ଭୁବନେଶ୍ୱର: କମିଶନରେଟ ପୋଲିସ କବଜାରେ ହାଇୱେ ଲୁଟେରା ଗ୍ୟାଙ୍ଗ। ୫ ଅଭିଯୁକ୍ତଙ୍କୁ ଗିରଫ କଲା ନୟାପଲ୍ଲୀ ଥାନା ପୋଲିସ । ଅଭିଯୁକ୍ତମାନେ ସ୍ପିଡ୍ ବାଇକରେ ଆସି ଚଳନ୍ତା ଗାଡ଼ିରୁ ଲୁଟପାତ କରୁଥିଲେ । ଲୁଟ ପରେ ନିଜ ଗାଡ଼ି ନମ୍ବର ବଦଳାଉଥିଲେ । ଅଭିଯୁକ୍ତଙ୍କ ନିକଟରୁ ବିପୁଳ ପରିମାଣର ସୁନା ଗହଣା ସହ ବାଇକ ଓ ଟଙ୍କା ଜବତ କରି ପୋଲିସ ତଦନ୍ତ ଜାରି ରଖିଛି ।
ଆଠଗଡ ବ୍ଲକ ଅଫିସ ପରିସରରେ ବିଜେପି ଓ ବିଜେଡି କର୍ମୀ ମୁହାଁମୁହିଁ
ଆଠଗଡ: ଆଠଗଡ ବ୍ଲକ ଅଫିସ ପରିସରରେ ବିଜେପି ଓ ବିଜେଡି କର୍ମୀ ମୁହାଁମୁହିଁ। । ଘଟଣା ସ୍ଥଳରେ ଦେଖାଦେଇଛି ଉତ୍ତେଜନ। ସ୍ଥିତିକୁ ନେଇ ଘଟଣା ସ୍ଥଳରେ ପୋଲିସ ଫୋର୍ସ ମୁତୟନ ହୋଇଛନ୍ତି। ଘଟଣାସ୍ଥଳରେ ଏସଡିପିଓଙ୍କ ସହ ସ୍ଥାନୀୟ ଆଇଆଇସି ଉପସ୍ଥିତ ଅଛନ୍ତି।
ସୂଚନା ଅନୁଯାୟୀ, ଗତ ୧୦ ଧାଇପୁର ସରପଞ୍ଚ ମୀନାକ୍ଷୀ ସାହୁ ଆଠଗଡ଼ ପଞ୍ଚାୟତ ସମିତି ଅଧ୍ୟକ୍ଷଙ୍କୁ ଧମକ ଦେଇଥିଲେ। ଏହାର ପ୍ରତିବାଦ କରି ବିଭିନ୍ନ ପଞ୍ଚାୟତର ସରପଞ୍ଚ, ସମିତି ସଭ୍ୟ ଏବଂ ଜିଲ୍ଲା ପରିଷଦଙ୍କ ପକ୍ଷରୁ ମୀନାକ୍ଷୀ ସାହୁଙ୍କ ନାମରେ ଆଠଗଡ ଥାନାରେ ଏତଲା ଦେଇଥିଲେ। ଏହି ପ୍ରସଙ୍ଗକୁ ନେଇ ଆଜି ପୁଣି ମୁହାଁମୁହିଁ ହୋଇଛନ୍ତି କର୍ମୀ। ଉଭୟ ଦଳ ନିଜର ପତିଆରା ଜାହିର କରିବା ପାଇଁ ବ୍ଲକ କାର୍ଯ୍ୟାଳୟ ପରିସରରେ ମୁହାଁମୁହିଁ ହୋଇଥିଲେ।
ଓଡ଼ିଶାର ପୋଷ୍ଟାଲ୍ ଦୁର୍ନୀତି ନେଇ ସିବିଆଇର ତନାଘନା, ୬୭ଟି ସ୍ଥାନରେ ରେଡ୍
ନନ୍ଦିଘୋଷ ବ୍ୟୁରୋ: ଓଡ଼ିଶାର ପୋଷ୍ଟାଲ୍ ଦୁର୍ନୀତି ନେଇ ସିବିଆଇର ତନାଘନା। ଏହି ଘଟଣାରେ ୬୭ଟି ସ୍ଥାନରେ ରେଡ୍ କରିଛି ସିବିଆଇ। ଗ୍ରାମୀଣ ଡାକ ସେବକ ପରୀକ୍ଷାର ୬୩ ଜଣ ପରୀକ୍ଷାର୍ଥୀ ଏବଂ ଡାକ ବିଭାଗର ଅଧିକାରୀଙ୍କ ବିରୋଧରେ ମାମଲା ରୁଜୁ କରି ତଦନ୍ତ କରୁଛି ସିବିଆଇ। ପୋଷ୍ଟାଲ ସେବାର ନିର୍ଦ୍ଦେଶକଙ୍କ ଅଭିଯୋଗ ପରେ କଳାହାଣ୍ଡି, ନୂଆପଡ଼ା, ରାୟଗଡ଼ା, ନବରଙ୍ଗପୁର, କନ୍ଧମାଳ, ମଯୂରଭଞ୍ଜ, ବାଲେଶ୍ବର, ଭଦ୍ରକର ବିଭିନ୍ନ ସ୍ଥାନରେ ଚାଲିଛି ରେଡ୍ ।
ସୂଚନା ଅନୁଯାୟୀ, ୨୦୨୩ରେ ୧ ହଜାର ୩୮୨ଟି ଗ୍ରାମୀଣ ଡାକ ସେବକ ପାଇଁ ନିଯୁକ୍ତି ପ୍ରକ୍ରିୟା ହୋଇଥିଲା। କେବଳ ଦଶମ ମାର୍କ ଆଧାରରେ ଚାକିରି ମିଳିବାର ନିୟମ ଥିଲା। ଜାଲ୍ ସାର୍ଟିଫିକେଟ ଦେଇ ଅନେକ ପିଲା ଏହି ଚାକିରି ପାଇଥିବାର ହୋଇଥିଲା ଅଭିଯୋଗ। ଅନେକ ପିଲା ରାଜ୍ଯ ବାହାରୁ ଜାଲ୍ ସାର୍ଟିଫିକେଟ ଆଣି ଏହି ଚାକିରି ପାଇଛନ୍ତି। ୨୦୨୩ ମେ’ ୯ ତାରିଖରେ ସିବିଆଇ ମାମଲା ରୁଜୁ କରିଥିଲା। ସାର୍ଟିଫିକେଟ ଯାଞ୍ଚ ବେଳେ ଦେଖା ଯାଇଥିଲା, ଅନେକ ପିଲା ରାଜ୍ଯ ବାହାରର ବିଭିନ୍ନ ବୋର୍ଡରୁ ଜାଲ୍ ସାର୍ଟିଫିକେଟ ଆଣିଛନ୍ତି। ପଶ୍ଚିମବଙ୍ଗ, କୋଲକାତା, ଝାଡ଼ଖଣ୍ଡ, ରାଞ୍ଚି, ଆଲାହାବାଦ ଏପରି ଅନେକ ସ୍ଥାନରୁ ସେମାନେ ଜାଲ୍ ସାର୍ଟିଫିକେଟ ଆଣି ଧରା ପଡ଼ିଥିଲେ।
ନିଟ୍ ରେଜଲ୍ଟ ବଡ଼ ସ୍କାମ୍; ଏଭଳି ସାଂଘାତିକ ଅଭିଯୋଗ ଆଣିଛି ରାଜ୍ୟ ଛାତ୍ର କଂଗ୍ରେସ
ଭୁବନେଶ୍ୱର: ନିଟ୍ ରେଜଲ୍ଟ ବଡ଼ ସ୍କାମ୍ । ଏଭଳି ସାଂଘାତିକ ଅଭିଯୋଗ ଆଣିଛି ରାଜ୍ୟ ଛାତ୍ର କଂଗ୍ରେସ। ଛାତ୍ରଛାତ୍ରୀ ଦିନରାତି ଏକ କରି କଠିନ ପରିଶ୍ରମ କରୁଛନ୍ତି। ହେଲେ ପିଲାଙ୍କ ଜୀବନ ସହ ଖେଳୁଛନ୍ତି କର୍ତ୍ତୃପକ୍ଷ। ନିର୍ବାଚନ ପରେ ରେଜଲ୍ଟ ବାହାରିବାର ଥିଲା। ତରବରିଆ ଭାବରେ ୧୦ ଦିନ ପୂର୍ବରୁ ରେଜଲ୍ଟ ବାହାର କରାଗଲା। ଆୟୋଜକ ସଂସ୍ଥା NTAକୁ ଦୁର୍ନୀତିଗ୍ରସ୍ତ ବୋଲି କହିଛି ଛାତ୍ର କଂଗ୍ରେସ। ମାମଲାରେ ନ୍ୟାୟପାଳିକା ତଦନ୍ତ କରିବାକୁ ଦାବି କରିଛି କଂଗ୍ରେସ। ଯେଉଁମାନେ ଏଥିରେ ଦୋଷୀ ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ।
ପରୀକ୍ଷାରେ ସ୍ଵଛତା ଅବଲମ୍ବନ ହୋଇନାହିଁ। କେନ୍ଦ୍ର ସରକାର ଏ ବାବଦରେ କାହିଁକି ମୁଁହ ଖୋଲୁ ନାହାନ୍ତି, ବୋଲି ପ୍ରଶ୍ନ କରିଛି ଛାତ୍ର କଂଗ୍ରେସ । ବିଭିନ୍ନ ରାଜ୍ୟରେ ପରୀକ୍ଷା ପ୍ରଶ୍ନପତ୍ର ଲିକ ସହ ପରୀକ୍ଷାର୍ଥୀ ପ୍ରଶ୍ନପତ୍ର ପୂର୍ବରୁ ପାଇଥିବା ଅଭିଯୋଗ ହୋଇଛି। ତେଣୁ ୨୫ ଲକ୍ଷ ଛାତ୍ରଛାତ୍ରୀଙ୍କ ଭବିଷ୍ୟତ ସହ ଖେଳ ଖେଳା ନଯାଉ। ପୁଣିଥରେ ସରକାର ପରୀକ୍ଷା ପାଇଁ ବ୍ୟବସ୍ଥା କରନ୍ତୁ ବୋଲି ଦାବି କରିଛି ଛାତ୍ର କଂଗ୍ରେସ।
ବାରଙ୍ଗ ନିକଟ ଚୁଡ଼ଙ୍ଗ ଜଙ୍ଗଲରୁ ଯୁବକଙ୍କ ମୃତଦେହ ଉଦ୍ଧାର
କଟକ: ବାରଙ୍ଗ ନିକଟ ଚୁଡ଼ଙ୍ଗ ଜଙ୍ଗଲରୁ ଯୁବକଙ୍କ ମୃତଦେହ ଉଦ୍ଧାର । ମୃତକ ହେଲେ ବାରଙ୍ଗ ଥାନା ପଛ କନକଦୁର୍ଗା ଆଦିବାସୀ ସାହିର ସୁଶାନ୍ତ ଟୁଡୁ । ମୃତକଙ୍କ ଶରୀରରେ କ୍ଷତ ଚିହ୍ନ ରହିଥିବାବେଳେ ତାଙ୍କୁ ହତ୍ଯା କରାଯାଇଥିବା ସନ୍ଦେହ କରାଯାଉଛି । ଅଭିଯୋଗ ଅନୁସାରେ ମଙ୍ଗଳବାର ପୂର୍ବାହ୍ନରେ ମୃତ ସୁଶାନ୍ତ ଦୁଇଜଣ ସହଯୋଗୀଙ୍କ ସହ ସ୍କୁଟର ଯୋଗେ ଜଙ୍ଗଲକୁ ମଦ୍ୟପାନ କରିବାକୁ ଯାଇଥିଲେ। ସେଠାରେ ସେମାନଙ୍କ ମଧ୍ୟରେ କୌଣସି କଥାକୁ ନେଇ ଯୁକ୍ତିତର୍କ ହୋଇଥିଲା । ଏହି ସମୟରେ ସୁଶାନ୍ତଙ୍କ ଦୁଇ ସହଯୋଗୀ ସେଠାରୁ ଚାଲି ଆସିଥିଲେ । ହେଲେ ରାତି ସୁଦ୍ଧା ସୁଶାନ୍ତ ଘରକୁ ଫେରିନଥିଲେ । ପରିବାର ଲୋକେ ବହୁ ଖୋଜାଖୋଜି କରିବା ପରେ ବି ସୁଶାନ୍ତଙ୍କ ଖୋଜଖବର ପାଇନଥିଲେ । ଏହାପରେ ଥାନାରେ ଅଭିଯୋଗ କରିଥିଲେ । ଗତକାଲି ସନ୍ଧ୍ଯାରେ ଜଙ୍ଗଲ ଭିତରୁ ତାଙ୍କ ମୃତଦେହ ଉଦ୍ଧାର ହୋଇଛି । ବାରଙ୍ଗ ଓ ଚନ୍ଦକା ପୋଲିସ ସାଇଣ୍ଟିଫିକ ଟିମ୍ ଓ ସନ୍ଧାନୀ କୁକୁର ସହାୟତାରେ ତଦନ୍ତ କରୁଛି। ଦୁଇ ସହଯୋଗୀଙ୍କୁ ଅଟକ ରଖି ପଚରାଉଚରା କରାଯାଉଛି । ସୁଶାନ୍ତଙ୍କୁ ହତ୍ଯା କରାଯାଇଥିବା ପରିବାର ଲୋକ ଅଭିଯୋଗ କରିଛନ୍ତି ।
ରାଜ୍ଯରେ ଆକାଶ ଛୁଆଁ ପରିବା ଦର
ନନ୍ଦିଘୋଷ ବ୍ୟୁରୋ: ରାଜ୍ଯରେ ଆକାଶ ଛୁଆଁ ପରିବା ଦର । ନିୟମିତ ବଢୁଛି ଦରଦାମ। କଞ୍ଚା ପରିବାରେ ହାତ ମାରିବାକୁ ବି ଡର ଲାଗୁଛି। ଓଡିଶାର ଅଧିକାଂଶ ସ୍ଥାନରେ ଚିନ୍ତା ବଢାଇଲାଣି ପରିବା ଦର । ଆଳୁ ସହ ଟମାଟୋ ଦର ଆକାଶ ଛୁଇଁଲାଣି । ତାସହ ଖାଉଟିଙ୍କୁ ମହଙ୍ଗା ପଡୁଛି କଞ୍ଚା ପନିପରିବା କିଣିବା । ସବୁ ପରିବା ଦାମ ୫୦ ଟଙ୍କା ଉପରେ ରହିଛି । ଆଗରୁ ୩୦ ଟଙ୍କାରେ ବିକ୍ରି ହେଉଥିବା ଟମାଟୋ ଏବେ ଦୁଇଗୁଣା। ଟମାଟୋ କିଲୋପ୍ରତି ୬୦ ଟଙ୍କାରେ ବିକ୍ରି ହେଉଥିବାବେଳେ ଫୁଲକୋବି, ପୋଟଳ, ବାଇଗଣ, କାଙ୍କଡ ଆଦି ପରିବା ୫୦ ଟଙ୍କା ଉପରେ ରହିଛି। ଦରଦାମକୁ ନେଇ ଲୋକଙ୍କ ମଧ୍ଯରେ ଅସନ୍ତୋଷ ଦେଖିବାକୁ ମିଳିଛି।
ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଗାଁ ବୁଲିଲେ ମୁଖ୍ଯମନ୍ତ୍ରୀ
ପୁରୀ: ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଗାଁ ବୁଲିଲେ ମୁଖ୍ଯମନ୍ତ୍ରୀ। ସୁଆଣ୍ଡୋରେ ମୁଖ୍ୟମନ୍ତ୍ରୀ ମୋହନ ମାଝୀ। ଆଜି ସକାଳୁ ମୁଖ୍ୟମନ୍ତ୍ରୀ ଅନ୍ୟ ଦୁଇ ଉପମୁଖ୍ୟମନ୍ତ୍ରୀଙ୍କ ସହ ପିପିଲି ଓ ସତ୍ୟବାଦୀର ବିଧାୟକ ଏବଂ ବାଲେଶ୍ବର, ପୁରୀର ସାଂସଦ ସୁଆଣ୍ଡୋରେ ପହଞ୍ଚିଥିଲେ। ପ୍ରଥମେ ଉତ୍କଳମଣୀ ଗୋପବନ୍ଧୁ ଦାସଙ୍କ ଷଠିଘର ପରିଦର୍ଶନ କରି ସେଠାରେ ଶ୍ରଦ୍ଧାସୁମନ ଅର୍ପଣ କରିଥିଲେ । ଏହାପରେ ଗୋପବନ୍ଧୁଙ୍କ ପ୍ରତିମୂର୍ତ୍ତୀରେ ମାଲ୍ୟାର୍ପଣ କରି ଶ୍ରଦ୍ଧାଞ୍ଜଳି ପ୍ରଦାନ କରିଥିଲେ ।
ଗୋପବନ୍ଧୁଙ୍କ ଗାଁ ବୁଲିବା ପରେ ଅଞ୍ଚଳର ବିକାଶ ନେଇ ଲୋକଙ୍କ ସହ କଥା ହୋଇଥିଲେ । ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି ଯେ ସୁଆଣ୍ଡୋର ବିକାଶ ପାଇଁ କାର୍ଯ୍ୟ କରିବାକୁ ସରକାର ପ୍ରତିଶୃତିବଦ୍ଧ ।
ରଜ ପାଇଁ ସଜବାଜ ହେଲାଣି ପରିବେଶ
ନନ୍ଦିଘୋଷ ବ୍ୟୁରୋ: ରଜ ପାଇଁ ଆରମ୍ଭ ହୋଇଗଲାଣି ସଜବାଜ। ଗାଁ ଠାରୁ ସହର ପର୍ଯ୍ୟନ୍ତ ରଜ ପାଇଁ ପ୍ରସ୍ତୁତି ଆରମ୍ଭ ହୋଇଛି । କୁଆଁରୀ ମାନେ ରଜ ୩ ଦିନ କିପରି ଖେଳକୁଦ ଓ ମଉଜ ମଜଲିସରେ କାଟିବେ ସେଥିପାଇଁ ସମସ୍ତେ ପ୍ରସ୍ତୁତ ଚାଲିଛି। କୁଆଁରୀଙ୍କ ଦୋଳି ବନ୍ଧା ଆରମ୍ଭ ହୋଇଗଲାଣି। ହାତଠାରି ଡାକିଲାଣି ଅଳତା, ମେହେନ୍ଦୀ, ପିଠା, ମିଠାପାନ। ପିଠା ମିଠାର ୧୨ ସୁଆଦ ନେବାକୁ କୁଆଁରୀ ମାନେ ଅପେକ୍ଷା କରିବସିଲେଣି। ଆଜି ଘରେ ଘରେ ରଜ ସଜବାଜ ସହ ପିଠା ମିଠାର ପ୍ରସ୍ତୁତି ଚାଲିଛି।
ଏପଟେ ରଜ କିଣାବିକା ପାଇଁ ବଜାରରେ ଭିଡ ଜମିଛି । ରଜରେ ସହରରେ ମଧ୍ୟ ପ୍ରସ୍ତୁତି ଆରମ୍ଭ ହୋଇଛି । ରଜ ପାଇଁ ଅନେକ ତେଜରାତି ଦୋକାନୀ ଚାଉଳ ଚୂନା ପ୍ରସ୍ତୁତ କରି ବିକ୍ରି କରୁଛନ୍ତି । ଅନ୍ୟପଟେ ପାର୍ଲରରେ ଝିଅଙ୍କ ଭିଡ । ବଡ ବଡ ରେଷ୍ଟୁରାଣ୍ଟରେ ମଧ୍ଯ ପିଠାକୁ ମେନ୍ଯୁର ସାମିଲ କରିଛନ୍ତି ମାଲିକ । ପୋଡପିଠା , କରଞ୍ଜିପିଠା, ଚନ୍ଦ୍ରକଳା, କାକରା, ମଣ୍ଡା, ଲବଙ୍ଗୀ ପରି ଭଳିକି ଭଳି ଖାଦ୍ଯ ମେନ୍ଯୁରେ ସାମିଲ ହୋଇଛି । ଛୋଟ ପିଲାଙ୍କ ପାଇଁ ସହର ଗଳିକନ୍ଦିରେ ଦୋଳିର ପସରା ମେଲି ବସିଥିବା ବ୍ଯବସାୟୀ ବି ଭଲ ରୋଜଗାର ନେଇ ଆଶାବାଦୀ ।
NEET: ପୁଣି ପରୀକ୍ଷା ଦେବେ ୧୫୬୩ ପରୀକ୍ଷାର୍ଥୀ
ନୂଆଦିଲ୍ଲୀ: ମେଡିକାଲ ପ୍ରବେଶିକା ପରୀକ୍ଷା ନିଟ୍ ରେଜଲ୍ଟ ବିବାଦରେ ସୁପ୍ରମକୋର୍ଟଙ୍କ ବଡ଼ ରାୟ। ରଦ୍ଦ ହେଲା ୧୫୬୩ ଜଣ ପରୀକ୍ଷାର୍ଥୀଙ୍କ ଗ୍ରେସମାର୍କ। ପୁଣି ପରୀକ୍ଷା ଦେଇପାରିବେ ଗ୍ରେସ ମାର୍କ ପାଇଥିବା ୧୫୬୩ ଜଣ ଛାତ୍ରଛାତ୍ରୀ। ଏହାସହ ଗ୍ରେସ ମାର୍କ ପାଇଥିବା ୧୫୬୩ ଜଣ ପରୀକ୍ଷାର୍ଥୀଙ୍କ ସ୍କୋରକାର୍ଡ ରଦ୍ଦ ହୋଇଛି। ରେଜଲ୍ଟ ବିବାଦରେ ଏନଟିଏର ଜବାବ ପରେ ଏହି ନିଷ୍ପତ୍ତି ନେଇଛନ୍ତି ସୁପ୍ରିମକୋର୍ଟ। ଛାତ୍ରଙ୍କ ଲାଗି ଦୁଇଟି ବିକଳ୍ପ ରହିଛି। ଗ୍ରେସମାର୍କ ପାଇଥିବା ୧୫୬୩ ପରୀକ୍ଷାର୍ଥୀ ପୁଣି ପରୀକ୍ଷା ଦେଇପାରିବେ କିମ୍ବା ସେମାନଙ୍କୁ ଗ୍ରେସମାର୍କ ବିନା ସ୍କୋରକାର୍ଡକୁ ଗ୍ରହଣ କରିବାକୁ ପଡିବ। ଆସନ୍ତା ୨୩ ଜୁନରେ ଗ୍ରେସମାର୍କ ପାଇଥିବା ଛାତ୍ରଛାତ୍ରୀଙ୍କ ଲାଗି ପୁନଃ ପରୀକ୍ଷା ହେବ। ଜୁନ ୩୦ ପୂର୍ବରୁ ରେଜଲ୍ଟ ପ୍ରକାଶ ପାଇବ।
ତେବେ ନିଟ୍ ପରୀକ୍ଷା ସମ୍ପୂର୍ଣ୍ଣ ରଦ୍ଦ କରାଯାଇନଥିବା ନେଇ ଜବାବ ଦାଖଲ ରଖିଥିଲା ଏନଟିଏ। ସୁପ୍ରିମକୋର୍ଟରେ ଏହି ଜବାବ ରଖିଛନ୍ତି ମେଡିକାଲ ପ୍ରବେଶିକା ପରୀକ୍ଷା ଆୟୋଜନ କରିଥିବା ନ୍ଯାସନାଲ ଟେଷ୍ଟିଂ ଏଜନସି NTA। ତେବେ ମେଡିକାଲ ନାମଲେଖା ଲାଗି କାଉନସେଲିଂ ପ୍ରକ୍ରିୟାରେ ରୋକ ଲଗାଇବାକୁ ମନା କରିଛନ୍ତି ସୁପ୍ରିମକୋର୍ଟ। ନାମଲେଖା ପ୍ରକ୍ରିୟା ଜାରି ରହିବ। ମେଡିକାଲ ପ୍ରବେଶିକା ପରୀକ୍ଷା ରେଜଲ୍ଟ , ପରୀକ୍ଷାରେ ଅନିୟମିତତା ଏବଂ ପରୀକ୍ଷା ରଦ୍ଦ କରିବା ନେଇ ଆବେଦନ ହୋଇଥିଲା। ଏହି ମାମଲାରେ ଜବାବ ଦାଖଲ ଲାଗି ସୁପ୍ରିମକୋର୍ଟରେ ଏନଟିଏକୁ ନିର୍ଦ୍ଦେଶ ଦେଇଥିଲେ। ସୁପ୍ରିମକୋର୍ଟରେ ଏନଟିଏର ଜବାବ ପରେ ଏହି ନିଷ୍ପତ୍ତି ନେଇଛନ୍ତି ସୁପ୍ରିମକୋର୍ଟ। ଆସନ୍ତା ଜୁଲାଇ ୮ ତାରିଖରେ ମାମଲାରେ ପରବର୍ତ୍ତୀ ଶୁଣାଣି ହେବ।
ରାଜ୍ୟରେ ଆଗକୁ ବଢ଼ିବ ମୌସୁମୀ, ୩ରୁ ୪ଦିନ ମଧ୍ୟରେ ଓଡ଼ିଶାକୁ ପ୍ରବେଶ କରିବ ମୌସୁମୀ
ଭୁବନେଶ୍ୱର: ଆଗକୁ ବଢିବ ମୌସୁମୀ । ଆସନ୍ତା ୧୫ ତାରିଖ ପରେ ମୌସୁମୀ ଆଗକୁ ବଢିବା ପାଇଁ ପାଗ ଅନୁକୂଳ ରହିଛି । ଦକ୍ଷିଣ ପଶ୍ଚିମ ମୌସୁମୀ ବାୟୁ ଗତ ୮ ତାରିଖରେ ଓଡ଼ିଶାର ମାଲକାନଗିରି ଜିଲ୍ଲାକୁ ଛୁଇଁଥିବା ବେଳେ ଆଉ ଆଗକୁ ବଢିପାରିନି । କାରଣ କାଳବୈଶାଖୀ ପ୍ରଭାବ କମିବା ସହ ପଶ୍ଚିମ ଓଡ଼ିଶାରେ ପ୍ରବଳ ଗ୍ରୀଷ୍ମପ୍ରବାହ ଜାରି ରହିଛି। ଉତ୍ତର ଉପକୂଳ ଓଡିଶାରେ ମଧ୍ୟ ଗରମ ଗୁଳୁଗୁଳି ଲଗାତାର ଜାରି ରହିଛି। ଫଳରେ ମୌସୁମୀ ମାଲକାନଗିରି ଜିଲ୍ଲାରୁ ଆଗକୁ ବଢିବା ପାଇଁ ବଳ ପାଉନି । ତେବେ ଗତକାଲି ଦକ୍ଷିଣ ପଶ୍ଚିମ ମୌସୁମୀ ବାୟୁ ମହାରାଷ୍ଟ୍ର ଓ ଛତିଶଗଡ଼ର କିଛି ଅଞ୍ଚଳ, ସମ୍ପୂର୍ଣ୍ଣ ତେଲେଙ୍ଗାନାକୁ ସ୍ପର୍ଶ କରିଛି । ଆଗାମୀ ୩ରୁ ୪ଦିନ ମଧ୍ୟରେ ଓଡ଼ିଶାର କିଛି ଅଞ୍ଚଳ ସମେତ ଆନ୍ଧ୍ର ଉପକୂଳ ଓ ବଙ୍ଗୋପସାଗରର ଉତ୍ତର ପଶ୍ଚିମ ଅଞ୍ଚଳକୁ ସ୍ପର୍ଶ କରିବା ନେଇ ପାଗ ଅନୁକୂଳ ରହିଥିବା ନେଇ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି । ତେବେ ମୌସୁମୀ ସ୍ପର୍ଶ କରିବା ପର୍ଯ୍ୟନ୍ତ ଓଡ଼ିଶାରେ ଗ୍ରୀଷ୍ମ ପ୍ରବାହ ଜାରି ରହିବ ।
ଆସନ୍ତା ୨୪ ଘଣ୍ଟା ମଧ୍ୟରେ ବଲାଙ୍ଗୀର, ନୂଆପଡ଼ା, ବରଗଡ଼, ଝାରସୁଗୁଡ଼ା, ସୁନ୍ଦରଗଡ଼, ମୟୂରଭଞ୍ଜ ଜିଲ୍ଲାରେ ଗ୍ରୀଷ୍ମପ୍ରବାହ ଓ ଉପକୂଳ ଓଡ଼ିଶାରେ ଗରମ ସହ ଗୁଳୁଗୁଳି ଅନୁଭୂତ ହେବ । ଉତ୍ତର ଓ ଆଭ୍ୟନ୍ତରୀଣ ଓଡ଼ିଶାରେ କାଳବୈଶାଖୀ ଜନିତ ବର୍ଷା ସହ ଘଣ୍ଟା ପ୍ରତି ୩୦ରୁ ୪୦ କିମି ବେଗରେ ପବନ ହୋଇପାରେ । ୧୫ ତାରିଖଠାରୁ ପାଗରେ ପରିବର୍ତ୍ତନ ହୋଇପାରେ। ଗ୍ରୀଷ୍ମ ପ୍ରବାହ ସାମାନ୍ୟ କମିବା ସହ କାଳବୈଶାଖୀ ବର୍ଷାର ପ୍ରଭାବ ବଢିବ। ୧୬ ତାରିଖରେ କୋରାପୁଟ, ନବରଙ୍ଗପୁର, ରାୟଗଡ଼ା ଓ କଳାହାଣ୍ଡି ଜିଲ୍ଲାର କେତେକ ସ୍ଥାନରେ ପ୍ରବଳ ବର୍ଷା ହୋଇପାରେ । ୧୭ ତାରିଖଠାରୁ ଓଡ଼ିଶାର ଅଧିକାଂଶ ସ୍ଥାନରେ ବର୍ଷା ଜାରି ରହିବ ବୋଲି ପାଣିପାଗ କେନ୍ଦ୍ର କହିଛି।