ରାଉରକେଲା: ରାଉରକେଲା ଇସ୍ପାତ କାରଖାନାରେ ଦୁର୍ଘଟଣା । ଇସ୍ପାତ କାରଖାନାର SMS-୧ ୟୁନିଟରେ ବିସ୍ଫୋରଣ। ତରଳ ଲୁହା ପଡ଼ି ୫ ଶ୍ରମିକ ଗୁରୁତର ହୋଇଛନ୍ତି । ୪ ଜଣ ସ୍ଥାୟୀ କର୍ମଚାରୀ ଓ ଜଣେ ଠିକା କର୍ମଚାରୀ ଗୁରୁତର ହୋଇଥିବା ସୂଚନା ମିଳିଛି। ଗୁରୁତରଙ୍କୁ ଇସ୍ପାତ ଜେନେରାଲ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି।
ନନ୍ଦିଘୋଷ ବ୍ୟୁରୋ: ସାଉଥ ସୁପରଷ୍ଟାର ଜୁନିଅର ଏନଟିଆରଙ୍କ ଫିଲ୍ମ ‘ଦେବରା ପାର୍ଟ -1′ ରିଲଜ ହୋଇସାରିଛି । ପ୍ରଥମ ଦିନରେ ବକ୍ସ ଅଫିସରେ ଧୁମ୍ ମଚେଇଛି ‘ଦେବରା’ । ଥିଏଟରରେ ସୋ’ ହାଉସଫୁଲ ହୋଇଥିବା ବେଳେ ଫିଲ୍ମଟି ଦର୍ଶକଙ୍କ ହୃଦୟକ ଛୁଇଁଛି। ଯାହାକୁ ନେଇ ସୋସିଆଲ ମିଡିଆରେ ପ୍ରତିକ୍ରିୟା ଦେଉଛନ୍ତି ୟୁଜର୍ସ ।
ରିପୋର୍ଟ ଅନୁଯାୟୀ, ‘ଦେବରା’ ପ୍ରଥମ ଦିନରେ ୭୭ କୋଟି ଟଙ୍କା ବ୍ୟବସାୟ କରିଛି। ଏହି ଚଳଚ୍ଚିତ୍ର ତେଲୁଗୁରେ ୬୮.୬ କୋଟି, ହିନ୍ଦୀରେ ୭ କୋଟି, ତାମିଲରେ ୦.୮ କୋଟି, କନ୍ନଡରେ ୩ କୋଟି ଏବଂ ମାଲାୟାଲମରେ ୩ କୋଟି ବ୍ୟବସାୟ କରିଛି। ଏହା ସହିତ ଜୁନିଅର ଏନଟିଆରରଙ୍କ ଏହି ଫିଲ୍ମ ଶାହାରୁଖ ଖାନଙ୍କ ‘ପଠାନ’, ରଣବୀର କପୁରଙ୍କ ‘ଆନିମଲ’ ଏବଂ ଆଲୁ ଅର୍ଜୁନଙ୍କ ‘ପୁଷ୍ପା’ର ପ୍ରଥମ ଦିନର ରୋଜଗାରକୁ ପଛରେ ପକାଇଛି । ବକ୍ସ ଅଫିସରେ ରେକର୍ଡ ସୃଷ୍ଟି କରିଛି ‘ଦେବରା’।
ଶାହାରୁଖ ଖାନଙ୍କ ପଠାନ ଫିଲ୍ମ ପ୍ରଥମ ଦିନରେ ୫୫ କୋଟି ବ୍ୟବସାୟ କରିଥିବା ବେଳେ ରଣବୀର କାପୁରଙ୍କ ‘ଆନିମଲ୍’ ଫିଲ୍ମ ପ୍ରଥମ ଦିନରେ ୫୦ କୋଟି ଇନକମ୍ କରିଥିଲା । ଅଲ୍ଲୁ ଅର୍ଜୁନଙ୍କ ଫିଲ୍ମ ପୁଷ୍ପା ପ୍ରଥମ ଦିନରେ ୫୨.୫୦ କୋଟି ବ୍ୟବସାୟ କରିଥିଲା । ଏହାସହିତ ଜୁନିଅର ଏନଟିଆରଙ୍କ ଫିଲ୍ମ ‘ଦେବରା’ ଫିଲ୍ମ ଏହି ୩ଟି ଫିଲ୍ମକୁ ପଛରେ ପକାଇ ନିଜର ରେକର୍ଡ ସୃଷ୍ଟି କରିଛି । ଚଳଚ୍ଚିତ୍ରର ଡ୍ୟାନ୍ସ ଏବଂ ଆକ୍ସନ୍ କୋରିଓଗ୍ରାଫି ବହୁତ ପ୍ରଶଂସା କରାଯାଉଛି । ଏହି ଫିଲ୍ମ କେବଳ ଦେଶରେ ନୁହେଁ ବିଦେଶରେ ମଧ୍ୟ ବହୁତ ପସନ୍ଦ କରାଯାଉଛି ।
‘ଦେବରା’ ଫିଲ୍ମକୁ ଦର୍ଶକ ପସନ୍ଦ କରୁଥିବା ବେଳେ ସୋସିଆଲ ମିଡିଆରେ ଅନେକ ପ୍ରତିକ୍ରିୟା ମଧ୍ୟ ଦେଇଛନ୍ତି । ନିର୍ଦ୍ଦେଶକ କୋର୍ଟଲା ଶିବା ‘ଦେବରା’ ଫିଲ୍ମର ନିର୍ଦ୍ଦେଶନା ଦେଇଛନ୍ତି । ଏହି ଫିଲ୍ମରେ ଜୁନିଅର ଏନଟିଆର, ସୈଫ ଅଲି ଖାନ ଏବଂ ଜାହ୍ନବୀ କପୁରଙ୍କୁ ଦେଖିବାକୁ ମିଳିଛି । ତେବେ ଏହି ଫିଲ୍ମ ସହ ପ୍ରଥମ ଥର ପାଇଁ ଜୁନିଅର ଏନଟିଆରଙ୍କ ସହ ଜାହ୍ନବୀ ଓ ସୈଫ ନଜର ଆସିଥିବା ବେଳେ ଏହି ଫିଲ୍ମ ସହ ଉଭୟ ତେଲୁଗୁ ଇଣ୍ଡଷ୍ଟ୍ରିରେ ଡେବ୍ୟୁ କରିଛନ୍ତି ।
ନୂଆଦିଲ୍ଲୀ: ଅଡୁଆରେ ଅର୍ଥମନ୍ତ୍ରୀ ନିର୍ମଳା ସୀତାରମଣ । ନିର୍ମଳା ସୀତାରମଣଙ୍କ ନାଁରେ ରୁଜୁ ହେବ ମାମଲା । ମାମଲା ରୁଜୁ ପାଇଁ ନିର୍ଦ୍ଦେଶ ଦେଲେ ବେଙ୍ଗାଲୁରୁ କୋର୍ଟ । ନିର୍ବାଚନୀ ବଣ୍ଡ୍ ଯୋଗେ ଜବରଦସ୍ତି ଟଙ୍କା ଆଦାୟ କରାଯାଇଥିବା ଅଭିଯୋଗରେ ଏହି ମାମଲା ରୁଜୁ ହେବ ।
ଜନାଧିକାର ସଂଘର୍ଷ ସଙ୍ଗଠନ ପକ୍ଷରୁ ଏନେଇ ସୀତାରମଣ ଓ ଅନ୍ୟ କିଛି ବ୍ୟକ୍ତିଙ୍କ ନାମରେ ଅଭିଯୋଗ ହୋଇଥିଲା। ଏହାପରେ ବେଙ୍ଗାଲୁରୁ ସ୍ଥିତ ଜନପ୍ରତିନିଧିର ବିଶେଷ ଅଦାଲତ ସୀତାରମଣଙ୍କ ବିରୋଧରେ ମାମଲା ରୁଜୁ ପାଇଁ ଆଦେଶ ଦେଇଛନ୍ତି। କୋର୍ଟଙ୍କ ନିର୍ଦ୍ଦେଶ ଆଧାରରେ ତିଳକ ନଗର ପୁଲିସ୍ ଏବେ ସୀତାରମଣ ଓ ଅନ୍ୟମାନଙ୍କ ନାଁରେ ମାମଲା ରୁଜୁ କରିବ ।
ରାଜନୀତିକ ଦଳମାନଙ୍କୁ ଅର୍ଥ ଦାନ କରିବାର ଏକ ମାଧ୍ୟମ ହେଉଛି ନିର୍ବାଚନୀ ବଣ୍ଡ। କେନ୍ଦ୍ର ସରକାର ୨୦୧୭ରେ ନିର୍ବାଚନ ବଣ୍ଡ ସ୍କିମ୍ ଘୋଷଣା କରିଥିଲେ। ଏହି ସ୍କିମ୍ ୨୯ ଜାନୁୟାରୀ ୨୦୧୮ରେ ଆଇନଗତ ଭାବରେ କାର୍ଯ୍ୟକାରୀ ହୋଇଥିଲା।
ନୂଆଦିଲ୍ଲୀ: ଦିଲ୍ଲୀର ରଙ୍ଗପୁରୀ ଅଞ୍ଚଳରେ ଚାଞ୍ଚଲ୍ୟ। ପିତାଙ୍କ ସହ ୪ ଦିବ୍ୟାଙ୍ଗ ଝିଅଙ୍କ ଆତ୍ମହତ୍ୟା। ଏକ ଭଡାଘରୁ ବାପା ଏବଂ ୪ ଝିଅଙ୍କ ମୃତଦେହ ଉଦ୍ଧାର ହୋଇଛି ।
ସୂଚନା ଅନୁଯାୟୀ, ବିହାରର ୫୦ ବର୍ଷୀୟ ହୀରାଲାଲ ତାଙ୍କ ପରିବାର ସହ ଦିଲ୍ଲୀ ରଙ୍ଗପୁରୀ ଗାଁରେ ଏକ ଭଡାଘରେ ରହୁଥିଲେ। ସେଠାରେ ହୀରାଲାଲ ରଙ୍ଗମିସ୍ତ୍ରୀ କାମ କରନ୍ତି । ଗୋଟେ ବର୍ଷ ପୂର୍ବେ କ୍ୟାନ୍ସରରେ ତାଙ୍କ ସ୍ତ୍ରୀ ମୃତ୍ୟୁବରଣ କରିଥିଲେ । ତାଙ୍କ ପରିବାରରେ ୧୮ ବର୍ଷର ଝିଅ ନିତୁ, ୧୫ ବର୍ଷର ଝିଅ ନିଶି, ୧୦ ବର୍ଷର ଝିଅ ନିରୁ ଏବଂ ୮ ବର୍ଷର ଝିଅ ନିଧି ସହ ରହୁଥିଲେ । ଝିଅମାନେ ଦିବ୍ୟାଙ୍ଗ ହେବା ଯୋଗୁଁ ଚଲାବୁଲା କରିବାରେ ଅସମର୍ଥ ଥିଲେ ଯାହାକୁ ନେଇ ହୀରାଲାଲ ସବୁବେଳେ ଚିନ୍ତାରେ ରହୁଥିଲେ ।
ସ୍ତ୍ରୀର ମୃତ୍ୟୁ ପରେ ହୀରାଲାଲ ଭାଙ୍ଗିପଡିଥିଲେ । ଏହାପରେ ପିଲାଙ୍କର ସମସ୍ତ ଦାୟୀତ୍ୱ ହୀରାଲାଲଙ୍କ ଉପରକୁ ଆସିଥିଲା । ଏବଂ ରୋଜଗାର କରି ପରିବାର ଚଳାଇବା ହୀରାଲାଲଙ୍କ ପକ୍ଷରେ ଅସମ୍ଭବ ହୋଇପଡିଥିଲା । ଯାହାକୁ ନେଇ ହୀରାଲାଲ ଆତ୍ମହତ୍ୟା କରିବାର ଚରମ ନିଷ୍ପତ୍ତି ନେଇଥିଲେ । ହାରୀଲାଲ ତାଙ୍କ ୪ ଝିଅଙ୍କ ସହ ବିଷ ପିଇ ଆତ୍ମହତ୍ୟା କରିଥିବା ଦିଲ୍ଲୀ ପୋଲିସ ସୂଚନା ଦେଇଛି ।
ରାଉରକେଲା: ରାଉରକେଲା ସହରରେ ପୁଣି ଲଜ୍ଜା। ଜଣେ ଶିଶୁ କନ୍ୟାକୁ ଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି। ୧୧ ବର୍ଷର ଶିଶୁ କନ୍ୟାକୁ ଦୁଷ୍କର୍ମ କରାଯାଇଥିବା ଅଭିଯୋଗ। ଘର ମାଲିକଙ୍କ ଶଳା ଶିଶୁ କନ୍ୟାକୁ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ଉଦିତନଗର ଥାନାରେ ଅଭିଯୋଗ ପରେ ପୋଲିସ ପକ୍ଷରୁ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି।
ଅନ୍ୟପଟେ ଅସୁରକ୍ଷିତ ପାଲଟିଛି ରାଉରକେଲା ସହର? ଦିନକୁ ଦିନ ସହରରେ ଅପରାଧ ବଢିଚାଲିଛି । ଗତ କିଛିଦିନ ଭିତରେ ୨ଟି ସମାନ ଘଟଣା ସାମ୍ନାକୁ ଆସିଥିଲା । ରାଉରକେଲାରେ ଆଇନ ଶୃଙ୍ଖଳାକୁ ନେଇ ସାଧାରଣରେ ପ୍ରଶ୍ନ ଉଠିିଛି ।
ନନ୍ଦିଘୋଷ ବ୍ୟୁରୋ: ଦ୍ବିତୀୟ ଦିନରେ ନର୍ସିଂ କର୍ମଚାରୀ ସଂଘର କାର୍ଯ୍ୟବନ୍ଦ ଆନ୍ଦୋଳନ। ରୋଗୀ ସେବା ଉପରେ ଏହାର ଗୁରୁତର ପ୍ରଭାବ ପଡିଛି। ଭୁବନେଶ୍ବରରୁ ବ୍ରହ୍ମପୁର, ରାଉରକେଲାରୁ ସମ୍ବଲପୁର ସବୁଠି ନର୍ସିଂ କର୍ମଚାରୀ ସଂଘର କାର୍ଯ୍ୟବନ୍ଦ ଆନ୍ଦୋଳନ। ସମସ୍ତ ହସ୍ପିଟାଲରେ ଇଞ୍ଜେକ୍ସନ ଦେବାକୁ ଖୋଜିଲେ ବି ନର୍ସ ମିଳୁନାହାନ୍ତି। ରାଜ୍ଯରେ କାର୍ଯ୍ଯବନ୍ଦ ଆନ୍ଦୋଳନକୁ ଓହ୍ଲାଇଛନ୍ତି ଓଡ଼ିଶା ନର୍ସିଂ କର୍ମଚାରୀ ସଂଘ । ଫଳରେ ସ୍ବାସ୍ଥ୍ଯ ସେବା ସମ୍ପୂର୍ଣ୍ଣ ଭାବେ ଭୁଶୁଡ଼ି ପଡ଼ିଛି। ରୋଗୀସେବା ଗୁରୁତର ଭାବେ ପ୍ରଭାବିତ ହୋଇଛି ।
ଗତ ବୁଧବାର ଓ ଗୁରୁବାର ଆନ୍ଦୋଳନ କରିଥିଲେ ବି ଜରୁରୀକାଳୀନ ସେବା ଯୋଗାଉଥିଲେ ନର୍ସ । ହେଲେ ସରକାର ଦାବି ନଶୁଣିବାରୁ ଶୁକ୍ରବାରଠୁ ସମ୍ପୂର୍ଣ୍ଣ କାର୍ଯ୍ଯବନ୍ଦ ଆନ୍ଦୋଳନ କରିଛନ୍ତି ନର୍ସ । ବିକ୍ଷୋଭରେ ପ୍ରାୟ ୧୫ ହଜାର ନର୍ସ ସାମିଲ ହୋଇଛନ୍ତି । ୨୦୧୩ ପୂର୍ବରୁ ନିଯୁକ୍ତି ପାଇଥିବା ନର୍ସିଂ ଅଫିସର ମାନଙ୍କର ୬ ବର୍ଷ ଚୁକ୍ତି ଭିତ୍ତିକ ଅବଧିକୁ ମୂଳ ଚାକିରି ସୀମାରେ ମିଶାଇ ପଦୋନ୍ନତି ସହ ସମସ୍ତ ଆର୍ଥିକ ସହାୟତା ଦାବି କରିଛି ସଂଘ । ଏହାସହ ବରିଷ୍ଠତା ଭିତ୍ତିରେ ପଦୋନ୍ନତି, CHO ପଦବୀରୁ ଫେରାଇ ଆଣି କ୍ୟାଡ଼ର ପୋଷ୍ଟ, ମେରୁଦଣ୍ଡ ଆଘାତ ଚିକିତ୍ସା କେନ୍ଦ୍ର ନର୍ସିଂ ଅଫିସର ମାନଙ୍କୁ ସ୍ଥାୟୀ, ଠିକା ସଂସ୍ଥା ଦ୍ୱାରା ନର୍ସିଂ ଅଫିସର ନିୟୋଜିତ ହୋଇଥିବା ଆଦେଶ ପ୍ରତିହାର ପରି ୧୦ ଦଫା ଦାବି ନେଇ ଆନ୍ଦୋଳନକୁ ଓହ୍ଲାଇଛି ନର୍ସିଂ କର୍ମଚାରୀ ସଂଘ ।
ଭଦ୍ରକ: ଭଦ୍ରକ ପୁରୁଣାବଜାର ଓ ସନ୍ଥିଆରେ ସୋସିଆଲ୍ ମିଡିଆ ପୋଷ୍ଟକୁ ନେଇ ତୁମୁଳକାଣ୍ଡ। ଉତ୍ତେଜନା ପ୍ରକାଶ ପରେ ଭଦ୍ରକ ପୁରୁଣାବଜାର, ଚନ୍ଦନବଜାର, ସନ୍ଥିଆ ଅଞ୍ଚଳ ସମେତ ଧାମନଗର ଏନଏସି ଓ ଦୋବଲରେ ଅଞ୍ଚଳରେ ଅନିର୍ଦ୍ଧିଷ୍ଟ କାଳ ପାଇଁ କର୍ଫୁ ଜାରି କରାଯାଇଛି। ଏଥିସହ ସାରା ଜିଲ୍ଲାରେ ଇଣ୍ଟରନେଟ୍ ସେବା ବନ୍ଦ କରାଯାଇଛି। ସହରରେ ଦୋକାନ ବଜାର ସହ ସରକାରୀ ଓ ବେସରକାରୀ ବିଦ୍ୟାଳୟ ବନ୍ଦ ରହିଛି। ଶାନ୍ତି ବଜାୟ ରଖିବା ପାଇଁ ପ୍ରଶାସନ ପକ୍ଷରୁ ଉଦ୍ୟମ ଜାରି ରହିଛି। ଘଟଣାସ୍ଥଳରେ ଏବେବି ଚାପା ଉତ୍ତେଜନା ଲାଗି ରହିଛି। ସ୍ଥାନୀୟ ଅଞ୍ଚଳରେ ୧୪ ପ୍ଲାଟୁନ ଫୋର୍ସ ମୁତୟନ ହୋଇଥିବା ବେଳେ ଫ୍ଲାଗ ମାର୍ଚ୍ଚ ଓ ପାଟ୍ରୋଲିଂ କରାଯାଉଛି। ଆବଶ୍ୟକତା ଅନୁସାରେ ଅଧିକ ଫୋର୍ସ ମୁତୟନ ପାଇଁ ଯୋଜନା କରାଯାଉଛି। ଘଟଣାକୁ ନେଇ ଭଦ୍ରକରେ ୧୦ ଓ ଧାମନଗରରେ ୯ ଜଣଙ୍କୁ ଅଟକ ରଖିଛି ପୋଲିସ। ଉଭୟ ପକ୍ଷର ମୁରବିଙ୍କୁ ନେଇ ଶାନ୍ତି କମିଟି ବୈଠକ ଡକାଯିବ ବୋଲି ଉଭୟ ଜିଲ୍ଲାପାଳ ଓ ଏସପି ସୂଚନା ଦେଇଛନ୍ତି।
ସୋସିଆଲ୍ ମିଡିଆ ପୋଷ୍ଟକୁ ନେଇ ପ୍ରଥମେ ଗୋଟିଏ ଗୋଷ୍ଠୀର ଶତାଧିକ ଲୋକ ଟାୟାର ଜାଳି ଏକ ରାଲି ବାହାର କରୁଥିବା ବେଳେ, ଭଦ୍ରକ ସନ୍ଥିଆ ନିକଟରେ ଉତ୍ତେଜନା ପ୍ରକାଶ ପାଇଥିଲା। ଭଦ୍ରକ ପୋଲିସ ଏହି ରାଲି ବନ୍ଦ କରି ଦୋଷୀକୁ ଧରିବାକୁ ଯାଉଥିବା ବେଳେ ପଥର ମାଡ଼ରେ ୨ ବରିଷ୍ଠ ପୋଲିସ ଅଧିକାରୀ ଆହତ ହୋଇଛନ୍ତି। ଏଥିସହ ତହସିଲଦାରଙ୍କ ଗାଡ଼ି ମଧ୍ୟ ଭଙ୍ଗାରୁଜା କରିଥିଲେ ଆନ୍ଦୋଳନକାରୀ । ପୋଲିସ ଉପରକୁ ଆକ୍ରମଣ ବେଳେ ଗାଡି ଭଙ୍ଗାରୁଜା ବେଳର ଭିଡିଓ ଯାଞ୍ଚ କରାଯାଉଛି।
ଏବେ ରାଜ୍ୟର ବିଭିନ୍ନ ସ୍ଥାନରେ ସାମାଜିକ ସଦଭାବନା ବ୍ୟାହତ ହେବାରେ ଲାଗିଛି। ବିଭିନ୍ନ ସ୍ଥାନରୁ ଆସୁଛି ଏଭଳି ଖବର । କୁହୁଡି, ଖୋର୍ଦ୍ଧା, ବାଲେଶ୍ବର, ଭଦ୍ରକ, ଧାମନଗର ଆରଡି ସମେତ ବିଭିନ୍ନ ସ୍ଥାନରେ ବାରମ୍ବାର ଏଭଳି ଘଟଣା ଘଟୁଛି। କିନ୍ତୁ ସବୁ ଜାଣିଥିଲେ ବି ଚୁପ ବସିଛି ପୋଲିସ ପ୍ରଶାସନ। ଯଦି ଏଭଳି ପରିସ୍ଥିତି ଜାରି ରୁହେ, ତେବେ ଆଗକୁ କେତେବେଳେ ବିସ୍ଫୋରକ ସ୍ଥିତି ସୃଷ୍ଟି ହେବ ତାହା କହିହେବ ନାହିଁ।
ରାଉରକେଲା: ରାଉରକେଲା ସହରରେ ଚାଞ୍ଚଲ୍ୟ। ଜଣେ ନାବାଳିକାକୁ ୫ ଜଣ ଯୁବକ କାରରେ ଅପହରଣ କରି ନେବାକୁ ଉଦ୍ୟମ କରିଥିବା ଅଭିଯୋଗ ହୋଇଛି। ସେକ୍ଟର ୭ ଥାନା ଛକ ନିକଟରୁ ନାବାଳିକାକୁ କାରରେ ଉଠାଇ ନେଇଥିଲେ ଅପହରଣକାରୀ। ତେବେ ଅପହରଣ କରିବାରେ ବିଫଳ ହେବା ପରେ ନାବାଳିକାକୁ ଘଣ୍ଟାଏ ପରେ ଛାଡି ଦେଇଥିବା ଜଣାପଡିଛି। ସେକ୍ଟର ୭ ଥାନାରେ ଅଭିଯୋଗ ପରେ ପୋଲିସ ପକ୍ଷରୁ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି । ୫ ଅଭିଯୁକ୍ତଙ୍କୁ ଗିରଫ ପାଇଁ ପୋଲିସ ପକ୍ଷରୁ ଉଦ୍ୟମ ଜାରି ରହିଛି।
ନନ୍ଦିଘୋଷ ବ୍ୟୁରୋ : ତେଜିଲା ଇସ୍ରାଏଲ ଲେବାନନ୍ ସଂଘର୍ଷ। ଶୁକ୍ରବାର ଲେବାନନ ଉପରେ ଜବରଦସ୍ତ ଆକ୍ରମଣ କରିଛି ଇସ୍ରାଏଲର ସେନା। ରାଜଧାନୀ ବେରୁତରେ ଏକାଧିକ ଟାର୍ଗେଟ ଉପରେ ହୋଇଛି ଏୟାର ଷ୍ଟ୍ରାଇକ। ହେଜବୁଲ୍ଲାର ମୁଖ୍ୟାଳୟକୁ ଟାର୍ଗେଟ କରି ହୋଇଥିଲା ଏହି ଆକ୍ରମଣ। ଏଥିରେ ବେରୁତରେ ଥିବା ୬ଟି କୋଠା ସମ୍ପୂର୍ଣ୍ଣ ଧ୍ଵଂସସ୍ତୁପ ପାଲଟିଛି। ଆକ୍ରମଣରେ ହେଜବୁଲ୍ଲାର କାର୍ଯ୍ୟକାରୀ ପରିଷଦ ପ୍ରମୁଖଙ୍କ ମୃତ୍ଯୁ ହୋଇଛି। ଏଥିରେ ୫୦ରୁ ଅଧିକ ଆହତ ହୋଇଛନ୍ତି। ବର୍ତ୍ତମାନ ଯାଏଁ ଇସ୍ରାଏଲ-ଗାଜା ଯୁଦ୍ଧ ମଧ୍ୟରେ ଏହା ହେଉଛି ସବୁଠାରୁ ଭୟଙ୍କର ଯୁଦ୍ଧ ବୋଲି କୁହାଯାଉଛି।
ସେପଟେ ହେଜବୁଲ୍ଲା ପରେ ଏବେ ୟେମେନରୁ ହୁତି ଆତଙ୍କବାଦୀ ସଂଗଠନ ଇସ୍ରାଏଲ ଉପରେ ଆକ୍ରମଣ କରିଛି। ବାଲିଷ୍ଟିକ ମିସାଇଲ ଆକ୍ରମଣ କରିଥିଲା ହୁତି ଆତଙ୍କୀ। ଆକାଶମାର୍ଗରେ ହିଁ ନଷ୍ଟକଲା ଇସ୍ରାଏଲର ସେନା। ଯୁଦ୍ଧରେ ୩ଟି କ୍ଷେତ୍ରରେ ଶତ୍ରୁଙ୍କ ସହ ମୁକାବିଲା କରୁଛି ଇସ୍ରାଏଲ ଡିଫେନ୍ସ ଫୋର୍ସେସ। ଆକ୍ରମଣ ଏମିତି ଏକ ସମୟରେ ଘଟିଛି ଯେତେବେଳେ ୟେମେନର ହୁତିମାନେ ଗାଜାରେ ଚାଲିଥିବା ସଂଘର୍ଷ ମଧ୍ୟରେ ଆଉ ଏକ ରଣକ୍ଷେତ୍ର ଖୋଲି ଇସ୍ରାଏଲ ଉପରେ ଚାପ ବଢ଼ାଇବାକୁ ଚେଷ୍ଟା କରୁଛନ୍ତି।
ବାଲେଶ୍ୱର: ଅଧା ରହିଗଲା ଜଗା ଦର୍ଶନ । ଜଳେଶ୍ବର ୬୦ ନମ୍ବର ଜାତୀୟ ରାଜପଥ ଏକତାଳି ବାଇପାସ୍ ନିକଟରେ ଦୁର୍ଘଟଣା। ଭାରସାମ୍ୟ ହରାଇ ୨୦ ଫୁଟ ତଳକୁ ଖସି ପଡ଼ିଥିଲା ତୀର୍ଥଯାତ୍ରୀ ବସ୍ । ଦୁର୍ଘଟଣାରେ ୪ ଯାତ୍ରୀଙ୍କର ମୃତ୍ୟୁ ହୋଇଥିବା ବେଳେ, ୧୭ରୁ ଅଧିକ ଗୁରୁତର ଅଛନ୍ତି । ଗୁରୁତରଙ୍କୁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଜଳେଶ୍ଵର ପୋଲିସ, ଅଗ୍ନିଶମ ବାହିନୀ ପକ୍ଷରୁ ଉଦ୍ଧାର କାର୍ଯ୍ୟ କରାଯାଇଥିଲା। ଉତ୍ତରପ୍ରଦେଶରୁ ପୁରୀ ଯାଉଥିଲା କ୍ରୀଷ୍ଣା ତୀର୍ଥଯାତ୍ରୀ ବସ। ବସରେ ୫୭ ଜଣ ଯାତ୍ରୀ ଥିଲେ।
