ନନ୍ଦିଘୋଷ ବ୍ୟୁରୋ: ମହାରାଷ୍ଟ୍ର ବିଧାନସଭା ନିର୍ବାଚନ। ଆଜି ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିପାରେ କଂଗ୍ରେସ। ପିସିସି ସଭାପତି ନାନା ପାଟୋଲ ସଙ୍କୋଳି ଆସନରୁ ଲଢିବା ଏକପ୍ରକାର ନିଶ୍ଚିତ ହୋଇଛି। ବିରୋଧୀ ଦଳ ନେତା ବିଜୟ ୱାଦେତିୱାର ବ୍ରାହ୍ମଣପୁରୀ ଆସନରୁ ଲଢିବା ସୂଚନା ମିଳିଛି। କଂଗ୍ରେସ ବିଧାୟକ ଦଳ ନେତା ବାଲାସାହେବ ଥୋରାଟ ସଙ୍ଗମେନରରୁ ଲଢିବେ। ଅନ୍ଯମାନଙ୍କ ମଧ୍ଯରେ ପୂର୍ବତନ ଶକ୍ତିମନ୍ତ୍ରୀ ନୀତୀନ ରାୱତ ଉତ୍ତର ନାଗପୁରରୁ, ପୂର୍ବତନ ମନ୍ତ୍ରୀ ଯଶୋମତି ଠାକୁର ତେଓସାରୁ ଲଢିପାରନ୍ତି। ସେପଟେ ପୂର୍ବ ବିଦର୍ଭର କୌଣସି ଆସନ ଶିବସେନା ୟୁବିଟିକୁ ଛାଡିବାକୁ ପ୍ରସ୍ତୁତ ନୁହେଁ କଂଗ୍ରେସ । ସେପେଟ ମୁମ୍ବାଇ ମହାନଗରୀ ଅନ୍ତର୍ଗତ ବିଧାନସଭା କ୍ଷେତ୍ରକୁ କଂଗ୍ରେସ ଲାଗି ଛାଡିବାକୁ ରାଜି ହୋଇନାହିଁ ଶିବସେନା-ୟୁବିଟି । ମୋଟ ୨୮୮ ଆସନରୁ ୨୬୦ ଆସନ ଲାଗି ଏମଭିଏରେ ବୁଝାମଣା ଚୂଡ଼ାନ୍ତ ହୋଇଛି। ବିବାଦୀୟ ୨୮ଟି ଆସନ ଲାଗି ହୋଇପାରିନି ସହମତି। ଏହି ୨୬ଟି ଆସନରେ ତିନି ଦଳର ହେଭିୱେଟମାନେ ଥିବାରୁ ଚୂଡାନ୍ତ ନିଷ୍ପତ୍ତି ନେଇପାରିନାହାନ୍ତି ତିନି ଦଳ। ବୁଝାମଣା ଅନୁସାରେ କଂଗ୍ରେସ ୧୧୦ରୁ ୧୧୫, ଶିବସେନା(ୟୁବିଟି) ୮୩ରୁ ୮୬, ଏନସିପି(ଏସପି) ୭୨ରୁ ୭୫ ଆସନରେ ଲଢିପାରେ। ସେପଟେ ସମାଜବାଦୀ ପାର୍ଟି ମାଗିଥିବା ୧୨ ଆସନକୁ ନେଇ ଚାଲିଛି ବିଚାରବିମର୍ଷ। ଏସପିର ୨ ବିଧାୟକ ଥିବାରୁ ଏହି ସଂଖ୍ଯା ବଢାଇବା ଲାଗି ଦଳ ଉଦ୍ଯମ କରୁଛି।
କିଏ ହେବ ପିସିସି ସଭାପତି, ନୂଆ ନାଁ ପୁରୁଣା ?
ଭୁବନେଶ୍ବର: ମୁଖିଆ ଖୋଜୁଛି କଂଗ୍ରେସ । କିଏ ହେବେ ପରବର୍ତ୍ତୀ ପିସିସି ସଭାପତି ? ଆସନ୍ତା ୨୬ ଓ ୨୭ ତାରିଖ ଦୁଇ ଦିନ ଧରି ଏଆଇସିସିର ୨ ଜଣ ପ୍ରତିନିଧି ଓଡିଶା କଂଗ୍ରେସ ନେତାଙ୍କ ସହ କରିବେ ମାନସ ମନ୍ଥନ । ନୂଆ ନାଁ ପୁରୁଣା ଚେହେରାକୁ ଦାୟିତ୍ବ ଦେଲେ ଓଡ଼ିଶାରେ ପୁଣି ହାତ ଉଠିବ ତାହାକୁ ନେଇ ବିଚାର ବିମର୍ଶ ଆରମ୍ଭ କରିଛି ଦଳ । ପ୍ରଥମ ଥର ପାଇଁ ନେତାଙ୍କ ମତକୁ ନେଇ ପିସିସି ସଭାପତି ଚୟନ ପ୍ରକ୍ରିୟା କରାଯାଉଥିବାରୁ କଂଗ୍ରେସ ଶିବିରରେ ଉତ୍ସାହର ମାହୋଲ ।
ନେତାଙ୍କ ମତକୁ ନେଇ ହେବ ମୁଖିଆ ଚୟନ। ସଠିକ ନେତୃତ୍ବ ସହ ସଂଗଠନକୁ ମଜଭୁତ କରିବା ଦକ୍ଷତା ଥିବା ନେତାଙ୍କୁ ଖୋଜୁଛି କଂଗ୍ରେସ । ସମସ୍ତଙ୍କୁ ସାଙ୍ଗରେ ନେବା ସହ ବିଜେପିର ମନମୁଖି ଶାସନକୁ ଯିଏ ସଠିକ ଢଙ୍ଗରେ ବିରୋଧ କରିପାରୁଥିବ, ସେଭଳି ନେତାଙ୍କୁ ପିସିସି ସଭାପତି କରିବାକୁ କଂଗ୍ରେସର ଏହି ପ୍ରକ୍ରିୟାକୁ ଶେଷ ପର୍ଯାୟକୁ ନେଇଛି ଦଳ । ଆସନ୍ତ ୨୬ ଓ ୨୬ ତାରିଖରେ AICC ଅଧ୍ୟକ୍ଷ ମଲିକର୍ଜୁନ ଖଡ଼ଗେଙ୍କ ନିର୍ଦ୍ଦେଶରେ ଓଡ଼ିଶା ପାଇଁ ପିସିସି ସଭାପତି ଓ ସାଂଗଠନିକ ସ୍ଥିତି ନେଇ ରିପୋର୍ଟ ପ୍ରସ୍ତୁତ କରିବେ ଛତିଶଗଡ଼ର କଂଗ୍ରେସ ବିଧାୟକ ଦଳ ନେତା ଚରଣ ଦାସ ମହନ୍ତ ଓ ରାହୁଲ ଗାନ୍ଧୀଙ୍କ କୋର ଟିମ ସଦସ୍ୟ ମୀନାକ୍ଷୀ ନଟରାଜନ । ଦୁଇ ଦିନ ଧରି ଓଡ଼ିଶାରେ ଏହି ଦୁଇ ନେତା ରାଜ୍ୟ କଂଗ୍ରେସ ନେତାଙ୍କ ସହ ଆଲୋଚନା କରି ରିପୋର୍ଟ ପ୍ରସ୍ତୁତ କରିବେ । ଯାହାକୁ ନେଇ କଂଗ୍ରେସ ନେତାଙ୍କ ମଧ୍ୟରେ ଉତ୍ସାହ । କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ କହିଛନ୍ତି, ଏଆଇସିସି ପିସିସି ସଭାପତି ବାଛିବା ଲାଗି ନେତାଙ୍କୁ ଦାୟିତ୍ବ ଦେଇଛନ୍ତି । ସେମାନେ ଓଡ଼ିଶା ଆସି ମତାମତ ନେବା ପରେ ପିସିସି ସଭାପତିଙ୍କ ନାଁ ଘୋଷଣା କରାଯିବ ।
ଅନ୍ୟପଟେ ଓଡ଼ିଶାର ପରବର୍ତ୍ତୀ ପିସିସି ସଭାପତି କିଏ ହେବା ତାହାକୁ ନେଇ ଦଳ ଭିତରେ ଚର୍ଚ୍ଚା ଆରମ୍ଭ ହୋଇଛି । ନୂଆ ନା ପୁରୁଣା ଚେହେରା ଦଳର ମଙ୍ଗ ଧରିବେ ସେନେଇ କଂଗ୍ରେସ ନେତାମାନେ ଭିନ୍ନ ଭିନ୍ନ ମତ ଦେଉଛନ୍ତି । ପିସିସି ରେସରେ ପୁରୁଣା ଚେହେରା ଭାବେ ଶ୍ରୀକାନ୍ତ ଜେନା, ଜୟଦେବ ଜେନା, ଶରତ ରାଉତଙ୍କ ନାଁ ଥିବାବେଳେ ନୂଆ ଚେହେରା ଭାବେ ମହମ୍ମଦ ମୋକିମ, ବିଶ୍ବ ରଂଜନ ମହାନ୍ତି, ସପ୍ତଗିରୀ ଉଲାକାଙ୍କ ନାଁ ଆସୁଛି । ଏମାନଙ୍କ ମଧ୍ୟରୁ କେଉଁ ନେତାଙ୍କୁ ଅଧିକ ସମର୍ଥନ ରହିଛି, ତାହା ବୈଠକ ପରେ ସ୍ପଷ୍ଟ ହେବ ବୋଲି କହିଛନ୍ତି ବରିଷ୍ଠ କଂଗ୍ରେସ ନେତା ସନ୍ତୋଷ ସିଂ ସାଲୁଜା ।
ପିସିସି ସଭାପତି ଚୌକିକୁ ନେଇ କଂଗ୍ରେସ ନେତାଙ୍କ ମଧ୍ୟରେ ସବୁବେଳେ ଟଣାଓଟରା ଚାଲିଥାଏ । ୨୦୨୪ ନିର୍ବାଚନ ଫଳାଫଳ ପରେ ଶହେ ଦିନରୁ ଅଧିକ ସମୟ ଧରି ପିସିସି ସଭାପତି ଚେୟାର ଖାଲି ପଡ଼ିବା ଦଳର ସଂଗଠନକୁ ଦୁର୍ବଳ କରିଛି । ଏପରି ସ୍ଥିତିରେ ଓଡ଼ିଶା କଂଗ୍ରେସର ମଙ୍ଗ ହାଇକମାଣ୍ଡ କାହା ହାତରେ ଦେଉଛନ୍ତି ତାହା ଉପରେ ନଜର ।
୪ ମାସର ଶାସନରେ ଅଣନିଃଶ୍ବାସୀ ଓଡ଼ିଶାବାସୀ, ଦରଦାମ ବେଲଗାମ
ଭୁବନେଶ୍ବର: ପରିବା ସହ ବଢ଼ି ବଢ଼ି ଚାଲିଛି ରାସନ ସାମଗ୍ରୀର ଦର । ଚାଉଳ, ଅଟା, ସୁଜି ଓ ତେଲ ଦର ନିୟନ୍ତ୍ରଣ କରିବାରେ ଫେଲ ମାରିଛନ୍ତି ସରକାର । ଅତ୍ୟାବଶ୍ୟକ ରାସନ ସାମଗ୍ରୀ ଦର କଣ୍ଟ୍ରୋଲରେ ନାହିଁ । ୪ ମାସ ଧରି ଅଣନିଃଶ୍ବସୀ ହୋଇ ପଡିଲେଣି ସାଧାରଣ ଲୋକେ । ସ୍ବଳ୍ପ ରୋଜଗାରରେ କିପରି ଘର ଚଳାଇବେ ସେହି ଚନ୍ତାରେ ଖାଉଟି ।
ଅଚ୍ଛେ ଦିନ କହି ଗରିବ ଖାଉଟିଙ୍କୁ କୋରଡ଼ା । ଦର ବଢାଇ ପରୋକ୍ଷରେ କରୁଛନ୍ତି କଲବଲ । ପରିବା ସାଙ୍ଗକୁ ଅତ୍ଯାବଶ୍ଯକ ସାମଗ୍ରୀ ଦରବୃଦ୍ଧି ଯୋଗୁଁ କାନ୍ଦିଲେଣି ଖାଉଟି । ଦର ନିୟନ୍ତ୍ରଣ କରିବାରେ ସରକାର ଫେଲ ମାରିଥିବା ଅଭିଯୋଗ । ସ୍ବଳ୍ପ ଦରମାରେ କିପରି ଘର ଚଳିବ ସେନେଇ ଚିନ୍ତାରେ ଖାଉଟି । ଭଲ ଟିକେ ଖାଇବା କଥା ଛାଡ଼ନ୍ତୁ ଯେତେ ଟଙ୍କା ନେଲେ ବି ବ୍ୟାଗ୍ ଟିକେ ପୁରୁନି । ପରିବାଠାରୁ ଆରମ୍ଭ କରି ରାସନ ସାମଗ୍ରୀ ସବୁ ଦରରେ ଲାଗିଛି ନିଆଁ । ୪ ମାସ ପୂର୍ବରୁ ସବୁ କିଛି ଠିକ ଥିବାବେଳେ ଲଗାତର ଦରବୃଦ୍ଧିକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଲୋକେ ।
ମାସ ତଳେ ସୋରିଷ ତେଲ ଲିଟର ପିଛା ୧୪୦ ଟଙ୍କା ଥିବା ବେଳେ ଏବେ ୧୭୦ରୁ ୧୯୦ । ରିଫାଇନ ତେଲ ୧୧୦ ଥିବାବେଳେ ଏବେ ୧୩୩ରୁ ୧୪୫ । ଅଟା ୪୦ରୁ ବଢି ୪୫ ହେଲାଣି । ସୁଜି କିଲୋ ୪୦ରୁ ବଢି ୬୦ ଛୁଇଁଲାଣି । ଚାଉଳ କିଲୋ ମାସକରେ ୫ ଟଙ୍କା ବଢିଛି । ତାହା ପୁଣି ବିଭିନ୍ନ ବର୍ଗରେ ଭିନ୍ନଭିନ୍ନ ଦର । ସେପଟେ ଅତ୍ୟାବଶ୍ୟକ ସାମଗ୍ରୀ ଦର କାହିଁକି ବଢିଲା କାହା ନିକଟରେ ନାହିଁ ସଠିକ୍ ଉତ୍ତର । ଦରବୃଦ୍ଧିକୁ ନେଇ ସରକାରଙ୍କୁ ଟାର୍ଗେଟ କରିଛି ଛାତ୍ର ସଂଗଠନ । ଶୀଘ୍ର ଦର ନିୟନ୍ତ୍ରଣ କରିବା ଦିଗରେ ଯଦି ରାଜ୍ୟ ସରକାର କୌଣସି ପଦକ୍ଷେପ ନନିଅନ୍ତି ତେବେ ଆଗକୁ ଜୋରଦାର ଆନ୍ଦୋଳନ କରିବା ପାଇଁ ଚେତାବନୀ ଦେଇଛି ସଂଗଠନ ।
ଭଜନ ସମ୍ରାଟ ଭିକାରୀ ବଳଙ୍କ ପ୍ରତିମୂର୍ତ୍ତିକୁ ଅସମ୍ମାନ
କଟକ: ଭଜନ ସମ୍ରାଟ ଭିକାରୀ ବଳଙ୍କ ପ୍ରତିମୂର୍ତ୍ତିକୁ ଅସମ୍ମାନ । ସିଏମସିର ବିକାଶ ଭବନ ପରିସରରେ ଏକ ପରିତ୍ୟକ୍ତ ସ୍ଥାନରେ ପାଲ ଘୋଡାଇ ପ୍ଲାଷ୍ଟିକ ରସିରେ ଟେଲିଫୋନ ଖୁଣ୍ଟରେ ବାନ୍ଧି ରଖାଯାଇଛି ପ୍ରତିମୂର୍ତ୍ତି । ନେତାଜୀ ବସ ଟର୍ମିନାଲ ସମ୍ମୁଖରୁ ରାସ୍ତା ସଂପ୍ରସାରଣ ପାଇଁ ଏକ ବର୍ଷ ତଳେ ହଟାଯାଇ ଥିଲା । ସେବେଠାରୁ ଏଠାରେ ବାନ୍ଧି ରଖାଯାଇଛି । ଯାହାକୁ ବୁଦ୍ଧିଜୀବୀ ଓ ସମାଜ ସେବୀ ନନ୍ଦା କରିବା ସହ ତୁରନ୍ତ ସମ୍ମାନର ସହ ଏହାକୁ ସ୍ଥାନିତ କରିବାକୁ ଦାବି ହୋଇଛି ।
ଭଜନ ସମ୍ରାଟ ଭିକାରୀ ବଳଙ୍କୁ କିଏ ବା ନ ଜାଣେ । ତାଙ୍କ କଣ୍ଠରେ ମହାପ୍ରଭୁ ଜଗନ୍ନାଥଙ୍କ ଭଜନ ସାରା ବିଶ୍ବରେ ଲୋକପ୍ରିୟ । ପରିତାପର ବିଷୟ, ତାଙ୍କ ମୃତ୍ଯୁ ପରେ ସମ୍ମାନ ଦେବାକୁ ଭୁଲି ଯାଇଛନ୍ତି କର୍ତ୍ତୃପକ୍ଷ । ପୂର୍ବ ସରକାର ଏକ ବିରାଟ ସୁନ୍ଦର ପ୍ରତିମୂର୍ତ୍ତି କଟକ ନେତାଜୀ ବସ ଟର୍ମିନାଲ ସମ୍ମୁଖ କାଠଯୋଡି ନଦୀକୂଳ ପାର୍କରେ ସ୍ଥାପନ କରିଥିଲେ । ଏବେ କିନ୍ତୁ ଏହା ପ୍ଲାଷ୍ଟିକ ପଲିଥିନରେ ଘୋଡାଇ ରସିରେ ଟେଲିଫୋନ ଖୁଣ୍ଟିରେ ବାନ୍ଧି ପରିତ୍ୟକ୍ତ ସ୍ଥାନରେ ରଖାଯାଇଛି । ରାସ୍ତା ସଂପ୍ରସାରଣ ପାଇଁ ଏହାକୁ ସ୍ଥାନାନ୍ତର କରାଯାଇ ଥିଲେ ସୁଦ୍ଧା ଏହାକୁ ବିକାଶ ଭବନ ପରିସରରେ ଥିବା ପୁରୁଣା ଷ୍ଟକ ୟାର୍ଡରେ ରଖା ଯାଇଥିବାରୁ ନନ୍ଦା କରିଛନ୍ତି ସମାଜସେବୀ ।
ବିକାଶ ପାଇଁ କୌଣସି ଭିତ୍ତିଭୂମୀର ସ୍ଥାନାନ୍ତର ଏକ ସ୍ବଭାବିକ ପ୍ରକ୍ରିୟା । ତେବେ ପ୍ରତିଭା ପୂଜା ବଦଳରେ ଏପରି ଅବହେଳାକୁ ସମସ୍ତେ ନାପସନ୍ଦ କରିଛନ୍ତି । ବର୍ଷକ ଭିତରେ ମୂର୍ତ୍ତି ପ୍ରତିଷ୍ଠା ପାଇଁ ୪ ଫୁଟର ଜାଗାଟିଏ ପ୍ରଶାସନ ସ୍ଥିର କରି ପାରୁ ନଥିବା କହିଛନ୍ତି ଲୋକେ । ତୁରନ୍ତ ମୂର୍ତ୍ତିଟିକୁ ସମ୍ମାନର ସହ ସ୍ଥାପନ କରିବାକୁ ବୁଦ୍ଧିଜୀବୀ ଦାବି କରିଛନ୍ତି ।
ପୋଲାଭରମ ପ୍ରକଳ୍ପ ସାରିବାକୁ ରାତି ଦିନ ଏକ କରି ଦେଇଛି ଆନ୍ଧ୍ର, ତୁଣ୍ଡି ବାନ୍ଧି ବସିଛନ୍ତି ଓଡ଼ିଶା ସରକାର
ଭୁବନେଶ୍ବର: ପୋଲାଭରମ ପ୍ରକଳ୍ପ ସାରିବାକୁ ରାତି ଦିନ ଏକ କରି ଦେଇଛନ୍ତି ଆନ୍ଧ୍ର ସରକାର । କେନ୍ଦ୍ର ସରକାର ମଧ୍ୟ ବିନା ପ୍ରଶ୍ନରେ ସବୁ ସହାୟତା ଅଜାଡି ଦେଉଛନ୍ତି । ପ୍ରକଳ୍ପର ନୂଆ ଡାୟାଫ୍ରାମ ବନ୍ଧ ତୁରନ୍ତ ସାରିବା ପାଇଁ ଆନ୍ଧ୍ରପ୍ରଦେଶ ସରକାର ନିର୍ଦ୍ଦେଶ ଦେଇଛନ୍ତି । ପ୍ରକଳ୍ପର ପରିବର୍ତ୍ତିତ ଡିଜାଇନରେ ଓଡିଶା ଅଧିକ କ୍ଷତିଗ୍ରସ୍ତ ହେଉଥିଲେ ମଧ୍ୟ ଓଡ଼ିଶାର ବିଜେପି ସରକାରଙ୍କ ନିଘା ନାହିଁ । ବାରମ୍ବାର ରାଜନୈତିକ ସ୍ତରରୁ ଆରମ୍ଭ କରି ବିଭିନ୍ନ ଜନ ସଂଗଠନ ପୋଲାଭରମ ନେଇ ଦାବି କଲେ ମଧ୍ୟ ରାଜ୍ୟର ବିଜେପି ସରକାର ପୂରା ଚୁପ, ଯାହାକୁ ନେଇ ଅସନ୍ତୋଷ ଦାନା ବାନ୍ଧୁଛି ।
ଆନ୍ଧ୍ରରେ ବିଜେପିର ସହଯୋଗୀ ଟିଡିପି ସରକାର ଆସିବା ପରେ ରକେଟ ବେଗରେ ପୋଲାଭରମ ପ୍ରକଳ୍ପର କାମ ଚାଲିଛି । ପ୍ରକଳ୍ପର ଡିଜାଇନ ପରିବର୍ତ୍ତନ କରି ନୂଆ ଡାଏଫ୍ରାମ ବନ୍ଧ ନଭେମ୍ବର ୨୦୨୫ ଭିତରେ ସାରିବାକୁ ଆନ୍ଧ୍ର ସରକାର କାର୍ଯ୍ୟକୁ ଜୋରଦାର କରିଛନ୍ତି । ଏହି ବନ୍ଧ କାର୍ଯ୍ୟ ସାରି ତୁରନ୍ତ ପ୍ରକଳ୍ପର ମୁଖ୍ୟ ଡ୍ୟାମ କାମ ଆରମ୍ଭ କରିବା ଓ ୨୦୨୭ ସୁଦ୍ଧା ପ୍ରକଳ୍ପ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି ଆନ୍ଧ୍ର ସରକାର । ଯୁଦ୍ଧକାଳୀନ ଭିତ୍ତିରେ ଏହି କାର୍ଯ୍ୟ କରୁଥିବା ବେଳେ ବିଦେଶୀ ବିଶେଷଜ୍ଞ, କେନ୍ଦ୍ରୀୟ ଜଳ କମିଶନ ଓ ଅନ୍ୟ ବିଶେଷଜ୍ଞଙ୍କ ଅକୁଣ୍ଠ ସହଯୋଗ ମଧ୍ୟ ମିଳୁଛି ।
ସମସ୍ଯା ହେଉଛି, ଏହି ପୋଲାଭରମ ପ୍ରକଳ୍ପରେ ଓଡ଼ିଶାର ବହୁତ କ୍ଷତି ହେଉଛି । ଏତେ କ୍ଷତି ଯେ, କହିଲେ ନ ସରେ । ତଥାପି ରାଜ୍ୟର ବିଜେପି ସରକାର ଆଦୌ ଚିନ୍ତିତ ନୁହନ୍ତି । ପ୍ରଭାବିତ ହେବାକୁ ଥିବା ମାଲକାନଗିରିର ମୋଟୁ ଅଞ୍ଚଳ ବାସିନ୍ଦା ହୁଅନ୍ତୁ ବା ରାଜନୈତିକ ଦଳ ଅବା ବିଭିନ୍ନ ସଂଗଠନ, ସରକାରଙ୍କୁ ଚେତାଇବାକୁ ଅନେକ ହାରି ଗୁହାରୀ ଅଭିଯୋଗ ଶୁଣାଇଛନ୍ତି । ତଥାପି ନିଦା ବିଷ୍ଣୁ ସାଜିଛନ୍ତି ରାଜ୍ୟର ବିଜେପି ସରକାର । ଏପରିକି ଓଡି଼ଶାର କେତେ କ୍ଷତି ହେବ, କ’ଣ କ୍ଷତି ହେବ, ତାର ଏକ ପୁଙ୍ଖାନୁପୁଙ୍ଖ ଆକଳନ ମଧ୍ଯ କରାଯାଇ ନଥିବାର ଅଭିଯୋଗ ହୋଇଛି । ଏହାର ପ୍ରତିବାଦ କରିବାକୁ ପ୍ରସ୍ତୁତ ହେଉଛନ୍ତି ମାଲକାନଗିରିର ପ୍ରମୁଖ ବ୍ୟକ୍ତି ବିଶେଷ, ଜାତୀୟ ସ୍ତରର ଜଳ ବିଶେଷଜ୍ଞ ଓ ପ୍ରମୁଖ ରାଜନୈତିକ ଦଳ ।
ପୋଲାଭରମ ପ୍ରକଳ୍ପ ଯୋଗୁଁ ମାଲକାନଗିରିର ବହୁ କ୍ଷତି ହେବ । ନିୟମ ଅନୁଯାୟୀ କୌଣସି ପ୍ରକଳ୍ପରେ କ୍ଷତିଗ୍ରସ୍ତ ହେବାକୁ ଥିବା ରାଜ୍ୟ କିମ୍ବା ଅଞ୍ଚଳ ପ୍ରସଙ୍ଗକୁ ଗୁରୁତ୍ୱ ଦିଆଯାଏ । କିନ୍ତୁ ପୋଲାଭରମ କ୍ଷେତ୍ରରେ ଓଡିଶାକୁ ସମ୍ପୂର୍ଣ୍ଣ ଅଣଦେଖା କରାଯାଉଛି । ତଥାପି ରାଜ୍ୟର ବିଜେପି ସରକାର କୌଣସି ପ୍ରତିକ୍ରିୟା ପ୍ରକାଶ କରୁ ନାହାନ୍ତି କିମ୍ବା ଆନ୍ଧ୍ର କି କେନ୍ଦ୍ର ସରକାରଙ୍କ ସହ ଆଲୋଚନା କରୁ ନାହାନ୍ତି । ଏ ସମୟରେ ପୂର୍ବ ବିଜେଡି ସରକାରକୁ ମନେ ପକାଉଛନ୍ତି ଲୋକେ । ମାଲକାନାଗିରିର ବିଚ୍ଛିନ୍ନାଞ୍ଚଳକୁ ଯୋଡ଼ିବାକୁ ବହୁ ପ୍ରତିକୂଳ ପରିସ୍ଥିତି ସତ୍ତ୍ଵେ ଗୁରୁପ୍ରିୟା ସଂପୂର୍ଣ୍ଣ କରିଥିଲେ ନବୀନ ସରକାର । ସ୍ଵାଭିମାନ ଅଞ୍ଚଳର ବ୍ୟାପକ ଉନ୍ନତି କରିଥିଲେ । ଏବେ ସେସବୁ ଅଞ୍ଚଳ ଉଜୁଡିବାକୁ ଯାଉଛି । କିନ୍ତୁ ବିଜେପି ସରକାର କାହିଁକି ଚୁପ ବୋଲି ପ୍ରଶ୍ନ ଉଠିଛି । ବିଜେପିକୁ ରାଜ୍ୟବାସୀ କ୍ଷମା ଦେବେ ନାହିଁ ବୋଲି କହିଛି ସିଟିଜେନସ ଫୋରମ ।
ପୋଲାଭରମ ପ୍ରସଙ୍ଗକୁ ନେଇ ବିଜେଡି ସରକାର ପଲ୍ଲୀରୁ ଦିଲ୍ଲୀ ପର୍ଯ୍ୟନ୍ତ, ସବୁ ସ୍ତରରେ କଥା ଉଠାଇ ଥିଲା । ଏବେ ବିରୋଧୀ ଦଳରେ ରହି ବିଜେଡି ଏ ପ୍ରସଙ୍ଗରେ ଲଢେଇ ଜାରି ରଖିଛି । ଅନ୍ୟ ସଂଗଠନ ବି ରାଜ୍ୟର ସ୍ଵାର୍ଥ ରକ୍ଷା ପାଇଁ ବାରମ୍ଵାର ପାଟି ଫିଟାଉଛନ୍ତି । କିନ୍ତୁ ଶାସକ ଦଳ ବିଜେପି ଓ ରାଜ୍ୟ ସରକାର ପାଟି ବନ୍ଦ କରି ରହିଥିବାରୁ ତେଜୁଛି ଅସନ୍ତୋଷ ।
ମହାନଦୀକୁ ମାରି ଦେବାକୁ ଛତିଶଗଡ଼ର ଷଡ଼ଯନ୍ତ୍ର ?
ଭୁବନେଶ୍ବର: ମୌସୁମୀ ନ ଫେରୁଣୁ, ବର୍ଷା ଋତୁ ନ ସରୁଣୁ ଏହାର ପ୍ରଭାବ ପଡ଼ିଲାଣି ମହାନଦୀ ଉପରେ । ମହାନଦୀରେ ପାଣି ଆସୁନି, ଶୁଖି ଯାଉଛି ଓଡ଼ିଶାର ବଡ଼ ନଦୀ । ପାଣି ଆସୁ ନଥିବାରୁ ହୀରାକୁଦ ଡ୍ୟାମ ବି ପ୍ରଭାବିତ ହୋଇଛି । ଏହି ଡ୍ୟାମର ଜଳସ୍ତର ହ୍ରାସ ପାଇଛି । ମାତ୍ର ୧୨ ଦିନରେ ୩ ଫୁଟ କମିଛି ପାଣି । କାରଣ କଲମା ବ୍ୟାରେଜର ୬୦ଟି ଗେଟ୍ ବନ୍ଦ କରି ଦେଇଛି ଛତିଶଗଡ଼ । ତେଣୁ ମହାନଦୀରେ ପାଣି ଆସୁନି । ଏକ ପ୍ରକାର ଶୁଖିଲା ପଡ଼ିଛି ଏହାର ଶଯ୍ୟା । ଏହାକୁ ଦେଖି ବିଜୁଳି ଉତ୍ପାଦନ ପାଇଁ କମ୍ ପାଣି ବ୍ୟବହାର କରିବାକୁ ଓଡ଼ିଶା ହାଇଡ୍ରୋ ପାୱାର କର୍ପୋରେସନକୁ ଚିଠି ଲେଖିଛନ୍ତି ହୀରାକୁଦ ବନ୍ଧ କର୍ତ୍ତୃପକ୍ଷ । ଏବେ ଚିନ୍ତା ପ୍ରକାଶ ପାଇଲାଣି, ଏବେଠୁ ଯଦି ଏଭଳି ସ୍ଥିତି, ଆଗକୁ ହେବ କ’ଣ ?
ଶୁଖି ଗଲାଣି ମହାନଦୀ । ବର୍ଷା ଋତୁ ନ ସରୁଣୁ ମହାନଦୀର ଶଯ୍ୟା ଶୁଖିଲା ପଡ଼ିଛି, ପାଣି ନାହିଁ । ଅକ୍ଟୋବରରେ ଯଦି ଏଭଳି ଅବସ୍ଥା ମେ’, ଜୁନ ବେଳକୁ ସ୍ଥିତି କ’ଣ ହେବ ତାକୁ ନେଇ ଚିନ୍ତା ବଢ଼ିଲାଣି । ଉପରମୁଣ୍ଡରୁ ମହାନଦୀକୁ ପାଣି ଆସୁ ନଥିବାରୁ ଏହି ଅବସ୍ଥା । ସ୍ଥିତି ଏମିତି ସଙ୍ଗୀନ ଯେ, ମାତ୍ର ୧୨ ଦିନ ଭିତରେ ହୀରାକୁଦର ଜଳସ୍ତର ୩ ଫୁଟ କମି ଗଲାଣି । ଅକ୍ଟୋବର ପ୍ରଥମ ସପ୍ତାହରେ ଡ୍ୟାମର ଜଳସ୍ତର ୬୩୦ ଫୁଟ ଥିବା ବେଳେ ବର୍ତ୍ତମାନ ଏହା ଖସି ଆସି ୬୨୭ ଫୁଟରେ ପହଞ୍ଚିଛି । ଏଥିପାଇଁ ହୀରାକୁଦ ନଦୀବନ୍ଧ କର୍ତ୍ତୃପକ୍ଷ OHPCକୁ ଚିଠି ଲେଖିଛନ୍ତି । ଡ୍ୟାମର ମୁଖ୍ୟଯନ୍ତ୍ରୀ କହିଛନ୍ତି, ଉପରମୁଣ୍ଡରୁ ପାଣି ଆସୁ ନଥିବାରୁ ଏଭଳି ସ୍ଥିତି ସୃଷ୍ଟି ହୋଇଛି ।
ଓଡି଼ଶା ସୀମାର ଠିକ୍ ଉପରେ ଥିବା ଛତିଶଗଡ଼ର କଲମା ବ୍ୟାରେଜରେ ଏବେ ମାତ୍ର ୬ଟି ଗେଟ୍ ଖୋଲା ଅଛି । ଯେତେବେଳେ ଟ୍ରିବ୍ୟୁନାଲକୁ ମହାନଦୀ ଜଳ ବିବାଦ ଯାଇଥିଲା, ସେତେବେଳେ ନିଷ୍ପତ୍ତି ହୋଇଥିଲା ଅକ୍ଟୋବର ପର୍ଯ୍ୟନ୍ତ ପୂରା ପାଣି ଛାଡ଼ିବ ଛତିଶଗଡ଼ । କିନ୍ତୁ ଏବେଠୁ ପ୍ରାୟ ସବୁ ଗେଟ୍ ବନ୍ଦ କରିଦେଇଥିବାରୁ ସିଧା ପ୍ରଭାବ ପଡ଼ିଛି ହୀରାକୁଦ ଡ୍ୟାମ୍ ଉପରେ । ଯାହାକୁ ନେଇ ଚିନ୍ତା ପ୍ରକାଶ ପାଇଲାଣି । ଛତିଶଗଡ଼ର ଦାଦାଗିରି ଯଦି ଏପରି ଆଗକୁ ବି ଜାରି ରହେ, ତେବେ ମହାନଦୀ କୂଳିଆ ଲୋକ ଛଟପଟ ହେବେ ବୋଲି କହିଛନ୍ତି । ଚାଷବାସଠାରୁ ଆରମ୍ଭ କରି ପିଇବା ପାଣି ପର୍ଯ୍ୟନ୍ତ ସବୁଥିରେ ଦେଖା ଦେବ ସଂକଟ ।
ବେଳ ଥାଉ ଥାଉ ଯଦି ଏହି ମହାନଦୀ ଜଳ ବିବାଦର ସମାଧାନ ନ ହୁଏ ଏବଂ ଛତିଶଗଡ଼ ପାଣି ନ ଛାଡ଼େ ତେବେ ରାଜ୍ୟର ଅଧାରୁ ଅଧିକ ଅଞ୍ଚଳ ପ୍ରଭାବିତ ହେବାର ଆଶଙ୍କା ଅଛି ।
କେନାଲରେ ପଡ଼ିଥିବା ବଲ କାଢ଼ିବାକୁ ଯାଇ ବୁଡ଼ିଗଲେ ୩ ନାବାଳକ
ବାରିପଦା: କେନାଲରେ ବୁଡ଼ି ତିନି ନାବାଳକଙ୍କ ମୃତ୍ୟୁ । ମୟୂରଭଞ୍ଜ ଜିଲ୍ଲା ସାରସକଣା ବ୍ଲକ ଛକ ନିକଟସ୍ଥ ସୁବର୍ଣ୍ଣରେଖା କେନାଲରେ ବୁଡି ଏମାନଙ୍କ ମୃତ୍ୟୁ ଘଟିଛି । ମୃତକମାନେ ହେଲେ ମଦନ ମୋହନ ସାହୁ, ଶ୍ରେୟାଂଶୁ ସାହୁ ଏବଂ ସାଇ ଶଙ୍କର ସାହୁ ।
ମିଳିଥିବା ସୂଚନା ଅନୁସାରେ, ସନ୍ଧ୍ୟା ସମୟରେ ଖେଳୁଥିବା ସମୟରେ ବଲ କେନାଲ ପାଣିରେ ପଡିଯାଇଥିଲା । ବଲ୍ ଆଣିବାକୁ ଯାଇ ତିନି ନାବାଳକ ବୁଡି ଯାଇଥିଲେ । ପହଁରା ଜାଣି ନଥିବାବେଳେ ହାତ ଧରାଧରି ହୋଇ ବଲ କାଢ଼ିବାକୁ ଚେଷ୍ଟା କରୁଥିବା ବେଳେ ଗୋଡ଼ ଖସି ଯାଇ ପାଣିରେ ବୁଡ଼ି ଯାଇଥିଲେ । ସଙ୍ଗେ ସଙ୍ଗେ ପାଖରେ ଥିବା ଗ୍ରାମବାସୀ ସେମାନଙ୍କୁ ଉଦ୍ଧାର କରି ସିର୍ସା ପ୍ରାଥମିକ ଚିକିତ୍ସାଳୟକୁ ନେଇଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ଆମ ଓଡ଼ିଶା, ନବୀନ ଓଡ଼ିଶାର ନାଁ ବଦଳାଇଲା ‘ନାଁ ବଦଳା ସରକାର’
ଭୁବନେଶ୍ବର: ଯୋଜନା ବଦଳା ସରକାରରେ ବଦଳିଲା ଆଉ ଏକ ଯୋଜନାର ନାଁ । ଆମ ଓଡ଼ିଶା, ନବୀନ ଓଡ଼ିଶା ହେଲା ବିକଶିତ ଗାଁ, ବିକଶିତ ଓଡ଼ିଶା । ଯାହାକୁ କଡ଼ା ଭାଷାରେ ସମାଲୋଚନା କରିଛି ବିଜେଡି । ବିଜେଡି କହିଛି ନାଁ ଓ ରଙ୍ଗ ବଦଳାଇବା ବିଜେପି ସରକାରର ମୁଖ୍ୟ ଏଜେଣ୍ଡା । ହେଲେ ଏଥିରେ ଲୋକଙ୍କର କୌଣସି ଉନ୍ନତି ହେଉନାହିଁ । କଂଗ୍ରେସ ମଧ୍ଯ ରାଜ୍ଯ ସରକାରଙ୍କ ଆଭିମୁଖ୍ଯକୁ ନେଇ ପ୍ରବଳ ବର୍ଷିଛି ।
ପ୍ରଥମେ ଲକ୍ଷ୍ମୀ । ବଜେଟରେ ବିଏସକେୱାଇ, କାଳିଆ, ମୋ ସ୍କୁଲ ଏମିତି କେତେ କ’ଣ । ଆଉ ଏବେ ଆମ ଓଡ଼ିଶା, ନବୀନ ଓଡ଼ିଶା । ନବୀନ ସରକାରଙ୍କ ଜନକଲ୍ଯାଣକାରୀ ଯୋଜନାର ନାଁ ବଦଳାଇବାରେ ବ୍ଯସ୍ତ ରାଜ୍ଯ ସରକାର । ଗ୍ରାମାଞ୍ଚଳର ସାମଗ୍ରିକ ବିକାଶ ପାଇଁ ନବୀନ କରିଥିବା ଆମ ଓଡ଼ିଶା, ନବୀନ ଓଡ଼ିଶା ଯୋଜନାର ନାଁ ବଦଳି ହୋଇଛି ବିକଶିତ ଗାଁ, ବିକଶିତ ଓଡ଼ିଶା । ଏ ବାବଦରେ ଗାଇଡଲାଇନ ପ୍ରସ୍ତୁତ କରାଯାଉଛି । ଶୀଘ୍ର ନୂଆ ଯୋଜନା ଅନୁସାରେ କାମ ହେବ ବୋଲି ପଞ୍ଚାୟତିରାଜ ମନ୍ତ୍ରୀ କହିଛନ୍ତି । ଯାହାକୁ ନେଇ ଜୋରଦାର ହୋଇଛି ରାଜନୀତି । ବିଜେଡି କହିଛି, ଯୋଜନାର ନାଁ ବଦଳୁଛି, ହେଲେ ରାଜ୍ଯରେ ଉନ୍ନୟନ କାମ ଠପ୍ ହୋଇ ରହିଛି । ନାଁ ବଦଳାଇବା ଓ ରଙ୍ଗ ବଦଳାଇବା ବିଜେପି ସରକାରର ମୁଖ୍ୟ ଏଜେଣ୍ଡା ପାଲଟିଛି ।
ନୂଆ ସରକାର ଗଠନ ହେବା ପରେ ଗାଁ ଗଣ୍ଡାରେ ଉନ୍ନୟନ ମୂଳକ କାମ ବନ୍ଦ ରହିଛି । ହେଲେ ଯୋଜନାର ନାମ ବଦଳାଇ ବିଜେପି ସରକାର କେବଳ ମାଇଲେଜ ନେବାକୁ ଚାହୁଁଛି । ସରକାରଙ୍କ ଏଭଳି ନାଁ ଓ ରଙ୍ଗ ବଦଳା ରାଜନୀତିକୁ ନେଇ କଂଗ୍ରେସ ବି ଖୁବ୍ ବର୍ଷିଛି । ଏହାକୁ ନାପସନ୍ଦ କରି କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ କହିଛନ୍ତି, ବିଜେପି ସରକାର କେବଳ ନେମ୍ ଚେଞ୍ଜର, ଗେମ୍ ଚେଞ୍ଜର ନୁହେଁ । ଖାଲି ନାଁ ବଦଳାଇ ବାହାବା ନେବାକୁ ବିଜେପିର ପ୍ରୟାସକୁ ରାଜନୈତିକ ବିଶେଷଜ୍ଞ ମଧ୍ଯ ସମାଲୋଚନା କରିଛନ୍ତି ।
ନବୀନ ସରକାର ଅମଳର ବିଭିନ୍ନ ଯୋଜନାର ନାମ ବଦଳାଇ ବିଜେପି ସରକାର ବାହାବା ନେବାକୁ ଚେଷ୍ଟା କରୁଛି । ଲକ୍ଷ୍ମୀ ବସ ହେଉ କି ଓମଫେଡ଼ ପ୍ୟାକେଟର ରଙ୍ଗ, ପୁଣି ସରକାରୀ କୋଠାର ରଙ୍ଗ ବି ଦଳୀୟ ରଙ୍ଗରେ କରିବାକୁ ନିଷ୍ପତ୍ତି ନେଇଛନ୍ତି ସରକାର । ବିଜେପିର ଏଭଳି ଅସୂୟା ଭାବକୁ ସବୁଠି ସମାଲୋଚନା କରାଯାଇଛି ।
ଓଡ଼ିଶାକୁ ବାତ୍ୟା ଭୟ: ସୋମବାର ପରେ ସ୍ପଷ୍ଟ ହେବ ଲ୍ଯାଣ୍ଡଫଲ ଚିତ୍ର… ୨୩ରୁ ୨୬ ଯାଏଁ ନନଷ୍ଟପ ବର୍ଷା
ଭୁବନେଶ୍ବର: ସ୍ପଷ୍ଟ ହେଉଛି ବାତ୍ୟା ଚିତ୍ର । ଆଣ୍ଡାମାନ ସାଗରରେ ସୃଷ୍ଟି ହେଲା ଘୂର୍ଣ୍ଣିବଳୟ । ୨୧ ତାରିଖ ମଧ୍ୟରେ ଏହା ଲଘୁଚାପ ରୂପ ନେବ । ୨୪ରୁ ୨୫ ମଧ୍ୟରେ ବାତ୍ୟା ଆଶଙ୍କା ଦେଖାଦେଇଥିବା ନେଇ ପାଣିପାଗ ବିଭାଗ ଆଶଙ୍କା କରିଛି । ଆନ୍ତର୍ଜାତିକ ପାଣିପାଗ ମଡେଲ ଅନୁସାରେ ବାତ୍ୟାର ପ୍ରଭାବ ଓଡ଼ିଶା ଓ ପଶ୍ଚିମବଙ୍ଗରେ ରହିବ । ତେବେ ବାତ୍ୟାର ତୀବ୍ରତା ଓ ଗତିପଥ ଏଯାଏଁ ସ୍ପଷ୍ଟ ହୋଇନି । ବାତ୍ଯା ନେଇ ଆଇଏମଡି କୌଣସି ସୂଚନା ଦେଇ ନଥିବା ବେଳେ ବର୍ଷା ନେଇ ସତର୍କତା ଜାରି କରିଛି ।
ସମୟ ଯେତିକି ଗଡୁଛି, ବାତ୍ୟା ଆଶଙ୍କା ସେତିକି ବଢୁଛି । ଓଡ଼ିଶାକୁ ବାତ୍ଯା ଭୟ ଭିତରେ ଆଣ୍ଡାମାନ ସାଗରରେ ସୃଷ୍ଟି ହେଲା ଘୂର୍ଣ୍ଣିବଳୟ । ୨୧ ସୁଦ୍ଧା ନେବ ଲଘୁଚାପ ରୂପ । ୨୩ରେ ଅବପାତ, ୨୨ରୁ ସମୁଦ୍ର ହେବ ଅଶାନ୍ତ । ୨୧ ପରେ ସ୍ପଷ୍ଟ ହେବ ଲ୍ୟାଣ୍ଡଫଲ ଡେଷ୍ଟିନେସନ୍ । ୨୩ ତାରିଖରୁ ୨୬ ଯାଏଁ ନନଷ୍ଟପ ବର୍ଷା । ଜିଏଫ୍ଏସ୍ ମଡେଲ ଅନୁସାରେ ୨୪ରୁ ୨୫ ତାରିଖ ମଧ୍ୟରେ ବାତ୍ୟାଟି ପଶ୍ଚିମବଙ୍ଗ କିମ୍ବା ବାଂଲାଦେଶ ଉପକୂଳରେ ସ୍ଥଳଭାଗ ଛୁଇଁପାରେ ।
ସେହିଭଳି ECMWFର ଆକଳନ କହୁଛି ସାମ୍ଭାବ୍ୟ ଲଘୁଚାପଟି ବାଲେଶ୍ବର କିମ୍ବା ପଶ୍ଚିମବଙ୍ଗରେ ଲ୍ୟାଣ୍ଡଫଲ କରିପାରେ । ଓ୍ବିଣ୍ଡିର ଗ୍ରାଫିକ୍ସ ଅନୁସାରେ ସାମ୍ଭାବ୍ୟ ଲଘୁଚାପ ବାତ୍ୟା ରୂପ ନେଇ ଗୋପାଳପୁର ନିକଟରେ ସ୍ଥଳଭାଗ ଅତିକ୍ରମ କରିବ । ତେବେ ପାଣିପାଗ ବିଶେଷଜ୍ଞ ଶରତ ସାହୁଙ୍କ କହିବା କଥା ବାତ୍ୟା ହେବାର ସମ୍ଭାବନା ଅଧିକ ରହିଛି । କାରଣ ସମୁଦ୍ରର ତାପମାତ୍ରା ଓ ସ୍ଥଳଭାଗର ତାପମାତ୍ରା ବାତ୍ୟା ପାଇଁ ଅନୁକୂଳ ବାତାବରଣ ସୃଷ୍ଟି କରିଛି ।
ଘୂର୍ଣ୍ଣବଳୟ ଲଘୁଚାପର ରୂପ ନେବା ପରେ ୨୩ ତାରିଖ ମଧ୍ୟରେ ଉତ୍ତର ପଶ୍ଚିମ ଦିଗରେ ଗତି କରି ଅବପାତରେ ପରିଣତ ହେବ । ପ୍ରଭାବରେ ୨୨ ତାରିଖରୁ ଉପକୂଳ ଓଡ଼ିଶାରେ ଆରମ୍ଭ ହୋଇଯିବ ବର୍ଷା । ୨୩ରୁ ଏହାର ପରିମାଣ ଏବଂ ବିସ୍ତୃତି ବଢି ୨୬ ତାରିଖ ଯାଏଁ ବର୍ଷା ଲାଗି ରହିବ । ଏଥିପାଇଁ ୨୩ ତାରିଖରୁ ୨୬ ତାରିଖ ପର୍ଯ୍ୟନ୍ତ ମତ୍ସ୍ଯଜୀବୀଙ୍କୁ ସମୁଦ୍ରକୁ ଯିବାକୁ ବାରଣ କରାଯାଇଛି । ତେବେ ବାତ୍ୟା ନେଇ ଆଇଏମଡି କୌଣସି ସୂଚନା ଦେଇ ନଥିବା ବେଳେ ସମୁଦ୍ର ଅଶାନ୍ତ ସହ ବର୍ଷା ପବନ ନେଇ ସତର୍କତା ଜାରି କରିଛି ।
ଅକ୍ଟୋବର ମାସ ଓଡ଼ିଶା ପାଇଁ ବାତ୍ୟା ପ୍ରବଣ ମାସ । ମୌସୁମୀ ପ୍ରତ୍ୟାବର୍ତ୍ତନ କରିସାରିଥିବା ବେଳେ ବର୍ତ୍ତମାନ ତାପମାତ୍ରା ଉପର ମୁହାଁ । ସମୁଦ୍ର ପତନର ତାପମାତ୍ରା ୩୨ ଡିଗ୍ରୀ ଉପରେ । ଫଳରେ ବାତ୍ୟାକୁ ବଳ ଗୋଟାଇବା ପାଇଁ ପାଗ ଅନୁକୂଳ ରହିଛି ।
ପ୍ରକାଶ ପାଇଲା ଓଏଏସ ରେଜଲ୍ଟ, ଶ୍ବେତାଶ୍ରୀ ଟପ୍ପର
ଭୁବନେଶ୍ବର: ପ୍ରକାଶ ପାଇଲା ୨୦୨୨ ଓଏଏସ୍ ରେଜଲ୍ଟ । ପୁଣି ଥରେ ଛାତ୍ରୀଙ୍କ କମାଲ ଦେଖିବାକୁ ମିଳିଛି । ଟପ୍ ଫାଇଭରେ ୩ ଜଣ ମହିଳା ରହିଛନ୍ତି । ସେହିପରି ଟପ୍ ଟେନରେ ୫ ଜଣ ଲେଖାଏଁ ଛାତ୍ରଛାତ୍ରୀ ରହିଛନ୍ତି । ମୋଟ ୬୮୩ ପରୀକ୍ଷାର୍ଥୀ କୃତକାର୍ଯ୍ୟ ହୋଇଛନ୍ତି ।
ଶ୍ବେତାଶ୍ରୀ ମହାପାତ୍ର ଓଏଏସ ଟପ୍ପର ହୋଇଥିବା ବେଳେ ପ୍ରିଙ୍କିଲ ପରବିନ ପରିଡ଼ା ଦ୍ବିତୀୟ ସ୍ଥାନ ହାସଲ କରିଥିବା ବେଳେ ତୃତୀୟ ସ୍ଥାନରେ ପୁରୁଷ ପରୀକ୍ଷାର୍ଥୀ ଦିପ୍ତୀରଞ୍ଜନ ପତି ରହିଛନ୍ତି । ସେହିପରି ଚତୁର୍ଥ ସ୍ଥାନରେ ପ୍ରଜ୍ଞା ପାରଙ୍ଗମ ଏବଂ ପଞ୍ଚମ ସ୍ଥାନରେ ଆଜାଦ କୁମାର ସାହୁ ଅଛନ୍ତି ।
ଷଷ୍ଠ ସ୍ଥାନରେ ଦୀପମ ରାଉତ, ସପ୍ତମ ସ୍ଥାନରେ ଦେବବ୍ରତ ଗୌଡ଼, ଅଷ୍ଟମ ସ୍ଥାନରେ ଆଦିତ୍ଯ ଦୀପଙ୍କର ଷଡ଼ଙ୍ଗୀ, ନବମ ସ୍ଥାନରେ କପିଳ କୁମାର ମହାନ୍ତି ଏବଂ ଦଶମ ସ୍ଥାନରେ ଅମ୍ରିତା ସାହୁ ଅଛନ୍ତି ।
ଏକାଦଶ ସ୍ଥାନରେ ବିକାଶ କୁମାର ସାହୁ, ଦ୍ବାଦଶ ସ୍ଥାନରେ ସତ୍ଯ ସନାତନ ପାଣିଗ୍ରାହୀ, ତ୍ରୟୋଦଶ ସ୍ଥାନରେ ନୁରି ପରବିନ, ଚତୁର୍ଦ୍ଦଶ ସ୍ଥାନରେ ସାରା ମଲ୍ଲିକ, ପଞ୍ଚଦଶ ସ୍ଥାନରେ ବିକାଶ ରଞ୍ଜନ ସାହୁ ଅଛନ୍ତି । ଷୋଡ଼ଶ ସ୍ଥାନରେ ଶୁଭମ ଚିନ୍ତନ ତ୍ରିପାଠୀ, ସପ୍ତଦଶ ସ୍ଥାନରେ ପ୍ରତିମା ନାୟକ, ଅଷ୍ଟାଦଶ ସ୍ଥାନରେ ରାଜୀବ ଲୋଚନ ଦୀକ୍ଷିତ, ଉନ୍ନବିଂଶ ସ୍ଥାନରେ ପ୍ରିୟଙ୍କା ପାଲ, ବିଂଶ ସ୍ଥାନରେ ସିଦ୍ଧାନ୍ତ ନାୟକ ରହିଛନ୍ତି ।
ସୂଚନାଯୋଗ୍ୟ, ଓଏଏସ ପରୀକ୍ଷା ପାଇଁ ୯୨ ହଜାର ୯୪୧ ଜଣ ପରୀକ୍ଷାର୍ଥୀ ଆବେଦନ କରିଥିଲେ । ସେମାନଙ୍କ ମଧ୍ୟରୁ ୪୦ ହଜାର ୫୮୬ ଜଣ ପରୀକ୍ଷାର୍ଥୀ କୃତକାର୍ଯ୍ୟ ହୋଇଛନ୍ତି । କୃତୀ ପରୀକ୍ଷାର୍ଥୀଙ୍କ ମଧ୍ୟରେ ୨୫୮ ଜଣ ମହିଳା ପରୀକ୍ଷାର୍ଥୀ ଅଛନ୍ତି ।