ନନ୍ଦିଘୋଷ ବ୍ୟୁରୋ: ଆଗାମୀ ଦିନରେ ବିହାରରେ ନିର୍ବାଚନ ହେବାକୁ ଥିବାବେଳେ ଏବେଠାରୁ ମାହୋଲ ବେଶ ସରଗରମ ହେବାରେ ଲାଗିଛି । ନେତାଙ୍କ ଦଳ ଡିଆଁ ପର୍ବ ମଧ୍ୟ ଆରମ୍ଭ ହୋଇଗଲାଣି । ଏହାରି ଭିତରେ ଜେଡିୟୁକୁ ଏକ ବଡ଼ ଝଟକା ଲାଗିପାରେ ବୋଲି କୁହାଯାଉଛି । ଜଣାଶୁଣା ନେତା ଡାକ୍ତର ସଞ୍ଜିବ ଆରଜେଡିରେ ଯୋଗ ଦେଇପାରନ୍ତି । ସେ ଆସନ୍ତା ୩ ତାରିଖରେ ଆରଜେଡି ନେତା ତେଜସ୍ବୀ ଯାଦବଙ୍କ ଉପସ୍ଥିତିରେ ମିଶିପାରନ୍ତି ବୋଲି ଚର୍ଚ୍ଚା ଆରମ୍ଭ ହୋଇଛି । ରିପୋର୍ଟ ମୁତାବକ ନିକଟରେ ସେ ତେଜସ୍ବୀଙ୍କୁ ଭେଟିଥିବାବେଳେ ଦଳରେ ନିଶ୍ଚିତ ଭାବେ ମିଶିପାରନ୍ତି ବୋଲି ବିହାରର ରାଜନୈତିକ ମାହୋଲ ବେଶ ସରଗରମ ହୋଇଛି । ତେବେ ଉଭୟଙ୍କ ଭେଟଘାଟର ଫଟୋ ସୋସିଆଲ ମିଡିଆରେ ମଧ୍ୟ ବେଶ ଭାଇରାଲ ହେବାରେ ଲାଗିଛି । ସେପଟେ ଆରଜେଡି ପକ୍ଷରୁ ଏକ ମିଶ୍ରଣ ପର୍ବର ମଧ୍ୟ ଆୟୋଜନ ଜୋରଦାରରେ ଚାଲିଥିବା ଖବରରୁ ମିଳିଛି ।
ମାଆ ବିମଳାଙ୍କ ପୀଠରେ ସ୍ୱତନ୍ତ୍ର ପୂଜା ସହ ଦୁର୍ଗାମାଧବ ଉପାସନର ପରମ୍ପରା
ନନ୍ଦିଘୋଷ ବ୍ୟୁରୋ: ଶାରଦୀୟ ଦୁର୍ଗାପୂଜାକୁ ନେଇ ସମଗ୍ର ରାଜ୍ୟ ଉତ୍ସବ ମୁଖରିତ ହୋଇଥିବା ବେଳେ ଶ୍ରୀକ୍ଷେତ୍ର ପୁରୀରେ ମଧ୍ୟ ବେଶ ଧୁମଧାମରେ ଦୁର୍ଗାପୁଜା ପାଳନ କରାଯାଉଅଛି। ଶ୍ରୀମନ୍ଦିରରେ ଦୁର୍ଗାମାଧବ ଉପାସନା ସହ ସହରର ଭିଭିନ୍ନ ସ୍ଥାନରେ ଦୁର୍ଗା ମା’ଙ୍କୁ ଗୋଶାଣୀ ରୂପେ ପୂଜାର୍ଚନା କରାଯାଉଥିବା ବେଳେ ବିଭିନ୍ନ ମଣ୍ଡପରେ ମଧ୍ୟ ଜାକଜମକ ସହକାରେ ପୂଜା ଅନୁଷ୍ଠିତ ହେଉଥିବା ଜଣାପଡିଅଛି।ପୂଜା ଉପଲକ୍ଷେ ପୁରୀରେ ପର୍ଯ୍ୟଟକ ଙ୍କ ବେଶ ଭିଡ଼ ଲାଗିଥିବା ବେଳେ ଏଠାରେ ବଙ୍ଗୀୟ ସମ୍ପ୍ରଦାୟ ପକ୍ଷରୁ ବଙ୍ଗୀୟ ରୀତିନୀତିରେ ଦୁର୍ଗବାଡି ମଣ୍ଡପରେ କୁମାରୀ ପୂଜାର ଝଲକ ମଧ୍ୟ ଦେଖିବାକୁ ମିଳିଅଛି।
ଶ୍ରୀକ୍ଷେତରେ ଗୁଞ୍ଜରିତ ହେଉଛି ମାଆ ଦୁର୍ଗାଙ୍କ ନାମ । ସବୁଠି ଭକ୍ତିମୟ ପରିବେଶ । ବିଭିନ୍ନ ବେଶରେ ଓ ବିଭିନ୍ନ ଢଙ୍ଗରେ ପୂଜା ପାଉଛନ୍ତି ମାଆ ଜଗତ ଜନନୀ । ପୁରୀର ଅଧିଷ୍ଠାତ୍ରୀ ଦେବୀ ମାଆ ବିମଳାଙ୍କ ପୀଠରେ ସ୍ୱତନ୍ତ୍ର ପୂଜା ସହ ଦୁର୍ଗାମାଧବ ଉପାସନର ପରମ୍ପରା ଦେଖିବାକୁ ମିଳିଥାଏ । ସେହିପରି ସହରର ବିଭିନ୍ନ ସାହି, ଜାଗା ,ଆଖଡା ମାନଙ୍କରେ ମାଙ୍କୁ ଆବାହନ କରାଯାଇ ଭିନ୍ନ ଭିନ୍ନ ଗୋସାଣୀ ରୂପରେ ପୂଜା କରାଯାଇଥାଏ । ସମ୍ପୂର୍ଣ୍ଣ ରୀତିନୀତି ଓ ବିଧି ଅନୁସାରେ ଏହି ପୂଜା ପାଠ ହେଉଥିବା ବେଳେ ସହରରେ ମାଆଙ୍କ ଦର୍ଶନ ପାଇଁ ଭକ୍ତଙ୍କ ଭିଡ଼ ଜମୁଛି। ବିଶେଷ କରି ସନ୍ଧ୍ୟା ସମୟରେ ବିଭିନ୍ନ ପୂଜା ମଣ୍ଡପ ଓ ଗୋଶାଣୀ ପୀଠ ମାନଙ୍କରେ ଭକ୍ତ ଓ ଶ୍ରଦ୍ଧାଳୁ ଶ୍ରଦ୍ଧା ସୁମନ ଜ୍ଞାମ୍ପନ କରୁଥିବା ବେଳେ ଦର୍ଶନର ସାନିଧ୍ୟ ଲାଭ କରି ଆନନ୍ଦିତ ହେଉଛନ୍ତି ।
ପାର୍ବଣର ମାହୋଲରେ ଶ୍ରୀକ୍ଷେତ୍ର ପୁରୀ ଏବେ ଉତ୍ସଭ ମୁଖର ହୋଇଉଠିଛି । ସବୁ ଆଡେ ସାଜସଜ୍ଜା ପରିଲକ୍ଷିତ ହୋଇଛି । ପୂଜା ଛୁଟି ଥିବା ହେତୁ ଏବେ ପୁରୀରେ ବହୁ ବଙ୍ଗୀୟ ପର୍ଯ୍ୟଟକଙ୍କ ଭିଡ଼ ଜମିଛି । ତେବେ ପୁରୀରେ ମଧ୍ୟ ବଙ୍ଗୀୟ ଶୈଳୀରେ ପୂଜାର୍ଚନା ପରିଲକ୍ଷିତ ହୋଇଥିବା ବେଳେ ଆଜି ମହନବମୀରେ କୁମାରୀ ପୂଜା ଅନୁଷ୍ଠିତ ହେଉଛି ।ଦୁର୍ଗବାଡି ଠାରେ ବହୁ ବଙ୍ଗୀୟ ଭକ୍ତଙ୍କ ଭିଡ଼ ଜମିଥିବା ବେଳେ ମାଆଙ୍କ ପୂଜାରେ ସାମିଲ ହୋଇଛନ୍ତି । ମାଆ ଦୁର୍ଗାଙ୍କ ଆଗମନ ସଂସାରରେ ଉତ୍ସାହ ଭରିଥିବା ବେଳେ ଶ୍ରୀକ୍ଷେତ୍ରର ଘରେ ଘରେ ପୂଜା ପାଠ କରାଯାଉଥିବା ପରିଲକ୍ଷିତ ହୋଇଛି ।
ଅଜଣା ରୋଗରେ ପୀଡିତ ଦିବ୍ୟାଙ୍ଗ ଝିଅ, ସରକାରୀ ସହାୟତା ପାଇଁ ଗୁହାରୀ
ନନ୍ଦିଘୋଷ ବ୍ୟୁରୋ: ଖେଳକୁଦ ବୟସରେ ଆରମ୍ଭ ହେଲା ଜୀବନ ସଂଗ୍ରାମ। ଜନ୍ମରୁ ମୂକ ହୋଇଯାଇଥିବା ଝିଅ ଅଜଣା ରୋଗରେ ହେଉଛି ଛଟପଟ। ନା କହିପାରୁଛି ନା ଚାଲିପାରୁଛି। ଆର୍ଥିକ ଦୁର୍ଗତି ଭିତରେ ଥିବା ପରିବାର ଝିଅ ମୁହଁରେ ଫୁଟାଇ ପାରୁନାହାନ୍ତି ହସ।
ଦଇବ ଦେଲା ଦୁଃଖ। ଜନ୍ମରୁ ମୂକ ନନ୍ଦିନୀ। ବୋଝ ଉପରେ ନଳିତା ବିଡ଼ା ସଦୃଶ ୬ ବର୍ଷରେ ଆସିଲା ଅଜଣା ରୋଗ। କ୍ରମଶଃ ପାଦ ହୋଇଗଲା ଅଚଳ। କଟକ ଜିଲ୍ଲା ସାଲେପୁର ବ୍ଲକ ଜାହାଙ୍ଗିରାବାଦ ଗ୍ରାମର ଦିନ ମଜୁରିଆ ଅଜୟ କୁମାର ସାମଲଙ୍କ ଝିଅ ନନ୍ଦିନୀ। ବୟସ ୧୭ ହେଲେ, ନା ଚାଲି ପାରୁଛି ନା କଥା କହିପାରୁଛି। ବାପା ମା ହିଁ ସାଜିଛନ୍ତି ସାହାରା।ବାପା ଯାହା ସଞ୍ଚୟ କରିଥିଲେ ସବୁ ମେଡିକାଲରେ ସରିଲା। ଅଧିକ ଚିକିତ୍ସା ପାଇଁ ବାଧକ ସାଜିଲା ଅର୍ଥ। ସରକାରୀ ସହାୟତା ପାଇଁ ନେତା ଅଫିସରଙ୍କୁ ଗୁହାରୀ କରି ହେଲେ ନିରାଶ। ଖୁଆଇବା ଠାରୁ ଆରମ୍ଭ କରି ନିତ୍ୟକର୍ମ ସବୁକିଛି କରୁଛନ୍ତି ମାଆ। ନନ୍ଦିନୀ ଶହେ ପ୍ରତିଶତ ଭିନ୍ନକ୍ଷମ ଥିଲେ ବି ବର୍ଦ୍ଧିତ ଭତ୍ତା ମିଳୁନାହିଁ। ଅନେକ ସ୍ବପ୍ନ ଦେଖିବା ବୟସରେ ଘରେ ବାନ୍ଧି ହୋଇ ପଡିରହିଛନ୍ତି ନନ୍ଦିନୀ। ଜୀବନ ସଂଗ୍ରାମରେ ଯୁଝୁଥିବା ଝିଅଙ୍କ ଲାଗି କୌଣସି ମହଲରୁ ମିଳିପାରୁନାହିଁ ସହାୟତା। ସରକାରଙ୍କ ବହୁ ଯୋଜନା ଥିଲେ ବି ନନ୍ଦିନୀଙ୍କ ଲାଗି ସବୁ ଯେପରି ହୋଇଛି ବନ୍ଦ।
ଆସନ୍ତାକାଲି ସମେତ ୩ ତାରିଖ ଯାଏଁ ରାଜ୍ୟରେ ବଡ ବର୍ଷା
ନନ୍ଦିଘୋଷ ବ୍ୟୁରୋ: ଆଗାମୀ ୧୨ ଘଣ୍ଟାରେ ଅବପାତର ରୂପ ନେବ ଲଘୁଚାପ । ପରବର୍ତ୍ତୀ ସମୟରେ ଆହୁରି ଘନୀଭୂତ ହୋଇ ଗଭୀର ଅବପାତର ରୂପ ନେବା ସମ୍ଭାବନା । ସମ୍ଭାବ୍ୟ ଗଭୀର ଅବପାତ ପ୍ରଭାବରେ ଆସନ୍ତାକାଲି ସମେତ ୩ ତାରିଖ ଯାଏଁ ରାଜ୍ୟରେ ବଡ ବର୍ଷା ସହ ପବନ ବୋହିବ । ସୂଚନା ଦେଲା ଭାରତୀୟ ପାଣିପାଗ ବିଭାଗ । ବର୍ଷା ପ୍ରଭାବରେ ପୂଜା ତୋରଣ ସହ ପେଣ୍ଡାଲ ଗୁଡିକ ପ୍ରଭାବିତ ହେବା ନେଇ ସମ୍ଭାବନା ରହିଛି ।
ପ୍ରକାଶ ପାଇଲା ଭାରତର ଧନୀ ତାଲିକା, ପ୍ରଥମଥର କୋଟିପତି ତାଲିକାରେ ସାମିଲ ହେଲେ ଶାହାରୁଖ
ନନ୍ଦିଘୋଷ ବ୍ୟୁରୋ: ଭାରତରେ ବଢ଼ୁଛନ୍ତି କୋଟିପତି । ଏମ୩ଏମ ହୁରୁନ୍ ଇଣ୍ଡିଆ ପକ୍ଷରୁ ପ୍ରକାଶ ପାଇଛି ଭରତର ଧନୀ ତାଲିକା । ଏହି କୋଟିପତି ତାଲିକାରେ ପୁଣିଥରେ ଏକ ନମ୍ବରରେ ରହିଛନ୍ତି ମୁକେଶ ଅମ୍ବାନୀ । ପ୍ରଥମଥର ଲାଗି କୋଟିପତି କ୍ଲବରେ ସାମିଲ ହୋଇଛନ୍ତି ବଲିଉଡର କିଙ୍ଗ ଖାନ୍ ଶାହାରୁଖ ଖାନ । ଭାରତରେ ୩୫୦ରୁ ଅଧିକ ଆରବପତି ରହିଛନ୍ତି । ଗତ ୧୩ ବର୍ଷ ମଧ୍ୟରେ ଏହା ୬ ଗୁଣା ବୃଦ୍ଧି ପାଇଛି । ହୁରୁନ ଇଣ୍ଡିଆର ରିପୋର୍ଟକୁ ଯଦି ବିଶ୍ବାସ କରିବା ତାହେଲେ ମୁକେଶ ଅମ୍ବାନୀ ଏବଂ ତାଙ୍କ ପରିବାରର ସମୁଦାୟ ସମ୍ପତ୍ତି ଆନୁମାନିକ ୯.୫୫ ଲକ୍ଷ କୋଟି ଟଙ୍କା । ଦ୍ବିତୀୟ ସ୍ଥାନରେ ରହିଛନ୍ତି ଗୌତମ ଆଦାନୀ ତାଙ୍କ ସମ୍ପତ୍ତିର ମୂଲ୍ୟ ରହିଛି ୮.୧୫ ଲକ୍ଷ କୋଟି ଟଙ୍କା । ତେବେ ଏହି ତାଲିକାରେ ଶାହାରୁଖ ଖାନ ସ୍ଥାନ ପାଇଥିବାବେଳେ ତାଙ୍କ ସମୁଦାୟ ସମ୍ପତ୍ତିର ମୂଲ୍ୟ ରହିଛି ୧୨,୪୯୦ କୋଟି ଟଙ୍କା ।
ସରକାରୀ କର୍ମଚାରୀଙ୍କ ବଢ଼ିଲା ୩ ପ୍ରତିଶତ ମହଙ୍ଗା ଭତ୍ତା
ନନ୍ଦିଘୋଷ ବ୍ୟୁରୋ: ସରକାରୀ କର୍ମଚାରୀଙ୍କ ଲାଗି ଖୁସି ଖବର । ଦୀପାବଳି ପୂର୍ବରୁ ବଡ଼ ଘୋଷଣା କଲେ କେନ୍ଦ୍ର ସରକାର । କେନ୍ଦ୍ର ସରକାର କ୍ୟାବିନେଟ୍ ବୈଠକରେ କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ମହଙ୍ଗା ଭତ୍ତା (DA) ବୃଦ୍ଧି କରିବାକୁ ନିଷ୍ପତ୍ତି ନେଇଛନ୍ତି । ମହଙ୍ଗା ଭତ୍ତା ୩ ପ୍ରତିଶତ ବୃଦ୍ଧି ପାଇଛି । ଏହି ବର୍ଦ୍ଧିତ DA ଜୁଲାଇ ୧ରୁ ପିଛିଲା ଭାବରେ କାର୍ଯ୍ୟକାରୀ ହେବ ।
ସମସ୍ତ କେନ୍ଦ୍ର ସରକାର କର୍ମଚାରୀଙ୍କୁ ଜୁଲାଇ, ଅଗଷ୍ଟ ଏବଂ ସେପ୍ଟେମ୍ବରର ବକେୟା ଅକ୍ଟୋବର ଦରମା ସହିତ ମିଳିବ । ସରକାର ଦୀପାବଳି ପୂର୍ବରୁ ଲକ୍ଷ ଲକ୍ଷ କର୍ମଚାରୀଙ୍କୁ ଏକ ଉପହାର ଦେଇଛନ୍ତି । ମହଙ୍ଗା ଭତ୍ତା ୩ ପ୍ରତିଶତ ବୃଦ୍ଧି ପାଇଛି । ୭ମ ବେତନ ଆୟୋଗ ମୁତାବକ, ସମସ୍ତ କେନ୍ଦ୍ର ସରକାର କର୍ମଚାରୀଙ୍କ ସହିତ ପେନସନଭୋଗୀଙ୍କ ପାଇଁ ଏହା ଲାଗୁ ହେବ ।
ସରକାର ପୂର୍ବରୁ ମହଙ୍ଗା ଭତ୍ତା (DA) ଏବଂ ମହଙ୍ଗା ରିଲିଫ୍ (DR) ୨% ବୃଦ୍ଧି କରିଥିଲେ । ଯାହା ଜାନୁଆରୀ ୧, ୨୦୨୫ ରୁ ଲାଗୁ ହୋଇଥିଲା । ଏହାଦ୍ବାରା ୧୧.୫ ନିୟୁତ କେନ୍ଦ୍ର ସରକାରୀ କର୍ମଚାରୀ ଏବଂ ପେନସନଭୋଗୀ ଉପକୃତ ହୋଇଥିଲେ । ଏହି ବୃଦ୍ଧି ପରେ ମହଙ୍ଗା ଭତ୍ତା ମୂଳ ଦରମାର ୫୩% ରୁ ୫୫% କୁ ବୃଦ୍ଧି ପାଇଲା । ଏବେ ୩ ପ୍ରତିଶତ ବଢିଲା ପରେ ମହଙ୍ଗା ଭତ୍ତା ମୂଳ ଦରମାର ୫୮%କୁ ବୃଦ୍ଧି ପାଇଛି ।
ଏହି ଖେଳାଳି ମାରିଲେ ଦ୍ରୁତତମ ଶତକ, ୧୦ ଛକା ମାରି…
ନନ୍ଦିଘୋଷ ବ୍ୟୁରୋ: ଆଇପିଏଲ ଢ଼ାଞ୍ଚାରେ ଏବେ ସବୁ ରାଜ୍ୟରେ ପ୍ରିମିୟର ଲିଗ୍ ଖେଳାଯାଉଛି । ଏବେ ଉତ୍ତରାଖଣ୍ଡରେ ଖେଳାଯାଉଥିବା ଉତ୍ତରାଖଣ୍ଡ ପ୍ରିମିୟର ଲିଗରେ ଏକ ବଡ଼ ରେକର୍ଡ ନଜର ଆସିଛି । ଦ୍ରୁତତମ ଶତକ ହାସଲ କରିଥିବା ନଜର ଆସିଛି । ମଙ୍ଗଳବାର usn Indians ଏବଂ RIF ମଧ୍ୟରେ ଖେଳାଯାଇଥିଲା ମ୍ୟାଚ୍ । ଏହି ମ୍ୟାରେ usn Indians ପ୍ରଥମେ ବ୍ୟାଟିଂ କରି ୨୩୦ ରନ କରିଥିଲା । ଦଳ ପକ୍ଷରୁ ବିଶାଲ କାଶ୍ୟପ ୧୧୬ ରନର ପାଳି ଖେଳିଥିଲେ । ୫୯ ବଲରେ ୮ ଛକା ଏବଂ ୧୧ ଚୌକା ମାରିଥିଲେ । ଦଳର ବିଜୟ ଏକପ୍ରକାର ସୁନିଶ୍ଚିତ ବୋଲି ସମସ୍ତେ କହିଥିଲେ ।
ମାତ୍ର ଦ୍ବିତୀୟ ପାଳିରେ ସବୁ କିଛି ଓଲଟ ପାଲଟ ହୋଇଯାଇଥିଲା । ରିଷିକେଶ ପକ୍ଷରୁ ଖେଳୁଥିବା ଆଲେନ ଚେତନ ଦ୍ରୁତତମ ଶତକ ହାସଲ କରି ସବୁ ଓଲଟ ପାଲଟ କରି ଦେଇଥିଲେ । ସେ ମାତ୍ର ୫୪ ବଲରେ ୧୧୬ ରନର ପାଳିଖେଳିଥିଲେ । ଯେଉଁଥିରେ ୧୦ ଛକା ଏବଂ ୭ ଚୌକା ରହିଛି । ତେବେ ମାତ୍ର ୪୪ ବଲରେ ସେ ଶତକ ହାସଲ କରି ରେକର୍ଡ କରିଛନ୍ତି । ଏହା ଉତ୍ତରାଖଣ୍ଡ ପ୍ରିମିୟର ଲିଗରେ ସବୁଠାରୁ ଦ୍ରୁତତମ ଶତକର ରେକର୍ଡ ହୋଇଛି ।
ଥମୁନି ଉତ୍ତରପ୍ରଦେଶ ବରେଲିରେ ଉତ୍ତେଜନା
ନନ୍ଦିଘୋଷ ବ୍ୟୁରୋ: ଥମୁନି ଉତ୍ତରପ୍ରଦେଶ ବରେଲିରେ ଉତ୍ତେଜନା। କଂଗ୍ରେସ ସାଂସଦ ଇମରାନ ମାସୁଦ ଓ ଡାନିସ ଅଲ୍ଲୀଙ୍କୁ ଗୃହବନ୍ଦୀ କରାଯାଇଛି। ଆଇ ଲଭ ମହମ୍ମଦ ବିବାଦକୁ ନେଇ ଗତ କିଛି ଦିନ ଧରି ବରେଲିରେ ଉତ୍ତେଜନା ଲାଗି ରହିଛି। ବରେଲି ଯିବା ବାଟରେ ଆଜି ଡାନିସଙ୍କୁ ଅମରୋହାରେ ପୋଲିସ ଅଟକ ରଖିବା ସହ ତାଙ୍କୁ ଗୃହବନ୍ଦୀ କରାଯାଇଛି। ବରେଲିର ଡିଆଇଜିଙ୍କୁ ଭେଟିବାକୁ ଯିବାବେଳେ ସାଂସଦ ମାସୁଦଙ୍କୁ ଶାହାହରନପୁରରେ ଅଟକ ରଖାଯାଇଛି। ତେବେ ଆଇନଶୃଙ୍ଖଳା କାରଣରୁ ସେମାନଙ୍କୁ ଅଟକ ରଖାଯାଇଛି ବୋଲି ପୋଲିସ କହିଛି। ଗତ ଶୁକ୍ରବାର ପ୍ରାର୍ଥନା ପରଠାରୁ ଆଇ ଲଭ ମହମ୍ମଦ ପ୍ରସଙ୍ଗକୁ ନେଇ ବରେଲିରେ ହିଂସା ତେଜିଥିଲା। ବରେଲିର ଇସଲାମିଆ ଗ୍ରାଉଣଅଡରେ ଏକ ହଜାରରୁ ଅଧିକ ଲୋକଙ୍କ ସମାଗମ ହୋଇଥିବାବେଳେ ସେଠାରେ ଆକସ୍ମିକ ଉତ୍ତେଜନା ପ୍ରକାଶ ପାଇଥିଲା। ଏହି ପ୍ରାର୍ଥନା ସଭାରେ ସାମିଲ ହୋଇଥିଲେ ଧର୍ମଗୁରୁ ମୌଲାନା ତାକିର ରାଜା ଖାଁ। ଆନ୍ଦୋଳନବେଳେ ଟେକାପଥରମାଡ ହେବା ସହ ଗାଡି ଭଙ୍ଗାରୁଜା ହୋଇଥିଲା। ଉତ୍ତେଜନା ପ୍ରଶମିତ କରିବା ଲାଗି ପୋଲିସ ପକ୍ଷରୁ ଫାଙ୍କା ଗୁଳିଚାଳନା କରାଯାଇଥିଲା।
ସିମେଣ୍ଟ ଫ୍ୟାକ୍ଟ୍ରିରେ ଅଗ୍ନିକାଣ୍ଡ, ଗ୍ୟାସ ସିଲିଣ୍ଡର ଫାଟିଯିବାରୁ…
ନନ୍ଦିଘୋଷ ବ୍ୟୁରୋ: ସିମେଣ୍ଟ ଫ୍ୟାକ୍ଟ୍ରିରେ ଅଗ୍ନିକାଣ୍ଡ । ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଳକ୍ ତିଛିଣି ଗ୍ରାମରେ ଥିବା ଟୁକୁନା ତରେଇଙ୍କର ସିମେଣ୍ଟ ବ୍ଲକ ଫ୍ୟାକ୍ଟ୍ରିରେ ଭୟାବହ ଅଗ୍ନିକାଣ୍ଡ । ରୋଷେଇ କଲାବେଳେ ଗ୍ଯାସ ସିଲିଣ୍ଡର ଫାଟିଯାଇ ନିଆଁ ଲାଗିଯାଇଥିଲା । ତିନିଟି ଟାଙ୍କି ଫାଟିବାରୁ ଅଗ୍ନିକାଣ୍ଡ ଘଟିଥିବାବେଳେ ଶ୍ରମିକ ମାନେ ବର୍ତ୍ତିଯାଇଛନ୍ତି । ଅଗ୍ନିକାଣ୍ଡରେ ଘରଟି ସଂପୂର୍ଣ୍ଣ ଜଳିଯାଇଥିବାବେଳେ ଲକ୍ଷାଧିକ ଟଙ୍କାର ସମ୍ପତ୍ତି ଜଳିପୋଡି ପାଉଁଶ ହୋଇଯାଇଛି । ଭୟଙ୍କର ଅଗ୍ନିକାଣ୍ଡ ଦେଖି ଗାଁ ଲୋକେ ସଂପୂର୍ଣ୍ଣ ଭୟଭୀତ ଅବସ୍ଥାରେ ଅଛନ୍ତି ।
ବିସିସିଆଇ ନିକଟରେ କ୍ଷମା ମାଗିଲେ ଏସିସି ଅଧ୍ୟକ୍ଷ ମହସିନ ନକଭି
ନନ୍ଦିଘୋଷ ବ୍ୟୁରୋ: ଶେଷରେ ବିସିସିଆଇ ନିକଟରେ କ୍ଷମା ମାଗିଲେ ଏସିସି ଅଧ୍ୟକ୍ଷ ମହସିନ ନକଭି। ଦୁବାଇ ଏସିସି ବୈଠକରେ କ୍ଷମା ମାଗିଛନ୍ତି ନକଭି। କହିଛନ୍ତି- ଏପରି ସ୍ଥିତି ଆସିବାର ନଥିଲା। ତେବେ ସେ ଟ୍ରଫି ଓ ମେଡାଲ ଫେରାଇବାକୁ ମନା କରିଛନ୍ତି। ପାକିସ୍ତାନ ବିରୋଧରେ ଭାରତର ବିଜୟ ପରେ ସେଲିବ୍ରେସନ ଲାଗି ଅନୁମତି ଦେଇ ନଥିଲେ ନକଭି। ରବିବାର ଫାଇନାଲରେ ନକଭିଙ୍କ ହାତରୁ ଟ୍ରଫି ଓ ମେଡାଲ ଗ୍ରହଣ କରିବାକୁ ମନା କରିଥିଲେ ଭାରତୀୟ ଖେଳାଳି। ଭାରତୀୟ ଖେଳାଳି ଟ୍ରଫି ଓ ମେଡାଲ ନେବାକୁ ମନା କରିବା ପରେ ଟ୍ରଫି ଓ ମେଡାଲ ନେଇଯିବାକୁ ଏସିସିକୁ ନିର୍ଦ୍ଦେଶ ଦେଇଥିଲେ ନକଭି। ଯଦି ଗଣମାଧ୍ୟମ ରିପୋର୍ଟକୁ ବିଶ୍ୱାସ କରାଯାଏ, ତେବେ ବିସିସିଆଇ ଅଧିକାରୀମାନେ ଟ୍ରଫି ଫେରାଇବା ପ୍ରଶ୍ନରେ ପିସିବି ମୁଖ୍ୟ କହିଛନ୍ତି ଯେ ସେମାନେ ଏହାକୁ ଫେରାଇ ଦେବେ କିନ୍ତୁ ଏହାକୁ ନେବା ପାଇଁ ଭାରତୀୟ ଦଳର ଅଧିନାୟକ ସୂର୍ଯ୍ୟକୁମାର ଯାଦବଙ୍କୁ ଏସୀୟ କ୍ରିକେଟ ପରିଷଦ କାର୍ଯ୍ୟାଳୟକୁ ଆସିବାକୁ ପଡିବ।