spot_img
Home Blog Page 1641

ଭଣ୍ଡାରୀ ଝର ନିକଟରେ ଦନ୍ତାହାତୀର ମୃତ୍ୟୁ

ଟାଙ୍ଗୀ : ଖୋର୍ଦ୍ଧା ବନଖଣ୍ଡ ଟାଙ୍ଗୀ ରେଞ୍ଜ ଦମଣ ଭୂମି ଭଣ୍ଡାରୀ ଝର ନିକଟରେ ଦନ୍ତାହାତୀର ମୃତ୍ୟୁ। ମୃତ୍ଯୁର କାରଣ ଅସ୍ପଷ୍ଟ ରହିଛି। ପୂର୍ବରୁ ଏହି ଜାଗାରେ ଗତ ଜୁଲାଇ ମାସରେ ଏକ ଦନ୍ତା ବିଦ୍ୟୁତ ଆଘାତରେ ପ୍ରାଣ ହରାଇଥିଲା। ଗତ କିଛି ବର୍ଷ ହେଲା ଚନ୍ଦକା ଜଙ୍ଗଲ ଛାଡି ଟାଙ୍ଗୀ ରେଞ୍ଜରେ ଡେରା ପକାଇଛନ୍ତି ହାତୀପଲ।  ପୂର୍ବରୁ ଏହି ହାତୀପଲରେ ହାତୀ ସଂଖ୍ୟା ୨୩ ଥିବା ବେଳେ ହାତୀ ମୃତ୍ୟୁ ସଂଖ୍ୟା ବୃଦ୍ଧି ପାଇ ୧୫ରେ ସୀମିତ ରହିଛି।  ହାତୀଙ୍କ ଗତିଵିଧି ଉପରେ ନଜର ରଖାଯାଇଛି। ହାତୀ ମୃତ୍ଯୁକୁ ନେଇ ବନବିଭାଗର ଦାୟିତ୍ବବୋଧ ଉପରେ ପ୍ରଶ୍ନ ଉଠିଛି।..

ଆଜି ବିଧାନସଭା ଦ୍ବିତୀୟ ପର୍ଯ୍ୟାୟ ଅଧିବେଶନର ନବମ ଦିନ

ଭୁବନେଶ୍ବର : ଆଜି ବିଧାନସଭା ଦ୍ବିତୀୟ ପର୍ଯ୍ୟାୟ ଅଧିବେଶନର ନବମ ଦିନ । ଗୃହରେ ବିଭିନ୍ନ ବିଭାଗର ପ୍ରଶ୍ନକାଳ ରହିଛି ।  ବିଦ୍ୟାଳୟ ଓ ଗଣଶିକ୍ଷା,  ଉଚ୍ଚଶିକ୍ଷା,  ଶିଳ୍ପ,  ଅନୁସୂଚିତ ଜନଜାତି,  ଅନୁସୂଚିତ ଜାତି ଉନ୍ନୟନ ଏବଂ  ସଂଖ୍ଯା ଲଘୁ ସମ୍ପ୍ରଦାୟ ଓ ପଛୁଆ ବର୍ଗ କଲ୍ୟାଣ,  କ୍ରୀଡା ଓ ଯୁବ କଲ୍ୟାଣ,  ଦକ୍ଷତା ବିକାଶ ଓ ବୈଷୟିକ ଶିକ୍ଷା,  ଓଡ଼ିଆ ଭାଷା ସାହିତ୍ୟ ଓ ସଂସ୍କୃତି,  ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ବିଭାଗର ପ୍ରଶ୍ନ କାଳ ରହିଛି ।  ଶୂନ୍ୟକାଳରେ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗକୁ ବିରୋଧୀ ଓ ଶାସକ ଦଳର ସଦସ୍ୟମାନେ ଉଠାଇବେ ।  ଅପରାହ୍ନରେ ଶିଳ୍ପ, ଏମଏସଏମଇ ବିଭାଗର ଖର୍ଚ୍ଚ ଦାବି ଆଲୋଚନା ରହିଛି ।  ବିରୋଧୀ ମୁଲତବୀ ପ୍ରସ୍ତାବ ବି ଆଣିପାରନ୍ତି ।

ନିଖୋଜ ନାବାଳିକାର ଗଳିତ ମୃତଦେହ ଉଦ୍ଧାର

ବାଲେଶ୍ବର: ରେମୁଣାସ୍ଥିତ ବାଲେଶ୍ଵର ଆଲଏଜ ନିକଟରେ ନିଖୋଜ ନାବାଳିକାର ଗଳିତ ମୃତଦେହ ଉଦ୍ଧାର। ମୃତଦେହ ଉଦ୍ଧାର କରିଛି ପୋଲିସ। ତିନିଦିନ ହେଲା ନାବାଳିକାଜଣକ ନିଖୋଜ ଥିବା ପରିବାର ତରଫରୁ ଥାନାରେ ଅଭିଯୋଗ ହୋଇଥିଲା। ଏକ ପରିତ୍ୟକ୍ତ ବନ୍ଦ କୋଠରୀ ଭିତରେ ଦୁର୍ଗନ୍ଧ ହେବାରୁ ସ୍ଥାନୀୟ ଲୋକ ପୋଲିସକୁ ସୂଚନା ଦେଇଥିଲେ। ପୋଲିସ  ଘର ଭିତରୁ ନିଖୋଜ ଥିବା ନାବାଳିକାର ମୃତଦେହ ଉଦ୍ଧାର କରିଛି । ନଅ ବର୍ଷର ନାବାଳିକାକୁ ଦୁଷ୍କର୍ମ କରିବା ପରେ ହତ୍ୟା କରାଯାଇଥିବା ପରିବାର ତରଫରୁ ଅଭିଯୋଗ ହୋଇଛି। ଏହି ହତ୍ୟାକାଣ୍ଡରେ ସମ୍ପୃକ୍ତ ଥିବା ଅଭିଯୋଗରେ ଜଣକୁ ଅଟକ ରଖି ପଚରା ଉଚରା କରୁଛି ପୋଲିସ।

ଆଜି ରାଜ୍ୟରେ ପ୍ରବଳ ବର୍ଷା, ୩ ଜିଲ୍ଲାକୁ ରେଡ ଆଲର୍ଟ ଜାରି

ଭୁବନେଶ୍ବର : ଆଜି ରାଜ୍ଯରେ ହେବ ଭୀଷଣ ବର୍ଷା । ଭାସିବ ଦକ୍ଷିଣ ଓଡ଼ିଶା ! । ଧସିବ ମାଟି ଅତଡା, ଭାଙ୍ଗିବ କଚ୍ଚା ଘର, ସୃଷ୍ଟି ହୋଇପାରେ ଆକସ୍ମିକ ବନ୍ୟା ସ୍ଥିତି । ଭୀଷଣରୁ ଅତି ଭୀଷଣ ବର୍ଷା ନେଇ ୩ ଜିଲ୍ଲା ଗଜପତି, କୋରାପୁଟ ଏବଂ ମାଲକାନଗିରିକୁ ରେଡ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ପୂର୍ବକେନ୍ଦ୍ରୀୟ ବଙ୍ଗୋପସାଗର ଏବଂ ଉତ୍ତର ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଖୁବଶୀଘ୍ର ଘନୀଭୂତ ହୋଇ ଓ୍ବେଲମାର୍କ ଲୋପ୍ରେସରରେ ପରିଣତ ହେବ । ପରବର୍ତ୍ତୀ ୨୪ ଘଣ୍ଟା ମଧ୍ୟରେ ଏହା ଅବପାତର ରୂପନେବ । ପରେ ପଶ୍ଚିମ-ଉତ୍ତର-ପଶ୍ଚିମ ଦିଗରେ ଗତିକରି ଦକ୍ଷିଣ ଓଡ଼ିଶା ଏବଂ ଉତ୍ତର ଆନ୍ଧ୍ରପ୍ରଦେଶ ନିକଟରେ ସ୍ଥଳଭାଗ ଛୁଇଁବ। ଏହାର ପ୍ରଭାବରେ ଦକ୍ଷିଣ ଏବଂ ଉପକୂଳ ଓଡ଼ିଶାରେ ଭୀଷଣ ବର୍ଷା ନେଇ ସତର୍କ କରାଇଛି ପାଣିପାଗ କେନ୍ଦ୍ର।  ଗଜପତି, କୋରାପୁଟ ଏବଂ ମାଲକାନଗିରିରେ ୨୦୦ ମିଲିମିଟରରୁ ଅଧିକ ବର୍ଷା ହୋଇପାରେ । ପାହାଡିଆ ଅଞ୍ଚଳରେ ଭୂସ୍ଖଳନ ସମ୍ଭାବନା ଅଧିକ ରହିଛି । ଏଥିସହ ପ୍ରବଳରୁ ଅତି ପ୍ରବଳ ବର୍ଷା ନେଇ ୪ ଜିଲ୍ଲାକୁ ଅରେଞ୍ଜ ଆଲର୍ଟ ଜାରି ହୋଇଛି । ଗଞ୍ଜାମ, ରାୟଗଡା, କଳାହାଣ୍ଡି ଏବଂ ନବରଙ୍ଗପୁରରେ ୭୦ ରୁ ୨ଶହ ମିଲିମିଟର ପର୍ଯ୍ୟନ୍ତ ବର୍ଷା ନେଇ ଆକଳନ କରାଯାଇଛି । ସେହିଭଳି ପ୍ରବଳ ବର୍ଷା ନେଇ ୧୧ଟି ଜିଲ୍ଲା ଜଗତସିଂହପୁର, ପୁରୀ, ଖୋର୍ଦ୍ଧା, କଟକ, ନୟାଗଡ଼, କନ୍ଧମାଳ, ବୌଦ୍ଧ, ସୋନପୁର, ବଲାଙ୍ଗୀର, ବରଗଡ଼ ଏବଂ ନୂଆପଡା ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି । କାଲି କୋରାପୁଟ, ନବରଙ୍ଗପୁର ଏବଂ ମାଲକାନଗିରିରେ ପ୍ରବଳରୁ ଅତିପ୍ରବଳ ବର୍ଷା ହେବାର ସମ୍ଭାବନା ରହିଛି । ୧ ତାରିଖରେ ମଧ୍ୟ ଦକ୍ଷିଣ ଓଡ଼ିଶାର ଅଧିକାଂଶ ଜିଲ୍ଲାରେ ପ୍ରବଳ ବର୍ଷା ହେବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ବର୍ଷା ସହ ଘଣ୍ଟାପ୍ରତି ୩୫ରୁ ୪୫ କିଲୋମିଟର ବେଗରେ ବହିବ ପବନ । ମତ୍ସ୍ୟଜୀବୀଙ୍କୁ ସମୁଦ୍ରକୁ ଯିବାକୁ ବାରଣ କରାଯାଇଛି । ଭୀଷଣରୁ ଅତି ଭୀଷଣ ବର୍ଷା ନେଇ ପାଣିପାଗ କେନ୍ଦ୍ରର ସତର୍କତା ପରେ ସଂପୃକ୍ତ ଜିଲ୍ଲାର ଜିଲ୍ଲାପାଳଙ୍କୁ ଚିଠି ଲେଖିଛନ୍ତି ଏସ୍ଆରସି । ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ସହ ଆବଶ୍ୟକୀୟ ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି । ଅନ୍ୟପଟେ ଆଜି କୋରାପୁଟ ଓ ଗଜପତି ଜିଲ୍ଲାରେ ସମସ୍ତ ଶିକ୍ଷା ଅନୁଷ୍ଠାନକୁ ଛୁଟି ଘୋଷଣା କରାଯାଇଛି। ଭୀଷଣ ବର୍ଷା ପାଇଁ ରେଡ୍ ଓ୍ବାର୍ଣ୍ଣିଂ ଥିବାରୁ ସ୍କୁଲ ଛୁଟି। ସମ୍ଭାବ୍ଯ ବିପଦ ଏଡାଇବା ପାଇଁ ଜିଲ୍ଲା ପ୍ରଶାସନ ପକ୍ଷରୁ ଜିଲ୍ଲାର ସମସ୍ତ ବିଦ୍ୟାଳୟକୁ ଛୁଟି ଘୋଷଣା କରିଛନ୍ତି ଜିଲ୍ଲାପାଳ ।

ଆଜି ପ୍ରକାଶ ପାଇବ ନିଟ-ପିଜି ସ୍କୋର କାର୍ଡ

ଭୁବନେଶ୍ବର : ଆଜି ପ୍ରକାଶ ପାଇବ ନିଟ-ପିଜି ସ୍କୋର କାର୍ଡ। ସ୍କୋର କାର୍ଡ ପ୍ରକାଶ କରିବ ନ୍ଯାସନାଲ ବୋର୍ଡ ଅଫ ଏଗଜାମିନେସନସ ଫର ମେଡିକାଲ ସାଇନ୍ସ ବା ଏନବିଇଏମଏସ। natboard.edu.in ଓ nbe.edu.in. ୱେବ ସାଇଟରେ ପ୍ରକାଶ ପାଇବ ସ୍କୋର କାର୍ଡ। ଗତ ଅଗଷ୍ଟ ୨୩ରେ ପ୍ରକାଶ ପାଇଥିଲା ଫଳ। ଗତ ଅଗଷ୍ଟ ୧୧ ତାରିଖରେ ଦୁଇଟି ସିଫ୍ଟରେ ହୋଇଥିଲା ନିଟ-ପିଜି। ଦେଶର ୧୭୦ ସହରର ୪୧୬ କେନ୍ଦ୍ରରେ ହୋଇଥିଲା ପରୀକ୍ଷା। ପ୍ରଥମ ସିଫ୍ଟରେ ପଞ୍ଜିକୃତ ୧ ଲକ୍ଷ ୭ ହଜାର ୨୭୬ ଜଣଙ୍କ ମଧ୍ଯରୁ ପରୀକ୍ଷା ଦେଇଥିଲେ ୧ ଲକ୍ଷ ୭ ହଜାର ୯୫୯ ଜଣ। ସେହିପରି ଦ୍ବିତୀୟ ସିଫ୍ଟରେ ପଞ୍ଜିକୃତ ୧ ଲକ୍ଷ ୧୪ ହଜାର ୨୬୪ ଜଣଙ୍କ ମଧ୍ଯରୁ ପରୀକ୍ଷା ଦେଇଥିଲେ ୧ ଲକ୍ଷ ୮ ହଜାର ୧୭୭ ଜଣ। ଏମଡି, ଏମଏସ, ଡିଏନବି ବା ଡିପ୍ଲୋମା କୋର୍ସରେ ଆଡମିସନ ଲାଗି ହୋଇଥାଏ ନିଟ-ପିଜି। ପ୍ରତି କ୍ଷେତ୍ରରେ ରହିଥାଏ ଭିନ୍ନ ଭିନ୍ନ କଟଅଫ ପର୍ସେଣ୍ଟେଜ।

ଆଜି ବିଜୁ ଛାତ୍ର ଜନତା ଦଳର ସାଂଗଠନିକ ବୈଠକ

ଭୁବନେଶ୍ବର : ଆଜି ଅନୁଷ୍ଠିତ ହେବ ବିଜୁ ଛାତ୍ର ଜନତା ଦଳର ସାଂଗଠନିକ ବୈଠକ । ଶଙ୍ଖ ଭବନରେ ସକାଳ ସାଢେ ୯ଟାରୁ ଦିନ ଦୁଇଟା ପର୍ଯ୍ଯନ୍ତ ବୈଠକ ବସିବ । ଏଥିରେ ସମସ୍ତ ଜିଲ୍ଲା ସଭାପତି, ଜୋନ ସଭାପତି ଏବଂ ରାଜ୍ଯ କର୍ମକର୍ତ୍ତା ଉପସ୍ଥିତ ରହିବେ ।  ବିଜେଡି ସଭାପତି  ନବୀନ ପଟ୍ଟନାୟକ କାର୍ଯ୍ଯକ୍ରମରେ  ଯୋଗଦେଇ ଦିଗଦର୍ଶନ ପ୍ରଦାନ କରିବେ । ବିଜୁ ଛାତ୍ର ଜନତା ଦଳ କିଭଳି ଓଡ଼ିଶାର ସ୍ବାର୍ଥ ପାଇଁ କାମ କରିବ ସେନେଇ ଗୁରୁମନ୍ତ୍ର ଦେବେ ନବୀନ । ବୈଠକରେ ଆଗାମୀ ଦିନର କାର୍ଯ୍ଯକ୍ରମ ଓ ସାଂଗଠନିକ ଖସଡ଼ା ପ୍ରସ୍ତୁତ ହେବ । ବିସିଜେଡିର ସମସ୍ତ କର୍ମକର୍ତ୍ତାଙ୍କୁ ତୃଣମୂଳସ୍ତରରୁ ଦଳର ସଂଗଠନ ସୁଦୃଢ କରିବାକୁ ଦିଗରେ ପଦକ୍ଷେପ ନେବାକୁ କାର୍ଯ୍ଯପନ୍ଥା ସ୍ଥିର କରାଯିବ । ବିଜେଡିର ସମସ୍ତ କର୍ମକର୍ତ୍ତା ସମାଜିକ ଗଣମାଧ୍ଯମରେ କିଭଳି ଅଧିକ କ୍ରିୟାଶୀଳ ହେବେ ସେଥିପାଇଁ ଦୃଷ୍ଟି ଦିଆଯିବ । ଛାତ୍ର ସଂସଦ ନିର୍ବାଚନ କରିବାକୁ ବିଜେପି ପ୍ରତିଶୃତି ଦେଇଥିଲା । ହେଲେ ସରକାରକୁ ଆସିବା ପରେ ନିଜ କଥା ରଖିବାରେ ବିଫଳ ହୋଇଛି । ଏହି ପ୍ରସଙ୍ଗକୁ ନେଇ ଦଳର ଆଭିମୁଖ୍ଯ କିପରି ରହିବ ସେନେଇ ଆଲୋଚନା ହୋଇପାରେ ।

ବହୁଚର୍ଚ୍ଚିତ ପୁରୁଲିଆ ଆର୍ମସ ଡ୍ରପ ମାମଲା, ଅଭିଯୁକ୍ତ କିମ୍ ପିଟର ଡାଭିଙ୍କୁ ଡେନମାର୍କ କରିବନି ପ୍ରତ୍ଯର୍ପଣ

ନନ୍ଦଘୋଷ ବ୍ୟୁରୋ: ବହୁଚର୍ଚ୍ଚିତ ପୁରୁଲିଆ ଆର୍ମସ ଡ୍ରପ ମାମଲା। ଅଭିଯୁକ୍ତ ନିଲସ ହୋକ ଓରଫ କିମ୍ ପିଟର ଡାଭିଙ୍କୁ ପ୍ରତ୍ଯର୍ପଣ ଲାଗି ଭାରତ କରିଥିବା ଆବେଦନକୁ ଖାରଜ କରିଛି ଡେନମାର୍କର ଏକ କୋର୍ଟ। ବିଗତ ୧୯୯୫ ଡିସେମ୍ବର ୧୭ରେ ପଶ୍ଚିମବଙ୍ଗର ପୁରୁଲିଆ ଜିଲ୍ଲା ଅନ୍ତର୍ଗତ ଯଉପୁର ଗ୍ରାମରେ ଏକ ଲାଟିଭୀୟ ଅନ୍ତୋନୋଭ ଏଏନ-୨୬ ବିମାନରୁ ବିପୁଳ ଅସ୍ତ୍ରଶସ୍ତ୍ର ପକାଯାଇଥିଲା। ପଶ୍ଚିମବଙ୍ଗରେ ଏକ ବିଦ୍ରୋହୀ ସଂଗଠନ ଲାଗି ଏହି ଅସ୍ତ୍ରଶସ୍ତ୍ର ଉଦ୍ଦିଷ୍ଟ ଥିଲା ବୋଲି ସୂଚନା ମିଳିଥିଲା।  ଏହି ମାମଲାରେ କିମ ଡାଭି ମାଷ୍ଟରମାଇଣ୍ଡ ଥିବା ଜଣାପଡିଥିଲା। ତାଙ୍କୁ ଭାରତ ହାତରେ ପ୍ରତ୍ଯର୍ପଣ କରିବା ଲାଗି ସରକାରଙ୍କ ପକ୍ଷରୁ ଦୀର୍ଘ ଦିନ ଧରି ଦାବି କରାଯାଇଆସୁଥିଲା। ମାତ୍ର ଶେଷରେ ଏହି ଅନୁରୋଧ ଅଗ୍ରାହ୍ୟ ହୋଇଛି। ୟୁରୋପୀୟ ମାନବାଧିକାର ସମ୍ମିଳନୀର ସର୍ତ୍ତାବଳୀ ଅନୁସାରେ ତାଙ୍କୁ ପ୍ରତ୍ଯର୍ପଣ କରାଯାଇପାରିବ ନାହିଁ ବୋଲି କୁହାଯାଇଛି। ଡାଭିଙ୍କ ଓକିଲ ଜୋନସ ଖ୍ରୀଷ୍ଟଫର୍ସନ କହିଛନ୍ତି- ଭାରତ ଦ୍ବାରା ପ୍ରଦାନ କରାଯାଇଥିବା ଗ୍ଯାରେଣ୍ଟି ବୈଧ ନହେବାରୁ କୋର୍ଟ ପ୍ରତ୍ଯର୍ପଣ ଅନୁରୋଧକୁ ଅଗ୍ରାହ୍ଯ କରିଛନ୍ତି। ପୂର୍ବରୁ ଏକ କୋର୍ଟରେ ହୋକ ସ୍ବୀକାର କରିଥିଲେ ଯେ, ପୁରୁଲିଆରେ ଅସ୍ତ୍ରଶସ୍ତ୍ର ପକାଇବା ଲାଗି ସେ ଅନ୍ଯ ୬ ଜଣଙ୍କ ସହ ବିମାନରେ ଥିଲେ। ପଶ୍ଚିମବଙ୍ଗର ଆନନ୍ଦମାର୍ଗ ସଂଗଠନ ଲାଗି ଏହି ଅସ୍ତ୍ରଶସ୍ତ୍ର ଉଦ୍ଦିଷ୍ଟ ଥିଲା ବୋଲି ସେ କହିଥିଲେ। ଅସ୍ତ୍ରଶସ୍ତ୍ର ମଧ୍ଯରେ ଥିଲା ଶତାଧିକ ଏକେ-୪୭, ଟ୍ଯାଙ୍କ ବିଧ୍ବଂସୀ ଗ୍ରେନେଡ, ରକେଟ ଲଞ୍ଚର, ୨୫ ହଜାର ଗୁଳି ଇତ୍ଯାଦି। ଏହି ବିମାନକୁ ଚଳାଉଥିଲେ ପିଟର ବ୍ଲିଚଙ୍କ ନେତୃତ୍ବାଧୀନ ଟିମ। ସେ ପୂର୍ବରୁ ବ୍ରିଟିଶର ଆର୍ମି ଅଫିସର ଥିଲେ। ପରେ ସେ ଆର୍ମସ ଡିଲର ପାଲଟିଥିଲେ। ୧୯୯୫ ଡିସେମ୍ବର ୨୨ର ଭାରତୀୟ ବାୟୁସେନାର ଜେଟ ଏହି ବିମାନକୁ ଠାବ କରିଥିଲେ। ବ୍ଲିଚ ଓ ୫ ଜଣ ଲାଟିଭୀୟ ନାଗରିକଙ୍କୁ ଗିରଫ କରାଯାଇଥିଲା। ତେବେ ବିମାନବନ୍ଦରରୁ ଫେରାର ହେବାକୁ ସକ୍ଷମ ହୋଇଥିଲେ ଅନ୍ଯତମ ଅଭିଯୁକ୍ତ ଡାଭି। ପ୍ରଥମେ ସେ ନେପାଳ ଯାଇ ସେଠାରୁ ଡେନମାର୍କ ଚାଲିଯାଇଥିଲେ। ବଡ଼କଥା ହେଉଛି ଏହି ଆର୍ମସଡ୍ରପ ମାମଲା ସମ୍ପର୍କରେ ଭାରତୀୟ କର୍ତ୍ତୃପକ୍ଷ ଜାଣିଥିଲେ ବୋଲି ଦର୍ଶାଇଥିଲେ ଡାଭି ଓ ବ୍ଲିଚ। ଡାଭି ସିଆଇଏରର ଜଣେ ଏଜେଣ୍ଟ ଥିଲେ ବୋଲି ଚର୍ଚ୍ଚା ହୋଇଥିଲା।

ଜାତୀୟ କ୍ରୀଡ଼ା ଦିବସରେ ବିଜୁ ପଟ୍ଟନାୟକ କ୍ରୀଡ଼ା ଓ ସାହସିକତା ପୁରସ୍କାର ପ୍ରଦାନ

ଭୁବନେଶ୍ବର: ଜାତୀୟ କ୍ରୀଡା ଦିବସ ପାଳନ ଅବସରରେ ଆଜି ରାଜ୍ୟ ସରକାରଙ୍କ କ୍ରୀଡା ବିଭାଗ ପକ୍ଷରୁ ବିଜୁ ପଟ୍ଟନାୟକ କ୍ରୀଡା ଓ ସାହାସିକତା ପୁରସ୍କାର ପ୍ରଦାନ କରାଯାଇଛି । ରାଜ୍ୟ କନଭେନସନ ହାଲରେ ମୁଖ୍ୟମନ୍ତ୍ରୀ ମୋହନ ମାଝୀ ମୁଖ୍ୟଅତିଥି ଭାବେ ଯୋଗ ଦେଇ ପୁରସ୍କାର ପ୍ରଦାନ କରିଛନ୍ତି ।

ହକିର ଯାଦୁଗର ମେଜର ଧ୍ୟାନଚାନ୍ଦଙ୍କ ଫଟରେ ପୁଷ୍ପ ଅର୍ପଣ ପରେ ଦେଶର ହକିର ବିକାଶ ଦିଗରେ ତାଙ୍କର କ’ଣ ଭୂମିକା ରହିଛି ସେ ସମ୍ପର୍କରେ ଆଲୋଚନା କରାଯାଇଥିଲା । ଏଥିରେ ବିଭିନ୍ନ କ୍ରୀଡ଼ାବିତ, କୋଚ, କ୍ରୀଡା ସାମ୍ବାଦିକଙ୍କୁ ବିଜୁ ପଟ୍ଟନାୟକ କ୍ରୀଡା ପୁରସ୍କାରରେ ସମ୍ମାନିତ କରାଯାଇଛି ।

ଶ୍ରେଷ୍ଠ ବିଜୁ ପଟ୍ଟନାୟକ କ୍ରୀଡା ସାମ୍ବାଦିକ ଭାବେ ପ୍ରମେୟ ଖବର କାଗଜର ଶୁକେଶ ରଞ୍ଜନ ବେହେରାଙ୍କୁ ସମ୍ମାନିତ କରାଯିବା ସହ ଦୁଇ ଲକ୍ଷ ଟଙ୍କା ପ୍ରଦାନ କରାଯାଇଛି । ଭାରୋତ୍ତୋଳକ ଶୁଚିସ୍ମିତା ଭୋଇଙ୍କୁ ଶ୍ରେଷ୍ଠ ଉଦୀୟମାନ ବିଜୁ ପଟ୍ଟନାୟକ କ୍ରୀଡା ପୁରସ୍କାର ପ୍ରଦାନ କରାଯାଇଛି । ତାଙ୍କୁ ପୁରସ୍କାର ବାବାଦକୁ ୨ ଲକ୍ଷ ଟଙ୍କା ସହ ମାନପତ୍ର ପ୍ରଦାନ କରାଯାଇଛି । ସେହିପରି ରୂପନ୍ୱିତା ପଣ୍ଡାଙ୍କୁ ବିଜୁ ପଟ୍ଟନାୟକ ଶ୍ରେଷ୍ଠ ଟେକ୍ନିକାଲ ଅଫିସର, ମହମ୍ମଦ ଜାଫର ଇକବାଲଙ୍କୁ ଶ୍ରେଷ୍ଠ ଦିବ୍ୟାଙ୍ଗ କ୍ରୀଡାବିତ, ହକି କୋଚ ବିଜୟ କୁମାର ଲାକ୍ରା ଶ୍ରେଷ୍ଠ କୋଚ ଭାବେ ସମ୍ମାନିତ କରାଯିବା ସହ ୨ ଲକ୍ଷ ଲେଖାଏଁ ଟଙ୍କା ପ୍ରଦାନ କରାଯାଇ ସମ୍ମାନିତ କରାଯାଇଛି ।

ସେହିପରି ଶ୍ରେଷ୍ଠ କ୍ରୀଡା ପ୍ରୋତ୍ସାହନ ସଂସ୍ଥା ଭାବେ ନାଲକୋକୁ ମାନପତ୍ର ସହ ୨ ଲକ୍ଷ ଟଙ୍କା ପ୍ରଦାନ କରାଯାଇଛି । ଜାଭେଲିନ ଥ୍ରୋରେ ଓଡ଼ିଶାକୁ ଗର୍ବିତ କରିଥିବା କିଶୋର କୁମାର ଜେନା ଶ୍ରେଷ୍ଠ କ୍ରୀଡ଼ାବିତ ଭାବେ ୩ ଲକ୍ଷ ଟଙ୍କା ପୁରସ୍କାର ରାଶି ସହ ଟ୍ରଫି ପ୍ରଦାନ କରାଯାଇଛି । ହକି ଲିଜେଣ୍ଡ ଲାଜରୁସ ବାର୍ଲାଙ୍କୁ ବିଜୁ ପଟ୍ଟନାୟକ ଜୀବନ ବ୍ୟାପି ସାଧନ ପୁରସ୍କାର ପ୍ରଦାନ କରାଯାଇଛି । ତାଙ୍କୁ ଟ୍ରଫି ସହ ୪ ଲକ୍ଷ ଟଙ୍କା ପ୍ରଦାନ କରାଯାଇଛି ।

ସେହିପରି ୧୨ ବର୍ଷର ବାଳକ ରୁଦ୍ର ପ୍ରସାଦ ମଲ୍ଲିକ ଏବଂ ତାଙ୍କ ମାଆ ଜୟନ୍ତୀ ମଲ୍ଲିକଙ୍କୁ ବିଜୁ ପଟ୍ଟନାୟକ ସାହସିକତା ପୁରସ୍କାରରେ ସମ୍ମାନିତ କରାଯାଇଛି । ସେମାନଙ୍କୁ ମାନପତ୍ର ସହ ୨ ଲକ୍ଷ ଟଙ୍କାର ପୁରସ୍କାର ରାଶି ପ୍ରଦାନ କରିଥିଲେ ମୁଖ୍ୟମନ୍ତ୍ରୀ । ଗତ ମାର୍ଚ୍ଚ ମାସରେ ୫ ଜଣ ଯୁବକ ନଦୀରେ ଭାସି ଯାଉଥିବା ବେଳେ ରୁଦ୍ର ଏବଂ ତାଙ୍କ ମାଆ ଜୟନ୍ତୀ ଜୀବନକୁ ବାଜି ଲଗାଇ ସେମାନଙ୍କ ମଧ୍ୟରୁ ୩ ଜଣକ ଜୀବନ ବଞ୍ଚାଇ ଥିଲେ ।

ଏହି ଅବସରରେ ମୁଖ୍ୟମନ୍ତ୍ରୀ ସମସ୍ତଙ୍କୁ ଶୁଭେଚ୍ଛା ଜଣାଇଛନ୍ତି । କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ କ୍ରୀଡାମନ୍ତ୍ରୀ ସୂର୍ଯ୍ୟବଂଶୀ ସୁରଜ, ମୁଖ୍ୟ ଶାସନ ସଚିବ ମନୋଜ ଆହୁଜା ଏବଂ କ୍ରୀଡା ସଚିବ ଭାସ୍କର ଜ୍ୟୋତି ଶର୍ମା ପ୍ରମୁଖ ଉପସ୍ଥିତ ଥିଲେ ।

ଜାତୀୟ ଶିକ୍ଷକ ସମ୍ମାନ ପାଇଁ ମନୋନୀତି ଦୁଇ ଓଡ଼ିଆ ଶିକ୍ଷକଙ୍କ ସହ କଥା ହେଲେ ନବୀନ

ଭୁବନେଶ୍ବର: ଜାତୀୟ ଶିକ୍ଷକ ସମ୍ମାନ ପାଇଁ ମନୋନୀତ ଓଡିଶାର ଦୁଇ କୃତୀ ଶିକ୍ଷକ ଡକ୍ଟର ଦ୍ବିତୀଚନ୍ଦ୍ର ସାହୁ ଏବଂ ସନ୍ତୋଷ କୁମାର କରଙ୍କ ସହ କଥା ହେଲେ ପୂର୍ବତନ ମୁଖ୍ୟମନ୍ତ୍ରୀ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ । ବ୍ୟକ୍ତିଗତ ଭାବେ ଫୋନ କରି ଦ୍ବିତୀଚନ୍ଦ୍ର ଏବଂ ସନ୍ତୋଷଙ୍କୁ ଜଣାଇଲେ ଅଭିନନ୍ଦନ ।

ଉଭୟଙ୍କ ନିଷ୍ଠା ଓ ସାଧନାର ଉଚ୍ଚ ପ୍ରଶଂସା କରିଛନ୍ତି ନବୀନ । ସେ କହିଛନ୍ତି, ଶିକ୍ଷା ଜରିଆରେ ହିଁ ଏକ ସଚେତନ ଓ ସଶକ୍ତ ସମାଜ ଗଠନ ହୋଇପାରିବ । ଶିକ୍ଷାଦାନ କ୍ଷେତ୍ରରେ ସେମାନଙ୍କ ଅବଦାନ ପାଇଁ ଆମେ ଗର୍ବିତ ।

ଜାତୀୟ ଶିକ୍ଷକ ସମ୍ମାନ ପାଇଁ ମନୋନୀତ ଡକ୍ଟର ଦ୍ଵିତୀଚନ୍ଦ୍ର ସାହୁ ରାୟଗଡା ଜିଲ୍ଲା ବିଲେଶୁ ଆଦିବାସୀ ମଙ୍ଗଳ ବିଭାଗର ସହକାରୀ ଶିକ୍ଷକ ଭାବରେ କାର୍ଯ୍ୟ କରୁଥିବା ବେଳେ, ସନ୍ତୋଷ କର କଳାହାଣ୍ଡି ଜିଲ୍ଲା ଜୟଦୁର୍ଗା ହାଇସ୍କୁଲରେ ଶିକ୍ଷକ ଭାବରେ ଅବସ୍ଥାପିତ। ପ୍ରତିବଦଳରେ ନବୀନ ପଟ୍ଟନାୟକଙ୍କୁ ଧନ୍ୟବାଦ ଜଣାଇବା ସହ ତାଙ୍କ ଆଶୀର୍ବାଦ ଆହୁରି ଭଲ କାମ କରିବା ପାଇଁ ପ୍ରେରଣା ଦେବ ବୋଲି କହିଛନ୍ତି ଉଭୟ ଶିକ୍ଷକ।

ହୁରନ ଇଣ୍ଡିଆ ରିଚ୍ ଲିଷ୍ଟର ୫୪୦ତମ ସ୍ଥାନରେ ତାରା ରଞ୍ଜନ ପଟ୍ଟନାୟକ

ଭୁବନେଶ୍ବର: ହୁରନ ଇଣ୍ଡିଆ ରିଚ୍ ଲିଷ୍ଟ-୨୦୨୪ର ୫୪୦ତମ ସ୍ଥାନରେ ତାରା ରଞ୍ଜନ ପଟ୍ଟନାୟକ । ୪ ହଜାର ୯୦୦ କୋଟି ଟଙ୍କାର ସମ୍ପତ୍ତି ସହିତ ଫାଲକନ ମେରାଇନ ଏକ୍ପପୋର୍ଟର ପ୍ରମୋଟର ତାରା ରଞ୍ଜନ ପଟ୍ଟନାୟକ ଏବଂ ପରିବାରକୁ ହୁରନ ଇଣ୍ଡିଆ ରିଚ୍ ଲିଷ୍ଟ-୨୦୨୪ର ୫୪୦ତମ ସ୍ଥାନରେ ସ୍ଥାନିତ କରିଛି ।

ଦୀର୍ଘ ୪୦ ବର୍ଷ ଧରି ବ୍ୟବସାୟ କରୁଥିବା ଫାଲକନ ଗ୍ରୁପ୍ ଦେଶର ବୃହତ୍ତମ ସାମୁଦ୍ରିକ ଖାଦ୍ୟ ରପ୍ତାନୀକାରୀ ସଂସ୍ଥା ଭାବେ ଉଭା ହୋଇଛି । ଏଥିସହିତ ବିଶ୍ବର ବିଭିନ୍ନ ଦେଶକୁ ମଧ୍ୟ ନିଜ ବ୍ୟବସାୟ ବିସ୍ତାର କରିଛି । ସି ଫୁଡ୍ ସହିତ ଆନିମଲ ଫିଡ୍ସ, ଟ୍ରେଡିଂ, ରିଅଲ ଏଷ୍ଟେଟ୍ ଆଦି କ୍ଷେତ୍ରରେ ଓଡ଼ିଶା, ଆନ୍ଧ୍ରପ୍ରଦେଶ, ଗୁଜରାଟ ଓ ଦୁବାଇରେ ଅଗ୍ରଣୀ ସଂସ୍ଥା ଭାବେ ପରିଚିତ ହୋଇଛି ।

ହୁରନ ଇଣ୍ଡିଆର ଏହି ତାଲିକାରେ ରହି ତାରା ଭାରତୀୟ ଏଲିଟ୍ କ୍ଲବରେ ସାମିଲ ହୋଇଛନ୍ତି । ଆଦାନୀ, ଅମ୍ବାନୀଙ୍କ ପରି ପ୍ରତିଷ୍ଠିତ ଶିଳ୍ପପତି ଏହି ତାଲିକାର ଯଥାକ୍ରମେ ୧ ନମ୍ବର ଏବଂ ୨ ନମ୍ବର ସ୍ଥାନରେ ଥିବା ବେଳେ ତାରା ଓ ପରିବାର ଏଥିରେ ସ୍ଥାନିତ ହେବା ରାଜ୍ୟ ପାଇଁ ଗର୍ବର ବିଷୟ ପାଲଟିଛି ।