ନୂଆଦିଲ୍ଲୀ: ବିଶ୍ବ ବିଜୟୀ ଭାରତୀୟ କ୍ରିକେଟ ଟିମ୍ ପାଇଁ ଛୁଟୁଛି ଉପହାର ସୁଆ । ଟି-୨୦ ବିଶ୍ବକପ୍ ବିଜୟ ଟିମ ପାଇଁ ୧୨୫ କୋଟି ଟଙ୍କା ଘୋଷଣା କରିଛି ବିସିସିଆଇ । ଏନେଇ ବିସିସିଆଇ ସମ୍ପାଦକ ଜୟ ଶାହ ଘୋଷଣା କରିଛନ୍ତି ।
ସୋସିଆମ ମିଡିଆ ଏକ୍ସରେ ପୁରସ୍କାର ରାଶି ପ୍ରଦାନ ନେଇ ଶାହ ସୂଚନା ଦେଇଛନ୍ତି । ଟିମ୍ ଇଣ୍ଡିଆର ଖେଳାଳି, କୋଚ୍ ଓ କର୍ମଚାରୀଙ୍କୁ ଏହି ପୁରସ୍କାର ପ୍ରଦାନ କରାଯିବ । ଟି-ଟ୍ବେଣ୍ଟି ବିଶ୍ବକପ ଜିତି ଭାରତ ନୂଆ ଇତିହାସ ଲେଖିଛି । ଭାରତର ଏ ଐତିହାସିକ ଉପଲବ୍ଧିରେ ସାରା ଦେଶ ଉତ୍ସବ ପାଳୁଛି ।
ଭୁବନେଶ୍ବର: ଆସନ୍ତାକାଲିଠାରୁ ସାଧାରଣ ଜନତାଙ୍କ ଅଭିଯୋଗ ଶୁଣିବେ ମୁଖ୍ୟମନ୍ତ୍ରୀ ମୋହନ ମାଝୀ । ଏଥିଲାଗି ପ୍ରସ୍ତୁତ ହୋଇଛି ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠ । ସାଧାରଣ ଲୋକଙ୍କ ଅଭିଯୋଗ ଶୁଣିବା ପାଇଁ ଅଭିଯୋଗ ପ୍ରକୋଷ୍ଠର ନବୀକରଣ କରାଯାଇଛି । ଯାହାର ତଦାରଖ କରୁଛନ୍ତି ଖୋଦ ବରିଷ୍ଠ ଅଧିକାରୀ ।
ଜୁଲାଇ ୧ରୁ ଅଭିଯୋଗ ପ୍ରକୋଷ୍ଟରୁ ମୁଖ୍ୟମନ୍ତ୍ରୀ ମୋହନ ମାଝୀ କରିବେ ଶୁଣାଣି । ସାଧାରଣ ଜନତାଙ୍କର ଶୁଣିବେ ଅଭିଯୋଗ । ଯେଉଁଠି ଏକକାଳୀନ ୩୦ ଜଣ ବସିବାର ବ୍ୟବସ୍ଥା କରାଯାଇଛି । ୧୧ ଟାରୁ ୟୁନିଟ-୫ ଭୁବନେଶ୍ୱର ସ୍ଥିତ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ଜନସାଧାରଣଙ୍କ ବିଭିନ୍ନ ଅଭିଯୋଗର ଶୁଣାଣି ହେବ । ଏହି ଅଭିଯୋଗ ଶୁଣାଣି ପାଇଁ ପଞ୍ଜିକରଣ ସେହିଦିନ ପୂର୍ବାହ୍ନ ୯ ଘଟିକାରୁ ମଧ୍ୟାହ୍ନ ୧୨ ଘଟିକା ପର୍ଯ୍ୟନ୍ତ ହେବ I ଗଣମାଧ୍ଯମ ପ୍ରତିନିଧିମାନେ ଉପସ୍ଥିତ ରହି ଶୃଙ୍ଖଳାର ସହ ଖବର ପ୍ରସାରଣ କରିପାରିବେ I
ଭୁବନେଶ୍ବର: ଚଳିତବର୍ଷ ରଥଯାତ୍ରାରେ ସାମିଲ ହେବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ମହାମହିମଙ୍କ ପୁରୀ ଗସ୍ତ କାର୍ଯ୍ୟକ୍ରମ ପାଇଁ ଏବେ ଠାରୁ ବ୍ୟାପକ ପ୍ରସ୍ତୁତ୍ତି ଆରମ୍ଭ ହୋଇଯାଇଛି l ରାଷ୍ଟ୍ରପତି ରଥାରୂଢ ଶ୍ରୀବିଗ୍ରହଙ୍କୁ ଦର୍ଶନ କରିବା ସହ ରଥ ଟାଣିବାର କାର୍ଯ୍ୟକ୍ରମ ରହିଛି ।
ମହାମହିମଙ୍କ ଗସ୍ତକୁ ନେଇ ଆଇନ ମନ୍ତ୍ରୀ ସମୀକ୍ଷା କରିଥିବାବେଳେ ରଥଯାତ୍ରା ସମୟରେ ଯେଭଳି କୌଣସି ଅସୁବିଧା ନ ଉପୁଜେ ସେ ନେଇ ପ୍ରଶାସନିକ ସ୍ତରରେ ପଦକ୍ଷେପ ନିଆଯିବାକୁ ଲକ୍ଷ୍ୟ ରଖାଯାଇଛି l ଏପଟେ ରାଷ୍ଟ୍ରପତି ଗସ୍ତକୁ ନେଇ କୌଳିକ ପଣ୍ଡା ଓ ସେବାୟତ ମହଲରେ ବେଶ ଉତ୍ସହ ଦେଖିବାକୁ ମିଳିଛି ।
ଦ୍ବିତୀୟ ଥର ପାଇଁ ପୁରୀ ଆସୁଛନ୍ତି ରାଷ୍ଟ୍ରପତି । ଜୁଲାଇ ୭ ତାରିଖ ଦିନ ଅପରାହ୍ନରେ ସ୍ୱତନ୍ତ୍ର ହେଲିକପ୍ଟର ଯୋଗେ ଅବତରଣ କରିବା ସହ ସିଂହଦ୍ୱାର ନିକଟକୁ ଆସିବେ l ସେଠାରେ ବଡ଼ଦାଣ୍ଡରେ ରଥାରୂଢ ଶ୍ରୀବିଗ୍ରହଙ୍କୁ ଦର୍ଶନ କରିବା ସହ ରଥ ଟାଣିବାର କାର୍ଯ୍ଯକ୍ରମ ରହିଛି ।
ଭୁବନେଶ୍ବର: ବିପଦରେ ସରକାରୀ ଓ ବେସରକାରୀ ୱେବସାଇଟ । ହୋଟେଲ ଶିଳ୍ପ ମଧ୍ୟ ବିପଦରେ । ଆଗକୁ ରଥଯାତ୍ରା ଥିବାବେଳେ ପୁରୀ ଓ ଭୁବନେଶ୍ୱରର କିଛି ୱେବସାଇଟର ଅବିକଳ ନକଲ କରି ପୋଲିସ ପାଇଁ ମୁଣ୍ଡ ବିନ୍ଧାର କାରଣ ପାଲଟିଛନ୍ତି ସାଇବର ଠକ ।
ରଥଯାତ୍ରା ପୂର୍ବରୁ ଆକ୍ଟିଭ ହେଲେଣି ସାଇବର ଠକ । ହୋଟେଲ ବୁକିଂ ନାଁରେ ସାଧାରଣ ଲୋକଙ୍କୁ ଠକେଇ । ପୁରୀ ପରେ ଟାର୍ଗେଟରେ ଭୁବନେଶ୍ୱରର ହୋଟେଲ । ଅବିକଳ ୱେବସାଇଟ ଡିଜାଇନ, ଅଜବ ବୁଦ୍ଧି । ଠକଙ୍କ ଜ୍ଞାନ ଆଗରେ ଯେ କେହି ବି ଧୋକ୍କା ଖାଇଯିବ । ଆଗକୁ ରଥଯାତ୍ରା ଥିବା ବେଳେ ପୁରୀରେ ପ୍ରବଳ ଜନସମାଗମ ହେବାର ଅଛି । ଦେଶ ବିଦେଶରୁ ଲକ୍ଷାଧିକ ଲୋକେ ପୁରୀ ଆସିବା ପାଇଁ ହୋଟେଲ ବୁକିଂ କରୁଛନ୍ତି ।
ଗୁଗୁଲରେ ହୋଟେଲ ସର୍ଚ୍ଚ କରିବା ବେଳେ ସାମ୍ନାକୁ ଆସୁଛି ଫେକ ୱେବସାଇଟ । ଟୁରିଷ୍ଟ ଯେତେବେଳେ ଗୁଗୁଲରେ ହୋଟେଲ ନାଁ ସର୍ଚ୍ଚ କରୁଛନ୍ତି, ସେତେବେଳେ ଅରିଜିନାଲ ବଦଳରେ ଡୁପ୍ଲିକେଟ ୱେବସାଇଟ ବୁକ କରି ଲକ୍ଷାଧିକ ଟଙ୍କା ହରାଉଛନ୍ତି । ଏଭଳି ଅଭିଯୋଗ ବାରମ୍ବାର ହେବା ପରେ ପୂର୍ବରୁ ହୋଟେଲ ମାଲିକ ସଂଘ ସହ ଆଲୋଚନା କରିଥିଲା କ୍ରାଇମବ୍ରାଞ୍ଚ । ହୋଟେଲର ଆଇଟିକୁ ସୁଦୃଢ଼ କରିବା ଦିଗରେ ଗୁରୁତ୍ୱାରୋପ କରାଯାଇଥିଲା । ଏବେ ପୁଣି ସେହି ଘଟଣାର ପୁନରାବୃତ୍ତି ହେଉଥିବା ଦେଖାଯାଇଛି ।
କେବଳ ହୋଟେଲ ନୁହେଁ, ପୁରୀ ଓ ଭୁବନେଶ୍ୱରରେ ଥିବା ରେଷ୍ଟୁରାଣ୍ଟ ମଧ୍ୟ ସମାନ ଅବସ୍ଥା । ଅନଲାଇନ ଫୁଡ ପାଇଁ ବୁକିଂ କଲେ ଟଙ୍କା ଠକି ନେଉଛି ଅଦୃଶ୍ୟ ଠକ । ୯୦ ପ୍ରତିଶତ ସରକାରୀ ଓ ବେସରକାରୀ ୱେବସାଇଟ ହ୍ୟାକରଙ୍କ କବଜାରେ ଥିବା ଜଣାପଡିଛି । କିଛି ମାସ ତଳେ ‘ମୋ ସ୍କୁଲ’ ୱେବସାଇଟର ଅବିକଳ ନକଲ କରି ଚାକିରି ପାଇଁ ବିଜ୍ଞପ୍ତି ଦେଇ ଠକେଇ ଘଟଣା ନଜରକୁ ଆସିବା ପରେ ଗଣଶିକ୍ଷା ବିଭାଗ ସଚିବ ଥାନାରେ ଏତଲା ଦେଇଥିଲେ ।
ଏଥର ଗୋଟିଏ ଦିନରେ ଶ୍ରୀଗୁଣ୍ଡିଚା ଓ ନବ ଯୌବନ ଦର୍ଶନ ପଡୁଥିବାରୁ ୧୦ ଲକ୍ଷରୁ ଊର୍ଦ୍ଧ୍ବ ଲୋକ ପୁରୀରେ ଏକାଠି ହେବେ । ତେଣୁ ସାମାନ୍ୟ ସଚେତନ ନହେଲେ ଆପଣ ମଧ୍ୟ ହରାଇପାରନ୍ତି କଷ୍ଟ ଅର୍ଜିତ ଧନ ।
ନୂଆଦିଲ୍ଲୀ: ଆସନ୍ତା ମାସରେ ସାଧାରଣ ବଜେଟ୍ । ମୋଦି ସରକାରଙ୍କ ତୃତୀୟ ପାଳିର ପ୍ରଥମ ବଜେଟ୍ । ଦରଦାମ ନିୟନ୍ତ୍ରଣ, ଆୟକର ଛାଡ଼ ସୀମା ବୃଦ୍ଧି ନେଇ ସାଧାରଣ ଲୋକେ ଆଶା ରଖିଛନ୍ତି । ଏହାସହିତ ଶିକ୍ଷା ଓ ସ୍ବାସ୍ଥ୍ୟରେ ଅଧିକ ବ୍ୟୟ ବରାଦ କରିବାକୁ ମତ ରଖିଛନ୍ତି ଅର୍ଥନୀତି ସମୀକ୍ଷକ । ମୌସୁମୀର ଅନିୟମିତତା ଉତ୍ପାଦନ ଉପରେ ପ୍ରଭାବ ପକାଉଥିବାରୁ ଖାଦ୍ୟଶସ୍ୟ, ଚାଷୀଙ୍କ ସାର ସବସିଡି ବାବଦରେ ଅଧିକ ବ୍ୟୟ ବରାଦ କରିବା ନେଇ ସାଧାରଣରେ ଦାବି ହେଉଛି ।
ଦରଦାମ ବୃଦ୍ଧି, ଉଚ୍ଚ ହାରର ଜିଏସଟି । ଆୟକର ଛାଡ଼ ସୀମା ବଢୁନି । କମୁଛି ଲୋକଙ୍କ କ୍ରୟ ଶକ୍ତି । ଅତିଷ୍ଠ ହେଲେଣି ଲୋକେ । ଜୁଲାଇରେ ଆସିବାକୁ ଥିବା ପୂର୍ଣ୍ଣାଙ୍ଗ ବଜେଟରେ ଏସବୁ ପ୍ରତି ଧ୍ଯାନ ଦେବେ କି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ନିର୍ବାଚନ ପୂର୍ବରୁ ଅନ୍ତରୀଣ ବଜେଟରେ ସେ ଦେଇଥିଲେ ୪୭ ଲକ୍ଷ ୬୦ ହଜାର କୋଟି । ୨୦୨୪-୨୫ ଆର୍ଥିକ ବର୍ଷ ପାଇଁ ପୂର୍ଣ୍ଣାଙ୍ଗ ବଜେଟରେ ସାଧାରଣ ଲୋକଙ୍କୁ କ’ଣ ମିଳିବ ? ଚାକିରିଆରୁ ଚାଷୀ, ଅଧ୍ୟାପକରୁ କ୍ଷୁଦ୍ର ବ୍ୟବସାୟୀ, ସମସ୍ତେ ଚାହିଁ ରହିଛନ୍ତି ନିର୍ମଳାଙ୍କ ପେଡ଼ିକୁ । ମୌସୁମୀର ଅନିୟମିତତା ଯୋଗୁଁ କମୁଛି ଖାଦ୍ୟ ଶସ୍ୟ ଉତ୍ପାଦନ । ଏଥରକ ବଜେଟରେ ଫସଲ ଗଚ୍ଛିତ ରଖିବା ପାଇଁ ଭଣ୍ଡାର ଗୃହ ପ୍ରତିଷ୍ଠା ଉପରେ ହୋଇପାରେ ବ୍ୟୟ ବରାଦ । ଆଳୁ, ପିଆଜ ସବୁ ଅଞ୍ଚଳରେ କିପରି ଚାଷ କରାଯାଇପାରିବ ସେ ନେଇ ଚାଷ ଓ ଚାଷୀଙ୍କୁ ପ୍ରୋତ୍ସାହନ ଦେବାକୁ ପଡ଼ିବ । ବିଭିନ୍ନ ରାଜ୍ୟରେ ବିଧାନସଭା ନିର୍ବାଚନ ଥିବାରୁ କେନ୍ଦ୍ର ଏନଡିଏ ସରକାର ଆୟକର ଛାଡ଼ ସୀମାକୁ ବୃଦ୍ଧି କରିପାରନ୍ତି । ବିଶେଷ କରି ମହାରାଷ୍ଟ୍ରରେ ଅଧିକ ଚାକିରିଆ ଥିବାରୁ ଓ ସେଠାରେ ଆଗକୁ ନିର୍ବାଚନ ଥିବାରୁ ଆୟକର ଛାଡ଼ ସୀମା ବଢ଼ିବା ସମ୍ଭାବନା ରହିଛି । ଭାରତୀୟ ମଜଦୁର ସଂଘ କେନ୍ଦ୍ର ଅର୍ଥମନ୍ତ୍ରୀଙ୍କୁ ଭେଟି ଆୟକର ରିହାତି ୭ ଲକ୍ଷରୁ ୧୦ ଲକ୍ଷ କରିବାକୁ ଅନୁରୋଧ କରିଛି ।
ଖାଦ୍ୟଠାରୁ ମୋବାଇଲ ଭାଉଚର, ଔଷଧଠାରୁ ବୀମା ସବୁଥିରେ ଉଚ୍ଚ ହାରର ଜିଏସଟି ଲାଗୁଛି । ଜିଏସଟି ଭାର ଯୋଗୁଁ ଲୋକଙ୍କ କ୍ରୟ ଶକ୍ତି କମୁଛି । ଜିଏସଟି କମିବା ଦରକାର । ଖାଲି ସେତିକି ନୁହେଁ, ଭାରତର ଅଭିବୃଦ୍ଧି ତୁଳନାରେ ଶିକ୍ଷା ଓ ସ୍ବାସ୍ଥ୍ୟରେ ବହୁତ କମ ବ୍ୟୟ ବରାଦ ବଜେଟରେ ହେଉଛି । ଶିକ୍ଷାରେ ମାତ୍ର ୩ ପ୍ରତିଶତ ହେଉଥିବା ବେଳେ ସ୍ବାସ୍ଥ୍ୟରେ ଜିଡିପିର ମାତ୍ର ୧. ୩ ପ୍ରତିଶତ ବ୍ୟୟ ବରାଦ ହେଉଛି । ଏହାକୁ ବୃଦ୍ଧି କରି କରିବା ସହିତ ବଜେଟରେ ମଧ୍ୟବିତ୍ତଙ୍କ ଆର୍ଥିକ ସ୍ଥିତି ଉନ୍ନିତ କଲା ଭଳି ବ୍ୟବସ୍ଥା ରଖିବାକୁ ବିଶେଷଜ୍ଞ ପରାମର୍ଶ ଦେଇଛନ୍ତି ।
ଆସନ୍ତା ପୂର୍ଣ୍ଣାଙ୍ଗ ବଜେଟକୁ ନେଇ ଲୋକଙ୍କ ଭିତରେ ବହୁତ ଆଶା । ନିର୍ବାଚନ ବେଳେ ମିଳିଥିବା ପ୍ରତିଶ୍ରୁତି କିପରି ପାଳନ ହେବ, ତାକୁ ବାସ୍ତବ ରୂପ ଦେବା କେନ୍ଦ୍ର ଅର୍ଥମନ୍ତ୍ରୀଙ୍କ ପାଇଁ ବଡ଼ ଆହ୍ବାନ ।
ଭୁବନେଶ୍ବର: କିଛିଦିନ ପରେ ଆରମ୍ଭ ହେବ ସଂସଦର ବଜେଟ ଅଧିବେଶନ । ସୂଚନା ଅନୁସାରେ ଜୁଲାଇ ୨୩ ତାରିଖରେ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ କରିପାରନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ଏହାହେବ ମୋଦି ସରକାରର ତୃତୀୟ ପାଳିର ପ୍ରଥମ ବଜେଟ । ୨୪ ନିର୍ବାଚନରେ ମୋଦି ଗ୍ଯାରେଣ୍ଟି ଥିଲା ବିଜେପିର ଏକ ପ୍ରମୁଖ ପ୍ରତିଶ୍ରୁତି । ଏବେ ସେହି ସବୁ ପ୍ରତିଶ୍ରୁତି ପୂରଣ କରିବା ମୋଦି ସରକାରର ପ୍ରାଥମିକତା ରହିବା ସହ ଚ୍ଯାଲେଞ୍ଜ ଭରା ହେବ । ଦ୍ବିତୀୟ ପାଳିର ୨୦୧୯-୨୦ ବଜେଟରେ ମୋଦି ସରକାରଙ୍କ ଫୋକସ୍ କ’ଣ ଥିଲା ? ୨୦୨୪-୨୫ ର ଅନ୍ତରୀଣ ବଜେଟରେ କାହାକୁ ଗୁରୁତ୍ବ ଦିଆଯାଇଥିଲା, ତାହା ଉପରେ ଥରେ ନଜର ପକାନ୍ତୁ ।
୨୦୧୯-୨୦ ଆର୍ଥିକ ବର୍ଷ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ବିତୀୟ ପାଳିର ପ୍ରଥମ ବଜେଟ୍ । ମୁଖ୍ୟତଃ ଭିତ୍ତିଭୂମିର ବିକାଶ ଓ ଦେଶର ଅର୍ଥନୀତିକୁ ଆହୁରି ସୁଦୃଢ଼ କରିବା ବଜେଟର ମୂଳ ଆଭିମୁଖ୍ୟ ଥିଲା । ଦେଶର ଅର୍ଥନୀତିକୁ ୫ ଟ୍ରିଲିୟନରେ ପହଞ୍ଚାଇବା ପାଇଁ ବଜେଟରେ ହୋଇଥିଲା ବ୍ୟୟ ବରାଦ । ଗ୍ରାମାଞ୍ଚଳ ଲୋକଙ୍କ ଆର୍ଥିକ ଅବସ୍ଥାରେ ପରିବର୍ତ୍ତନ ଆଣିବା ପାଇଁ ବଜେଟରେ ହୋଇଥିଲା ବ୍ୟୟ ବରାଦ । ଏହି ବଜେଟରେ ମଧ୍ୟବିତ୍ତଙ୍କ ପାଇଁ ନିର୍ଦ୍ଦିଷ୍ଟ ଭାବେ କୌଣସି ଯୋଜନା ବାବଦରେ ବ୍ୟୟ ବରାଦ ହୋଇ ନଥିଲା । ସେହିବର୍ଷ ବଜେଟ୍ ଆକାର ଥିଲା ୨୭ ଲକ୍ଷ ୮୬ ହଜାର ୩୪୯ କୋଟି ଟଙ୍କା । ପ୍ରତ୍ୟକ୍ଷ କର ବ୍ୟବସ୍ଥାରେ ରିହାତିକୁ ୫ ଲକ୍ଷ ଟଙ୍କାକୁ ବୃଦ୍ଧି କରିଥିଲେ କେନ୍ଦ୍ର ସରକାର । ଖାଲି ସେତିକି ନୁହେଁ, ଟିକସ ଦାତା ଯେପରି ସେମାନଙ୍କର ଆୟର ସବୁ ହିସାବ ଟିକିନିଖି ଭାବେ ଆୟକର ବିଭାଗ ପାଖରେ ଦାଖଲ କରିବେ ସେ ନେଇ ଟିକସ ଫାଇଲ ବ୍ୟବସ୍ଥାରେ ସରଳୀକରଣ କରାଯାଇଥିଲା ।
ମଧ୍ୟବିତ୍ତ ହେଉ କି ଗରିବ ଲୋକ ଯେପରି ବିମାନ ଯାତ୍ରାର ସୁବିଧା ପାଇବେ, ସେଥିପାଇଁ ଉଡାନ ଯୋଜନାରେ ଅଧିକ ବ୍ୟୟ ବରାଦ କରି ସବୁ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ବିମାନବନ୍ଦର ପ୍ରତିଷ୍ଠା କରିବା କେନ୍ଦ୍ର ସରକାର ଲକ୍ଷ୍ୟ ରଖିଥିଲେ । ଖୁଚୁରା ବ୍ୟବସାୟୀଙ୍କୁ ପ୍ରଧାନମନ୍ତ୍ରୀ କର୍ମ ଯୋଗୀ ମନ ଧନ ଯୋଜନା ମାଧ୍ୟମରେ ପେନସନ ଦେବାକୁ ହୋଇଥିଲା ବ୍ୟବସ୍ଥା । ଆର୍ଥିକ ଅନଗ୍ରସର ଲୋକଙ୍କୁ କମ ସୁଧରେ ସୁବିଧାରେ ଗୃହ ଋଣ ସମେତ ଅଣୁ, କ୍ଷୁଦ୍ର, ମଧ୍ୟମ ଶିଳ୍ପ ପାଇଁ କର୍ପୋରେଟ୍ ଟିକସ ୧୫ ପ୍ରତିଶତରୁ ହ୍ରାସ କରାଯାଇଥିଲା । ମୁଦ୍ରା, ଉଜ୍ଜଳା ଓ ସୌଭାଗ୍ୟ ଯୋଜନାରେ ଗରିବ ଲୋକଙ୍କ ଆର୍ଥିକ ରୂପାନ୍ତରଣ ପାଇଁ ପ୍ରସ୍ତୁତ କରାଯାଇଥିଲା ରୋଡମ୍ୟାପ୍ ।
ସେହିପରି ଏବର୍ଷ ନିର୍ବାଚନ ପୂର୍ବରୁ ଗତ ଫେବୃଆରୀରେ ୨୦୨୪-୨୫ ଆର୍ଥିକ ବର୍ଷ ପାଇଁ ଅନ୍ତରୀଣ ବଜେଟ୍ ଆଗତ କରିଥିଲେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ବଜେଟ୍ ଆକାର ଥିଲା ୪୭ ଲକ୍ଷ ୬୦ ହଜାର କୋଟି । ମହିଳା, ଚାଷୀ, ଆତ୍ମନିର୍ଭର ଭାରତକୁ ଗୁରୁତ୍ବ ଦେଇ କେନ୍ଦ୍ର ସରକାର ପ୍ରସ୍ତୁତ କରିଥିଲେ ବଜେଟ୍ । ୩ କୋଟି ଲକ୍ଷପତି ଦିଦି ସୃଷ୍ଟି କରିବା ସହିତ ଶକ୍ତି କ୍ଷେତ୍ରରେ ଆତ୍ମନିର୍ଭର ହେବାକୁ ସୌରଶକ୍ତି ବିକାଶ ଦ୍ବାରା ଲୋକଙ୍କୁ ୩୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି ଦେବାକୁ ହୋଇଛି ବ୍ୟୟ ବରାଦ । ୨୦୭୦ ସୁଦ୍ଧା ପ୍ରଦୂଷଣ ମାତ୍ରା ଶୂନ କରିବାକୁ ଅକ୍ଷୟ ଶକ୍ତି ବିକାଶକୁ ଜୋର ଦିଆଯାଇଛି । ଗରିବ କଲ୍ୟାଣ ଯୋଜନା ଦ୍ବାରା ୨୫ କୋଟି ଗରିବ ଦାରିଦ୍ର ସୀମାରେଖା ଉପରକୁ ଉଠିଛନ୍ତି । ୯ରୁ ୧୪ ବର୍ଷ ବୟସର ଝିଅଙ୍କୁ ସର୍ଭାଇକାଲ କ୍ୟାନସର ଟୀକାକରଣ ପାଇଁ ବଜେଟରେ ଅର୍ଥ ବ୍ୟୟ ବରାଦ ହୋଇଛି । ଆଗାମୀ ୫ ବର୍ଷରେ ୨ କୋଟି ଅତିରିକ୍ତ ପିଏମ ଆବାସ ନିର୍ମାଣ ପାଇଁ ଲକ୍ଷ୍ୟ ରହିଥିବା ବେଳେ ୨୦୨୪-୨୫ ଆର୍ଥିକ ବର୍ଷରେ ୮୦ ହଜାର ୬୭୧ ଆବାସିକ ଗୃହ ନିର୍ମାଣ ପାଇଁ କେନ୍ଦ୍ର ବଜେଟରେ ଅର୍ଥ ପ୍ରଦାନ କରାଯାଇଛି ।
ନୂଆ ଟିକସ ବ୍ୟବସ୍ଥାରେ ପ୍ରତ୍ୟକ୍ଷ ଆୟକର ଦାତାଙ୍କ ପାଇଁ ୭ ଲକ୍ଷ ଟଙ୍କା ପର୍ଯ୍ୟନ୍ତ ଆୟ ଉପରେ କୌଣସି ଟିକସ ଦେବାକୁ ପଡ଼ିବନି । କିନ୍ତୁ ଆୟକର ଛାଡ଼ ସୀମା ପୁରୁଣା ଓ ନୂଆ ଟିକସ ବ୍ୟବସ୍ଥାରେ ଯଥାକ୍ରମେ ଅଢ଼େଇ ଲକ୍ଷ ଓ ତିନି ଲକ୍ଷ ଟଙ୍କା ପର୍ଯ୍ୟନ୍ତ ଅପରିବର୍ତ୍ତିତ ରଖାଯାଇଛି ।
ଭୁବନେଶ୍ବର: ନଦୀର ସୁରକ୍ଷା ପାଇଁ ରାଜ୍ୟ ସରକାର ବଜେଟର ଗୁରୁତ୍ବ ଦିଅନ୍ତୁ । ମହାନଦୀ ସମେତ ଅନ୍ଯାନ୍ଯ ନଦୀର ସୁରକ୍ଷା ପାଇଁ ନୂଆ ସରକାରଙ୍କ ନିକଟରେ ଏଭଳି ଦାବି ରଖିଛି ମହାନଦୀ ବଞ୍ଚାଓ ଆନ୍ଦୋଳନ । ମହାନଦୀ ପ୍ରସଙ୍ଗରେ ଓଡିଶାକୁ ହକ ମିଳିବା ଓ ରାଜ୍ୟର ସମସ୍ତ ନଦୀ ତଥା ଜଳାଶୟର ସୁରକ୍ଷା ନିହାତି ଆବଶ୍ୟକ । ବର୍ତ୍ତମାନର ବିଜେପି ସରକାର ନଦୀ ସୁରକ୍ଷା ଓ ଚାଷ ଉପରେ ଗୁରୁତ୍ୱ ଦେବା କଥା କହୁଥିବାରୁ ବଜେଟରେ ଏଥିପାଇଁ ସ୍ବତନ୍ତ୍ର ବ୍ୟବସ୍ଥା କରିବାକୁ ପ୍ରସ୍ତାବ ଦିଆଯାଇଛି । ପ୍ରମୁଖ ରାଜ୍ୟରେ ଜଳ ସଂକଟ ବ୍ୟାପକ ରୂପ ନେଉଥିବା ବେଳେ ଓଡ଼ିଶାରେ ସେଭଳି ସ୍ଥିତି ଯେପରି ସୃଷ୍ଟି ନହେବ ସେଥିପାଇଁ ଧ୍ଯାନ ଦେବାକୁ ବିଶେଷଜ୍ଞମାନେ ମତ ରଖିଛନ୍ତି ।
ମହାନଦୀରେ ସ୍ବାଭାବିକ ହେଉ ଜଳ ପ୍ରବାହ । ନଦୀ ନହେଉ ପ୍ରଦୂଷିତ । କରା ନଯାଉ ବେଆଇନ ନିର୍ମାଣ । ରାଜ୍ୟରେ ମହାନଦୀ ସମେତ ଅନ୍ୟାନ୍ୟ ନଦୀ ତଥା ଜଳାଶୟର ସୁରକ୍ଷା ପାଇଁ ଆସନ୍ତା ବଜେଟରେ ସ୍ୱତନ୍ତ୍ର ବ୍ୟବସ୍ଥା କରିବାକୁ ଦାବି କରିଛି ମହାନଦୀ ବଞ୍ଚାଓ ଆନ୍ଦୋଳନ । ନଦୀଗୁଡିକର ଏକ ସ୍ୱତନ୍ତ୍ର ସର୍ଭେ କରାଯିବା ସହ ଇନଷ୍ଟ୍ରିମ ବ୍ୟାରେଜ ନିର୍ମାଣ ପାଇଁ ସର୍ବାଧିକ ଗୁରୁତ୍ୱ ଦେବାକୁ ବିଜେପି ସରକାର ନିକଟରେ ଦାବି ହୋଇଛି । ଦିନକୁ ଦିନ ଭୂତଳ ଜଳସ୍ତର ଖସିବାରେ ଲାଗିଛି । ଓଡ଼ିଶାର ଜୀବନରେଖା ମହାନଦୀ ଶୁଖିଲା ପଡୁଛି । ଯାହାକି ପରିବେଶ ଓ ଚାଷ ଉପରେ ବଡ଼ ପ୍ରଭାବ ପକାଉଛି । ଏଣୁ ବଜେଟରେ ଏସବୁର ସମାଧାନ ପାଇଁ ଆର୍ଥିକ ବ୍ୟୟବରାଦ କରିବାକୁ ଦାବି ହୋଇଛି ।
ବିଶେଷଜ୍ଞଙ୍କ କହିବା ଅନୁସାରେ ରାଜ୍ୟର ସାମଗ୍ରିକ ପ୍ରଗତି ପାଇଁ ଚାଷ ଓ ଚାଷୀଙ୍କ ଉନ୍ନତି ନିହାତି ଆବଶ୍ୟକ । ଚାଷ ପାଇଁ ଜଳସେଚନ ଜରୁରୀ । ଯଦି ରାଜ୍ୟର ନଦୀ ଓ ଜଳାଶୟଗୁଡିକ ଏଭଳି ଶୁଖିଲା ରହିବ ତା’ହେଲେ ଚାଷ କରାଯାଇପାରିବ ନାହିଁ । ଏଣୁ ରାଜ୍ଯର ଅର୍ଥନୈତିକ ପ୍ରଗତି ତଥା ଚାଷୀଙ୍କୁ ନ୍ୟାୟ ପ୍ରଦାନ ପାଇଁ ପ୍ରଥମେ ନଦୀକୁ ସୁରକ୍ଷା ଦେବା ଆବଶ୍ୟକ ବୋଲି କୁହାଯାଇଛି ।
ଛତିଶଗଡ଼ର ମାନମାନି ଯୋଗୁଁ ଓଡ଼ିଶାରେ ମହାନଦୀ ଶୁଖିଲା ପଡିଛି । ବାରମ୍ବାର ଆନ୍ଦୋଳନ ପରେ ମଧ୍ୟ କିଛି ସୁଫଳ ମିଳୁନାହିଁ । ତେଣୁ ରାଜ୍ୟର ନୂଆ ବିଜେପି ସରକାର ଏହାକୁ ଗୁରୁତ୍ୱ ଦେଇ କାର୍ଯ୍ୟ କରିବେ ବୋଲି ସବୁ ମହଲରେ ଆଶା ପ୍ରକାଶ ପାଇଛି ।
ପୁରୀ: ଓଡ଼ିଶାର ମୁଖ୍ୟ ଶାସନ ସଚିବ ଦାୟିତ୍ବ ଗ୍ରହଣ କରିବା ପରେ ପୁରୀରେ ମନୋଜ ଆହୁଜା । ପୁରୀରେ ପହଞ୍ଚିବା ପରେ ପଟ୍ଟିଦିଅଁଙ୍କ ଦର୍ଶନ କରିଛନ୍ତି ମନୋଜ । ପ୍ରଦୀପ ଜେନାଙ୍କ କାର୍ଯ୍ଯକାଳ ସରିବା ପରେ ସେ ଓଡ଼ିଶାର ନୂଆ ମୁଖ୍ୟ ଶାସନ ସଚିବ ଭାବେ ଆଜି ଦାୟିତ୍ବ ଗ୍ରହଣ କରିଛନ୍ତି । ମୁଖ୍ୟ ଶାସନ ସଚିବ ସହିତ ସେ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ ବିଭାଗର ସଚିବ ଭାବେ ମଧ୍ୟ ଦାୟିତ୍ଵ ଗ୍ରହଣ କରିଛନ୍ତି । ବିଦାୟୀ ସିଏସ ପ୍ରଦୀପ ଜେନା ମନୋଜଙ୍କୁ ଦାୟିତ୍ବ ହସ୍ତାନ୍ତର କରିଛନ୍ତି ।
୧୯୯୦ ବ୍ୟାଚ ବରିଷ୍ଠ ଆଇଏଏସ ଅଫିସର ହେଉଛନ୍ତି ମନୋଜ ଆହୁଜା । ନିକଟରେ କେନ୍ଦ୍ର ଡେପୁଟେସନରୁ ଫେରିଥିଲେ । କେନ୍ଦ୍ରରେ ୨୦୨୨ ଫେବୃଆରୀରୁ କୃଷି ସଚିବ ଦାୟିତ୍ଵରେ ଥିଲେ ମନୋଜ । ୨୦୧୭ରେ କେନ୍ଦ୍ରୀୟ ଡେପୁଟେସନରେ ଯିବା ପରେ ଲାଲ ବାହାଦୂର ଶାସ୍ତ୍ରୀ ଏକାଡେମୀର ସ୍ଵତନ୍ତ୍ର ନିର୍ଦ୍ଦେଶକ ଭାବେ କାମ କରିଥିଲେ । ୨୦୨୦ରେ କେନ୍ଦ୍ର ଶିକ୍ଷାମନ୍ତ୍ରାଳୟରେ ସେ ସିବିଏସଇ ଅଧ୍ୟକ୍ଷ ଭାବେ ଦାୟିତ୍ଵରେ ରହିଥଲେ । ଖୋର୍ଦ୍ଧା ଜିଲ୍ଲାପାଳ ଭାବେ କ୍ଯାରିୟର ଆରମ୍ଭ କରିଥିଲେ ମନୋଜ । ଏହାପରେ ୨୦୦୯ରେ ଖାଦ୍ୟ ଯୋଗାଣ ସଚିବ, ୨୦୧୦ରେ ଖଣି ଇସ୍ପାତ ବିଭାଗ ସଚିବ ହୋଇଥିଲେ । ୨୦୧୨ରେ କ୍ରୀଡ଼ା ଯୁବ ବ୍ଯାପାର ଓ ୨୦୧୨ରୁ ୨୦୧୫ ପର୍ଯ୍ୟନ୍ତ ବାଣିଜ୍ୟ କର କମିଶନର ଥିଲେ । ୨୦୧୫ରେ ସମବାୟ ବିଭାଗର ସଚିବ ଦାୟିତ୍ଵ ଗ୍ରହଣ କରିଥିଲେ ।
କୋଣାର୍କ: ସେ ଘୋଡ଼ା ନଥିଲା । ସେ ଥିଲା ତା’ ପୁଅ । ସାଥୀ ସହ ମିଶି ପୂରା ପରିବାର ପେଟକୁ ଦେଉଥିଲା ଦାନା । ନାଁ ତା’ର ସୁଲତାନ । ହେଲେ ଆଜି ସୁଲତାନ ନାହିଁ । ସାଥୀ ଘୋଡ଼ା ଏଣେ ତେଣେ ଚାହିଁ ତାକୁ ଖୋଜୁଛି । ଆଉ ମାଲିକ ଅସ୍ତରଙ୍ଗ ନିକଟ ଦେବୀ ନଦୀ କୂଳରେ ବସି ଆଖିରୁ ଲୁହ ଗଡ଼ାଉଛି । କାରଣ ଏହି ଦେବୀ ନଦୀରେ ପଡ଼ି ଚାଲିଯାଇଛି ସୁଲତାନର ଜୀବନ । ଏବେ ଗୋଟିଏ ଘୋଡ଼ା ସହ ଅସହାୟ ମାଲିକ ଘରକୁ କେମିତି ଫେରିବ ? ପରିବାର କେମିତି ଚଳିବ ସେହି ଚିନ୍ତାରେ କାନ୍ଦି ପକାଉଛନ୍ତି ।
ସୂଚନା ଅନୁସାରେ, ଦିଲ୍ଲୀର ମହମ୍ମଦ ଅନସାରୀ । ତାଙ୍କ ପାଖରେ ଥିଲେ ଦୁଇଟି କଳା ଘୋଡ଼ା । ଏହି ଦୁଇ ଘୋଡ଼ାଙ୍କୁ ସାଙ୍ଗରେ ଧରି ଗାଁରୁ ଗାଁ ବୁଲି ଅନସାରୀ ମୁଦି ବିକ୍ରି କରୁଥିଲେ । ଯାହା ରୋଜଗାର ହେଉଥିଲା, ସେଥିରେ ପରିବାର ଚଳୁଥିଲା । ଦୁଃଖ କଷ୍ଟରେ ଦିନ କଟୁଥିଲେ ବି ପରିବାର ଓ ନିଜ ପିଲା ଭଳି ଦୁଇ ଘୋଡ଼ାଙ୍କୁ ନେଇ ବେଶ ଖୁସି ଥିଲେ ଅନସାରୀ । ହେଲେ ବିଧିର ବିଧାନ ଥିଲା ଭିନ୍ନ । ଦୁଇ ଘୋଡ଼ାଙ୍କୁ ଧରି ଅନସାରୀ କୋଣାର୍କ ଅଞ୍ଚଳକୁ ଆସିଥିଲେ । ଗାଁରୁ ଗାଁ ବୁଲି ସେ ମୁଦି ବେପାର କରୁଥିଲେ । ହେଲେ ଅସ୍ତରଙ୍ଗ ନିକଟ ଝାଡ଼ଲିଙ୍ଗ ଗାଁ ଦେବୀ ନଦୀରେ ଘଟିଲା ଅଘଟଣ ।
ଝାଡ଼ଲିଙ୍ଗ ଗାଁରେ ଘୋଡା ଗାଡ଼ି ବୁଲାଇ ଅନସାରୀ ଦେବୀ ନଦୀ ବନ୍ଧରେ ଫେରୁଥିଲେ । ନଦୀ ବନ୍ଧରେ ଦୁଇ ଘୋଡ଼ାଙ୍କୁ ନେଇ ଯାଉଥିଲେ ଅନସାରୀ । କିଛି ଦୂରରୁ ଶାମୁକା ପୋଡ଼ା ଗନ୍ଧ ଆସୁଥିବାରୁ ସୁଲତାନ ବୁଲି ପଡିଥିଲା । ନଦୀ ବନ୍ଧ ସଂକୀର୍ଣ୍ଣ ଥିବାରୁ ଘୋଡା ଭିଡୁଥିବା ଗାଡିର ପଛ ଚକା ଦେବୀ ନଦୀର ପଥର ବନ୍ଧରେ ଖସି ଯାଇଥିଲା । ଫଳରେ ସୁଲତାନ ଭାରସାମ୍ୟ ହରାଇ ନଦୀରେ ପଡ଼ି ଯାଇଥିଲା । ତାକୁ ଉଦ୍ଧାର କରିବାକୁ ଅନସାରୀ ବହୁତ ଚେଷ୍ଟା କରିଥିଲା । ସ୍ଥାନୀୟ ଲୋକେ ମଧ୍ୟ ଘୋଡ଼ାଟିକୁ ଉଦ୍ଧାର କରିବାକୁ ଉଦ୍ୟମ କରିଥିଲେ । ହେଲେ ଦେବୀ ନଦୀର ପ୍ରଖର ସ୍ରୋତରେ ସୁଲତାନକୁ ଉଦ୍ଧାର କରିବା ସମ୍ଭବ ହୋଇ ନଥିଲା । ଫଳରେ ନଦୀରେ ବୁଡ଼ି ସୁଲତାନର ମୃତ୍ୟୁ ଘଟିଥିଲା ।
ସୁଲତାନର ମୃତ୍ୟୁ ପରେ ଭାଙ୍ଗି ପଡ଼ିଛନ୍ତି ଅନସାରୀ । ସେଇ ନଦୀରେ ସୁଲତାନର ମୃତଦେହକୁ ଭସାଇ ଦେଇଛନ୍ତି । ଆଖିରୁ ଝରି ପଡୁଛି ଅନବରତ ଲୁହର ଧାର । ପିଲା ଭଳି ପାଳି ଥିବା ସୁଲତାନକୁ ହରାଇ ସେ ଯେତିକି ମର୍ମାହତ ହୋଇପଡ଼ିଛନ୍ତି, ତା’ଠୁ ଅଧିକ ଘାରିଛି ଏବେ ପରିବାର କେମିତି ଚଳିବ । କାରଣ ଗୋଟିଏ ଘୋଡ଼ାରେ ତ ଗାଡି ଟାଣି ହେବନି ଓ ଆଉ ଗୋଟିଏ ଘୋଡ଼ା କିଣି ଯୋଡ଼ି ବନାଇବାକୁ ତାଙ୍କ ପାଖରେ ସମ୍ଭଳ ନାହିଁ ।
ଘୋଡ଼ାଟିର ମୃତ୍ୟୁ ନା କେବଳ ଅନସାରୀଙ୍କୁ ଭାଙ୍ଗି ଦେଇଛି ତାହା ନୁହେଁ । ସ୍ଥାନୀୟ ଲୋକଙ୍କ ମଧ୍ୟରେ ଘୋଡ଼ାଟିର ଅକାଳ ମୃତ୍ୟୁରେ ଶୋକର ଛାୟା ଖେଳିଯାଇଛି । ସ୍ଥାନୀୟ ଗ୍ରାମବାସୀଙ୍କ ସାହାଯ୍ଯରେ ଅନ୍ୟ ଘୋଡା ଓ ଅନସାରୀଙ୍କୁ ଦିଲ୍ଲୀ ପଠାଇବାର ବ୍ଯବସ୍ଥା କରାଯାଉଛି । ଘୋଡା ଓ ମାଲିକକୁ ଦିଲ୍ଲୀ ପଠାଇବାର ବ୍ଯବସ୍ଥା କରିବାକୁ ସ୍ଥାନୀୟ ଲୋକେ ପ୍ରଶାସନକୁ ନିବେଦନ କରିଛନ୍ତି ।
ସୋନପୁର: ଠକି ଦେଲା ବିହନ କମ୍ପାନୀ । ନକଲି ଧାନ ବିହନ ବୁଣି ଚାଷୀ ହତାଶ । ଅନ୍ନପୂର୍ଣା କମ୍ପାନୀର ବାହାଦୁର ଧାନ ବିହନ ଚାଷୀଙ୍କୁ କଲା ହତାଶ । ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲିରେ ଏକର ଏକର ଜମିରେ ଚାଷୀ ବାହାଦୁର ଧାନ ଚାଷ କରିଥିଲେ । ହେଲେ ଧାନ ଜାଗାରେ ଉଠିଛି ଘାସ । କମ୍ପାନୀ ଠକି ଦେଇଥିବା ଅଭିଯୋଗ କରିଛନ୍ତି ଚାଷୀ l
କମ୍ପାନୀ ମାଲେମାଲ, ଚାଷୀ ହତାଶ l ନକଲି ଧାନ ବିହନ ଚାଷୀ ପେଟକୁ ମାରିଛି ଲାତ l ଅନ୍ନପୂର୍ଣା କମ୍ପାନୀର ବାହାଦୁର ଧାନ ବିହନ ଚାଷୀଙ୍କୁ ଠକି ଦେଇଛି । ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲିରେ ଏକର ଏକର ଜମିରେ ଚାଷୀ ବାହାଦୁର ଧାନ ଚାଷ କରିଥିଲେ । ଧାନ ତଳି ଉଠିବା ବଦଳରେ ଉଠିଛି ଘାସ ଗଛ । ବାହାଦୁର କମ୍ପାନୀ ପକ୍ଷରୁ ଠକେଇ ହୋଇଥିବା ଅଭିଯୋଗ ଆଣିଛନ୍ତି ଚାଷୀ l ଡୁଙ୍ଗୁରିପାଲି ବ୍ଲକ ଅନ୍ତର୍ଗତ ଲରିଆବାହାଲ ଗାଁର ଜିତୁ ହାତୀ ତିନି ଏକର, ଠେଙ୍ଗାନାଲର ଇନ୍ଦ୍ରମଣି ବଗର୍ତ୍ତୀ ତିନି ଏକର, ପlଙ୍କେଲର କେନାଲୁ ଆଡବାଙ୍କ ଦୁଇ ଏକରରୁ ଅଧିକ ଜମିରେ ଚାଷ କରିଥିଲେ ବି ଫସଲ ଶୂନ୍ଯ । ଧାନ ନୁହେଁ ଘାସରେ ଭର୍ତ୍ତି ହୋଇଯାଇଛି ବିଲ ।
ଧାର ଉଧାର କରି ଚାଷ କାମ ଆରମ୍ଭ କରିଥିଲେ ଶତାଧିକ ଚାଷୀ । ବାହାଦୁର ଧାନରୁ ଭଲ ଫସଲ ହେବାର ଦୃଢ ଆଶା ବାନ୍ଧିଥିଲେ । ହେଲେ ଧାନ ବଦଳରେ ବିଲ ସାରା ଉଠିଛି ଘାସ ଗଛ । କମ୍ପାନୀ ପକ୍ଷରୁ କ୍ଷତିପୂରଣ ଦେବାକୁ ଦାବି କରିଛନ୍ତି ଚାଷୀ l ଏପଟେ କମ୍ପାନୀ କର୍ତ୍ତୃପକ୍ଷ କହିଛନ୍ତି, ଧାନ ବିହନ କମ୍ପାନୀରୁ ଯାଇଥିଲା । ଧାନ ଚାଷ ନହେବାରେ କମ୍ପାନୀର କୌଣସି ଭୁଲ ନାହିଁ। l ଅନ୍ୟପଟେ କୃଷି ବିଭାଗ ପାଖକୁ ସେଭଳି ଚାଷୀଙ୍କ ପାଖରୁ ଅଭିଯୋଗ ଆସି ନଥିବା କହିବା ସହ ଅଭିଯୋଗ ଆସିଲେ ତଦନ୍ତ କରି କମ୍ପାନୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି କୃଷି ଜିଲ୍ଲା ଅଧିକାରୀ ବିପିନ ଉଦଘାତା କହିଛନ୍ତି l
