ନନ୍ଦିଘୋଷ ବ୍ୟୁରୋ: ପୁଣି ଫେଲ୍ ହେଲେ ରୋହିତ-ବିରାଟ । ଭାରତ-ନ୍ଯୁଜିଲାଣ୍ଡ ତୃତୀୟ ଟେଷ୍ଟର ପ୍ରଥମ ଦିନରେ ଉଭୟ ବିଫଳ ହୋଇଛନ୍ତି । କ୍ଯାପଟେନ ରୋହିତ ଶର୍ମା ୧୮ ରନ କରି ପାଭିଲିଅନ ଫେରିଥିବାବେଳେ ବିରାଟ ମାତ୍ର ୪ ରନ କରିବାକୁ ସକ୍ଷମ ହୋଇଛନ୍ତି । ଗତକାଲି ପ୍ରଥମ ଦିନର ଖେଳ ଶେଷ ସୁଦ୍ଧା ଭାରତ ୪ ୱିକେଟ ହରାଇ ୮୬ ରନ କରିଛି । ଆଜି ଦ୍ବିତୀୟ ଦିନରେ ଶୁଭମନ ଗିଲ ଓ ପନ୍ତ ବ୍ଯାଟିଂ କରିବେ । ମୁମ୍ବାଇର ୱାଙ୍ଖଡେ ଷ୍ଟାଡିୟମରେ ଗତକାଲି ପ୍ରଥମ ଦିନରେ ମୋଟ ୧୪ଟି ୱିକେଟ ଖସିଥିଲା । ନ୍ୟୁଜିଲାଣ୍ଡକୁ ୨୩୫ ରନରେ ଅଲଆଉଟ କରିଥିଲା ଭାରତ । ଡାରିଲ ମିଚେଲ ସର୍ବାଧିକ ୮୨ ରନ୍ କରିଥିବାବେଳେ ୱିଲ ୟଙ୍ଗ ୭୧ ରନ କରିଥିଲେ । ରବିନ୍ଦ୍ର ଜାଡେଜା ୫ ୱିକେଟ୍ ନେଇଥିବା ବେଳେ ୱାଶିଂଟନ୍ ସୁନ୍ଦର ୪ ୱିକେଟ୍ ନେଇଥିଲେ । ଏହା ସହିତ ଆକାଶଦୀପ ଗୋଟିଏ ୱିକେଟ ନେଇଥିଲେ । ପ୍ରଥମ ଇନିଂସରେ ଭାରତୀୟ ଦଳକୁ ପ୍ରଥମ ଝଟକା ସପ୍ତମ ଓଭରରେ ଲାଗିଥିଲା । ଏହାପରେ ନିମିତ ଭାବେ ୱିକେଟ ପଡ଼ିବା ସହ ଭାରତ ଦ୍ବିତୀୟ ଦିନ ଶେଷସୁଦ୍ଧା ୮୬ ରନ କରିଥିଲା ।
ସ୍ତ୍ରୀକୁ ହତ୍ୟା କରିବା ପରେ ଦଉଡ଼ି ଲଗାଇ ସ୍ବାମୀଙ୍କ ଆତ୍ମହତ୍ୟା
ଭଟଲି: ବରଗଡ଼ ଜିଲ୍ଲା ଭଟଲି ବ୍ଲକ୍ କୁସନପୁରୀ ବିଜୟା ଛକ ନିକଟରେ ଅଭାବନୀୟ ଘଟଣା । ସ୍ତ୍ରୀଙ୍କୁ ହତ୍ୟା କରିବା ପରେ ବେକରେ ଦଉଡ଼ଇ ଲଗାଇ ସ୍ବାମୀ ଆତ୍ମହତ୍ୟା କରିଥିବା ଅଭିଯୋଗ । ମୃତକ ହେଲେ କିଶୋର ଭୋଇ ଏବଂ ତାଙ୍କ ପତ୍ନୀ ସୁନୀତା ।
ଖବର ପାଇ ଭଟଲି ଥାନା ଅଧିକାରୀ ବିଭୂତି ଭୂଷଣ ଦଳେଇ ଘଟଣାସ୍ଥଳକୁ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ସାଇଣ୍ଟିଫିକ ଦଳ ଘଟଣାସ୍ଥଳରେ ପହଞ୍ଚି ସରଜମିନ ତଦନ୍ତ କରିଛି । କିଶୋର ସୁନୀତାଙ୍କୁ ଛୁରୀ ଭୁସି ହତ୍ୟା କରିବା ପରେ ଆତ୍ମହତ୍ୟା କରିଥିବା ଅନୁମାନ କରାଯାଉଛି । ଏନେଇ ଭଟଲି ଥାନାରେ ଏକ ମାମଲା ରୁଜୁ କରାଯାଇ ଶବ ଜବତ କରି ବ୍ୟବଚ୍ଛେଦ ପାଇଁ ପଠାଯାଇଛି ।
ବାଣ ନିଆଁରେ ପୋଡ଼ି ହୋଇ ୩ ଶିଶୁ ମୃତ
କୋଲକାତା: ପଶ୍ଚିମବଙ୍ଗର ହାୱାଡା ଅନ୍ତର୍ଗତ ଉଲୁବେଡି଼ଆରେ ଅଘଟଣ । ବାଣ ନିଆଁରେ ଚାଲିଗଲା ୩ ଶିଶୁଙ୍କ ଜୀବନ । ଉଲୁବେଡ଼ିଆ ପୌର ପରିଷଦ ଅନ୍ତର୍ଗତ ୨୯ ନମ୍ୱର ୱାର୍ଡସ୍ଥିତ ରାଣୀତାଲାରେ ବାଣ ଫୁଟାଇବା ବେଳେ ଏକ ଘରେ ନିଆଁ ଲାଗିଯାଇଥିଲା । ଅଗ୍ନିକାଣ୍ଡରେ ସେହି ଘରେ ଥିବା ୩ ଜଣ ଶିଶୁ ଜୀବନ୍ତ ଦଗ୍ଧ ହୋଇଯାଇଥିଲେ ।
ଖବର ପାଇ ପୋଲିସ ଓ ଦମକଳ ବାହିନୀ ପହଞ୍ଚି ନିଆଁ ଲିଭାଇଥିଲେ । ମୃତକମାନେ ହେଲେ ୧୧ ବର୍ଷ ବୟସ୍କ ଶ୍ରାବନ୍ତିକା ମିସ୍ତ୍ରୀ, ୨ ବର୍ଷର ଇଶାନ ଧାରା ଓ ମମତାଜ ଖାତୁନ । ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
ହରିୟାଣା ପରାଜୟକୁ ଗ୍ରହଣ କରିପାରୁନି କଂଗ୍ରେସ, ନିର୍ବାଚନ କର୍ତ୍ତୃପକ୍ଷଙ୍କ ବିରୋଧରେ ଆଇନଗତ ପଦକ୍ଷେପ ନେବାକୁ ଧମକ
ନୂଆଦିଲ୍ଲୀ: ହରିୟାଣା ନିର୍ବାଚନକୁ ନେଇ ନିର୍ବାଚନ କର୍ତ୍ତୃପକ୍ଷଙ୍କୁ ନାଲି ଆଖି ଦେଖାଇଛି କଂଗ୍ରେସ । ନିର୍ବାଚନରେ ପରାଜୟକୁ କଂଗ୍ରେସ ସହଜରେ ଗ୍ରହଣ କରିପାରୁନାହିଁ । ଶୁକ୍ରବାର ହରିୟାଣା ବିଧାନସଭା ନିର୍ବାଚନ ସମ୍ପର୍କରେ ଦଳର ଅଭିଯୋଗକୁ ନେଇ ପ୍ରତିକ୍ରିୟା ପ୍ରକାଶ କରିଛି । ନିର୍ବାଚନ କର୍ତ୍ତୃପକ୍ଷଙ୍କ ବିରୋଧରେ ଆଇନଗତ ପଦକ୍ଷେପ ନେବାକୁ ଧମକ ଦେଇଛି କଂଗ୍ରେସ ।
ଏହାସହ ଦଳ କହିଛି, ଏହା କୌଣସି ଆଶର୍ଯ୍ୟର କଥା ନୁହେଁ, ଅଭିଯୋଗକୁ ଯାଞ୍ଚ କରି ନିର୍ବାଚନ କର୍ତ୍ତୃପକ୍ଷ ନିଜକୁ କ୍ଲିନ୍ ଚିଟ୍ ଦେଇଛନ୍ତି । ଏହାସହ ନିର୍ବାଚନ କର୍ତ୍ତୃପକ୍ଷଙ୍କ ଉତ୍ତର ମଧ୍ୟ ଅତ୍ୟନ୍ତ ନିନ୍ଦନୀୟ ବୋଲି କଂଗ୍ରେସ କହିଛି । ହରିୟାଣା ନିର୍ବାଚନରେ ଅନୀୟମିତତା ଅଭିଯୋଗ ଆଣି ନିର୍ବାଚନ କମିଶନ କଂଗ୍ରେସ ଚିଠି ଲେଖିଥିଲା ।
କଂଗ୍ରେସର ଅଭିଯୋଗକୁ ନିର୍ବାଚନ କର୍ତ୍ତୃପକ୍ଷ ମଙ୍ଗଳବାର ଭିତ୍ତିହୀନ କହି ଖାରଜ କରିଦେଇଥିଲେ । ନିର୍ବାଚନ ଆୟୋଗ କଂଗ୍ରେସକୁ ନିର୍ବାଚନ ପରେ ଭିତ୍ତିହୀନ ଅଭିଯୋଗ ନକରିବାକୁ ପରାମର୍ଶ ଦେଇଥିଲେ । ହରିୟାଣା ନିର୍ବାଚନରେ କଂଗ୍ରେସ ପରାଜୟର ସାମ୍ନା କରୁଥିବା ବେଳେ ଭିତ୍ତିହୀନ ଅଭିଯୋଗ କରିଥିବାରୁ ନିର୍ବାଚନ ଆୟୋଗ ଦଳକୁ ସମାଲୋଚନା କରିଥିଲେ । ଏପରି ଦାୟିତ୍ୱହୀନ ଅଭିଯୋଗ ଜନସାଧାରଣଙ୍କ ମଧ୍ୟରେ ଅଶାନ୍ତି ଓ ଅରାଜକତା ସୃଷ୍ଟି କରିପାରେ ବୋଲି ଆୟୋଗ କହିଥିଲେ ।
ଦୁଇ ଶିଶୁଙ୍କୁ ବଳି ଅଭିଯୋଗ, ମନ୍ଦିର ନିକଟରୁ ଶବ ଉଦ୍ଧାର
ଲକ୍ଷ୍ନୌ: ଉତ୍ତରପ୍ରଦେଶରେ ୨ ଶିଶୁଙ୍କୁ ବଳି ସନ୍ଦେହ । ଦେବବନ୍ଦରେ ୨ ଜଣ ଶିଶୁଙ୍କ ଶବଠାବ ହେବା ପରେ ଘଟଣାକୁ ନେଇ ତୀବ୍ର ଉତ୍ତେଜନା । ଶହ ଶହ ଲୋକଙ୍କ ବିକ୍ଷୋଭ । ପରିବାର ଲୋକେ କହିଲେ, ତନ୍ତ୍ର ସାଧନା ପାଇଁ ପିଲାଙ୍କୁ ଦିଆଯାଇଛି ବଳି ।
ଦେବବନ୍ଦ ଅନ୍ତର୍ଗତ ଭାୟଲ ଗ୍ରାମରେ ୧୧ ବର୍ଷ ବୟସ୍କ ଦେବ ଓ ୯ ବର୍ଷ ବୟସ୍କ ମାହୀଙ୍କ ଶବ ସ୍ଥାନୀୟ ଏକ ମନ୍ଦିର ନିକଟରୁ ମିଳିବା ପରେ ତନ୍ତ୍ର ସାଧନା କାରଣରୁ ସେମାନଙ୍କୁ ବଳି ଦିଆଯାଇଥିବା ଅଭିଯୋଗ ହୋଇଛି । ଗତକାଲି ଦୁଇ ଶିଶୁ ବିଳମ୍ବିତ ରାତି ପର୍ଯ୍ୟନ୍ତ ଘରକୁ ଫେରି ନଥିଲେ । ବହୁ ଖୋଜାଖଷାଜି କରିବା ପରେ ମନ୍ଦିର ନିକଟରୁ ସେମାନଙ୍କ ପରିବାର ଲୋକେ ସେମାନଙ୍କ ମୃତଦେହ ଦେଖିବାକୁ ପାଇଥିଲେ ।
ଦୁଇ ଶିଶୁଙ୍କ ହାଡ ଭାଙ୍ଗିଥିବାରୁ ଦୁର୍ଘଟଣାରେ ସେମାନଙ୍କ ମୃତ୍ଯୁ ଘଟିଥିବା ପୋଲିସ ସନ୍ଦେହ କରିଛି । ଘଟଣାର ଯାଞ୍ଚ କରୁଛନ୍ତି ଏସପି ସାଗର ଜୈନ ।
ଶ୍ରୀ ଶ୍ରୀ ରବିଶଙ୍କରଙ୍କୁ ସର୍ବୋଚ୍ଚ ବେସାମରିକ ସମ୍ମାନରେ ସମ୍ମାନିତ କଲା ଗଣରାଜ୍ୟ ଫିଜି
ବେଙ୍ଗାଲୁରୁ: ଗୁରୁଦେବ ଶ୍ରୀ ଶ୍ରୀ ରବି ଶଙ୍କରଙ୍କୁ ସର୍ବୋଚ୍ଚ ବେସାମରିକ ସମ୍ମାନରେ ସମ୍ମାନିତ କରିଛି ଫିଜି । ଭିନ୍ନ ଭିନ୍ନ ସମ୍ପ୍ରଦାୟକୁ ଏକତ୍ରିତ କରି, ଶାନ୍ତି ଓ ସୁସଙ୍ଗତୀ କରିବାରେ ଯୋଗଦାନ ଲାଗି ତାଙ୍କୁ ଏହି ସମ୍ମାନରେ ସମ୍ମାନିତ କରାଯାଇଛି ।
ଫିଜି ସାଧାରଣତନ୍ତ୍ରର ରାଷ୍ଟ୍ରପତି ଏଚ.ଇ. ରାତୁ ବିଲିଆମେ ଏମ. କଟୋନିଭେରେ ‘ଓନରାରୀ ଅଫିସର ଅଫ ଦି ଅଡର ଅଫ ଫିଜି’ ଗୁରୁଦେବଙ୍କୁ ପ୍ରଦାନ କରିଛନ୍ତି ।
ଫିଜି ଭ୍ରମଣ ବେଳେ ଗୁରୁଦେବ ରାଜ୍ୟର ଉଚ୍ଚ ପଦସ୍ଥ କର୍ମଚାରୀଙ୍କୁ ସାକ୍ଷାତ କରିଥିଲେ । ଫିଜିର ଉପ ପ୍ରଧାନମନ୍ତ୍ରୀ ବିଲିଆମେ ଗଭୋକା ଏବଂ ମି. ଦିର୍କ ବାଗେନାର, ୟୁଏନ ନିବାସୀ ସମନ୍ୱୟକାରୀ ଫିଜିଙ୍କ ସହ ବାର୍ତ୍ତା ଆଦାନ ପ୍ରଦାନ କରିଥିଲେ । ନେତାମାନେ ଆର୍ଟ ଅଫ ଲିଭିଂ କିପରି ଦ୍ବୀପରେ ଯୁବା ସଶସ୍ତିକରଣ, ସ୍ଥାନୀୟ ସମ୍ପ୍ରଦାୟ ଲୋକଙ୍କ ମାନସିକ ସ୍ୱାସ୍ଥ୍ୟରେ ଅପରିବର୍ତ୍ତନୀୟ ଆୟୁର୍ବେଦ ଜ୍ଞାନ ବିଷୟରେ ଆଲୋଚନା କରିଥିଲେ ।
ନବୀନଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ ଉଦ୍ଯମ କରୁଛି ବିଜେପି ସରକାର
ଭୁବନେଶ୍ବର: ନବୀନଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ ଉଦ୍ଯମ କରୁଛି ବିଜେପି ସରକାର । ଏଥିପାଇଁ ନବୀନଙ୍କ ସୁରକ୍ଷା ବ୍ଯବସ୍ଥାକୁ କମାଇ ଦିଆଯାଇଥିବା ନେଇ ସଙ୍ଗୀନ ଅଭିଯୋଗ କରିଛି ବିଜେଡି । ବିଜେଡି ମୁଖପାତ୍ର ଅମର ପଟ୍ଟନାୟକ କହିଛନ୍ତି, ନବୀନ କେବଳ ବିରୋଧୀ ଦଳ ନେତା ନୁହଁନ୍ତି, ସେ ୨୪ ବର୍ଷ ଧରି ଓଡ଼ିଶାର ମୁଖ୍ଯମନ୍ତ୍ରୀ ରହିଥିଲେ । ଦେଶର ଦ୍ବିତୀୟ ସର୍ବାଧିକ ସମୟ ମୁଖ୍ଯମନ୍ତ୍ରୀ ଦାୟିତ୍ବ ତୁଲାଇଥିବା ନେତା ହେଉଛନ୍ତି ନବୀନ । ଓଡ଼ିଶାବାସୀ ତାଙ୍କୁ ସବୁବେଳେ ଭଲ ପାଉଛନ୍ତି ଆଉ ଆଗକୁ ମଧ୍ଯ ପାଇବେ । ବିକାଶମୂଳକ କାମ ପାଇଁ ନବୀନଙ୍କୁ ଓଡ଼ିଶାବାସୀ ହୃଦୟରେ ବସାଇଛନ୍ତି । ହେଲେ ବିଜେପି ସରକାର ନବୀନଙ୍କ ସୁରକ୍ଷା କମାଇ ଦେବା ସହ ତାଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ ଉଦ୍ୟମ କରୁଛି । ସୁରକ୍ଷା ହଟାଇବା ଆଇନତଃ ରାଜ୍ୟ ସରକାରଙ୍କ କ୍ଷମତା ପରିସରଭୁକ୍ତ । କିନ୍ତୁ ନବୀନଙ୍କ ଭାବମୂର୍ତ୍ତିକୁ କ୍ଷୁର୍ଣ୍ଣ କରିବାକୁ ଉଦ୍ୟମ କଲେ ରାଜ୍ୟବାସୀ କେବେ ବି କ୍ଷମା ଦେବେନାହିଁ ବୋଲି ଅମର କହିଛନ୍ତି ।
ଦୁଇ ପ୍ରେମିକା ସହ ମିଶି ସ୍ତ୍ରୀକୁ ହତ୍ୟା ଘଟଣା, ରିମାଣ୍ଡରେ ଯିବ ଜହ୍ଲାଦ ସ୍ବାମୀ
ଭୁବନେଶ୍ବର: ରାଜଧାନୀ ଭୁବନେଶ୍ବରରେ ଦୁଇ ପ୍ରେମିକା ସହ ମିଶି ସ୍ତ୍ରୀଙ୍କୁ ଆନାସ୍ଥେସିଆ ଦେଇ ହତ୍ୟା ଘଟଣା । ରିମାଣ୍ଡରେ ଆସିବ ଜହ୍ଲାଦ ସ୍ୱାମୀ ପ୍ରଦ୍ୟୁମ୍ନ । ୩ ଦିନିଆ ରିମାଣ୍ଡ ପାଇଁ କୋର୍ଟରେ ଆବେଦନ କରିଛି କମିଶନରେଟ ପୋଲିସ୍ । ରିମାଣ୍ଡ ବେଳେ ଅଭିଯୁକ୍ତକୁ ନେଇ ହତ୍ୟା କରାଯାଇଥିବା ଘରେ କ୍ରାଇମସିନ ରିକ୍ରିଏସନ କରିବ ପୋଲିସ । ସେପଟେ ହତ୍ୟାରେ ବ୍ୟବହୃତ ସିରିଞ୍ଜ ଓ ଆନାସ୍ଥେସିଆ ମେଡିସିନ ଯାଞ୍ଚ ପାଇଁ ରାଜ୍ୟ ଫରେନସିକ ଲ୍ୟବକୁ ପଠାଯାଇଛି ।
ଡେମୋ ଦେଖାଇବ ପତ୍ନୀହନ୍ତା ସ୍ବାମୀ । ସାଁପୁର ଘରେ କେମିତି ଦେଇଥିଲା ଇଞ୍ଜେକସନ୍ । କ’ଣ ଥିଲା ୨୮ ତାରିଖ ଅପରାହ୍ନ ୨ ଟାର ଘଟଣା । ସିସିଟିଭରେ ରହିଛି ନାଟକର ମୁଖ୍ୟ ଅଂଶ । ଅଭିଯୁକ୍ତ ରୋଜିପାତ୍ର ରୁମକୁ କିଏ କିଏ ଆସିଥିଲେ । ରାଜଧାନୀରେ ଦୁଇ ପ୍ରେମିକା ସହ ମିଶି ସ୍ତ୍ରୀଙ୍କୁ ଇଞ୍ଜେକ୍ସନ ଦେଇ ହତ୍ୟା କରିବା ଘଟଣାରେ ରିମାଣ୍ଡରେ ଆସିବ ସ୍ୱାମୀ ପ୍ରଦ୍ୟୁମ୍ନ । ୩ ଦିନିଆ ରିମାଣ୍ଡ ପାଇଁ କୋର୍ଟରେ ଆବେଦନ କରିଛି କମିଶନରେଟ୍ ପୋଲିସ । ରିମାଣ୍ଡ ବେଳେ ଅଭିଯୁକ୍ତ ପ୍ରଦ୍ୟୁମ୍ନକୁ ନେଇ ହତ୍ୟା କରାଯାଇଥିବା ଘରେ କ୍ରାଇମସିନ ରିକ୍ରିଏସନ କରିବା ସହ ଆନେସ୍ଥେସିଆ ଇଞ୍ଜେକସନ୍ କେଉଁଠୁ ଆଣିଥିଲେ ସେ ନେଇ ଖୋଳତାଡ ହେବ ।
ହତ୍ୟାରେ ବ୍ୟବହୃତ ସିରିଞ୍ଜ ଓ ଅନାସ୍ଥେସିଆ ମେଡିସିନିକୁ ରାଜ୍ୟ ଫରେନସିକ ଲ୍ୟାବ୍କୁ ପଠାଇଛି ତଦନ୍ତକାରୀ ଟିମ୍ । ସିରିଞ୍ଜରେ କେତେ ଜଣଙ୍କର ଫିଙ୍ଗର ପ୍ରିଣ୍ଟ ରହିଛି ଓ ଆନାସ୍ଥେସିଆ ମେଡିସିନରେ ଆଉ କିଛି ବିଷ ମିଶା ଯାଇଥିଲା କି ନାହିଁ, ସେ ସବୁର ତଥ୍ୟ ମିଳିବ । ସେପଟେ ଆନେସ୍ଥେସିଆ ନେଇ ବରିଷ୍ଠ ଡାକ୍ତର ସୂର୍ଯ୍ୟପ୍ରକାଶ ଚୌଧୁରୀ କହିଛନ୍ତି, ଅପରେସନ ସମୟରେ ରୋଗୀମାନଙ୍କୁ ବିଭିନ୍ନ ପ୍ରକାର ଆନେସ୍ଥେସିଆ ଦିଆଯାଏ । ସାଧାରଣ ରୋଗୀକୁ କିଲୋଗ୍ରାମ ପିଛା ୧ ଦଶମିକ ୫ ମିଲିଗ୍ରାମ୍ ଡୋଜ ଦିଆଯାଏ । ସର୍ବାଧିକ ୧୫୦ ମିଲିଗ୍ରାମ୍ ଆନେସ୍ଥେସିଆ ଦେଲେ ରୋଗୀ ସହ୍ୟ କରିପାରିବ । ତଥାପି କିଛି କେସରେ ରୋଗୀମାନଙ୍କୁ ହାର୍ଟଟାଟାକ୍, ବିପି ହାଇ ଭଳି ସମସ୍ୟା ଦେଖାଯାଏ । କିନ୍ତୁ ଏହି ନିର୍ଦ୍ଦିଷ୍ଟ ମାମଲାରେ ହୁଏତ ଆନେସ୍ଥେସିଆ ସହ ଅନ୍ୟ କିଛି ମାରାତ୍ମକ ଡ୍ରଗ୍ସ ମିଶିଥିବା ଆଶଙ୍କା କରାଯାଉଛି । ଏପରିକି ୧୫୦ ମିଲିଗ୍ରାମରୁ ଅଧିକ ଡୋଜର ଆନେସ୍ଥେସିଆ ଦେଲେ ଜଣେ ମାତ୍ର ୫ ମିନିଟ ବଞ୍ଚିପାରିବ ।
ଗତ ୨୮ ତାରିଖ ଦିନ ପତ୍ନୀ ଶୁଭଶ୍ରୀଙ୍କୁ ଇଞ୍ଜେକ୍ସନ ଦେଇ ହତ୍ୟା କରିଥିଲା ସ୍ୱାମୀ ପ୍ରଦ୍ୟୁମ୍ନ । ହତ୍ୟା ପାଇଁ ସହଯୋଗ କରିଥିଲେ ତାଙ୍କ ଦୁଇ ପ୍ରେମିକା ରୋଜି ଏବଂ ଏଜିତା । ଶୁଭଶ୍ରୀଙ୍କ ମୃତ୍ୟୁ ପରେ ଆତ୍ମହତ୍ୟା ରୂପ ଦେବାକୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ । ପରେ ପୋଲିସ ହତ୍ୟାକାଣ୍ଡ ଉପରୁ ପରଦା ହଟାଇବା ସହ ୩ ଜଣଙ୍କୁ ଗିରଫ କରିଛି ପୋଲିସ ।
ଚାଷୀଙ୍କୁ ବିଜେପି ସରକାରର ଧୋକା, ଭୁଆଁ ବୁଲାବାକୁ କରୁଛନ୍ତି ଚେଷ୍ଟା
ଭୁବନେଶ୍ବର: ସମସ୍ତଙ୍କ ମୁହଁରେ ଆହାର ଦେଉଥିବା ଚାଷୀଙ୍କୁ ବିଜେପି ସରକାରର ଧୋକା । କ୍ଵିଣ୍ଟାଲ ପିଛା ୩୧ ଶହ ଟଙ୍କାରେ ଧାନ କିଣିବାର ଲୋଭ ଦେଖାଇ ଭୋଟ ହାତେଇଛି ବିଜେପି । ଧାନର ସର୍ବନିମ୍ନ ସହାୟକ ମୂଲ୍ୟ କ୍ଵିଣ୍ଟାଲ ପିଛା ୨୩୦୦ ଟଙ୍କା ହୋଇଥିବା ବେଳେ ରାଜ୍ୟ ସରକାର ୩୧ ଶହ ଟଙ୍କା ଦେବ କେମିତି । ବୋନସ ଆକାରରେ ବାକି ୮ ଶହ ଟଙ୍କା ଦେବା କଥା କୁହାଯାଉଛି । କିନ୍ତୁ କେନ୍ଦ୍ର ଏଥିପାଇଁ ଅନୁମତି ଦେବ କି ବୋଲି ଉଠିଛି ପ୍ରଶ୍ନ । କାରଣ ଏମଏସପି ଉପରେ ବୋନସ ଦେବାକୁ ବାରଣ କରୁଛି କେନ୍ଦ୍ର । ତା’ହେଲେ ରାଜ୍ୟ ସରକାର କେମିତି ଦେବ ୩୧ ଶହ ଟଙ୍କା । ଚାଷୀଙ୍କୁ ଏହା ଧୋକା ବୋଲି ଅଭିଯୋଗ ହୋଇଛି ।
ରାଜ୍ୟର ଚାଷୀଙ୍କୁ ଭୁଆଁ ବୁଲାବାକୁ ଚେଷ୍ଟା କରୁଛନ୍ତି କି ରାଜ୍ୟ ସରକାର । ଧାନ କିଣ୍ଟାଲ ପିଛା ୩୧ ଶହ ଟଙ୍କାରେ କିଣିବୁ କହି ବିଜେପି ଚାଷୀଙ୍କ ଭୋଟ ତ ନେଲା । ହେଲେ ଏବେ ୩୧ ଶହ ଟଙ୍କା କିଏ ଦେବ ଓ କେମିତି ଦେବ ? କେନ୍ଦ୍ର ସରକାର ଧାନର ସର୍ବନିମ୍ନ ସହାୟକ ମୂଲ୍ୟ ୨୩ ଶହ ଟଙ୍କା ସ୍ଥିର କରିଛନ୍ତି । ବାକି ୮ ଶହ କିଏ ଦେବ, ରାଜ୍ୟ ସରକାର ନା କେନ୍ଦ୍ର ସରକାର । ଯେହେତୁ ସର୍ବନିମ୍ନ ସହାୟକ ମୂଲ୍ୟ କେନ୍ଦ୍ର ସରକାର ସ୍ଥିର କରନ୍ତି, ରାଜ୍ୟ ସରକାର ତାକୁ ନିଜେ ବୃଦ୍ଧି କରିପାରିବେ ନାହିଁ କିମ୍ଵା ନିଜେ ବର୍ଦ୍ଧିତ ମୂଲ୍ୟ ଦେଇପାରିବେ ନାହିଁ । କେନ୍ଦ୍ର ସରକାର ବି ତ ଏମଏସପି ବୃଦ୍ଧି କରି ନାହାନ୍ତି । ତେବେ ଓଡ଼ିଶାର ଚାଷୀ କେମିତି ପାଇବ ୩୧ ଶହ ଟଙ୍କା ।
କୁହାଯାଉଛି, ରାଜ୍ୟ ସରକାର ବୋନସ୍ ଭାବେ ବାକି ୮ ଶହ ଟଙ୍କା ଦେବେ । କିନ୍ତୁ ଏଥିପାଇଁ କେନ୍ଦ୍ର ସରକାର ଅନୁମତି ଦେବେ କି ବୋଲି ପ୍ରଶ୍ନ କରିଛନ୍ତି ବରିଷ୍ଠ ବିଜେଡି ବିଧାୟକ ପ୍ରସନ୍ନ ଆଚାର୍ଯ୍ୟ । ତାଙ୍କ କହିବା ଅନୁସାରେ ଏମଏସପି ଉପରେ ବୋନସ୍ ଦେବାକୁ ଆଗରୁ ହିଁ ବାରଣ କରିଆସୁଛନ୍ତି କେନ୍ଦ୍ର ସରକାର । ଏବେ ରାଜ୍ୟର ବିଜେପି ସରକାର କେମିତି ବୋନସ ଦେବ । ବରଂ ଚାଷୀଙ୍କୁ ଭୁଆଁ ନ ବୁଲାଇ କେନ୍ଦ୍ର ସରକାର ସ୍ଵାମୀନାଥନ କମିଟି ରିପୋର୍ଟ ଲାଗୁ କରନ୍ତୁ, ଧାନର ଏମଏସପି ବୃଦ୍ଧି କରନ୍ତୁ ବୋଲି ଦାବି କରିଛନ୍ତି ପ୍ରସନ୍ନ ଆଚାର୍ଯ୍ୟ । ଏଥିପାଇଁ ରାଜ୍ୟର ବିଜେପି ସରକାର କେନ୍ଦ୍ର ନିକଟରେ ଦାବି କରନ୍ତୁ ବୋଲି ସେ କହିଛନ୍ତି ।
ଏମଏସପି ଉପରେ ବୋନସ୍ ଦେବାକୁ କେନ୍ଦ୍ର ବାରଣ କରିଥିବାରୁ ୨୦୧୩-୧୪ରେ ନବୀନ ସରକାର ସ୍ଵତନ୍ତ୍ର ମରୁଡ଼ି ସହାୟତା ଭାବେ କ୍ଵିଣ୍ଟାଲ ପିଛା ଶହେ ଟଙ୍କା ଲେଖାଏଁ ଦେବାକୁ ନିଷ୍ପତ୍ତି ନେଇଥିଲେ । ୨୦୧୫ ସୋହେଲା ସମାବେଶରେ ଏହା ଘୋଷଣା କରିଥିଲେ ସେତେବେଳର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଶହେ କ୍ଵିଣ୍ଟାଲରୁ କମ୍ ଧାନ ବିକିଥିବା ଚାଷୀଙ୍କୁ ଏହି ସହାୟତା ମିଳିଥିଲା । ନିଜ ପ୍ରତିଶ୍ରୁତି ଅକ୍ଷରେ ଅକ୍ଷରେ ପାଳନ କରିଥିଲେ ନବୀନ ପଟ୍ଟନାୟକ । କେବଳ ବରଗଡ଼ ଜିଲ୍ଲାରେ ୪୫୫ କୋଟି ଟଙ୍କା ଚାଷୀଙ୍କୁ ଏହି ସ୍ଵତନ୍ତ୍ର ମରୁଡ଼ି ସହାୟତା ଦିଆଯାଇଥିଲା । ହଜାର ହଜାର ଚାଷୀ ଏହା ପାଇଛନ୍ତି । ଚାଷୀମାନେ ଓ ଯୋଗାଣ ଅଧିକାରୀ ବି ଏହା ସ୍ଵୀକାର କରିଛନ୍ତି ।
ଆଉ କିଛି ଦିନ ପରେ ଅମଳ ହେବ ଖରିଫ ଧାନ । ତା’ ପରେ ପରେ ଧାନ କିଣା ବି ଆରମ୍ଭ ହୋଇଯିବ । ସେତେବେଳେ ସତରେ ଚାଷୀଙ୍କୁ ଧାନ କ୍ଵିଣ୍ଟାଲ ପିଛା ୩୧ ଶହ ଟଙ୍କା ମିଳିବ ତ । ନା ଭୋଟ ହାତେଇବା ପରେ କିଛି ନା କିଛି ତଞ୍ଚକତା କରି ଚାଷୀଙ୍କୁ ଭୁଆଁ ବୁଲେଇ ଦେବ ରାଜ୍ୟର ବିଜେପି ସରକାର ।
ହେବନି ଅଧିକ ଶୀତ, ଦିଲ୍ଲୀ ଦଶା ଭୋଗିବ ଓଡ଼ିଶା !
ଭୁବନେଶ୍ବର: ବର୍ଷା, ବାତ୍ଯା ସତ୍ତ୍ବେ ଶୀତ ଆସିବନି । ଲା-ନିନା ଆସିବାରେ ବିଳମ୍ବ ଯୋଗୁଁ ଏବର୍ଷ ଓଡ଼ିଶାରେ ଶୀତ କମ୍ ହେବ । ନଭେମ୍ବର, ଡିସେମ୍ବର ଓ ଜାନୁଆରୀ ମାସରେ ତାପମାତ୍ରାରେ ହ୍ରାସ ହେବନି । ହିମାଳୟ ପଟୁ ଓଡ଼ିଶାକୁ କମ ପବନ ବହିବ । ଏପରି ପୂର୍ବାନୁମାନ କରିଛନ୍ତି ପାଣିପାଗ ବିଜ୍ଞାନୀ । ସେପଟେ ଭାରତୀୟ ପାଣିପାଗ ରିପୋର୍ଟ ଅନୁସାରେ ୧୯୫୧ ପରେ ଚଳିତବର୍ଷ ଅକ୍ଟୋବରରେ ଦିଲ୍ଲୀ ସବୁଠୁ ଉତ୍ତପ୍ତ ସହର ସାବ୍ଯସ୍ତ ହୋଇଛି । ଧୀରେ ଧୀରେ ଦିଲ୍ଲୀ ଦଶା ଓଡ଼ିଶା ଭୋଗି ପାରେ ବୋଲି ଆଶଙ୍କା ପ୍ରକାଶ ପାଇଛି ।
ଶୀତରେ ଥରିବ ମଧ୍ୟ ଭାରତ, ହେଲେ ଓଡ଼ିଶାରେ ହେବନି ଶୀତ । ନଭେମ୍ବର, ଡିସେମ୍ବର ଓ ଜାନୁଆରୀରେ ଓଡ଼ିଶାରେ ତାପମାତ୍ରା ସ୍ବାଭାବିକ ଠାରୁ ଅଧିକ ରହିବ । ଫଳରେ ଏହି ସମୟରେ ଶୀତର ପ୍ରକୋପ କମ୍ ଅନୁଭୁତ ହେବ । ଏପରି ପୂର୍ବାନୁମାନ କରିଛନ୍ତି ବିଶିଷ୍ଟ ପାଣିପାଗ ବିଜ୍ଞାନୀ ସୁରେନ୍ଦ୍ର ନାଥ ପଶୁପାଳକ । ଘନ ଘନ ଲଘୁଚାପ ହେଲା, ବାତ୍ୟା ଯୋଗୁଁ ବର୍ଷିଲା । ଆଶା ଥିଲା ଭଲ ଶୀତ ହେବ । କିନ୍ତୁ ରାଜ୍ୟରେ ସେଭଳି କିଛି ଥଣ୍ଡା ଅନୁଭୁତ ହେବନି ।
ଶୀତ ନହେବାର ୩ଟି କାରଣ
୩ଟି କାରଣ ଯୋଗୁଁ ଓଡ଼ିଶାରେ ଶୀତର ପ୍ରକୋପ ଚଳିତବର୍ଷ ଦେଖିବାକୁ ମିଳିବନି । ସାଧାରଣତଃ ଜୁଲାଇ ପରେ ଲା-ନିନା ଆସିଥାଏ । କିନ୍ତୁ ଅଗଷ୍ଟ, ସେପ୍ଟେମ୍ବର ଓ ଅକ୍ଟୋବର ପରେ ବି ଲା-ନିନା ଆସିନାହିଁ । ଆଶା କରାଯାଉଛି ନଭେମ୍ବରରେ ଆସିପାରେ କିନ୍ତୁ ଶକ୍ତିଶାଳୀ ରହିବନି । ଏହାସହିତ ବହୁତ କମ୍ ସମୟ ପାଇଁ ଓଡ଼ିଶାରେ ରହିବ । ଡିସେମ୍ବର ଓ ଜାନୁଆରୀରେ ବର୍ଷା ହେବା ସମ୍ଭାବନା ରହିଛି । ଫେବ୍ରୁଆରୀ ବେଳକୁ କିଛିଟା ଶୀତ ଅନୁଭୁତ ହେବ । ଏହାସହ ହିମାଳୟ ପଟୁ ଆସୁଥିବା ବାଣିଜ୍ଯିକ ବାୟୁ ବା ଟ୍ରେଡ୍ ଓ୍ବିଣ୍ଡ୍ ପ୍ରବାହିତ ହେବ ଆଶା କମ୍ । ଯାହାଯୋଗୁଁ ତାପମାତ୍ରା କମିବା ପରିବର୍ତ୍ତେ ଜଳବାୟୁ ପରିବର୍ତ୍ତନ ପ୍ରଭାବ ଯୋଗୁଁ ଥଣ୍ଡା କମ୍ ହେବା ନେଇ ଆକଳନ କରାଯାଇଛି ।
ଦିଲ୍ଲୀ ଦଶା ଭୋଗିବ ଓଡ଼ିଶା
ସେପଟେ ଭାରତୀୟ ପାଣିପାଗ ବିଭାଗ ରିପୋର୍ଟ କହୁଛି, ୧୯୫୧ ପରେ ଚଳିତ ଅକ୍ଟୋବରରେ ଦିଲ୍ଲୀ ସବୁଠୁ ଉତ୍ତପ୍ତ ସହର ଭାବେ ଚିହ୍ନଟ ହୋଇଛି । ଏଥର ଓଡ଼ିଶାରେ ମଧ୍ଯ ଅକ୍ଟୋବରରେ ନାହିଁ ନଥିବା ତାତି ଜୀବନକୁ ଅସ୍ତବ୍ଯସ୍ତ କରିଛି । ଦିଲ୍ଲୀ ଦଶା ଓଡ଼ିଶା ଭୋଗିବାକୁ ଯାଉଛି । ଓଡିଶା ଆକାଶରେ ଦିନକୁ ଦିନ ବଢୁଛି ସବୁଜ ଗୃହ ବାଷ୍ପ ପରିମାଣ । ଯାହାଯୋଗୁଁ ଭୂପୃଷ୍ଠର ତାପମାତ୍ରା ନିୟମିତ ଅନ୍ତରରେ ବାୟୁମଣ୍ଡଳକୁ ବିକିରଣ ହେଉନାହିଁ । କଳକାରଖାନା ପ୍ରଦୂଷଣ, ଜୀବାଶ୍ମ ଇନ୍ଧନରେ ଗାଡ଼ି ଚଳାଚଳ ସଂଖ୍ୟା ବଢୁଥିବାରୁ ଏହାର ପ୍ରଭାବ ସମଗ୍ର ଅଞ୍ଚଳରେ ପଡ଼ିବାକୁ ଯାଉଛି । ରାଜଧାନୀ ଭୁବନେଶ୍ବରେ ରାସ୍ତାଘାଟ ସବୁ ଆଡେ କଂକ୍ରିଟ ହେବା ଯୋଗୁଁ ବର୍ଷା ହେଲେ ବି ଭୂତଳକୁ ପାଣି ଯାଉନି । ଏପରିକି ରାସ୍ତା ପାର୍ଶ୍ବରେ ଫେବର ବ୍ଲକ୍ ପଡ଼ିଥିବାରୁ ପାଣି ମାଟି ଭିତରକୁ ପର୍ଯ୍ୟାପ୍ତ ପରିମାଣରେ ଯାଇପାରୁନି । ଏହା ଅତ୍ୟନ୍ତ ବିପଜ୍ଜନକ । ଏଥର ଖାଲି ଓଡ଼ିଶାରେ ଶୀତ କମ୍ ହେବନି ଆନ୍ଧ୍ରପ୍ରଦେଶ, ତାମିଲନାଡୁ ସମେତ ଦକ୍ଷିଣ ଭାରତ ଉପକୂଳ ରାଜ୍ୟଗୁଡ଼ିକ ମଧ୍ୟ ସମାନ ଦଶା ଭୋଗିପାରନ୍ତି ।
ଏଣିକି ଜଳବାୟୁ ପରିବର୍ତ୍ତନ ଯୋଗୁଁ ପ୍ରତିବର୍ଷ ଏକ୍ସଟ୍ରିମ୍ କ୍ଲାଇମେଟ୍ ଦେଖିବାକୁ ମିଳିବ । ପ୍ରତିବର୍ଷ ଅତିବୃଷ୍ଟି, ଅନାବୃଷ୍ଟି, ଘନ ଘନ ଅବପାତ, ବାତ୍ୟା ଦ୍ବାରା ନୂଆ ନୂଆ ଅସ୍ବାଭାବିକ ରେକର୍ଡ ସୃଷ୍ଟି ହେବ ବୋଲି ଆଶଙ୍କା ବ୍ୟକ୍ତ କରିଛନ୍ତି ବୈଜ୍ଞାନିକ ।