ରୋମ୍: ଇଟାଲୀରେ ଜଣେ ଭାରତୀୟ ଶ୍ରମିକଙ୍କ ମୃତ୍ୟୁ ପରେ ଜୋରଦାର ଉତ୍ତେଜନା ଦେଖାଦେଇଛି । ଏହି ମୃତ୍ୟୁକୁ ନେଇ ପ୍ରଧାନମନ୍ତ୍ରୀ ଜର୍ଜିଆ ମେଲୋନି ଦୁଃଖ ପ୍ରକାଶ କରିଛନ୍ତି । ମେଲୋନି ଏହାକୁ ଏକ ଅମାନବୀୟ କାର୍ଯ୍ୟ ବୋଲି କହିଛନ୍ତି। ସେ ଆହୁରୀ ମଧ୍ୟ କହିଛନ୍ତି , ଭାରତୀୟ ଶ୍ରମିକଙ୍କ ହାତ କଟିଯାଇଥିଲା । କିନ୍ତୁ ସେ ଯେଉଁଠାରେ କାମ କରୁଥିଲେ ସେଠାରେ ତାଙ୍କୁ ଚିକିତ୍ସା କରିବା ବଦଳରେ ତାଙ୍କୁ ରାସ୍ତା କଡରେ ଫିଙ୍ଗି ଦେଇଥିଲେ । ଯେଉଁଥିପାଇଁ ତାଙ୍କର ମୃତ୍ୟୁ ହୋଇଛି । ଏହା ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ପ୍ରଧାନମନ୍ତ୍ରୀ କହିଛନ୍ତି ।
ସୂଚନା ଅନୁଯାୟୀ, ମୃତକ ଶ୍ରମିକ ହେଉଛନ୍ତି ୩୧ ବର୍ଷୀୟ ସତନାମ ସିଂହ । ରୋମର୍ ନିକଟ ଲାଜିୟୋରେ ଏକ ପରିବା କ୍ଷେତରେ କାମ କରୁଥିବା ବେଳେ ସତନାମ ସିଂହଙ୍କ ହାତ ଧାରୁଆ ମେସିନରେ କଟି ଯାଇଥିଲା । ଏହା ପରେ କ୍ଷେତର ମାଲିକ ତାଙ୍କୁ ଅତି ନିଷ୍ଠୁର ବ୍ୟବହାର କରିଥିଲେ। ଚିକିତ୍ସା ପାଇବା ପରିବର୍ତ୍ତେ ସତନାମ ସିଂଙ୍କୁ ରାସ୍ତା କଡରେ ଫିଙ୍ଗି ଦେଇଥିଲେ। ପରେ ନିକଟସ୍ଥ କେହି ଜଣେ ତାଙ୍କୁ ସାହାଯ୍ୟ କରିଥିଲେ। କୌ ଣସି ପ୍ରକାରେ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା, କିନ୍ତୁ ଡାକ୍ତରମାନେ ତାଙ୍କୁ ବଞ୍ଚାଇ ପାରିନଥିଲେ।
ସତନାମ ସିଂହଙ୍କ ମୃତ୍ୟୁ ପାଇଁ ଦାୟୀ ବ୍ୟକ୍ତିଙ୍କ ବିରୋଧରେ ତୁରନ୍ତ ପଦକ୍ଷେପ ନେବାକୁ ଭାରତ ଇଟାଲୀକୁ କହିଛି।
