ନନ୍ଦିଘୋଷ ବ୍ୟୁରୋ: କଳିଙ୍ଗ ପୁରସ୍କାର ବନ୍ଦ ପାଇଁ ଚକ୍ରାନ୍ତ। କେନ୍ଦ୍ରକୁ ନବୀନଙ୍କ କଡ଼ା ଚିଠି । ଧରାପଡିଲା ବିଜେପି ସରକାରଙ୍କ ଷଡ଼ଯନ୍ତ୍ର । ୟୁନେସ୍କୋ କଳିଙ୍ଗ ପୁରସ୍କାର ବନ୍ଦ । ଏହାକୁ ପୁଣି ଚାଲୁ କରିବାକୁ କେନ୍ଦ୍ର ବିଜ୍ଞାନ ଓ କାରିଗର କୌଶଳ ମନ୍ତ୍ରୀ ଜିତେନ୍ଦ୍ର ପ୍ରସାଦଙ୍କୁ ଚିଠି ଲେଖିଛନ୍ତି ବିରୋଧୀ ଦଳ ନେତା ନବୀନ ପଟ୍ଟନାୟକ । ୧୯୫୨ ମସିହାରୁ ଆରମ୍ଭ ହୋଇଥିବା ଏହି ପୁରସ୍କାର ବର୍ତ୍ତମାନ ସୁଦ୍ଧା ୭୨ ଜଣ ବିଶିଷ୍ଟ ବୈଜ୍ଞାନିକ ଓ ୭ ଜଣ ନୋବେଲ ପୁରସ୍କାର ବିଜେତାଙ୍କୁ ପ୍ରଦାନ କରାଯାଇଛି । ୟୁନେସ୍କୋର ବଦାନ୍ୟତା ଯୋଗୁ ଏହି ପୁରସ୍କାର ଆନ୍ତର୍ଜାତୀୟ ମାନ୍ୟତା ଲାଭ କରିଥିଲା । ୧୯୫୧ ମସିହାରେ ପ୍ରବାଦ ପୁରୁଷ ବିଜୁ ପଟ୍ଟନାୟକ ଏହି ପୁରସ୍କାର ବିଜ୍ଞାନ ଓ ଗବେଷଣାକୁ ଲୋକପ୍ରିୟ କରିବାକୁ ଆରମ୍ଭ କରିଥିଲେ । କେନ୍ଦ୍ରମନ୍ତ୍ରୀ ଜିତେନ୍ଦ୍ର ପ୍ରସାଦ ନିଜେ ଏହି ଘଟଣାରେ ହସ୍ତକ୍ଷେପ କରି ପୁରସ୍କାରକୁ ପୁଣି ଲାଗୁ କରିବାକୁ ଅନୁରୋଧ କରିଛନ୍ତି ନବୀନ । ଓଡ଼ିଶାର ଗର୍ବ ଓ ସ୍ୱାଭିମାନ ହେଉଛି କଳିଙ୍ଗ ପୁରସ୍କାର। କଳିଙ୍ଗ ପୁରସ୍କାର ଅନୁଦାନ ବନ୍ଦ କରିଛି କେନ୍ଦ୍ର। ଏହି ପୁରସ୍କାର ବନ୍ଦ କରି ମିଛ ଓଡ଼ିଆ ଅସ୍ମିତାର ପ୍ରମାଣ ଦେଇଛି ବିଜେପି ସରକାର। ସାଧାରଣରେ ଏହାକୁ ନେଇ ବଢ଼ୁଛି ତୀବ୍ର ଅସନ୍ତୋଷ। ଓଡ଼ିଶା ସରକାର ସବୁ ଜାଣି ନିରବ ରହିଛନ୍ତି ବିଜେପି ସରକାର। ଏପରିକି କଳିଙ୍ଗ ପୁରସ୍କାରକୁ ଅନୁଦାନ ବନ୍ଦ ନେଇ ମଧ୍ୟ ରାଜ୍ୟ ସରକାରଙ୍କ ପକ୍ଷରୁ କୌଣସି ପ୍ରତିକ୍ରିୟା ମଧ୍ୟ ପ୍ରକାଶ ପାଉନାହିଁ।
ଦୁର୍ଘଟଣାରେ ଚାଲିଗଲେ ବାପା ଓ ମାଆ, ଅଳ୍ପକେ ବତ୍ତିଲା ନାବାଳକ ପୁଅ
ନବରଙ୍ଗପୁର : ବୋଲବମ ଯାତ୍ରା ହେଲା ଶେଷ ଯାତ୍ରା। ବୋଲବମରୁ ଫେରିବା ବାଟରେ ବାଇକ ସହ ଟ୍ରକର ମୁହାଁମୁହିଁ ଧକ୍କା ହୋଇ ଚାଲିଗଲା ଜୀବନ। ବାପା, ମାଆଙ୍କ ମୃତ୍ଯୁ ହୋଇଥିବାବେଳେ ଅଳ୍ପକେ ବର୍ତ୍ତିଲା ନାବାଳକ ପୁଅ। ନବରଙ୍ଗପୁର ଉମରକୋଟ କୁନ୍ଦେଇ ରାବଣାଗୁଡାରେ ଘଟିଛି ଏ ମର୍ମନ୍ତୁଦ ସଡକ ଦୁର୍ଘଟଣା। ମୃତକ ହେଲେ ଅଜିତ ମଜୁମଦାର ଓ ଦୀପିକା ମଜୁମଦାର । ଛତିଶଗଡରେ ରହିଥିବା ସିହାବା ଶୈବପୀଠରେ ପାଣି ଢାଳି ଘରକୁ ଫେରିବା ସମୟରେ ବାଇକକୁ ଧକ୍କା ଦେଇଥିଲା ଟ୍ରକ। ଦୁର୍ଘଟଣାକୁ ନେଇ ଘଟଣାସ୍ଥଳରେ ଚାପା ଉତ୍ତେଜନା ସୃଷ୍ଟି ହୋଇଥିଲା। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହକୁ ଜବତ କରିବା ସହ ଉତ୍ତେଜିତ ଲୋକଙ୍କୁ ବୁଝା ସୁଝା କରିଛି।
ବିଜେପିର ପ୍ରତିଶ୍ରୁତି ପାଣିର ଗାର: ନବୀନ
ନନ୍ଦିଘୋଷ ବ୍ୟୁରୋ: ନିର୍ବାଚନୀ ଇସ୍ତହାରରେ ବିଜେପି ଦେଇଥିବା ପ୍ରତିଶୃତି ପୁରଣ ନକରିବା ନେଇ ନବୀନଙ୍କ ପ୍ରତିକ୍ରିୟା । ବିଜେପି ପ୍ରତିଶ୍ରୁତି ପାଣିରେ ଗାର ବୋଲି କହିଲେ ନବୀନ । ବିଜେପି ତାର ନିର୍ବାଚନୀ ଘୋଷଣାପତ୍ରରେ ଭତ୍ତାଧାରୀଙ୍କୁ ୩,୦୦୦ ତଥା ୩,୫୦୦ ଟଙ୍କା ଭତ୍ତା ପ୍ରଦାନ ପାଇଁ ପ୍ରତିଶ୍ରୁତି ଦେଇଥିଲା। ଏଥିରେ ବୟସ୍କ, ଭିନ୍ନକ୍ଷମ, ବିଧବା ତଥା ନିରାଶ୍ରୟମାନେ ସାମିଲ ଥିଲେ। ହେଲେ ବଜେଟରେ କୁହାଯାଉଛି ଯେ କେବଳ ୮୦ ବର୍ଷ ବୟସରୁ ଅଧିକ ବୟସ୍କ ଏବଂ ୮୦% ଅକ୍ଷମତା ଥିବା ଭିନ୍ନକ୍ଷମ ଏହି ବର୍ଦ୍ଧିତ ଭତ୍ତା ପାଇବେ । ଏହାସହିତ ୪୫,୦୦୦ କୋଟି ଟଙ୍କାର ଋଣ ନେଇ ମଧ୍ୟ ଘୋଷଣା ପାଳନ କରାଯାଉ ନାହିଁ।
ଏଥିରୁ ପୁରା ସ୍ପଷ୍ଟ ହେଉଛି, ବିଜେପିର ପ୍ରତିଶ୍ରୁତି ପାଣିର ଗାର ପାଲଟିଛି। ଭତ୍ତାଧାରୀ ବୟସ୍କ ତଥା ସମସ୍ତ ଓଡ଼ିଶାବାସୀଙ୍କ ସହ ପ୍ରତାରଣା ହୋଇଛି। ଏପରି ପ୍ରତାରଣା ଲୋକଙ୍କ ଭିତରେ ଜନ ଅସନ୍ତୋଷ ବଢ଼ାଇଛି।
ଏନେଇ ୧୬ ଅଗଷ୍ଟରୁ ବିଜେଡି ଜନଜାଗରଣ ଅଭିଯାନ ଆରମ୍ଭ କରିବାକୁ ଯାଉଛି। ପ୍ରତି ପଞ୍ଚାୟତରେ ଏନେଇ ସଚେତନତା କାର୍ଯ୍ୟକ୍ରମ କରାଯିବ। ବୟୋଜ୍ୟେଷ୍ଠଙ୍କ ଅଧିକାର ପାଇଁ ବିଜେଡି ଆଗକୁ ବାହାରିବ। ପ୍ରତିଟି କର୍ମୀ ତଥା ସଚେତନ ନାଗରିକ ଏଥିରେ ସାମିଲ ହୋଇ ଲୋକଙ୍କୁ ବିଜେପିର ପ୍ରତାରଣା ବିଷୟରେ ଜାଗ୍ରତ କରିବେ।
ଏହା ସହିତ ନବୀନ କହିଛନ୍ତି ମୁଁ ଆଶା କରୁଛି, ବିଜେପି ଓଡ଼ିଶାର ଲୋକଙ୍କୁ ଭୁଆଁ ନ ବୁଲେଇ, ପ୍ରଦାନ କରିଥିବା ପ୍ରତିଶ୍ରୁତି ପାଳନ କରିବ। ବିଜେପି ନିଜ ପ୍ରତିଶ୍ରୁତି ପୂରଣ ନ କରିବା ପର୍ଯ୍ୟନ୍ତ ଓଡ଼ିଶାବାସୀଙ୍କ ନିକଟରେ ଏହାକୁ ପହଞ୍ଚାଇବା ପାଇଁ ବିଜେଡି ସର୍ବଦା ନିଜର ଅଭିଯାନ ଜାରି ରଖିବ।
ଆଳୁ ସଂକଟ ପାଇଁ ସରକାରଙ୍କ ପୂର୍ବପ୍ରସ୍ତୁତି ଅଭାବକୁ ଦାୟୀ କଲା ବିଜେଡ଼ି
ନନ୍ଦିଘୋଷ ବ୍ୟୁରୋ: ଆଳୁଠାରୁ ରାଜ୍ୟରେ ବାଂଲାଦେଶୀ ଅନୁପ୍ରବେଶ ଓ ରେଳ ପ୍ରକଳ୍ପ ଆଦି ବିଭିନ୍ନ ପ୍ରସଙ୍ଗକୁ ନେଇ ସରକାରଙ୍କୁ ଘେରିଛି ବିଜେଡ଼ି । ଆଳୁ ସଂକଟ ଦୂର କରିବାରେ ରାଜ୍ୟ ସରକାର ବିଫଳ ହୋଇଛନ୍ତି ବୋଲି ବିଜେଡ଼ି ଅଭିଯୋଗ କରିଛି । ଏହା ସହିତ ରାଜ୍ୟରେ ରହୁଥିବା ସମସ୍ତଙ୍କୁ ସୁରକ୍ଷା ଦେବା ସରକାରଙ୍କ କର୍ତ୍ତବ୍ୟ ବୋଲି ସରକାରଙ୍କୁ ମନେ ପକାଇ ଦେଇଛି ବିଜେଡି । ଭୁବନେଶ୍ୱରରେ ବିଜେଡି ମୁଖ୍ୟାଳୟ ଶଂଖ ଭବନରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଜେଡି ନେତା ତଥା ନବୀନ ପଟ୍ଟନାୟକଙ୍କ ରାଜନୈତିକ ସଚିବ ସଂତୃପ୍ତ ମିଶ୍ର ବିଭିନ୍ନ ପ୍ରସଙ୍ଗକୁ ନେଇ ସରକାରଙ୍କୁ ଟାର୍ଗେଟ୍ କରିଛନ୍ତି ।
ଆଳୁ ସଂକଟ ଦୂର କରିବାରେ ସରକାର ବିଫଳ
ଆଳୁ ଦରବୃଦ୍ଧି ଓ ଅଭାବ ପ୍ରସଙ୍ଗରେ ରାଜ୍ୟ ସରକାରଙ୍କୁ ଟାର୍ଗେଟ କରି ସଂତୃପ୍ତ ମିଶ୍ର କହିଥିଲେ ଯେ, ମୁଖ୍ୟମନ୍ତ୍ରୀ ମୋହନ ମାଝୀ,ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ସହିତ କଣ କଥା ହୋଇଛନ୍ତି ଆମେ ଜାଣିନୁ । ଆଳୁ ଦର କେମିତି କମିବ, ସାଧାରଣ ଲୋକଙ୍କ କଷ୍ଟ କେମିତି ଦୂର ହେବ, କଳା ବଜାରି ଉପରେ କେମିତି ଅଙ୍କୁଶ ଲାଗିବ ତାହା ଆମର ଚିନ୍ତା । ସରକାର ଆଗରୁ ପ୍ରୋଆକ୍ଟିଭ ହୋଇ କାମ କରିଥିଲେ, ଏପରି ପରିସ୍ଥିତି ସୃଷ୍ଟି ହୋଇ ନଥାନ୍ତା । ସରକାର ଅନ୍ୟ ଜାଗାରୁ ଆଳୁ ଆଣି ପାରିଥାନ୍ତେ । ବିଜେଡି ସମୟରେ ଏପରି ହେଉ ନଥିଲା କାରଣ ସେତେବେଳେ ସରକାରଙ୍କ ପୂର୍ବପ୍ରସ୍ତୁତି ଥିଲା।
ବାଂଲାଦେଶୀ ଅନୁପ୍ରବେଶ ଓ ସୁରକ୍ଷା
ସମସ୍ତଙ୍କ ସାମ୍ବିଧାନିକ ଅଧିକାରକୁ ସମ୍ମାନ ଦେବା ବିଜେଡ଼ିର ନୀତି । ଭାରତୀୟ ନାଗରିକଙ୍କ ସୁରକ୍ଷା ରାଜ୍ୟ ସରକାରଙ୍କ ଦାୟିତ୍ୱ । ଓଡ଼ିଶାରେ ଵି ଯିଏ ଅଛନ୍ତି, ସେମାନଙ୍କ ସୁରକ୍ଷା ଵି ଓଡ଼ିଶା ସରକାରଙ୍କ ଦାୟିତ୍ୱ । ଯେଉଁ ମାନେ ନାଗରିକ ନୁହେଁ, ତାଙ୍କୁ ଚି଼ହ୍ନଟ କରନ୍ତୁ ।
ରେଳ ପ୍ରକଳ୍ପକୁ ନେଇ ସରକାରଙ୍କୁ ଟାର୍ଗେଟ୍
ସାତ ବର୍ଷ ତଳେ ଘୋଷଣା ହୋଇଥିବା ରେଳ ପ୍ରକଳ୍ପକୁ ପୁଣି ଘୋଷଣା କରିବାର କଣ ଆବଶ୍ୟକ ପଡିଲା ବୋଲି ବିଜେଡି ପ୍ରଶ୍ନ କରିଛି । ପୁରୁଣା ପ୍ରକଳ୍ପ ବାବଦରେ ପୁଣି ଘୋଷଣା କରିବାର କାରଣ କ’ଣ , ତାହା କିଛି ଜଣା ପଡୁନି ବୋଲି ବିଜେଡ଼ି କହିଛି । ସାତ ବର୍ଷ ତଳେ ଯଦି ବଜେଟରେ ଥିଲା, ତାହା କାହିଁକି କାର୍ଯ୍ୟକାରୀ ହୋଇ ନଥିଲା ଏବଂ ତାକୁ ପୁଣି ଥରେ ନୂଆ କରି କରିବା ଉଦ୍ଦେଶ୍ୟ କଣ ବୋଲି ପ୍ରଶ୍ନ କରିଛନ୍ତି ସଂତୃପ୍ତ ମିଶ୍ର ।
ପଶ୍ଚିମବଙ୍ଗର ଜଲପାଇଗୁଡି ଶିଲିଗୁଡିରେ ଦୁର୍ଘଟଣା, ୭ମୃତ
ନନ୍ଦିଘୋଷ ବ୍ୟୁରୋ: ବୋଲବମ ହେଲା ଶେଷଯାତ୍ରା । ଶିବଙ୍କୁ ଜଳଲାଗି କରିବା ପାଇଁ ଯାଉଥିବାବେଳେ ରାସ୍ତାରୁ ନେଇଗଲା ଯମ । ପଶ୍ଚିମବଙ୍ଗର ଜଲପାଇଗୁଡି ଶିଲିଗୁଡିରେ ମର୍ମନ୍ତୁଦ ଦୁର୍ଘଟଣା । କାଉଡିଆ ଶିବ ମନ୍ଦିରରେ ପାଣି ଢାଳିବାକୁ ଯାଉଥିବା ବେଳେ ଘଟିଲା ଦୁର୍ଘଟଣା । ଦ୍ରୁତ ଗତିରେ ଆସୁଥିବା ଟ୍ରକରେ ଚାପି ହୋଇ ୭ ଜଣଙ୍କ ମୃତ୍ୟୁ ହୋଇଥିବା ବେଳେ ୫ଜଣ ଗୁରୁତର ଆହତ ହୋଇଛନ୍ତି । କାଉଡିଆ ଚାଲି ଚାଲି ଯାଉଥିବା ବେଳେ ଟ୍ରକ ଧକ୍କା ଦେଇଥିଲା । ଘଟଣା ସ୍ଥଳରେ ୬ ଜଣ ମୃତ ହୋଇଛି। ଆହତ ସମସ୍ତଙ୍କୁ ନିକଟରେ ଥିବା ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରା ଯାଇଛି । ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ଟ୍ରକ ଚାଳକ ଫେରାର ଅଛନ୍ତି ।
ମୁଖ୍ୟଯନ୍ତ୍ରୀ ତାରାପ୍ରସାଦଙ୍କ ଘରେ ମିନି ଜୁଏଲାରୀ ଦୋକାନ
ଭୁବନେଶ୍ବର: ଘର ନୁହେଁତ ଅଳଙ୍କାର ଦୋକାନ । ଘରେ ରହିଛି ଅଳଙ୍କାର ଦୋକାନ ଭଳି ପୁଳା ପୁଳା ସୁନା ଓ ଦାମୀ ଗହଣା । ସରକାରୀ ଟଙ୍କାରେ ବାବୁ ଜଣକ ଚାକଚକ୍ୟ ଜୀବନ ବିତାଉଥିଲେ । ସୁନା ଗହଣା ସହ, ସୁନା ବିସ୍କୁଟ, ସୁନା ଓ ରୂପା କଏନ, ଭିନ୍ନ ଭିନ୍ନ ଡିଜାଇନର ଦାମୀ ଘଣ୍ଟା ଏବଂ ବିଦେଶୀ ମୁଦ୍ରା ଠାବ ହୋଇଛି। ଏସବୁ ଦେଖିଲେ ଲାଗୁଛି ଯେମିତି ବାବୁଙ୍କ ଘରେ ମିନି ଜୁଏଲାରୀ ହୋଇଥିଲା। ନିଜର ଚାକିରି ସମସୟରେ ଏତେ ପରିମାଣର ସୁନା ଗହଣା, ଏକାଧିକ ଫ୍ଲାଟ୍ କିଭଳି କିଣିଲେ ସେ ନେଇ ଖୋଳତାଡ କରୁଛି ଭିଜିଲାନ୍ସ।
ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ପୂର୍ବତନ ମୁଖ୍ୟଯନ୍ତ୍ରୀ ତାରାପ୍ରସାଦ ମିଶ୍ରଙ୍କ ଘରେ ଚଢାଉ କରିଛି ଭିଜିଲାନ୍ସ । ଭୁବନେଶ୍ଵର, କଟକ ଓ ଝାରସୁଗୁଡ଼ା ସମେତ ୯ଟି ସ୍ଥାନରେ ଚାଲିଛି ଏକକାଳୀନ ରେଡ। କୋଉଠି କାନ୍ଥରେ ବନ୍ଧୁକ ଟଙ୍ଗା ହୋଇଛିତ ଆଉ କେଉଁଠୁ ମିଳିଛି ବ୍ରାଣ୍ଡେଡ଼ ଘଣ୍ଟା ଓ ବ୍ରାଣ୍ଡେଡ଼ ଚଷମା ଏବଂ ବିଦେଶୀ ମୁଦ୍ରା । ଏବେବି ଭିଜିଲାନ୍ସ ଚଢାଉ ଜାରି ରଖିଛି।
ଭିଜିଲାନ୍ସ ଚଢାଉରେ ୪୦ରୁ ଅଧିକ ଅଧିକାରୀ ସାମିଲ ହୋଇଛନ୍ତି । ୧୨ ଡିଏସପି, ୧୨ ଇନ୍ସପେକ୍ଟର ଓ ୧୬ ଜଣ ଏଏସଆଇଙ୍କ ସମେତ ଅନ୍ୟ କର୍ମଚାରୀଙ୍କୁ ନେଇ ଚାଲିଛି ବିଭିନ୍ନ ସ୍ଥାନରେ ରେଡ୍। ଭୁବନେଶ୍ଵର ନୟାପଲ୍ଲୀ ଅର୍ପଣ ଆପାର୍ଟମେଣ୍ଟରେ ଥିବା ବାସଭବନରେ ଚାଲିଛି ରେଡ। ଏହାସହ ଭୁବନେଶ୍ଵର କସମୋପଲିସରେ ଥିବା ଦୁଇଟି ଫ୍ଲାଟ, ଝାରସୁଗୁଡ଼ାରେ ଥିବା ଆଶିଆନା ଆପାର୍ଟମେଣ୍ଟରେ ଥିବା ୩ଟି ଫ୍ଲାଟ ଏବଂ କଟକ ଆଠଗଡରେ ଥିବା ପୈତୃକ ଘର ଏବଂ ଜଣେ ସମ୍ପର୍କୀୟଙ୍କ ଘରେ ରେଡ କରୁଛି ଭିଜିଲାନ୍ସ । ଭୁବନେଶ୍ଵର ନୟାପଲ୍ଲୀ ନୀଳକଣ୍ଠନଗରରେ ଥିବା ଜଣେ ସମ୍ପର୍କୀୟଙ୍କ ଘରେ ମଧ୍ୟ ଭିଜିଲାନ୍ସ ରେଡ କରୁଛି।
ସେଣ୍ଟ୍ ମାର୍ଟିନ ଦ୍ୱୀପ ଉପରେ କ’ଣ ପାଇଁ ଆମେରିକାର ଆଖି ?
ନନ୍ଦିଘୋଷ ବ୍ୟୁରୋ: ବାଂଲାଦେଶ ବିଦ୍ରୋହ ପରେ ଶେଖ ହାସିନା ଭାରତରେ ଆଶ୍ରୟ ନେଇଛନ୍ତି । ଛାତ୍ର ଓ ବିରୋଧୀ ଦଳଙ୍କ ମିଳିତ ମେଣ୍ଟ ଆଗରେ ହାସିନ ଅସ୍ତ୍ରତ୍ୟାଗ କରି ଭାରତ ପଳାୟନ କରିଥିଲେ । ତେବେ ଭାରତ ଆସିବା ପରେ ଶେଖ ହାସିନା ବିଦ୍ରୋହ ପଛରେ ଆମେରିକାର ହାତ ଥିବା ଦାବି କରିଥିଲେ । ସେ କହିଥିଲେ ଯେ, ଆମେରିକା ବାଂଲାଦେଶର ସେଣ୍ଟ୍ ମାର୍ଟିନ୍ ଦ୍ୱୀପକୁ ତା’ର ସାମରିକ ଘାଟି ପାଇଁ ଚାହୁଁଥିଲା । ତେବେ ଏହି ଦ୍ୱୀପକୁ ହସ୍ତାନ୍ତର କରିବାକୁ ମନା କରିବାରୁ ତାଙ୍କ ବିରୋଧରେ ଆମେରିକା ଷଡ଼ଯନ୍ତ୍ର କରିଥିଲା । ଏମିତିରେ ମନକୁ ପ୍ରଶ୍ନ ଉଠିପାରେ ଯେ, କ’ଣ ପାଇଁ ଆମେରିକା ସେଣ୍ଟ୍ ମାର୍ଟିନ୍ ଦ୍ୱୀପକୁ ଏତେ ଆଗ୍ରହୀ ? ଆସନ୍ତୁ ଉତ୍ତର ଜାଣିବା ।
ସେଣ୍ଟ୍ ମାର୍ଟିନ୍ ଦ୍ୱୀପର ଇତିହାସ
ବଙ୍ଗୋପସାଗର ଉତ୍ତର-ପୂର୍ବ ଭାଗରେ ସେଣ୍ଟ୍ ମାର୍ଟିନ୍ ଦ୍ୱୀର ରହିଛି । ମାତ୍ର ତିନି ବର୍ଗ କିଲୋମିଟରର ଏହି ଦ୍ୱୀପ ଉପରେ ଆମେରିକାଠାରୁ ଚୀନ୍ ସମସ୍ତଙ୍କ ଆଖି ରହିଛି । କକ୍ସ ବଜାର-ଟ୍ୟାଙ୍କଫ ଉପଦ୍ୱୀପଠାରୁ ପ୍ରାୟ ୯ କିମି ଦୂରରେ ଥିବା ଏହି ଦ୍ୱୀପକୁ ମଧ୍ୟ ନାରିକେଳ ଓ ଡାଲଚିନ ଦ୍ୱୀପ ବୋଲି କୁହାଯାଏ । କାରଣ ଏହି ଦ୍ୱୀପରେ ପ୍ରଚୁର ପରିମାଣରେ ନଡ଼ିଆ ଓ ଡାଲଚିନ ଗଛ ଦେଖିବାକୁ ମିଳେ । ଏହା ବାଂଲାଦେଶର ଏକମାତ୍ର ପ୍ରବାଳ ଦ୍ୱୀପ । ଏହି ଦ୍ୱୀପର ଜନସଂଖ୍ୟା ପ୍ରାୟ ୩ ହଜାର ୭ଶହ । ଦ୍ୱୀପ ବାସିନ୍ଦାଙ୍କ ମୁଖ୍ୟ ଜୀବିକା ହେଉଛି ମାଛ ଧରିବା,ଧାନଚାଷ ଓ ନଡ଼ିଆ ଚାଷ । ଏଠାରୁ ଧାନ ଓ ନଡ଼ିଆ ମିଆଁମାରକୁ ରପ୍ତାନୀ ହୋଇଥାଏ । ଅଷ୍ଟାଦଶ ଶତାବ୍ଦୀରେ ଆରବ ବ୍ୟବସାୟୀ ମାନେ ଏହି ଦ୍ୱୀପରେ ଅଟକିବା ଆରମ୍ଭ କରିଥିଲେ । ସେବେଠାରୁ ଏଠାରେ ଲୋକ ରହିବା ଆରମ୍ଭ ହୋଇଥିଲା । ଆରବ ବ୍ୟବସାୟୀ ଏହାକୁ ‘ଜଜିରା’ ନାମ ଦେଇଥିଲେ । ୧୯୦୦ ମସିହାରେ ଏହାକୁ ବ୍ରିଟେନ ଭାରତରେ ସାମିଲ କରିଥିଲା । ଜଣେ ଖ୍ରୀଷ୍ଟିଆନ ପାଦ୍ରିଙ୍କ ନାମ ଅନୁସାରେ ଏହାର ନାମ ସେଣ୍ଟ୍ ମାର୍ଟିନ ହୋଇଥିଲା । ୧୯୭୪ ମସିହାର ବୁଝାମଣା ଅନୁସାରେ ମିଆଁମାର ଏହି ଦ୍ୱୀପ ଉପରୁ ନିଜ ଦାବି ଛାଡି ଦେଇଥିଲା ।
ସାମରିକ ମହତ୍ୱ
ବଙ୍ଗୋପସାଗର ମଧ୍ୟରେ ଏହି ଦ୍ୱୀପ ଏମିତି ସ୍ଥାନରେ ଅଛି ଯାହାର ସାମରିକ ଗୁରୁତ୍ୱ ଢେର ଅଧିକ । ଆମେରିକା ଏହି ଦ୍ୱୀପରେ ସାମରିକ ଘାଟି ସ୍ଥାପନ କରିବାକୁ ଚାହୁଁଛି ଯାହାଫଳରେ ଏହା ଚୀନ ଉପରେ ନଜର ରଖି ପାରିବ । ଏହି ଦ୍ୱୀପଠାରୁ ଚୀନ୍ ଓ ମିଆଁମାର ଭଳି ଦେଶର ଦୂରତା କମ । ଦ୍ୱୀପରେ ସାମରିକ ଘାଟି ଦ୍ୱାରା ଆମେରିକା ଚୀନକୁ ଚେକମେଟ୍ କରିବାକୁ ଚାହୁଁଛି । ୨୦୨୩ରେ ଶେଖ ହାସିନା ଆମେରିକା ବିରୋଧରେ ସେଣ୍ଟ୍ ମାର୍ଟିନକୁ ନେଇ ଅଭିଯୋଗ ଆଣିଥିଲେ । ସେ ଅଭିଯୋଗ କରିଥିଲେ ଯେ, ଆମେରିକା ସେଠାରେ ଏକ ସାମରିକ ଘାଟି ସ୍ଥାପନ ପାଇଁ ବଂଲାଦେଶ ସରକାରଙ୍କ ଉପରେ ଚାପ ପକାଉଛି ।
ଭଦ୍ରକ ଲେଖିକା ସଂସଦର ବର୍ଷା ଆସର ଓ ପୁସ୍ତକ ଲୋକାର୍ପଣ
ଭଦ୍ରକ: ଭଦ୍ରକ ଲେଖିକା ସଂସଦ ତରଫରୁ ଆୟୋଜିତ ବର୍ଷା ଆସର ‘ ଟୁପଟୁପ ବର୍ଷା ଓ ପୁସ୍ତକ ଲୋକାର୍ପଣ ଗତକାଲି ମହେନ୍ଦ୍ର ଭବନ ପରିସରରେ ସଭାନେତ୍ରୀ ଝରଣା ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି । ଏହାର ପ୍ରଥମ ପ୍ରସ୍ଥରେ ବର୍ଷା କବିତାର ସଂଚାଳିକା ଭାବରେ ଅଧ୍ୟାପିକା ଉଷାରାଣୀ ଜେନା ଓ ଡ.ମମତା ସାହୁ ଯୋଗ ଦେଇଥିଲେ । ପଚାଶରୁ ଉର୍ଦ୍ଧ୍ବ କବି,କବୟିତ୍ରୀ ସେମାନଙ୍କର କବିତା ପାଠ କରିଥିଲେ । ଦ୍ୱିତୀୟ ପ୍ରସ୍ଥରେ ଶ୍ରୀମତୀ ଜାନକୀ ପାଢ଼ୀ ଅତିଥିଙ୍କୁ ମଞ୍ଚ ଆମନ୍ତ୍ରଣ କରିବା ପରେ ଅତିଥିମାନଙ୍କ ଦ୍ଵାରା ପ୍ରଥମେ ପ୍ରଦୀପ ପ୍ରଜ୍ଵଳନ କରା ଯିବା ସମୟରେ କବି ଓ କଳାକାର ବିଜୟ ବହଳୀ ବେଦପାଠ କଲାପରେ ଶ୍ରୀମତୀ ମନୋରମା ରାୟ ଅତିଥିମାନଙ୍କୁ ପୁଷ୍ପଗୁଚ୍ଛ ପ୍ରଦାନ କରିଥିଲେ । ଭଦ୍ରକ ଲେଖିକା ସଂସଦର ସମ୍ପାଦିକା ଡ.ସୋମା ଚାନ୍ଦ ଅତିଥିମାନଙ୍କୁ ସ୍ଵାଗତ କରିବାପରେ ଶ୍ରୀମତୀ ଗୀତାରାଣୀ ଆଇଚ ଅତିଥି ପରିଚୟ ରଖିଥିଲେ । ଏହି ଅବସରରେ ଡ.ସୋମା ଚାନ୍ଦଙ୍କର ଦୁଇଟି ପୁସ୍ତକ ‘ କାଚଘର ‘ ଓ ସମୟ ପୃଷ୍ଠାରେ ନାରୀ ‘ଉନ୍ମୋଚିତ ହୋଇଥିଲା । ଡ.ରାଧାରାଣୀ ମହାପାତ୍ର ଏହି ଅବସରରେ ଡ. ଶଶଧର ଦାସଙ୍କୁ ତାଙ୍କରଜନ୍ମଦିନ ଅବସର ରେ ସଂସଦ ତରଫ ରୁ ଶୁଭେଛା ଜଣାଇଥିଲେ। ଆଜିର ସମ୍ମାନିତ ଅତିଥି ଅଞ୍ଜୁମନ୍ ଆରା ପ୍ରଥମଥର ପାଇଁ ଭଦ୍ରକ ଆସିଥିବାରୁ ଖୁସି ବ୍ୟକ୍ତ କରିବା ସହିତ ସାହିତ୍ୟ ଓ ସାହିତ୍ୟିକମାନଙ୍କ ଭୂମିକା ଓ ଭବିଷ୍ୟତ ସମ୍ପର୍କରେ କହିଥିଲେ ।ମୁଖ୍ୟବକ୍ତା ଶ୍ରୀଯୁକ୍ତ ନିରାକାର ଦାସ କବିତା ଦୁର୍ଲଭ ଓ କବିର ଭାଵନା ସର୍ବଶ୍ରେଷ୍ଠ ବୋଲି କହିଥିଲେ । ବିଶିଷ୍ଟ କବି ହୃଦାନନ୍ଦ ପାଣିଗ୍ରାହୀ ବର୍ଷା ସମ୍ପର୍କରେ ଆଲୋଚନା କରିଥିଲେ । ମୁଖ୍ୟ ଅତିଥି ବିଶିଷ୍ଠ ଗାଳ୍ପିକା ତଥା ସାରସ୍ବତ ସାଧିକା ଡ.ବାସନ୍ତୀ ମହାନ୍ତି ସାହିତ୍ୟ ସମାଜର ପ୍ରତିଛବି ବୋଲି ବକ୍ତବ୍ୟ ରଖିଥିଲେ । ଲେଖିକା ସଂସଦକୁ ଭଲ ପାଉଥିବା ବହୁ ସାହିତ୍ୟିକ ଓ ବୁଦ୍ଧିଜୀବୀ ଏହି ଆସରରେ ଯୋଗ ଦେଇଥିଲେ । ଶ୍ରୀମତୀ ଚୈତାଳୀ ଖିଲାର ଧନ୍ୟବାଦ ଦେଇଥିଲେ ।
ହିଣ୍ଡେନବର୍ଗ ରିପୋର୍ଟର ପ୍ରଭାବ : ଆଦାନୀ ଗ୍ରୁପ ସେୟାରରେ ୭ ପ୍ରତିଶତ ହ୍ରାସ, ନିବେଶକଙ୍କର ଡୁବିଲା ୫୩ ହଜାର କୋଟି ଟଙ୍କା
ମୁମ୍ବାଇ : ଦଲାଲ ଷ୍ଟ୍ରିଟରେ ସୋମବାର ଦିନ ଆଦାନୀ ଗ୍ରୁପର ସେୟାର ଚିତପଟାଙ୍ଗ ମାରିଛି । ହିଣ୍ଡେନବର୍ଗର ରିପୋର୍ଟ ପ୍ରଭାବରେ ଆଦାନୀ ଗ୍ରୁପର ବିଭିନ୍ନ କମ୍ପାନିର ସେୟାର ମୂଲ୍ୟରେ ୭ ପ୍ରତିଶତ ହ୍ରାସ ଆସିଛି । ଫଳରେ ନିବେଶକ ୫୩ ହଜାର କୋଟି ଟଙ୍କା ହରାଇଛନ୍ତି । ସୋମବାର ଦିନ ବଜାର ଖୋଲିବା ସହିତ ସୂଚକାଙ୍କର ହାଲୁକା ହ୍ରାସ ପରିଲକ୍ଷିତ ହୋଇଥିଲା । ସେନସେକ୍ସ ୪୨୫ ପଏଣ୍ଟ ହ୍ରାସ ସହିତ ୭୯ ହଜାର ୩୩୦ରେ ଖୋଲିଥିଲା । ସେହିଭଳି ନିଫ୍ଟି ସୂଚକାଙ୍କ ୪୭ ପଏଣ୍ଟ ହ୍ରାସ ସହିତ ୨୪ ହଜାର ୩୨୦ରେ ଖୋଲିଥିଲା । ତେବେ ରିପୋର୍ଟ ଲେଖଯିବା ବେଳକୁ ସୂଚକାଙ୍କ ୨୪ ହଜାର ୪୦୨ ଥିଲା ।
ନିବେଶକ ହରାଇଲେ ୫୩ ହଜାର କୋଟି ଟଙ୍କା
ଆଦାନୀ ବନାମ ହିଣ୍ଡନବର୍ଗ ମାମଲାରେ ସେବି ମୁଖ୍ୟ ମାଧବୀ ବୁଚଙ୍କ ନାମ ଆସିବା ପରେ ନିବେଶକ ସୁରକ୍ଷିତ ରହିବାକୁ ପସନ୍ଦ କରିଥିଲେ । ଯାହାଫଳରେ ସୋମବାର ସକାଳେ ଆଦାନୀ ଗ୍ରୁପର ବିଭିନ୍ନ କମ୍ପାନୀର ସେୟାର ମୂଲ୍ୟରେ ୭ ପ୍ରତିଶତ ହ୍ରାସ ହୋଇଥିଲା । ନିବେଶକ ମୋଟ ୫୩ ହଜାର କୋଟି ଟଙ୍କା ହରାଇଥିବା ଅନୁମାନ କରାଯାଉଛି । ୧୦ ଆଦାନୀ ସେୟାରର ମିଶ୍ରିତ ବଜାର ପୁଞ୍ଜିକରଣ ୧୬.୭ ଲକ୍ଷ କୋଟି ଟଙ୍କା ପର୍ଯ୍ୟନ୍ତ ହ୍ରାସ ପାଇଥିଲା ।
ଆଦାନୀ ଷ୍ଟକରେ ୭ ପ୍ରତିଶତ ହ୍ରାସ
ଆଦାନୀ ଗ୍ରୀନ ଏନର୍ଜି ସେୟାରେ ସବୁଠାରୁ ଅଧିକ କ୍ଷତି ହୋଇଥିଲା । କାରଣ ବିଏସଇରେ ଏହା ୭ ପ୍ରତିଶତ ହ୍ରାସ ପାଇ ଏହା ୧୬୫୬ ଟଙ୍କାର ଇଣ୍ଟ୍ରାଡେ ଲୋ’ ସ୍ତରକୁ ଛୁଇଁଥିଲା । ତେବେ ପରେ ଏଥିରେ କିଛିଟା ରିକଭରି ହୋଇଥିଲା । ସେହିଭଳି ଆଦାନୀ ପାୱାରରେ ୪ ପ୍ରତିଶତ ହ୍ରାସ ହୋଇଥିଲା । ଆଦାନୀ ୱିଲମର,ଆଦାନୀ ଏନର୍ଜି ସଲ୍ୟୁସନ ଓ ଆଦାନୀ ଏଣ୍ଟରପ୍ରାଇଜେସର ସେୟାର ମୂଲ୍ୟରେ ମଧ୍ୟ ପ୍ରାୟ ୩ ପ୍ରତିଶତର ହ୍ରାସ ଆସିଥିଲା ।
ସୂଚନାଯୋଗ୍ୟ ଯେ, ଶନିବାର ଦିନ ଆମେରିକା ସର୍ଟ୍ ସେଲର ହିଣ୍ଟନବର୍ଗ ଆଦାନୀ ଗ୍ରୁପ ଉପରେ ଏକ ନୂଆ ରିପୋର୍ଟ ଜାରି କରିଥିଲା । ଦେଢ ବର୍ଷ ପରେ ଆଦାନୀ ଉପରେ ଜାରି ରିପୋର୍ଟ ପରେ ଏହି ରିପୋର୍ଟ ଆସିଥିଲା । ନୂଆ ରିପୋର୍ଟରେ ଆଦନୀ ଗ୍ରୁପରେ ସେବି ମୁଖ୍ୟ ମାଧବୀ ବୁଚଙ୍କ ପତି ଧବଲ ବୁଚଙ୍କର ଅଂଶଧନ ଥିବା ଦାବି କରାଯାଇଥିଲା । ଯାହାକୁ ମାଧବୀ ଓ ତାଙ୍କ ସ୍ୱାମୀ ଖଣ୍ଡନ କରିଥିଲେ । ମାଧବୀଙ୍କ ଅଭିଯୋଗ ଥିଲା ଯେ,ହିଣ୍ଡନବର୍ଗକୁ କାରଣ ଦର୍ଶାଅ ନୋଟିସ ଜାରି କରାଯାଇଥିବାରୁ ଏଭଳି ମିଥ୍ୟ ରିପୋର୍ଟ ଜାରି କରିଛି । ଅନ୍ୟପକ୍ଷରେ ହିଣ୍ଡନବର୍ଗର ରିପୋର୍ଟକୁ ନେଇ ଦେଶରେ ରାଜନୀତି ଆରମ୍ଭ ହୋଇଛି । ବିରୋଧୀ ଦଳ ମାଧବୀଙ୍କ ଇସ୍ତଫା ଦାବି କରିବା ସହିତ ହିଣ୍ଡନବର୍ଗ ରିପୋର୍ଟ ଉପରେ ଜେପିସି ତଦନ୍ତ ଦାରି କରୁଛନ୍ତି ।
ସିଦ୍ଧେଶ୍ୱରନାଥ ମନ୍ଦିରରେ କେମିତି ହୋଇଥିଲା ଦଳାଚକଟା ?
ବିହାର: ବିହାରର ଜେହାନାବାଦରେ ଅବସ୍ଥିତ ସିଦ୍ଧେଶ୍ୱରନାଥ ମନ୍ଦିରରେ ୭ଜଣଙ୍କ ମୃତ୍ୟୁ ହେବାର ପ୍ରକୃତ କାରଣ ସାମ୍ନାକୁ ଆସିଛି। ଏହି ଦୁର୍ଘଟଣା ମନ୍ଦିର ଭିତରେ ଜଳଲାଗି କରିବାକୁ ଆସିଥିବା ଶ୍ରଦ୍ଧାଳୁଙ୍କ ପାଇଁ ନୁହେଁ ବରଂ ଫୁଲ ବିକ୍ରେତାମାନଙ୍କ ଦ୍ୱାରା ଭକ୍ତଙ୍କ ଉପରେ ହୋଇଥିବା ଆକ୍ରମଣ ଯୋଗୁଁ ଘଟିଥିଲା | ବଡ କଥା ହେଉଛି ଶ୍ରାବଣର ଚତୁର୍ଥ ସୋମବାରରେ ହେବାକୁ ଥିବା ସମ୍ଭାବ୍ୟ ଭିଡ଼କୁ ଦୃଷ୍ଟିରେ ରଖି ବହୁ ସଂଖ୍ୟକ ପୋଲିସ ନିୟୋଜିତ ହୋଇଥିଲେ ମଧ୍ୟ ପୋଲିସ ଏବଂ ପ୍ରଶାସନର କୌଣସି ଅଧିକାରୀ ଘଟଣାସ୍ଥଳରେ ଉପସ୍ଥିତ ନଥିଲେ।
ଘଟଣାସ୍ଥଳରେ ଉପସ୍ଥିତ ଜଣେ ପ୍ରତ୍ୟକ୍ଷଦର୍ଶୀଙ୍କ କହିବାନୁଯାୟୀ ମନ୍ଦିରରେ ଜଳ ଅର୍ପଣ କରିବାକୁ ଯଦି ପୋଲିସ ଘଟଣାସ୍ଥଳରେ ଉପସ୍ଥିତ ଥାଆନ୍ତେ, ବୋଧହୁଏ ଏହି ଘଟଣା ଏତେ ବଡ଼ ହୋଇ ନଥାନ୍ତା | ସୋମବାର ଦିନ ବହୁ ସଂଖ୍ୟାରେ ଭକ୍ତ ମନ୍ଦିରରେ ମହାଦେବଙ୍କୁ ଦର୍ଶନ କରିବାକୁ ପହଞ୍ଚିଥିଲେ । ଲୋକମାନେ ଶାନ୍ତିଶୃଙ୍ଖଳରେ ଭୋଲେନାଥଙ୍କ ଶିବଲିଙ୍ଗରେ ଜଳାଭିଷେକ କରୁଥିଲେ | ଏହି ସମୟରେ ଫୁଲ ବିକ୍ରୟ ପାଇଁ ମନ୍ଦିର ବାହାରେ ବସିଥିବା ଦୋକାନୀମାନଙ୍କର କିଛି ଭକ୍ତଙ୍କ ସହ ଝଗଡା ହୋଇଯାଇଥିଲା । କିଛିସମୟ ଘଟଣାସ୍ଥଳରେ ସମସ୍ତ ଦୋକାନୀମାନେ ଏକତ୍ରିତ ହେଇଯାଇଥିଲେ । | ଏଭଳି ପରିସ୍ଥିତିରେ ମନ୍ଦିରର ମୁଖ୍ୟ ଫାଟକରେ ଉତ୍ତେଜନା ଦେଖାଦେଇଥିଲା।
ମନ୍ଦିରରେ ପୂର୍ବରୁ ଭିଡର ଆଶା କରାଯାଇଥିଲା
ଲୋକମାନେ ଏହି ଗଣ୍ଡଗୋଳରୁ ନିଜକୁ ରକ୍ଷା କରିବା ପାଇଁ ଏପଟ ସେପଟ ଦୌଡାଦୌଡି ଆରମ୍ଭ କରିବାବେଳେ ଦଳାଚକଟା ହୋଇଥିଲା । | ମନୋଜଙ୍କ ଅନୁଯାୟୀ ଏହି ଦୁର୍ଘଟଣାରେ ଅତି କମରେ ୫୦ରୁ ୬୦ ଲୋକ ଆହତ ହୋଇଛନ୍ତି । ଡିଏମ୍ଙ୍କ PRO ପ୍ରକାଶିତ ପ୍ରେସ ନୋଟରେ ସୋମବାର ମନ୍ଦିରରେ ବହୁ ସଂଖ୍ୟାରେ ଜନସମାଗମ ଆଶା କରାଯାଉଥିଲା। ତେଣୁ ବହୁ ସଂଖ୍ୟକ ପ୍ରଶାସନିକ ଅଧିକାରୀ ନିୟୋଜିତ ହୋଇଥିଲେ।
ପୋଲିସର ସିଦ୍ଧାନ୍ତ ପଛଘୁଞ୍ଚା ଦେଇଛି
PRO ଅନୁଯାୟୀ, ମନ୍ଦିରରେ ଫୁଲ ବିକ୍ରେତାଙ୍କ ମଧ୍ୟରେ ଝଗଡା ହେତୁ ଏହି ଦୁର୍ଘଟଣା ଘଟିଛି। ବର୍ତ୍ତମାନ ଘଟଣାର ତଦନ୍ତ ଚାଲିଛି। ଏହାପୂର୍ବରୁ ପୋଲିସ ଦାବି କରିଥିଲା ଯେ ଭକ୍ତଙ୍କ ମଧ୍ୟରେ ଗଣ୍ଡଗୋଳ ହେତୁ ମନ୍ଦିର ଭିତରେ ଦଳାଚକଟା ଘଟିଥିଲା । ତେବେ ନୂଆ ତଥ୍ୟ ଆସିବା ପରେ ପୋଲିସର ସମ୍ପୂର୍ଣ୍ଣ ସିଦ୍ଧାନ୍ତ ବଦଳି ଯାଇଛି। ଏହି ମନ୍ଦିର ଏକ ପାହାଡ ଉପରେ ଅଛି | ଏହି ମନ୍ଦିରଟି ଛୋଟ ହେଇଥିବା ବେଳେ ନିମ୍ନରୁ ମନ୍ଦିରକୁ ପହଞ୍ଚିବା ପାଇଁ ପ୍ରବେଶ ରାସ୍ତା ମଧ୍ୟ ସଂକୀର୍ଣ୍ଣ |
ମୃତକଙ୍କ ପରିବାରକୁ 4 ଲକ୍ଷ ଟଙ୍କା କ୍ଷତିପୂରଣ ମିଳିବ
ଡିଏମଙ୍କ PRO ଅନୁଯାୟୀ, ପରିସ୍ଥିତି ଅନୁଯାୟୀ ପୋଲିସ ଏବଂ ପ୍ରଶାସନିକ ଅଧିକାରୀଙ୍କୁ ଘଟଣାସ୍ଥଳରେ ନିୟୋଜିତ କରାଯାଇଛି। ସେ କହିଛନ୍ତି ଯେ ଦୁର୍ଘଟଣା ପରେ ସିଏମ ନୀତୀଶ କୁମାରଙ୍କ ନିର୍ଦ୍ଦେଶରେ ମୃତକଙ୍କ ପରିବାରକୁ 4 ଲକ୍ଷ ଟଙ୍କା କ୍ଷତିପୂରଣ ପ୍ରଦାନ କରାଯିବ। ଆହତଙ୍କ ପରିବାରକୁ ପ୍ରତ୍ୟେକଙ୍କୁ ୫୦୦୦୦ଟଙ୍କା ଦେବାକୁ ଘୋଷଣା କରାଯାଇଛି। ଏହା ବ୍ୟତୀତ ସମସ୍ତ ଆହତଙ୍କ ପାଇଁ ଉନ୍ନତ ଚିକିତ୍ସା ବ୍ୟବସ୍ଥା କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।