନ୍ତୁ । ଏପରିକି କୌଣସି ସମସ୍ୟା ଥିଲେ ହାଇକମାଣ୍ଡଙ୍କ ସହ ଆଲୋଚନା କରିବାକୁ ଭକ୍ତ ଆହ୍ୱାନ ଦେଇଛନ୍ତି । ବାହାରେ ସାଉଟ କଲେ ଲାଭ ନାହିଁ । କଂଗ୍ରେସ ପିଲାମାନେ ଯଦି କାହାର ପ୍ରରୋଚନାରେ କାମ କରୁଛନ୍ତି ସେମାନେ ସଠିକ ବାଟରେ ଆସିଲେ ମୁଁ କ୍ଷମା କରିଦେବି ବୋଲି ଭକ୍ତ କହିଛନ୍ତି । ସେପଟେ ଦଳର କୁହାଳିଆ ବରିଷ୍ଠ ନେତା ସୁରେଶ କୁମାର ରାଉତରାୟ କହିଛନ୍ତି, ଦଳରେ ଯଦି ଵିଭୀଷଣ, ରାବଣ ରହିଲେ ତା’ହେଲେ ସୁଗ୍ରୀବ ବି ରହିଥିବେ । ଖୁବଶୀଘ୍ର ଏକ ବନ୍ଧୁ ମିଳନ କରି ସମସ୍ତଙ୍କୁ ଏକାଠି କରିବା ପାଇଁ ସେ ଆହ୍ବାନ ଦେଇଛନ୍ତି ।

ନୂଆପଡ଼ା ଉପନିର୍ବାଚନ ପରେ ପିସିସି ସଭାପତିଙ୍କୁ ସାଙ୍ଗଠନିକ ଶକ୍ତି ବଢାଇବାକୁ ନିର୍ଦ୍ଦେଶ ଦେଇଛନ୍ତି ରାହୁଲ ଗାନ୍ଧୀ । ରାହୁଲଙ୍କ ସହ ସାକ୍ଷାତ ବେଳେ ସାଙ୍ଗଠନିକ କାର୍ଯ୍ୟକ୍ରମ ଉପରେ ଆଲୋଚନା ହୋଇଛି । ଆଗକୁ ଏସଆଇଆର ଉପରେ କାର୍ଯ୍ୟକ୍ରମ ହେବ । ଆଗାମୀ ୧୪ ତାରିଖରେ ଦିଲ୍ଲୀର ରାମଲୀଳା ମଇଦାନରେ ଏଆଇସିସି ପକ୍ଷରୁ ଆୟୋଜିତ ହେବାକୁ ଥିବା ରାଲିରେ ଓଡ଼ିଶାରୁ ୫ ହଜାରରୁ ଅଧିକ କଂଗ୍ରେସ କର୍ମୀ ଓ ନେତା ଯୋଗଦେବାର କାର୍ଯ୍ଯକ୍ରମ ରହିଛି ।