ଇନ୍ଦୋରରେ ବିଷାକ୍ତ ପାନୀୟ ଜଳ ପ୍ରସଙ୍ଗ। ଘଟଣାରେ ମୃତକଙ୍କ ସଂଖ୍ୟା ୧୦ ହୋଇଥିବା ବେଳେ ୧୫୦୦ରୁ ଅଧିକ ଅସୁସ୍ଥ ବିଭିନ୍ନ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ତେଣେ ଇନ୍ଦୋର ମହାନଗର ନିଗମ କମିଶନର ଦିଲୀପ କୁମାର ଯାଦବଙ୍କୁ ପଦରୁ ହଟାଇଛନ୍ତି ମଧ୍ୟପ୍ରଦେଶ ସରକାର। ଏହା ସହ ଅତିରିକ୍ତ କମିଶନର ରୋହିତ ସିସୋନିୟାଙ୍କୁ ସସପେଣ୍ଡ କରାଯାଇଛି। ଅତିରିକ୍ତ ମୁଖ୍ୟ ଶାସନ ସଚିବ ସଞ୍ଜୟ ଦୁବେଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ସ୍ଥିତି ସମୀକ୍ଷା କରାଯାଇଛି। ତେଣେ ଭାଗୀରଥିପୁରାରେ ଡାଇରିଆ ବ୍ୟାପିବ ଯୋଗୁ ଆତଙ୍କ ସୃଷ୍ଟି ହୋଇଛି। ବିଭିନ୍ନ ସ୍ଥାନରେ ପାନୀୟ ଜଳର ଯାଞ୍ଚ ପ୍ରକ୍ରିୟା ଜାରି ରହିଛି। ଲୋକଙ୍କୁ ଟ୍ୟାଙ୍କର ଯୋଗେ ପାନୀୟ ଜଳ ଯୋଗାଇଦିଆଯାଉଛି। ଇନ୍ଦୋର ହେଉଛି ଦେଶର ସବୁଠୁ ସ୍ଵଚ୍ଛ ସହର। ହେଲେ ଏହି ସହରର ପାଣି ସମସ୍ୟା ଚିନ୍ତାର କାରଣ ହୋଇଛି। ମୃତକଙ୍କ ପରିବାରକୁ ୨ ଲକ୍ଷ ଲେଖାଏଁ ଅନୁକମ୍ପା ରାଶି ଘୋଷଣା କରିବା ସହିତ ମୁଖ୍ୟମନ୍ତ୍ରୀ ତିନି ଜଣିଆ କମିଟି ମଧ୍ୟ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି । ସେପଟେ ହାଇକୋର୍ଟ ମଧ୍ୟ ସରକାରଙ୍କୁ କଡ଼ା ଟିପ୍ପଣୀ କରିଛନ୍ତି । ପ୍ରଭାବିତଙ୍କୁ ତୁରନ୍ତ ବିଶୁଦ୍ଧ ପାନୀୟ ଜଳ ଯୋଗାଇବା ସହ ଚିକିତ୍ସା ସୁବିଧା ଯୋଗାଇ ଦେବାକୁ ନିର୍ଦ୍ଦେଶ ଦେଇଛନ୍ତି ।
KBC ସେଟରୁ ଦର୍ଶକଙ୍କୁ ଭାବବିହ୍ବଳ ବିଦାୟ ଦେଲେ ବିଗ ବି’
KBC ସେଟରୁ ଦର୍ଶକଙ୍କୁ ଭାବବିହ୍ବଳ ବିଦାୟ ଦେଲେ ବିଗ ବି’
ନନ୍ଦିଘୋଷ ବ୍ୟୁରୋ: ସୋନି ଟେଲିଭିଜନର ସବୁଠୁ ବଡ ଲୋକପ୍ରିୟ ପ୍ଲାଟଫର୍ମ ‘କୌନ ବନେଗା କରୋଡପତି’ ବା କେବିସିର ସିଜିନ ୧୭ ଶେଷ ହୋଇଛି । ଶୋ’ ସରିଥିବା ବେଳେ ବିଦାୟ ନେଇଛନ୍ତି ବିଗ ବି ଅମିତାଭ ବଚ୍ଚନ । କିନ୍ତୁ ଏଥରର ବିଦାୟ ସାଧାରଣ ନଥିଲା । କେବିସି ସିଜିନ ୧୭ର ଶେଷ ଏପିସୋଡ୍ରେ ଦର୍ଶକମାନଙ୍କୁ ବିଦାୟ ଦେବା ସମୟରେ ଭାବବିହ୍ବଳ ହୋଇଯାଇଥିଲେ ବିଗ ବି ।
ଶୋ’ର ଶେଷ ଦିନରେ, ଯେତେବେଳେ ମେଗାଷ୍ଟାର ଅମିତାଭ ବଚ୍ଚନ ତାଙ୍କର ବିଦାୟ ଭାଷଣ ଆରମ୍ଭ କରିଥିଲେ, ତାଙ୍କର ଧୀର କଣ୍ଠସ୍ୱର ଓ ଛଳଛଳ ଆଖି ଲକ୍ଷ ଲକ୍ଷ ଦର୍ଶକଙ୍କୁ ଭାବୁକ କରି ଦେଇଥିଲା । ସେ କହିଥିଲେ, ‘ଦେବୀଓ ଓ ସଦଜନୋ, କେବିସିର ଏହି ସିଜିନ ଶେଷ ହୋଇଗଲା। ଗୋଟିଏ ପରେ ଗୋଟିଏ, ପ୍ରତିଯୋଗୀଙ୍କ ଚେୟାର ଖାଲି ହୋଇଯିବ । ଷ୍ଟୁଡିଓ ସେଟ୍ରୁ ଦର୍ଶକ ସିଟ ଛାଡି ଦେବେ । ଆଜି ଯେଉଁ ଆଲୋକ ଜଳୁଛି ତାହା କାଲି ଅନ୍ୟ କାହା ପାଇଁ ଜଳିବ । କରତାଳି ମଧ୍ୟ ଅନ୍ୟ କାହା ପାଇଁ ବାଜିବ ।’
ଏହି ଅବସରରେ ଭାବ ପ୍ରବଣତାର ସହ ସେ କହିଥିଲେ, ମଞ୍ଚରେ ବିତାଇଥିବା ପ୍ରତ୍ୟେକ ମୁହୂର୍ତ୍ତର ମଜା ଉଠାଇଛି । ବିଦାୟ ବେଳେ ଶବ୍ଦ ପ୍ରାୟତଃ କମ୍ ପଡ଼ିଯାଏ । ଯେତେବେଳେ ଶବ୍ଦ କମ୍ ପଡ଼ିଯାଏ, ସେତେବେଳେ ସଙ୍ଗୀତର ଆଶ୍ରୟ ନେବା ଉଚିତ । କାରଣ ସଙ୍ଗୀତ ହିଁ ଏକ ମାଧ୍ୟମ ଯାହା ସିଧାସଳଖ ହୃଦୟକୁ ଛୁଇଁଥାଏ ।
ଆଗକୁ ସେ କହିଥିଲେ, ମୋ ଜୀବନର ଏକ ତୃତୀୟାଂଶରୁ ଅଧିକ ସମୟ ଆପଣମାନଙ୍କ ସହିତ ବିତାଇବା ମୋ ପାଇଁ ସମ୍ମାନ ବିଷୟ । ଅମିତାଭଙ୍କ କଥା ଶୁଣି କେବଳ ଷ୍ଟୁଡିଓରେ ଉପସ୍ଥିତ ଥିବା ଲୋକ ନୁହଁନ୍ତି ଟିଭି ସାମ୍ନାରେ ବସିଥିବା ଲକ୍ଷ ଲକ୍ଷ ପ୍ରଶଂସକଙ୍କ ଆଖିରେ ଲୁହ ଆଓିଯାଇଥିଲା ।
ଏହାପରେ ସ୍କ୍ରିନରେ ଏକ ସ୍ୱତନ୍ତ୍ର ଭିଡିଓ ପ୍ରଦର୍ଶିତ ହୋଇଥିଲା । ଯେଉଁଥିରେ ପ୍ରଥମ ସିଜିନରୁ ଆରମ୍ଭ କରି ବର୍ତ୍ତମାନ ସିଜିନ ପର୍ଯ୍ୟନ୍ତ ସ୍ମରଣୀୟ ମୁହୂର୍ତ୍ତ, ପ୍ରତିଯୋଗୀଙ୍କ ସଂଘର୍ଷ ଓ ଚଳିତ ସିଜିନର କୋଟିପତି ବିଜେତାଙ୍କ ଭିଡିଓ ପ୍ରଦର୍ଶିତ ହୋଇଥିଲା । ଏହି ଭିଡିଓ ଦେଖି ଅମିତାଭ ବଚ୍ଚନ ନିଜେ ନିଜ ଲୁହ ରୋକିପାରି ନଥିଲେ । ଭିଡିଓ ଶେଷ ହେବା ମାତ୍ରେ, ଷ୍ଟୁଡିଓରେ ଉପସ୍ଥିତ ସମସ୍ତ ଦର୍ଶକ ଠିଆ ହୋଇ ତାଙ୍କୁ ଅଭିବାଦନ ଜଣାଇଥିଲେ । ଆଉ ହୃଦୟର ସହ, ବିଗ୍ ବି ମଧ୍ୟ ସମସ୍ତଙ୍କୁ ଧନ୍ୟବାଦ ଜଣାଇବା ସହ ହସି ହସି ବିଦାୟ ନେଇଥିଲେ ।
ଗତ ୨୫ ବର୍ଷ ଧରି ଚାଲିଥିବା ଏହି ଶୋ’ ପୁଣି ଥରେ ପ୍ରମାଣ କରିଛି ଯେ କେବିସି କେବଳ ଏକ ଶୋ’ ନୁହେଁ । ଏହା ଭାରତ ଓ ଭାରତୀୟଙ୍କ ଭାବନାର ଏକ ଅବିଚ୍ଛେଦ ଅଂଶ ।
ଭେନେଜୁଏଲା ରାଜଧାନୀ କରାକାସରେ ଲଗାତର ବିସ୍ଫୋରଣ
ଭେନେଜୁଏଲା ରାଜଧାନୀ କରାକାସର ଲଗାତର ବିସ୍ଫୋରଣ। କିଛି ଦିନ ଧରି ଭେନେଜୁଏଲାକୁ ଟାର୍ଗେଟ କରିଆସୁଥିଲା ଆମେରିକା। କମ୍ ଉଚ୍ଚତାରେ ଉଚ୍ଚତାରେ କିଛି ବିମାନ ଉଡୁଥିବା ସୂଚନା ମିଳିଛି। କରାକାସରେ ୭ଟି ବିସ୍ଫୋରଣ ଘଟିଥିବା ଜଣାଯାଇଛି। ଭେନେଜୁଏଲା ଉପରେ ଗ୍ରାଉଣ୍ଡ ଷ୍ଟ୍ରାଇକ କରିବାକୁ ପୂର୍ବରୁ ଧମକ ଦେଇଥିଲେ ଆମେରିକା ରାଷ୍ଟ୍ରପତ ଡୋନାଲଡ ଟ୍ରମ୍ପ। କ୍ଷମତା ହସ୍ତାନ୍ତର ଓ ଡ୍ରଗ୍ସ କାରବାର ପ୍ରସଙ୍ଗରେ ଉତକ୍ଷିପ୍ତ ହୋଇଥିଲେ ଟ୍ରମ୍ପ। ଭୋର ପ୍ରାୟ ୨ଟାରେ ବିସ୍ଫୋରଣ ଶବ୍ଦ ଶୁଭିଥିବା ସୂଚନା ମିଳିଛି। ବିସ୍ଫୋରଣ ପରେ ସହରବାସୀ ନିଜ ନିଜ ଘରକୁ ଆତଙ୍କରେ ଚାଲିଯାଇଥିବା ସୂଚନା ମିଳିଛି। ତେବେ ବିସ୍ଫୋରଣର ପ୍ରକୃତ କାରଣ ସ୍ପଷ୍ଟ ହୋଇନାହିଁ। କିଛି ଦିନ ତଳେ ଭେନେଜୁଏଲା ଅନ୍ତର୍ଗତ କାରବିୟାନ ଅଞ୍ଚଳରେ ଆମେରିକା ମୁତୟନ କରିଥିଲା ୟୁଏସ ନାଭି ଟାସ୍କଫୋର୍ସ। କରାକାସର ବିଭିନ୍ନ ସ୍ଥାନରେ କିଛି ଏୟାରପ୍ଲେନ ଉଡୁଥିବା ଦେଖିବାକୁ ମିଳିଛି। ଭେନେଜୁଏଲା ରାଷ୍ଟ୍ରପତି ନିକୋଲାସ ମାଦୁରୋଙ୍କୁ ହଟାଇବା ଲାଗି କିଛି ଦିନ ଧରି ନାଲିଆଖି ଦେଖାଇଆସୁଛନ୍ତି ଟ୍ରମ୍ପ। ଏହା ସହ ଭେନେଜୁଏଲାର ବିଭିନ୍ନ ଅଞ୍ଚଳରେ ନିଜର ସାମରିକ ଆଧିପତ୍ୟ ବିସ୍ତାର କରିଆସିଛି ଆମେରିକା।
ବାୟୁ ପ୍ରଦୂଷଣରେ ଦିଲ୍ଲୀକୁ ପଛରେ ପକାଇଲା ଓଡ଼ିଶା: ଏନେଇ କ’ଣ କହିଲେ BMC ମେୟର ?
ବାୟୁ ପ୍ରଦୂଷଣକୁ ନେଇ ଦିଲ୍ଲୀ ସାରା ଦେଶରେ ବେଶ୍ ବଦନାମ ହୋଇଥିବା ବେଳେ ଏବେ ଦିଲ୍ଲୀକୁ ପଛରେ ପକାଇ ଦେଇଛି ଓଡ଼ିଶା। ରାଜ୍ୟର ୭ଟି ସହର ମଧ୍ୟ ଦିଲ୍ଲୀକୁ ପଛରେ ପକାଇ ଦେଇଛନ୍ତି। ଭୁବନେଶ୍ୱର, କଟକ, ବାଲେଶ୍ୱର, ବାରିପଦା, ଅନୁଗୁଳ, ତାଳଚେର ଓ କେନ୍ଦୁଝର ବାୟୁ ସୂଚକାରେ ନିୟମିତ ଭାବେ 300 ପାର୍ କରୁଛନ୍ତି। ଯାହା ଅତି ଖରାପ। ରାସ୍ତା କାମ, ନିର୍ମାଣ, ଶିଳ୍ପ ସଂସ୍ଥାରୁ ନିର୍ଗତ ଧୂଆଁ ଏହାର ପ୍ରମୁଖ କାରଣ। ଶୀତ ଦିନ ଯୋଗୁଁ ଧୂଳି ତଳେ ରହୁଥିବାରୁ ନିଷ୍କାସନ ହୋଇ ପାରୁ ନଥିବାରୁ ମଧ୍ୟ ପ୍ରଦୂଷଣ ହେଉଛି। ଖରାପ ରାସ୍ତା, ଟ୍ରାଫିକ ଭିଡ଼ ଓ ଗାଡି ମୋଟରରୁ ନିର୍ଗତ ଧୂଆଁ ବି ବାୟୁମଣ୍ଡଳକୁ ପ୍ରଦୂଷିତ କରୁଛି। ଜଳ ସିଞ୍ଚନ, ମେକାନିକାଲ ସୁଇପର ପରି ବ୍ୟବସ୍ଥା କରିବାକୁ ବାରମ୍ବାର ପୌର ସଂସ୍ଥା ଗୁଡିକୁ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଚିଠି ଲେଖୁଛି। ମେକାନିକାଲ ସୁଇପର ଫ୍ରିକୁଏନସି ବୃଦ୍ଧି କରିବାକୁ ବି କୁହାଯାଇଛି।
ତେବେ ପ୍ରଦୂଷଣରେ ଦିଲ୍ଲୀକୁ ଭୁବନେଶ୍ଵର ଟକ୍କର ଦେବା ପରେ ବିଏମସି ମେୟର ସୁଲୋଚନା ଦାସ କହିଛନ୍ତି, ଭୁବନେଶ୍ୱରର AQI ଦିଲ୍ଲୀ ସହିତ ସମାନ ହେଲାଣି। ପ୍ରଦୂଷଣର ମାତ୍ରା ବେଶ୍ ବୃଦ୍ଧି ହୋଇ। ସହର ପରିମଳ ବ୍ୟବସ୍ଥା ମଧ୍ୟ ପ୍ରଦୂଷଣ ବଢ଼ାଇବାରେ ସହାୟକ ହେଉଛି। ଏଣୁ ସହର କିଭଳି ସ୍ୱଚ୍ଛ ରହିବ, ପରିମଳ ବ୍ୟବସ୍ଥା କିଭଳି ଆଉରି ସୁଦୃଢ଼ ହେବ, ବିଏମସି ତାଉପରେ ନଜର ଦେଉଛି । ସହର ଭିତରେ ଥିବା ଟେମ୍ପୋରାରି ଟ୍ରାନଜିଟ ଷ୍ଟେସନ- TTSକୁ ମଧ୍ୟ ଖୁବ୍ ଶୀଘ୍ର ସ୍ଥାନାନ୍ତର କରିବା ପାଇଁ ଯୋଜନା କରୁଛି ବିଏମସି। ପରିମଳ ବ୍ୟବସ୍ଥାରେ ସୁଧାର ଆସିଲେ ପ୍ରଦୂଷଣ ମଧ୍ୟ କମିବ ।
IIT ହାଇଦ୍ରାବାଦର ୨୧ ବର୍ଷୀୟ ଛାତ୍ରଙ୍କୁ ମିଳିଲା ୨.୫ କୋଟିର ଜବ୍ ଅଫର
IIT ହାଇଦ୍ରାବାଦର ଶେଷ ବର୍ଷର ଜଣେ ଛାତ୍ର ୨.୫ କୋଟିର ଅନ୍ତରାଷ୍ଟ୍ରୀୟ ଜବ୍ ଅଫର ପାଇଛନ୍ତି । ଗୋଟିଏ ପଟେ ହାୟରିଂ ସିଜିନ ମନ୍ଥର ରହିଥିବା ବେଳେ ଅନ୍ୟପଟେ ଏହି ଛାତ୍ର ଜଣଙ୍କ ତାଙ୍କର ଶିକ୍ଷାନୁଷ୍ଠାନରେ ଇତିହାସ ରଚିଛନ୍ତି । ଆଇଆଇଟି ହାଇଦ୍ରାବାଦର କ୍ୟାମ୍ପସ ୨୦୦୮ ମସିହାରେ ଆରମ୍ଭ ହୋଇଥିବା ବେଳେ ଆଜି ପର୍ଯ୍ୟନ୍ତ କୌଣସି ଛାତ୍ର ଏତେ ବଡ଼ ପ୍ୟାକେଜ୍ ପାଇନଥିଲେ । ଜଣେ ୨୧ ବର୍ଷୀୟ କମ୍ପ୍ୟଟର ସାଇନ୍ସ ଛାତ୍ର ଏହି ପ୍ୟାକେଜ୍ ଅଫର ପାଇଛନ୍ତି ।
ଏହି ଜବ୍ ଅଫର ପାଇ ରେକର୍ଡ କରିଛନ୍ତି ବି-ଟେକ ଫାଇନାଲ ବର୍ଷର ଛାତ୍ର ଏଡଓ୍ବାର୍ଡ ନାଥନ ଭର୍ଗିସ । ସେ କମ୍ପ୍ୟୁଟର ଇଞ୍ଜିନିୟରିଂର ଶେଷ ବର୍ଷର ଛାତ୍ର ଅଟନ୍ତି । ସେ ଏବେ ଗ୍ଲୋବାଲ ଟ୍ରେଡିଂ ଫାର୍ମ Optiverରେ ଜଣେ ସଫ୍ଟଓ୍ବେର ଇଞ୍ଜିନିୟର ଭାବେ କାମ କରିବେ । ଆସନ୍ତା ଜୁଲାଇ ମାସରୁ ଏଡଓ୍ବାର୍ଡ ନେଦରଲାଣ୍ଡ ସ୍ଥିର ଏହି କମ୍ପାନୀରେ ଯୋଗଦେବେ । ସବୁଠାରୁ ବଡ଼ କଥା ହେଉଛି, ଏକ ସମର ଇଣ୍ଟର୍ଣ୍ଣଶିପ ପରେ ଏହା ଏକ ପ୍ରି-ପ୍ଲେସମେଣ୍ଟ ଅଫର ଆସିଥିଲା । IITH ଛାତ୍ରଙ୍କ ପାଇଁ ଏହା ସବୁଠାରୁ ବଡ଼ ପ୍ୟାକେଜ ବୋଲି ଶିକ୍ଷାନୁଷ୍ଠାନ ତରଫରୁ କୁହାଯାଇଛି । ଏହା ପୂର୍ବରୁ ୨୦୧୭ରେ ୧ କୋଟି ପ୍ୟାକେଜ ରେକର୍ଡ ରହିଥିଲା । ଏଡଓ୍ବାର୍ଡ Optiverରେ ଦୁଇ ମାସର ଇଣ୍ଟର୍ଣ୍ଣଶିପ କରିଥିଲେ । ହାଇଦ୍ରାବାଦରେ ଜନ୍ମଗ୍ରହଣ କରିଥିବା ଏଡଓ୍ବାର୍ଡ ବେଙ୍ଗାଲୁରୁରେ ୭ମରୁ ଦ୍ବାଦଶ ପର୍ଯ୍ୟନ୍ତ ପାଠ ପଢ଼ିଥିଲେ ।
୨୦୨୬ର ପ୍ରଥମ ଦିନିକିଆ ସିରିଜ ପାଇଁ ଟିମ୍ ଇଣ୍ଡିଆ ଘୋଷଣା ଆଜି, କାହାକୁ ମିଳିବ ସ୍ଥାନ ?
୨୦୨୬ର ପ୍ରଥମ ଦିନିକିଆ ସିରିଜ ପାଇଁ ଟିମ୍ ଇଣ୍ଡିଆ ଘୋଷଣା ଆଜି, କାହାକୁ ମିଳିବ ସ୍ଥାନ ?
ନନ୍ଦିଘୋଷ ବ୍ୟୁରୋ: ନୁଆବର୍ଷ ୨୦୨୬ର ପ୍ରଥମ ଦିନିକିଆ ସିରିଜ ପାଇଁ ଭାରତୀୟ ଟିମ୍ ଘୋଷଣା ହେବ । ଆଜି ଅଜିତ ଅଗରକରଙ୍କ ଅଧ୍ୟକ୍ଷତାରେ ବସିବାକୁ ଥିବା ବିସିସିଆଇର ବରିଷ୍ଠ ପୁରୁଷ ଚୟନ କମିଟି ବୈଠକ ବସିବ । ଯେଉଁଥିରେ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜ ପାଇଁ ଭାରତୀୟ ଟିମ୍ ଚୟନ କରାଯିବା ସହ ଘୋଷଣା କରାଯିବ । ଆଗକୁ ଟି୨୦ ବିଶ୍ବକପ୍ ଥିବାରୁ ଏହି ଦିନିକିଆ ସିରିଜ ଏତେ ଗୁରୁତ୍ବପୂର୍ଣ୍ଣ ହୋଇ ନଥିଲେ ବି କିଛି ଖେଳାଳିଙ୍କ କ୍ରିକେଟ ଭବିଷ୍ୟତ ପାଇଁ ଗୁରୁତ୍ବ ରହିଛି ।
୧୧ ଜାନୁଆରୀରୁ ନ୍ୟୁଜିଲିଣ୍ଡ ଓ ଭାରତ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ସିରିଜ ଖେଳାଯିବ । ଆଉ ଏଥିପାଇଁ ଟିମ୍ ଇଣ୍ଡିଆ ଘୋଷଣା ଉପରେ ସମସ୍ତଙ୍କ ନଜର ରହିଛି । ଗତ ଦୁଇଟି ସିରିଜ ପରି ଏଥର ଫୋକସରେ ରୋହିତ ଶର୍ମା ଏବଂ ବିରାଟ କୋହଲି ନାହାନ୍ତି । ହେଲେ ଏମିତି କିଛି ଖେଳାଳିଙ୍କ ଉପରେ ନଜର ରହିଛି ଯେଉଁମାନେ ନିୟମିତ ଟିମରୁ ଇନ, ଆଉଟ୍ ହେଉଚନ୍ତି । ଆଉ ଏମାନଙ୍କ ମଧ୍ୟରେ ଦୁଇଟି ବଡ଼ ନାଁ ରିଷଭ ପନ୍ତ ଏବଂ ମହମ୍ମଦ ସାମି ।
ପନ୍ତ-ଇଶାନ ନା ଜୁରେଲ; କାହାକୁ ମିଳିବ ସୁଯୋଗ ?
ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜରେ ପନ୍ତ ଭାରତୀୟ ଟିମରେ ଥିଲେ ବି ଗୋଟିଏ ହେଲେ ମ୍ୟାଚ୍ ଖେଳିବାକୁ ସୁଯୋଗ ପାଇ ନଥିଲେ । ସୂଚନା ମିଳୁଛି ନ୍ୟୁଜିଲାଣ୍ଡ ବିପକ୍ଷରେ ତାଙ୍କୁ ପ୍ଲେଇଂ ଇଲେଭେନରେ ଦେଖିବା ତ ଦୂରର କଥା, ତାଙ୍କ ଚୟନ ବି ହୋଇ ନପାରେ । ତାଙ୍କ ସ୍ଥାନରେ ଚୟନକର୍ତ୍ତା ଇଶାନ କିଷାନଙ୍କୁ ଟିମରେ ନେଇପାରନ୍ତି । ସେ ଜବରଦସ୍ତ ଫର୍ମରେ ଥିବା ବେଳେ ଟି୨୦ ବିଶ୍ବକପ୍ ପାଇଁ ଟିକେଟ ହାସଲ କରିସାରିଛନ୍ତି । ଇଶାନ ନିକଟରେ ବିଜୟ ହଜାରେ ଟ୍ରଫିରେ ମାତ୍ର ୩୪ ବଲରେ ଶତକ ଲଗାଇ ନିଜ ଫର୍ମ ଦେଖାଇ ସାରିଛନ୍ତି । ହେଲେ ପ୍ରଶ୍ନ ଉଠୁଛି ଚୟନକର୍ତ୍ତା ଇଶାନଙ୍କୁ ନେବେ ନା ଧ୍ରୁବ ଜୁଏଲଙ୍କ ଉପରେ ନଜର ପକାଇବେ । ଏବେ ସବୁଠି ଇଶାନ କିଷାନଙ୍କୁ ନେଇ ଚର୍ଚ୍ଚା ହେଉଛି । ଆଉ ଯଦି ଇଶାନ ଟିମକୁ ଫେରନ୍ତି ଦିନିକିଆ ବିଶ୍ବକପ୍ ପରେ ଏହି ଫର୍ମାଟରେ ପ୍ରଥମ ଥର ଟିମକୁ ଫେରିପାରନ୍ତି ।
ଶାମୀ ଓ ସିରାଜ ଫେରିବେ କି ?
ସବୁଠାରୁ ବଡ଼ ପ୍ରଶ୍ନ ହେଲା ଟିମ ଇଣ୍ଡିଆକୁ ମହମ୍ମଦ ଶାମୀ ଫେରିବେ କି । ଚାମ୍ପିୟନ୍ସ ଟ୍ରଫି ୨୦୨୫ ପରଠାରୁ ସେ ଟିମ୍ ଇଣ୍ଡିଆରୁ ବାହାରେ ଅଛନ୍ତି । ଫିଟନେଓ କାରଣରୁ ଇଂଲଣ୍ଡ ଗସ୍ତରୁ ବାଦ ପରିବା ପରଠାରୁ ତାଙ୍କୁ ଆଉ ସୁଯୋଗ ମିଳିନି । ଆଉ ଏମିତି ସ୍ଥିତିରେ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କ ସହ ତାଙ୍କ ସମ୍ପର୍କରେ ତିକ୍ତତା ଆସିଛି । ଘରୋଇ କ୍ରିକେଟରେ ଶାମୀ ନିୟମିତ ଚମତ୍କାର ଦେଖାଇ ଚାଲିଛନ୍ତି । ହେଲେ ପ୍ରଶ୍ନ ଉଠୁଛି, ଅଜିତ ଅଗରକର ତାଙ୍କୁ ସୁଯୋଗ ଦେବେ ନା ନାହିଁ ? ଆଉ ଆଜିର ବୈଠକରେ ଶାମୀଙ୍କ ଭବିଷ୍ୟତ ସ୍ପଷ୍ଟ ହୋଇଯିବ । ସେହିପରି ମହମ୍ମଦ ସିରାଜଙ୍କ ପାଇଁ ବି ଏହି ଦିନିକିଆରେ ଚୟନ ହେବା ଗୁରୁତ୍ବପୂର୍ଣ୍ଣ ରହିଛି । କିଛିଦିନ ହେବ ସେ ମଧ୍ୟ ଦିନିକିଆ ଓ ଟି୨୦ ଟିମରୁ ବାହାରେ ଅଛନ୍ତି । ତାଙ୍କର ଟି୨୦ କ୍ୟାରିୟର ଏକ ପ୍ରକାର ଶେଷ ହୋଇ ସାରିଥିବା ବେଳେ ଦିନିକିଆ ପାଇଁ ସେ ପ୍ରବଳ ଦାବିଦାର ରହିଛନ୍ତି । ସେହିପରି ଦକ୍ଷିଣ ଆଫ୍ରିକା ସିରିଜରେ ଥିବା ଅଧିକାଂଶ ଖେଳାଳିଙ୍କୁ ହି ସିରିଜରେ ଦେଖିବାକୁ ମିଳିବ ।
ସମ୍ଭାବ୍ୟ ଦିନିକିଆ ଟିମ୍
ଶବମନ ଗିଲ (ଅଧିନାୟକ)
ରୋହିତ ଶର୍ମା
ବିରାଟ କୋହଲି
ଋତୁରାଜ ଗାୟକଓ୍ବାଡ
କେଏଲ ରାହୁଲ
ରବୀନ୍ଦ୍ର ଜାଡେଜା
ଓ୍ବାସିଂଟନ ସୁନ୍ଦର
କୁଲଦୀପ ଯାଦବ
ମହମ୍ମଦ ଶାମୀ
ମହମ୍ମଦ ସିରାଜ
ପ୍ରସିଦ୍ଧି କ୍ରିଷ୍ଣା
ଇଶାନ କିଷାନ
ଯଶସ୍ବୀ ଜୟସଓ୍ବାଲ
ତିଲକ ବର୍ମା
ଶ୍ରୀୟସ ଆୟର
ସ୍ବର୍ଗତ ଜାନକୀ ବଲ୍ଲଭ ପଟ୍ଟନାୟକଙ୍କ ଜୟନ୍ତୀରେ ଶ୍ରଦ୍ଧାଞ୍ଜଳି ଜଣାଇଲେ ବିରୋଧୀ ଦଳ ନେତା ନବୀନ ପଟ୍ଟନାୟକ
ଆଜି ହେଉଛି ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ତଥା ବିଶିଷ୍ଟ ରାଜନୀତିଜ୍ଞ ସ୍ବର୍ଗତ ଜାନକୀବଲ୍ଲଭ ପଟ୍ଟନାୟକ ଜନ୍ମ ଶତବାର୍ଷିକୀ । ଜାନକୀଙ୍କ ଶତବାର୍ଷିକୀ ଅବସରରେ ଶ୍ରଦ୍ଧାଞ୍ଜଳି ଜଣାଇଛନ୍ତି ବିଜେଡି ସୁପ୍ରିମୋ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ । ଶତବାର୍ଷିକୀ ପାଳନ ଅବସରରେ ଜାତୀୟ ସ୍ତରର ନେତା ଏମ୍ ବିରାପା ମୋଇଲି, ଡି ରାଜା, ସରୋଜ ବାଲା, ମୁଖ୍ୟମନ୍ତ୍ରୀ ମୋହନ ମାଝୀ, ବିରୋଧୀ ଦଳ ନେତା ନବୀନ ପଟ୍ଟନାୟକ, ନରସିଂହ ମିଶ୍ରଙ୍କ ସମେତ ବିଭିନ୍ନ ରାଜନୈତିକ ଦଳର ପ୍ରମୁଖ କାର୍ଯ୍ୟକର୍ତ୍ତା ଏହି କାର୍ଯ୍ୟକ୍ରମ ରେ ସାମିଲ ହେବା ନେଇ ସୂଚନା ରହିଛି । ଭୁବନେଶ୍ବର ୟୁନିଟ ୩ କ୍ୟାପିଟାଲ ହାଇସ୍କୁଲରେ ଧୁମ ଧାମରେ ପାଳନ କରାଯିବ ସ୍ବର୍ଗତ ଜାନକୀବଲ୍ଲଭ ପଟ୍ଟନାୟକଙ୍କ ଶତବାର୍ଷିକୀ ।
ଅନ୍ୟପକ୍ଷରେ କଂଗ୍ରେସ କିପରି କ୍ଷମତାକୁ ଫେରିବ ସେନେଇ ଆଜି କଂଗ୍ରେସର ନେତା ଓ କର୍ମୀମାନେ ଶପଥ ଗ୍ରହଣ କରିବେ । ଜାନକୀଙ୍କ ନୀତିକୁ ଆପଣାଇବାକୁ ଅଣ୍ଟା ଭିଡ଼ିଛି ଦଳ । ଅଶୀ ଦଶକର ଚାଣକ୍ୟ କୁହାଯାଉଥିବା ଜାନକୀଙ୍କ ସମୟରେ ରାଜ୍ୟରେ କଂଗ୍ରେସର ସ୍ଥିର ସରକାର ରହିଥିଲା । ତାଙ୍କର ଫର୍ମୂଲାକୁ ଆପଣାଇ ଓଡ଼ିଶାରେ କଂଗ୍ରେସ ସଂଗଠନ ବେଶ୍ ମଜବୁତ ରହିଥିଲା । ତାଙ୍କ ସମୟ ଥିଲା ରାଜ୍ୟ କଂଗ୍ରେସ ପାଇଁ ଗୋଲଡେନ ସମୟ। ତାଙ୍କ ପରେ ଆଉ ଉଧାଉନି କଂଗ୍ରେସ ସଙ୍ଗଠନ। ତେଣୁ ରାଜ୍ୟ କଂଗ୍ରେସ ଏବେ ଜାନକୀ ନୀତିରେ ଅନୁପ୍ରାଣିତ ହେବାକୁ ଅଣ୍ଟା ଭିଡିଛି। ଜାନକୀ ବଲ୍ଲବ ପଟ୍ଟନାୟକଙ୍କ ଜନ୍ମ ଶତବାର୍ଷିକୀରେ ଏହାର ମୂଳଦୁଆ ପକାଇବ କଂଗ୍ରେସ। ଜାନକୀ ବଲ୍ଲଭ ପଟ୍ଟନାୟକଙ୍କ ସମୟରେ ଓଡ଼ିଶାରେ ହୋଇଥିବା ବିକାଶକୁ ରାଜ୍ୟ କଂଗ୍ରେସ ଏବେ ଜୋରଦାର ପ୍ରଚାର ପ୍ରସାର କରିବ । ଦଳର ବରିଷ୍ଠ ନେତାଙ୍କ ଯୁକ୍ତି, ଜାନକୀଙ୍କ ଶାସନ ସମୟରେ ଆଗେଇଥିଲା ଶିଳ୍ପ କ୍ଷେତ୍ର। ଜଣେ ବିଚକ୍ଷଣ ନେତା ହେବା ସହ ସମସ୍ତଙ୍କୁ ସାଙ୍ଗରେ ନେଇ ଆଗକୁ ବଢିବାର କଳା ତାଙ୍କୁ ବେଶ ଜଣାଥିଲା।
ଲାଲବାହିନୀକୁ ବଡ଼ ଧରଣର ଝଟକା: ଏନକାଉଣ୍ଟରରେ ୧୨ ନକ୍ସଲ ନିହତ
ଲାଲବାହିନୀକୁ ବଡ଼ ଧରଣର ଝଟକା। ମାଲକାନଗିରି ଜିଲ୍ଲା ସୀମାନ୍ତ ଛତିଶଗଡ଼ର କୋଣ୍ଟା କିସ୍ତାରାମ ଜଙ୍ଗଲରେ ୧୪ ମାଓବାଦୀ ନିହତ। ସେମାନଙ୍କ ମଧ୍ୟରେ ୩ ଜଣ ଏରିଆ କମାଣ୍ଡର ଅଛନ୍ତି। ଯବାନ ଓ ମାଓବାଦୀଙ୍କ ମଧ୍ୟରେ ଗୁଳି ଜାରି ରହିଛି। ଘଟଣାସ୍ଥଳରୁ AK 47 ଏବଂ INSAS ଭଳି ସ୍ୱୟଂଚାଳିତ ରାଇଫଲ ଜବତ କରାଯାଇଛି। ଘଟଣାସ୍ଥଳରେ ସୁକମା DRG ସୈନିକ ଉପସ୍ଥିତ ଥିଲେ। ଏସପି କିରଣ ଚୌହାନ ପରିସ୍ଥିତି ଉପରେ ନଜର ରଖିଛନ୍ତି।
ରାସ୍ତାରେ ଇରାନ ବାସିନ୍ଦା, ଆୟାତୋଲ୍ଲା ଖୋମେନେଇ ବିରୋଧରେ ଉଗ୍ର ହେଉଛି ବିଦ୍ରୋହ
ରାସ୍ତାରେ ଇରାନ ବାସିନ୍ଦା, ଆୟାତୋଲ୍ଲା ଖୋମେନେଇ ବିରୋଧରେ ଉଗ୍ର ହେଉଛି ବିଦ୍ରୋହ
ନନ୍ଦିଘୋଷ ବ୍ୟୁରୋ: ଇରାନରେ ବଢ଼ି ଚାଲିଛି ଆୟାତୋଲ୍ଲା ଖୋମେନେଇ ବିରୋଧୀ ସଂଗ୍ରାମ I ରାସ୍ତାକୁ ଓହ୍ଲାଇଛନ୍ତି ହଜାର ହଜାର ଦେଶବାସୀ I ସେପଟେ ଆନ୍ଦୋଳନ ନିଆଁରେ ଘିଅ ଢାଳିଛନ୍ତି ନିର୍ବାସନରେ ଥିବା ପ୍ରିନ୍ସ ରେଜା ପହଲବି I ଦେଶର ୨୨ ପ୍ରଜାତନ୍ତ୍ରର ଶତାଧିକ ସହରରେ ଆନ୍ଦୋଳନ ତୀବ୍ର ହେବାରେ ଲାଗିଛି I ଏପରିକି ଶିହାବହୁଳ ସହର କୋମରେ ବି ଆନ୍ଦୋଳନ ତୀବ୍ର ହୋଇଛି I ବର୍ତ୍ତମାନ ସୁଦ୍ଧା ପୋଲିସ ଗୁଳିରେ ୮ ଜଣ ପ୍ରାଣ ହରାଇଥିବାବେଳେ ଦିନକୁ ଦିନ ଆନ୍ଦୋଳନ ବିଭିନ୍ନ ସହରକୁ ବ୍ୟାପିବାରେ ଲାଗିଛି I ଆନ୍ଦୋଳନକାରୀଙ୍କ ଉପରେ ବଳ ପ୍ରୟୋଗ ନ କରିବା ଲାଗି ଇରାନ ସରକାରଙ୍କୁ ଚେତାଇଛନ୍ତି ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପ I
ଇରାନର ବହୁ ନେତା ଦେଶ ଛାଡ଼ି ବ୍ରିଟେନ ଚାଲିଯିବାକୁ ଯୋଜନା କରୁଥିବା ସୂଚନା ମିଳିଛି I ଶତାଧିକ ଆନ୍ଦୋଳନକାରୀଙ୍କୁ ଅଟକ ରଖାଯାଇଛି । ତେହେରାନ, ମସହାଦ, ଜାହେଦାନ, କାଜଭିନ, ହାମଦାନ ସମେତ ବହୁ ସହରରେ ବ୍ୟାପକ ପୋଲିସ ମୁତୟନ ହୋଇଛନ୍ତି I ଦେଶରେ ମୌଳିକ ଅଧିକାରକୁ କ୍ଷୁଣ୍ଣ କରାଯାଇଛି ବୋଲି ଅଭିଯୋଗ କରିଛି ଆମେରିକା I ମାନବାଧିକାରକୁ ଗୁରୁତ୍ବ ଦେବା ଲାଗି ବହୁ ମାନବିକ ଅଧିକାର ସଂଗଠନ ପକ୍ଷରୁ ଆହ୍ବାନ ଦିଆଯାଇଛି I
ଶାନ୍ତପୂର୍ଣ୍ଣ ଭାବେ କ୍ଷମତାର ହସ୍ତାନ୍ତର କରିବାକୁ ଆହ୍ବାନ ଦେଇଛନ୍ତି ପ୍ରସିଦ୍ଧ ଫିଲ୍ମ ନିର୍ମାତା ଜାଫର ପାନାହି ଓ ନୋବେଲ ଶାନ୍ତି ବିଜେତା ନର୍ଗେସ ମହମ୍ମଦି I ଦେଶ ଦେବାଳିଆ ହେବା ସହ ଅର୍ଥନୈତିକ ପ୍ରଗତି ଠପ୍ ହୋଇଯାଇଛି I ଦେଶରେ ମୁଦ୍ରାସ୍ଫୀତି ଚରମ ସୀମାରେ ପହଞ୍ଚିଥିବାବେଳେ ଦାରିଦ୍ର୍ୟ, ବେକାରୀ, ଦୁର୍ନୀତି ବ୍ୟାପକ ହୋଇଛି ବୋଲି ବିଭିନ୍ନ ମହଲରୁ ଅଭିଯୋଗ କରାଯାଉଛି I ଅତ୍ୟାଚାରର ଅନ୍ତ ଘଟିବା ସହ ଦେଶରେ ନୂଆ ଶାସନ ପ୍ରତିଷ୍ଠା କରିବାକୁ ଆହ୍ବାନ ଜଣାଇଛନ୍ତି ପହଲବି I ଆନ୍ଦୋଳନକୁ ସୁପରିଚାଳନା କରିବା ଲାଗି ସେ ନାଗରିକଙ୍କୁ ପରାମର୍ଶ ଦେଇଛନ୍ତି I
ସେପଟେ ଆନ୍ଦୋଳନକାରୀଙ୍କୁ ସମର୍ଥନ ଜଣାଇଛି କୁର୍ଦ୍ଦିସ ପାର୍ଟି I ତେଣେ ଟ୍ରମ୍ପ ଜାତିସଂଘ ନିୟମକୁ ଉଲ୍ଲଂଘନ କରିଛନ୍ତି ବୋଲି ଅଭିଯୋଗ କରିଛନ୍ତି ଇରାନ ପ୍ରସିକ୍ୟୁଟର ଜେନେରାଲ ମହମ୍ମଦ ମୋବାହେଦି ଆଜାଦ I ନିଜର ନୀତିକୁ ସମୀକ୍ଷା କରିବା ସହ ଅର୍ଥନୈତିକ ସମସ୍ୟାର ସମାଧାନ ଲାଗି ଆଲୋଚନାକୁ ସରକାର ଖୋଲା ରଖିଛନ୍ତି ବୋଲି କହିଛନ୍ତି ରାଷ୍ଟ୍ରପତି ମାସୁଦ ପେଜସକିଆନ I ତେଣେ ଇରାନ ଉପରେ ଯଦି ଆକ୍ରମଣ କରାଯାଏ ତେବେ ଇସ୍ରାଏଲ ଓ ଆମେରିକାର ସାମରିକ ଘାଟିଗୁଡ଼ିକ ଉପରେ ଇରାନ ହମଲା କରିପାରେ ବୋଲି ଚେତାବନୀ ଦେଇଛନ୍ତି ଇରାନ ଇସଲାମିକ ରିଭଲ୍ୟୁସନାରୀ ଗାର୍ଡ କର୍ପସ ବା IRGCର ପୂର୍ବତନ ମୁଖ୍ୟ ମହସିନ ରେଜେଇ I
ବାଂଲାଦେଶୀ କ୍ରିକେଟର ମସ୍ତାଫିଜୁର ରହମାନଙ୍କୁ କେକେଆର ଟିମରୁ ବାଦ ଦେବାକୁ ବିସିସିଆଇର ନିର୍ଦ୍ଦେଶ
ବାଂଲାଦେଶୀ କ୍ରିକେଟର ମସ୍ତାଫିଜୁର ରହମାନଙ୍କୁ କେକେଆର ଟିମରୁ ବାଦ ଦେବାକୁ ବିସିସିଆଇର ନିର୍ଦ୍ଦେଶ
ନନ୍ଦିଘୋଷ ବ୍ୟୁରୋ: ବାଂଲାଦେଶ ହିଂସା, ସଂଖ୍ୟାଲଘୁ ବିଶେଷ କରି ହିନ୍ଦୁଙ୍କୁ ଆକ୍ରମଣ ନେଇ ସବୁଠି ଅସନ୍ତୋଷ । ଯାହାର ପ୍ରଭାବ କ୍ରିକେଟ ଉପରେ ପଡିଛି । ବଲିଉଡ଼ ଷ୍ଟାର ଶାହରୁଖ ଖାନଙ୍କ ସହ ମାଲିକାନାରେ ଥିବା କୋଲକାତା ନାଇଟ ରାଇଡର୍ସ ବାଂଲାଦେଶୀ ଖେଳାଳିଙ୍କୁ ନିଲାମରେ କିଣି ବିବାଦରେ । ଦିନକୁ ଦିନ ବିବାଦ ତୀବ୍ର ହେଉଥିବା ବେଳେ ବାଂଲାଦେଶୀ କ୍ରିକେଟର ମୁସ୍ତାଫିଜୁର ରହମାନଙ୍କୁ କେକେଆର ଟିମରୁ ବାଦ ଦେବାକୁ ବିସିସିବିଆଇ ନିର୍ଦ୍ଦେଶ ଦେଇଛି ।
କେକେଆର ଲାଗି ମୁସ୍ତାଫିଜୁରଙ୍କୁ କ୍ରୟ କରି ବିବାଦରେ ଫସିଥିଲେ କିଙ୍ଗ ଖାନ ଶାହରୁଖ । ଆଇପିଏଲର ଅନ୍ୟତମ ଫ୍ରାଞ୍ଚାଇଜ କେକେଆର ବାଂଲାଦେଶୀ କ୍ରିକେଟର ମୁସ୍ତାଫିଜୁର ରହମାନଙ୍କୁ କିଣିଥିବାରୁ ସାରା ଦେଶରେ ପ୍ରତିକ୍ରିୟାପ୍ରକାଶ ପାଇବାରେ ଲାଗିଛି । ଦେଶର ବିଭିନ୍ନ ରାଜନୈତିକ ଦଳ ଓ ସଂଗଠନ ଶାହରୁଖଙ୍କୁ ଏଥିରୁ ଓହରିଯିବାକୁ ପରାମର୍ଶ ଦେଇଥିଲେ । ଶାହରୁଖ ଭାରତୀୟଙ୍କ ମନୋଭାବକୁ ସମ୍ମାନ ଦେବା ଉଚିତ । ଶାହରୁଖଙ୍କୁ ଯାହା ସମ୍ମାନ, ପ୍ରସିଦ୍ଧି ମିଳିଛି ତାହା ଭାରତୀୟଙ୍କ ଲାଗି ମିଳିଛି । ତେଣୁ ଶାହରୁଖ ବାଂଲାଦେଶୀ କ୍ରିକେଟରଙ୍କୁ କିଣିବା ଉଚିତ ନଥିଲା ବୋଲି ସେମାନେ ପ୍ରତିକ୍ରିୟା ରଖିଛନ୍ତି ।
ଏପରିକି ଏହି ଘଟଣାରେ ଶାହରୁଖଙ୍କୁ ଦେଶଦ୍ରୋହୀ, ଗଦ୍ଦାର ଓ ଆତଙ୍କବାଦୀ ବୋଲି ମଧ୍ୟ କହି ଆକ୍ଷେପ କରାଯାଇଛି । ତଥାକଥିତ ଧର୍ମଗୁରୁ ଦେବକୀନନ୍ଦନ ଠାକୁର ଓ ଜଗତଗୁରୁ ରାମଭଦ୍ରାଚାର୍ଯ୍ୟ ଶାହରୁଖଙ୍କୁ କଡ଼ା ସମାଲୋଚନା କରିଛନ୍ତି । ଶାହରୁଖ ଯାହା କରିଛନ୍ତି ତାହା ଆଦୌ ଗ୍ରହଣୀୟ ନୁହେଁ ବୋଲି କହିଛନ୍ତି । ତେବେ ପ୍ରଥମେ ଏହାକୁ ନେଇ ଅଙ୍ଗୁଳି ଉଠାଇଥିଲେ ବିଜେପି ନେତା ସଙ୍ଗୀତ ସୋମ । ଶାହରୁଖଙ୍କ ପରି ବ୍ୟକ୍ତି ଭାରତରେ ରହିବା ଉଚିତ ନୁହେଁ । ବାଂଲାଦେଶରେ ହିନ୍ଦୁମାନଙ୍କୁ ହତ୍ୟା କରାଯାଉଥିବାବେଳେ ତାଙ୍କ ଖେଳାଳି କିଣିବା ଗଦ୍ଦାର କାମ ବୋଲି ସେ କହିଥିଲେ । ଏଥିରେ ସ୍ବର ମିଳାଇଥିଲେ କଥାବାଚକ ଧୀରେନ୍ଦ୍ରନାଥ ଶାସ୍ତ୍ରୀ ।
ଅନ୍ୟପଟେ ଅଲ ଇଣ୍ଡିଆ ମୁସଲିମ ଜମାତର ଅଧ୍ୟକ୍ଷ ଶାହବୁଦ୍ଦିନ ରଜଭି ବରେଲିଭ ଶାହରୁଖଙ୍କୁ ସମର୍ଥନମରେ ବାହାରିଛନ୍ତି । ସେ କହିଛନ୍ତି, ଶାହରୁଖ କେବେ କେଉଁଠି ବାଂଲାଦେଶ ହିନ୍ଦୁ ସଂଖ୍ୟାଲଘୁଙ୍କ ଉପରେ ହେଉଥିବା ଆକ୍ରମଣକୁ ସଠିକ କହିନାହାଁନ୍ତି । ତେଣୁ ତାଙ୍କୁ ଗଦ୍ଦାର, ଆତଙ୍କବାଦୀ କହିବା ଠିକ ନୁହେଁ । ସେହିପରି ସପା ନେତା ଜିଆ ଚୌଧୁରୀ ସଂଗୀତ ସୋମଙ୍କୁ କଡ଼ା ଭାଷାରେ ସମାଲୋଚନା କରିଛନ୍ତି । ସେ କହିଛନ୍ତି, ସଂଗୀତ ଡିପ୍ରେସନକୁ ଚାଲିଯାଇଛନ୍ତି । ତୃଣମୂଳ କଂଗ୍ରେସର ଜଣେ ନେତା ଫିରହାଦ ହାକିମ ଏହା ଉପରେ ପ୍ରତିକ୍ରିୟ। ଦେଇ ବିଜେପିକୁ ପ୍ରଶ୍ନ କରିଛି ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ବେଗମ ଖାଲିଦା ଜିଆଙ୍କ ଅନ୍ତିମ ସଂସ୍କାରରେ ବୈଦେଶିକ ମନ୍ତ୍ରୀ ଏସ. ଜୟଶଙ୍କର ଯୋଗଦେବା କ’ଣ ଦେଶଦ୍ରୋହୀ କାର୍ଯ୍ୟ ନୁହେଁ ?