ବାଲେଶ୍ୱର; ସ୍ବାଧୀନତା ଦିବସରେ ଅଘଟଣ। ପତାକା ଉତ୍ତୋଳନ ବେଳେ ଶିକ୍ଷକ ମୃତ। ବାଲେଶ୍ୱର ସିମୁଳିଆ ଥାନା ମଇତାପୁର ଠାରେ ଥିବା ଏକ ଘରୋଇ ସ୍କୁଲରେ ଅଘଟଣ। ପତାକା ଉତ୍ତୋଳନ ପାଇଁ ପ୍ରସ୍ତୁତ ହେଉଥିବା ବେଳେ ଲୁହା ପାଇପଟି ବିଦ୍ୟୁତ ତାର ଉପରେ ପଡିଥିଲା l ତେଣୁ ଚାର୍ଜ ହେଇଯିବାରୁ ସ୍କୁଲର ଖେଳ ଶିକ୍ଷକ ଆହତ ହୋଇଥିଲେl ଗୁରୁତର ଅବସ୍ଥାରେ ତାଙ୍କୁ ଭଦ୍ରକ ମେଡିକାଲ ନେଇଥିବା ବେଳେ ସେଠାରେ ତାଙ୍କର ମୃତ୍ୟୁ ହୋଇଛି। ଶିକ୍ଷକ ପ୍ରିୟବ୍ରତ ବେହେରାଙ୍କ ଘର ବାଲେଶ୍ୱର ବସ୍ତା ଅଂଚଳର ହୋଇଥିବା ବେଳେ ବିଦ୍ୟାଳୟର ଦୁଇ ପିଲା ମଧ୍ୟ ଆହତ ହୋଇ ଭଦ୍ରକ ମେଡିକାଲ ଭର୍ତ୍ତି ହୋଇଛନ୍ତି l ଖବରପାଇ ଘଟଣାସ୍ଥଳରେ ସିମୁଳିଆ ପୋଲିସ ପହଞ୍ଚି ତଦନ୍ତ ଆରମ୍ଭ ହୋଇଛି।
ଟ୍ରେଲରକୁ ପଛପଟୁ ଧକ୍କା ଦେଲା ଯାତ୍ରୀବାହୀ ବସ୍
ସମ୍ବଲପୁର; ଟ୍ରେଲରକୁ ପଛପଟୁ ଧକ୍କା ଦେଲା ଯାତ୍ରୀବାହୀ ବସ୍ । ଦୁର୍ଘଟଣାରେ ୨ ମୃତ, ୧୨ରୁ ଅଧିକ ଗୁରୁତର। ସମ୍ବଲପୁର – ଯୁଯୁମୁରା ଥାନା ଅନ୍ତର୍ଗତ କଂସର ନିକଟରେ ମର୍ମନ୍ତୁଦ ଦୁର୍ଘଟଣା। ଶ୍ରୀ ଜଗନ୍ନାଥ ନାମକ ଏକ ବସ୍ ପୁରୀରୁ ସମ୍ବଲପୁର ଆସୁଥିବାବେଳେ କଂସର ପାଖରେ ଛିଡା ହୋଇଥିବା ଏକ ଟ୍ରେଲରକୁ ଧକ୍କା ଦେଇଥିଲା। ସମସ୍ତ ଆହତଙ୍କୁ ସମ୍ବଲପୁର ଜିଲ୍ଲା ମୂଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି l କିଛି ଗୁରୁତରଙ୍କୁ ବୁର୍ଲା ମେଡିକାଲ ସ୍ଥାନାନ୍ତର କରାଯାଇଛି । ଖବରପାଇ ଘଟଣାସ୍ଥଳରେ ଯୁଯୁମରା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି । ମୃତକ ହେଲେ ପଦ୍ମପୁରରେ କାର୍ଯ୍ୟରତ SBI କର୍ମଚାରୀ ଦୀପକ ଦାସ ଓ ଭୁବନେଶ୍ୱରରେ କାର୍ଯ୍ୟରତ ଅଫିସର ପ୍ରୀତି ସୁମନ ପ୍ରଧାନ।
ପ୍ରେମିକ ଘର ଆଗରେ ଜଳିଗଲେ ପ୍ରେମିକା
ରାଉରକେଲା;ପ୍ରେମିକ ଘର ଆଗରେ ଜଳିଗଲେ ପ୍ରେମିକା। ରାଉରକେଲା ସହରର ଝିରପାଣି ଅଞ୍ଚଳରେ ଅଭାବନୀୟ ଘଟଣା। ଗୁରୁତର ଅବସ୍ଥାରେ ଯୁବତୀଙ୍କୁ ରାଉରକେଲା ଇସ୍ପାତ ଜେନେରାଲ ହସପିଟାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ଯୁବତୀଙ୍କ ଆଵସ୍ଥା ସଙ୍କଟାପନ୍ନ ଥିବା ସୁଚନା ମିଳିଛି। ଫେରାର ପ୍ରେମିକକୁ ଧରିବା ପାଇଁ ପୋଲିସ ପକ୍ଷରୁ ବିଭିନ୍ନ ସ୍ଥାନରେ ଚଢାଉ ଆରମ୍ଭ ହୋଇଛି। ଝିରପାଣି ଥାନାରେ ଅଭିଯୋଗ ହେଵା ପରେ ପୋଲିସ ପକ୍ଷରୁ ଘଟଣାର ତଦନ୍ତ ଆରମ୍ଭ ହୋଇଛି।
ଲଗାଣ ବର୍ଷାରେ ଭୁଶୁଡିଲା ନିର୍ମାଣ ଧୀନ ବ୍ରିଜ
ନିମାପଡା;ଲଗାଣ ବର୍ଷାରେ ଭୁଶୁଡିଲା ନିର୍ମାଣ ଧୀନ ବ୍ରିଜ । ପୁରୀ ଜିଲ୍ଲା ନିମାପଡା – ବଳଙ୍ଗା ମୁଖ୍ୟରାସ୍ତା ଧନୁଆଁ ଛକ ନିକଟରେ ଭୁସୁଡ଼ିଲା ନିର୍ମାଣ ଧୀନ ବ୍ରିଜ। ୪୪ କୋଟିରୁ ଉର୍ଦ୍ଧ ଟଙ୍କା ବ୍ୟୟବରାଦରେ ନିର୍ମାଣ କରାଯାଉଥିବା ଏହି ରାସ୍ତା ଏବଂ ବ୍ରିଜ କାମରେ ବ୍ୟାପକ ଅନିୟମିତତା ଓ ନିମ୍ନମାନର କାମକୁ ନେଇ ବିଭିନ୍ନ ସମୟରେ ଅଭିଯୋଗ ହେଇଆସୁଥିବା ବେଳେ ଆଜି ପୁଣି ନିର୍ମାଣଧିନ ବ୍ରିଜଟି ଭୁଶୁଡ଼ି ପଡ଼ିଥିବା ଦେଖିବାକୁ ମିଳିଛି। । ଗତ କାଲି ଏହି ବ୍ରିଜଟିର ଛାତ ନୂତନ ଭାବେ ନିର୍ମାଣ କରାଯାଇଥିବା ବେଳେ ଆଜି ସକାଳ ସମୟରେ ଛାତଟିର ଅଧିକାଂଶ ସ୍ଥାନରେ ଫାଟ ଦେଖାଯିବା ସହ ଗୋଟିଏ ପାର୍ଶ୍ୱ ଦବିଯାଇଥିବାର ସ୍ଥାନୀୟ ଲୋକେ ଦେଖିଥିଲେ। ପରବର୍ତ୍ତୀ ସମୟରେ ବ୍ରିଜଟି ଆଧାରୁ ଅଧିକ ଭୁସୁଡ଼ି ପଡିଥିଲା। ସଂପୂର୍ତ୍ତ ଠିକାସଂସ୍ଥା ନିଜର ଦୋଷ ଦୁର୍ବଳତା ଲୁଚାଇବା ପାଇଁ ଏକ ଜେସିବି ସାହାଯ୍ୟରେ ଭଲଥିବା ବାକି ଅଂଶ ଭାଙ୍ଗିବାକୁ ଚେଷ୍ଟା କରିଥିବା ସମୟରେ ସ୍ଥାନୀୟ ଲୋକେ ଜୋରଦାର ବିରୋଧ କରିଥିଲେ। ତେବେ ବାରମ୍ବାର ଏହି ରାସ୍ତା ନିର୍ମାଣକୁ ନେଇ ସମ୍ପୂର୍ତ୍ତ ଠିକାସଂସ୍ଥା ଉପରେ ଅଭିଯୋଗ ହେଉଥିଲେ ମଧ୍ୟ ବିଭାଗୀୟ ଯନ୍ତ୍ରୀ ଏଦିଗରେ କୌଣସି କାର୍ଯ୍ୟାନୁଷ୍ଠାନ ନେଉନଥିବା ସ୍ଥାନୀୟ ଲୋକେ ଅଭିଯୋଗ କରିବା ସହିତ ତୁରନ୍ତ ଏହାର ଉଚ୍ଚ ସ୍ତରୀୟ ତଦନ୍ତ ଦାବି କରିଛନ୍ତି। ଯଦି ତଦନ୍ତ କରାନଯାଏ ତେବେ ଆଗାମୀ ସମୟରେ ଲୋକେ ରାସ୍ତା ରୋକ କରିବା ପାଇଁ ଚେତାବନୀ ଦେଇଛନ୍ତି।
ମୋହନ ମାଝୀଙ୍କ ବଡ଼ ଘୋଷଣା: ଚାକିରି ବୟସ ସୀମା ୪୨, OCSରେ ହଟିଲା ୬ ସୁଯୋଗ ସୀମା
ଭୁବନେଶ୍ବର: ସରକାରୀ ଚାକିରି ପାଇଁ ଆବେଦନକାରୀଙ୍କ ଲାଗି ବଡ଼ ଘୋଷଣା। ଅଧିକରୁ ଅଧିକ ସୁଯୋଗ ଦେବା ପାଇଁ ସର୍ବାଧିକ ବୟସ ସୀମାକୁ ୩୨ରୁ ୪୨ ବର୍ଷକୁ ବୃଦ୍ଧି କରାଯାଇଛି । ଏହା ସହ ଓଡ଼ିଶା ସିଭିଲ୍ ସର୍ଭିସ୍ ପରୀକ୍ଷା ପାଇଁ ଯେଉଁ ସର୍ବାଧିକ ୬ଟି ସୁଯୋଗ ରହିଛି, ତାକୁ ଉଠାଇଦିଆଯାଇଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ସେ କହିଛନ୍ତି- ସରକାରୀ କର୍ମଚାରୀଙ୍କ ଦେହାନ୍ତ ପରେ ଅନୁକମ୍ପାମୂଳକ ନିଯୁକ୍ତିରେ ଯେଉଁ କଟକଣା ରହିଥିଲା ତାହାକୁ କୋହଳ କରାଯାଇଛି।
ସ୍ବାଧୀନତା ଦିବସ ଅବସରରେ ପତାକା ଉତ୍ତୋଳନ କରି ମୁଖ୍ୟମନ୍ତ୍ରୀ କହିଛନ୍ତି.ଦୁଇ ବର୍ଷରେ ରାଜ୍ୟ ସରକାର, ‘ସବ୍କା ସାଥ, ସବ୍କା ବିକାଶ, ସବ୍କା ବିଶ୍ବାସ ଓ ସବ୍କା ପ୍ରୟାସ’ ମନ୍ତ୍ରକୁ ପାଥେୟ କରି ସମୃଦ୍ଧ ଓଡିଶା ଓ ବିକଶିତ ଓଡ଼ିଶା ଗଠନ କରିବା ପାଇଁ କାର୍ଯ୍ୟରତ ରହିଛି। ରାଜ୍ୟ ଜନସଂଖ୍ୟାର ଅଧା ହେଉଛନ୍ତି ମହିଳା । ଜନସଂଖ୍ୟାର ପ୍ରାୟ ୬୦ ପ୍ରତିଶତ ହେଉଛନ୍ତି କୃଷକ, ମତ୍ସ୍ୟଜୀବୀ ଓ ପ୍ରାଣିପାଳକ। ୨୦୨୭ ମସିହା ଶେଷ ସୁଦ୍ଧା, ସବୁ ଗାଁକୁ ଏହି ମୌଳିକ ସୁବିଧା ପ୍ରଦାନ କରିବା ପାଇଁ ଲକ୍ଷ୍ୟ ରଖାଯାଇଛି। ଦେଶର ପ୍ରଥମ ରାଜ୍ୟ ଭାବେ ଓଡିଶାରେ ‘କେଜି ରୁ ପିଜି’ ଶିକ୍ଷାକୁ ସଂପୂର୍ଣ୍ଣ ଭାବେ ନିଃଶୁଳ୍କ କରିବା ହେଉଛି ଏହାର ସବୁଠାରୁ ବଡ ଉଦାହରଣ। ଅର୍ଥାତ୍, ଶିଶୁ ବାଟିକାରୁ ଆରମ୍ଭ କରି ସ୍ନାତକୋତ୍ତର ଶ୍ରେଣୀ ପର୍ଯ୍ୟନ୍ତ ସବୁ ସରକାରୀ ସ୍କୁଲ, କଲେଜ, ବିଶ୍ୱବିଦ୍ୟାଳୟ ତଥା ସରକାରୀ ପ୍ରତିଷ୍ଠାନରେ ଶିକ୍ଷାକୁ ମାଗଣା କରାଯାଇଛି। ପ୍ରଥମ ପର୍ଯ୍ୟାୟରେ ୨,୨୦୦ଟି ଆଦର୍ଶ ପ୍ରାଥମିକ ବିଦ୍ୟାଳୟ ନିର୍ମାଣ କରାଯିବ। ପ୍ରାଥମିକ ଶିକ୍ଷାକୁ ସୁଦୃଢ କରିବା ପାଇଁ ଏଇ ଦୁଇ ବର୍ଷ ମଧ୍ୟରେ ୨୬ ହଜାର ଶିକ୍ଷକ-ଶିକ୍ଷୟତ୍ରୀଙ୍କୁ ନିଯୁକ୍ତି ଦିଆ ଯାଇଛି।
ଉଚ୍ଚଶିକ୍ଷାକୁ ଆହୁରି ବ୍ୟାପକ କରିବା ପାଇଁ ଉପାନ୍ତ ଜିଲ୍ଲାରେ ୧୮ଟି ନୂଆ ସରକାରୀ ମହାବିଦ୍ୟାଳୟ ପ୍ରତିଷ୍ଠା ସହିତ ୪ଟି ନୂଆ ବିଶ୍ୱବିଦ୍ୟାଳୟ ପ୍ରତିଷ୍ଠା ପାଇଁ ନିଷ୍ପତ୍ତି ନିଆଯାଇଛି । କେନ୍ଦ୍ର ସରକାରଙ୍କ ଆୟୁଷ୍ମାନ ଭାରତ – ପ୍ରଧାନ ମନ୍ତ୍ରୀ ଜନ ଆରୋଗ୍ୟ ଯୋଜନା ତଥା ରାଜ୍ୟ ସରକାରଙ୍କ ନିଜସ୍ଵ ଗୋପବନ୍ଧୁ ଜନ ଆରୋଗ୍ଯ ଯୋଜନାର ମିଳିତ କାର୍ଯ୍ୟକାରିତା ଯୋଗୁଁ ରାଜ୍ୟର ୩ କୋଟି ୭୦ ଲକ୍ଷ ଲୋକ ଅର୍ଥାତ ୮୦ ପ୍ରତିଶତ ଲୋକଙ୍କ ପାଇଁ ଦେଶର ପ୍ରତିଷ୍ଠିତ ବେସରକାରୀ ହସ୍ପିଟାଲରେ ଚିକିତ୍ସିତ ହେବା, ଆଉ ସ୍ଵପ୍ନ ନୁହେଁ, ଏହା ବାସ୍ତବତାରେ ପରିଣତ ହୋଇଛି। ଅର୍ଥନୈତିକ ସ୍ତରରେ ସ୍ବାବଲମ୍ବୀ କରିବା ପାଇଁ ସୁଭଦ୍ରା ଓ ଲକ୍ଷପତି ଦିଦି କାର୍ଯ୍ୟକ୍ରମ ଉଲ୍ଲେଖନୀୟ। ଏକ କୋଟିରୁ ଅଧିକ ସୁଭଦ୍ରା ହିତାଧିକାରୀ ଓ ୨୬ ଲକ୍ଷରୁ ଅଧିକ ଲକ୍ଷପତି ଦିଦି ଆଜି ବିଭିନ୍ନ ଛୋଟ ବଡ ବ୍ୟବସାୟ କରିବାକୁ ପୁଞ୍ଜି ନିବେଶ ପାଇଁ ଅନ୍ୟ ଉପରେ ନିର୍ଭରଶୀଳ ନୁହନ୍ତି। ଗତ ଦୁଇ ବର୍ଷରେ ୨୧ ଲକ୍ଷ କୋଟି ଟଙ୍କାର ନିବେଶ ପ୍ରସ୍ତାବ ଆସିଥିବା ବେଳେ ୧୦ ଲକ୍ଷ କୋଟି ଟଙ୍କାର ୪୫୩ ଗୋଟି ଶିଳ୍ପ ପ୍ରକଳ୍ପ ଗୁଡ଼ିକୁ ମଞ୍ଜୁରୀ ଦିଆଯାଇଛି। ଏଥି ମଧ୍ୟରୁ ବର୍ତ୍ତମାନ ସୁଦ୍ଧା ସାଢେ ତିନି ଲକ୍ଷ କୋଟି ଟଙ୍କାର ୧୫୨ଟି ପ୍ରକଳ୍ପର ଉଦ୍ଘାଟନ ତଥା ଶିଳାନ୍ୟାସ କରାଯାଇଛି। ଏହା ଦ୍ୱାରା ୨ ଲକ୍ଷ ୫୦ ହଜାର ଯୁବକ-ଯୁବତୀଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହୋଇପାରିଛି।
ଶଙ୍ଖ ଭବନରେ ସ୍ୱାଧୀନତା ଦିବସ ପାଳନ
ଭୁବନେଶ୍ବର; ଶଙ୍ଖ ଭବନରେ ପାଳିତ ହୋଇଛି ସ୍ବାଧୀନତା ଦିବସ। ଆୟୋଜିତ ଉତ୍ସବରେ ପତାକା ଉତ୍ତୋଳନ କରିଥିଲେ ବିଜେଡି ସୁପ୍ରିମୋ ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ। ଦଳର ବହୁ ନେତା, ପୂର୍ବତନ ମନ୍ତ୍ରୀ, ବିଧାୟକ ଓ କର୍ମୀ ଉପସ୍ଥିତ ରହି ଏହି ଦିବସକୁ ପାଳନ କରିଥିଲେ। ପତାକା ଉତ୍ତୋଳନ ପରେ ସମସ୍ତେ ଜନ ଗଣ ମନ ଗାନ କରିଥିଲେ। ପ୍ରଥମେ ଦଳର ନେତା ଓ କର୍ମୀ ବୀରପୁତ୍ରଙ୍କ ଫଟୋ ଚିତ୍ରରେ ମାଲ୍ୟାର୍ପଣ କରିବା ସହ ବନ୍ଦେ ଉତ୍କଳ ଜନନୀ ଗାନ କରିଥିଲେ। ସେହିପରି ବନ୍ଦେ ମାତରଂ ଗାନ ବି ପରିବେଷଣ କରାଯାଇଥିଲା। ଏହି ଅବସରରେ ଦେଶର ଓ ରାଜ୍ୟର ବରପୁତ୍ରମାନଙ୍କ ସ୍ୱାଧୀନତା ସଂଗ୍ରାମରେ ଅବଦାନକୁ ସ୍ମରଣ କରାଯିବା ସହ ସେମାନଙ୍କ ବଳିଦାନକୁ ମନେ ପକାଇଥିଲେ ବିଜୁ ଜନତା ଦଳର ନେତା ଓ କର୍ମୀ। ସେପଟେ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି ବିଜେଡି ନେତା। ବିଜେପି ସରକାର ଯେଉଁ ତ୍ରୁଟି କରିଛି, ତାକୁ ସୁଧାରନ୍ତୁ। ପୂର୍ବରୁ ଯେପରି ଓଡ଼ିଶା ସବୁଠାରେ ପ୍ରଶଂସିତ ହେଉଥିଲା, ବିକାଶ ଧାରା ଚାଲୁଥିଲା, ତାକୁ ସରକାର ବଜାୟ ରଖନ୍ତୁ ବୋଲି କହିଛନ୍ତି ବିଜେଡି ନେତା।
ବନ୍ଦେ ମାତରମ୍ରେ ଗୁଞ୍ଜିଲା ଲାଲକିଲ୍ଲା, ବିକଶିତ ଭାରତର ଲକ୍ଷ୍ୟ ଦେଲେ ମୋଦୀ
ନୂଆଦିଲ୍ଲୀ; ବିକାଶର ଜୟଯାତ୍ରା କରିଚାଲିଛି ଭାରତ। ସାରା ବିଶ୍ବର ଦୃଷ୍ଟି ଆକର୍ଷଣ କରିବାରେ ଭାରତ ନିଜକୁ ସମର୍ଥ କରାଇଛି। ଦେଶ ଏକ ଶିଳ୍ପୋନ୍ନତ ରାଷ୍ଟ୍ରରେ ପରିଣତ ହୋଇଛି ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଐତିହାସିକ ଲାଲକିଲ୍ଲା ଉପରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଛନ୍ତି- ଗତ ୧୨ ବର୍ଷରେ ଭାରତ ଅନେକ କ୍ଷେତ୍ରରେ ବିକାଶ ଲାଭ କରିଛି। ୧୪୦ କୋଟି ଭାରତବାସୀଙ୍କ ଆଶା ଓ ଆକାଂକ୍ଷା ପୂରଣ ହୋଇଛି। ଏହି ସମୟ କାଳ ମଧ୍ୟରେ ଭାରତର ଅଭିବୃଦ୍ଧି ହାର ଯଥେଷ୍ଟ ବୃଦ୍ଧି ପାଇଛି। ପ୍ରତିରକ୍ଷା ଉତ୍ପାଦନ ହାର ୪ ଗୁଣ, ଇଲେକ୍ଟ୍ରୋନିକ୍ସ ସାମଗ୍ରୀ ଉତ୍ପାଦନ ହାର ୭ ଗୁଣ ବୃଦ୍ଧି ପାଇଛି। ଆଧୁନିକ ରେଳବାଇ କୋଚ ଉତ୍ପାଦନ ହାର ୨୧ଗୁଣ ବୃଦ୍ଧି ପାଇଛି। ସେହିପରି ମୋବାଇଲ ଉତ୍ପାଦନ ହାର ୩୩ ଗୁଣ ବୃଦ୍ଧି ପାଇଛି। ସେ କହିଛନ୍ତି- ଜାତୀୟ ଶିକ୍ଷାନୀତି କରିବାରେ ସରକାର ସଫଳ ହୋଇଛନ୍ତି। ଛାତ୍ରଛାତ୍ରୀଙ୍କ ଲାଗି ମାଗଣା ଅନଲାଇନ କୋଚିଂ ବ୍ୟବସ୍ଥା ସରକାର କରିବେ। ଦେଶରେ ଅନେକ ପ୍ରାକୃତିକ ବିପର୍ଯ୍ୟୟ ଘଟିଛି। ହେଲେ ବିପନ୍ନଙ୍କ ନିକଟରେ ଦେଶବାସୀ ଠିଆ ହୋଇଛନ୍ତି। ବୀର ସଂଗ୍ରାମୀଙ୍କ ନିକଟରେ ଦେଶବାସୀ କୃତଜ୍ଞ। ଭାରତୀୟମାନେ ବଡ଼ ସ୍ବପ୍ନ ଦେଖନ୍ତି। ସେସବୁକୁ ସାକାର କରିବା ଲାଗି ବଡ଼ ଆଭିମୁଖ୍ୟ ପୋଷଣ କରନ୍ତି। ୨୦୪୭ ବିକଶିତ ଭାରତ ଲକ୍ଷ୍ୟ ପୂରଣ କରିବାକୁ ଆହ୍ବାନ ଦେଇଛନ୍ତି ମୋଦୀ। ଗତ ୧୨ ବର୍ଷରେ ଭାରତ ଏକ ନୂଆ ଶକ୍ତିରେ ପରିଣତ ହୋଇଛି। ଡିଜିଟାଲ ଯାତ୍ରାରେ ଭାରତ ଯଥେଷ୍ଟ ଆଗେଇଛି। ଡିଜିଟାଲ ଟ୍ରାଞ୍ଜାକ୍ସନ ୬ ଗୁଣ ବଢ଼ିଛି। ଅର୍ଥନୀତି ସହ ଅନେକ କ୍ଷେତ୍ରରେ ଭାରତ ବିକଶିତ ଲାଭ କରୁଛି। ଘରେ ଘରେ ପାଇପ ପାଣି, ଗ୍ୟାସ ସଂଯୋଗ ଦିଆଯାଇଛି। ଆତ୍ମନିର୍ଭର ଭାରତ ସରକାରଙ୍କ ମୂଳ ଲକ୍ଷ୍ୟ। ଭୋକାଲ ଫର ଲୋକାଲ ଦିଗରେ ଭାରତ ଯଥେଷ୍ଟ ଆଗେଇଛି ବୋଲି କହିଛନ୍ତି ମୋଦୀ। ଦେଶରେ ସାର, ପେଟ୍ରୋଲ, ୟୁରିଆ ପରି ସମସ୍ୟା ସୃଷ୍ଟି ହୋଇଛି। ମାତ୍ର ସମସ୍ତ ସଙ୍କଟକୁ ସଫଳତାର ସହ ଟାଳିଦିଆଯାଇଛି। ୮୦ତମ ସ୍ବାଧୀନତା ଦିବସରେ ଆୟୋଜିତ ଜାତୀୟସ୍ତରୀୟ ପରେଡ ଉତ୍ସବରେ ଦେଶ ଦେଖାଇଛି ଦମ୍। ପ୍ରଥମ ଥର ଲାଗି ସ୍ବାଧୀନତା ଦିବସରେ ଗାନ କରାଯାଇଛି ବନ୍ଦେ ମାତରଂ। ଚଳିତ ବର୍ଷର ଥିମ ରହିଛି ବନ୍ଦେ ମାତରଂର ୧୫୦ ବର୍ଷ। କଡା ସୁରକ୍ଷା ବଳୟରେ ରହିଛି ଦିଲ୍ଲୀ। ଦେଶର ପ୍ରାୟ ୫ ହଜାର ଅତିଥି ଉତ୍ସବରେ ସାମିଲ ହୋଇଛନ୍ତି। ସକାଳେ ପ୍ରଧାନମନ୍ତ୍ରୀ ମୋଦୀ ରାଜଘାଟ ଯାଇ ସ୍ମୃତିତର୍ପଣ କରିଥିଲେ।
ଚିନ୍ତା ବଢ଼ାଇଲା ଲଗାଣ ବର୍ଷା, ୭୮ ହଜାରରୁ ଅଧିକ ଲୋକ ପ୍ରଭାବିତ
ବାଲେଶ୍ବର; ଚିନ୍ତା ବଢ଼ାଇଲା ଲଗାଣ ବର୍ଷା । ଲଘୁଚାପ ବର୍ଷା ପୁଣି ରାଜ୍ୟରେ ଆଣିଲା ଦ୍ବିତୀୟ ବନ୍ୟା । ଏଥିରେ ଅଧିକ ପ୍ରଭାବିତ ହୋଇଛି ବାଲେଶ୍ବର ଜିଲ୍ଲା । ଜଳକା ଓ ବୁଢ଼ାବଳଙ୍ଗ ନଦୀର ଜଳସ୍ତର ବଢ଼ିବାରୁ ଅନେକ ଗାଁରେ ପଶିଛି ପାଣି । ୪୧ ପଞ୍ଚାୟତର ୭୮ ହଜାରରୁ ଅଧିକ ଲୋକ ପ୍ରଭାବିତ ହୋଇଛନ୍ତି । ଅଞ୍ଚଳରେ ଅଗ୍ନିଶମ, ଓଡ୍ରାଫ ଟିମ୍ ମୁତୟନ ହୋଇଛନ୍ତି । ସେପଟେ କୃତିମ ବନ୍ୟା ପରିସ୍ଥିତି ଯୋଗୁଁ ରାଉରକେଲାରେ ହଜାର ହଜାର ପରିବାର କ୍ଷତିଗ୍ରସ୍ତ ହୋଇଥିବା ଅଭିଯୋଗ ହୋଇଛି । ପୁଣି ଡରାଇଲା ବୁଢ଼ାବଳଙ୍ଗ, ଜଳକା । ଲଘୁଚାପ ଲଗାଣ ବର୍ଷା ଆଣିଲା ଦ୍ବିତୀୟ ବନ୍ୟା । ପୁଣି ଜଳ ପ୍ଲାବନ ହେଲା ବାଲେଶ୍ବର । ବର୍ଷା ପାଇଁ ଜିଲ୍ଲାର ୪୧ ପଞ୍ଚାୟତର ୭୮ ହଜାରରୁ ଉର୍ଦ୍ଧ୍ୱ ଲୋକ ପ୍ରଭାବିତ ହୋଇଛନ୍ତି । ସଦରର ଉଲୁଣ୍ଡା, ସିନ୍ଧିଆ, ବୁଆଁଳ, ଗୋପୀନାଥପୁର ଓ ପରଖି ପଞ୍ଚାୟତର ବହୁ ଅଞ୍ଚଳ ବାହ୍ୟ ଜଗତରୁ ବିଚ୍ଛିନ୍ନ ହୋଇଛି । ୬ ହଜାର ୨୦୧ ଜଣ ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରାଯାଇଛି । ପ୍ରଭାବିତ ଅଞ୍ଚଳରେ ୨ଟି NDRF ଓ ୨ଟି ଓଡ୍ରାଫ ଟିମ୍ ମୁତୟନ କରାଯାଇଛି । ବନ୍ୟା ପୀଡ଼ିତଙ୍କ ପାଇଁ ୧୬ଟି ମାଗଣା ରୋଷେଇ କେନ୍ଦ୍ର ଖୋଲାଯାଇଛି । ଗୃହପାଳିତ ପ୍ରାଣୀଙ୍କ ଚିକିତ୍ସା ଓ ସୁରକ୍ଷା ପାଇଁ ୯ଟି ଭେଟେରିନାରୀ ଟିମ୍ ନିୟୋଜିତ ଅଛନ୍ତି । ବର୍ଷା ଛାଡିଲେ ବି ୪ ଦିନ ଜଳବନ୍ଦୀ ସମସ୍ୟା ଲାଗିରହିବ ବୋଲି କହିଛନ୍ତି ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ । ବନ୍ୟାଦ୍ବାରା ବାଲେଶ୍ୱର, ଧାମନଗର, ତିହିଡି, ଦଶରଥପୁର ପ୍ରଭାବିତ ହୋଇଥିବା ସେ ସୂଚନା ଦେଇଛନ୍ତି । ଲଗାଣ ବର୍ଷା ଯୋଗୁଁ ରାଉରକେଲାରେ ସୃଷ୍ଟି ହୋଇଛି କୃତ୍ରିମ ବନ୍ୟା । ଏଥିରେ ହଜାର ହଜାର ପରିବାର କ୍ଷତିଗ୍ରତ ହୋଇଥିବା ଅଭିଯୋଗ ହୋଇଛି । ଇସ୍ପାତ କାରଖାନା, ରେଲୱେ ଓ ରାଉରକେଲା ମହାନଗର ନିଗମ ମଧ୍ୟରେ ସମନ୍ବୟର ଅଭାବ ଯୋଗୁଁ ଏପରି ସ୍ଥିତି ସୃଷ୍ଟି ହୋଇଥିବା ଅଭିଯୋଗ କରିଛନ୍ତି ବିଧାୟକ । ବର୍ଷାଜଳ ନିଷ୍କାସନ ହୋଇ ନପାରିବାରୁ ଶତାଧିକ ବସ୍ତି ବାସିନ୍ଦା ଦୀର୍ଘ ସମୟଧରି ଜଳବନ୍ଦୀ ଜୀବନ ବିତାଇଛନ୍ତି । ଘଟଣାକୁ ନେଇ ଗତକାଲି ଦୁଃଖ ପ୍ରକାଶ କରିଥିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ । ହକି ବିଶ୍ୱକପ ଆୟୋଜନ କରି ଯେଉଁ ରାଉରକେଲା ସ୍ମାର୍ଟ ସିଟି ଗୌରବ ଆଣିଥିଲା, ଏବେ ସେହି ସହର ଜଳବନ୍ଦୀ ହୋଇ ଅପବାଦ ମୁଣ୍ଡାଉଛି ବୋଲି କହିଥିଲେ ନବୀନ । ପୂର୍ବରୁ ବନ୍ୟା ପାଇଁ ଅନେକ ଲୋକ ଅଣ୍ଟା ସଳଖି ନଥିବାବେଳେ ଏବେ ପୁଣି ଲଗାଣ ବର୍ଷା ଆଣିଲା ବିପଦ ।
ଡିବିରୀ ଆଲୁଅରେ ପାଠ ପଢୁଛନ୍ତି ପିଲା, ବିଜୁଳି ଅପେକ୍ଷାରେ ୧୫ ଆଦିବାସୀ ପରିବାର
ଗଜପତି : ସଞ୍ଜ ହୋଇଗଲେ ଅନ୍ଧକାର ହୋଇଯାଉଛି ପୂରା ଗାଁ l ଡିବିରୀ ଆଲୁଅ ସାଜିଛି ଏକମାତ୍ର ଭରସା। ଗଜପତି ଜିଲ୍ଲା ଗୁବୁରୀଗୁଡା ବଟସାହିରେ ପହଞ୍ଚିନି ବିଦ୍ୟୁତ। ଡିବିରୀ ଲଗାଇ ପାଠ ପଢୁଛନ୍ତି ପିଲା । ଗାଁ କୁ ବିଜୁଳି ଯୋଗାଇ ଦେବା ପାଇଁ ବାରମ୍ବାର ଅଭିଯୋଗ କଲେ ମଧ୍ୟ ଫଳ ଶୂନ l ଖାଲି ସେତିକି ନୁହେଁ ମୌଳିକ ସୁବିଧାରୁ ବଞ୍ଚିତ ଏଠାକାର ବାସିନ୍ଦା। ବିନା ଆଲୁଅରେ ବିତୁଛି ଜୀବନ । ବିଜୁଳି ଆଲୁଅ ଏଠି ସାତସପନ । ସଞ୍ଜ ନଇଁଲେ ଘୋଟିଯାଉଛି ଅନ୍ଧକାର। ଡିବିରୀ ଆଲୁଅ ସାଜିଛି ଏକମାତ୍ର ଭରସା । ଡିବିରୀ ଲଗାଇ ପାଠ ପଢୁଛନ୍ତି ପିଲା। ଗଜପତି ଜିଲ୍ଲା ମୋହନା ବ୍ଲକ ଗୁବୁରୀଗୁଡା ବଟସାହିରେ ପହଞ୍ଚିନି ବିଦ୍ୟୁତ। ଏଠାରେ ୧୫ଗୋଟି ଆଦିବାସୀ ସମ୍ପ୍ରଦାୟର ପରିବାର ବସବାସ କରୁଛନ୍ତି। ମୌଳିକ ସୁବିଧାରୁ ବଞ୍ଚିତ ଏଠାକାର ବାସିନ୍ଦା। ଗାଁକୁ ନା ଅଛି ପକ୍କା ରାସ୍ତା ନା ସ୍ଵଛ ପାନୀୟ ଜଳର ବ୍ୟବସ୍ଥା l ଟାଙ୍କି ଅଛି, ନଳକୂପ ବି ବସିଛି, ହେଲେ ଆସୁନି ପାଣି। ପିଇବା ପାଣି ମୁନ୍ଦେ ପ୍ରତିଦିନ ହଇରାଣ ହେଉଛନ୍ତି ଲୋକେ lସମସ୍ୟା ସମ୍ପର୍କରେ ବ୍ଲକ ପ୍ରଶାସନ ଠାରୁ ଆରମ୍ଭ କରି ଜିଲ୍ଲାପାଳ ଅଭିଯୋଗ ଶୁଣାଣିରେ ଅଭିଯୋଗ କରିଥିଲେ ମଧ୍ୟ ଫଳ ଶୂନ l ଫଳରେ ଗାଁ ଟି ପୁରା ଅନ୍ଧକାରେ ରହୁଥିବା ବେଳେ ପିଲାମାନେ ଡିବିରୀ ଲଗାଇ ପାଠ ପଢୁଛନ୍ତି l
ସାର ଦାମ ଆକାଶ ଛୁଆଁ,ଚାଷୀଙ୍କ ମୁଣ୍ଡରେ ଋଣ ବୋଝ
ଚାଷୀଙ୍କୁ ଘାରିଛି ସାର ଟେନସନ । ପୁରୀ ଜିଲ୍ଲା କାକଟପୁର ଓ ଅସ୍ତରଙ୍ଗ ବ୍ଲକ ଅଂଚଳରେ ସାରର ଅହେତୁକ ଦର ବୃଦ୍ଧି ଚାଷୀଙ୍କ ମେରୁଦଣ୍ଡକୁ ଦୋହଲାଇ ଦେଲାଣି । ସାର ଦାମ ୩ ଗୁଣା, ଆଉ ବଜାରରେ କଳାବଜାରୀର ରାଜ। ଚାଷୀର ଖର୍ଚ୍ଚ ଲକ୍ଷେ, ଆୟ ଅଧା । କିଭଳି ଶୁଝିବେ ଋଣ, ଘାରିଛି ଚିନ୍ତା । ଚାଷୀଙ୍କୁ ଘାରିଛି ସାର ଟେନସନ। ଡିଏପି, ୟୁରିଆ ଓ ଗ୍ରୋମରର ଅହେତୁକ ଦର ବୃଦ୍ଧି ଚାଷୀଙ୍କ ମେରୁଦଣ୍ଡ ଦୋହଲାଇ ଦେଲାଣି । ଏଭଳି ସ୍ଥିତିରେ ଚାଷ କାର୍ଯ୍ୟ କିଭଳି କରିବେ, କିଭଳି ଋଣ ଶୁଝିବେ ସେହି ଚିନ୍ତାରେ ପୁରୀ ଜିଲ୍ଲା କାକଟପୁର ଓ ଅସ୍ତରଙ୍ଗ ବ୍ଲକ ଅଂଚଳର ଚାଷୀ। ଓଳଙ୍ଗର, ଓସ୍ତପୁର, ଖଣ୍ଡାସାହି, ବେଗୁନିଆବସ୍ତ, ଝାରିଆ ଗାଁ ହେଉଛି ପନିପରିବାର ଭଣ୍ଡାର। ଏଠାର ବାଇଗଣ, ପୋଟଳ, କଲରା, ଟମାଟୋ,କୋବି କେବଳ ଅସ୍ତରଙ୍ଗ ବଜାର ନୁହେଁ, ପୁରୀ, କଟକ, ଜଗତସିଂହପୁର ଜିଲ୍ଲାକୁ ଯାଇଥାଏ । ଗତବର୍ଷ DAP ଥିଲା ୧୩ଶହ ଟଙ୍କା, ଆଜି ୨ହଜାର । ଗ୍ରୋମର ୧୭ଶହରୁ ୨୮ଶହ, ୟୁରିଆ ୫ଶହରୁ ୮ଶହ, ପଟାସ ୧୫ଶହରୁ ୨୩ଶହ ଟଙ୍କାରେ ପହଞ୍ଚିବା ସହ କୀଟନାଶକ ଦର ମଧ୍ୟ ଆକାଶଛୁଆଁ। ଚଳିତ ବର୍ଷ ବାଇଗଣ ଚାଷ କରି ଭଲ ଲାଭ ଆଶା ରଖିଥିଲେ ଚାଷୀ । କିନ୍ତୁ ସାର ଓ କୀଟନାଶକର ଦାମ ସେମାନଙ୍କ ସ୍ୱପ୍ନ ଭାଙ୍ଗି ଦେଇଛି। ସମବାୟ ଓ ବଜାରରେ ମିଳୁନି ସାର। ସୁଯୋଗ ନେଉଛନ୍ତି କଳାବଜାରୀ । ବାଧ୍ୟ ହୋଇ ଚାଷୀ ଅଧିକ ଟଙ୍କା ଦେଇ କିଣୁଛି। ଓଳଙ୍ଗରରୁ ଝାରିଆ ପର୍ଯ୍ୟନ୍ତ ଶତାଧିକ ପରିବା ଚାଷୀ ଆଜି ଦେବାଳିଆ ଅବସ୍ଥାରେ। ସରକାର ଦରରେ ନିୟନ୍ତ୍ରଣ ରଖିବା ସହ ପର୍ଯ୍ୟାପ୍ତ ସାର ଯୋଗାଇଦେବାକୁ ଦାବି ହୋଇଛି । ସେପଟେ ଲଗାଣ ବର୍ଷା ସହ ରାଜ୍ୟରେ ବନ୍ୟା ପରିସ୍ଥିତି ସମସ୍ୟା ବଢ଼ାଇଛି।