ଭୁବନେଶ୍ୱର: ଆଜି କେରଳ ଛୁଇଁଲା ଦକ୍ଷିଣ ପଶ୍ଚିମ ମୌସୁମୀ ବାୟୁ। ଏନେଇ ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି। ପାଣିପାଗ ବିଭାଗ ସୂଚନା ଅନୁସାରେ, ଦକ୍ଷିଣ ପଶ୍ଚିମ ମୌସୁମୀ ବାୟୁ କେରଳ ଛୁଇଁବା ପରେ ଉତ୍ତର ପୂର୍ବ ଆଡ଼କୁ ଅଗ୍ରସର ହେବ। IMD ପୂର୍ବାନୁମାନ ଅନୁସାରେ ଗୋଟିଏ ଦିନ ପୂର୍ବରୁ କେରଳ ଉପକୂଳ ଛୁଇଁଛି ମୌସୁମୀ ବାୟୁ। ଚଳିତ ବର୍ଷ ମେ ୩୧ ସୁଦ୍ଧା ମୌସୁମୀ ବାୟୁ କେରଳ ଛୁଇଁବ ବୋଲି ପୂର୍ବାନୁମାନ କରିଥିଲା ଭାରତୀୟ ପାଣିପାଗ ବିଭାଗ।
ନୂଆଦିଲ୍ଲୀ: ସପ୍ତମ ତଥା ଶେଷ ପର୍ଯ୍ୟାୟ ନିର୍ବାଚନ। ୮ ରାଜ୍ଯ ଓ କେନ୍ଦ୍ରଶାସିତ ଅଞ୍ଚଳର ୫୭ ଆସନ ଲାଗି ଆଜି ସରିବ ପ୍ରଚାର। ମୋଟ ୯୦୪ ପ୍ରାର୍ଥୀଙ୍କ ହେବ ଭାଗ୍ଯ ନିର୍ଦ୍ଧାରଣ। ମଇଦାନରେ ପ୍ରଧାନମନ୍ତ୍ରୀ ଓ ଦୁଇ କେନ୍ଦ୍ରମନ୍ତ୍ରୀ ତଥା ବହୁ ହେଭିଓ୍ବେଟ। ଉତ୍ତରପ୍ରଦେଶ ବାରାଣସୀରୁ ଭାଗ୍ଯ ପରୀକ୍ଷା କରୁଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । କଂଗ୍ରେସର ଅଜୟ ରାୟ ପ୍ରଧାନମନ୍ତ୍ରୀଙ୍କୁ ଟକ୍କର ଦେଉଛନ୍ତି। ୨୦୧୪ ଓ ୨୦୧୯ରେ ବିଜୟୀ ହୋଇଥିଲେ ନରେନ୍ଦ୍ର ମୋଦୀ । ୨୦୧୯ରେ ପରାସ୍ତ ହୋଇଥିଲେ ଏସପିର ଶାଳିନୀ ଯାଦବ। ୨୦୧୪ରେ ମୋଦୀଙ୍କ ଠାରୁ ପରାସ୍ତ ହୋଇଥିଲେ ଆପ୍ ନେତା ଅରବିନ୍ଦ କେଜରିଓ୍ବାଲ । ଉତ୍ତରପ୍ରଦେଶ ଚନ୍ଦୌଲିରୁ ଲଢୁଛନ୍ତି କେନ୍ଦ୍ର ଭାରୀ ଶିଳ୍ପମନ୍ତ୍ରୀ ମହେନ୍ଦ୍ର ନାଥ ପାଣ୍ଡେ। ତାଙ୍କ ବିରୋଧରେ ଲଢୁଛନ୍ତି ସମାଜବାଦୀ ପାର୍ଟିର ପ୍ରାର୍ଥୀ ବୀରେନ୍ଦ୍ର ସିଂ । ଉତ୍ତରପ୍ରଦେଶ ମୀର୍ଜାପୁରର ପ୍ରାର୍ଥୀ ଅଛନ୍ତି କେନ୍ଦ୍ର ବାଣିଜ୍ଯ ଓ ଶିଳ୍ପମନ୍ତ୍ରୀ ତଥା ଆପନା ଦଳ(ଏସ) ନେତ୍ରୀ ଅନୁପ୍ରିୟା ପଟେଲ। ତାଙ୍କ ବିରୋଧରେ ପ୍ରାର୍ଥୀ ଅଛନ୍ତି ସମାଜବାଦୀ ପାର୍ଟିର ରମେଶ ଚନ୍ଦ୍ର ବିନ୍ଦ। ହିମାଚଳ ପ୍ରଦେଶ ହମିରପୁରରୁ ଭାଗ୍ଯ ପରୀକ୍ଷା କରୁଛନ୍ତି କେନ୍ଦ୍ରମନ୍ତ୍ରୀ ଅନୁରାଗ ଠାକୁର । ସେପଟେ ପଞ୍ଜାବ ଜଳନ୍ଧରରେ ପ୍ରତିଦ୍ବନ୍ଦ୍ବିତା କରୁଛନ୍ତି ପୂର୍ବତନ ମୁଖ୍ଯମନ୍ତ୍ରୀ ଚରଣଜିତ ସିଂ ଚନ୍ନି । ତାଙ୍କ ବିରୋଧରେ ପ୍ରାର୍ଥୀ ଅଛନ୍ତି ଆପର ପଓ୍ବନ କୁମାର ତିନୁ।
ଅନ୍ୟପଟେ ପଟିଆଲାରେ ବିଜେପିରୁ ପ୍ରତିଦ୍ବନ୍ଦ୍ବିତା କରୁଛନ୍ତି ପୂର୍ବତନ ମୁଖ୍ଯମନ୍ତ୍ରୀ ଅମରିନ୍ଦର ସିଂଙ୍କ ପତ୍ନୀ ପ୍ରୀନିତ କୌର। ତାଙ୍କୁ ଟକ୍କର ଦେଉଛନ୍ତି କଂଗ୍ରେସର ଧରମବୀର ଗାନ୍ଧୀ। ପଶ୍ଚିମବଙ୍ଗ ଡାଏମଣ୍ଡ ହାରବର ଆସନରେ ଠିଆ ହୋଇଛନ୍ତି ଟିଏମସି ସୁପ୍ରିମୋ ମମତା ବାନାର୍ଜୀଙ୍କ ପୁତୁରା ଅଭିଷେକ ବାନାର୍ଜୀ । ତାଙ୍କ ବିରୋଧରେ ପ୍ରାର୍ଥୀ ହୋଇଛନ୍ତି ବିଜେପିର ବବି କୁମାର ଦାସ। ହିମାଚଳ ପ୍ରଦେଶ କାଙ୍ଗ୍ରାରେ ଲଢୁଛନ୍ତି କଂଗ୍ରେସର ହେଭିଓ୍ବେଟ ଆନନ୍ଦ ଶର୍ମା । ବିଜେପିର ରାଜୀବ ଭରଦ୍ବାଜ ତାଙ୍କ ବିରୋଧରେ ଲଢେଇ କରୁଛନ୍ତି । ଝାଡଖଣ୍ଡ ଦୁମକାରେ ପ୍ରାର୍ଥୀ ଅଛନ୍ତି ବିଜେପିର ସୀତା ସୋରେନ। ସେ ହେଉଛନ୍ତି ଜେଏମଏମ ସୁପ୍ରିମୋ ଶିବୁ ସୋରେନଙ୍କ ବୋହୂ। ତାଙ୍କ ବିରୋଧରେ ପ୍ରାର୍ଥୀ ଅଛନ୍ତି ଜେଏମଏମର ନଳୀନ ସୋରେନ । ଚଣ୍ଡୀଗଡ ଆସନରୁ ଲଢୁଛନ୍ତି କଂଗ୍ରେସ ହେଭିଓ୍ବେଟ ମନୀଷ ତିଓ୍ବାରୀ। ବିଜେପିର ସଞ୍ଜୟ ଟଣ୍ଡନଙ୍କ ସହ ତାଙ୍କର ହେଉଛି ଲଢେଇ । ସେପଟେ ବିଭିନ୍ନ ସ୍ଥାନରେ ପ୍ରଚାର କରିଛନ୍ତି କଂଗ୍ରେସ ନେତ୍ରୀ ପ୍ରିୟଙ୍କା ଗାନ୍ଧୀଙ୍କ ସମେତ ବହୁ ନେତା।
ଭୁବନେଶ୍ୱର: ଆସନ୍ତା ୧ ତାରିଖରେ ରାଜ୍ୟରେ ଚତୁର୍ଥ ତଥା ଶେଷ ପର୍ଯ୍ୟାୟ ମତଦାନ ଅନୁଷ୍ଠିତ ହେବାକୁ ଯାଉଛି । ଶେଷ ପର୍ଯ୍ୟାୟରେ ୬ ଲୋକସଭା ଯଥା ମୟୂରଭଞ୍ଜ, ବାଲେଶ୍ୱର, ଭଦ୍ରକ, ଯାଜପୁର, କେନ୍ଦ୍ରାପଡ଼ା ଓ ଜଗତସିଂହପୁର ପାଇଁ ମତଦାନ ହେବ। ସେହିପରି ଏହା ଅନ୍ତର୍ଗତ ୪୨ ବିଧାନସଭା ନିର୍ବାଚନମଣ୍ଡଳୀ ପାଇଁ ମଧ୍ୟ ଭୋଟର ନିଜର ପ୍ରତିନିଧି ବାଛିବାକୁ ଯାଉଛନ୍ତି । ଏଥିପାଇଁ ଆଜି ସନ୍ଧ୍ଯାରେ ସରିବ ପ୍ରଚାର। ଉପରୋକ୍ତ ଆସନଗୁଡ଼ିକରେ ଚଳିତ ଥର ବହୁ ହେଭିୱେଟ ମଇଦାନକୁ ଓହ୍ଲାଇଥିବା ବେଳେ ନିର୍ବାଚନ ଜିଣିବା ସେମାନଙ୍କ ପାଇଁ ସମ୍ମାନର ପ୍ରଶ୍ନ ପାଲଟିଛି । ୬ ଲୋକସଭା କ୍ଷେତ୍ରରେ ଚଳିତଥର ରାଜ୍ୟର ୩ ପ୍ରମୁଖ ଦଳ ବିଜେଡି, ବିଜେପି ଓ କଂଗ୍ରେସ ନିଜର ବହୁ ହେଭିୱେଟ ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇଛନ୍ତି । ବିଶେଷକରି ବାଲେଶ୍ୱର ସଂସଦୀୟ କ୍ଷେତ୍ରରେ ଶେଷ ପର୍ଯ୍ୟାୟର ସବୁଠୁ ରୋଚକ ଲଢ଼େଇ ଦେଖିବାକୁ ମିଳିବ ବୋଲି ରାଜନୈତିକ ମହଲରେ ଆଲୋଚନା ହେଉଛି । ବିଜେଡି ଏଠାରୁ ଚର୍ଚ୍ଚିତ ନେତ୍ରୀ ଡ. ଲେଖାଶ୍ରୀ ସାମନ୍ତ ସିଂହାରଙ୍କୁ ପ୍ରାର୍ଥୀ କରିଥିବା ବେଳେ କଂଗ୍ରେସର ଜାତୀୟ ତଥା ରାଜ୍ୟ ରାଜନୀତିର ଚର୍ଚ୍ଚିତ ନେତା ଶ୍ରୀକାନ୍ତ ଜେନାଙ୍କୁ ଟିକଟ ଦେଇଛି। ସେହିପରି ବିଜେପି ସାଂସଦ ପ୍ରତାପ ଚନ୍ଦ୍ର ଷଡ଼ଙ୍ଗୀଙ୍କୁ ପୁନଃ ପ୍ରାର୍ଥୀ କରିଛି । ଉପରୋକ୍ତ ୩ ନେତାଙ୍କର ରାଜ୍ୟ ରାଜନୀତିରେ ବେଶ୍ ସୁନାମ ରହିଥିବା ବେଳେ ବାଲେଶ୍ୱରର ତ୍ରିକୋଣୀୟ ଲଢ଼େଇ ବର୍ତ୍ତମାନ ରାଜ୍ୟ ରାଜନୀତିରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି ।
ସେହିପରି ମୟୂରଭଞ୍ଜରେ ବିଜେଡି ସାଂସଦ ପ୍ରାର୍ଥୀ ଭାବେ ରାଜ୍ୟର ଅନ୍ୟତମ ବଡ଼ ଆଦିବାସୀ ଚେହେରା ତଥା ରାଜସ୍ୱ ମନ୍ତ୍ରୀ ସୁଦାମ ମାରାଣ୍ଡି ନିଜର ଭାଗ୍ୟ ପରୀକ୍ଷା କରୁଛନ୍ତି । କେନ୍ଦ୍ରାପଡ଼ା ଲୋକସଭା ଆସନରେ ବିଜେପିର ରାଷ୍ଟ୍ରୀୟ ଉପାଧ୍ୟକ୍ଷ ବୈଜୟନ୍ତ ପଣ୍ଡା ଓ ବିଜେଡ଼ିର ଅଂଶୁମାନ ମହାନ୍ତିଙ୍କ ମଧ୍ଯରେ ବଡ଼ ଟକ୍କର ହେଉଛି । ନିର୍ବାଚନ ଜିତିବା ପାଇଁ ହେଭିୱେଟ ନେତା ଝାଳବୁହା ପରିଶ୍ରମ କରୁଥିବା ବେଳେ ନିଜ ନିଜ ଦଳର ଶୀର୍ଷ ନେତୃତ୍ୱଙ୍କୁ ଆଣି ନିଜ ସପକ୍ଷରେ ପ୍ରଚାର କରାଉଛନ୍ତି। ସେହିପରି ବିଧାନସଭା କ୍ଷେତ୍ରରେ ମଧ୍ୟ ଶେଷ ପର୍ଯ୍ୟାୟରେ ରାଜ୍ୟର ବହୁ ହେଭିୱେଟ ନିଜର ଭାଗ୍ୟ ପରୀକ୍ଷା କରୁଛନ୍ତି। ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ଚାନ୍ଦବାଲିରେ ବିଜେପି ରାଜ୍ୟ ସଭାପତି ମନମୋହନ ସାମଲ, ଯୁବ ବିଜେଡି ରାଜ୍ୟ ସଭାପତି ବ୍ୟୋମକେଶ ରାୟ, ଭଦ୍ରକରୁ ବରିଷ୍ଠ ବିଜେଡି ନେତା ପ୍ରଫୁଲ୍ଲ ସାମଲ, ଭଣ୍ଡାରିପୋଖରୀରୁ ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ ପ୍ରମୁଖ ନିର୍ବାଚନ ଲଢ଼ୁଛନ୍ତି।
ସେହିପରି ମନ୍ତ୍ରୀ ଅଶ୍ୱିନୀ ପାତ୍ର, ପ୍ରତାପ ଦେବ, ଅତନୁ ସବ୍ୟସାଚୀ ନାୟକ, ବାଚସ୍ପତି ପ୍ରମିଳା ମଲ୍ଲିକ, ମନ୍ତ୍ରୀ ପ୍ରୀତିରଞ୍ଜନ ଘଡ଼ାଇ ପ୍ରମୁଖ ନିର୍ବାଚନରେ ଅବତ୍ତୀର୍ଣ୍ଣ ହୋଇଛନ୍ତି । ୨୦୧୯ ସାଧାରଣ ନିର୍ବାଚନରେ ବିଜେଡି ଏହି ୬ ଲୋକସଭା ଆସନରେ ବଡ଼ ବିଜୟ ହାସଲ କରିଥିଲା। ୬ ଲୋକସଭା ଆସନରୁ ୪ଟି ବିଜେଡି ଖାତାକୁ ଯାଇଥିବା ବେଳେ ୪୨ ବିଧାନସଭା ଆସନରୁ ୩୩ଟିରେ ଦଳ ବିଜୟ ବାନା ଉଡ଼ାଇଥିଲା । ଏପରିକି ୩ ଜିଲ୍ଲା ଯଥା କେନ୍ଦ୍ରାପଡ଼ା, ଯାଜପୁର ଓ ଜଗତସିଂହପୁର ଜିଲ୍ଲାରେ ବିଜେଡି ସବୁ ଆସନ ପୋଛି ନେଇଥିଲା । ଚଳିତ ଥର ବିଜେଡି ସହ ବିଜେପି ଓ କଂଗ୍ରେସ ନିଜ ନିଜ ବିଜୟ ନେଇ ଆଶାବାଦୀ ଥିବାବେଳେ ହାତୀ କାହା ମୁଣ୍ଡରେ ସୁନା କଳସ ଢାଳୁଛି ତାହା ଦେଖିବାକୁ ବାକି ରହିଲା ବୋଲି ସାଧାରଣରେ ଚର୍ଚ୍ଚା ଜୋର୍ ଧରିଛି ।
ପୁରୀ: ପୁରୀ ନରେନ୍ଦ୍ର ପୁଷ୍କରିଣୀ ନିକଟରେ ଘଟିଥିବା ଅଘଟଣ ପାଇଁ ଦୁଃଖ ପ୍ରକାଶ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଆହତମାନଙ୍କ ଉତ୍ତମ ଚିକିତ୍ସା ସୁନିଶ୍ଚିତ କରିବା ସହ ବ୍ୟବସ୍ଥାର ତଦାରଖ ପାଇଁ ମୁଖ୍ୟ ଶାସନ ସଚିବ ଓ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି ନବୀନ । ମୁଖ୍ୟମନ୍ତ୍ରୀ ରିଲିଫ୍ ପାଣ୍ଠିରୁ ଆହତମାନଙ୍କ ସମସ୍ତ ଚିକିତ୍ସା ଖର୍ଚ୍ଚ ବହନ କରାଯିବ। ମହାପ୍ରଭୁଙ୍କ ନିକଟରେ ସମସ୍ତଙ୍କ ଆଶୁଆରୋଗ୍ୟ କାମନା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।
ସୂଚନା ଅନୁଯାୟୀ, ବାଣ ନିଆଁ ପଡି ଜଣେ ଶ୍ରଦ୍ଧାଳୁଙ୍କ ମୃତ୍ୟୁ ହୋଇଛି । ୨୭ରୁ ଅଧିକ ଶ୍ରଦ୍ଧାଳୁ ଆହତ। ମହାପ୍ରଭୁ ନରେନ୍ଦ୍ର ପୁଷ୍କରିଣୀରେ ଚାପ ଖେଳିବା ସମୟରେ ବାଣ ଫୁଟାଯାଉଥିଲା l ବାଣ ଫୁଟି ନିଆଁ ଲୋକଙ୍କ ନିକଟରେ ପଡିଥିଲା l ଫଳରେ ୨୭ରୁ ଅଧିକ ଭକ୍ତ ଆହତ ହୋଇଛନ୍ତି। ଗୁରୁତରଙ୍କ ମଧ୍ୟରେ କିଛି ଶିଶୁ ରହିଥିବା ଜଣାପଡିଛି l ଆହତ ବ୍ୟକ୍ତି ଓ ଶିଶୁଙ୍କୁ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଗୁରୁତରଙ୍କୁ କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି। ଏକା ସଂଗେ ଅଧିକ ବାଣ ଫୁଟିବାରୁ ଘଟିଥିଲା ଅଘଟଣ। ହସ୍ପିଟାଲରେ ପହଞ୍ଚି ଆହତଙ୍କୁ ଭେଟିଛନ୍ତି ପୁରୀ ଜିଲ୍ଲାପାଳ।
ପୁରୀ : ପୁରୀ ନରେନ୍ଦ୍ର ପୁଷ୍କରିଣୀ ନିକଟରେ ଅଘଟଣ। ବାଣ ନିଆଁ ପଡି ୨୦ରୁ ଅଧିକ ଶ୍ରଦ୍ଧାଳୁ ଆହତ। ମହାପ୍ରଭୁ ନରେନ୍ଦ୍ର ପୁଷ୍କରିଣୀରେ ଚାପ ଖେଳିବା ସମୟରେ ବାଣ ଫୁଟାଯାଉଥିଲା l ବାଣ ଫୁଟି ନିଆଁ ଲୋକଙ୍କ ନିକଟରେ ପଡିଥିଲା l ଫଳରେ ୨୦ରୁ ଅଧିକ ଭକ୍ତ ଆହତ ହୋଇଥିଲେ। ଗୁରୁତରଙ୍କ ମଧ୍ୟରେ କିଛି ଶିଶୁ ରହିଥିବା ଜଣାପଡିଛି l ଗୁରୁତର ଆହତ ବ୍ୟକ୍ତି ଓ ଶିଶୁ ଙ୍କୁ ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଆହତଙ୍କ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି ।
ମୟୂରଭଞ୍ଜ : ଇଟାଭାଟି ଜମି ବିବାଦରୁ ତୁମୁଳକାଣ୍ଡ । ରାସ୍ତା ଅବରୋଧ ହଟାଇବାକୁ ଯାଇ ପୋଲିସ, ଗାଁ ଲୋକଙ୍କ ଆକ୍ରୋଶର ଶିକାର । ପଥରମାଡରେ ପୁଲିସ ଭ୍ୟାନ ଭାଙ୍ଗିବା ସହ ଏସଡିପିଓ ଓ ଆଇଆଇସି ଗୁରୁତର ଆହତ। ମୟୂରଭଞ୍ଜ ଜିଲ୍ଲା ବଡ଼ସାହି ଥାନା ଅଧୀନ ବେଲପାଳ ଗାଁରେ ଘଟିଛି ତୁମୁଳକାଣ୍ଡ । ଏକ ଇଟାଭାଟି ଜମି ମାଲିକାନାକୁ ନେଇ ଦୁଇ ଗୋଷ୍ଠୀ ମଧ୍ୟରେ ସୃଷ୍ଟି ହୋଇଥିଲା ବିବାଦ । ବିବାଦକୁ ନେଇ ଗୋଟିଏ ଗୋଷ୍ଠୀର ସମର୍ଥକ ବଡସାହି-ବେତନଟୀ ରାସ୍ତାକୁ ଦୀର୍ଘ ସମୟ ଅବରୋଧ କରିଥିଲେ । ପ୍ରଶାସନ ସେମାନଙ୍କୁ ନିବୃତ୍ତ କରିବାରେ ବିଫଳ ହେବାରୁ ବେତନଟୀ ଏସଡିପିଓ ସୁଦର୍ଶନ ଦାଶ ଓ ବଡ଼ସାହି ଆଇଆଇସି ଉମାଶଙ୍କର ନାୟକ ପୁଲିସ ଫୋର୍ସ ସହିତ ଘଟଣାସ୍ଥଳରେ ପହଞ୍ଚି ଥିଲେ । ତେବେ ଅବରୋଧକାରୀ ମାନେ ସେମାନଙ୍କୁ ଆକ୍ରମଣ କରିବାରୁ ପୁଲିସ ଭ୍ୟାନ ଭାଙ୍ଗି ରୁଜି ଯାଇଥିବା ବେଳେ ଦୁଇ ପୁଲିସ୍ ଅଧିକାରୀଙ୍କ ସମେତ ଅନେକ ଆହତ ହୋଇଛନ୍ତି । ଆହତମାନଙ୍କୁ ବଡ଼ସାହି ଡାକ୍ତରଖାନାରେ ପ୍ରାଥମିକ ଚିକିତ୍ସା ପରେ ବାରିପଦା ଜିଲ୍ଲା ମୁଖ୍ୟ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି । ବେଲପାଳ ଗାଁର ଜଣେ ବ୍ୟକ୍ତି ଏକ ଫ୍ଲାଏଆସ ଇଟାଭାଟିର ବ୍ୟାଙ୍କ ଋଣ ପରିଶୋଧ କରିନପାରିବାରୁ ବ୍ୟାଙ୍କ ତାକୁ ନିଲାମ କରିଥିଲା । ଗାଁର ଅନ୍ୟଜଣେ ବ୍ୟକ୍ତି ଏହି ଇଟା ଭାଟିକୁ ଲିଜରେ ନେଇ ଦଖଲରେ ରଖିଥିଲେ । ତେବେ ଋଣଖିଲାପକାରୀ ଉଚ୍ଚନ୍ୟାୟାଳୟରେ ଘଟଣାକୁ ନେଇ ଫେରାଦ ହୋଇଥିଲେ । ଉଚ୍ଚ ନ୍ୟାୟଳୟ ମଧ୍ୟ ବିଚାର ଶେଷ ପର୍ଯ୍ୟନ୍ତ ଫ୍ଲାଏଆସକୁ ପୂର୍ବମାଲିକଙ୍କୁ ପୁନଃ ଦଖଲ ଆଦେଶ ଦେଇଥିଲେ । ପ୍ରଶାସନ ଓ ପୁଲିସକୁ ସହଯୋଗ ପାଇଁ ମଧ୍ୟ ନିର୍ଦ୍ଦେଶ ଦେଇଥିଲେ । ତେବେ ବୁଧବାର ସକାଳେ ଇଟାଭାଟି ସ୍ଥାନରେ ପୂର୍ବ ମାଲିକ ବାଡ ଘେରିବା ସମୟରେ ବର୍ତ୍ତମାନ ଦଖଲରେ ଥିବା ମାଲିକଙ୍କ ସହିତ ଗଣ୍ଡଗୋଳ ଘଟିଥିଲା । ଉଭୟ ଆହତ ହେବା ସହିତ ବଡସାହି ଥାନାରେ ଅଭିଯୋଗ କରିଥିଲେ । ଏହାକୁ କେନ୍ଦ୍ର କରି ଗାଁରେ ଉତ୍ତେଜନା ବୃଦ୍ଧି ପାଇବା ସହିତ ଦଖଲରେ ଥିବା ମାଲିକଙ୍କୁ ଗିରଫ ଦାବିରେ ପୂର୍ବ ମାଲିକଙ୍କ ସମର୍ଥକ ବେଲପାଳ ଛକରେ ରାସ୍ତାରୋକ କରିଥିଲେ । ଦିନବେଳେ ବଡ଼ସାହି ବିଡ଼ିଓ ଓ ତହସିଲଦାର ଘଟଣାସ୍ଥଳରେ ପହଞ୍ଚି ରାସ୍ତାରୋକ ହଟାଇବାରେ ବିଫଳ ହୋଇଥିଲେ । ପରେ ଘଟଣା ସ୍ଥଳରେ ପୋଲିସ ଫୋସ ପହଞ୍ଚିବା ପରେ ପୁଣି ରାସ୍ତାରୋକ ହଟାଇବାକୁ ଚେଷ୍ଟା କରାଯାଇଥିଲା । ଏଥିରେ ଲୋକେ ଉତକ୍ଷିପ୍ତ ହୋଇ ପୋଲିସକୁ ଆକ୍ରମଣ ଓ ଢେଲା ପଥର ମାଡ଼ କରିଥିଲେ । ଗାଁରେ ଏବେ ବି ଉତ୍ତେଜନ ଲାଗିରହିଛି ।
ଖୋର୍ଦ୍ଧା : ଲୁଚିଛି ନା ଗୋଡ଼ ଦିଟା ଦିଶୁଛି । ଯେତେ ଲୁଚେଇଲେ ଲୁଚୁନି ବିଜେପିର ଖୋର୍ଦ୍ଧା ବିଧାୟକ ପ୍ରାର୍ଥୀ ପ୍ରଶାନ୍ତ ଜଗଦ୍ଦେବଙ୍କ ଗୁଣ୍ଡାଗିରି । ଅଧା ସିସିଟିଭି ଭିଡିଓ ଛାଡ଼ି ଜଗଦ୍ଦେବଙ୍କ ଭଳି ଅପରାଧୀଙ୍କୁ ସୁରକ୍ଷା ଦେବାକୁ ଉଦ୍ଯମ କରୁଥିଲେ ବିଜେପିର ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀ । ହେଲେ ଆମେ ଦେଖାଉଛୁ ଜଗଦ୍ଦେବଙ୍କ ଗୁଣ୍ଡାଗିରିର ଲାଇଭ ଫୁଟେଜ୍ । ଦେଖନ୍ତୁ କିଭଳି ଗଲା ୨୫ ତାରିଖରେ ବେଗୁନିଆ ବୋଲଗଡ ନିର୍ବାଚନ ମଣ୍ଡଳୀର ୧୧୪ ନମ୍ବର ବୁଥରେ ଗୁଣ୍ଡାଗିରି ଚଳାଇଥିଲେ ପ୍ରଶାନ୍ତ ଜଗଦ୍ଦେବ । ଲୋକଙ୍କୁ ଧମକ ଦେବା ସହ ଯିଏ ତାଙ୍କୁ ବାଧା ଦେଉଛି ତାକୁ ଅଶାଳୀନ ଭାଷାରେ ଗାଳି ବି ଦେଉଛନ୍ତି । ଲୋକଙ୍କୁ ଠେଲାପେଲା କରି ପ୍ରିଜାଇଡିଂ ଅଫିସରଙ୍କୁ ଧମକ ଦେଉଛନ୍ତି । ସେଦିନ ଜଗଦ୍ଦେବ କିଭଳି ଗୁଣ୍ଡାଗିରି କରିଥିଲେ ଏହି ଭିଡିଓ ହେଉଛି ତାହାର ପ୍ରମାଣ । ଅଭିଯୋଗ ଅନୁସାରେ ୧୧୪ ନମ୍ବର ବୁଥକୁ ଭୋଟ ଦେବାକୁ ଯାଇଥିଲେ ପ୍ରଶାନ୍ତ । ଲୋକ ଧାଡ଼ିରେ ଠିଆ ହୋଇଥିବାବେଳେ ମନଇଚ୍ଛା ଆଗକୁ ଯାଇ ପ୍ରଥମେ ଭୋଟ ଦେବେ ବୋଲି କହିଥିଲେ । ହେଲେ ଭୋଟର ଏହାକୁ ବିରୋଧ କରିବାରୁ ନାଲିଆଖି ଦେଖାଇଥିଲେ ଜଗଦ୍ଦେବ । ଯିଏ ବିରୋଧ କଲା ତାକୁ ଠେଲାପେଲା କରି ଗାଳିଗୁଲଜ ବି କରିଥିଲେ । ଏପରିକି ପ୍ରିଜାଇଡିଂ ଅଫିସରଙ୍କୁ ବି ଧମକ ଦେଇଥିଲେ ।
ଶେଷରେ ଇଭିଏମ ଫୋପାଡ଼ିବା ଅଭିଯୋଗ ବି ହୋଇଛି । ଏହି ସମୟରେ ସେଠାରେ ଉପସ୍ଥିତ ଭୋଟର ହିଁ ଜଗଦ୍ଦେବଙ୍କ ଗୁଣ୍ଡାଗିରିକୁ ମୋବାଇଲରେ କଏଦ କରିଥିଲେ । ଯାହାକି ଏବେ ଭାଇରାଲ ହେବାରେ ଲାଗିଛି । ବୁଥ ଭିତରେ ପଶି ପ୍ରିଜାଇଡିଂ ଅଫିସରଙ୍କୁ ଧମକାଇବା, ଇଭିଏମ ଫୋପାଡିବା, ସର୍ବସାଧାରଣ ସମ୍ପତ୍ତି ନଷ୍ଟ କରିବା ଆଦି ସଂଗୀନ ଅଭିଯୋଗରେ ଗିରଫ ହୋଇ ଜେଲରେ ଅଛନ୍ତି ପ୍ରଶାନ୍ତ । ଜଗଦ୍ଦେବଙ୍କ ବିରୋଧରେ ସବୁ ତଥ୍ଯପ୍ରମାଣ ଥିବା ସତ୍ତ୍ବେ ଗୁଣ୍ଡାଗର୍ଦ୍ଦିର ପୋଷ୍ଟରବୟକୁ କର୍ମବୀର ଆଖ୍ଯା ଦେଉଛି ବିଜେପି । ବିଜେପିର ଭୁବନେଶ୍ବର ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀ ଏଭଳି ଗୁଣ୍ଡାଙ୍କ ପାଇଁ ଦରଦ ଦେଖାଉଛନ୍ତି । ପ୍ରଶାନ୍ତ ଜଗଦ୍ଦେବଙ୍କୁ ସୁରକ୍ଷା ଦେବାକୁ ଭୁବନେଶ୍ବର ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀ ହୀନଉଦ୍ଯମ ଚଳାଇଛନ୍ତି । ସିସିଟିଭି ଭିଡିଓକୁ ଏଡିଟ କରି ଜଣେ ଗୁଣ୍ଡାଙ୍କୁ ସଂଗ୍ରାମୀ କହୁଛନ୍ତି । ହେଲେ ଏହି ଭିଡିଓ ସାମ୍ନାକୁ ଆସିବା ପରେ ପ୍ରଶାନ୍ତଙ୍କ ଅସଲ ଚରିତ୍ର ସହ ଅପରାଜିତାଙ୍କ ମିଛ ଧରାପଡ଼ିଯାଇଛି ।
ପାରାଦୀପ : ଓଡିଶାରେ ଚତୁର୍ଥ ତଥା ଶେଷ ପର୍ଯ୍ୟାୟ ନିର୍ବାଚନ ପାଇଁ କାଲି ସରିବ ପ୍ରଚାର। ହାତରେ ଆଉ ମାତ୍ର ଗୋଟିଏ ଦିନ ଥିବା ବେଳେ ପ୍ରଚାରକୁ ଜୋରଦାର କରିଛନ୍ତି ପ୍ରାର୍ଥୀ। ଜଗତସିଂହପୁର ର ପାରାଦୀପ ନିର୍ବାଚନ ମଣ୍ଡଳୀ ର ବିଜେଡି ପ୍ରାର୍ଥୀ ଗୀତାଞ୍ଜଳୀ ରାଉତରାୟ ଆଜି ବିଭିନ୍ନ ପଞ୍ଚାୟତ ବୁଲି ପ୍ରଚାର କରିଛନ୍ତି। ଏହି ଅଞ୍ଚଳ ତାଙ୍କ ଶ୍ବଶୁର ଦାମ ରାଉତଙ୍କ ଗଡ ବୋଲି କୁହାଯାଉଥିବା ବେଳେ ପୂର୍ବରୁ ସ୍ବାମୀ ସମ୍ବିତ ରାଉତରାୟ ବିଧାୟକ ଭାବେ ଲୋକଙ୍କ ସେବା କରିଛନ୍ତି। ଚଳିତ ଥର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହିଳାଙ୍କୁ ଗୁରୁତ୍ୱ ଦେଇ ପ୍ରାର୍ଥୀ କରିଥିବାରୁ ଅଞ୍ଚଳବାସୀ ବେଶ ଉତ୍ସାହିତ ଅଛନ୍ତି। ଗତ ନିର୍ବାଚନ ଠାରୁ ଏହି ନିର୍ବାଚନ ରେ ଅଧିକ ବ୍ୟବଧାନରେ ଜିତିବେ ବୋଲି ଗୀତାଞ୍ଜଳୀ ଆଶା ରଖିଛନ୍ତି। ଏଠି ବାହାର ରାଜ୍ୟର ଯେତେ ନେତା ଆଶିକି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅଶାଳୀନ ମନ୍ତବ୍ୟ ଦେଲେ କିଛି ଫରକ ପଡିବନି। ପାରାଦୀପ ରେ ସମସ୍ତେ ବିଜୁ ପରିବାର। ମୁଖ୍ୟମନ୍ତ୍ରୀ ଙ୍କୁ ସମସ୍ତେ ଭଲପାଆନ୍ତି ବୋଲି ଗୀତାଞ୍ଜଳୀ କହିଛନ୍ତି।
ବାଲେଶ୍ୱର : ନୀଳଗିରି ବିଜେଡି ବିଧାୟକ ପାର୍ଥି ସୁକାନ୍ତ ନାୟକ ଓ ବାଲେଶ୍ୱର ସାଂସଦ ପାର୍ଥି ଲେଖାଶ୍ରୀ ଙ୍କ ପାଇଁ ପ୍ରଚାର ମଇଦାନ ରେ ଏବେ ଷ୍ଟାର ପ୍ରଚାରକ ସୈଲେନ୍ଦ୍ର ଏବଂ ସୂର୍ୟମୟି । ହଜାର ହଜାର ସମର୍ଥକ ଙ୍କ ସହ କରିଛନ୍ତି ରୋଡ ସୋ। ଗୁହିରା ବିର୍ଷାମୁଣ୍ଡାଛକ ରୁ ବରହମପୁର ଶନିମନ୍ଦିର ପର୍ଯ୍ୟନ୍ତ କଲେ ବିଶାଳ ରୋଡ ସୋ। ରାସ୍ତାଘାଟ ପାଲଟିଲା ବିଜୁ ଜନତା ଦଳର ସ୍ଳୋଗାନ ରେ ଜନ ସମୁଦ୍ର। ନିର୍ବାଚନ କୁ ଆଉ ହାତରେ ଦୁଇଦିନ ଥିବା ବେଳେ ଖରା କୁ ଖାତିର ନ କରି ବିଜେଡ଼ି ବିଧାୟକ ପାର୍ଥି ସୁକାନ୍ତ ନାୟକ ଓ ବାଲେଶ୍ୱର ସାଂସଦ ପାର୍ଥିନୀ ଲେଖାଶ୍ରୀ ଙ୍କ ପାଇଁ ରୋଡ ସୋ କରି ବଣସୀମା ଅଞ୍ଚଳରେ ବିଜେଡ଼ି ଦେଖାଇଲା ଦମ୍। ଏ ନେଇ ନୀଳଗିରି ବଣସିମା ଅଞ୍ଚଳରୁ ଅଧିକ ସୂଚନା ଦେଉଛନ୍ତି ଆମ ନୀଳଗିରି ପ୍ରତିନିଧି ସୁକାନ୍ତ ଦାସ।
କୋଣାର୍କ : ପ୍ରଚାର ଶେଷ ପୂର୍ବରୁ ଅଧିକ ନିକଟତର ହେଉଛନ୍ତି ପ୍ରାଥୀ । ବିଜେଡି ବିଧାୟକ ପ୍ରାଥୀ ଙ୍କ ରାତିରେ ଜୋରଦାର ପ୍ରଚାର ଓ କ୍ୟାମ୍ପେନ । ଶେଷ ପର୍ଯ୍ୟାୟ ନିର୍ବାଚନ ପାଈଁ ଜୋରଦାର ପ୍ରଚାର ଚାଲିଛି । ଜୟ ଜୟକାର ନାରାରେ କମ୍ପୁଛି ମୈଦାନ। ପ୍ରାଥୀଙ୍କ ପ୍ରତିଶୃତି ପାହାଡ଼ରେ ଗଦଗଦ ଭୋଟର । କିଏ ଧନ୍ୟବାଦ ଦେଉଛି ତ କିଏ ଜଣାଉଛି କୃତଜ୍ଞତା । କାକଟପୁର ନିର୍ବାଚନ ମଣ୍ଡଳୀରେ ବିଜୁ ଜନତା ଦଳର ବିଧାୟକ ପ୍ରାଥୀ ତୁଷାରକାନ୍ତି ବେହେରା ବିଭିନ୍ନ ପଂଚାୟତରେ ବାଇକ ଶୋଭାଯାତ୍ରା ରେ ପ୍ରଚାରକୁ ସରଗରମ କରିବା ସହ ଲୋକଙ୍କ ନିକଟରେ ପହଂଚୁଛନ୍ତି । ନିର୍ବାଚନ ଆଉ ଅଳ୍ପ ଦିନ ଥିବାରୁ ପ୍ରଚାର ମୈଦାନ ଜମୁଛି । ଲୋକଙ୍କ ମନ ଜିଣିବାକୁ ପ୍ରାଥୀଙ୍କ ଜମୁଛି କ୍ୟାମ୍ପେନ ଓ ରୋଡ଼ ସୋ । ଶାସକ ଦଳକୁ ମାତ ଦେବାକୁ ବିରୋଧୀ ଦଳ ପକ୍ଷରୁ କଡା ରଣନୀତି ପ୍ରସ୍ତୁତ କରୁଛନ୍ତି । କାକଟପୁର ନିର୍ବାଚନ ମଣ୍ଡଳୀ କାକଟପୁର ପଂଚାୟତରେ ସନ୍ଧ୍ୟା ସମୟରେ ବିଜେଡି ବିଧାୟକ ପ୍ରାଥୀ ତୁଷାରକାନ୍ତି ବେହେରାଙ୍କ ରୋଡ଼ସୋ । ଏ ସମ୍ପର୍କରେ ତୁଷାରକାନ୍ତି ବେହେରାଙ୍କ ସହ ଅଧିକ ଆଲୋଚନା କରିଛନ୍ତି ଆମ କୋଣାର୍କ ପ୍ରତିନିଧି ମାନସ ଖଣ୍ଡୁଆଳ ।
