ଲମତାପୁଟ: ଲଗାଣ ବର୍ଷା ଯୋଗୁଁ ଚଳିତ ବର୍ଷ ପ୍ରଥମ ଥର ଜଲାପୁଟ ଡ୍ୟାମର ୬ଟି ଗେଟ ଖୋଲିଛି। ଜଲାପୁଟ ଡ୍ୟାମର କ୍ଷମତା ୨ ହଜାର ୭୫୦ ଫୁଟ ରହିଥିବା ବେଳେ ୨ ହଜାର ୭୪୯.୪୫ କୁ ଜଳସ୍ତର ଛୁଇଁଛି । ଡ୍ୟାମକୁ ୨ ହଜାର କ୍ୟୁସେକ ପାଣି ପ୍ରବେଶ କରୁଥିବା ବେଳେ ଜଲାପୁଟର ସ୍ପିଲ ଓ୍ବେ ଡ୍ୟାମ ଏବଂ ମୁଖ୍ୟ ଡ୍ୟାମ ଦେଇ ୨୩ ହଜାର କ୍ୟୁସେକ ପାଣି ଛଡାଯାଉଛି । ସେହି ପାଣି ମାଛକୁଣ୍ଡ ଜଳବିଦ୍ୟୁତ ପ୍ରକଳ୍ପ ର ଡି.ଡ୍ୟାମରେ ପହଞ୍ଚି ଜଳସ୍ତର ବଢ଼ିବାରୁ ୪ଟି ଗେଟ ଖୋଲାଯାଇଛି । ଜଳଭଣ୍ଡାରରେ ଜଳସ୍ତର ବଢ଼ି ବିପଦ ସଂକେତକୁ ଛୁଇଁବା ପରେ ଡି.ଡ୍ୟାମର ୪ଟି ଗେଟ ଖୋଲିଛି। ୩ ନମ୍ବର, ୫ ନମ୍ବର, ୬ ନମ୍ବର ଏବଂ ୭ ନମ୍ବର ଗେଟ ଖୋଲି ୨୦ ହଜାର କ୍ୟୁସେକ ପାଣି ନିଷ୍କାସିତ କରାଯାଉଛି । ଡ୍ୟାମ କ୍ଷମତା ୨୫ ଶହ 90 ଫୁଟ ଥିବା ବେଳେ ବର୍ତ୍ତମାନ ୨୫ ଶହ ୮୬ ଫୁଟ କୁ ଜଳସ୍ତର ଛୁଇଁଛି।
ଲଗାଣ ବର୍ଷାରେ ବେହାଲ ସମଗ୍ର ମାଲକାନଗିରି ଜିଲ୍ଲା, ସୋମନାଥପୁରରେ କାନ୍ଥ ଭୁଶୁଡ଼ି ୩ ଆହତ
ମାଲକାନଗିରି: ଲଗାଣ ବର୍ଷାରେ ବେହାଲ ସମଗ୍ର ମାଲକାନଗିରି ଜିଲ୍ଲା। ମାଲକାନଗିରିରୁ ଜୟପୁର ସଂଯୋଗ କରୁଥିବା ୩୨୬ ନମ୍ବର ଜାତୀୟ ରାଜପଥ ପାଙ୍ଗମା ପୋଲ ଉପରେ ତିନି ଫୁଟ ଉଚ୍ଚରେ ପାଣି ପ୍ରବାହିତ ହେଉଛି । ମାଲକାନଗିରି ଠାରୁ ମୋଟୁ ମଧ୍ୟରେ ଥିବା କାଙ୍କୁରୁକୋଣ୍ଡା, ଏମଭି-୯୦ ଓ ଏମଭି-୯୬ ପୋଲ ଉପରେ ମଧ୍ୟ ପାଣି ପ୍ରବାହିତ ହେଉଛି । ଫଳରେ ମାଲକାନଗିରି ଠାରୁ କାଲିମେଳା, ମୋଟୁ ଓ ଜୟପୁର ମଧ୍ୟରେ ଯୋଗାଯୋଗ ବିଚ୍ଛିନ୍ନ ରହିଛି । ପୋଲର ଦୁଇ ପାର୍ଶ୍ଵରେ ଅନେକ ଯାନ ବାହାନ ଅଟକି ରହିଛି । ଭାରି ବର୍ଷା ଯୋଗୁଁ ସହରରେ ମଧ୍ୟ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଲୋକଙ୍କ ଦୋକାନ ଓ ଘରେ ପାଣି ପଶିଛି । ବିଭିନ୍ନ ସାହି ଓ ବସ୍ତିରେ ମଧ୍ୟ ପାଣି ପ୍ରବାହିତ ହେଉଛି ।
କୋରୁକୋଣ୍ଡା ବ୍ଲକ ସୋମନାଥପୁର ପଞ୍ଚାୟତର ତୋଟାଗୁଡା ଗାଁରେ କାନ୍ଥ ଭୁଷୁଡି ତିନି ଜଣ ଆହତ ହୋଇଛନ୍ତି । ଆହତ ମାନଙ୍କୁ ମେଡିକାଲରେ ଭର୍ତ୍ତି କରାଯାଇଛି ।ମାଲକାନଗିରି ଜିଲ୍ଲା ପୋଟେରୂରେ ବନ୍ୟା । ପୋଟେରୂ ନଦୀର ବନ୍ୟା ଜଳ ଗାଁ ଭିତରେ ପ୍ରବେଶ କରିଛି । ଲୋକଙ୍କ ଘର ଦ୍ବାର ଦୋକାନ ବଜାର ବନ୍ୟା ପାଣିର ବୁଡି ରହିଛି । ବର୍ଷା ଜାରି ରହିଥିବା ବେଳେ ସ୍ଥିତି ଆହୁରି ସାଙ୍ଘାତିକ ହେବାରେ ଆଶଙ୍କା ରହିଛି । ଲୋକେ ଘର ଦ୍ବାର ଛାଡି ପୋଟେରୂ ଥାନାର ଦୁଇ ମହଲା ଉପରେ ଆଶ୍ରୟ ନେଇଛନ୍ତି ।
ମିଳିପାରେ ଜିଏସଟି ଆଶ୍ବସ୍ତି; ଆଜି ଦିଲ୍ଲୀରେ ବସିବ ୫୪ତମ ଜିଏସଟି ପରିଷଦ ବୈଠକ
ନୂଆଦିଲ୍ଲୀ: ଆଜି ଦିଲ୍ଲୀରେ ବସିବ ୫୪ତମ ଜିଏସଟି ପରିଷଦ ବୈଠକ। ଲୋକସଭା ନିର୍ବାଚନ ପରେ ଏହା ହେବ ଦ୍ବିତୀୟ ଜିଏସଟି ପରିଷଦ ବୈଠକ। ସାମିଲ ହେବେ ଅର୍ଥମନ୍ତ୍ରୀ ନିର୍ମଳା ସୀତାରମଣ। ଜିଏସଟି କ୍ଷତିପୂରଣ ସେସକୁ ଜାରି ରଖିବା କିମ୍ବା ଏହା ବଦଳରେ ଅନ୍ଯ କୌଣସି ନୂଆ କର କିମ୍ବା ସେସ୍ ଲାଗି ବୈଠକରେ ଆଲୋଚନା ହୋଇପାରେ।
ସେହିପରି ଜୀବନ ଓ ସ୍ବାସ୍ଥ୍ଯ ବୀମା ପ୍ରିମିୟମ କ୍ଷେତ୍ରରେ ଜିଏସଟି ହାର ହ୍ରାସ ଲାଗି ହୋଇପାରେ ନିଷ୍ପତ୍ତି। ବର୍ତ୍ତମାନ ଏହି ବୀମା ପ୍ରିମିୟମ କ୍ଷେତ୍ରରେ ଜିଏସଟି ଲାଗୁ କରାଯାଉଛି ୧୮ ପ୍ରତିଶତ। ଯଦି ଏହା ଗୃହୀତ ହୁଏ ତେବେ ବିଭିନ୍ନ ବୀମା କମ୍ପାନିରେ ସାମିଲ ଥିବା ହିତାଧିକାରୀ ଉପକୃତ ହେବେ। ସେହିପରି ବିଦେଶୀ ଏୟାରଲାଇନ୍ସ ହୋଇପାରନ୍ତି ଉପକୃତ। ବିଦେଶୀ ଏୟାରଲାଇନସ୍ ଦ୍ବାରା ଆମଦାନୀ ହେଉଥିବା ସେବାକୁ କରମୁକ୍ତ କରିବା ପ୍ରସ୍ତାବ ଉପରେ ବି ଲାଗିପାରେ ମୋହର। କର୍କଟ ରୋଗ ଲାଗି ଔଷଧ, ବିଦ୍ଯୁତ ମିଟର ସେବା ଉପରୁ ଜିଏସଟି ହ୍ରାସ ବି ବିଚାରାଧୀନ ରହିଛି।
ସେହିପରି ରିୟଲଇଷ୍ଟେଟ ଓ ଧାତବ ଶିଳ୍ପ ଲାଗି କେତେକ ରିହାତି ଘୋଷଣା କରିପାରନ୍ତି ସରକାର। ଯଦି ଏହି ପ୍ରସ୍ତାବ ଗୃହୀତ ହେବ ତେବେ ସମ୍ପତ୍ତି କ୍ରୟ କରୁଥିବା ବ୍ଯକ୍ତି ଓ ଛାତ୍ରଛାତ୍ରୀ ଉପକୃତ ହେବେ ବୋଲି କୁହାଯାଇଛି। ଲୋକସଭା ନିର୍ବାଚନ ପରେ ଗତ ଜୁନ ୨୨ରେ ଜିଏସଟି ବୈଠକ ବସିଥିଲା।
ନୂଆଦିଲ୍ଲୀସ୍ଥିତ ଓଡିଶା ଭବନକୁ ଅସୁରକ୍ଷିତ ଘୋଷଣା କରିଛନ୍ତି ରାଜ୍ୟ ସରକାର
ଭୁବନେଶ୍ୱର: ନୂଆଦିଲ୍ଲୀ ସ୍ଥିତ ଓଡିଶା ଭବନକୁ ଅସୁରକ୍ଷିତ ଘୋଷଣା କରିଛନ୍ତି ରାଜ୍ୟ ସରକାର। ଓଡିଶା ଭବନ ଏବେ ରହିବା ପାଇଁ ଆଉ ସୁରକ୍ଷିତ ନୁହେଁ। ପୂର୍ତ୍ତ ବିଭାଗର ଆଧାରରେ ରାଜ୍ୟ ସରକାର ଓଡିଶା ଭବନକୁ ଅସୁରକ୍ଷିତ ଘୋଷଣା କରିବା ସହ ଏହାକୁ ଭାଙ୍ଗିବାକୁ ନିର୍ଦ୍ଦେଶ ଦେଇଛନ୍ତି।
୨୦୨୦ ଜୁନ ୨୯ ତାରିଖରେ ଦିଲ୍ଲୀ ମ୍ଯୁନିସିପାଲ କାଉନସିଲର ମୁଖ୍ୟ ଆର୍କିଟେକ୍ଟ ସବୁ ସରକାରୀ କୋଠାର ସୁରକ୍ଷା ସମ୍ପର୍କିତ ଅଡିଟ କରିବା ପାଇଁ ନିର୍ଦ୍ଦେଶ ଦେଇଥିଲେ। ତଦନୁଯାୟୀ ପୂର୍ତ୍ତ ବିଭାଗ ରାଜ୍ୟ ସରକାର ତିନିଟି ଯାକ କୋଠା-ଓଡିଶା ଭବନ, ଓଡିଶା ନିବାସ ଓ ଓଡିଶା ସଦନର ସୁରକ୍ଷା ଯାଞ୍ଚ କରିଥିଲେ। ପୂର୍ତ୍ତ ବିଭାଗର ମୁଖ୍ୟଯନ୍ତ୍ରୀ ୨୦୨୨ ଏପ୍ରିଲ ୧୯ ତାରିଖରେ ଓଡିଶା ଭବନ ରହିବା ପାଇଁ ସୁରକ୍ଷିତ ନୁହେଁ ଏବଂ ଏହାକୁ ଦୁଇ ତିନି ବର୍ଷ ମଧ୍ୟରେ ଭାଙ୍ଗିବାକୁ ସୁପାରିଶ କରିଥିଲେ। ଏହି କୋଠା ଆଉ ମରାମତି ଯୋଗ୍ୟ ନୁହେଁ ବୋଲି ମଧ୍ୟ ପୂର୍ତ୍ତ ବିଭାଗ ରିପୋର୍ଟ ଦେଇଥିଲା। ତଦନୁଯାୟୀ ଓଡିଶା ଭବନକୁ ଅସୁରକ୍ଷିତ ଘୋଷଣା କରିବା ସହ ଏହାକୁ ଭାଙ୍ଗିବାକୁ ନିର୍ଦ୍ଦେଶ ଦେଇଛନ୍ତି ସରକାର।
ସାପ କାମୁଡ଼ାରେ ଗଲା ୩ ଭଉଣୀଙ୍କ ଜୀବନ, ବାପା ଗୁରୁତର ଅବସ୍ଥାରେ ବୁର୍ଲା ସ୍ଥାନାନ୍ତର
ବୌଦ୍ଧ: ସାପ କାମୁଡ଼ାରେ ଗଲା ୩ ଭଉଣୀଙ୍କ ଜୀବନ। ବାପା ଗୁରୁତର ଅବସ୍ଥାରେ ବୁର୍ଲା ସ୍ଥାନାନ୍ତର। ଏଭଳି ଘଟଣା ଘଟିଛି ବୌଦ୍ଧ ଆଦର୍ଶ ଥାନା ଟିକରପଡ଼ା ପଂଚାୟତ ଅନ୍ତର୍ଗତ ଚେରୁଆ ଗ୍ରାମରେ । ସେହି ଗ୍ରାମର ଶୈଳେନ୍ଦ୍ର ମଲ୍ଲିକ ଖାଇ ସାରି ପରିବାର ସହ ଶୋଇଥିବା ବେଳେ ଏକ ବିଷାକ୍ତ ସାପ କାମୁଡିିଛି।
ସୂଚନା ଅନୁଯାୟୀ, ରବିବାର ବିଳମ୍ବିତ ରାତିରେ ଶୈଳେନ୍ଦ୍ର ମଲ୍ଲିକଙ୍କ ପରିବାର ଖାଇ ସାରି ଶୋଇଥିବା ବେଳେ ଏକ ବିଷଧର ସାପ ଆସି ପରିବାରର ୪ ଜଣଙ୍କୁ କାମୁଡ଼ି ଦେଇଥିଲା। ଏହା କୌଣସି ମତେ ଜଣାପଡିବା ପରେ ଗ୍ରାମବାସୀ ମିଶି ଏକ ଆମ୍ବୁଲାନ୍ସ ଯୋଗେ ସମସ୍ତଙ୍କୁ ବୌଦ୍ଧ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ତେବେ ସେଠାରେ ଡାକ୍ତର ୩ ଭଉଣୀଙ୍କୁ ମୃତ ଘୋଷଣା କରିଥିବା ବେଳେ ପରିବାରର ମୁଖ୍ୟ ଶୈଳେନ୍ଦ୍ରଙ୍କୁ ବୁର୍ଲା ସ୍ଥାନାନ୍ତରିତ କରାଯାଇଛି। ମୃତକ ହେଲେ ଶୁଦ୍ଧିରେଖା, ଶୁଭରେଖା, ସୁରଭି। ପୋଲିସ ଶବକୁ ଜବତ କରି ତଦନ୍ତ କରୁଥିବା ଜଣାପଡିଛି । ଅନ୍ୟପଟେ ଶୈଳେନ୍ଦ୍ରଙ୍କ ପତ୍ନୀ ଓ ସାନପୁଅ ଅନ୍ୟତ୍ର ଶୋଇଥିବାରୁ ଅଳ୍ପକେ ବର୍ତ୍ତି ଯାଇଛନ୍ତି।
ଆଜି ଉପକୂଳ ଓଡିଶାରେ ଭୀଷଣ ବର୍ଷା; ପ୍ରସ୍ତୁତ ରହିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ
ଭୁବନେଶ୍ୱର: ଗଭୀର ଅବପାତର ରୂପ ନେଲା ଅବପାତ। ଏହା ପ୍ରଭାବରେ ଆଜି ଉପକୂଳ ଓଡିଶାରେ ଭୀଷଣ ବର୍ଷା ହେବ। ପ୍ରବଳ ବର୍ଷାକୁ ଦୃଷ୍ଟିରେ ରଖି ସତର୍କ ରହିବା ଲାଗି ବିଭିନ୍ନ ଜିଲ୍ଲାପ୍ରଶାସନକୁ ସରକାରଙ୍କ ନିର୍ଦ୍ଦେଶ। ପାଣିପାଗ ବିଭାଗର ପୂର୍ବାନୁମାନ ଅନୁସାରେ ପଶ୍ଚିମ-କେନ୍ଦ୍ର ଏବଂ ପାର୍ଶ୍ୱବର୍ତ୍ତୀ ଉତ୍ତର–ପଶ୍ଚିମ ବଙ୍ଗୋପସାଗରରେ ଅବପାତ କ୍ଷେତ୍ର ସୃଷ୍ଟି ହୋଇଛି । ଏହା ଉତ୍ତର ଓଡିଶା, ପଶ୍ଚିମ ବଙ୍ଗ ଉପକୂଳରେ ଗତିଶୀଳ ହୋଇ ଗଭୀର ଅବପାତର ରୂପ ନେଇପାରେ । ଏହା ପୁରୀ ଏବଂ ଦିଘା ମଧ୍ୟରେ ଆଜି ରାତି ସୁଦ୍ଧା ଅତିକ୍ରମ କରିପାରେ। ଏହି ପରିପ୍ରେକ୍ଷୀରେ ଓଡିଶା ଉପକୂଳରେ ସମ୍ଭାବ୍ୟ ଲଘୁଚାପ ଜନିତ ଲଗାଣ ବର୍ଷା ପାଇଁ ପ୍ରସ୍ତୁତି ରହିବାକୁ ନିର୍ଦ୍ଦେଶ।
ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଏକ ଜରୁରୀ ବୈଠକ ଲୋକସେବା ଭବନରେ ଅନୁଷ୍ଠିତ ହୋଇଥିଲା। ଉପକୂଳ ଜିଲ୍ଲାଗୁଡିକରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ଦୃଷ୍ଟିରୁ ପୁରୀ , ଜଗତସିଂହପୁର, ଖୋର୍ଦ୍ଧା, କଟକ, ଢେଙ୍କାନାଳ ଜିଲ୍ଲା ପ୍ରଶାସନକୁ ପ୍ରସ୍ତୁତି ସହ ପଦକ୍ଷେପ ନେବା ପାଇଁ ନିର୍ଦ୍ଦେଶ ଦିଆଯାଇଛି । ମାଲକାନଗିରି, କୋରାପୁଟ, ରାୟଗଡା, ଗଜପତି, ଗଂଜାମ ଜିଲ୍ଲାକୁ ପ୍ରସ୍ତୁତି ପାଇଁ ସଜାଗ କରାଯାଇଛି । ଏ ସଂପର୍କରେ ସମ୍ପୃକ୍ତ ଜିଲ୍ଲାପାଳମାନଙ୍କୁ ଅବଗତ କରାଯାଇଛି । ସମ୍ଭାବ୍ୟ ଲଗାଣ ବର୍ଷା ଫଳରେ ବିଭିନ୍ନ ତଳିଆ ଅଂଚଳରେ ବର୍ଷା ଜମି ରହିବାର ସମ୍ଭାବନାକୁ ଦୃଷ୍ଟିରେ ରଖି ପଦକ୍ଷେପ ନିଆଯିବା।
ଆବଶ୍ୟକସ୍ଥଳେ ଅତ୍ୟଧିକ ବର୍ଷା ହେଲେ ତଳିଆ ଅଂଚଳ ଲୋକଙ୍କୁ ଉଚ୍ଚ ସ୍ଥାନକୁ ସ୍ଥାନାନ୍ତରଣ କରିବାକୁ ନିର୍ଦ୍ଦେଶ ଦିଆଯାଇଛି । କ୍ଷେତ୍ରସ୍ତରରେ ଥିବା ଯନ୍ତ୍ରୀମାନଙ୍କୁ ନଦୀ ବନ୍ଧ ପ୍ରତି ସତର୍କ ଦୃଷ୍ଟି ରଖିବାକୁ କୁହାଯାଇଛି । ମହାନଗର ନିଗମ ଓ ପୌରାଂଚଳ କର୍ତ୍ତୃପକ୍ଷମାନଙ୍କୁ ଡ୍ରେନେଜ ସମସ୍ୟା ଉପୁଜିଲେ ତୁରନ୍ତ ପ୍ରତିକାର ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି । ଅଗ୍ନିଶମ ସେବା ବିଭାଗ ଏବଂ ଓଡ୍ରାଫ୍ ମୁତୟନ କରାଯିବା ପାଇଁ ନିର୍ଦ୍ଦେଶ ଦିଆଯାଇଛି ।
ଗଭୀର ଅବପାତର ରୂପ ନେଲା ଅବପାତ; ଭୀଷଣ ବର୍ଷା ନେଇ ୫ ଜିଲ୍ଲାକୁ ରେଡ୍ ଆଲର୍ଟ ଜାରି
ଭୁବନେଶ୍ୱର: ଗଭୀର ଅବପାତର ରୂପନେଲା ଅବପାତ। ପଶ୍ଚିମ କେନ୍ଦ୍ରୀୟ ସଂଲଗ୍ନ ଉତ୍ତର ପଶ୍ଚିମ ବଙ୍ଗୋପସାଗରରେ ଗଭୀର ଅବପାତ ସୃଷ୍ଟି ହୋଇଛି । କିଛି ସମୟ ମଧ୍ୟରେ ପୁରୀ ଉପକୂଳ ଅତିକ୍ରମ କରିବ । ପରେ ପଶ୍ଚିମ ଉତ୍ତର ପଶ୍ଚିମ ଦିଗରେ ଗତିକରି ପଶ୍ଚିମବଙ୍ଗ, ଉତ୍ତର ଓଡିଶା, ଝାଡ଼ଖଣ୍ଡ ଦେଇ ଛତିଶଗଡ଼ ମୁହାଁ ହେବ। ଏହା ପ୍ରଭାବରେ ଆଜି ଉପକୂଳ ଓଡିଶାରେ ଭୀଷଣ ବର୍ଷା ହେବ । ଏନେଇ ୫ ଜିଲ୍ଲାକୁ ରେଡ, ୧୨ ଜିଲ୍ଲାକୁ ଅରେଞ୍ଜ ଏବଂ ୧୩ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି ।
ପୁରୀ, ଖୋର୍ଦ୍ଧା, କଟକ, ଜଗତସିଂହପୁର ଏବଂ ଢେଙ୍କାନାଳକୁ ରେଡ ଆଲର୍ଟ ଜାରି ହୋଇଛି । ଏହି ଜିଲ୍ଲା ଗୁଡିକରେ ୨୦୦ ମିମି ରୁ ଅଧିକ ବର୍ଷା ହୋଇପାରେ। ଭୂସ୍ଖଳନ, ଆକସ୍ମିକ ବନ୍ୟା, ଜଳବନ୍ଦୀ ପରିସ୍ଥିତି ସୃଷ୍ଟି ହେବା ସମ୍ଭାବନା ରହିଛି। କଚ୍ଚା ଘର ଏବଂ କଚ୍ଚା ରାସ୍ତା ପ୍ରଭାବିତ ହେବ । ୧୧ ତାରିଖ ପର୍ଯ୍ୟନ୍ତ ମତ୍ସ୍ୟଜୀବୀଙ୍କୁ ସମୁଦ୍ର ମନା । ସବୁ ବନ୍ଦରରେ ୩ ନମ୍ବର ବିପଦ ସଂକେତ ଜାରି କରାଯାଇଛି ।
ଭାରତରେ ମଙ୍କିପକ୍ସର ଏଣ୍ଟ୍ରି: ବିଦେଶ ଫେରନ୍ତାଙ୍କ ଶରୀରରେ ଚିହ୍ନଟ ହେଲା ଲକ୍ଷଣ
ନୂଆଦିଲ୍ଲୀ: ଭାରତରେ ମଙ୍କିପକ୍ସର ଏଣ୍ଟ୍ରି। ବିଦେଶ ଫେରନ୍ତାଙ୍କ ଶରୀରରେ ଚିହ୍ନଟ ହେଲା ଲକ୍ଷଣ। ଭାରତରେ ମଙ୍କିପକ୍ସର ଏଣ୍ଟ୍ରି ହୋଇଥିବା ନେଇ ଆଶଙ୍କା କରାଯାଉଛି। ଏନେଇ କେନ୍ଦ୍ର ସ୍ୱାସ୍ଥ୍ୟ ବିଭାଗ ପକ୍ଷରୁ ସୂଚନା ମିଳିଛି। ସ୍ୱାସ୍ଥ୍ୟ ବିଭାଗ ରିପୋର୍ଟ ଅନୁସାରେ, ସନ୍ଦିଗ୍ଧ ଯୁବକ ମଙ୍କିପକ୍ସ ଆକ୍ରାନ୍ତ ଦେଶ ଭ୍ରମଣ କରିଥିଲେ। ତାଙ୍କ ଶରୀରରେ କିଛି ଲକ୍ଷଣ ଦେଖା ଯିବାରୁ ନମୂନା ପରୀକ୍ଷା ପାଇଁ ପଠାଯାଇଛି। ବର୍ତ୍ତମାନ ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଛି। ନମୂନା ପରୀକ୍ଷା ରିପୋର୍ଟ ଆସିବା ପରେ ମଙ୍କିପକ୍ସ ହୋଇଛି କି ନାହିଁ, ତାହା ସ୍ପଷ୍ଟ ହେବ।
ଅଗଷ୍ଟ ୧୪ରେ ମଙ୍କିପକ୍ସକୁ ବିଶ୍ୱ ସ୍ୱାସ୍ଥ୍ଯ ସଂଗଠନ ହେଲଥ୍ ଏମର୍ଜେନ୍ସି ଘୋଷଣା କରିଥିଲା। ପାଖାପାଖି ୧୭ଟି ଦେଶକୁ ମଙ୍କିପକ୍ସ ବିସ୍ତାର କରିସାରିଛି। କିନ୍ତୁ ଜୁଲାଇରେ ନୂଆ ଭାରିଆଣ୍ଟ ‘କ୍ଲେଡ୍ 1ବି’ ଚିହ୍ନଟ ହେବା ପରେ ବିଶ୍ୱ ସ୍ୱାସ୍ଥ୍ୟ ସଂଗଠନ ଏହାକୁ ହେଲଥ ଏମର୍ଜେନ୍ସି ଭାବେ ଘୋଷଣା କରିଥିଲା। ରିପୋର୍ଟ ଅନୁସାରେ, ବୁରୁଣ୍ଡି, କେନିଆ, ରୁୱାଣ୍ଡା ଏବଂ ଉଗାଣ୍ଡାରେ ମଙ୍କିପକ୍ସର ନୂଆ ଷ୍ଟ୍ରେନରେ ଆକ୍ରାନ୍ତ ଚିହ୍ନଟ ହୋଇଛନ୍ତି।
ପ୍ଲାଷ୍ଟିକ ବର୍ଜ୍ୟବସ୍ତୁ ନିର୍ଗତ କରିବାରେ ଭାରତ ବିଶ୍ବରେ ଏକ ନମ୍ବର
ନନ୍ଦିଘୋଷ ବ୍ୟୁରୋ: ପ୍ଲାଷ୍ଟିକ ବର୍ଜ୍ୟବସ୍ତୁ ନିର୍ଗତ କରିବାରେ ଭାରତ ବିଶ୍ବରେ ଏକ ନମ୍ବର । ପଲିଥିନ୍ ଓ ପ୍ଲାଷ୍ଟିକ ବ୍ୟବହାର ନିୟନ୍ତ୍ରଣ ପାଇଁ ସରକାର ଆଇନ କରୁଛନ୍ତି । ହେଲେ ଲୋକେ ମାନୁନାହାନ୍ତି। ସବୁ ନିୟମକୁ ଫୁ କରି ଦେଉଛନ୍ତି । ପରିଣତି ଅକାଳରେ ଯାଉଛି ଜୀବନ। ପ୍ଲାଷ୍ଟିକ ବର୍ଜ୍ୟବସ୍ତୁ ନିର୍ଗତ କରିବାରେ ଏବେ ବିଶ୍ବରେ ଏକ ନମ୍ବର ଭାରତ। ଏପରି ଆଖି ତରାଟି ଦେଲାଭଳି ତଥ୍ୟ ପ୍ରକାଶ କରିଛନ୍ତି ଇଂଲଣ୍ଡ ଲିଡ୍ ବିଶ୍ବବିଦ୍ୟାଳୟର ଗବେଷକ । ବିଶ୍ବରେ ସମୁଦାୟ ୫୨୦ ଲକ୍ଷ ଟନ୍ ପ୍ଲାଷ୍ଟିକ ବର୍ଜ୍ୟ ନିର୍ଗତ ହେଉଛି । ସେଥିରୁ ୧୮ ପ୍ରତିଶତ ଅର୍ଥାତ୍ ୯୦ ଲକ୍ଷ ୩୦ ହଜାର ଟନ୍ ପ୍ଲାଷ୍ଟିକ ବର୍ଜ୍ୟବସ୍ତୁ କେବଳ ଭାରତ ଛାଡୁଛି । ଏଥିରୁ ଅନୁମାନ କରାଯାଇପାରେ ଯେ, କେତେ ପରିମାଣରେ ବିଷାକ୍ତ ପ୍ଲାଷ୍ଟିକ ଦେଶରେ ବ୍ୟବହାର ହେଉଛି । ଭାରତୀୟ ବହୁଳ ମାତ୍ରାରେ ପ୍ଲାଷ୍ଟିକ୍ ବ୍ୟବହାର କରୁଥିବାରୁ ନଦୀ, ନାଳ ଓ ବାୟୁରେ ପ୍ଲାଷ୍ଟିକର ସୁକ୍ଷ୍ମ ଅଂଶ ମିଶି ପି.ଏମ୍ ୨.୫ରେ ପରିଣତ ହେଉଛି। ଯାହାକି ଫୁସଫୁସ ଦେଇ ଶରୀରରେ କର୍କଟ ରୋଗ ସୃଷ୍ଟି କରୁଛି ।
୧୯୬୩ ମସିହାରେ ପ୍ଲାଷ୍ଟିକ ଉଦ୍ଭାବନ ହୋଇଥିଲା। ଜୈବ ବିଘଟନ କ୍ଷମତା ନଥିବାରୁ ପ୍ଲାଷ୍ଟିକ୍ ବ୍ୟବହାର ଉପରେ ପ୍ରଥମ କରି ଭାରତରେ ୧୯୯୮ରେ ନିୟନ୍ତ୍ରଣ ଆଇନ ହେଲା। ପ୍ରଥମେ ସରକାର ୨୦ ମାଇକ୍ରନ୍ ମୋଟେଇର ପଲିଥିନକୁ ଅନୁମତି ଦେଇଥିଲେ। ପରେ ୭୫ ମାଇକ୍ରନ୍ ଓ ୨୦୨୨ରେ ୧୨୦ ମାଇକ୍ରନ୍ ପ୍ଲାଷ୍ଟିକ୍ ବ୍ୟବହାର ନେଇ ସରକାରୀ ନିୟମ ହେଲା। ଅଥଚ ନା ଏଥିପ୍ରତି ଜନସାଧାରଣ ସଚେତନ ନା ନିୟମ କଡ଼ାକଡ଼ି ପାଳନ ପାଇଁ ସରକାର ତତ୍ପର। ଫଳରେ ପ୍ରଦୂଷଣକାରୀ ରାଷ୍ଟ୍ର ଭାବେ ବିଶ୍ବରେ ନିନ୍ଦିତ ହେଲାଣି ଭାରତ।
ଉଲଂଘନାକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନହେବାରୁ ରାଜ୍ୟ ଓ ଦେଶରେ ବଢି ବଢି ଚାଲିଛି ପ୍ଲାଷ୍ଟିକର ବ୍ୟବହାର। ସରକାରୀ ଉଦାସୀନତା ଯୋଗୁ ଅକାଳେ ଯାଉଛି ଜୀବନ। ବିଶ୍ବରେ ଏବେ ୪୦୦ ନିୟୁତ ଟନ୍ ପ୍ଲାଷ୍ଟିକ ଉତ୍ପାଦନ ହେଉଛି। ଏକକ ବ୍ୟବହାର ଯୋଗ୍ୟ ପ୍ଲାଷ୍ଟିକ୍ ହେଉଛି ପରିବେଶ ପ୍ରଦୂଷଣର ମୂଳ କାରଣ। ଖାଦ୍ୟ ପୁଡ଼ିଆ, ଜିନିଷ ପ୍ୟାକେଟରେ ଏହା ବ୍ୟବହାର ହେଉଥିବାରୁ ଲୋକେ ଏହାକୁ ଏଣେତେଣେ ଫୋପାଡି ଦେଉଛନ୍ତି। ସହରାଞ୍ଚଳ ଓ ଗ୍ରାମାଞ୍ଚଳ ସ୍ଥାନୀୟ ପ୍ରଶାସନ ଏସବୁ ଦେଖିବା କଥା। କେବଳ ବର୍ଷକୁ ଥରେ କିମ୍ବା ଦୁଇଥର ପ୍ରଦୂଷଣ ଦିବସ ପାଳନ କିମ୍ବା ସଚେତନତା ଦିବସ ଆସିଲେ ଚଢ଼ଉ କରି ଉଲଂଘନକାରୀଙ୍କ ଠାରୁ କିଛି ଜରିମାନା ଆଦାୟ କରି ନିଜ ଦାୟିତ୍ବ ସାରି ଦେଉଛି ପ୍ରଶାସନ। ବାକି ବର୍ଷ ଯାକ ଲୋକେ ଓ ଦୋକାନୀ ବିଷାକ୍ତ ପ୍ଲାଷ୍ଟିକ ବ୍ୟାଗ ବର୍ଷତମାମ ବ୍ୟବହାର କରୁଛନ୍ତି । ବିଘଟନ ହୋଇପାରୁନଥିରୁ ପରିବେଶ ପ୍ରଦୂଷଣ କରିବାରେ ବଡ଼ କାରଣ ସାଜିଛି ପ୍ଲାଷ୍ଟିକ।
ନୂଆଁଖାଇ ଅବସରରେ ସିଏମ କିଷାନ ଯୋଜନାର ଶୁଭାରମ୍ଭ କଲେ ମୁଖ୍ୟମନ୍ତ୍ରୀ ମୋହନ ମାଝୀ
ଭୁବନେଶ୍ୱର: ପବିତ୍ର ନୂଆଁଖାଇ ଅବସରରେ ସିଏମ କିଷାନ ସହାୟତା କାର୍ଯ୍ୟକ୍ରମ ଏବଂ ପିଏମ କିଷାନ ସ୍ୱତନ୍ତ୍ର ଅଭିଯାନ କାର୍ଯ୍ୟକ୍ରମ ଆରମ୍ଭ ହୋଇଛି । ସମ୍ବଲପୁର ଗଙ୍ଗାଧର ମେହେର ବିଶ୍ବବିଦ୍ୟାଳୟ ଅଡିଟୋରିୟମରେ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମରେ ସିଏମ କିଷାନ ଯୋଜନାର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ । ଏହି ଯୋଜନାରେ ରାଜ୍ୟର ୪୬ ଲକ୍ଷ କ୍ଷୁଦ୍ର ଓ ନାମମାତ୍ର ତାଷୀ ଓ ଭୂମିହୀନ କୃଷକ ପରିବାର ଏହି ଯୋଜନାରେ ଉପକୃତ ହେବେ । ୯୨୫କୋଟି ଟଙ୍କାର ଆର୍ଥିକ ସହାୟତା ଡିବିଟି ମାଧ୍ୟମରେ ଚାଷୀଙ୍କ ଆକାଉଣ୍ଟକୁ ସିଧା ଯାଇଛି ବୋଲି ମୁଖ୍ୟମନ୍ତ୍ରୀ କହିଛନ୍ତି ।
ସିଏମ କିଷାନ୍ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଛଡା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ରାଜସ୍ବ ମନ୍ତ୍ରୀ ସୁରେଶ ପୂଜାରୀ, ସମ୍ବଲପୁର ବିଧାୟକ ଜୟନାରାୟଣ ମିଶ୍ର, କୃଷି ସଚିବ ଅରବିନ୍ଦ ପାଢୀ ପ୍ରମୁଖ ଉପସ୍ଥିତ ଥିଲେ । ଭିସିରେ ଯୋଡି ହୋଇଥିଲେ କୃଷିମନ୍ତ୍ରୀ କନକ ବର୍ଦ୍ଧନ ସିଂଦେଓ ।