କଟକ: ବୟସ୍କଙ୍କୁ  ଠକିଦେଲା ବିଜେପି ସରକାର । ୩ହଜାର ଟଙ୍କା ଭତ୍ତା ଦେବାକୁ କହି ଠକିଦେଲା ବିଜେପି । ନିର୍ବାଚନ ପୂର୍ବରୁ ଦେଇଥିବା ପ୍ରତିଶୃତି ପାଲଟିଲା ପାଣିରଗାର। ଭୋଟ ସମୟରେ ବଡ଼ବଡ଼ ପ୍ରତିଶୃତି ଦେଇ ସରକାରକୁ ଆସିବା ପରେ ନିଜ ରୁପ ଦେଖାଇଛି ବିଜେପି। ବୟସ୍କ ଲୋକଙ୍କୁ  ଲୋଭ ଦେଖାଇ ଭୋଟ ନେବାପରେ ପ୍ରତାରଣା କରିଛି । ଏକଥା କହୁଛନ୍ତି କଟକ ଜିଲ୍ଲା ମାହାଙ୍ଗା  ଓ ନିଶ୍ଚିନ୍ତକୋଇଲି ଅଞ୍ଚଳର ହିତାଧିକାରୀ। ବାର୍ଦ୍ଧକ୍ଯ ଭତ୍ତା ଓ ବିଧବା ଭତ୍ତା ନାଁ ଶୁଣିଲେ ଖୁସି ହୋଇଯାଆନ୍ତି ବୟସ୍କ ବ୍ଯକ୍ତି। ହେଲେ ନିର୍ବାଚନ ସମୟର ଭତ୍ତା ବଢିବା ନେଇ ସରକାର ଯେଉଁ ଅଶା ଦେଇଥିଲେ ତାହା ଏବେ ମଉଳି ଯାଇଛି ।  ମୁଖ୍ୟମନ୍ତ୍ରୀ ଏବେ କହୁଛନ୍ତି,  ୮୦ ବର୍ଷ ବୟସ୍କଙ୍କୁ  ମିଳିବ ୩ ହଜାର ୫ଶହ ଟଙ୍କା । ତେବେ ପ୍ରଶ୍ନ ଉଠୁଛି- ଓଡିଶାରେ କେତେ ଜଣ ଅଛନ୍ତି ୮୦ବର୍ଷରୁ ଅଧିକ ବ୍ୟକ୍ତି ? ବିଜେପି ସରକାରର ପ୍ରତାରଣା ଲୋକଙ୍କ ମଧ୍ଯରେ ଅସନ୍ତୋଷ ତେଜିବାରେ ଲାଗିଛି । ଆଗକୁ ସମୟ ଆସିଲେ ଏହାର ଜବାଜ ଦେବେ ବୋଲି କହିଛନ୍ତି ହିତାଧିକାରୀ ।

ବୟସ୍କ ବ୍ଯକ୍ତିଙ୍କ ଭତ୍ତା ହିଁ ଏକମାତ୍ର ସାହାରା ପାଲଟିଥାଏ । ହେଲେ ନୂତନ ସରକାରଙ୍କ ଏହି ନିୟମ ସତେ ଯେମିତି ପାଣିର ଗାର ପାଲଟିଛି। ବର୍ତ୍ତମାନ ଯେଉଁ ଭତ୍ତା ମିଳୁଛି ଆଜିକା ସମୟରେ ତାହା ସମୁଦ୍ରକୁ ଶଙ୍ଖେ ଭଳି । ବଜାରରରେ ଚାଉଳଠୁ ଆରମ୍ଭ କରି ପନିପରିବା ସବୁ ଜିନିଷର ଦର ବଢିଛି। ଗରିବ ଅସହାୟ ବୟସ୍କ ଲୋକ ଏହି ଭତ୍ତା ପଇସାରେ ଚଳିବା କଷ୍ଟ ହୋଇପଡୁଛି ।  କେତେବେଳେ ଯେ କାହାର କଣ ହେବ କହିହେବ ନାହିଁ। କାହାର ଆଖିକୁ ଭଲ ଭାବେ ଦେଖାଯାଉନଥିବା ବେଳେ କାହାର କାନକୁ ଭଲ ଭାବେ ଶୁଭୁନାହିଁ । ଏପରିକି କିଏ ସିଧା ହୋଇ ମଧ୍ୟ ଚାଲି ପାରୁନାହାନ୍ତି । ତେଣୁ ମୃତ୍ଯୁ ପୂର୍ବରୁ ସେମାନଙ୍କୁ ବର୍ଦ୍ଧିତ ଭତ୍ତା ଦେବାକୁ ନିବେଦନ କରିଛନ୍ତି ହିତାଧିକାରୀ ।