ରାଉରକେଲା: ରାଉରକେଲା ସହରରେ ଚାଞ୍ଚଲ୍ୟ। ଜଣେ ନାବାଳିକାକୁ ୫ ଜଣ ଯୁବକ କାରରେ ଅପହରଣ କରି ନେବାକୁ ଉଦ୍ୟମ କରିଥିବା ଅଭିଯୋଗ ହୋଇଛି। ସେକ୍ଟର ୭ ଥାନା ଛକ ନିକଟରୁ ନାବାଳିକାକୁ କାରରେ ଉଠାଇ ନେଇଥିଲେ ଅପହରଣକାରୀ। ତେବେ ଅପହରଣ କରିବାରେ ବିଫଳ ହେବା ପରେ ନାବାଳିକାକୁ ଘଣ୍ଟାଏ ପରେ ଛାଡି ଦେଇଥିବା ଜଣାପଡିଛି। ସେକ୍ଟର ୭ ଥାନାରେ ଅଭିଯୋଗ ପରେ ପୋଲିସ ପକ୍ଷରୁ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଛି । ୫ ଅଭିଯୁକ୍ତଙ୍କୁ ଗିରଫ ପାଇଁ ପୋଲିସ ପକ୍ଷରୁ ଉଦ୍ୟମ ଜାରି ରହିଛି।
ନନ୍ଦିଘୋଷ ବ୍ୟୁରୋ : ତେଜିଲା ଇସ୍ରାଏଲ ଲେବାନନ୍ ସଂଘର୍ଷ। ଶୁକ୍ରବାର ଲେବାନନ ଉପରେ ଜବରଦସ୍ତ ଆକ୍ରମଣ କରିଛି ଇସ୍ରାଏଲର ସେନା। ରାଜଧାନୀ ବେରୁତରେ ଏକାଧିକ ଟାର୍ଗେଟ ଉପରେ ହୋଇଛି ଏୟାର ଷ୍ଟ୍ରାଇକ। ହେଜବୁଲ୍ଲାର ମୁଖ୍ୟାଳୟକୁ ଟାର୍ଗେଟ କରି ହୋଇଥିଲା ଏହି ଆକ୍ରମଣ। ଏଥିରେ ବେରୁତରେ ଥିବା ୬ଟି କୋଠା ସମ୍ପୂର୍ଣ୍ଣ ଧ୍ଵଂସସ୍ତୁପ ପାଲଟିଛି। ଆକ୍ରମଣରେ ହେଜବୁଲ୍ଲାର କାର୍ଯ୍ୟକାରୀ ପରିଷଦ ପ୍ରମୁଖଙ୍କ ମୃତ୍ଯୁ ହୋଇଛି। ଏଥିରେ ୫୦ରୁ ଅଧିକ ଆହତ ହୋଇଛନ୍ତି। ବର୍ତ୍ତମାନ ଯାଏଁ ଇସ୍ରାଏଲ-ଗାଜା ଯୁଦ୍ଧ ମଧ୍ୟରେ ଏହା ହେଉଛି ସବୁଠାରୁ ଭୟଙ୍କର ଯୁଦ୍ଧ ବୋଲି କୁହାଯାଉଛି।
ସେପଟେ ହେଜବୁଲ୍ଲା ପରେ ଏବେ ୟେମେନରୁ ହୁତି ଆତଙ୍କବାଦୀ ସଂଗଠନ ଇସ୍ରାଏଲ ଉପରେ ଆକ୍ରମଣ କରିଛି। ବାଲିଷ୍ଟିକ ମିସାଇଲ ଆକ୍ରମଣ କରିଥିଲା ହୁତି ଆତଙ୍କୀ। ଆକାଶମାର୍ଗରେ ହିଁ ନଷ୍ଟକଲା ଇସ୍ରାଏଲର ସେନା। ଯୁଦ୍ଧରେ ୩ଟି କ୍ଷେତ୍ରରେ ଶତ୍ରୁଙ୍କ ସହ ମୁକାବିଲା କରୁଛି ଇସ୍ରାଏଲ ଡିଫେନ୍ସ ଫୋର୍ସେସ। ଆକ୍ରମଣ ଏମିତି ଏକ ସମୟରେ ଘଟିଛି ଯେତେବେଳେ ୟେମେନର ହୁତିମାନେ ଗାଜାରେ ଚାଲିଥିବା ସଂଘର୍ଷ ମଧ୍ୟରେ ଆଉ ଏକ ରଣକ୍ଷେତ୍ର ଖୋଲି ଇସ୍ରାଏଲ ଉପରେ ଚାପ ବଢ଼ାଇବାକୁ ଚେଷ୍ଟା କରୁଛନ୍ତି।
ବାଲେଶ୍ୱର: ଅଧା ରହିଗଲା ଜଗା ଦର୍ଶନ । ଜଳେଶ୍ବର ୬୦ ନମ୍ବର ଜାତୀୟ ରାଜପଥ ଏକତାଳି ବାଇପାସ୍ ନିକଟରେ ଦୁର୍ଘଟଣା। ଭାରସାମ୍ୟ ହରାଇ ୨୦ ଫୁଟ ତଳକୁ ଖସି ପଡ଼ିଥିଲା ତୀର୍ଥଯାତ୍ରୀ ବସ୍ । ଦୁର୍ଘଟଣାରେ ୪ ଯାତ୍ରୀଙ୍କର ମୃତ୍ୟୁ ହୋଇଥିବା ବେଳେ, ୧୭ରୁ ଅଧିକ ଗୁରୁତର ଅଛନ୍ତି । ଗୁରୁତରଙ୍କୁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଜଳେଶ୍ଵର ପୋଲିସ, ଅଗ୍ନିଶମ ବାହିନୀ ପକ୍ଷରୁ ଉଦ୍ଧାର କାର୍ଯ୍ୟ କରାଯାଇଥିଲା। ଉତ୍ତରପ୍ରଦେଶରୁ ପୁରୀ ଯାଉଥିଲା କ୍ରୀଷ୍ଣା ତୀର୍ଥଯାତ୍ରୀ ବସ। ବସରେ ୫୭ ଜଣ ଯାତ୍ରୀ ଥିଲେ।
ଭୁବନେଶ୍ବର: ଜିଏସଟି ବଢୁଛି । ଜିଡିପି ବଢୁଛି । ହେଲେ ବଢୁନି ଲୋକଙ୍କ ମୁଣ୍ଡ ପିଛା ଆୟ । ଆଁ କଲାଣି ଧନୀ ଗରିବ ତାରତମ୍ୟ । ୧୪୦ କୋଟି ବିଶିଷ୍ଟ ଜନସଂଖ୍ୟାର ମାତ୍ର ୧ ପ୍ରତିଶତ ଲୋକଙ୍କ ହାତରେ ଠୁଳ ହୋଇ ଚାଲିଛି ସମ୍ପତ୍ତି । ଆମେରିକାର ଗ୍ଲୋବାଲ ଫାଇନାନସିଆଲ ଇଣ୍ଟିଗ୍ରିଟି ଅର୍ଥନୈତିକ ଗବେଷକଙ୍କ ଭାରତ ସମ୍ପର୍କରେ ଏଭଳି ଅନୁଶୀଳନ ଏବେ ସମସ୍ତଙ୍କୁ ଚକିତ କରିଛି ।
ବେରୋଜଗାରୀ, ଦରଦାମ ବୃଦ୍ଧି ବେଡ଼ି ଉପରେ କୋରଡ଼ା ମାଡ଼ ଦେଉଛି । କ୍ରୋନି କ୍ୟାପିଟାଲିଜିମ୍ ଓ କିଛି ମୁଷ୍ଟିମେୟ ବିଲିୟନାରୀଙ୍କ ଯୋଗୁ ଧନୀ ଅଧିକ ଧନୀ ହୋଇଚାଲିଛନ୍ତି । ଏହାର ଅର୍ଥ ୧ କୋଟି ୪୦ ଲକ୍ଷ ଲୋକଙ୍କ ହାତରେ ଦେଶର ୯୦ ପ୍ରତିଶତ ଧନ ଠୁଳ ହେଉଥିବାବେଳେ ବାକି ଲୋକ ମାତ୍ର ୧୦ ପ୍ରତିଶତ ଧନରେ ନିଜର ଗୁଜରାଣ ମେଣ୍ଟାଉଛନ୍ତି । ଆଗରୁ ମଧ୍ଯ ଧନୀ ଓ ଗରିବ ଭିତରେ ବ୍ୟବଧାନ ଥିଲା । କିନ୍ତୁ ୨୦୧୪ ପରଠୁ ସ୍ଥିତି ସଙ୍ଗୀନ ହେବାରେ ଲାଗିଛି । ଏବେର କେନ୍ଦ୍ର ସରକାର ବାସ୍ତବତା ଯାହା ଥିଲେ ବି ଜିଏସ୍ଟି ଓ ଜିଡିପିକୁ ଦେଖାଇ ପ୍ରଚାରରେ ମାତିଛନ୍ତି । ବିରୋଧୀ ଓ ବିଶେଷଜ୍ଞଙ୍କ ଅଭିଯୋଗ ସାଂଘାତିକ ସ୍ଥିତିରେ ପହଞ୍ଚିଲାଣି ଦେଶର ଋଣଭାର ।
ଏବେ ଭାରତର ଗଚ୍ଛିତ ବୈଦେଶିକ ମୁଦ୍ରା ପରିମାଣ ୬୮୯.୪୬ ବିଲିୟନ୍ ଆମେରିକୀୟ ଡଲାର । କିନ୍ତୁ ଯେତିକ ଋଣ ହେଲାଣି ମୋଟ ବୈଦେଶିକ ମୁଦ୍ରାର ୯୫ ପ୍ରତିଶତ । କଂଗ୍ରେସ କହିଛି ଏପରି ଚାଲିଲେ ୨୦୪୭ ବେଳକୁ ବିକଶିତ ନୁହେଁ ବିକ୍ଷିପ୍ତ ଭାରତ ଭାବେ ବିଶ୍ବରେ ପରିଚୟ ପାଇବ ।
ଏବେକାର କେନ୍ଦ୍ର ସରକାର ପୁଞ୍ଜିବାଦ ଉପରେ ବେଶୀ ବିଶ୍ବାସ କରନ୍ତି । ନୋବେଲ ପୁରସ୍କାର ପ୍ରାପ୍ତ ଅମର୍ତ୍ତ୍ୟ ସେନଙ୍କ ମତରେ ଭାରତର ଆର୍ଥିକ ସମାନତା ସେତିକିବେଳ ଆସିବ ଯେତେବେଳେ ସମସ୍ତଙ୍କ ପାଇଁ ଗୁଣାତ୍ମକ ଶିକ୍ଷା ଓ ସ୍ବାସ୍ଥ୍ୟ ବ୍ୟବସ୍ଥା ମାଗଣା ମିଳିବ । ପୂର୍ବତନ ଅର୍ଥମନ୍ତ୍ରୀଙ୍କ ଅଭିଯୋଗ ଏବର କେନ୍ଦ୍ର ସରକାର ଡବଲ୍ ଇଞ୍ଜିନ୍ ନାଁରେ ରାଜ୍ୟ ରାଜ୍ୟ ଭିତରେ ଏକ ପ୍ରକାର ବୈଷମ୍ୟ ଭାବନା ବୁଣିଚାଲିଛନ୍ତି । ଯେଉଁଠି ଡବଲ୍ ଇଞ୍ଜିନ ନାହିଁ ସେଠି ବିକାଶ ନାହିଁ । ସ୍ବାଧୀନ ଭାରତରେ ବୋଧହୁଏ ଆଗରୁ କୌଣସି ସରକାର ଏପରି ଆଇନା ଦେଖାଇ ନଥିଲେ । ଅଭିବୃଦ୍ଧି ସହିତ ଲୋକଙ୍କ ମୁଣ୍ଡପିଛା ଆୟର କୌଣସି ସମ୍ପର୍କ ନାହିଁ । ଯଦି ତା ହୋଇଥାନ୍ତା ଦେଶର ଜିଡିପି ସହିତ ଲୋକଙ୍କ ପାଖରେ ରୋଜଗାର ମିଳୁଥାନ୍ତା । ଦରଦାମ ବି ସମସ୍ତଙ୍କୁ ସୁହାଇଲାଭଳି ହୋଇଥାନ୍ତା । ଜାତୀୟବୋଧ ନେଇ ଲୋକଙ୍କୁ ଏକଜୁଟ କରିବା ଭଲ । କିନ୍ତୁ ଯେତେବେଳେ ପେଟକୁ ଦାନା ନଥିବ ସେତେବେଳେ ସେଦିନ ଦୂର ନୁହେଁ ଭାରତରେ ଶ୍ରୀଲଙ୍କା, ବାଂଲାଦେଶ ଭଳି ସ୍ଥିତି ସୃଷ୍ଟି ହେବ ।
ଭୁବନେଶ୍ବର: ଲଗାଣ ବର୍ଷାରେ ବେହାଲ ଓଡିଶା। ଉପାନ୍ତରୁ ଉପକୂଳ ସବୁଠି ଲାଗି ରହିଛି ବର୍ଷା । ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ବର୍ଷା ଲାଗି ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ପ୍ରବଳ ବର୍ଷା ନେଇ ୫ଟି ଜିଲ୍ଲା ସମ୍ବଲପୁର, ବରଗଡ, ଝାରସୁଗୁଡା, ସୁନ୍ଦରଗଡ ଏବଂ କେନ୍ଦୁଝରକୁ ୟେଲୋ ଆଲର୍ଟ ଜାରି କରାଯାଇଛି।
ଏହି ସବୁ ଜିଲ୍ଲାରେ ୭୦ ରୁ ୧୧୦ ମିଲିମିଟର ପର୍ଯ୍ୟନ୍ତ ବର୍ଷା ହେବା ସହ ଦକ୍ଷିଣ-ପୂର୍ବ ମଧ୍ୟପ୍ରଦେଶ ଏବଂ ଏହାର ଆଖପାଖରେ ଏକ ଘୂର୍ଣ୍ଣିବଳୟ ସକ୍ରିୟ ରହିବ। ୨୯ ଓ ୩୦ ତାରିଖରେ ବର୍ଷାର ପରିମାଣରେ ସାମନ୍ୟ କମିପାରେ। ତେବେ ଆସନ୍ତା ୧ ତାରିଖରୁ ରାଜ୍ୟରେ ପୁଣି ବର୍ଷାର ପରିମାଣ ବଢିବ । ବାଂଲାଦେଶ ତଥା ନିକଟସ୍ଥ ଉତ୍ତର-ପୂର୍ବ ରାଜ୍ୟ ଗୁଡିକ ଉପରେ ଏକ ଘୂର୍ଣ୍ଣିବଳୟ ସୃଷ୍ଟି ହେବାର ସମ୍ଭାବନା ରହିଛି । ଏହାର ପ୍ରଭାବରେ ରାଜ୍ୟରେ ଅକ୍ଟୋବର ୧ ତାରିଖରୁ ୩ ତାରିଖ ପର୍ଯ୍ୟନ୍ତ ଉପକୂଳ ଏବଂ ଦକ୍ଷିଣ ଓଡ଼ିଶାରେ ବର୍ଷା ହେବ ।
ପ୍ରବଳ ବର୍ଷା ନେଇ ୧ ତାରିଖରେ ୧୪ଟି ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ସେପଟେ ପ୍ରବଳ ବର୍ଷା ସମ୍ଭାବନା ଥିବାରୁ ସଂପୃକ୍ତ ଜିଲ୍ଲାର ଜିଲ୍ଲାପାଳଙ୍କୁ ଚିଠି ଲେଖିଛନ୍ତି ଏସ୍ଆରସି । ଆବଶ୍ୟକୀୟ ପଦକ୍ଷେପ ଗ୍ରହଣ କରିବା ସହ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବାକୁ ନିର୍ଦ୍ଦେଶ ଦିଆଯାଇଛି । ଏହାସହ ଜଳବନ୍ଦୀ ସମସ୍ୟା ଉପୁଜିଲେ ଜଳ ନିଷ୍କାସନ କରିବାର ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି ।
ଭୁବନେଶ୍ୱର: ଶଙ୍ଖ ଭବନରେ ରାଜ୍ୟ ସାଙ୍ଗଠନିକ କର୍ମକର୍ତ୍ତା ଓ ଜିଲ୍ଲା ସଭାପତିଙ୍କ ବୈଠକ ଅନୁଷ୍ଠିତ ହୋଇଛି । ବିଜୁ ଜନତା ଦଳର ସୁପ୍ରିମୋ ତଥା ବିରୋଧିଦଳ ନେତା ନବୀନ ପଟ୍ଟନାୟକଙ୍କ ନେତୃତ୍ୱରେ ଏହି ବୈଠକ ବସିଥିଲା । ୩୩ଟି ସାଙ୍ଗଠନିକ ସଭାପତି ମାନଙ୍କ ସହ କୋଡିନେସନ୍ କମିଟିର ଆଲୋଚନା ହୋଇଛି ।
ଆସନ୍ତା ଅକ୍ଟୋବର ୨ତାରିଖ ରୁ ଅକ୍ଟୋବର ୬ ତାରିଖ ପର୍ଯ୍ୟନ୍ତ ଜନସଂପର୍କ ପଦଯାତ୍ରା କରାଯିବ ବିଜେଡି । ଦ୍ବିତୀୟ ପର୍ଯ୍ୟାୟ ଜନସଂପର୍କ ପଦଯାତ୍ରା ଅକ୍ଟୋବର ୨୧ ତାରିଖ ରୁ ୩୦ ତାରିଖ ପର୍ଯ୍ୟନ୍ତ ଚାଲିବ । ୩୦ ଜିଲ୍ଲା ଓ ୩ ଟି ସଙ୍ଗଠନ ଜିଲ୍ଲାର ଅକ୍ଟୋବର ୯ ତାରିଖରୁ ସଭ୍ୟ ସଂଗ୍ରହ ଅଭିଯାନ ମଧ ଆରମ୍ଭ ହେବ । ଜିଲ୍ଲା ନେତୃତ୍ୱ ଓ ନିର୍ବାଚନ ମଣ୍ଡଳୀର ନେତୃତ୍ୱକୁ ନେଇ କାର୍ଯ୍ୟ କରାଯିବ । ବିଭିନ୍ନ ପ୍ରସଙ୍ଗରେ ଆଜି ଆଲୋଚନା ହୋଇଛି। ନବୀନ ପଟ୍ଟନାୟକ ଏକ ଘଣ୍ଟାରୁ ଅଧିକ ସମୟ ଧରି ଆଲୋଚନା କଲେ । ଦଳକୁ ଅଧିକ ମଜବୁତ୍ କିପରି କରାଯିବ ସେନେଇ ଆଲୋଚନା ହୋଇଛି ।
ଭୁବନେଶ୍ୱର: ଦରଦାମ ବୃଦ୍ଧି ଠାରୁ ଆରମ୍ଭ କରି ନାରୀ ସୁରକ୍ଷା, ପୁଞ୍ଜି ବିନିଯୋଗ ଆଦି ବିଭିନ୍ନ କ୍ଷେତ୍ରରେ ଓଡିଶାରେ ବିଜେପି ସରକାର ବିଫଳ ହୋଇଛି । ଏ ସରକାର ଶହେ ଦିନ ପୂରଣ କରିସାରିଲାଣି । କିନ୍ତୁ ସରକାରର ବିଫଳତା ଆଜି ସବୁଆଡେ ନିରାଶା ସୃଷ୍ଟି କରିଛି । ନିତ୍ୟ ବ୍ୟବହାର୍ଯ୍ୟ ପଦାର୍ଥର ଅହେତୁକ ଦରବୃଦ୍ଧି ସାଧାରଣ ଲୋକଙ୍କୁ ଘର ଚଳାଇବା କଷ୍ଟ କରି ଦେଲାଣି । ମହିଳା ମାନେ ନିଜକୁ ସୁରକ୍ଷିତ ମନେ କରୁନାହାନ୍ତି । ନାରୀ ନିର୍ଯାତନା ବଢି ଚାଲିଛି । ଏପରିକି ସରକାରୀ କର୍ମଚାରୀ ମାନେ ମଧ୍ୟ ନିଜକୁ ସୁରକ୍ଷିତ ମନେ କରୁନାହାନ୍ତି । ପୁରୀ ରାଜଭବନରୁ ଆରମ୍ଭ କରି ଭରତପୁର ଥାନା ପର୍ଯ୍ୟନ୍ତ ଏ ସବୁ ଘଟଣା ସରକାରଙ୍କ ବିଫଳତାକୁ ଅଙ୍ଗୁଳି ନିର୍ଦ୍ଦେଶ କରୁଛି । ଓଡିଶାରୁ ପୁଞ୍ଜି ଫେରି ଯାଉଛି । ଶିଳ୍ପପତି ମାନଙ୍କର ଓଡିଶା ସରକାର ଭରସା ନାହିଁ । ଏହିପରି ଅନେକ ବିଫଳତା ଶହେ ଦିନର ସରକାରର କାର୍ଯ୍ୟ ଦକ୍ଷତାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି ବୋଲି ବିଜୁ ଜନତା ଦଳ ସଭାପତି ନବୀନ ପଟ୍ଟନାୟକ କହିଛନ୍ତି ।
ଆଜି ଶଙ୍ଖ ଭବନରେ ଜନସମ୍ପର୍କ ପଦଯାତ୍ରା ଓ ସଭ୍ୟ ସଂଗ୍ରହ ସଂକ୍ରାନ୍ତୀୟ ପ୍ରସ୍ତୁତି ବୈଠକରେ ଉଦ୍ବୋଧନ ଦେଇ ନବୀନ କହିଛନ୍ତି ମିଛ କାହାଣୀ କହି ବିଜେପି ନିର୍ବାଚନରେ ଜିତିଛି । ମିଛ କହି ନିର୍ବାଚନ ଜିତା ଯାଇପାରେ, କିନ୍ତୁ ଲୋକଙ୍କ ହୃଦୟ ନୁହେଁ । ସୁଭଦ୍ରା ଯୋଜନା ହେଉ ବା ମାଗଣା ବିଜୁଳି ବା ଭତ୍ତା ବୃଦ୍ଧି, ବିଜେପିର ମିଥ୍ୟା ପ୍ରତିଶୃତି ଆଜି ସାଧାରଣ ଲୋକଙ୍କୁ ହତଚକିତ କରିଛି ବୋଲି ନବୀନ କହିବା ସହ ବିଜେପି ସରକାରର ବିଫଳତା ଓ ମିଛ ପ୍ରତିଶୃତି ବିଷୟରେ ଲୋକଙ୍କୁ ସଚେତନ କରିବା ପାଇଁ ଆହ୍ୱାନ ଜଣାଇଥିଲେ ।
ନବୀନ କହିଥିଲେ ଯେ ବିଜୁ ଜନତା ଦଳ ଏକ ଦାୟିତ୍ୱପୂର୍ଣ୍ଣ ବିରୋଧୀ ଦଳ ଭାବରେ କାମ କରୁଛି । ଆମ ପାଇଁ ସାଧାରଣ ଲୋକର ସମସ୍ୟାର ସମାଧାନ ଓ ଓଡିଶାର ସ୍ୱାର୍ଥ ସବୁଠାରୁ ଗୁରୁତ୍ୱପୂର୍ଣ୍ଣ । ଗତ ଚବିଶ ବର୍ଷ ଭିତରେ ବିଜେଡି ସରକାରର ସଫଳତା ବିଷୟରେ ଉଲ୍ଲେଖ କରି ନବୀନ କହିଥିଲେ ୨୦୦୦ ରୁ ୨୦୨୪ ମସିହା ମଧ୍ୟରେ ଓଡିଶାର ମୁଣ୍ଡପିଛା ରୋଜଗାର ସର୍ବାଧିକ ବୃଦ୍ଧି ଘଟିଛି ଯାହାକି ମଧ୍ୟ ପ୍ରଦେଶ, ଉତ୍ତର ପ୍ରଦେଶ, ଆସାମ ଆଦି ବିଜେପି ଶାସିତ ଡବଲ ଇଞ୍ଜିନ ରାଜ୍ୟମାନଙ୍କ ଠାରୁ ଅଧିକ । ସେହିପରି ମୁଣ୍ଡପିଛା ଋଣ ପରିମାଣ ମଧ୍ୟ ଡବଲ ଇଞ୍ଜିନ ରାଜ୍ୟମାନଙ୍କ ଠାରୁ କମ୍ ରହିଛି ।
ଜନ ସମ୍ପର୍କ ପଦଯାତ୍ରା ସମ୍ପର୍କରେ ସୂଚନା ଦେଇ ନବୀନ କହିଥିଲେ ଯେ ପ୍ରତିବର୍ଷ ପରି ବିଜେଡିର ଜନ ସମ୍ପର୍କ ପଦଯାତ୍ରା ଗାନ୍ଧୀ ଜୟନ୍ତୀରୁ ଆରମ୍ଭ ହେବ । ଅକ୍ଟୋବର ୬ ରେ ପ୍ରଥମ ପର୍ଯ୍ୟାୟ କାର୍ଯ୍ୟକ୍ରମ ଶେଷ ହେବ । ପୂଜା ପରେ ଅକ୍ଟୋବର ୨୧ ରୁ ଅକ୍ଟୋବର ୩୦ ପର୍ଯ୍ୟନ୍ତ ଦ୍ୱିତୀୟ ପର୍ଯ୍ୟାୟ ପଦଯାତ୍ରା ଜାରି ରହିବ । ସେହିପରି ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଜୟନ୍ତୀ ଅକ୍ଟୋବର ୯ ତାରିଖରୁ ଡିସେମ୍ବର ୯ ତାରିଖ ଦୁଇ ମାସ ପର୍ଯ୍ୟନ୍ତ ସଭ୍ୟ ସଂଗ୍ରହ ଅଭିଯାନ ଜାରୀ ରହିବ ବୋଲି ଘୋଷଣା କରିଥିଲେ ।
ସୋସିଆଲ ମିଡିଆକୁ ଅଧିକ ସକ୍ରିୟ କରିବା ସହିତ ପଦଯାତ୍ରା ଓ ସଭ୍ୟ ସଂଗ୍ରହ ଅଭିଯାନର ବିପୁଳ ସଫଳତା ଦିଗରେ ନିଷ୍ଠାପର ଭାବରେ କାର୍ଯ୍ୟ କରିବା ପାଇଁ ନବୀନ ଦଳୀୟ ନେତୃବୃନ୍ଦ ଓ ପଦାଧିକାରୀ ମାନଙ୍କୁ ପରାମର୍ଶ ଦେଇଥିଲେ ।
ସୁନ୍ଦରଗଡ: ପୋଷା ଶୁଆର ମୃତ୍ୟୁ ପରେ ତାର ଶେଷକୃତ୍ୟ କରିବା ସହ ଅସ୍ଥି ବିସର୍ଜନ କରି ଦ୍ୱାଦଶାହଃ ପିଣ୍ଡଦାନ ଓ ଗଙ୍ଗାଭୋଜି ହୋଇଛି । ଏଭଳି କହି ମଣିଷ ଓ ପକ୍ଷୀମଧ୍ୟରେ ଥିବା ଅନାବିଳ ସମ୍ପର୍କକୁ ସମ୍ମାନ ଦେଇଛନ୍ତି ସୁନ୍ଦରଗଡ ମହାଦେବପଡାର ବିଶ୍ୱଜିତ । ବ୍ରାହ୍ମଣ ମନ୍ତ୍ର ପାଠ କରି ଅମର ଆତ୍ମାର ମଙ୍ଗଳ କାମନା କରିବା ସହ ମୋକ୍ଷ ପ୍ରାପ୍ତି ପାଇଁ ହୋମ କରୁଛନ୍ତି ।
ଏହି ପୂଜା ବିଧି କୌଣସି ମଣିଷ ଆତ୍ମାର ମୋକ୍ଷ ପ୍ରାପ୍ତି ପାଇଁ ନୁହେଁ ବରଂ ଏକ ଶୁଆ ର ଆତ୍ମା ମୋକ୍ଷ ପ୍ରାପ୍ତି ପାଇଁ ଚାଲିଛି ପୂଜା । ସମ୍ପୂର୍ଣ୍ଣ ରିତିନୀତି ଅନୁସାରେ ପୂଜା ସରିଲା ପରେ ବ୍ରାହ୍ଣଣ ଭୋଜନ ଏବଂ ତାପରେ ଗଙ୍ଗା ଭୋଜି ଦେଇ ନିଜର କର୍ତବ୍ୟ ସମ୍ପନ୍ନ କରିଛନ୍ତି ବିଶ୍ୱଜିତ ।
୨୮ବର୍ଷ ତଳେ ଦିନେ ହଠାତ ଏହି ଶୁଆ ଉଡିଆସି ବଶ୍ୱଜିତିଙ୍କ ଘରକୁ ଆସିଥିଲା । ସେହିଦିନରୁ ପରିବାର ସଦସ୍ୟ ଭାବରେ ରହିଥିଲା ଶୁଆଟି । ୨୮ବର୍ଷର ଲମ୍ବା ସମୟ ଧରି ଶୁଆଟି ଏକ ପକ୍ଷୀ ଭାବରେ ନୁହେଁ ବରଂ ଘରର ଏକ ସଦସ୍ୟ ଭାବରେ ରହି ଆସିଥିଲା । ଶୁଆର ନା ଦେଇଥିଲେ କୁନୁ ।
କୁନୁ ଘରର ସୁଖ ଦୁଃଖରେ ସାମିଲ ହେବା ସହ ସମସ୍ତଙ୍କୁ ନିଜର କରିନେଇଥିଲା । ଶୁଆର ମୃତ୍ୟୁ ପରେ ସମସ୍ତେ ମର୍ମାହତ ହୋଇପଡିଥିଲେ । ଶେଷକୃତ୍ୟ ସଂପନ୍ନ କରିବା ପରେ ରିତିନୀତି ଅନୁସାରେ ସମସ୍ତ କ୍ରିୟାକର୍ମ କରିଥିଲେ ପରିବାର ଲୋକ ।
ଭୁବନେଶ୍ବର: ଗୁଜୁରାଟରୁ ଆସୁଥିଲେ, ଓଡ଼ିଶାରେ ଲୁଟୁଥିଲେ । ଓଡ଼ିଆ ପିଲାଙ୍କ ସହାୟତାରେ ଓଡିଶା ପୋଲିସର ଛାତିରେ ଛନକା ପୂରାଇ ଦେଇଥିବା ଲୁଟେରା ଗ୍ୟାଙ୍ଗକୁ କାବୁ କରିଛି ସ୍ପେଶାଲ ସ୍କ୍ୱାଡ । ମର୍ଣ୍ଣିଂ ୱାକ ଓ ମନ୍ଦିର ଯାଉଥିବା ମହିଳାଙ୍କୁ ଏମାନେ ଟାର୍ଗେଟ କରୁଥିଲେ ।
ଚାରି ଅଭିଯୁକ୍ତଙ୍କ ମଧ୍ୟରୁ ଜଣେ ନାବାଳକ ଥିବା ବେଳେ ଅନ୍ୟ ୩ ଜଣ ହେଉଛନ୍ତି ଅମିତ ଶାଡାଙ୍କେ , ସୁବାସ ପ୍ରଧାନ ଓ ଜିତୁ ପ୍ରଧାନ । ସେମାନଙ୍କଠାରୁ ୮୦ ଗ୍ରାମ ଓଜନର ୮ ଟି ସୁନା ଚେନ, ୫ଟି ଇମିଟେସନ ଚେନ , ଦୁଇଟି ପଲସର ବାଇକ , ୨ଟି ମୋବାଇଲ ଓ ଏକ ଧାରୁଆ ଛୁରୀ ଜବତ କରିଛି ସ୍ପେଶାଲ ସ୍କ୍ୱାଡ଼ । ବଡ଼ଗଡ଼, ଲକ୍ଷ୍ମୀସାଗର, ତମାଣ୍ଡୋ ଅଞ୍ଚଳରେ ଏମାନେ ଚେନ ଝାମ୍ପିବାର ସିସିଟିଭି ଫୁଟେଜ ପୋଲିସ ହାତରେ ଲାଗିଛି ।
ଅଭିଯୁକ୍ତଙ୍କ ନାଁରେ ଗୁଜରାଟର ସୁରଟ ବ୍ୟତୀତ ଭୁବନେଶ୍ୱର କଟକରେ ୯ଟି ମାମଲା ରହିଛି । ଲୁଟ ସୁନାକୁ ବନ୍ଧା ପକାଇ ସେହି ଟଙ୍କାରେ ବ୍ରାଣ୍ଡେଡ୍ କପଡା, ଜୋତା ପିନ୍ଧିବା ସହ ମଦ ପିଇ ଲୁଟେରା ଅୟସ କରୁଥିବା କହିଛନ୍ତି କମିଶନର ।
ସମ୍ବଲପୁର: ରିପୋର୍ଟର କେବଳ ରିପୋର୍ଟିଂ କରନ୍ତି ନାହିଁ, ଆବଶ୍ୟକସ୍ଥଳେ ଜୀବନ ବଞ୍ଚାଇବାକୁଭି ପ୍ରସ୍ତୁତ ହୋଇ ରହିଥାନ୍ତି । ଆମ ସମ୍ବଲପୁର ପ୍ରତିନିଧି ସମୀର ଷଢଙ୍ଗୀ ନ୍ୟୁଜ୍ କଭରେଜ କରୁଥିବା ବେଳେ ହଠାତ୍ କ୍ୟାମେରାମ୍ୟାନ ଦେବରାଜ ବେହେରାଙ୍କୁ ହୃଦଘାତ ହୋଇଥିଲା।
ଦେବରାଜ ବେହୋସ ହୋଇ ତଳେ ପଡିଗଲେ। ସାଙ୍ଗେସାଙ୍ଗେ ଆମ ରିପୋର୍ଟର ସମୀର, ଦେବରାଜଙ୍କୁ ଏକ ସମତଳ ସ୍ଥାନରେ ଶୁଆଇ ଦେଇ ସିପିଆର ଦେବା ଆରମ୍ଭ କରିଦେଇଥିଲେ। ପ୍ରାୟ ୧୦ ମିନିଟରୁ ଅଧିକ ସମୟ ସିପିଆର ଦେବା ପରେ ଦେବରାଜଙ୍କ ଚେତା ଫେରିଥିଲା ଏବଂ ସେ ସୁସ୍ଥ ଅନୁଭବ କରିଥିଲେ।
ରିପୋର୍ଟରଙ୍କ ଉପସ୍ଥିତ ବୁଦ୍ଧି ଯୋଗୁଁ କ୍ଯାମେରା ମ୍ୟାନଙ୍କ ଜୀବନକୁ ତୁରନ୍ତ ଜରୁରୀ ସହାୟତା ମିଳିଥିଲା। ଏହି ଘଟଣା ଉପସ୍ଥିତ ଥିବା ସମସ୍ତଙ୍କୁ ଆଶ୍ଵସ୍ତି ପ୍ରଦାନ କରିଥିଲା।
