ଅଧାରେ ରହିଲା ସାଉଦି ଆରବ ହଜ୍ ଯାତ୍ରା, ଡିସକାଉଣ୍ଟରେ କରାଇ ଦେବାକୁ କହି ୭୨ ଲକ୍ଷ ଲୁଟି ନେଲା ଠକ

ନନ୍ଦିଘୋଷ ବ୍ୟୁରୋ: ଅଧାରେ ରହିଲା ସାଉଦି ଆରବ ହଜ୍ ଯାତ୍ରା । ଭକ୍ତି ଭାବରେ ବିଷ ଭରି ଦେଲା ଠକ । ଟ୍ରାଭେଲ ଏଜେନ୍ସି ମାଲିକଙ୍କଠାରୁ ଲୁଟି ନେଲା ୭୨ ଲକ୍ଷ ଟଙ୍କା । ଭୁବନେଶ୍ୱର ସାଇବର ଥାନାର ଦ୍ୱାରସ୍ଥ ହେଲେ ଠକେଇର ଶିକାର ବ୍ୟକ୍ତି । ସେପଟେ ପ୍ରି ଆକ୍ଟିଭେଟେଡ ସିମ ଜରିଆରେ ଠକେଇ ବଢୁଥିବା ନେଇ ଉଦବେଗ ।

ତୀର୍ଥ ଯାତ୍ରା କରାଇବା ନାଁରେ ୭୨ ଲକ୍ଷ ଠକେଇ । କାଳ ହେଲା ସାଉଦି ଆରବକୁ ହଜ୍ ଯାତ୍ରା । ଟ୍ରାଭେଲ ଏଜେନ୍ସି ମାଲିକ ଥାନାର ଦ୍ୱାରସ୍ଥ । ଫେକ ସିମ୍ ଜରିଆରେ ସାରା ଦେଶରେ ବଢୁଛି ଠକେଇ ।

ନାଁ ମହମ୍ମଦ ସଲମାନ । ୟୁନିଟ ୪ରେ ମହମ୍ମଦଙ୍କର ଏକ ଟ୍ରାଭେଲ ଏଜେନ୍ସି ରହିଛି । ହଜ୍ ଯାତ୍ରା ପାଇଁ ୧୧୨ ଜଣଙ୍କୁ ସାଉଦି ଆରବ ନେବା ପାଇଁ ଟଙ୍କା କଲେକ୍ସନ କରିଥିଲେ । ଏହାପରେ ଗୁଗୁଲରେ ସାଉଦି ଆରବର ଟ୍ରାଭେଲ ଏଜେନ୍ସିକୁ ଭିସା ଓ ହୋଟେଲ ବୁକିଂ ପାଇଁ ଯୋଗାଯୋଗ କରିବା ବେଳେ ଜଣେ ଡିସକାଉଣ୍ଟରେ ସୁବିଧା କରି ଦେବେ ବୋଲି ଫୋନ ଯୋଗେ ପ୍ରତିଶ୍ରୁତି ଦେଇଥିଲେ । ପ୍ରତିଶୃତି ମୁତାବକ ୧୧୨ ଜଣଙ୍କୁ ନେଇ ମୁମ୍ବାଇ ଏୟାରପୋର୍ଟରେ ପହଁଚିବା ପରେ ନା ଥିଲା ଭିସାର ଯୋଗାଡ଼ ନା ଥିଲା ହୋଟେଲ ବୁକିଂ । ଓଲଟା ଆକାଉଣ୍ଟରୁ କଟି ଚାଲିଥିଲା ଟଙ୍କା । ନିରାଶ ହୋଇ ଫେରିବା ପରେ ମହମ୍ମଦ ସଲମାନ ଭୁବନେଶ୍ୱର ସାଇବର ଥାନାର ଦ୍ୱାରସ୍ଥ ହୋଇଛନ୍ତି । ସମୁଦାୟ ୭୨ ଲକ୍ଷ ହରାଇବା ପରେ ଘରେ ସୁନା ଅଳଙ୍କାର ବିକ୍ରି କରି ଲୋକଙ୍କ ଟଙ୍କା ସୁଝିଥିବା କ୍ଷୋଭର ସହ କହିଛନ୍ତି ।

ଇଣ୍ଡିଆନ ସାଇବର କ୍ରାଇମ କୋର୍ଡ଼ିନେସନରୁ ମିଳିଥିବା ସୂଚନା ମୁତାବକ ପଶ୍ଚିମବଙ୍ଗ, ଆସାମ ସମେତ ଓଡ଼ିଶା ପାଲଟିଛି ଫେକ ସିମର ହବ । ପ୍ରତିଦିନ ଦେଶରେ ପାଖାପାଖି ୭୦ ହଜାର ସାଇବର ସମ୍ପର୍କିତ ଅଭିଯୋଗ ଆସୁଥିବା ବେଳେ ଅଧିକାଂଶ ଫେକ ସିମ୍ ଦ୍ୱାରା ଅପରେଟ କରାଯାଉଛି । ଓଡ଼ିଶାରେ କ୍ରାଇମବ୍ରାଞ୍ଚ ପକ୍ଷରୁ ଟ୍ରାଇ ଓ ମୋବାଇଲ କମ୍ପାନୀ ସହ ବାରମ୍ବାର ଆଲୋଚନା ସତ୍ତ୍ୱେ ମଧ୍ୟ ରାସ୍ତା କଡ଼ରେ ଛତୁ ଫୁଟିବା ଭଳି ହେଉଛି ସିମ୍ ବିକ୍ରି । ଯାହାର ଫାଇଦା ନେଇ ଲୋନ ଫ୍ରଡ଼, ନ୍ୟୁଡ କଲ, ଡିଜିଟାଲ ଆରେଷ୍ଟ ଭଳି ସଙ୍ଗିନ ଘଟଣା ଘଟାଉଛନ୍ତି ଅପରାଧୀ । ସେପଟେ ଟ୍ରାଭେଲ ଏଜେନ୍ସି ଜରିଆରେ ଠକେଇର ଶିକାର ହେବା ପରେ ନ୍ୟାୟ ଆଶାରେ ସାଇବର ଥାନାର ଦ୍ୱାରସ୍ଥ ହୋଇଛନ୍ତି ମହମ୍ମଦ ସଲମାନ । କଷ୍ଟମର କେୟାର, ରିଫଣ୍ଡ , ଅନଲାଇନ ବୁକିଂ, କେୱାଇସି, ସେକ୍ସର୍ଟସନ ଭଳି ସାଇବର ଫ୍ରଡ଼ରେ ମାତ୍ରାଧିକ ବେନାମୀ ସିମ୍ ର ବ୍ୟବହାର ଦେଶର ଅର୍ଥନୀତିକୁ ମଧ୍ୟ ପ୍ରଭାବିତ କରୁଥିବା କହିଛନ୍ତି ବିଶେଷଜ୍ଞ ।