ନନ୍ଦିଘୋଷ ବ୍ୟୁରୋ : ଜମ୍ମୁ ଓ କାଶ୍ମୀର ବିଧାନସଭା ତୃତୀୟ ପର୍ଯ୍ୟାୟ ନିର୍ବାଚନ ଲାଗି ପ୍ରଚାର ଶେଷ। ଶେଷ ଦିନରେ ପ୍ରାଣମୂର୍ଚ୍ଛା ପ୍ରଚାର କରିଛନ୍ତି ବିଭିନ୍ନ ଦଳର ନେତା। ତୃତୀୟ ପର୍ଯ୍ୟାୟ ଲାଗି ପ୍ରଚାର ଶେଷ ହୋଇଛି। ତୃତୀୟ ପର୍ଯ୍ୟାୟ ଲାଗି ଆସନ୍ତା ଅକ୍ଟୋବର ୧ରେ ୪୦ଟି ବିଧାନସଭା ଆସନରେ ଭୋଟ ହେବ। ଜମ୍ମୁ ଓ କାଶ୍ମୀରର ବିଭିନ୍ନ ସ୍ଥାନରେ ପ୍ରଚାର କରିଛନ୍ତି କଂଗ୍ରେସ ସଭାପତି ମଲ୍ଲିକାର୍ଜ୍ଜୁନ ଖଡଗେ ଓ କଂଗ୍ରେସ ନେତା ତଥା ରାଜସ୍ଥାନର ପୂର୍ବତନ ଉପମୁଖ୍ଯମନ୍ତ୍ରୀ ସଚିନ ପାଇଲଟ। କଂଗ୍ରେସ ଓ ନ୍ଯାସନାଲ କନଫରେନ୍ସର ମିଳିତ ପ୍ରାର୍ଥୀଙ୍କୁ ଭୋଟ ଦେବାକୁ ସେମାନେ କରିଛନ୍ତି ନିବେଦନ। କାଠୁଆରେ ଖଡଗେ ପ୍ରଚାର କରିଥିବାବେଳେ ଉଦ୍ଧମପୁର ୱେଷ୍ଟ, ବଣି ଓ ନାଗରୋଟାରେ ପ୍ରଚାର କରିଛନ୍ତି ସଚିନ। ଜମ୍ମୁ ଓ କାଶ୍ମୀରବାସୀଙ୍କ ଲାଗି ୭ ଗ୍ଯାରେଣ୍ଟି ପୂରଣ କରାଯିବ। ପ୍ରତି କୃଷକ, ମହିଳାଙ୍କୁ ମାସିକ ୩ ହଜାର ଟଙ୍କା ସହାୟତା ଦିଆଯିବ। ବେକାରଙ୍କୁ ମାସିକ ୩ ହଜାର ୫ ଶହ ଟଙ୍କା ଭତ୍ତା ଦିଆଯିବ। ପ୍ରତି ଶସ୍ଯ ଲାଗି ବୀମା ଦିଆଯିବ। ମାସକ ମଧ୍ଯରେ ୧ ଲକ୍ଷ ଖାଲି ପଦବୀ ପୂରଣ କରାଯିବ। ଜମ୍ମୁ ଓ କାଶ୍ମୀରକୁ ରାଜ୍ଯମାନ୍ଯତା ଦେବା ଲାଗି କଂଗ୍ରେସ ଲଢିବ ବୋଲି କହିଛନ୍ତି ଖଡଗେ।
ଅକ୍ଟୋବର ୨ରୁ ବିଜେଡିର ଜନସମ୍ପର୍କ ପଦଯାତ୍ରା ଅଭିଯାନ
ଭୁବନେଶ୍ବର : ବିଜେଡିର ଆରମ୍ଭ ହେବ ଜନ ସଂପର୍କ ପଦଯାତ୍ରା ଅଭିଯାନ । ଗାନ୍ଧୀ ଜୟନ୍ତୀ ଠାରୁ ଆରମ୍ଭ ହେବ ବୋଲି ଦଳ ସୁପ୍ରିମୋ ନବୀନ ପଟ୍ଟନାୟକ ପୂର୍ବରୁ ଘୋଷଣା କରିଥିଲେ । ଏହି ବିଷୟରେ ଦଳ ପକ୍ଷରୁ ନୂତନ ଭାବେ ତିଆରି ହୋଇଥିବା କମିଟି , ରାଜ୍ୟର ସମସ୍ତ କାର୍ଯ୍ୟକର୍ତ୍ତା, ବିଧାୟିକା/ବିଧାୟକ ପ୍ରାର୍ଥୀ, ବ୍ଲକ ଓ ନଗର କର୍ମକର୍ତ୍ତାଙ୍କ ସହିତ ନିର୍ବାଚନ ମଣ୍ଡଳୀର ନେତାଙ୍କୁ ଜନ ସଂପର୍କ ପଦଯାତ୍ରା ସମ୍ପର୍କରେ ସୂଚିତ କରାଯାଇଛି ବୋଲି ଏକ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ଦଳର ବରିଷ୍ଠ ନେତା ଦେବୀ ପ୍ରସାଦ ମିଶ୍ର। ଦୁଇଟି ପର୍ଯ୍ୟୟରେ ଜନ ସଂପର୍କ ପଦଯାତ୍ରା ହେବା ପାଇଁ ନିଷ୍ପତି ନେଇଛି ବିଜେଡି । ଦୁଇଟି ପର୍ଯ୍ୟାୟରେ ହେବାକୁ ଥିବା ଏହି ପଦଯାତ୍ରାର ପ୍ରଥମ ପର୍ଯ୍ୟାୟ ଅକ୍ଟୋବର ଦୁଇ ତାରିଖରୁଆରମ୍ଭ ହୋଇ ଅକ୍ଟୋବର ୬ତାରିଖ ପର୍ଯ୍ୟନ୍ତ ଚାଲିବ । ପୁଣି ଅକ୍ଟୋବର ୨୧ ରୁ ୩୦ ତାରିଖ ପର୍ଯ୍ୟନ୍ତ ଦ୍ବିତୀୟ ପର୍ଯ୍ୟାୟ ଜନସମ୍ପର୍କ ପଦଯାତ୍ରା ଅଭିଯାନ କରାଯିବ ବୋଲି ନିଷ୍ପତି ନେଇଛନ୍ତି ଦଳ ସୁପ୍ରିମୋ ନବୀନ ପଟ୍ଟନାୟକ। ପୁଣ୍ୟାତ୍ମା ଗୋପବନ୍ଧୁଙ୍କ ପବିତ୍ର ତିଥିରେ ବି ବିଜୁ ଜନତା ଦଳର ସଦସ୍ୟତା ଅଭିଯାନକୁ ମଧ୍ୟ ବ୍ୟାପକ କରାଯିବ। ଅକ୍ଟୋବର ୯ରୁ ଆରମ୍ଭ କରିବାକୁ ନିଷ୍ପତି ନେଇଛି ଦଳ। ସେପଟେ ସଦସ୍ୟତା ଅଭିଯାନକୁ ରାଜ୍ୟର ବିଭିନ୍ନ ଜିଲ୍ଲା ଗୁଡିକରେ ଓ କ୍ଷେତ୍ରୀୟ ସ୍ଥରରେ ବି ବ୍ୟାପକ କରାଯିବ ବୋଲି ସୂଚନା ଦେଲେ ବିଜୁ ଜନତା ଦଳର ସମନୟ କମିଟିର ଅଧ୍ୟକ୍ଷ ଦେବୀ ପ୍ରସାଦ ମିଶ୍ର ।
ମୋଦୀଙ୍କୁ ହରାଇବା ଯାଏଁ ମୁଁ ବଞ୍ଚିବି : ମଲ୍ଲିକାର୍ଜୁନ ଖଡଗେ
କଠୁଆ : ଭାଷଣ ଦେବା ସମୟରେ ବେହୋସ ହେଲେ କଂଗ୍ରେସ ରାଷ୍ଟ୍ରୀୟ ସଭାପତି ମଲ୍ଲିକାର୍ଜୁନ ଖଡଗେ । ଜସରୋଟା ବିଧାନସଭା ମଣ୍ଡଳୀର ବର୍ଣ୍ଣୋଟିରେ ଏକ ଜନସଭାକୁ ସମ୍ବୋଧିତ କରିବା ସମୟରେ ସେ ବେହୋସ ହୋଇଗଲେ । ମଞ୍ଚରେ ପଡିଯିବା ପରେ କିଛି ସମୟ ପାଇଁ ଭାଷଣକୁ ବନ୍ଦ କରିବାକୁ ପଡିଲା । କିଛି ସମୟ ପରେ ସେ ଉଠିକି ବସି ପୁଣି ଭାଷଣ ଦେଇଥିଲେ କିନ୍ତୁ ମଝିରେ ପୁଣି ଅଟକି ଯାଇଥିଲେ । ଏହା ପରେ ପୁଣି ଛିଡା ହୋଇ ଦୁଇ ମିଟନ ଭାଷଣ ଦେଇଥିଲେ । ସଭାରୁ ମଞ୍ଚରୁ ଯିବା ସମୟରେ ସେ ସମସ୍ତଙ୍କୁ ସମ୍ବୋଧିତ କହିଥିଲେ, ସେ ୮୩ ବର୍ଷର ଅଟନ୍ତି । ଏବେ ସେ ମୃତ୍ୟୁ ବରଣ କରିବେ ନାହିଁ । ମୋଦିଙ୍କୁ କ୍ଷମତାରୁ ହଟାଇବା ଯାଏଁ ସେ ବଞ୍ଚି ରହିବେ ।
ମଲ୍ଲିକାର୍ଜୁନ ଖଡଗେ ଏହା କହିଛନ୍ତି ଯେ ଏହି ଲୋକମାନେ (କେନ୍ଦ୍ର ସରକାର) କେବେ ନିର୍ବାଚନ କରିବାକୁ ଚାହୁଁନାହାଁନ୍ତି। ଯଦି ସେମାନେ ଚାହାଁନ୍ତି, ସେମାନେ ବର୍ଷେ କିମ୍ବା ଦୁଇ ବର୍ଷ ମଧ୍ୟରେ ନିର୍ବାଚନ କରିଥାନ୍ତେ । ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ସେ ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ କରିଥିଲେ । ସେମାନେ ଉପରାଜ୍ୟପାଳଙ୍କ ମାଧ୍ୟମରେ ଏକ ରିମୋର୍ଟ କଣ୍ଟ୍ରୋଲର ସରକାର ଚଳାଇବାକୁ ଚାହୁଁଥିଲେ ।
ପ୍ରଧାନମନ୍ତ୍ରୀ ମୋଦୀ ଗତ ୧୦ ବର୍ଷ ମଧ୍ୟରେ ଭାରତର ଯୁବକମାନଙ୍କୁ କିଛି ଦେଇ ନାହାଁନ୍ତି । ଆପଣ କ‘ଣ ଏପରି ଜଣେ ବ୍ୟକ୍ତିଙ୍କୁ ବିଶ୍ବାସ କରିବେ, ଯିଏ ୧୦ ବର୍ଷ ମଧ୍ୟରେ ଆପଣଙ୍କର ସମୃଦ୍ଧତା ଫେରାଇ ଆଣି ପାରିବେ ନାହିଁ? ଯଦି କୌଣସି ବିଜେପି ନେତା ଆପଣଙ୍କ ସାମ୍ନାକୁ ଆସନ୍ତି, ତେବେ ତାଙ୍କୁ ପଚାରନ୍ତୁ ଯେ ସେ ସମୃଦ୍ଧତା ଆଣିଛନ୍ତି କି ନାହିଁ ?
ଜମି ବିକିବାକୁ କହି ଠକିନେଲେ ଲକ୍ଷଲକ୍ଷ ଟଙ୍କା !
ପାଟକୁରା : ଜମି ବିକିବାକୁ କହି ଟଙ୍କା ନେଲେ। ହେଲେ ଏବେ ଧରା ଦେଉନାହାନ୍ତି ଜମି ମାଫିଆ। କେନ୍ଦ୍ରାପଡା ଡେରାବିଶ ଅଞ୍ଚଳରୁ ଆସିଛି ଏଭଳି ଅଭିଯୋଗ। ଜମି ବିକ୍ରି କରିବାକୁ କହି ଗୋଟିଏ ପରିବାରଠାରୁ ଲୁଟି ନେଇଛନ୍ତି ସାଢେ ୫ ଲକ୍ଷ ଟଙ୍କା। ଡେରାବିଶ ଥାନା ବଡ଼ଫୁଗଳ ଗାଁର ବାସନ୍ତୀ ଶତପଥି ଏହି ଠକାମିର ଶିକାର ହୋଇଛନ୍ତି। ଡେରାବିଶ ଚଷାଖଣ୍ଡ ଅଞ୍ଚଳର ଅଜୟ ସିଂ ନାମକ ବ୍ୟକ୍ତିଙ୍କଠାରୁ ୩ ଗୁଣ୍ଠ ଜମି କିଣିବା ପାଇଁ ସାଢେ ୫ ଲକ୍ଷ ଟଙ୍କା ଦେଇଥିଲେ। ହେଲେ ଅଜୟ ସିଂ ଟଙ୍କା ନେବା ପରେ ସେହି ୩ ଗୁଣ୍ଠ ଜମିକୁ ରେଜିଷ୍ଟ୍ରି ନକରି ଫେରାର ହୋଇଯାଇଥିଲେ। ଏହାକୁ ନେଇ ଅଜୟ ସିଂଙ୍କ ପରିବାର ଲୋକଙ୍କୁ କହିବାରୁ ପୁଅକୁ ସମର୍ଥନ କରି ବାସନ୍ତୀଙ୍କ ପରିବାର ଲୋକଙ୍କୁ ମାଡ଼ ମାରିଥିଲେ। ଏନେଇ ବାସନ୍ତୀ ଶତପଥି ଓ ସ୍ୱାମୀ ବିଚିତ୍ର ଶତପଥି ଡେରାବିଶ ଥାନାରେ ଅଭିଯୋଗ କରିଛନ୍ତି।ଠକେଇକୁ ନେଇ ସେ ମୁଖ୍ୟମନ୍ତ୍ରୀ ଓ ପୋଲିସ ଡିଜିଙ୍କ ଦ୍ଵାରସ୍ଥ ମଧ୍ୟ ହୋଇଥିଲେ। ମାମଲାକୁ ନେଇ କେନ୍ଦ୍ରାପଡ଼ା କୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ଜମି ଦଲାଲ ଓ ଜମି ମାଫିଆଙ୍କ ବଶବର୍ତ୍ତୀ ହୋଇ ବାସନ୍ତିଙ୍କ ପରିବାର ସର୍ବସ୍ୱ ହରାଇଥିବା କହିଛନ୍ତି।
ମହିଳାଙ୍କ ଉପରେ ଚଢିଗଲା କାର
ବ୍ରହ୍ମପୁର : ବ୍ରହ୍ମପୁର ବିଜିପୁର ଛକରେ ଦୁର୍ଘଟଣା । ମହିଳାଙ୍କ ଉପରେ ଚଢିଗଲା କାର । ଛକରେ ବସି ନଡ଼ିଆ ବିକ୍ରି କରୁଥିବା ସମୟରେ ଏକ କାର ମହିଳାଙ୍କ ଉପରେ କାର ଚଢ଼ି ଯାଇଥିଲା। ଘଟଣାସ୍ଥଳରେ ହିଁ ନଡ଼ିଆ ବିକ୍ରି କରୁଥିବା ମହିଳାଙ୍କ ମୃତ୍ୟୁ ହୋଇଛି । ମୃତ ମହିଳା ରଣ୍ଢା ଅଞ୍ଚଳର ହୋଇଥିବା ସୂଚନା ରହିଛି । ଦୁର୍ଘଟଣା ଘଟାଇବା ପରେ କାର ଡ଼୍ରାଇଭର ଗୋଷାଣୀ ନୂଆଗାଁ ଥାନାରେ ଆତ୍ମସମର୍ପଣ କରିଛି । ଗୋଷାଣୀ ନୂଆଗାଁ ଥାନା ପୋଲିସର ଘଟଣାର ତଦନ୍ତ କରୁଛି ।
ବିହାରରେ ବନ୍ୟା, ହାଇଆଲର୍ଟରେ ୧୩ ଜିଲ୍ଲା
ପାଟନା : ନେପାଳରେ ବର୍ଷା ପରେ ବିହାରରେ ବନ୍ୟା ସ୍ଥିତି। କୋସୀ ନଦୀରେ ଜଳସ୍ତର ବୃଦ୍ଧିରୁ ହାଇଆଲର୍ଟରେ ୧୩ ଜିଲ୍ଲା । ଅରରିଆ ଜିଲ୍ଲା ସବୁଠାରୁ ଅଧିକ ପ୍ରଭାବିତ ହୋଇଛି । ଅନେକ ଘର ବୁଡି ଯାଇଥିବା ଖବର ମିଳିଛି । ୧୦ରୁ ଅଧିକ ପଞ୍ଚାୟତରେ ପାଣି ପଶିଯାଇଛି। ତଳିଆ ଅଂଚଳରେ ପାଣି ପଶିଥିବାରୁ ଆଲର୍ଟରେ ବିହାର ସରକାର । ଉଦ୍ଧାରକାରୀ ଟିମକୁ ସତର୍କ କରିଛନ୍ତି ସରକାର। ୧୯୬୮ ପରେ କୋସୀ ବ୍ଯାରେଜରୁ ସବୁଠାରୁ ଅଧିକ ପାଣି ଛଡାଯାଇଛି। ନଦୀର ଜଳସ୍ତର ବଢିବା ଆଂଶକାରେ ୧୩ ଜିଲ୍ଲାରେ ହାଇଆଲର୍ଟ ଜାରି କରିଛନ୍ତି ବିହାର ସରକାର। ତଳିଆ ଅଂଚଳରେ ପାଣି ଭରି ଯାଇଛି। ଶିବହର ଜିଲ୍ଲାର ବାଗମତି ନଦୀ ବିପଦ ସଙ୍କେତର ଦୁଇ ମିଟର ଉପରେ ପ୍ରବାହିତ ହେଉଛି। ଆଗକୁ ବିହାର ଅନେକ ଜିଲ୍ଲାରେ ପ୍ରବଳ ବର୍ଷା ନେଇ ପାଣିପାଗ ପୂର୍ବାନୁମାନ କରିଥିବାରୁ ବନ୍ୟା ସ୍ଥିତି ଆହୁରି ବିଗିଡିପାରେ। ବେଲବା ଅଂଚଳରେ ବାଗମତି ନଦୀର ଅନେକ ତଟବନ୍ଧ କ୍ଷତିଗ୍ରସ୍ତ ହୋଇଛି। ଅରରିଆ ଜିଲ୍ଲାରେ ପରମାନ ନଦୀର ଜଳସ୍ତର ବଢିବାରେ ଲାଗିଛି। ବର୍ଷାର ଶହ ଶହ ଏକ ଜମିରେ ପାଣି ଭରିଯାଇଛି। ଜୋବନୀ ଷ୍ଟେସନରେ ମଧ୍ୟ ପାଣି ପଶିଯାଇଛି। ଅରରିଆ ଜିଲ୍ଲାରେ ବନ୍ୟାସ୍ଥିତି ଦେଖାଦେଇଛି। ମଧୁବନୀରେ କମଳା ନଦୀ ବିପଦ ସଙ୍କେତ ଉପରେ ଚାଲୁଛି।
ରାଉରକେଲା ଗଣ ଦୁଷ୍କର୍ମ ମାମଲା, ୬ ଅଭିଯୁକ୍ତ କୋର୍ଟରେ ହାଜର
ରାଉରକେଲା: ରାଉରକେଲା ଗଣ ଦୁଷ୍କର୍ମ ମାମଲାରେ ୬ ଜଣ ଅଭିଯୁକ୍ତଙ୍କୁ କୋର୍ଟରେ ହାଜର କଲା ରଘୁନାଥପାଲି ପୋଲିସ । ସୁନ୍ଦରଗଡ଼ ସ୍ବତନ୍ତ୍ର ପକ୍ସୋ କୋର୍ଟରେ ହାଜର ପରେ ଜାମିନ ନାମଞ୍ଜୁର ହେବାରୁ ସମସ୍ତ ଅଭିଯୁକ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ଏହି ଗଣ ଦୁଷ୍କର୍ମ ଘଟଣାରେ ପୋଲିସ ୬ ଜଣ ଅଭିଯୁକ୍ତଙ୍କୁ ଗିରଫ କରିବାକୁ ସଫଳ ହୋଇଥିବା ବେଳେ ଜଣେ ଏବେ ବି ଫେରାର ଅଛି ।
ଗତ ୨୨ ତାରିଖ ରାତି ପ୍ରାୟ ୧୧ଟା ବେଳେ ଦୁଇ ପୁରୁଷ ବନ୍ଧୁଙ୍କ ସହ ସିଭିଲ ଟାଉନସିପରେ ଥିବା ହୋଟେଲ ହୃଦଙ୍ଗକୁ ଯାଇଥିଲେ ନାବାଳିକା । ସେଠାରେ ନାବାଳିକାଙ୍କୁ ଜୋରଜବରଦସ୍ତି ମଦ୍ୟ ପାନ କରାଇ ସେଠାରୁ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଥିଲା ।
ରଘୁନାଥପାଲି ଥାନାରେ ଅଭିଯୋଗ ହେବାପରେ ହୋଟେଲ ହୃଦଙ୍ଗକୁ ପୋଲିସ ସହ ଅବକାରୀ ବିଭାଗ ମିଳିତ ଭାବରେ ଚଢାଉ କରି ସିଲ କରିଥିଲେ । ଗିରଫ ୬ ଜଣ ହେଲେ ଏମଡି ସୋହେଲ କୁରେସି ଓରଫ ବାଦସାହା, ଏମଡି ଜାରାଏତ, ବିନୋଦ କୁମାର ରାମ, ଦୀପକ ସୋନକର, ମହମ୍ମଦ ଦାନିସ, ଆଫତାବ ଖାଁ । ସମସ୍ତଙ୍କୁ ଗିରଫ କରି କୋର୍ଟରେ ହାଜର କରିଛି ପୋଲିସ ।
ତଥ୍ୟ ନଦେବାରୁ ହ୍ବାଟ୍ସଆପ ବିରୋଧରେ ଏତଲା ଦେଲା ଗୁରୁଗ୍ରାମ ପୋଲିସ
ଗୁରୁଗ୍ରାମ: ହ୍ବାଟ୍ସଆପ୍ ବିରୋଧରେ ଗୁରୁଗ୍ରାମ ପୋଲିସର ଏତଲା ଦାୟର । ମାମଲାର ସୂଚନା ନ ଦେବାରୁ ହ୍ବାଟ୍ସଆପ୍ ବିରୋଧରେ ଏହି ପଦକ୍ଷେପ ନେଇଛି ପୋଲିସ । ସରକାରୀ କର୍ମଚାରୀଙ୍କ ଆଦେଶ ନ ମାନିବା, ଅଭିଯୁକ୍ତକୁ ସୁରକ୍ଷା ଦେବା, ପ୍ରମାଣ ନଷ୍ଟ କରିବା ଭଳି ଦଫା ଲାଗିଛି ହ୍ଵାଟ୍ସଆପ୍ ନିର୍ଦ୍ଦେଶକ ଓ ଏହାର ନୋଡାଲ ଅଫିସରଙ୍କ ବିରୋଧରେ ।
ମେ’ ୧୭ ତାରିଖରେ ଗୁରୁଗ୍ରାମର ସାଇବର ଥାନାରେ ଏକ ଠକେଇ ଓ ଅପରାଧ ଷଡ଼ଯନ୍ତ୍ର ମାମଲା ରୁଜୁ ହୋଇଥିଲା । ଅଭିଯୁକ୍ତର ୪ଟି ହ୍ବାଟ୍ସଆପ୍ ଆକାଉଣ୍ଟ ରହିଛି । ସେସବୁର ତଥ୍ୟ ମାଗିଥିଲା ପୋଲିସ । ହେଲେ ତଥ୍ୟ ଦେବା ବଦଳରେ ହ୍ବାଟ୍ସଆପ୍ ସ୍ପଷ୍ଟୀକରଣ ମାଗିଥିଲା ।
କାହିଁକି ସୂଚନା ଦରକାର, ତାହା ଦର୍ଶାଇ ଦ୍ଵିତୀୟ ଥର ନୋଟିସ୍ କରିଥିଲା ଗୁରୁଗ୍ରାମ ପୋଲିସ । ଏହା ସତ୍ତ୍ଵେ ଏଣ୍ଡ ଟୁ ଏଣ୍ଡ ଏନକ୍ରିପସନ ଓ ପ୍ରାଇଭେସି ପଲିସି ଦର୍ଶାଇ ତଥ୍ୟ ଦେଇ ନଥିଲା ହ୍ବାଟ୍ପଆପ୍ । ଏହା ପରେ ଗୁରୁଗ୍ରାମ ପୋଲିସ ହ୍ବାଟ୍ସଆପ୍ ବିରୋଧରେ ଏତଲା ରୁଜୁ କରିଛି ।
ସଉଦା ପାଇଁ ଯାଇଥିବା ନାବାଳିକାଙ୍କୁ ଉଠାଇ ନେଇ ଦୁଷ୍କର୍ମ, ଅଭିଯୁକ୍ତ ଅଟକ
ଖୋର୍ଦ୍ଧା: ରାଉରକେଲାରେ ଗୋଟିଏ ପରେ ଗୋଟିଏ ନାବାଳିକାଙ୍କୁ ଦୁଷ୍କର୍ମ ଅଭିଯୋଗ ସାରା ରାଜ୍ୟରେ ଆଲୋଡନ ସୃଷ୍ଟି କରିଥିବା ବେଳେ ଖୋର୍ଦ୍ଧାରୁ ଆସିଛି ସମାନ ଅଭିଯୋଗ । ସଉଦା ପାଇଁ ଯାଇଥିବା ଜଣେ ନାବାଳିକାଙ୍କୁ ଅଭିଯୁକ୍ତ ଉଠାଇ ନେଇ ଦୁଷ୍କର୍ମ କରିଥିବା ଅଭିଯୋଗ ହୋଇଛି । ଘଟଣା ଘଟିଛି ଜଟଣୀ ଅଞ୍ଚଳରେ । ଅଭିଯୁକ୍ତକୁ ଅଟକ ରଖି ପୋଲିସ ତଦନ୍ତ କରୁଛି ।
ଅଭିଯୋଗ ଅନୁସାରେ, ଗତକାଲି ରାତିରେ ପୀଡ଼ିତା ଦୋକାନକୁ ସଉଦା ପାଇଁ ଯାଇ ଆଉ ଫେରି ନଥିଲେ । ପରିବାର ଲୋକେ ବହୁ ଖୋଜାଖୋଜି କରିବା ପରେ ନିକଟସ୍ଥ ଏକ ପଥର ଖଣି ପାଖରୁ ଗୁରୁତର ଅବସ୍ଥା ପାଇଥିଲେ ।
ଝିଅକୁ କୁଦିଆରି ଅଞ୍ଚଳର ଶଙ୍କର ବେହେରା ନାମକ ଜଣେ ଯୁବକ ଦୁଷ୍କର୍ମ କରିଥିବା ପରିବାର ଲୋକେ ଥାନାରେ ଅଭିଯୋଗ କରିଥିଲେ । ପୋଲିସ ଶଙ୍କରଙ୍କୁ ଅଟକ ରଖି ପଚରାଉଚରା କରୁଛି । ପୀଡ଼ିତାଙ୍କୁ ଡାକ୍ତରୀ ମାଇନା ପାଇଁ ଭୁବନେଶ୍ୱର ସରକାରୀ ମୁଖ୍ୟ ଚିକିତ୍ସାଳୟକୁ ପଠାଯାଇଥିବା ଜଟଣୀ ପୋଲିସ କହିଛି ।
ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି । ଅଭିଯୁକ୍ତକୁ କଠୋର ଦଣ୍ଡ ନେଇ ବିଭିନ୍ନ ସଂଗଠନ ସହ ସ୍ଥାନୀୟ ଲୋକେ ଦାବି କରିଛନ୍ତି ।
ଦିଲ୍ଲୀ କନଷ୍ଟେବଲଙ୍କ ଉପରେ କାର ଚଢ଼ାଇ ୧୦ ମିଟର ଘୋଷାଡ଼ି ନେଲା ମଦ ବେପାରୀଙ୍କ ଡ୍ରାଇଭର
ନୂଆଦିଲ୍ଲୀ: ଦିଲ୍ଲୀ ପୋଲିସ କନଷ୍ଟେବଲଙ୍କୁ ହତ୍ଯା । କାରକୁ ଅଟକାଇବାକୁ କହିବାରୁ ମଡ଼ାଇ ଦେଇ ଚାଲିଗଲା ମଦ ବେପାରୀର କାର ଡ୍ରାଇଭର । ଦିଲ୍ଲୀ ନାଗଲୋଇ ଅଞ୍ଚଳରେ ଘଟିଛି ଘଟଣା ।
ଗତକାଲି ରାତି ପ୍ରାୟ ୩ଟା ସମୟରେ କାରକୁ ଅଟକାଇବାକୁ କହିଥିଲେ ଡ୍ଯୁଟିରେ ଥିବା କନଷ୍ଟେବଲ ସନ୍ଦୀପ । ତେବେ କାର ଅଟକି ନଥିଲା । ଏହାପରେ ବାଇକରେ ପିଛା କରି ଗାଡିକୁ ସାଇଡ କରିବାକୁ ସିଗନାଲ ଦେଇଥିଲେ ସନ୍ଦୀପ । ହେଲେ ଡ୍ରାଇଭର କାର ନ ଅଟକାଇ ବାଇକକୁ ଧକ୍କା ଦେଇଥିଲା । ଧକ୍କା ଦେବା ପରେ ବାଇକ ସହ ସନ୍ଦୀପଙ୍କୁ ପ୍ରାୟ ୧୦ ମିଟର ଘୋଷାଡ଼ି ନେଇ ଆଉ ଏକ କାରକୁ ଧକ୍କା ଦେଇଥିଲା ମଦ ବେପାପୀଙ୍କ ଡ୍ରାଇଭର । ଏଥିରେ କନଷ୍ଟେବଲଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା ।
ଘଟଣାସ୍ଥଳରୁ ଉଦ୍ଧାର କରି କନଷ୍ଟେବଲ ସନ୍ଦୀପଙ୍କୁ ନିକଟ ହସ୍ପିଟାଲରେ ଭର୍ତ୍ତି କରାଯାଇଥିଲା । ଚିକିତ୍ସାଧୀନ ଅବସ୍ଥାରେ କନଷ୍ଟେବଲଙ୍କ ମୃତ୍ଯୁ ଘଟିଛି । ଦୁର୍ଘଟଣା ଘଟାଇଥିବା କାରକୁ ଜବତ କରି ତନାଘନା ଆରମ୍ଭ କରିଛି ଦିଲ୍ଲୀ ପୋଲିସ । ପ୍ରକୃତରେ ଏହା ଦୁର୍ଘଟଣା ନା ଜାଣିଶୁଣି ଡ୍ରାଇଭର ଜଣକ ମଡ଼ାଇ ଘୋଷାଡ଼ି ନେଇ ହତ୍ଯା କରିଛି ଖୋଳତାଡ଼ କରୁଛି ପୋଲିସ ।